ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> མི་སྣ།
 རྩོམ་ཡིག་ཀློག་པ།

དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༦

  རྩོམ་པ་པོ:བཞག་སྤྲུལཡོང་ཁུངས:ནང་རིགགཟིགས་གྲངས:7130ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2014/11/19 13:13:02ཚོགས་ཡར་སྤྲོད:admin
༄༅། ། དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ཆེན་མོ་ལུང་རིགས་རྒྱ་མཚོའི་གཏེར་མཛོད་ཅེས་བྱ་བ་བཞུགས་སོ། །༦
 
ལི་ཐང་བཞག་པ་སྐྱེ་མིང་འཇམ་དབྱངས་མཁས་གྲུབ་ཀྱིས་བརྩམས།
  དྲུག་པ་དུས་ཕྱིས་རྒྱ་གར་དུ་གྲགས་པ་རྣམས་བུ་སྟོན་ཐམས་ཅད་མཁྱེན་པའི་ཆོས་འབྱུང་ལས་ཇི་ལྟར་བྱུང་བ་ནི། དེ་ཡང་བུ་སྟོན་ཐམས་ཅད་མཁྱེན་པ་དང་ཇོ་ནང་ཏཱ་ར་ནཱ་ཐ་གཉིས་ཀྱིས་ཇི་ལྟར་བསྒྱུར་བ་རྣམས་ཕྱོགས་གཅིག་ཏུ་བཀོད་དགོས་དོན་ནི། }ར་བོད་དུ་བསྒྱུར་བའི་ཀླུ་སྒྲུབ་ཀྱི་རྣམ་ཐར་ཅུང་ཟད་རྒྱས་ལ་ཁུངས་བཙན་པ་ནི་བུ་སྟོན་ཆོས་འབྱུང་དང་ཇོ་ནང་ཏཱ་ར་ནཱ་ཐའི་རྒྱ་གར་ཆོས་འབྱུང་དང་བཀའ་བབས་བདུན་ལྡན་གྱི་བརྒྱུད་པའི་རྣམ་ཐར་དང་བཅས་པ་ཡིན་ལ། དེ་དག་ཀྱང་སྤྱི་ལོ་༡༢༩༠ནས་༡༦༣༤བར་དུ་རྒྱ་གར་དུ་གྲགས་པའི་ཀླུ་སྒྲུབ་ཀྱི་རྣམ་ཐར་རྣམས་བོད་ཡིག་ཏུ་བསྒྱུར་བ་ཡིན་ནོ། །དེས་ན་རྒྱ་གར་གྱི་ཡུལ་འདི་དོན་དངོས་ཀྱི་ལོ་རྒྱུས་དང་ལོ་རབས་ལ་དེ་ཙམ་དོ་སྣང་མེད་ཅིང༌། ངོ་མཚར་ཆེ་ཞིང་ཡ་མཚན་པའི་རྟགས་མཚན་ཇི་ལྟར་བྱུང་བ་དང་ཚེ་ལོ་བརྒྱ་ཕྲག་ཇི་ཙམ་བཞུགས་པ་སོགས་ལྷ་སྒྲུང་དང་འབྲེལ་བའི་གཏམ་རྒྱུད་ལ་དོ་སྣང་ཧ་ཅང་ཆེན་པོ་ཡོད་པའི་མི་རིགས་ཤིག་ཡིན་སྟབས། དུས་རབས་མི་འདྲ་བར་འཕགས་མཆོག་ཀླུ་སྒྲུབ་ཀྱི་རྣམ་ཐར་ལའང་གསུངས་རྒྱུན་མི་འདྲ་བ་མང་པོ་ཞིག་བྱུང་ཡོད་པས། དོན་དངོས་གང་ཡིན་གྱི་དབྱེ་བ་ཤིན་ཏུ་འབྱེད་དཀའ་མོད། འོན་ཀྱང་སྤྱིའི་ཆོས་ཉིད་ལ། ཀླུ་སྒྲུབ་ཕེབས་པའི་དུས་དང་ཇི་ཙམ་ཉེ་བ་དེ་ཙམ་གྱི་ཁུངས་བཙན་པར་བྱེད་པས། }་རྩོམ་རྣམས་ཁུངས་བཙན་ཞིང་ཕྱིས་སུ་བརྩམས་པ་རྣམས་དེའི་ཁ་སྐོང་ལྟ་བུར་གོ་བ་བླངས་ན་བཟང་བར་སེམས་སོ། །འོ་ན་བུ་སྟོན་ཆོས་འབྱུང་དང་ཇོ་ནང་ཏཱ་ར་ནཱ་ཐའི་རྒྱ་གར་ཆོས་འབྱུང་དང་བཀའ་བབས་བདུན་ལྡན་གྱི་བརྒྱུད་པའི་རྣམ་ཐར་རྣམས་རང་རང་གི་གསུང་འབུམ་ན་བཞུགས་ཤིང༌། ལོགས་སུ་དཔེ་བསྐྲུན་བྱས་པའང་ཡོད་པས་འདིར་བཀོད་པས་ནི་ཡིག་ཚོགས་ཤིན་ཏུ་ཆེ་བར་གྱུར་ཅིང་དགོས་པའང་མེད་དོ་ཞེ་ན། སྨྲ་བར་བྱ་སྟེ། དཔེར་ན་རྒྱུ་སྤུས་དང༌། རིན་ཐང་དང༌། ཚོན་གྱི་ཁ་དོག་དང༌། དབྱིབས་དང༌། ཆེ་ཆུང་གི་ཚད་དང༌། བཟོའི་ཁྱད་པར་དང༌། བྱེད་ལས་སོགས། ཡོ་བྱད་མི་འདྲ་བ་གྲངས་ལས་འདས་པ་དང་ལྡན་པའི་ཚོང་ཁང་དུ་ཉོ་སྒྲུབ་བྱེད་པར་ཕེབས་ན། རང་རང་ལ་གང་མཁོ་བའི་དངོས་པོ། དཔེར་ན་ཞྭ་དང༌། ལྷམ་དང༌། གོས་དང་འཚོ་བའི་ཡོ་བྱད། གང་དང་གང་འདོད་པའི་དངོས་པོ་དེ་དང་དེ་ལྟ་ཁོ་ན་རྙེད་པར་འགྱུར་གྱི། གཞན་ཚོང་ཁང་ཆུང་ངུའམ་ཅ་ལག་ཉུང་ངུ་ལས་མེད་སར་ཕྱིན་ན་ནི། རང་གིས་གང་དང་གང་འདོད་པའི་དངོས་པོ་དེ་དག་ཡིད་དང་མཐུན་པ་རྙེད་པར་མི་ནུས་སོ། །དེས་ན་འདིར་ཡང་རྒྱ་གར་ནག་བོད་གསུམ་གྱི་མཁས་གྲུབ་ལོ་པཎ་ཁུངས་མ་རྣམས་ཀྱིས་གསུངས་པའི་གཞུང་ཚིག་རྣམས་རྫོགས་པར་བཀོད་པས་ནི། འཕགས་མཆོག་ཀླུ་སྒྲུབ་ཀྱི་རྣམ་པར་ཐར་པ་འདི་དག་ལ་བསྲེགས་བཅད་བརྡར་བའི་གསེར་བཞིན་དུ་ཡང་དག་པའི་རིགས་པས་ལེགས་པར་བརྟག་པའི་གོ་སྐབས་བཟང་པོ་ཞིག་ཐོབ་པར་འགྱུར་བས། ཆོས་ཀྱི་རྗེས་སུ་འབྲངས་པའི་དབང་རྣོན་གྱི་དད་པ་རྣམ་པར་དག་པ་ཞིག་འཁྲུངས་བར་ནུས་ལ། དེ་ལྟར་ན་མཛད་པ་པོ་དེ་ལས་བྱུང་བའི་ཟབ་མོ་དབུ་མའི་ལམ་ལའང་ཁུངས་བཙན་པའི་ཆོས་སུ་ཡིད་ཆེས་པའི་མི་ཕྱེད་པའི་དད་པ་བརྟན་པོ་ཞིག་རྙེད་པར་འགྱུར་ཏེ། རྗེའི་ལམ་རིམ་ཆེ་ཆུང་རྣམས་ལས། ཆོས་ཁུངས་བཙུན་པར་བསྟན་པའི་ཕྱིར་མཛད་པ་པོའི་ཆེ་བ་བསྟན་པར་གསུངས་པས་སོ། །འདི་དག་ལས་གང་ཞིག་ནི་ལོ་རྒྱུས་དངོས་ཡིན། གང་ཞིག་ནི་དད་པ་དང་དག་སྣང་ལ་འཆར་བ་ཡིན། གང་ཞིག་ནི་གཏམ་རྒྱུད་དང་ལྷ་སྒྲུང་དང་སྦྱར་ནས་གསུངས་པ་ཡིན། གང་ཞིག་ནི་དེའི་དུས་ཀྱི་གདུལ་བྱ་རྣམས་དྲངས་པའི་སླད་དུ་ཡུལ་དུས་ཀྱི་མོས་པ་དང་མཐུན་པར་ཐབས་མཁས་ཀྱི་གསུང་བྱོན་པ་ཡིན་པ་ལ་སོགས་པར་ལེགས་པར་བརྟགས་ཤིང་དཔྱད་ནས་ངེས་པར་བྱེད་པ་ནི་ཅིས་ཀྱང་གལ་ཆེའོ། །འོ་ན་ཅིས་ཕྱིར་གོང་གི་ཚུལ་རྣམ་པ་བཞིས་གསུངས་ཞེ་ན། ཚུལ་དང་པོ་ལོ་རྒྱུས་ཀྱི་དོན་དངོས་ཇི་ལྟ་བ་བཞིན་དུ་གསུངས་པ་ལ་དགོས་པ་ཡོད་དེ། དབང་རྣོན་རྣམས་ནི་དོན་དེ་ལ་ལུང་དང་རིགས་པའི་གནོད་པ་མ་མཐོང་བ་ན། དེ་ལྟ་ཡིན་པར་ཡིད་ཆེས་པའི་དད་པ་བརྟན་པོ་སྐྱེ་བར་འགྱུར་ལ། དོན་དེ་ལ་ལེགས་པར་མ་དཔྱད་པར་ཚམ་ཚོམ་དུ་ནི་མི་འཇུག་གོ། ཚུལ་གཉིས་པ་དད་པ་དང་དག་སྣང་ལ་འཆར་བ་ལྟར་གསུངས་པ་ལ་དགོས་པ་ཡོད་དེ། སྐྱེས་བུ་དམ་པ་ས་ལམ་གྱི་རྟོགས་པ་མཐོན་པོར་གཤེགས་པ་རྣམས་ལ་ནི་དག་པའི་སྣང་བར་སངས་རྒྱས་བྱང་སེམས་གཤེགས་ཟིན་རྣམས་དངོས་སུ་མཇལ་ནས་གདམས་པ་དང་རྗེས་སུ་བསྟན་པ་ཐོབ་པ་ལ་སོགས་པ་ནི་བསམ་གྱིས་མི་ཁྱབ་པའི་གནས་ཡིན་པས། རང་རེ་ཐ་མལ་བ་རྣམས་ཀྱི་དད་པའི་ཡུལ་ཙམ་དང༌། གང་ཟག་ཁྱད་པར་ཅན་རྣམས་ཀྱི་ནང་ཕན་ཚུན་གྱི་སྤྱོད་ཡུལ་ཁོ་ན་ཡིན་པས། དེས་དྲངས་དགོས་ཀྱི་སྐྱེ་བོ་རྣམས་ཀྱི་དོན་དུ་དེ་ལྟར་གསུངས་ན་དོན་ཆེན་པོར་འགྱུར་བའི་ཕྱིར་རོ། ། ཚུལ་གསུམ་པ་གཏམ་རྒྱུད་དང་ལྷ་སྒྲུང་དང་སྦྱར་ནས་གསུངས་པ་ལ་དགོས་པ་ཡོད་དེ། ཇི་སྐད་དུ་འགྲེལ་བ་དོན་གསལ་ལས། རེ་ཞིག་དད་པའི་རྗེས་སུ་འབྲངས་བ་རྣམས་ནི་འདི་ལ་ཐེ་ཚོམ་མེད་པར་མྱུར་དུ་རབ་ཏུ་དད་པ་སྐྱེའོ། །ཞེས་གསུངས་པ་ལྟར། དབང་རྟུལ་དད་པའི་རྗེས་སུ་འབྲང་བ་རྣམས་ནི་གཞུང་ཆེན་པོའི་ལུང་དང༌། ཡང་དག་རིགས་པའི་ལམ་ནས་བརྟག་ཅིང་དཔྱད་པར་མི་ནུས་ཤིང་དོན་དུའང་མི་གཉེར་ལ། ཤིན་ཏུ་སྙན་པའི་གཏམ་རྒྱུད་དང་ལྷ་སྒྲུང་དང་སྦྱར་ནས་གསུངས་ན་བཅོས་མིན་གྱི་དད་པ་སྐྱེ་བས་ན་དོན་ཆེན་པོར་འགྱུར་བའི་ཕྱིར་རོ། །ཚུལ་བཞི་པ་དེའི་དུས་ཀྱི་གདུལ་བྱ་རྣམས་དྲངས་པའི་སླད་དུ་ཡུལ་དུས་ཀྱི་མོས་པ་དང་མཐུན་པར་ཐབས་མཁས་ཀྱི་གསུང་བྱོན་པ་ལ་དགོས་པ་ཡོད་དེ། ཡུལ་དུས་ཀྱི་མོས་པ་ཟེར་བ་དེ་དབང་ཤིན་ཏུ་བཙན་པས། རྐང་གཅིག་ཡུལ་དུ་སླེབས་པ་ན། །རྐང་གཉིས་པ་ལ་མིར་མི་བརྩི། །གསུངས་པ་ལྟར། གལ་ཏེ་ཡུལ་དུས་ཀྱི་མོས་པ་དང་མི་མཐུན་ན་ཇི་ལྟ་བུའི་ཡང་དག་པའི་དོན་ཞིག་ཡིན་ཡང༌། དེ་ལ་དོན་དུ་གཉེར་བ་མེད་པས། དཔེར་ན་དེ་དུས་ཀྱི་རྒྱ་གར་བ་རྣམས་ལ་ཚེ་ལོ་བརྒྱ་ཕྲག་མང་པོ་བཞུགས་པར་གསུངས་ན་རྨ་བྱས་འབྲུག་སྒྲ་ཐོས་པ་ལྟར་འགྱུར་བས། རྒྱལ་རབས་དང་ལོ་རྒྱུས་ཀྱི་དོན་དངོས་དང་མི་མཐུན་ཡང༌། དེའི་དུས་ཀྱི་གདུལ་བྱ་རྣམས་དྲངས་པའི་དོན་དུ་ཐབས་མཁས་ཀྱི་གསུང་བྱོན་པ་ལ་ཉེས་པ་ག་ལ་ཡོད་དེ། གལ་ཏེ་ཡོད་ན་སངས་རྒྱས་ཀྱི་གསུང་ལ་དྲང་ངེས་ཀྱི་དབྱེ་བ་མི་འཐད་པར་འགྱུར་རོ། ། དེ་ལ་བུ་སྟོན་ཆོས་འབྱུང་ལས་ཇི་ལྟར་བྱུང་བ་དངོས་ནི།  སྤྱི་ལོ་༡༢༩༠ནས་༡༣༦༤་ལོ་ལ་བུ་སྟོན་རིན་པོ་ཆེས་མཛད་པའི་ཆོས་འབྱུང་གསུང་རབ་རིན་པོ་ཆེའི་མཛོད་ཅེས་བྱ་བར་དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་བཀོད་པ་འདི་ལྟར། སངས་རྒྱས་འདས་ནས་ལོ་བཞི་བརྒྱ་ན་ལྷོ་ཕྱོགས་བེ་དརྦྷའི་ཡུལ་དུ་བྲམ་ཟེ་ཕུན་སུམ་ཚོགས་པ་ཞིག་ལ་བུ་མེད་པ་ན་རྨི་ལམ་དུ་བྲམ་ཟེ་བརྒྱ་ལ་ཆོས་སྟོན་དྲངས་ན་བུ་རྙེད་ཅེས་ལྷས་ལུང་བསྟན་ཏོ། །དེ་ནས་དེ་ལྟར་བྱས་ཏེ་གསོལ་བ་བཏབས་པས་ཟླ་བ་བཅུ་ན་ཁྱེའུ་ཞིག་བཙས་ཏེ་མཚན་མཁན་ལ་བསྟན་པས་མཚན་བཟང་མོད་ཀྱི། འོན་ཀྱང་ཞག་བདུན་གྱི་ཚེ་ལས་མེད་དོ་ཟེར། །དེ་ལ་ཅི་ཕན་དྲིས་པས་བྲམ་ཟེ་བརྒྱ་ལ་ཆོས་སྟོན་དྲངས་པས་ཟླ་བ་བདུན་དང༌། དགེ་སློང་བརྒྱ་ལ་ཆོས་སྟོན་དྲངས་པས་ལོ་བདུན་ཐུབ། དེ་ནས་ཐབས་མེད་དོ་ཟེར་རོ། དེ་ནས་དེ་བཞིན་བྱས་ཏེ་ལོ་བདུན་དུ་ཉེ་བ་ན། བུའི་རོ་མཐོང་བ་ཕ་མས་མི་བཟོད་པས་གཡོག་དང་བཅས་པ་འཁྱམ་དུ་བཏང་ངོ༌། །དེ་རིམ་གྱིས་སོང་སོང་སྟེ་ཁ་སརྤྱཱ་ཎི་པཱ་ཎིའི་ཞལ་བལྟས་ཏེ་རིམ་གྱིས་དཔལ་ནཱ་ལེནྡྲའི་སྒོ་དྲུང་དུ་སོང་སྟེ་སྙན་དངགས་ཀྱི་རིག་བྱེད་དག་བསྒྲགས་པ་ན། དེ་ན་བྲམ་ཟེ་ས་ར་ཧ་བཞུགས་པས་གསན་ནས་ནང་དུ་ཁྲིད་ནས་ཇི་ལྟར་གྱུར་པའི་རྒྱུ་མཚན་བཤད་པས། སློབ་དཔོན་ན་རེ། རབ་ཏུ་འབྱུང་ནུས་ན་ཐབས་ཡོད་གསུངས་པས་རབ་ཏུ་བྱུང༌། ཚེ་དཔག་མེད་འཆི་བདག་འཇོམས་པའི་དཀྱིལ་འཁོར་དུ་དབང་བསྐུར་ནས་གཟུངས་འདོན་དུ་བཅུག ཁྱད་པར་ལོ་བདུན་ལོན་པའི་ནུབ་མོ་མཚན་ཐོག་ཐག་བཏོན་པས་འཆི་བདག་ལས་ཐར་ཏེ་ཕ་མ་དང་ཕྲད་པས་ཀྱང་ཤིན་ཏུ་དགའོ། །དེ་ནས་བྲམ་ཟེ་ས་ར་ཧ་ལ་དཔལ་གསང་བ་འདུས་པ་ལ་སོགས་པའི་གཞུང་གདམས་པ་དང་བཅས་པ་ཞུས་སོ། །དེ་ནས་ནཱལེནྡྲའི་མཁན་པོ་སྒྲ་གཅན་འཛིན་བཟང་པོ་ལ་མཁན་པོ་ཞུས་ཏེ་བསྙེན་པར་རྫོགས་ཏེ་དགེ་སློང་དཔལ་ལྡན་ཞེས་གྲགས་སོ། །དེའི་ཚེ་ནཱ་ལེནྡྲའི་དགེ་འདུན་གྱི་ཞལ་ཏ་བ་བྱས་པའི་ཚེ་མུ་གེ་ཆེན་པོ་བྱུང་བ་ལ་གླིང་བར་ནས་གསེར་འགྱུར་གྱི་རྩི་བླངས་ཏེ་གསེར་འགྱུར་བྱས་ནས་དགེ་འདུན་གྱི་གདུགས་ཚོད་སྦྱར་ཏེ་དབྱར་གནས་ཐོན་པ་དང་དགེ་འདུན་རྣམས་ཀྱིས་མི་རིད་པ་དང་ཤི་བ་མཐོང་ནས་མུ་གེ་བྱུང་འདུག་པས་དགེ་འདུན་གྱི་གདུགས་ཚོད་ཇི་ལྟར་སྦྱར་ཞེས་དྲིས་པས་སྔར་གྱི་ཚུལ་བརྗོད་པས་དགེ་འདུན་ལ་མ་ཞུས་པར་དགེ་འདུན་ལོག་འཚོ་ལ་བཀོད་འདུག་པས་གནས་ནས་ཕྱུང་ལ་གཙུག་ལག་ཁང་དང་མཆོད་རྟེན་བྱེ་བ་གྱིས་ཤིག་ཅེས་བསྒོའོ། །དེ་ནས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་བསྒྲུབས་པས་ཐོབ་སྟེ་དེའི་ཚེ། དགེ་སློང་བདེ་བྱེད་ཅེས་པས་རིག་པའི་རྒྱན་ཞེས་པའི་གཞུང་འབུམ་ཕྲག་བཅུ་གཉིས་པ་བྱས་ནས་ཐམས་ཅད་སུན་ཕྱུང་བ་བྱུང་བས་དེ་གདུལ་བའི་དོན་དུ་ནཱ་ལེནྡྲར་ཆོས་གསུངས་སོ། དེའི་ཚེ་བྱིས་པ་གཉིས་ཆོས་མཉན་ཅིང་ས་འོག་ཏུ་སོང་བ་ལ་སུ་ཡིན་དྲིས་པས་ཀླུ་ཡིན་ཟེར་བ་ལ་སློབ་དཔོན་གྱིས་གནོད་སྦྱིན་གྱི་འདམ་ཁྱེར་ལ་ཤོག་གསུངས་པས། དེ་དག་གིས་ཀླུའི་རྒྱལ་པོ་ལ་ཞུས་པས་སློབ་དཔོན་སྤྱན་དྲངས་པས་དོན་དུ་འགྱུར་བར་མཁྱེན་ནས་ཀླུའི་ཡུལ་དུ་བྱོན་ནས་ཆོས་གསུངས་སོ། དེའི་ཚེ་ཀླུས་བཞུགས་པར་ཞུས་པས་ང་མཆོད་རྟེན་བྱེ་བ་བཞེངས་པའི་འདམ་འཚོལ་བ་དང་འབུམ་གདན་འདྲེན་དུ་འོངས་ཀྱི་བསྡད་མི་ཁོམ། ཕྱིས་འོང་སྲིད་གསུངས་ཏེ་འདམ་མང་པོ་དང༌། །འབུམ་དག་ཡེ་གེ་ཉུང་ངུ་ཡང་གདན་དྲངས་ཏེ། འབུམ་གྱི་ཞབས་ནས་བག་ཙམ་ཀླུས་མ་བསྐུར་ཞེས་གྲག་གོ ། དེ་ནས་འདམ་དེས་མཆོད་རྟེན་ལ་སོགས་བྱེ་བ་བྱས། ཀླུ་རྣམས་ཀྱིས་གྲོགས་བྱས་ཏེ་ཕལ་ཆེར་གྲུབ་ལ་འགའ་ཞིག་ཀླུ་ཡུལ་དུ་མི་འགྲོ་བའི་ཕྱིར་མ་བྱས་ཏེ་ཀླུ་སྒྲུབ་ཅེས་པའི་མིང་དུ་གྱུར་ཏོ། །དེ་ནས་ལི་ཁ་ར་ཤིང་འཕེལ་དུ་གསེར་འགྱུར་བྱས་ཏེ་སྦྱིན་པ་རྒྱ་ཆེན་པོ་བྱས་ཏེ་དེའི་ཚེ་བྲམ་ཟེ་རྒན་རྒོན་གཉིས་ལ་གསེར་མང་པོ་གནང་བས་དད་དེ་རྒན་པོས་ཉེ་གནས་བྱས་ཆོས་མཉན་ཏེ་ཤི་ནས་སློབ་དཔོན་ཀླུའི་བྱང་ཆུབ་ཏུ་གྱུར་ཏོ། དེ་ནས་ཤར་ཕྱོགས་པ་ཊ་བེ་སར་བྱོན་ནས་ལྷ་ཁང་མང་པོ་བཞེངས། ཡུལ་ར་དྷར་ཡང་བཞེངས། དྲིལ་བུ་ལྟ་བུའི་བྲག་གསེར་དུ་བྱ་བར་བཞེད་པ་ལྷས་བཀག་སྟེ། སྒྲ་མི་སྙན་དུ་གཤེགས་པའི་ལམ་གྲོང་ཁྱེར་ས་ལ་མ་ན་བྱིས་པ་ཛི་ཏ་ཀའི་ལག་རིས་ལས་རྒྱལ་པོར་ལུང་བསྟན་ནས་སྒྲ་མི་སྙན་དུ་བྱོན་ནས་ན་བཟའ་ཤིང་ལ་བཀལ་ཏེ་ཁྲུས་མཛད་པས་གོས་དེ་དག་གིས་ཁྱེར་བ་ལ། ངའི་ཡིན་གསུངས་པས་ང་བདག་ཅན་ཟེར་ནས་བལྟ་སྐད། དེར་དོན་བྱས་ཏེ་བྱོན་པས་སྔར་གྱི་བྱིས་པ་རྒྱལ་པོར་གྱུར་ཏེ་དེས་རིན་པོ་ཆེ་མང་དུ་ཕུལ་ཏེ་སྐྱེས་ལན་དུ་ཆོས་ཀྱི་རིན་པོ་ཆེའི་ཕྲེང་བ་གནང་ངོ༌། །སློབ་དཔོན་དེས། བསྟན་པའི་བྱ་བ་དགེ་འདུན་གྱི་ཞལ་ཏ་བྱས། མཆོད་རྟེན་ལྷ་ཁང་མང་པོ་བཞེངས། རྡོ་རྗེ་གདན་ལ་རྡོའི་དྲ་མིག་གིས་རྭ་བས་བསྐོར། དཔལ་འབྲས་སྤུངས་ཀྱི་མཆོད་རྟེན་གྱི་བཀོད་པ་བཞེངས། བསྟན་བཅོས་ལ་ནང་རིག་པ་ལ། ལྟ་བ་གཙོ་བོར་སྟོན་པ་ལ་མཐའ་བྲལ་གྱི་དབུ་མ་ལུང་གིས་སྟོན་པ་ལ་ལུང་གིས་སྟོན་པ་དབུ་མ་བསྟོད་པའི་སྐོར། རིགས་པས་སྟོན་པ་རིགས་པའི་ཚོགས། སྤྱོད་པ་གཙོ་བོར་སྟོན་པ་ལ་ལུང་གིས་སྟོན་པ་མདོ་ཀུན་ལས་བཏུས། རིགས་པས་སྟོན་པ་ཐེག་ཆེན་བློ་སྦྱོང༌། ཉན་ཐོས་རིགས་སད་པར་བྱེད་པ་རྨི་ལམ་ཡིད་བཞིན་གྱི་ནོར་བུ། རྟེན་ཁྱིམ་པའི་སྤྱོད་པ་གཙོ་བོར་སྟོན་པ་བཤེས་སྤྲིང༌། རབ་བྱུང་གི་སྤྱོད་པ་གཙོ་བོར་སྟོན་པ་བྱང་ཆུབ་ཀྱི་ཚོགས། སྔགས་ཀྱི་ཕྱོགས་ལ་ལྟ་སྤྱོད་མདོར་བསྡུས་པ་རྒྱུད་ཀུན་ལས་བཏུས། ལྟ་བ་གཏན་ལ་འབེབས་པ་བྱང་ཆུབ་སེམས་འགྲེལ། བསྐྱེད་རིམ་སྟོན་པ་འདུས་པའི་གྲུབ་ཐབས། མདོར་བྱས། མདོ་བསྲེ། དཀྱིལ་ཆོག་ཉི་ཤུ་པ། རྫོགས་རིམ་སྟོན་པ་རིམ་པ་ལྔ་ལ་སོགས་པ་མཛད་དོ། གསོ་བ་རིག་པའི་བསྟན་བཅོས་སྦྱོར་བ་བརྒྱ་པ་ལ་སོགས་པ་དང༌། ལུགས་ཀྱི་བསྟན་བཅོས་དམངས་ལ་གདམས་པ་སྐྱེ་བོ་གསོ་ཐིགས། བློན་པོ་ལ་གདམས་པ་ཤེས་རབ་བརྒྱ་པ། རྒྱལ་པོ་ལ་ཐེག་ཆེན་གྱི་ལྟ་སྤྱོད་ཟུང་འབྲེལ་དུ་སྟོན་པ་དབུ་མ་རིན་ཆེན་ཕྲེང་བ། གཞན་ཡང་རྟེན་འབྲེལ་གྱི་རྩིས། སྤོས་སྦྱོར་གསེར་འགྱུར་ལ་སོགས་རང་རྐང་དུ་བརྩམས་པ་མང་པོ་དང༌། གཞན་འགྲེལ་དུ་བཏགས་པ་གསང་འདུས་འགྲེལ་པ་དང་སཱ་ལུ་ལྗང་པའི་མདོ་ཚིགས་བཅད་དུ་བསྡུས་པ་ལ་སོགས་པ་མཛད་དོ། །ཕྱག་རྒྱ་བཞི་བ་པ་ནི། ཀླུ་སྒྲུབ་ཀྱིས་མཛད་པ་མིན་ནོ་ཞེས་མན་ངག་སྙེ་མར་བཤད་དོ། སློབ་དཔོན་ཤེས་རབ་འབྱུང་གནས་བློ་གྲོས་ཀྱིས། སྤྱོད་འཇུག་འགྲེལ་པར་སློབ་དཔོན་ཀླུ་སྒྲུབ་ཀྱིས་བསླབ་པ་ཀུན་ལས་བཏུས་པ་ཞིག་ཀྱང་མཛད་པར་བཤད་དོ། དེ་ལྟར་ལོ་དྲུག་བརྒྱར་བསྟན་པའི་བྱ་བ་མཛད་དོ། དེའི་ཚེ་རྒྱལ་པོ་མཐར་འགྲོ་ཞོན་ནམ་བདེ་སྤྱོད་བཟང་པོ་ལ་བུ་གཞོན་ནུ་ནུས་ལྡན་ཞེས་བྱ་བ་ཞིག་ལ་མས་གོས་བཟང་སྲུབ་མེད་པ་ཞིག་བྱིན་པས་འདི་ངས་རྒྱལ་སྲིད་འཛིན་དུས་སུ་དགོས་ཟེར་བ་ལ། མས་ཁྱོད་ཀྱིས་རྒྱལ་སྲིད་འཛིན་པ་མི་འོང༌། ཡབ་དང་སློབ་དཔོན་ཀླུ་སྒྲུབ་ཚེ་སྒྲུབ་དང་བཅུད་ལེན་སྟབས་སུ་བྱས་པས་གྲུབ་སྟེ་སློབ་དཔོན་དང་སྲོག་གཅིག་པ་ཡིན་ཟེར་བ་དང༌། དེས་དཔལ་གྱི་རི་ལ་སློབ་དཔོན་ཀླུ་སྒྲུབ་བཞུགས་སར་ཕྱིན་ཏེ་དབུ་བསླངས་པས་ཆོད་གསུང་སྟེ་རལ་གྲིས་བཅད་པས་མ་ཆོད་པ་ན། སློབ་དཔོན་ན་རེ། ངས་རྩྭ་ཀུ་ཤ་བཅད་པས་སྲོག་ཆགས་ཤི་བའི་རྣམ་སྨིན་ཡོད་པས་ཀུ་ཤས་ཆོད་གསུངས་ནས་བཅད་པས་སྐེའི་རྩ་བ་ནས། ང་ནི་བདེ་བ་ཅན་གྱི་འཇིག་རྟེན་དུ། །ཕྱིན་ནས་ལུས་འདི་ལ་ཡང་འཇུག་པར་འགྱུར། །ཞེས་ཚིགས་བཅད་བྱུང་ངོ། །དབུ་དེ་དེས་ཁྱེར་ཏེ་ཕྱིན་ནས་གནོད་སྦྱིན་མོས་འཕྲོགས་ཏེ་དཔག་ཚད་གཅིག་ཏུ་དོར་རོ། །དབུ་དང་སྐུ་ལུས་གཉིས་ཀ་མ་ཉམས་པར་ལོ་རེ་ཞིང་ཇེ་ཉེར་སོང་ནས་མཐར་འབྱར་ནས་བསྟན་པ་དང་འགྲོ་དོན་མཛད་ཅེས་གྲག་གོ། །ནཱ་གཱརྫུ་ནའི་ནཱ་ག་ནི་ཀླུ་སྟེ། ཆོས་ཀྱི་དབྱིངས་སུ་སྐྱེས་པ་རྟག་ཆད་གཉིས་ཀྱི་མཐའ་ལ་མི་གནས་པ། གསུང་རབ་རིན་པོ་ཆེའི་བང་མཛོད་ལ་མངའ་བརྙེས་པ། སྲེག་ཅིང་གསལ་བའི་ལྟ་བ་དང་ལྡན་པས་ཀླུའོ། ། ཨརྫུ་ན་ནི་སྲིད་སྒྲུབ་སྟེ། ཆོས་ཀྱི་རྒྱལ་སྲིད་སྐྱོང་བ་དང༌། ཉེས་པའི་དགྲ་ཚོགས་འདུལ་བས་སྲིད་སྒྲུབ་སྟེ། བསྡུས་པས་ཀླུ་སྒྲུབ་བོ། །ཚིག་གསལ་དུ། གང་ཞིག་མཐའ་གཉིས་གནས་ལ་གནས་བསལ་ཞིང༌། །རྫོགས་སངས་རྒྱས་བློ་རྒྱ་མཚོར་སྐྱེ་བ་བརྙེས། །དམ་ཆོས་མཛོད་ཀྱི་ཟབ་མོ་ཉིད་ཇི་ལྟར། །རྗེས་སུ་རྟོགས་བཞིན་ཐུགས་རྗེས་སྟོན་པར་མཛད། །གང་གི་ལྟ་བའི་མེ་དཔུང་གིས། །ད་དུང་ཕས་རྒོལ་གཞུང་ལུགས་ཀྱི། །བུད་ཤིང་དང་ནི་འཇིག་རྟེན་གྱི། ། ཡིད་ཀྱི་མུན་རྣམས་འཇོམས་པར་མཛད། །གང་གིས་གཉིས་མེད་ཡེ་ཤེས་གསུང་མདའི་ཚོགས། །ལྷ་དང་བཅས་པའི་གདུལ་བྱའི་འཇིག་རྟེན་ལ། །ཁམས་གསུམ་དག་ཏུ་རྒྱལ་ཐབས་ལེགས་མཛད་ནས། །སྲིད་པའི་དགྲ་སྡེ་མ་ལུས་འཇོམས་མཛད་པ། །ཀླུ་སྒྲུབ་དེ་ལ་ཕྱག་འཚལ་ནས་ནི་དེའི། །ཞེས་པ་དང༌། དབུ་ནི་དོན་དུ་གཉེར་བ་འོངས་ལ་ཐུགས་རྗེས་དབུ་ནི་བཅད་དེ་སྩོལ་མཛད་ནས། །བདེ་བ་ཅན་དུ་རྒྱལ་བའི་སྲས་པོ་ཀླུ་སྒྲུབ་གཤེགས་པར་གྱུར་པ་དེས་མཛད་པའི། །ཞེས་གསུངས་སོ། ། ཁ་ཅིག་སྤྲིན་ཆེན་པོའི་མདོ་ལས་ལི་ཙ་བྱི་འདི་ང་འདས་ནས་ལོ་བཞི་བརྒྱ་ན་ཀླུ་ཞེས་བྱ་བའི་དགེ་སློང་དུ་གྱུར་ནས། ངའི་བསྟན་པ་རྒྱས་པར་བྱེད་དེ་མཐར་འཇིག་རྟེན་གྱི་ཁམས་དང་བའི་འོད་དུ་སངས་རྒྱས་ཡེ་ཤེས་འབྱུང་གནས་འོད་དུ་འཚང་རྒྱའོ་ཞེས་བཤད་ཟེར་ཏེ། །སྤྲིན་ཆེན་ལས། ལྷོ་ཕྱོགས་དྲང་སྲོང་བྱི་པོའི་ཡུལ་དུ་རྒྱལ་པོ་རྒུད་པ་གསོ་བ་ཞེས་བྱ་བ་འབྱུང་སྟེ་དེའི་ཚེ་ལོ་བརྒྱད་ཅུ་པ་ན་དམ་པའི་ཆོས་ཞིག་པའི་ལྷག་མ་ཙམ་དུ་གྱུར་པ་ན། བསོད་ནམས་ལྡན་གྱི་གྲོང་ཁྱེར་བྱེ་མ་ཆེན་པོ་ཞེས་པའི་འབབ་ཆུ་མཛེས་འབྱོར་གྱི་བྱང་གི་འགྲམ་དུ་རྗེ་རིགས་འབྲ་གོ་ཅན་གྱིས་ཕྱོགས་སུ་ལི་ཙ་བྱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་དེ་བཞིན་གཤེགས་པའི་ཆོས་དབྱུང་བའི་ཕྱིར་ངའི་མིང་ཅན་དུ་སྐྱེའོ། །དེས་དེ་བཞིན་གཤེགས་པ་ཀླུ་རིགས་སྒྲོན་མའི་དྲུང་དུ་ཐུབ་པའི་བསྟན་པ་ལ་ཆོས་ཕྱིར་སྲོག་བཏོང་བར་དམ་བཅས་པ་དེས་བསྟན་པ་རྒྱས་པར་བྱེད་དོ། །ཞེས་འབྱུང་གི་ཀླུ་སྒྲུབ་ཀྱི་གསལ་ཁ་མེད་མོད། ཁ་ཅིག་ཀླུ་སྒྲུབ་ཀྱི་མཚན་ཤཱཀྱ་བཤེས་གཉེན་དུ་འདོད་པ་ལྟར་ན་བརྟག་ཅིང༌། རྔ་བོ་ཆེའི་མདོ་ལས། ཀླུ་སྒྲུབ་ལུང་བསྟན་པ་རྒྱས་པར་བཤད་ཅེས་པའང་བརྟག་པར་བྱའོ། ། དེའི་སྲས་སློབ་དཔོན་ཨཱརྱ་དེ་ཝ་ནི། སིངྒ་ལའི་གླིང་དུ་པདྨའི་སྦུབས་སུ་བརྫུས་ཏེ་སྐྱེས་པ་ལ་དེའི་རྒྱལ་པོས་བུར་བཟུང་སྟེ་ཆེར་སྐྱེས་པ་ན་སློབ་དཔོན་ཀླུ་སྒྲུབ་ཅན་དུ་བྱོན་ནས་སློབ་གཉེར་མཛད་པས་རིག་པའི་གནས་ཐམས་ཅད་དང་ཕྱི་ནང་གི་གྲུབ་མཐའ་མ་ལུས་པ་ལ་མཁས་པར་གྱུར་ཏེ། དེའི་ཚེ་མུ་སྟེགས་ཀྱི་སྟོན་པ་མ་ཁོལ་ཞེས་བྱ་བ་ལྷ་དབང་ཕྱུག་ཆེན་པོ་གྲུབ་སྟེ་མངལ་སྐྱེས་གང་གིས་ཀྱང་མི་ཐུབ་པའི་མཆོག་སྦྱིན་པ་ཞིག་ཡོད་པ་དེས་སངས་རྒྱས་ཀྱི་བསྟན་པ་ལ་གནོད་པ་བྱས་ཏེ་ཕལ་ཆེར་མུ་སྟེགས་ལ་བཙུད་དེ་ནཱ་ལེནྡྲར་ཕྱིན་ནོ། །ནཱ་ལེནྡྲ་པ་རྣམས་ཀྱིས། དཔལ་གྱི་རི་ལ་ཀླུ་སྒྲུབ་བཞུགས་པ་ལ་སྦྲན་པས། སློབ་དཔོན་ཨཱརྱ་དེ་ཝས་འདུལ་བར་ཞལ་གྱིས་བཞེས་ཏེ་བྱོན་པའི་ཚེ། ཤིང་གི་ལྷ་མོས་སྤྱན་སློང་བ་ལ་སྤྱན་གཅིག་སྦྱིན་པར་བཏང་ངོ༌། དེ་ནས་མུ་སྟེགས་ཕམ་པར་བྱས་པ་ན་མིག་གཅིག་པ་ཅི་འདྲ་འདི་ཞེས་སྨྲ་བ་ལ། དྲག་པོ་མིག་གསུམ་ལྡན་ཡང་དེ་ཉིད་མཐོང་བ་མེད། །བརྒྱ་བྱིན་མིག་སྟོང་ལྡན་ཡང་དེ་ཉིད་མཐོང་བ་མེད། །ཨཱརྱ་དེ་ཝ་མིག་གཅིག་པོ་ནི་གང་ཡིན་དེས། །སྲིད་པ་གསུམ་པོ་མ་ལུས་པ་ཡི་དེ་ཉིད་མཐོང༌། །ཞེས་གསུངས་ཤིང་ཆོས་ཀྱིས་ཚར་བཅད་དེ་བསྟན་པ་ལ་བཅུག་པས་པཎྜི་ཏ་ཆེན་པོར་གྱུར་ཏོ། །སློབ་དཔོན་འདི་ས་བརྒྱད་པ་པར་གྲགས་ཏེ། འཇམ་དཔལ་རྩ་རྒྱུད་ལས། །འཕགས་པ་མིན་ལ་འཕགས་པའི་མིང༌། ཞེས་གསུངས་པས་བརྟག་པར་བྱའོ། ། སློབ་དཔོན་འདིས་རང་བཞིན་མེད་པའི་དོན་རྒྱས་པར་སྟོན་པ་དབུ་མ་བཞི་བརྒྱ་པ། བསྡུས་ཏེ་སྟོན་པ་དབུ་མ་ལག་པའི་ཚད། དེ་ལ་རྩོད་པ་སྤོང་བ། འཁྲུལ་བ་ཟློག་པའི་གཏན་ཚིགས་སྒྲུབ་པ། མཚན་ཉིད་དང་སྔགས་ཀྱི་གྲུབ་མཐའི་རྣམ་གཞག་སྟོན་པ་ཡེ་ཤེས་སྙིང་པོ་ཀུན་ལས་བཏུས། སྔགས་ཕྱོགས་ལ་སྔགས་ཀྱི་ལྟ་སྤྱོད་གཏན་ལ་འབེབས་པ་ལ་མདོ་རྒྱུད་རྟོག་པའི་ལུང་བསྲེས་ནས་སྒྲུབ་པ་སྤྱོད་པ་བསྡུས་པའི་སྒྲོན་མ། རིགས་པས་སྒྲུབ་པ་སེམས་ཀྱི་སྒྲིབ་སྦྱོང༌། སྨིན་བྱེད་དབང་གི་ཆོ་ག་ལ་གདན་བཞིའི་དཀྱིལ་ཆོག་སྙིང་པོ་མདོར་བསགས། བསྐྱེད་རིམ་སྟོན་པ་གདན་བཞིའི་སྒྲུབ་ཐབས། ཡེ་ཤེས་མཁའ་འགྲོ་མའི་སྒྲུབ་ཐབས། གཏོར་ཆོག་རྫོགས་རིམ་སྟོན་པ་ཤིང་གཅིག་གི་དཀའ་འགྲེལ་ལ་སོགས་པ་མཛད་ཅིང་སྒྲོན་གསལ་གྱི་འགྲེལ་བཤད་མཛད་ཟེར་ཏེ། དུས་མཚུངས་མི་མཚུངས་བརྟག་པར་བྱའོ། །ཞེས་གསུངས་སོ། ། འདིའི་ནང་དུ་གོང་གི་རྣམ་ཐར་རྣམས་ཀྱི་གསལ་བྱེད་དུ་སོང་བ་དང༌། གོང་གི་རྣམ་ཐར་དང་གསུང་ཚུལ་མི་འདྲ་བ་དང༌། གོང་གི་རྣམ་ཐར་ལས་མ་གསུངས་པའང་འགའ་ཤས་འདུག་པས། དེ་དག་མཚོན་ཙམ་ཞུས་ན། འཁྲུངས་པའི་དུས་ནི་སངས་རྒྱས་འདས་ནས་ལོ་བཞི་བརྒྱ་ན་དང༌། འཁྲུངས་ཡུལ་ནི་རྒྱ་གར་ལྷོ་ཕྱོགས་བེ་དརྦྷའི་ཡུལ་ཡིན་པར་གསུངས་པ་དང༌། རིགས་དང་ཇི་ལྟར་འཁྲུངས་ཚུལ་རྣམས་ལ་མཆོད་སྦྱིན་ལ་བརྟེན་ནས་སྐུ་ཚེ་ལོ་བདུན་དུ་བསྲིངས་ནས་དཔལ་ནཱ་ལེནྡྲའི་དགོན་པར་ཕེབས་པར་གསུངས་ཀྱང༌། དཔལ་ནཱ་ལེནྡྲའི་དགོན་པ་ནི་སྤྱི་ལོ་༤༡༤ནས་༤༥༥་བར་དུ་བྱུང་བའི་གུཔྟའི་རྒྱལ་རབས་སུ་ཕྱག་བཏབས་པ་ཞིག་ཡིན་པས། ཀླུ་སྒྲུབ་ཀྱི་དུས་སུ་དགོན་ཆེན་འདི་ད་དུང་ཕྱག་བཏབ་མེད་མོད། འོན་ཀྱང་ས་འདི་ནི་ཨ་མྲའི་ཚལ་ཞེས་བྱ་བ་དེ་ཡིན་པས། སྔོན་སངས་རྒྱས་འཁོར་དང་བཅས་པ་ཕེབས་ནས། ཟླ་བ་གསུམ་གྱི་བར་དུ་ཆོས་གསུངས་ཤིང༌། ང་མྱ་ངན་ལས་འདས་པའི་འོག་ཏུ། ཡུལ་འདིའི་རྒྱལ་པོ་कनिष्कཀ་ནིཥྐ་ཞེས་བྱ་བས་མཆོད་རྟེན་བཞེངས་པར་ལུང་བསྟན་ལ། ཀླུ་སྒྲུབ་ཀྱི་སྔོན་ཙམ་ལ་གནྡྷ་རའི་རྒྱལ་པོ་ཀ་ནི་ཥྐ་ཞེས་པས་ལུང་བསྟན་རང་ལ་ཡིན་པར་བསམས་ནས། སྔར་ནས་མཆོད་རྟེན་ཁྲུ་གསུམ་པ་ཞིག་ཡོད་པ་དེ་གཞིར་བྱས་ནས་དེའི་སྟེང་དུ་མཆོད་རྟེན་ཆེན་པོ་བློའི་ཡུལ་ལས་འདས་པ། རྩེ་མོར་གསེར་གྱི་ཆོས་འཁོར་བཅུ་གསུམ་དང་ལྡན་པ་བསམ་གྱིས་མི་ཁྱབ་པ་ཞིག་བཞེངས་པར་ཆེན་པོ་ཐང་གི་ནུབ་ཕྱོགས་ཡུལ་གྱི་ཟིན་བྲིས་ཞེས་པ་དང༌། གཙུག་ལག་ཁང་གི་ཟིན་ཐོ་ལོ་ཡང་དུ་བཀོད་པ་ཞེས་པ་སོགས་ན་གསལ་ལ། གཞོན་ནུ་སྲོག་གིས་བསྒྱུར་བའི་ཀླུ་སྒྲུབ་རྣམ་ཐར་ལས་ཀྱང༌། དེ་ལས་ཐོན་མ་ཐག་ཏུ་རི་ལ་སོང་ནས་སངས་རྒྱས་ཀྱི་མཆོད་རྟེན་ཞིག་གི་དྲུང་དུ་ཞུགས་ནས་རབ་ཏུ་བྱུང་སྟེ་སྡོམ་པ་ཡང་དག་པར་བླངས་སོ་གསུངས་པས། རྗེས་སུ་དཔལ་ནཱ་ལེནྡྲའི་དགོན་པ་གང་དུ་ཆགས་པའི་གནས་དེར་སྔར་ནས་མཆོད་རྟེན་ཆེན་པོའི་ཁོར་ཡུག་ཏུ་གཙུག་ལག་ཁང་གཙང་ཁང་དང་བཅས་པ་ཡོད་པ་དེ་ཡིན་ནམ་སྙམ་མོ། །གཙང་ཁང་ཡོད་པ་ཅི་ལས་རྟོགས་ཤེ་ན། དེར་ནང་རྟེན་འཕགས་པ་སྤྱན་རས་གཟིགས་ཀྱི་བཞེངས་སྐུ་ཁྱད་པར་ཅན་ཞིག་བཞུགས་པའི་གཙང་ཁང་ཡོད་པར་གསུངས་པས་སོ། །མདོར་ན་སངས་རྒྱས་ཀྱི་མཆོད་རྟེན་ཞིག་གི་དྲུང་དུ་ཞུགས་ནས་རབ་ཏུ་བྱུང་ཞེས་པ་ནི་མཆོད་རྟེན་ཁོ་ན་ཙམ་ལ་གོ་རྒྱུ་མ་ཡིན་པར་མཆོད་རྟེན་ཆེན་པོའི་ཉེ་འཁོར་ན་གཙུག་ལག་ཁང་དང་གཙང་ཁང་སོགས་ཡོད་པ་ཞིག་ལ་གོ་དགོས་པས། དེའི་དུས་སུ་དཔལ་ནཱ་ལེནྡྲའི་དགོན་པ་ཞེས་པའི་མཚན་གྱིས་བརྗིད་པའི་གཙུག་ལག་སློབ་གྲྭ་ཆེན་མོ་དེ་མེད་ཀྱང༌། མཆོད་རྟེན་གཙོ་བོར་གྱུར་པའི་དགོན་པ་ཆུང་ངུ་ཞིག་ནི་ཅིས་ཀྱང་ཡོད་པས་ཀླུ་སྒྲུབ་དེར་རབ་ཏུ་བྱུང་བ་ཡིན་ནམ་སྙམ་མོ། །འདིར་དོ་སྣང་བྱེད་དགོས་པ་ནི། བུ་སྟོན་གྱིས་བྲམ་ཟེ་ས་ར་ཧ་ལས་སྔགས་ཀྱི་དབང་དང༌། སློབ་དཔོན་སྒྲ་གཅན་འཛིན་བཟང་པོ་ལས་དགེ་སློང་གི་སྡོམ་པ་ཞུས་པར་གསུངས་པས། དང་པོ་ཀླུ་སྒྲུབ་ཀྱིས་གྲུབ་ཆེན་ས་ར་ཧ་ལས་སྔགས་ཀྱི་དབང་དང་སྡོམ་པ་ཞུས་པའི་སྐོར་ལ་ཉེ་དུས་ཀྱི་མཁས་པ་རྣམས་ལ་ལྟ་ཚུལ་མི་འདྲ་བ་མང་པོ་ཞིག་བྱུང་ཡོད། དེ་དག་སོ་སོར་ཕྱེ་ན། རྩུབ་པོར་སྨྲ་བ་དང༌། འཇམ་པོར་སྨྲ་བ་གཉིས་སུ་འདུུ་ལ། རྩུབ་པོར་སྨྲ་བ་རྣམས་ནི་གསང་སྔགས་པ་རྣམས་ཀྱིས་ས་ར་ཧ་ཀླུ་སྒྲུབ་ཀྱི་སློབ་དཔོན་ཡིན་པར་སྨྲ་བ་དང༌། ཀླུ་སྒྲུབ་ཀྱིས་གསང་བ་འདུས་པའི་གཞུང༌། མདོར་བྱས། མདོ་བསྲེ། རིམ་ལྔ་སོགས་མཛད་པར་སྨྲ་བ་ནི་གསང་སྔགས་ཀྱི་ཆོས་དེ་ཁུངས་བཙན་པོ་ཡིན་པར་སྒྲོག་པའི་སླད་དུ་དེ་དག་རང་ཉིད་ཀྱིས་ལྐོག་ཏུ་རྫུན་བསྒྲིག་བྱས་ཏེ་ཀླུ་སྒྲུབ་ལ་ཁ་གཡར་བ་ཁོ་ནའོ་ཞེས་སྨྲ་སྟེ། འདི་དག་རྣམས་ནི་ཕ་རོལ་པོས་རྫུན་བསྒྲིག་བྱས་པར་སྔར་ནས་ཐག་བཅད་ཟིན་ནས། སུས་རྫུན་བསྒྲིགས་བྱེད་པ་དང༌། དེས་ཇི་ལྟར་རྫུན་བསྒྲིགས་བྱས་པའི་ཚུལ། དེའི་སྒྲུབ་བྱེད་རྣམས་རྗེས་སུ་བཙལ་དགོས་པ་རྣམས་སོ། །འཇམ་པོར་སྨྲ་བ་རྣམས་ནི་ཞེ་ཕུག་ལ་གསང་སྔགས་ཕྱིས་སུ་བྱུང་བ་སྨྲ་བར་མོས་མཐུན་ཡོད་ཀྱང༌། གསང་སྔགས་པ་རྣམས་དང་རྒྱབ་འགལ་བྱེད་པར་མོས་མཐུན་མེད་པས༌། རེ་ཞིག་གསང་སྔགས་པ་རྣམས་ལ་སེམས་གསོ་བྱེད་པའི་ཆེད་དུ། རང་ཉིད་ཀྱིས་ཀླུ་སྒྲུབ་སྔ་མ་དང་ཀླུ་སྒྲུབ་ཕྱི་མ་གཉིས་སུ་རྫུན་སྒྲིག་བྱས་ཏེ། ཀླུ་སྒྲུབ་སྔ་མ་ནི་དབུ་མའི་ཤིང་རྟའི་སྲོལ་འབྱེད་དང་ཕྱི་མ་ནི་གསང་སྔགས་ཀྱི་སློབ་དཔོན་ཡིན་པར་བཤད་དེ། དེ་དག་ནི་འཇམ་པོའི་ཐབས་ཀྱིས་གསང་སྔགས་པ་རྣམས་ཀྱི་རྫུན་ཕུག་བརྟོལ་བར་འདོད་ནས༌། དེའི་ཆེད་དུ་རང་ཉིད་རྫུན་སྒྲིག་བྱེད་པར་བརྩོན་པ་རྣམས་སོ། །བདག་ནི་དཔལ་མགོན་འཕགས་པ་ཀླུ་སྒྲུབ་ཀྱིས་གསང་སྔགས་ཀྱི་དབང་ཞུས་ཤིང་སྔགས་ཀྱི་གཞུང་འདི་དག་བརྩམས་པར་འདོད་དེ། གཞོན་ནུ་སྲོག་གིས་གསང་ཚིག་དང་རིག་སྔགས་ལ་མངའ་བརྙེས་པར་གྱུར་ཏོ་ཞེས་གསུངས་པའི་ཕྱིར་དང༌། ཧན་རྒྱལ་རབས་མཇུག་གི་རྒྱལ་ཁབ་གསུམ་གྱི་དུས་ཏེ། སྤྱི་ལོ་༢༢༠ནས་༢༦༥་བར་དུ་རྒྱ་ནག་སྐད་དུ་གསང་སྔགས་ཀྱི་གཞུང་མང་པོ་བསྒྱུར་བར་གསུངས་པས། ཀླུ་སྒྲུབ་ཀྱི་སྐུ་ཚེ་སྨད་ཙམ་ལ་གསང་སྔགས་རྒྱ་གར་དུ་ཤིན་ཏུ་དར་བ་མ་ཟད་རྒྱ་ནག་སྐད་དུའང་བསྒྱུར་བས་ཀླུ་སྒྲུབ་དུས་སུ་གསང་སྔགས་མེད་པར་འདོད་པ་ནི་ཧ་ཅང་ཐལ་ལོ། །གཞན་ཡང་སྒྲུབ་བྱེད་ཤིན་ཏུ་མང་ཡང་ཡི་གེ་མང་བར་དོགས་ནས་མ་བྲིས་སོ། །དེའི་དུས་སུ་དར་ཡང་ཀླུ་སྒྲུབ་ཀྱིས་མི་མཁྱེན་པའམ་ཐུགས་མི་མཉེས་སོ་གསུངས་ན། དེའི་སྒྲུབ་བྱེད་ནི་རང་ཉིད་གསང་སྔགས་ལ་མི་མོས་པ་ཙམ་དུ་ཟད་པས་ཉི་ཟླ་དཔང་པོར་བཅོལ་ཏེ་མནའ་བསྐྱལ་ན་ལེགས་སོ། ། འོ་ན་འདི་དག་གིས་དེ་ལྟར་འདོད་པའི་རྒྱུ་མཚན་གང་ལ་ཐུག་ཅེ་ན། འདི་དག་གི་ཁྲོད་དུ་སངས་རྒྱས་ཀྱིས་ནི་ཉན་ཐོས་སྡེ་པའི་གཞུང་ཁོ་ན་གསུངས་པ་ལས། ཐེག་ཆེན་གྱི་མདོ་གཏན་ནས་མ་གསུངས་ཤིང༌། ཐེག་པ་ཆེན་པོའི་མདོ་སྡེ་རྣམས་ནི་སྤྱི་ལོའི་དུས་རབས་དང་པོའི་སྔོན་རྗེས་ནས་རིམ་བཞིན་རྫུན་སྒྲིག་བྱས་པ་ཡིན་ལ། དེ་ཡང་བྱེད་པོའི་གཙོ་བོ་ཀླུ་སྒྲུབ་ལ་སོགས་པ་ཡིན་པར་དོགས་སོ། ། གསང་སྔགས་ནི་དུས་རབས་བདུན་པ་བརྒྱད་པ་ཙམ་ནས་བྲམ་ཟེའི་ཆོས་ལ་དཔེར་བླངས་ནས་རིམ་བཞིན་རྫུན་སྒྲིག་བྱས་པ་ཡིན་པར་འདོད་དེ། དེའི་རྒྱུ་མཚན་ཡང་མཐར་བཏུག་ན་དམ་ཆོས་གང་ནས་གདན་དྲངས་པའི་ལྷ་ཀླུ་སོགས་མི་མ་ཡིན་པའི་འགྲོ་བ་ཁས་མི་ལེན་པ་ལ་ཐུག་ཅིང༌། དེའང་མཐར་བཏུག་ན་འཇལ་བྱེད་ཀྱི་ཚད་མ་ལ་མངོན་སུམ་ཚད་མ་ཁོ་ན་ལས་རྗེས་དཔག་ཚད་མ་གཏན་ནས་ཁས་མི་ལེན་པ་ལ་ཐུག་པས། ཆོས་ལ་ཞིབ་འཇུག་བྱེད་པའི་དམིགས་ཡུལ་ཡང་འཇིག་རྟེན་ཕྱི་མའི་མངོན་མཐོ་དང་མཐར་ཐུག་གི་ངེས་ལེགས་ལ་སོགས་པ་དོན་དུ་གཉེར་བ་ནི་གཏན་ནས་མིན་པས། དེ་དག་ནི་ཆོས་ལ་དད་པ་བྱེད་མཁན་ཡིན་ན། ཆོས་ཀྱི་ཞིབ་འཇུག་པ་ཚད་ལྡན་མ་ཡིན་པས་ཁྱབ་པར་ཁས་ལེན་པས། ཆོས་ལ་ཞིབ་འཇུག་བྱེད་པའི་དམིགས་ཡུལ་གང་ཡིན་པའང་ཤེས་སླའོ། ། ༼འཕྲོ་མུ་མཐུད་འགོད་རྒྱུ།
·རྩོམ་ཡིག་གོང་མ:དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༥
·རྩོམ་ཡིག་འོག་མ:དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༧
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
འབྲེལ་ཡོད་རྩོམ་ཡིག་མི་འདུག
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 9:00:50 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 12:05:38 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 17:58:52 [来自: 112.5.248.229]

འབྲེལ་ཡོད་དཔྱད་བརྗོད 49 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།27.34MS