དོ་ནུབ་ང་ལྷ་ས་རུ་ཡོད

ལྷ་སའི་རུམ་ཁ་འཁྱག་པའི་ནང་དུ་ཡོད

ཁེར་རྐྱང་ངང་རེ་སྒུག་ལ་ཕྱིར་དྲན་བྱེད་བཞིན་ཡོད

ཉམས་ཉེན་ཞིག      དགའ་བ་ཞིག

ཕར་སོང་གི     ཡང་ན་མ་འོངས་པའི

 

དོ་ནུབ་ང་ལྷ་ས་རུ་ཡོད

ལྷ་སའི་རུམ་ཁ་འཁྱག་པའི་ནང་དུ་ཡོད

མིག་ཟུང་གིས་རྒྱང་ལྟ་བྱས་ཏེ་སེམས་པ་སྟོང་པ་ངུ་ཤུམ་བྱེད་ཀྱིན

ནམ་མཁའི་མེ་ཏོག་ལ་སེམས་པས་གླན་གྱིན

འཐོར་སོང་བའི་མེ་ཏོག་གི་འདབ་མར་མྱ་ངན་ཞུ་བཞིན

ལོ་རྒྱུས་ཀྱི་ངོ་གདོང་གི་རྔུལ་ཆུ་འཁྲུད་བཞིན་ཡོད

 

དོ་ནུབ་ང་ལྷ་ས་རུ་ཡོད

ལྷ་སའི་རུམ་ཁ་འཁྱག་པའི་ནང་དུ་ཡོད

ཕ་ཡུལ་གྱི་ཨ་མ་དྲན་གྱིན

འདས་སོང་གི་ཕ་ལོའི་གཏམ་རྒྱུད་ལ་དྲི་བ་འདོན་བཞིན

བརྗོད་མི་ཤེས་པའི་ཚོར་བ་ཞིག་གི་བར་མཚམས་སུ

དགོད་ཀྱིན་དགོད་ཀྱིན་དུ      ངུ་བཞིན་ངུ་བཞིན་དུ

ལོ་ངོ་དུ་མའི་བོད་ལུགས་ལོ་སར་གྱི་རྟེན་འབྲེལ་བར་ན་སྙན་ངག་འབྲི་བཞིན་ཡོད