ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> མི་སྣ།
 རྩོམ་ཡིག་ཀློག་པ།

དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༤

  རྩོམ་པ་པོ:བཞག་པ་སྤྲུལ་སྐུ།ཡོང་ཁུངས:ནང་རིགགཟིགས་གྲངས:6318ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2014/11/12 20:37:16ཚོགས་ཡར་སྤྲོད:admin
༄༅། །དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ཆེན་མོ་ལུང་རིགས་རྒྱ་མཚོའི་གཏེར་མཛོད་ཅེས་བྱ་བ་བཞུགས་སོ། །༤
 
ལི་ཐང་བཞག་པ་སྐྱེ་མིང་འཇམ་དབྱངས་མཁས་གྲུབ་ཀྱིས་བརྩམས།
 
  ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོའི་མན་ངག་གི་གཞུང་འདི་ཀླུ་སྒྲུབ་ཀྱི་མིན་པའི་སྒྲུབ་བྱེད་གཅིག་ལ་དེའི་ནང་དུ། ཞི་སྒོ་གཉིས་པ་མེད་པ་དང༌། །ལྟ་བ་ངན་རྣམས་འཇིག་བྱེད་ཅིང༌། །
སངས་རྒྱས་ཀུན་གྱི་ཡུལ་འགྱུར་པ། །དེ་མིང་བདག་མེད་པ་ཡི་ཆོས། །འདི་རྒྱ་འགྱུར་གྱི་ཤེར་ཕྱིན་མན་ངག་ལས་ཐད་ཀར་བསྒྱུར་བ་ཡིན་པས་བོད་འགྱུར་གྱི་བཞི་བརྒྱ་པའི་རྩ་ཚིག་དང་བསྡུར་ན་ཅུང་ཟད་མི་འདྲའོ། །
ཞེས་བཞི་བརྒྱ་པའི་ལུང་འདྲེན་མཛད་པས་སོ་གསུངས་པ་ལ་ཡང་དོགས་གཞི་ཡོད་དེ། ལུང་དེའི་གོང་འོག་གི་ཚིག་དོན་གྱི་འབྲེལ་བབས་ལ་ལེགས་པར་བརྟག་ན། དེར་བཞི་བརྒྱ་པའི་ལུང་འདྲེན་པར་མི་འཐད་ཅིང༌། བཞི་བརྒྱ་པར་ཚིགས་བཅད་འདི་ཐད་ཀར་ལུང་འདྲེན་པར་ཁས་ལེན་ན་འཐད་པའི་རྒྱུ་མཚན་རྣམ་པ་ལྔ་དང་ལྡན་པས་སོ། །
དེ་ལ་རྒྱུ་མཚན་དང་པོ་ནི། ཚིགས་བཅད་དེའི་གོང་འོག་དེ་མ་ཐག་ཏུ་བྱུང་བའི་ཚིགས་བཅད་དག་ནི་བཞི་བརྒྱ་པའི་ལུང་ཚིག་མིན་པས། ལུང་དེའི་གོང་འོག་ཚང་བར་དྲངས་ན་འདི་ལྟར། ཤེར་ཕྱིན་མན་ངག་ལས།
དབུ་མ་རྩ་བའི་ཚིག་ལེའུར་བྱེད་པ་ལས།གལ་ཏེ་སྟོང་མིན་ཅུང་ཟད་ཡོད། །
སྟོང་པའང་ཅུང་ཟད་ཡོད་པར་འགྱུར། །མི་སྟོང་པ་ཡང་མི་རྙེད་ན། །
སྟོང་པ་རྙེད་པར་ག་ལ་འགྱུར། །བྱིས་པས་མི་སྟོང་པ་ཉིད་ལྟ། །
དེ་བཞིན་སྟོང་པའང་ལྟ་བར་འགྱུར། །ལྟ་དང་ལྟ་མིན་མི་ལྟ་བ། །
དེ་མིང་མྱ་ངན་འདས་པ་ཉིད། །ཞི་སྒོ་གཉིས་པ་མེད་པ་དང༌། །
ལྟ་བ་ངན་རྣམས་འཇིག་བྱེད་ཅིང༌། །སངས་རྒྱས་ཀུན་གྱི་ཡུལ་གྱུར་པ། །
དེ་མིང་བདག་མེད་པ་ཡི་ཆོས། །བདག་དོན་མདོར་བསྡུས་གསུངས་པ་གང༌། །
ཐོས་པས་དེང་འདིར་བཤད་པར་བགྱིས། ། ཞེས་གསུངས་པས་གོང་འོག་གི་ཚིགས་བཅད་རྣམས་ཚིག་དོན་གཉིས་ཀའི་ཆ་ནས་གཞུང་གཅིག་ལས་བྱུང་བ་ཤིན་ཏུ་གསལ་སྟེ། ཚིག་གི་ཆ་ནས་གོང་དེ་མ་ཐག་གི་ཚིག་རྐང་ཐ་མར། དེ་མིང་མྱ་ངན་འདས་པ་ཉིད། །ཅེས་དང༌། ཚིག་རྐང་འདིའི་ཐ་མར། དེ་མིང་བདག་མེད་པ་ཡི་ཆོས། །ཞེས་གསུངས་པ་དང༌། དོན་གྱི་ཆ་ནས་གོང་གི་ཤླཽཀ་དང་པོས་་ཡུལ་བདེན་པ་གཉིས་ལ་བདེན་ཞེན་བཀག་པ་དང༌། ཤླཽཀ་གཉིས་པས་ཡུལ་ཅན་ལྟ་བ་ལ་བདེན་ཞེན་བཀག་པ་དང༌། ཤླཽཀ་འདིས་ནི་གོང་གི་ཡུལ་དང་ཡུལ་ཅན་ལ་བདེན་ཞེན་བཟློག་པའི་བདག་མེད་དེ་ནི་ཞི་སྒོ་གཅིག་པུ་དང༌། ལྟ་ངན་གྱི་གཉེན་པོ་དང༌། སངས་རྒྱས་ཀུན་གྱིས་གང་མངོན་དུ་བྱ་བའི་སྤྱོད་ཡུལ་ཡིན་པར་གསུང་པས། ཚིག་དོན་གཉིས་ཀའི་ཆ་ནས་འདི་འདྲའི་གཅིག་མཐུན་བྱུང་བས་ནི་རྩོམ་པ་པོ་གཅིག་གིས་དུས་གཅིག་ཏུ་ཐར་ཆགས་སུ་བྲིས་པར་ཤིན་ཏུ་གསལ་ལོ། །
རྒྱུ་མཚན་གཉིས་པ་ནི། མགོར་དབུ་མ་རྩ་བའི་ཚིག་ལེའུར་བྱས་པ་ལས། ཞེས་ལུང་དེ་དག་གང་ནས་བྱུང་བའི་ཁུངས་བཀོད་ཡོད་པས། གལ་ཏེ་ཞི་སྒོ་གཉིས་པ་ཞེས་པའི་ཚིགས་བཅད་དེའི་ལུང་ཁུངས་ཐ་དད་ཡིན་ན་བཀོད་རིགས་པ་ལ་མ་བཀོད་པའི་ཕྱིར་དང༌།
རྒྱུ་མཚན་གསུམ་པ་ནི། དེའི་ནང་གི་ཤླཽཀ་དང་པོ་དེ་ད་ལྟའི་དབུ་མ་རྩ་བའི་རབ་བྱེད་བཅུ་གསུམ་པ་འདུ་བྱེད་བརྟག་པར་ཡོད་ལ། ཞི་སྒོ་གཉིས་པ་ཞེས་པའི་ཚིགས་བཅད་དེ་བཞི་བརྒྱ་པར་ཡོད་ཀྱང༌། དེ་མིན་གྱི་ཤླཽཀ་གཅིག་དང་ཕྱེད་ནི་ད་ལྟའི་དབུ་མ་རྩ་བར་མི་བཞུགས་ཤིང༌། བཞི་བརྒྱ་པར་ཡང་མི་བཞུགས་པས། གལ་ཏེ་ཚིགས་སུ་བཅད་པ་འདི་དག་ཐར་ཆགས་སུ་བྲིས་པའི་གཞུང་ཞིག་མེད་ན་ནི། ཤླཽཀ་གཅིག་དང་ཕྱེད་ཀ་འདི་ལ་ཕ་ཡུལ་མེད་པར་འགྱུར་རོ། །
རྒྱུ་མཚན་བཞི་པ་ནི། པཎྜིཏ་གཞོན་ནུ་སྲོག་གིས་བསྒྱུར་བའི་ཀླུ་སྒྲུབ་རྣམ་ཐར་ལས། འཇིགས་པ་མེད་པའི་བསྟན་བཅོས་ཤླཽཀ་འབུམ་ཡོད་པ་ཞིག་བརྩམས་ཏེ་དབུ་མ་རྩ་བའི་ཚིག་རྣམས་ཀྱང་དེའི་ནང་ནས་ཕྱུང་ངོ། །གསུང་ཚུལ་ལ་དཔག་ན་དབུ་མ་རྩ་བའི་གཞུང་ལའང་རྒྱས་བསྡུས་སྣ་ཚོགས་ཡོད་པར་ཤིན་ཏུ་གསལ་བའི་ཕྱིར་རོ། །
རྒྱུ་མཚན་ལྔ་པ་ནི།  གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོའི་མན་ངག་འདི་སྤྱི་ལོ་༤༠༡ཙམ་ལ་རྒྱ་ནག་ཏུ་ཕེབས་པའི་པཎྜིཏ་གཞོན་ནུ་སྲོག་རང་ཉིད་ཀྱིས་བརྩམས་ནས་ཀླུ་སྒྲུབ་ལ་ཁ་གཡར་བའོ་ཞེ་ན། དེའི་རྗེས་ཀྱི་ལོ་བདུན་བཅུ་ཙམ་ལ་རྒྱ་ནག་ཏུ་ཕེབས་པའི་ལི་ཡུལ་གྱི་སློབ་དཔོན་ཀིངྐར་དང་རྒྱའི་བཙུན་པ་ཐན་ཡའོ་གཉིས་ཀྱིས་རྒྱ་ཡིག་ཏུ་བསྒྱུར་བའི་ཆོས་ཀྱི་མཛོད་གང་ལ་བརྟེན་ནས་བྱུང་བའི་གཏད་རབས་ནང་དུའང་ཀླུ་སྒྲུབ་ཀྱིས་ཤེར་ཕྱིན་གྱི་བསྟན་བཅོས་ཤླཽཀ་འབུམ་ཡོད་པ་ཞིག་མཛད་པར་བཤད་པས།
གལ་ཏེ་གཞོན་ནུ་སྲོག་གིས་མཛད་པ་ཡིན་ན། བརྩམས་ནས་ལོ་ངོ་བདུན་ཅུ་ཙམ་ལས་མ་ལོན་པའི་བསྟན་བཅོས་ཤིག་རྒྱ་ནག་ཏུ་སུས་མཛད་ངོས་མི་ཟིན་པར་སྲིད་ནའང༌། ལི་ཡུལ་གྱི་སྡེ་སྣོད་འཛིན་པའི་ཁྲོད་དུའང་ཀླུ་སྒྲུབ་ཀྱིས་མཛད་པ་ཡིན་མིན་ལ་དོགས་པ་མི་ཟ་བ་ནི་ཤིན་ཏུ་དཀའ་བས། ལི་ཡུལ་གྱི་སློབ་དཔོན་ཀིངྐརས་བདེན་དཔང་བྱས་ཀྱང་ད་དུང་དོགས་པ་མི་ཆོད་ན། གཞན་རྣམས་ཐམས་ཅད་རྫུན་པའི་གྲལ་དུ་སྐྱོལ་ལ་རང་ཉིད་གཅིག་པུ་བདེན་པའི་གྲལ་དུ་སྡོད་ཅིག
ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོའི་མན་ངག་གི་སྨད་ཙམ་ལས།
གལ་ཏེ་བདག་མེད་རྟོགས་པ་ཡི། །སྐྱེ་བོ་དེ་འདྲ་ཡོད་ན་ནི། །
ཆོས་ཡོད་ཐོས་པས་མི་དགའ་ཞིང༌། །ཆོས་མེད་པས་ཀྱང་སྐྱོ་བ་མིན། །
འདི་ཡང་རྒྱ་འགྱུར་གྱི་ཤེར་ཕྱིན་མན་ངག་ལས་ཐད་ཀར་བསྒྱུར་བ་ཡིན་པས་བོད་འགྱུར་གྱི་བཞི་བརྒྱ་པའི་རྩ་ཚིག་དང་བསྡུར་ན་ཅུང་ཟད་མི་འདྲའོ། ། ཞེས་པའི་བཞི་བརྒྱ་པའི་ཚིག་དྲངས་པའི་ཕྱིར་རོ་གསུངས་མོད། གལ་ཏེ་ལུང་གོང་མར་དོགས་པ་མ་ཆོད་ན་འདི་ཡང་གང་ལས་གང་དུ་དྲངས་པའི་དོགས་པ་མི་ཆོད་དོ། །འོ་ན་ཤླཽཀ་འདི་དང་གོང་དེ་མ་ཐག་གི་ཚིགས་བཅད།
ཆོས་འདི་གང་གིས་ཤེས་གྱུར་པ། །དེ་ནི་གཞན་ལ་མི་དགའ་སྟེ། །
དེས་ན་བདག་ལ་ཆོས་འདི་ནི། །འཇིགས་པའི་སྒོ་དང་འདྲ་བར་སྣང༌། ། ཞེས་པ་གཉིས་ཀྱང་ཚིག་དོན་གྱི་འབྲེལ་བབས་ལ་ལེགས་པར་བརྟག་ན། གཅིག་མཐུན་འབྱུང་བས། རྩོམ་པ་པོ་གཅིག་གིས་དུས་གཅིག་ཏུ་ཐར་ཆགས་སུ་བྲིས་པར་ཁས་ལེན་དགོས་ལ། དེ་ལྟར་མིན་ན་གོང་དུའང་རྟགས་མ་གྲུབ་བོ་ཞེ་ན། དེ་གཉིས་མི་འདྲ་སྟེ། གོང་གི་དེ་ནི་ཤླཽཀ་ཐམས་ཅད་ལུང་དྲངས་པ་ཡིན་པས་གལ་ཏེ་ལུང་ཁུངས་ཐ་དད་ཡིན་ན། ཚིག་དོན་གཉིས་ཀར་རྩོམ་ཉམས་གཅིག་མཐུན་འབྱུང་བ་ཤིན་ཏུ་དཀའ་ལ། འདིར་ནི་ཤླཽཀ་འོག་མ་ལུང་འདྲེན་དང་ཤླཽཀ་གོང་མ་འཕགས་པ་ལྷས་བརྩམས་པ་ཡིན་པས་ལུང་གི་རྩོམ་ཉམས་དང་མཐུན་པར་བྱེད་དུ་ཡོད་པས་སོ། ། འོན་ཀྱང་ཤེར་ཕྱིན་མན་ངག་གི་གཞུང་ཚིག་ཡོངས་རྫོགས་ཀླུ་སྒྲུབ་ཀྱི་ཡིན་པའི་ངེས་པ་ནི་མེད་དེ། སྔོན་གྱི་དཔེ་ཆ་ཐམས་ཅད་བྲིས་མ་ཤ་སྟག་ཡིན་པས། ཡི་གེར་ཆད་ལྷག་དང༌། རྩ་ཚིག་ལ་མཆན་འགྲེལ་ཡོད་པ་རྣམས་འབྲི་བཤུས་སྐབས་ཡི་གེ་ཆེ་ཆུང་གི་ཁྱད་པར་མ་ཕྱེད་པར་ཐད་ཀར་བྲིས་པ་མ་དག་རྒྱུན་འབྱམས་སུ་སོང་བས་རྩ་འགྲེལ་དབྱེར་མེད་དུ་འདྲེས་པར་གྱུར་པ། སཾསྐྲྀཏའི་རྒྱ་དཔེ་རྙིང་པ་རྣམས་ཀྱང་གཅིག་མཐུན་མིན་པ་ཤིན་ཏུ་མང་སྟེ། དོན་འདི་ལ་དགོངས་ནས་སློབ་དཔོན་སེང་གེ་བཟང་པོས་ཉི་ཁྲི་ལེའུ་བརྒྱད་མ་ལས།
ལྟ་བ་མང་པོས་ཀུན་དུ་དཀྲུགས་པས་དེ་ལྟར་རྩོད་པའི་དུས་འདིར་ཀློག་པའང་ཤིན་ཏུ་ཉུང༌། །
གླེགས་བམ་དུ་མའི་ཚིག་རྣམས་མི་མཐུན་ཐ་དད་གྱུར་པ་མཐོང་ནས་དད་པས་འདིར། །
རྒོལ་བའི་གླང་པོའི་དབང་པོ་ཁྲོས་པས་འོངས་བའི་ཀླད་འགེམས་སེང་གེ་བཟང་པོ་བདག །
གང་གིས་དག་པར་གཏུགས་པ་འཇིག་རྟེན་དོན་དུ་མཉམ་པར་བཞག་པ་མཁས་པས་བླང་བར་གྱིས། ། ཞེས་གསུངས་སོ། །འོ་ན་ཉི་ཁྲི་ལེའུ་བརྒྱད་མ་དེ་སློབ་དཔོན་སེངྒེ་བཟང་པོས་དག་པར་གཏུགས་པ་ཙམ་ཡིན་པར་གསུངས་ན་ཅིའི་ཕྱིར་བཀའ་འགྱུར་གྱི་གྲལ་དུ་མི་འཇོག་ཅེ་ན། འདི་ལ་རྒྱུ་མཚན་གཉིས་ཡོད་པར་སྙམ་སྟེ། རྒྱུ་མཚན་དང་པོ་ནི། དེའི་དུས་ཀྱི་ཡུམ་བར་མའི་གླེགས་བམ་ཕན་ཚུན་བར་དུ་ཚིག་གི་གོ་རིམ་དང་ཚིག་སྣ་རིང་ཐུང་དང་། ཚིག་དང་ལེའུ་མང་ཉུང་ལ་ཅུང་ཟད་མི་མཐུན་པ་ཤིན་ཏུ་མང་བ་ནི། རང་རེ་བོད་ཀྱི་བཀའ་འགྱུར་ཁྲོད་དུ་བཞུགས་པའི་ཡུམ་བར་མ་ལོ་ཆེན་ཡེ་ཤེས་སྡེ་ལ་སོགས་པའི་དུས་སུ་བོད་ཡིག་ཏུ་བསྒྱུར་བ་ལེའུ་བདུན་ཅུ་རྩ་དྲུག་ཡོད་པ་དང༌། ལོ་ཆེན་ཞོན་ཙང་ནས་རྒྱ་ཡིག་ཏུ་བསྒྱུར་བའི་ཡུམ་བར་མ་ལ་ལེའུ་བརྒྱད་ཅུ་གྱ་ལྔ་ཡོད་པ་དང༌། ལོ་ཆེན་གཞོན་ནུ་སྲོག་གིས་རྒྱ་ཡིག་ཏུ་བསྒྱུར་བའི་ཡུམ་བར་མ་ལ་ལེའུ་དགུ་བཅུ་ཡོད་པ་དང༌། རྒྱ་གར་གྱི་པཎྜིཏ་ཞི་བ་བཟང་པོ་དང་ལོ་ཙཱ་བ་ཚུལ་ཁྲིམས་རྒྱལ་བ་གཉིས་ཀྱིས་བོད་ཡིག་ཏུ་བསྒྱུར་བའི་ཉི་ཁྲི་ལེའུ་བརྒྱད་མ་ལ་ལེའུ་བདུན་ཅུ་ཡོད་པ་རྣམས་བསྡུར་ནས་གཟིགས་ན་གསལ་བས། ཉི་ཁྲི་ལེའུ་བརྒྱད་མ་འདིའི་ཚིག་གི་ཚོགས་ནི་ཤིན་ཏུ་རྒྱས་ཤིང་ཕུན་སུམ་ཚོགས་པར་ཡོད་པས་དཔེ་གཅིག་གི་ནང་དུ་མ་ཚང་བ་རྣམས་དཔེ་གཞན་ནས་བསྡུས་ཏེ་བསྣན་པ་ཡིན་གྱི། མར་འཕྲི་ནས་ཇེ་ཉུང་དུ་གཏོང་བ་ནི་ཡིན་ཚོད་མི་གདའོ། །དེས་ན་མ་དཔེ་ལ་མཆན་འགྲེལ་ཡོད་པ་རྣམས་འབྲི་བཤུས་སྐབས་ཡི་གེ་ཆེ་ཆུང་གི་ཁྱད་པར་མ་ཕྱེད་པར་ཐད་ཀར་བྲིས་པའང་སྲིད་པས་ཐམས་ཅད་རྩ་གཞུང་ཡིན་པའི་ངེས་པ་མེད་དམ་སྙམ་མོ། །འོན་ཀྱང་ཉི་ཁྲི་ལེའུ་བརྒྱད་མ་འདིའི་ལེའུ་ཡི་གྲངས་ཚད་ནི་ཉུང་ཤོས་ཡིན་པས་རྒྱ་ནག་དང་བོད་ཀྱི་འགྱུར་གཞན་རྣམས་འདི་ལས་མང་བ་ཤ་སྟག་བྱུང་ངོ། །དེས་ན་ཉི་ཁྲི་ལེའུ་བརྒྱད་མ་འདི་མདོ་ཕན་ཚུན་བསྡུ་སྒྲིག་བྱས་ཤིང༌། མ་ཚང་བ་རྣམས་བསྣན་ནས་དག་པར་གཏུགས་པ་ཡིན་པས་བཀའ་འགྱུར་གྲལ་དུ་མ་བཞག་པ་ཡིན་ཏེ། དཔེར་ན་དགྲ་བཅོམ་པ་ཆོས་སྐྱབས་བཟང་པོས་སངས་རྒྱས་ཀྱིས་གསུངས་པའི་ཆོས་ཀྱི་ཚིགས་སུ་བཅད་པ་རྣམས་བསྡུ་སྒྲིག་མཛད་པའི་ཆེད་དུ་བརྗོད་པའི་ཚོམས་ཞེས་པ་དེ་བསྟན་འགྱུར་གྲལ་དུ་འཇོག་པ་ལས་བཀའ་འགྱུར་གྲལ་དུ་མི་འཇོག་པ་བཞིན་ནོ། །
རྒྱུ་མཚན་གཉིས་པ་ནི། ཉི་ཁྲི་ལེའུ་བརྒྱད་མ་འདི་ནི་ཡུམ་གྱི་སྦས་དོན་མངོན་པར་རྟོགས་པ་བརྒྱད་གཏན་ལ་ཕབས་པའི་བསྟན་བཅོས་མངོན་པར་རྟོགས་པའི་རྒྱན་གྱི་དགོངས་པ་ལྟར། ཡུམ་གྱི་སྦས་དོན་མཁྱེན་པ་གསུམ༌། སྦྱོར་བ་བཞི། འབྲས་བུ་ཆོས་སྐུ་དང་བཅས་པའི་དངོས་པོ་བརྒྱད་དེ། དོན་བདུན་ཅུའམ། མཁྱེན་གསུམ་གྱི་རྣམ་པ་བརྒྱ་དང་དོན་གསུམ་གྱི་རྣམ་བཞག་རྒྱས་པར་ཕྱེ་ནས་དེ་དག་གི་མདོ་ཚན་རྣམས་མ་ནོར་བར་སོ་སོར་བཅད་དེ། ཤེས་རབ་ཕ་རོལ་ཏུ་ཕྱིན་པ་སྟོང་ཕྲག་ཉི་ཤུ་ལྔ་པའི་མདོ་རིལ་པོའི་གོ་རིམ་དང་བསྟན་བཅོས་མངོན་པར་རྟོགས་པའི་རྒྱན་གྱི་སྐབས་བརྒྱད་ཀྱི་གོ་རིམ་མ་འཁྲུག་པར། ཚིག་དང་དོན་ཡོངས་སུ་རྫོགས་པ་ལེགས་པར་སྦྱར་ནས་སྒྲིག་པའམ་རྩོམ་པའི་བསྟན་བཅོས་ཡིན་གྱི་མདོའི་གྲལ་དུ་འཇོག་པ་མི་འཐད་དེ། རྗེ་བླ་མའི་ལེགས་བཤད་གསེར་ཕྲེང་ལས། དེ་རྗེས་སློབ་དཔོན་གྱིས་བསྡུས་དོན་འགྲེལ་པ་ཉི་ཁྲི་ལེའུ་བརྒྱད་མ་མཛད་ནས་སྦྱར་རོ། །ཞེས་མཛད་པ་པོ་སློབ་དཔོན་སེངྒེ་བཟང་པོ་ཡིན་པར་གསུངས་སོ། །གཞན་ཡང་བུ་སྟོན་ཆོས་འབྱུང་དུའང༌། དེའི་ཚེ་སློབ་དཔོན་སེང་གེ་བཟང་པོ་ཞེས་བྱ་བ་རྒྱལ་རིགས་ལས་རབ་ཏུ་བྱུང་བ། ཕྱི་ནང་གི་གྲུབ་མཐའ་ཐམས་ཅད་ལ་མཁས་པ་ཁྱད་པར་དུ་ཡུམ་གྱི་དོན་ལ་རིང་དུ་གོམས་པ་ཞིག་བྱུང་སྟེ། དེས་རང་གི་མཁན་པོ་རྣམ་སྣང་བཟང་པོ་ལ་བྱམས་པའི་སྒྲུབ་ཐབས་ཞུས་ནས་བསྒྲུབས་པས། རྨི་ལམ་དུ་དགེ་སློང་གུར་ཀུམ་གྱི་མདོག་ཅན་སྤྱོད་ལམ་མཛེས་པ་ཞིག་རྨིས་ཏེ། ཤར་ཕྱོགས་ཁརས་པཱ་ཎིར་སོང་ཞིག །ཅེས་ལུང་བསྟན་ནོ། །སད་དེ་དེར་སོང་ནས་ཞག་གསུམ་དུ་སྨྱུང་གནས་བྱས་ཏེ། རྨི་ལམ་བརྟགས་པས་ཐོ་རངས་རྨི་ལམ་ན། ཨོ་ཏྱནྟ་པུ་རི་བི་ཧ་རིའི་གནྡྷོ་ལའི་སྟེང་གི་ནམ་མཁའ་ལ་སྤྲིན་ཕུང་འཐུག་པོ་ཞིག་གི་གསེབ་ན། ལྷའི་ལུས་སྟོད་སྤྲིན་གྱི་གསེབ་ནས་ཕྱུང་ནས་མཆོད་རྫས་སྣ་ཚོགས་ཀྱིས་མཆོད་པ་མཐོང་སྟེ། ཅི་བྱེད་དྲིས་པས། རྗེ་བཙུན་བྱམས་པ་བརྒྱད་སྟོང་པ་གསུང་བ་ལ་མཆོད་པ་བྱེད་པ་ཡིན་ཟེར་ཏེ། རིང་དུ་བལྟས་པས་རྗེ་བཙུན་ཞལ་གསེར་མདོག་ཅན་སྤྱི་གཙུག་མཆོད་རྟེན་གྱིས་སྤྲས་པ་ཕྱག་གཡས་ཆོས་འཆད་ཀྱི་ཕྱག་རྒྱ་མཛད་པ་ཙམ་ཞིག་མཐོང་ནས་ཕྱག་དང་མཆོད་པ་བྱས་ཏེ། ཉིད་ཀྱི་བསྟན་བཅོས་ལ་དེང་སང་འགྲེལ་པ་མང་དུ་མཆིས་ན། གང་གི་རྗེས་སུ་འཇུག་པར་བགྱི་ཞེས་ཞུས་པས། ཐམས་ཅད་ཀྱི་གཞུང་ལེགས་པར་རྟོགས་ལ། འཐད་པ་བསྡུས་ཏེ། ཁྱོད་ཀྱིས་ཕྱོགས་གཅིག་ཏུ་རྩོམས་ཤིག །ཅེས་གནང་བ་ཐོབ་བོ། །སད་དེ་མཆོད་པ་བྱས་ཏེ། བསྟན་བཅོས་རྩོམ་པའི་སྦྱིན་བདག་བཙལ་པའི་ཕྱིར། ཤར་ནས་ནུབ་ཏུ་བྱོན་པ་ན། རྒྱལ་པོ་ས་སྐྱོང་གིས་ཡུམ་འཆོད་པ་ལ། སློབ་དཔོན་སེང་གེ་བཟང་པོ་མཁས་པར་ཐོས་ནས། གདན་འདྲེན་དུ་བཏང་པའི་ཕོ་ཉ་དང་པྲད་ནས་གདན་དྲངས་ཏེ། འཕགས་པའི་འགྲེལ་པ་དང་མཐུན་པ་ཉི་ཁྲིའི་བསྡུས་དེན་ལེ་བརྒྱད་མ་དང་བརྒྱད་སྟོང་འགྲེལ་ཆེན་དང་། དོན་གསལ་འགྲེལ་པ་དང་། སྡུད་འགྲེལ་རྟོགས་པར་སླ་བ་དང་། ཤེས་ཕྱིན་སྒོམ་པ་ལ་སོགས་པ་མཛད་དོ། །ཞེས་གསུངས་ཏེ། འདི་དག་གིས་ནི་ས་བཅད་ཉི་ཤུ་པ་ཀླུ་སྒྲུབ་འདས་ནས་རྣམ་ཐར་འདི་བརྩམས་པའི་བར་ལོ་བརྒྱ་ཙམ་སོང་བའི་རིང་ལ་དབུ་མའི་བསྟན་པ་དར་ཞིང༌། དེའི་རྗེས་སུ་རིམ་བཞིན་ཇི་ལྟར་ཉམས་པའི་སྐོར་གསུངས་སོ། ། ཡང་ཚིག་གསལ་ལས། མདོ་སྡེ་ཀུན་ལས་བཏུས་དང་གཏམ་བྱ་རིན་ཆེན་ཕྲེང་དང་ཡང་དག་བསྟོད་པ་དང༌། ། འབད་པས་ཤིན་ཏུ་ཡུན་རིང་འཕགས་པའི་བསྟན་བཅོས་ལས་བསྟན་ཚིག་ལེར་བྱས་དེ་དང༌། །རིགས་པ་དྲུག་ཅུ་ཞེས་བྱ་རྣམ་པར་འཐག་བཅས་སྟོང་ཉིད་བདུན་ཅུ་པ་དེ་དང༌། །གང་ཡང་རྩོད་པ་རྣམ་པརབཟློག་པ་བཀོད་པ་དེ་དག་ཀྱང་ནི་མཐོང་གྱུར་ཞིང༌། །ཞེས་པས་ནི་ཟླ་བ་གྲགས་པས་དངོས་སུ་གཟིགས་མྱོང་བའི་ཀླུ་སྒྲུབ་ཀྱིས་མཛད་པའི་བསྟན་བཅོས་གཙོ་བོ་དག་གི་མཚན་ཐོ་བཀོད་པར་མཛད་དེ། ༡མདོ་སྡེ་ཀུན་ལས་བཏུས་པ་དང༌། ༢དབུ་མ་རིན་ཆེན་ཕྲེང་བ། ༣ཡང་དག་བསྟོད་པ། ༤དབུ་མ་རྩ་བའི་ཚིག་ལེའུ་བྱས་པ་ཤེས་རབ། ༥རིགས་པ་དྲུག་ཅུ་པ། ༦ཞིབ་མོ་རྣམ་པར་འཐག་པ། ༧སྟོང་ཉིད་བདུན་ཅུ་པ། ༨རྩོད་པ་བཟློག་པ་དང་བཅས་པ་སྟེ། རིགས་ཚོགས་དྲུག་གི་སྟེང་དུ་མདོ་བཏུས་དང་ཡང་དག་བསྟོད་པ་གཉིས་བསྣན་པས་བརྒྱད་དུ་གསུངས་པས། འདི་དག་ནི་ཀླུ་སྒྲུབ་ཀྱིས་མཛད་པའི་དབུ་མའི་གཞུང་ཁུངས་མ་ཡིན་པར་གྲུབ་པས། ས་བཅད་བཅོ་ལྔ་པ་ཀླུ་སྒྲུབ་ཀྱིས་མཛད་པའི་བསྟན་བཅོས་ཀྱི་མཚན་ཐོའི་ནང་དུ་ཡོད་པ་དང་བསྣན་དགོས་ཅི་རིགས་པ་དག་གོ།
སྨྲས་པ།
དཔ༵ལ་ལྡན་ཟླ་བའི་གཞུང་ལ་ཁུངས་བཅོལ་ནས། །
དཔ༵ལ་མགོན་ཀླུ་ཡི་རྣམ་ཐར་ལ་དཔྱོད་ན། །
དཔ༵ལ་མཆོག་བློ་གྲོས་དོན་གཉེར་སྐྱེས་བུ་ལ། །
དཔ༵ལ་གྱི་ཡོན་ཏན་འཐོབ་པར་གདོན་མི་ཟ། །
ཞེས་པ་ནི་བར་སྐབས་ཀྱི་ངལ་གསོ་བའི་ཚིགས་སུ་བཅད་པའོ། ། ༼འཕྲོ་མུ་མཐུད་འགོད་རྒྱུ།
·རྩོམ་ཡིག་གོང་མ:དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད།༣
·རྩོམ་ཡིག་འོག་མ:དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༥
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·རྗེ་ལམ་རིམ་པའི་རྣམ་ཐར་མདོར་བསྡུས། 2015/7/12 14:59:21
·འཕགས་པ་ཐོགས་མེད་ཀྱི་རྣམ་ཐར་སྔོན་མེད་ལེགས་བཤད་དགའ་སྟོན། 2015/6/24 11:31:41
·དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་་ལུང་རིགས་གཏེར་མཛོད།༨ 2014/11/19 13:34:06
·དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༧ 2014/11/19 13:19:56
·དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༥ 2014/11/12 20:48:06
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 12:49:26 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 16:38:46 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/17 1:13:24 [来自: 112.5.248.229]

འབྲེལ་ཡོད་དཔྱད་བརྗོད 43 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།22.46MS