ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> ལེཊ་རྩོམ།
 རྩོམ་ཡིག་ཀློག་པ།

ཁ་བ་རི་པའི་ཡུལ་ཁོར་འཚོ་བའི་དགེ་མཚན།

  རྩོམ་པ་པོ:ལྕང་ཡོང་ཁུངས:མཚོ་གཟིགས་གྲངས:1820ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2011/11/26 22:48:48ཚོགས་ཡར་སྤྲོད:admin

ཁ་བ་རི་པ།

ལྕང་ཞབས་པ།


      གཅིག  ཁ་བ་རི་བའི་ཡུལ་གྲོང་།
༡ རི་སུལ་དང་ནི་ཡངས་པའི་ཐང་ཆེན་དུ།
ཁང་བཟང་མཐོ་དམའ་མི་འདྲ་སྣ་ཚོགས་ཤིག
མཎྜ་ཚོམས་བུ་བཀོད་འདྲའི་དག་པའི་ཞིང་།
ཁ་བ་ཅན་གྱི་གྲོང་གི་ཆགས་ཚུལ་ལགས།

༢ གྲོང་དང་གྲོང་གི་བཞེངས་འཛུགས་རྣམ་པ་འདི། 
རང་བྱུང་ཁམས་དང་འཚམས་པའི་འཆམ་མཐུན་གྱིས། 
མིག་ལམ་གཙང་ཞིང་ཡིད་དུ་འོང་པ་ནི། 
སྣོད་བཅུད་མཐུན་པའི་བརྡ་རྟགས་དྭངས་མ་ལགས།

༣ མི་བུའི་འཚོ་རྟེན་ལེགས་པར་གྲུབ་པ་ཡི།
ཁྱིམ་གཞི་དྲོན་མོ་སྐྲུན་བྱེད་ས་རྡོ་ཤིང་།
རྫས་སྦྱོར་མ་འདྲེས་ཁང་ཁྱིམ་གཙང་མ་བཟོས།
ཁ་བ་ཅན་གྱི་གྲོང་གི་བཀོད་པ་ལགས།

༤ ཁྱིམ་གྱི་རྒྱན་ཆ་རྫས་སྦྱོར་འདྲེས་པ་ཡིས།
ནད་ངན་སློང་ནས་མི་བུའི་སྲོག་འཕྲོག་པ།
རྒྱུ་ཆ་དེ་དག་རིང་དུ་དོར་བ་ཡི།
ཁ་བ་ཅན་གྱི་གྲོང་གི་བཀོད་པ་ལགས།  

༥ ལོ་ངོ་བརྒྱ་ཕྲག་ཁུར་གྱིས་ལྗི་ན་ཡང་།
ཁང་རྒན་སེངྒེའི་ཡ་ཁ་འདྲ་བ་ཡང་།
ཚེ་སྲོག་ལྕགས་ཀྱི་སྡོང་པོས་བཟུང་བས་ན།
བག་ཕེབས་ཅི་བདེར་སྤྱོད་པ་ཁ་བ་ཅན།

༦ བགྲང་བྱ་སྟོང་གི་ཁུར་པོ་བཀལ་ན་ཡང་།
གཟི་མདངས་ལྷག་ཏུ་རྒྱས་པ་པོ་ཏ་ལའི།
སྲོག་གི་ཀ་གདུང་གསར་རྙིང་བརྗེ་ན་ཡང་།
ས་རོ་རྡོ་རོ་མ་སོང་བརྗིད་ཆགས་ཅན།

༧ མི་ཕྱུགས་གཉིས་ཀ་བག་ཕེབས་བདེ་བའི་ངང་།
གནས་གཞི་བརྩེགས་མ་ཅན་པོའི་ཁང་ཆེན་གྱི།
རབ་གསལ་ཁ་ནས་ཉི་འདོན་དྲོ་བ་དང་།
གུ་ཡངས་ཅན་འདི་གཞལ་ཡས་ཁང་དང་འདྲ།

༨ མགོ་སྟོང་འགའ་ཡིས་ལྕགས་དང་སྦི་ལ་ཡིས།
ཁ་བའི་ལྗོངས་ན་ཁང་ཆེན་བཟོ་བ་འདི།
ལོ་འགའ་སོང་རྗེས་གཅན་གཟན་ཤི་རོ་བཞིན།
ཤུན་པགས་ཞིག་སྟེ་ཁ་ཆག་སྣ་རལ་གྱུར།

༩ ལོ་ངོ་བརྒྱ་ཕྲག་ཏུའང་གངས་ཀྱི་ཁྲོད།
ཁ་བ་ཅན་གྱི་ཁང་ཆེན་དེ་དག་ནི།
ལྷང་ངེར་འགྱིང་བའི་སྲ་ལ་བརྟན་པ་འདི།
གངས་ཁྲོད་འཚོ་སྡོད་བྱེད་པའི་འབྲོང་རྒོད་འདྲ།

༡༠ གྱང་རྡུང་རྡོ་རྩིག་འགེབ་ས་བླུག་པ་དང་།
དྲ་ཤིང་འཐུ་སོགས་ཁང་ལས་དཀའ་བ་རྣམས།
གྲོང་ཁྱིམ་ཕན་ཚུན་རོགས་རམ་བྱེད་པ་ལས།
གླ་ཆ་མི་དགོས་ཁ་བ་ཅན་གྱི་སྲོལ།

༡༡ ཁང་ཁྱིམ་སོ་སོའི་བར་ཐག་རིང་བ་དང་།
གྲོང་གསེབ་རྟ་ནོར་ལུག་སོགས་རྒྱུ་བ་ལ།
གུ་ཡངས་ཅན་པོ་ཁ་བ་རི་བའི་གྲོང་།
མུ་ཏིག་ཕྲེང་བ་ས་ལ་འཐོར་བ་འདྲ།

༡༢ རྟ་ནོར་ལུག་སོགས་ཇི་ལྟར་མང་ན་ཡང་།
དབྱར་གྱི་རྩྭ་ལྡུམ་ཅི་ཙམ་སྤུངས་ཀྱང་རུང་།
སྟོན་གྱི་ལོ་ཏོག་ཇི་ལྟར་རྩིག་ན་ཡང་།
གུ་ཡངས་ཅན་པོ་ཁ་བ་ཅན་གྱི་ཁྱིམ།

༡༣ ཁྱིམ་ཆས་གོས་སྒམ་འབྲུ་སྒམ་ལྕོག་ཙེ་དང་།
ཐབ་དང་ཟངས་སོགས་སྤྱོད་ཆས་མང་ཡང་རུང་།
ཕ་མ་སྤུན་སྲིང་གཅིག་གྲོགས་གཅིག་བྱས་ཏེ།
བདེ་དགས་མི་ཚེ་སྐྱེལ་བ་གངས་ཅན་པ།

༢༤ ལྕི་ཤིང་འབུད་ཤིང་བ་གམ་བརྩེགས་པ་དང་། 
སྐུ་གསུང་ཐུགས་རྟེན་མཆོད་གཤོམ་བཀོད་ལེགས་པ། 
སྟག་ཁྱི་གཟིག་ཁྱི་སྐོར་རྒྱུག་ཅི་བྱེད་རུང་། 
ཁང་ཆེན་ར་བ་ཅན་པོ་གངས་ཅན་པ།

༡༥ ཕ་མ་སྤུན་སྲིང་མི་སྣ་མང་བ་ཡི།
 ཁང་ཆུང་སྤྱིལ་བུར་བསྟེན་པའི་སློང་མོ་བའང།
ཇི་ཙམ་ཨུ་ཐུག་ཐབས་དང་མི་ལྡན་ནའང་།
སྤྲོ་དགའི་ངང་ནས་མི་ཚེ་བསྐྱལ་བ་ཡིན།

      གཉིས།    ཁ་བ་རི་བའི་ཁོར་ཡུག
༡ མཐོན་མཐིང་མཁའ་ལ་ཆུ་འཛིན་དཀར་པོ་འཁྲིགས།  
ཉི་འོད་གསལ་ལ་ཟླ་འོད་དྭངས་གཙང་ཅན།  
འབགས་བཙོག་མེད་པའི་སྣང་བ་གསལ་བ་བཅས། 
ཁོར་ཡུག་རབ་མཛེས་ཁ་བ་ཅན་གྱི་གནས།

༥ མཁའ་དབྱིངས་ཐང་ལ་བཞག་འདྲའི་སྤང་ལྗོངས་སུ། 
སྲིད་ན་དཀོན་པའི་ཆུ་གཙང་ཡིད་འོང་དག  
གཡུ་འབྲུག་ནུར་འགྲོས་བཞིན་དུ་རྒྱུ་བ་འདི།
ཁ་བ་ཅན་གྱི་རང་བྱུང་གཏེར་ཆུ་ལགས།

༦  ཇོ་བོས་བསྔགས་པའི་ཁ་བ་ཅན་གྱི་ཆུ།
འཛམ་གླིང་ཡིད་སྨོན་ཤོར་སའི་གངས་ཅན་ཆུ།
བཏུང་ན་ཞིམ་ལ་ལུས་ལ་ཕན་པ་ཡི།
རིན་ཆེན་དང་པོ་དེས་ཀྱང་འགྲན་མི་ཕོད།

༧ མཐོ་སྒང་སྟེང་ན་གངས་རི་རྫ་རི་སོགས།
ནགས་རི་ངོས་ན་རི་དྭགས་གཅན་གཟན་སོགས།
བག་ཡངས་རྒྱུ་བའི་ལྟད་མོ་མང་བ་འདི།
ཁ་བ་རི་བའི་རང་བྱུང་སྲོག་ཆགས་གླིང་།

༨ ངོས་མཉམ་ངོས་འཇམ་ཡངས་པའི་སྤང་ཐང་ལ།
མེ་ཏོག་འདབ་བརྒྱ་བཞད་པའི་གླིང་ག་འདི།
གནམ་ལ་འཕུར་དགུ་ས་ལ་འཛུལ་དགུ་སོགས།
སྲོག་ཆགས་ཡོངས་ལ་ཕུལ་བའི་འདོད་ཡོན་ལྔ།

༩ མི་བུ་དུང་ཕྱུར་ཉི་ཤུ་རྩ་ལྷག་གི།
ཁེ་ཕན་དོན་དུ་ཁོར་ཡུག་སྲུང་སྐྱོང་གི།
བྱ་བ་བྱེད་ལ་དཔའ་བའི་དམག་དཔུང་དེ།
འཚོ་སྡོད་རྒྱང་འཛིན་བྱེད་པའི་གངས་ཅན་པ།

༡༠ ཟླ་ལྟར་དཀར་བའི་གངས་རི་གཟེངས་པ་དང་།
སྣག་ལྟར་གནག་པའི་རྫ་རི་ཉམས་ཅན་དག
གནམ་གྱི་ཀ་བ་ས་ཡི་རྟེན་ཕུར་ཏེ།
གོ་ལའི་རིན་ཆེན་སྲོག་གི་དམུ་ཐག་ཡིན།

       གསུམ།   ཁ་བ་རི་བའི་འཚོ་བ།
༡ མིང་ཙམ་ཐོས་ཀྱང་འཇིགས་སྐུལ་ཐེབས་པ་ཡི།
ནད་ངན་སྣ་ཚོགས་སྤྲིན་ལྟར་འཁྲིགས་དུས་འདིར།
བོད་པ་ཚང་ལ་ནད་ངན་མེད་པ་འདི།
ཟས་གོས་གནས་མལ་ཚུལ་མཐུན་ཡིན་པས་རེད།

༢ རང་བྱུང་གཡག་ཤ་ཟེར་ནས་རྒྱ་གང་ལ།
གྲོང་ཁྱེར་དག་ན་སྒོར་མོ་བརྒྱ་སོ་བྱས།
ཁ་བ་ཅན་ནི་གཡག་གི་ཕ་ས་རེད།
གཡག་གི་ཕ་སའི་ཤ་དེ་རང་བྱུང་དངོས།

༣ ཀུ་ཧུའི་བུ་མོས་མགྲིན་དབྱངས་གྱེར་བའི་དུས།
ཟྭ་དང་རུ་པ་ཆུ་རུག་ལ་སོགས་པ།
རང་བྱུང་སྔོ་ཚལ་སྣ་ཚོགས་འབུར་བ་ལ།
གཙང་གཙང་སེང་སེང་རོལ་མཁན་གངས་ཅན་པ།

༤རྩྭ་ཆུ་གཙང་མ་སྨན་རྩྭ་སྨན་ཆུ་ལ།
གཟན་ལ་གཡེངས་བའི་འབྲི་དང་མཛོ་མོ་ཡི།
གཙང་ལ་བཅུད་ལྡན་ལྷད་མེད་མར་དཀར་ལ།
ལོངས་སུ་སྤྱོད་མཁན་ཁ་བ་ཅན་པ་རེད།

༥  ས་ཆ་འགའ་ལ་བཏུང་ཆུའང་དཀོན་དུས་འདིར།
བོད་པ་ཚང་གིས་ཡན་ལག་བརྒྱད་ལྡན་ཆུ།
བཏུང་བ་འཛད་མེད་འབེལ་འབེལ་ལྷུན་འགྲུབ་དང་།  
མི་གཙང་འདེད་བྱེད་ལ་ཡང་གཏེར་ཆུ་སྤྱོད།

༦ ལྷོ་ཆུ་བྱང་ལ་འདྲེན་པའི་ལས་གཞི་ཡིས།
རྫ་ཆུ་གངས་ཆུ་ཁ་བ་རི་བའི་ཆུ།
སེམས་ཅན་སྤྱི་ལ་གནང་སྦྱིན་བྱེད་པ་སྟེ།
བྱང་སེམས་རྣམ་ཐར་འཛིན་པའི་གངས་ཅན་པ།

༧ རྒྱ་མཚོ་ངོས་ནས་མཐོ་ཚོད་ལྔ་སྟོང་གི།
མཐོ་སྒང་ཡུལ་ནའང་སྐྱེས་སྟོབས་བཟང་བ་ཡི།
འབགས་བཙོག་མ་གོས་ཨ་འབྲུ་ནས་སྲན་སོགས།
ཁ་བ་རི་བའི་ཁ་ཟས་མཆོག་ཏུ་བསྔགས།

༨ འཛམ་གླིང་ཡང་རྩེ་ཁ་བ་ཅན་གྱི་སར།
འབྲུ་རིགས་སྣ་ཚོགས་སོན་ལ་འདེབས་པ་ན།
འབྲུ་སྣ་གཞན་དག་བག་ལ་ཞ་བའི་ཚེ།
སྐྱེས་སྟོབས་དཔལ་འབར་ཁ་བ་རི་བའི་འབྲུ།

༩ སེམས་པ་སྤྲོ་བའི་གླུ་དང་ལ་འུར་སོགས།
དབྱངས་རྟ་གྱེར་བའི་སྣང་བ་སྐྱིད་སྐྱིད་ཀྱིས།
རྫ་མགོ་རི་མགོ་ཡངས་པའི་སྤང་ལྗོངས་སུ།
གུ་ཡངས་རྒྱུ་བ་སྦྲ་ནག་ཚང་གི་མི།

༡༠ གྲོང་ཁྱེར་ཆེན་པོའི་འཚོ་བའི་གནོན་ཤུགས་དང་། 
  ང་ཁྱེད་རྩོད་པའི་རྣོ་ངར་མེད་པ་དང་།
གཡོ་འཕྲུལ་རིག་པའི་ཇུས་འགོད་མེད་བཞིན་དུ།
འཚོ་སྡོད་གུ་ཡངས་ཅན་པོ་བོད་པ་ཚང་།

༡༡ ཆུ་བོ་རྨ་འབྲི་རྫ་གསུམ་གླུ་ལ་བསྐྱོན།
རི་དྭགས་ཤྭ་རྣ་སྒོ་གསུམ་གཞས་ལ་དྲངས།
གཅན་གཟན་སྟག་གཟིག་དོམ་དྲེད་མགུར་དང་སྦྲེལ། 
སྣང་བ་དབྱངས་རྟ་གྱེར་བའི་གངས་ཅན་པ།

༡༢ བྱ་དང་བྱི་ལ་རྩེ་གྲོགས་མེད་ན་ཡང་།
ཚེ་ཡི་ལྷག་མ་ཆོས་དང་འགྲོགས་བྱས་ཏེ།
བུ་ཚ་དེ་ཚོས་གོང་དུ་བཀུར་བ་ཡི།
བོད་པ་ཚང་གི་རྒས་བཟང་སྣང་སྐྱིད་རེད།

དེ་ལྟར་བོད་ཀྱི་ལོ་རྒྱུས་ཡུལ་སྲོལ་ལས།
ཁ་བ་རི་བའི་ཡུལ་གྲོང་ཁོར་ཡུག་དང་།
འཚོ་བ་བཅས་པ་མདོར་ཙམ་གླེང་བ་འདི།
རྒྱ་མཚོ་ཆེ་ལས་ཆུ་ཐིགས་བླངས་པ་ལྟར།
ཡིན་མོད་ཁ་བ་རི་བའི་དགེ་མཚན་ལ།
བསམ་ན་སྐྱེས་དང་ཚེ་རབས་ཀུན་ཏུ་ཡང་།
གནས་འདིར་སྐྱེས་ན་དགའ་བ་ཅིས་མི་སྐྱེས།
ཡབ་མེས་དམ་པའི་བཞག་པ་བཟང་པོ་འདིར།
ཁ་བ་ཅན་དུ་སྐྱེས་མ་ཐག་པ་ཡི།
བྱིས་པ་དེ་ཚོའང་ལོངས་སུ་སྤྱོད་པ་ཡི།
སྐལ་ལྡན་ལས་འཕྲོ་ཅན་པོ་གངས་ཅན་པ།
སྐུ་ཚེ་བརྟན་ཅིང་མཛད་འཕྲིན་རྒྱས་གྱུར་ན།
འཛམ་གླིང་སྤྱི་ཡི་སྣོད་བཅུད་གཉིས་ཆ་ལ།
ཕན་པ་ངེས་ཞེས་རིས་མེད་ཆེད་མཁས་པས།
རྡོ་རྗེའི་གསུངས་དེ་དོན་ལ་གནས་པ་སྟེ།
ཡན་ལག་དང་མ་མགོ་བོ་ཇི་བཞིན་དུ།
གོ་ལའི་སྲོག་རྩ་ཇོ་མོ་གླང་རི་འདི།
མ་སྨད་མ་ཉམས་ཡུན་དུ་བརྟན་གྱུར་ན།
འཚོ་སྡོད་གནས་ལ་བག་ཟོན་མི་དགོས་སོ།
                             དགེའོ།། བཀྲ་ཤིས།།

·རྩོམ་ཡིག་གོང་མ:བོད་མིའི་གཤིས་ཀ་ཡ་མཚན།
·རྩོམ་ཡིག་འོག་མ:གཞས་ཚིག ཞབས་བྲོ་འཁྲབ་ཡ།
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·འགོ་ཁྲིད་དང་དཔོན་པོ་མ་ནོར་ཅིག 2016/9/30 16:16:26
·ཀུན་མཁྱེན་ཇོ་ནང་པ་ཆེན་པོའི་བསྟན་པ་རྒྱས་པའི་སྨོན་ལམ། 2016/9/30 16:11:32
·སྐད་ཡིག་དང་ནང་ཆོས་གཅིག་ཏུ་འཁྲུལ་མི་ཉན། 2016/3/7 18:08:42
·རླབས་ཆེན་གྱི་བཞུད་ལམ། 2016/3/7 18:03:51
·སྙིང་གཏམ་བཅོ་ལྔ་པ། 2016/3/7 17:51:57
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 6:38:16 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 9:12:14 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 13:41:00 [来自: 112.5.248.229]

འབྲེལ་ཡོད་དཔྱད་བརྗོད 54 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།35.16MS