ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ཚངས་དབྱངས་འདུ་ར། >> དུས་གཏམ་མྱོང་གླེང་།
 རྩོམ་ཡིག་ཀློག་པ།

བལ་ཡུལ་གྱི་བོད་མི་ཚོས་ས་གནས་བྱིས་པ་གཡོག་ཏུ་བཀོལ་ཚུལ།

  རྩོམ་པ་པོ:སྤོབས་པ་མཐའ་ཡས།ཡོང་ཁུངས:ངེད་གཟིགས་གྲངས:1842ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2013/5/19 12:35:04ཚོགས་ཡར་སྤྲོད:admin
 
སྤོབས་པ་མཐའ་ཡས།
 
    ཧི་མ་ལ་ཡའི་ཁོངས་སུ་གནས་པའི་བལ་ཡུལ་ནི་གནའ་བོའི་རིག་གནས་དཔལ་ཡོན་ངོ་མཚར་ཅན་གྱི་ཤུལ་བཞག་མང་པོ་དང་། དུས་བཞིར་དྲོ་གྲང་སྙོམས་པའི་ཡུལ་ལུང་མཛེས་པོ། ཆོས་ལུགས་དང་སྡེ་རིས་མི་འདྲ་བ་མང་པོས་གྲུབ་པའི་ཡུལ་སྡེ་ངོ་མཚར་ཅན་ཞིག་ཡིན་སྟབས་བོད་མི་མང་པོས་རང་གི་ཕ་ཡུལ་གཉིས་པ་ལྟ་བུར་ཚོར་གྱིན་ཡོད། བལ་ཡུལ་ལ་ཉེ་བའི་ལོ་བཅུ་ཕྲག་རེ་ཟུང་ལ་ནང་འཁྲུག་མང་པོ་བྱུང་བས་མང་ཚོགས་ཀྱི་འཚོ་བ་ཡར་རྒྱས་ལ་འགོག་རྐྱེན་ཚད་མེད་ཐེབས། ཡུལ་འདིའི་མང་ཚོགས་ཀྱིས་མྱོང་བཞིན་པའི་དབུལ་ཕོངས་དང་དྲག་སྤྱོད་ཀྱི་དཀའ་ངལ་མང་། བལ་ཡུལ་ན་བོད་མི་ཕྱུག་པོ་ཚོས་ཀྱང་བལ་ཡུལ་གྱི་སྲོལ་རྒྱུན་རྗེས་ལུས་དང་། དབུལ་ཕོངས་ཀྱི་འཚོ་བ། ཡིག་རྨོངས་པའི་གནས་སྟངས། སྲིད་ཁྲིམས་ཀྱི་ནུས་ཤུགས་རུལ་སུངས་སུ་འགྱུར་བཞིན་པའི་གོ་སྐབས་བཟུང་ནས་བྱིས་པ་གཡོག་ནག་ཏུ་བཀོལ་ནས་ཆེ་ཚུགས་ངོམ་པའི་སྤྱོད་ངན་ཚབས་ཆེ། བལ་ཡུལ་གྱི་བོད་མི་ཚོས་ཡུལ་མིའི་བྱིས་པ་གཡོག་ནག་ཏུ་བཀོལ་སྟངས་དེ་ཡང་གླ་ཆའི་ཚད་འཛིན་མེད་པ། ཆུ་ཚོད་ཀྱི་ཚད་འཛིན་མེད་པ། ལས་ཀའི་ཚད་འཛིན་མེད་པར་ཁྱིམ་བདག་གི་ཅི་འདོད་བཞིན་བཀོལ་སྤྱོད་བྱེད་ཀྱིན་ཡོད་སྟབས་སྔོན་དུས་ཀྱི་ཚེ་གཡོག་ལམ་ལུགས་དང་ཁྱད་པར་ཆེན་པོ་ཞིག་མེད།
   བལ་ཡུལ་གྱི་གྲོང་ཁྱེར་ཀ་ཐ་མན་དྷུའི་མ་ཧ་ར་ཇ་གྷན་ཇི་ཞེས་པར་ང་ལ་བོད་མི་ཁྱིམ་ཚང་ངོ་ཤེས་པ་ཞིག་ཡོད། ཁྱིམ་ཚང་དེའི་དཔལ་འབྱོར་གྱི་ཡོངས་ཁུངས་ངོ་མ་གང་ཡིན་མི་ཤེས་མོད་བསགས་དངུལ་ཕོན་ཆེན་དང་ཆོས་སྦྱིན་ཐེབས་རྩ་ཚོགས་པ་ལྟ་བུ་བརྒྱུད་ནས་ཡོང་སྒོ་ཡག་པོ་ཡོད་ངེས། ཁོང་བཟའ་མི་གཉིས་པོར་ལས་ཀ་འདི་ཡིན་ཟེར་བ་མེད་མོད་དངུལ་རྩ་མི་ཉུང་བ་ཞིག་ཡོད་པར་ཐེ་ཚོམ་མེད། ཁོང་ཚོར་ཁང་བརྩེགས་གསུམ་ཅན་ར་སྐོར་དང་བཅས་པ། ཆིབས་འཁོར་ཏྲོ་ཡོ་ཏྲ་ཆེ་བ་འཁོར་བཞིའི་ཤུགས་ཅན་གཅིག་དང་། སུ་ཟུ་ཀི་ཆུང་བ་གཅིག  མཆོད་ཁང་ཟེར་ན་དགོན་པ་གྲྭ་གྲངས་ཉི་ཤུ་ཅན་ཞིག་གི་འདུ་ཁང་བྱས་ཀྱང་མི་ཆུང་བ་ཞིག  དེའི་ནང་ན་གསེར་བྱུགས་པའི་ལྷ་སྐུ་མི་ཚད་ཙམ་སོགས་སྐུ་བྲིས་འབུར་མང་པོ། དངུལ་འཇངས་བརྡུང་གིས་གྲུབ་པའི་མཆོད་ཀོང་དང་བདུན་ཚར་སོགས་མང་པོ། ས་གདན་ཡག་གྲས་ཆེ་ཆུང་མང་པོ་སོགས་མཐོང་ལམ་ན་ཡོད་པའི་རྒྱུ་དངོས་དེས་ཀྱང་འབྱོར་བ་ཅན་ཞིག་ཡིན་པ་མཐོང་ནུས། མི་ཚང་དེའི་འགྲོ་སོང་ཡང་ཆེ། ཁྱིམ་མི་རྣམས་ཀྱི་སྤྲོ་སྐྱིད་ཀྱི་འགྲོ་སོང་སྣ་ཚོགས་དང་། ལོ་རེ་རེ་བཞིན་ཆོས་ཕྱོགས་ནས་འབུམ་སྒྲོགས་པ་སོགས་སྐུ་རིམ་ཆེ་གྲས་དང་། ཟླ་བ་རེ་རེ་བཞིན་གྲྭ་བ་ཁ་ཤས་རེ་གདན་དྲངས་ནས་རིམ་གྲོ་བྱེད་དུ་འཇུག་པར་ཡོན་དངུལ་མཐོ་ཚད་འབུལ་བ། ཆིབས་འཁོར་གླ་བ། མཚམས་མཚམས་སུ་བོད་ཀྱི་བླ་སྤྲུལ་གྲགས་ཅན་གདན་དྲངས་ནས་གསོལ་ཚིགས་དང་འབུལ་བས་མཉེས་པར་བྱེད་པ། ཆོས་ཕྱོགས་ཀྱི་ཆོ་གའི་ཡོ་བྱད་ཉོ་བ་སོགས་ཁོ་ན་ཡང་ཁྱིམ་ཚང་འབྲིང་གྲས་ཤིག་གིས་འཚོ་བ་ཡོངས་རྫོགས་འཁྱོལ་བ་ལས་ལྷག་ཙམ་ཞིག་ནི་ཆོས་ཕྱོགས་སུ་བསྙད་པའི་བྱེད་སྒོ་དེའི་ཆེད་ནར་གཏོང་བྱེད།
  ཁྱིམ་ཚང་དེ་ལ་བལ་པོའི་བུ་མོ་མ་ཡ་ཟེར་བའི་གཡོག་མོ་ཞིག་འདུག  བུ་མོ་དེ་གྲོང་ཁྱེར་ལས་ཉིན་ཕྱེད་ལྷག་ཙམ་ལ་འགྲུལ་འཁོར་དང་དེ་ནས་རྐང་ཐང་ལ་ཆུ་ཚོད་ཁ་ཤས་འགྲོ་དགོས་པའི་གྲོང་གསེབ་ཅིག་ནས་ཡོང་ཚུལ་ཐོས། བུ་མོ་དེ་ཐོག་མར་བོད་མི་ཁྱིམ་ཚང་འདིར་སླེབས་སྐབས་ལོ་ན་བཅུ་ཙམ་མ་གཏོགས་ཟིན་མེད་པ་འདྲ། ང་ཐོག་མར་ཁྱིམ་ཚང་འདི་ལ་འབྲེལ་བ་བྱུང་སྐབས་ཁྱིམ་ཚང་འདི་ལ་བུ་མོ་ལོ་དྲུག་ལ་སོན་པ་ཞིག་འདུག  དགོང་ཟས་ཀྱི་རྗེས་སུ་ཁྱིམ་བདག་གི་སྲས་མོ་ཆུང་ངུ་དེ་འབོལ་སྟེགས་སྟེང་དུ་གཉིད་ཁུག་ཤོར། ཁྱིམ་བདག་གིས་གཡོག་མོ་ལ་སྲས་མོ་ལྷ་ལྕམ་གཟིམ་ཁང་ནང་དུ་ཁུར་དགོས་ཞེས་བཀའ་བཏང་སོང་། སྐབས་དེར་གཡོག་མོས་སྲས་མོ་ཡར་འགྱོག་སྐབས་ཕར་བལྟས་ཚོད་ལ་ཆེ་ཆུང་གི་ཁྱད་པར་ཆེན་པོ་ཞིག་མི་འདུག  ཡིན་ན་ཡང་ཁུར་མི་ཐུབ་ཟེར་དབང་མེད་པར་ཁུར་དགོས་པ་ནི་དཔོན་དང་གཡོག་གི་འབྲེལ་བ་རེད།
   གཡོག་མོ་ཆུང་ངུ་དེའི་ལས་ཀ་ནི་ཞོགས་པར་ཁྱིམ་བདག་ནང་མི་མགྲོན་པོ་ཡོངས་རྫོགས་ལ་ཞོགས་ཟས་སྟ་གོན་བྱས། དེ་ནས་ཐབ་ཚང་ནང་དུ་ལངས་ནས་མི་སུ་སླེབས་ལ་བཟའ་བཏུང་སྤྲད། ཁྱིམ་ཀྱི་ཁང་མིག་ཡོངས་རྫོགས་དང་ར་སྐོར་བཅས་གཙང་མ་བྱ་བ། ཉིན་གུང་གི་བཟའ་བཏུང་སྟ་གོན་བྱ་བ། དེ་ནས་ཁྱིམ་བདག་མགྲོན་པོ་སུ་ཡོད་ཚང་མར་ཉིན་གུང་གི་བཟའ་བཏུང་དྲངས། དེ་ནས་ཁྱིམ་བདག་དང་མགྲོན་སོ་སུ་ཡོད་ཀྱི་གྱོན་ཆས་དྲེག་པ་ཅན་ཡོངས་རྫོགས་ལག་པས་བཀྲུས། གདང་ལ་བཀལ་ནས་བསྐམ། སྟེབས་རྩིགས་བྱས། རང་རང་སུ་ལ་དབང་བའི་གནས་སུ་སྐྱེལ་དགོས། འབྱོར་ལྡན་ཁྱིམ་ཚང་འདིས་གྱོན་ཆས་འཁྲུད་འཁོར་ཞིག་ཉོ་མི་ཐུབ་པ་མིན་མོད་གཡོག་མོ་ཡོད་སྟབས་ཉོ་མ་དགོས་པ་རེད། ཁྱིམ་བདག་གི་སྲས་དང་སྲས་མོ་ཚོ་སློབ་གྲྭར་འགྲོ་བའི་གྲ་སྒྲིག་གིས་སློབ་གྲྭའི་ཕེབས་འཁོར་སླེབས་པའི་ས་མིག་དེར་བསྐྱལ་ནས་ཕེབས་འཁོར་ནང་དུ་འཇུག་འགོས། སྲས་སྲས་མོ་ཚོ་ཚུར་སླེབས་སྐབས་ཁོང་ཚོའི་གཟུགས་པོ་བཀྲུ་རོགས་དང་གྱོན་ཆས་བརྗེ་བ། ཕྱི་དྲོར་དགོང་ཟས་སྟ་གོན་སོགས་ཀྱང་དུས་ཐོག་ཏུ་བྱས། དགོང་མོར་ཁྱིམ་དེའི་མི་ཚང་མ་ཉལ་སར་སོང་རྗེས་སུ་གཞི་ནས་ཐབ་ཚང་གི་རྡོ་གཅལ་སྟེང་དུ་རྩྭ་སྟན་ཞིག་བཏིངས་བའི་སྟེང་དུ་ཉལ་ཆོག་གི་ཡོད་འདུག  མདོར་ན་བུ་མོ་འདི་སྔ་མོར་ཡར་ལངས་པ་ནས་མཚན་དཀྱིལ་མར་ཉལ་བའི་བར་དུ་ངལ་གསོའི་དུས་ཚོད་གཏན་ནས་མེད།
  བལ་ཡུལ་གྱི་བོད་མིའི་ཁྱིམ་ཚང་ལ་ལས་གཡོག་པོ་གཡོག་མོར་ཟླ་བ་རེར་བལ་སྒོར་བརྒྱ་ཉིས་བརྒྱ་རེ་ཙམ་སྤྲོད་སྲོལ་ཡོད་ཟེར་མོད། ཁྱིམ་ཚང་འདིས་གཡོག་མོར་གླ་ཆ་ཟེར་བའི་དངུལ་གྲངས་ཚད་ཀྱིས་བཅད་པ་ཞིག་སྤྲོད་སྲོལ་མེད། ཁྱིམ་ཚང་དེར་བསྡད་ཕྱིན་ཁྱིམ་ཚང་དེ་ནས་བཟའ་བཏུང་སྤྲོད། ཁྱིམ་ཚང་དེའི་བུད་མེད་ཚོའི་གྱོན་ཆས་རྙིང་པ་རེ་སྤྲོད་པའམ་རིན་གོང་དམའ་ཤོས་ཀྱི་གྱོན་ཆས་ལུས་ལ་བགོ་རུང་ཙམ་རེ་ཉོ། ཁྱིམ་བདག་གིས་ཅི་གསུངས་བསྒྲུབས་པའི་གཡོག་མོ་ཡག་པོ་ཞིག་ཡིན་ན་ལོ་ཁ་ཤས་ཀྱི་རྗེས་སུ་ཕྱིར་ལོག་ཉིན་རྔན་པ་ཡག་པོ་ཞིག་སྤྲོད་ཟེར་སྲོལ་འདུག  རྔན་པ་ནི་ཁྱིམ་ཚང་དེའི་བུད་མེད་ཚོའི་གྱོན་ཆས་བེད་སྤྱོད་བྱས་ཟིན་པ་སྒྱེ་གང་དོ་རེ་དང་བལ་སྒོར་སྟོང་ཕྲག་གཅིག་ནས་ལྔ་དྲུག་གི་བར་ཙམ་རེད།
ཁྱིམ་བདག་གིས་བུ་མོ་དེར་འགྲོ་བ་མི་འདྲ་མཉམ་གྱི་རྣམ་འགྱུར་བསྟན་ནས་སྐད་ཆ་ཤོད་སྲོལ་མེད། ནམ་ཡིན་ཡང་སྐད་མགོ་མཐོན་པོ། གདོང་གཤིས་གནག་པོ། སྐད་གདངས་དྲག་པོ། བརྗོད་ཚིག་རྩུབ་པོ་ཤ་སྟག་ཤོད། ལས་ཀ་ལ་མ་མགུ་བའམ་ཁྱིམ་བདག་རང་ཉིད་ཀྱི་སྣང་བ་མི་སྐྱིད་ཉིན་བྱིས་པ་གཡོག་མོ་དེར་འགྲམ་ལྕག་རྒྱག་པར་འཛེམ་ཟོན་གཏན་ནས་མེད། དེ་ནི་རྒྱུན་དུ་ང་ཚོས་ཀྱང་མཐོང་ནུས་པ་ཞིག་ཡིན། མཚམས་མཚམས་སུ་རྡོ་དབྱུག་བསྣུན་པ་སོགས་བཅར་རྡུང་དྲག་པོ་ཡང་བྱེད་ཀྱིན་འདུག  ཁྱིམ་དེའི་བུད་མེད་དང་བྱིས་པ་ཕར་ཞོག མགྲོན་པོ་ཆ་རྒྱུས་ཅན་ཚོས་ཀྱང་གཡོག་མོ་ལ་འགྲོ་བ་མི་འདྲ་མཉམ་གྱི་རྣམ་འགྱུར་ཞིག་སྟོན་སྲོལ་མི་འདུག
  ཐོག་མར་མ་ཡ་ངས་མཐོང་དུས་བྱིས་པ་ཞིག་རེད། རིམ་གྱིས་ནར་སོན་ནས་ལོ་ན་བཅོ་ལྔ་བཅུ་དྲུག་ལ་སོན་པའི་མོ་གཞོན་དར་མ་ཞིག་ཏུ་གྱུར་འདུག  མོ་ལ་གྱོན་ཆས་གསར་པ་མེད་ཅིང་བཞིན་རས་མཛེས་བཟོའི་བྱུག་རྫས་མེད་མོད་རང་བཞིན་གྱིས་དཀར་ལ་དམར་མདངས་ཆགས་པའི་བཞིན་རས་དང་མཉེན་ལྡེམ་གྱི་སྐྱེ་གཟུགས་ལ་མཛེས་མའི་མཚན་ཉིད་ཚང་བ་ཞིག་རེད། ཁྱིམ་ཚང་དེའི་བྱིས་པ་ཚོར་སློབ་ཚན་ཟུར་ཁྲིད་དགེ་རྒན་དང་ཡིག་སྐུར་འབྲི་བ་སོགས་ཀྱི་ལས་ཀ་བྱེད་མཁན་བོད་མི་ལོ་ན་ལྔ་བཅུའི་ནང་དུ་སོན་པ་ཞིག་ཡོད། མི་རྒན་དེས་ནམ་ཡིན་ཡང་ཁྱིམ་བདག་མེད་པའི་དུས་སུ་བུ་མོ་དེ་ལ་ལག་པས་རེག་པ་དང་ཆགས་གཏམ་གླེང་བའི་གོ་སྐབས་འཚོལ་གྱིན་འདུག  ད་དུང་རྒྱ་གར་ལྷོ་ཕྱོགས་ཀྱི་དགོན་པ་ཞིག་ནས་ཡོང་བའི་གྲྭ་བ་ཞིག་ཁྱིམ་ཚང་དེར་ཟླ་བ་ཁ་ཤས་རེར་སྡོད་ཀྱིན་འདུག  གྲྭ་བ་དེ་བལ་ཡུལ་དུ་འདུག་དུས་ཕལ་ཆེ་བར་གྲྭ་ཆས་མི་གྱོན་ཞིང་མཚམས་མཚམས་སུ་ཁྱིམ་ཚང་དེར་ལས་ཀའི་རོགས་ཅུང་རེ་ཡང་བྱེད། གྲྭ་བ་དེས་ཀྱང་གཡོག་མོ་དེར་ཚུལ་མིན་ཆགས་སྤྱོད་ཀྱི་དགོས་འདུན་འདོན་པ་དང་རྣམ་འགྱུར་སྟོན་བཞིན་པ་ཐེངས་རེ་འགའ་མཐོང་མྱོང་། དེ་དང་དེ་ལྟ་བུར་གཡོག་མོ་དེ་ནི་ཁྱིམ་ཚང་དེའི་ཚུལ་མིན་ཆགས་སྤྱོད་ཀྱི་གནོད་འཚེ་ཕོག་ཡུལ་དུ་ཡང་གྱུར་འདུག
   འདི་ནི་དཔེ་མཚོན་གཅིག་ཁོ་ན་ཡིན། བལ་ཡུལ་གྱི་བོད་མི་ཚོས་ཡུལ་མིའི་བྱིས་པ་གཡོག་པོར་ཉར་བ་ཙམ་མ་ཡིན་པར་དེ་དག་བཀོལ་སྤྱོད་བྱེད་སྟངས་དེ་ནི་སྙིང་ལ་ན་ཟུག་སློང་བའི་གདོལ་སྤྱོད་ཅིག་རེད། ངས་མཐོང་བ་ཁོ་ན་ཡང་འདི་ཙམ་དུ་མ་ཟད་པར་ཆེས་མང་པོ་ཡིན་ན་མ་མཐོང་བ་ནི་དེ་ལས་ཀྱང་མང་བ་ཞིག་ཡོད་པར་ཐག་གིས་ཆོད། བོད་མིའི་ཡ་རབ་བཟང་སྤྱོད་ནི་འཛམ་གླིང་སྤྱི་ཚོགས་ཀྱི་མིག་དཔེར་འོས་ཚུལ་དང་བྱང་ཆུབ་སེམས་དཔའི་ལམ་ལ་སློབ་པ་སོགས་ཁ་ཕོ་ཆེན་པོ་དེ་ཚོ་འདོན་མཚམས་བཞག་ནས་ཐོག་མར་ཡུལ་གྱི་སྲིད་ཁྲིམས་དང་རྒྱལ་སྤྱིའི་ཁྲིམས་ལུགས་དང་ཡང་འགལ་བའི་སྤྱོད་ངན་འདི་རིགས་མཚམས་འཇོག་ཐབས་རེ་གནང་ན་ཆོས་སྲིད་གང་ཐད་ནས་ཕན་པ་ཆེན་པོ་ཡོད་པར་ངེས་སོ།།
 
·རྩོམ་ཡིག་གོང་མ:ལམ་རིམ་དམ་ཆོས་བདུད་རྩིའི་སྙིང་པོ།
·རྩོམ་ཡིག་འོག་མ:ཕུར་སྨོན་བཞུགས་སོ།
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·འགོ་ཁྲིད་དང་དཔོན་པོ་མ་ནོར་ཅིག 2016/9/30 16:16:26
·ཀུན་མཁྱེན་ཇོ་ནང་པ་ཆེན་པོའི་བསྟན་པ་རྒྱས་པའི་སྨོན་ལམ། 2016/9/30 16:11:32
·སྐད་ཡིག་དང་ནང་ཆོས་གཅིག་ཏུ་འཁྲུལ་མི་ཉན། 2016/3/7 18:08:42
·རླབས་ཆེན་གྱི་བཞུད་ལམ། 2016/3/7 18:03:51
·སྙིང་གཏམ་བཅོ་ལྔ་པ། 2016/3/7 17:51:57
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 13:19:55 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 17:14:23 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/17 2:07:42 [来自: 112.5.248.229]

འབྲེལ་ཡོད་དཔྱད་བརྗོད 47 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།34.18MS