ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> མི་སྣ།
 རྩོམ་ཡིག་ཀློག་པ།

དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་་ལུང་རིགས་གཏེར་མཛོད།༨

  རྩོམ་པ་པོ:བཞག་སྤྲུལ།ཡོང་ཁུངས:ནང་རིགགཟིགས་གྲངས:6850ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2014/11/19 13:34:06ཚོགས་ཡར་སྤྲོད:admin
 
༄༅། །དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ཆེན་མོ་ལུང་རིགས་རྒྱ་མཚོའི་གཏེར་མཛོད་ཅེས་བྱ་བ་བཞུགས་སོ། །༨
 
གཉིས་པ་ཇོ་ནང་ཏཱ་ར་ནཱ་ཐས་མཛད་པའི་བཀའ་བབས་བདུན་ལྡན་གྱི་བརྒྱུད་པའི་རྣམ་ཐར་ལས་ཇི་ལྟར་བྱུང་བ་ནི། དེའི་སློབ་མ་ནི་སློབ་དཔོན་ཀླུ་སྒྲུབ་ཡིན་ཏེ། དེ་ཡང་ལྷོ་ཕྱོགས་བཻ་དརྦྷར་སྐུ་འཁྲུངས། རིགས་ནི་བྲམ་ཟེའོ། །བཙས་པ་ན་ལྟས་མཁན་རྣམས་ཀྱིས་དགེ་སློང་བརྒྱ། བྲམ་ཟེ་བརྒྱ། སྐྱེ་བོ་ཕལ་པ་བརྒྱ་རྣམས་ལ་སྟོན་མོ་དྲངས་ན། རིམ་པས་ལོ་བདུན། ཟླ་བ་བདུན། ཞག་བདུན་འཚོ། དེ་ལས་ལྷག་པའི་ཐབས་མེད་ཟེར་ཕ་མས་ཀྱང་དེ་བཞིན་བྱས། དུས་དེ་རྣམས་རྫོགས་སུ་ཉེ་བ་ན། གཡོག་དང་བཅས་ཡུལ་གཞན་དུ་འཁྱམ་དུ་བཏང་བས། མཐར་ནཱ་ལེནྡྲར་སླེབ། མཁན་པོ་སྒྲ་གཅན་འཛིན་གྱིས་ཚེ་དཔག་མེད་ཀྱི་རིག་སྔགས་བཟླར་བཅུག་པས། ལེགས་པར་འཚོ་ཐུབ། དེར་རབ་ཏུ་བྱུང་ནས། ཐེག་པ་ཆེ་ཆུང་གི་སྡེ་སྣོད་མཐའ་དག་དང༌། རིག་པའི་གནས་སུ་གྱུར་པ་གང་ཡང་མི་མཁྱེན་པ་མེད་པར་བྱས་སོ། །དེ་ནས་རྨ་བྱ་ཆེན་མོ་དང༌། ཀུ་རུ་ཀུལླེ་དང༌། གནོད་སྦྱིན་མོ་དགུ་དང༌། ནག་པོ་ཆེན་པོ་རྣམས་བསྒྲུབས་པས། རི་ལུ་མིག་སྨན་རལ་གྲི་རྐང་མགྱོགས་བཅུད་ལེན་གཏེར་ལ་སོགས་པ་དངོས་གྲུབ་མང་པོ་དང༌། ཚར་གཅོད་པ་དང༌། སླར་གསོ་བ་ལ་སོགས་པའི་ནུས་པ་ཐམས་ཅད་གྲུབ་བོ། །གནོད་སྦྱིན་དང་ཀླུ་ལ་སོགས་པ་མི་མ་ཡིན་ཐམས་ཅད་མངག་གཞུག་ཏུ་སོང༌། ཁྱད་པར་བཅུད་ལེན་གྲུབ་པས་རྡོ་རྗེའི་སྐུར་གྱུར། རྫུ་འཕྲུལ་དང་མངོན་ཤེས་ཆེན་པོར་གྱུར་སྐད། ནག་པོ་ཆེན་པོའི་རིགས་སྔགས་གྲུབ་ན་སདྷ་ནྱ་ཀ་ཊ་ཀའི་གླིང་ན། །རྒྱུད་བཞུགས་པ་སྤྱན་འདྲེན་པར་དགོངས། གླིང་དེར་མི་གཡོ་བ་ལ་བརྟེན་ཏེ་སྒྱུ་མ་བསྒྲུབས་ནས། སྒྱུ་མས་མཁའ་འགྲོ་མ་རྣམས་མགོ་འཁོར་བའི་བར་ལ། ལྷ་མོ་ནག་མོ་དང༌། ནག་པོ་ཆེན་པོའི་རྒྱུད་བརྒྱད་དེ་ཕྱག་གཉིས་གཉིས་པ་ནས་ཕྱག་བཅོ་བརྒྱད་ཀྱི་བར་གྱི་རྒྱུད་དང་ཀུ་རུ་ཀུལླེའི་རྟོག་པ་སོགས་པ་སྤྱན་དྲངས། ཡེ་ཤེས་ཀྱི་མཁའ་འགྲོརྣམས་ལ་ཞལ་གྱི་གདམས་པ་ཐོབ། སྒྲུབ་ཐབས་མི་གཅིག་པ་བརྒྱ་དྲུག་ཅུ་སྤྱན་དྲངས་ཟེར། རལ་གྲི་དངུལ་ཆུ་སོགས་ཐུན་མོང་གི་དངོས་གྲུབ་བརྒྱད་ཆར་ལ་རིགས་མི་གཅིག་པ་མཐའ་ཡས་པ་བསྒྲུབས་སོ། །དགེ་འདུན་ལ་འཚོ་བ་སྦྱར་བའི་ལོ་རྒྱུས་ན། མཁན་པོ་སྒྲ་གཅན་འཛིན་བཟང་པོ་རྗེ་བཙུན་མ་ཕགས་མ་སྒྲོལ་མ་བསྒྲུབ་ཅིང་བཞུགས། ཀླུ་སྒྲུབ་མཁན་པོར་བྱོན་ནས་དགེ་འདུན་ལྔ་བརྒྱ་ལ་ལུང་འབོགས་པའི་བྱ་བ་སོགས་མཛད་ཅིང་ཡོད་པ་ན། མུ་གེ་ལོ་བཅུ་གཉིས་སུ་བྱུང་བས། མ་ག་དྷའི་ཡུལ་རྣམས་སྟོངས་པ་ཙམ་བྱུང་བ་ན། སེམས་ཅན་གྱི་ལས་སུ་གཟིགས་ནས། སློབ་དཔོན་གྱིས་གསེར་འགྱུར་གྱི་རྩི་མཛད་དེ། གསེར་རྣམས་ཡུལ་ཐག་རིང་པོ་མུ་གེ་མེད་པ་རྣམས་སུ་འབྲུ་དང་བསྒྱུར་ནས། དགེ་འདུན་རྣམས་འཚོ་བས་མི་བྲེལ་བར་བྱས། སློབ་དཔོན་སྒྲ་གཅན་འཛིན་སྒྲུབ་པ་ཐོན་པ་ན། ཡུལ་རྣམས་སྟོངས་པར་གཟིགས་ནས། རྒྱུ་མཚན་དྲིས་པས། སློབ་དཔོན་གྱི་སྒྲུབ་པའི་བར་ཆད་དུ་གྱུར་དོགས་ཞུ་བར་མ་ནུས། མུ་གེ་བྱུང་ནས་ལོ་བཅུ་གཉིས་ལོན་ཞུས་པས། སློབ་དཔོན་ན་རེ། མ་ལེགས་ཟས་ཀྱི་ཆར་འབེབས་པའི་ནུས་པའང་ང་ལ་ཡོད་པ་ལ། ཁྱོད་སེམས་ཅན་ལ་སྙིང་རྗེ་ཆུང༌། བྱང་ཆུབ་སེམས་དཔའི་སྤྱོད་པ་དང་འགལ། ད་ནི་དེའི་སྡིག་སྦྱོང་ལ་གཙུག་ལག་ཁང་བརྒྱ་རྩ་བརྒྱད། ལྷ་ཁང་སྟོང༌། མཆོད་རྟེན་ཁྲི་ཕྲག་བཞེངས་དགོས་གསུང༌། དེ་དགེ་སློང་གཅིག་ཁོ་ནས་འགྲུབ་དཀའ་བར་གཟིགས་ནས། ཡོ་བྱད་གནོད་སྦྱིན་ཛམྦྷ་ལ་ལས་ནོར་བསླངས། ལས་གྲོགས་ཀླུ་རྣམས་ལ་འཚོལ་དགོས་པས། རེ་ཞིག་ཀླུ་རྣམས་དད་པར་བྱེད་དགོས་དགོངས་ཏེ། ཀུ་རུ་ཀུལླེའི་རིག་སྔགས་ཀྱིས་ཀླུའི་རྒྱལ་པོ་འཇོག་པོའི་བུ་མོ་འཁོར་དང་བཅས་པ་བཀུགས་པས། ཆོས་གསུང་བའི་ཚོགས་སུ་མིའི་བུ་མོའི་རྣམ་པ་གཉིས་འཁོར་མང་པོ་དང་བཅས་བྱུང་བས། དཔག་ཚད་ཙམ་ཙནྡན་ས་མཆོག་གི་དྲིས་ཁྱབ་བོ། །ཡང་དེ་སོང་བ་ན་དྲི་དེ་སངས་འགྲོ། དེ་འདྲ་ལན་མང་དུ་བྱུང༌། དེར་ཅི་ཡིན་ཞེས་དྲི་བ་ལྟར་མཛད་པས། ངེད་ཀླུ་འཇོག་པོའི་བུ་མོ་ཡིན། མིའི་གྲིབ་མ་སྲུང་བ་ལ་ཙནྡན་ས་མཆོག་གིས་ལུས་ལ་བྱུགས་པ་ཡིན་ཟེར། འོ་ན་ཙནྡན་དེ་ལ་སྒྲོལ་མའི་སྐུ་བཞེངས་པར་འདོད་པས་ཙནྡན་ཡང་སྦྱིན་དགོས། ཁོ་བོས་གཙུག་ལག་ཁང་བཞེངས་པའི་ལས་གྲོགས་ཀྱང་བྱེད་དགོས་གསུངས་པས། ཕ་ལ་བཟླས་ནས་འོང་ཟེར་བ། དེའི་ནང་པར་དེ་གཉིས་ན་རེ། ཀླུའི་རྒྱལ་པོའི་མཆིད་ནས་སློབ་དཔོན་ཉིད་ཀླུ་ཡུལ་དུ་ཕེབས་ན་བཀའ་བཞིན་བྱེད། གཞན་སྒྲུབ་མི་ནུས་ཟེར། དེ་ནས་ཤེར་ཕྱིན་འབུམ་པ་སྤྱན་འདྲེན་པ་སོགས་ཀླུ་དང་མིའི་དོན་རྒྱ་ཆེན་པོ་གཟིགས་ནས། རེ་ཤིག་ཀླུའི་ཡུལ་དུ་བྱོན་ནོ། ལོ་རྒྱུས་ཁ་ཅིག་ལས། འདས་པའི་སངས་རྒྱས་འོད་སྲུང་དང་གསེར་ཐུབ་ལ་སོགས་པའི་ཞལ་མཐོང་བའི་དགེ་སློང་ཡིན་ཟེར་བ། ལུས་གཞན་པས་ཆེ་བ་མང་པོས་གཟིགས་ཟེར་ཏེ་ཆེ་བ་ཙམ་ཡིན་ནོ། བཅོམ་ལྡན་འདས་ཤཱཀྱ་ཐུབ་པའི་བསྟན་པ་འདིའི་དགྲ་བཅོམ་པ་མང་པོ་ཀླུ་རྣམས་ཀྱི་མཆོད་གནས་སུ་འདུག་པ་རྣམས་ན་རེ། ངེད་རྣམས་ནི་དགྲ་བཅོམ་པ་ཡིན་ལ། ཁྱོད་དུག་གསུམ་དང་བཅས་པའི་མི་ཞིག་འདིར་འོངས་པ་ལ་ཀླུའི་དུག་གིས་གནོད་པ་མི་འོང་བའི་རྒྱུ་ཅི་ཡིན་འདྲི་བ་ལ། ངས་ནི་རྨ་བྱ་ཆེན་མོའི་རིག་སྔགས་གྲུབ་པ་ཡིན་གསུངས། ཡང་ལོ་རྒྱུས་འགའ་ལས། དེ་རྣམས་ལ་རྒྱལ་བའི་བཀའ་ལས་ནི་ཆོས་ཐམས་ཅད་ངོ་བོས་གྲུབ་པ་མེད་པར་གསུངས་ལ། སའི་སྟེང་གི་དགེ་སློང་ཤས་ཆེ་བ་རྣམས་ནི། དེ་ལས་བཟློག་སྟེ་སྨྲ་ན། ཁྱེད་རྣམས་ཀྱིས་ཇི་ལྟར་རྟོགས་ཞེས་དྲིས་པས། ཆོས་རྣམས་ཀྱི་རང་བཞིན་ནི་ཁྱེད་ཀྱི་ལྟར་ཡིན། ཕྱིས་དམིགས་པའི་ལྟ་བ་ཅན་གྱི་ཉན་ཐོས་འབའ་ཞིག་འབྱུང་བར་སངས་རྒྱས་ཀྱིས་ལུང་བསྟན་གསུང་སྐད་དེ། དབུ་མ་པ་རྣམས་ཀྱིས་བཅོས་པ་མིན་ན་རུང་ངོ༌། །དེ་ནས་ཀླུ་རྣམས་ལ་ཆོས་གསུངས་ཤིང་ཡུན་རིང་པོར་བཞུགས། ཤེར་ཕྱིན་རྒྱས་པ་དང༌། གཟུངས་དང་རྟོག་པའི་རིགས་དུ་མ་སྤྱན་དྲངས། འབུམ་གྱི་ཞབས་ནས་བག་ཙམ་ཀླུས་མ་བསྐུར་བ་ཡིན་ཡང་ཟེར། དམ་པའི་ཆོས་ལ་དགྲ་ལན་གསུམ་བྱུང་བའི་ཚེ་མ་ཚང་བ་ཡིན་ཡང་ཟེར་ཏེ་ཕྱི་མ་དག་གསུངས༌། འབུམ་རྒྱ་ནག་པའི་ཞབས་ཀྱི་ལེའུ་གསུམ་ནི་ཉི་ཁྲི་ནས་དྲངས་པའོ། །དེ་ནས་ས་སྟེང་དུ་བྱོན། རིག་ཚོགས་ལ་སོགས་པའི་བསྟན་བཅོས་ཀྱང་མང་དུ་བརྩམས། དགེ་སློང་བདེ་བྱེད་ལ་སོགས་པ་ཐེག་པ་ཆེན་པོ་ལ་སྡང་བ་ཐམས་ཅད་རྩོད་པས་སུན་ཕྱུང༌། ལར་ཉན་ཐོས་སེན་དྷ་པས་བརྩམས་པའི་རྟོག་གེ་ཐེག་ཆེན་ལ་རྩོད་པའི་གཞུང་མང་པོ་བྱུང་བ་དེ་དག་གི་དཔེ་ཐམས་ཅད་བསྡུས་ནས་ས་འོག་ཏུ་སྦས་སོ། །ཡང་ཕྱི་ཞིག་ན་ལྷོ་ཕྱོགས་ཛ་ཊ་སཾ་གྷ་ར། རལ་པ་འཇོམས་པ་ཟེར་བའི་གནས་དེར། མུ་སྟེགས་ཀྱི་རྒོལ་བ་འདུས་པ་ལྔ་བརྒྱ་ཙམ་དང་བརྩད་ནས་ཚར་བཅད་དེ་ཐམས་ཅད་བསྟན་པ་ལ་བཅུག་གོ ། དེ་དག་གི་སྐབས་སུ་ལྷ་ཁང་དང་མཆོད་རྟེན་ཡང་གྲུབ། སློབ་དཔོན་འདིས་བཞེངས་པའི་མཆོད་རྟེན་གྱིས་ཕྱོགས་ཐམས་ཅད་ཁྱབ་ཡོད་གསུངས། དེ་ལྟར་ཐེག་ཆེན་གྱི་བསྟན་པ་ཉི་མ་ལྟར་མཛད། དྲིལ་བུ་བྲག་དང་བྱང་ཕྱོགས་དྷིང་ཀོ་ཊ་སོགས་རི་མང་པོ་གསེར་དུ་བསྒྱུར་བར་བཞེད་པ་ལ། རྗེ་བཙུན་མ་སྒྲོལ་མས་མ་འོངས་པ་ན་རྩོད་པར་འགྱུར་གསུངས་པས་བཟློག འོན་ཀྱང་གསེར་གྱི་འབྱུང་ཁུངས་མང་པོ་བྱུང༌། རྡོ་རྣམས་གསེར་མདོག་ཏུ་གྱུར་པ་ཙམ་ཡོད་གསུང༌། དེ་ནས་ལན་གཅིག་ན་བྱིས་པ་མང་པོ་རྩེ་བ་ལ་གཅིག་རྒྱལ་པོར་འགྱུར་བར་ལུང་བསྟན་ནས། བྱང་སྒྲ་མི་སྙན་དུ་བཞུད། གླིང་གཞན་དང་མི་མ་ཡིན་གྱི་གནས་སུ་ལོ་བཅུ་གཉིས་ཙམ་སོང༌། སླར་འཛམ་བུ་གླིང་དུ་ཕེབས་ཙམ་ན་སྔར་གྱི་བྱིས་པ་དེ། རྒྱལ་པོར་གྱུར་པ་བདེ་སྤྱོད་ཅེས་བྱ་བར་སོང༌། སློབ་དཔོན་ལ་གུས་པས་མཆོད། རྒྱལ་པོའང་སློབ་དཔོན་གྱི་གདམས་པ་ལ་བརྟེན་ནས་བཅུད་ལེན་དང་གནོད་སྦྱིན་གྱི་མངག་གཞུག་གྲུབ། དགེ་འདུན་བཞུགས་པའི་གཙུག་ལག་ཁང་ལྔ་བརྒྱ་བཞེངས་སོ། །ཕྱིས་དཔལ་གྱི་རིར་ལོ་ཉིས་བརྒྱ་ཙམ་གནོད་སྦྱིན་མོ་རྣམས་ཀྱི་འཁོར་དང་བཅས་ཏེ། སྔགས་ཀྱི་སྤྱོད་པས་བཞུགས། མཚན་བཟང་པོ་སོ་གཉིས་ཀྱང་སྐུ་ལ་གྲུབ། ཕྱིས་དབུ་སྦྱིན་པར་བཏང་བའི་རྐྱེན་གྱིས་ལོ་ཕྱེད་ལོའི་ལོ་དྲུག་བརྒྱར་བདུན་ཅུ་དོན་གཅིག་གིས་མ་ཚང་སྐད་དེ། དེ་ཡང་རྒྱལ་པོ་བདེ་སྤྱོད་ཀྱི་བུ་ཆུང་ངུ་སུ་ཤཀྟ། རྒྱལ་བུ་རབ་ནུས་སམ། རྒྱལ་བུ་ནུས་ལྡན་ཡང་ཟེར་ཏེ་དེ་རྒྱལ་སྲིད་ལ་དགའ་བས་མ་ལ་ན་རེ། ཡབ་སློབ་དཔོན་དང་སྐུ་ཚེ་མཉམ་པར་བྱིན་གྱིས་རླབས་འདུག སློབ་དཔོན་རྡོ་རྗེའི་སྐུ་ཡིན་པས་གྲོང་པ་མེད། རྒྱལ་པོའི་སྲས་པོ་སྔ་མ་རྣམས་ཀྱང་རྒྱལ་སྲིད་མ་ཐོབ་པར་འདས་ཤིང༌། །བུ་དང་ཚ་བོའི་བར་ཡང་འདས་ཟེར་བས། ཤིན་ཏུ་ཡིད་མི་དགའ་བ་ལ། མ་ན་རེ། འོ་ན་ཐབས་ཡོད། སློབ་དཔོན་བྱང་ཆུབ་སེམས་དཔའ་ཡིན་པས་དབུ་བསླངས་ན་སྟེར་བས། སློབ་དཔོན་འདས་པའི་ཚེ་ཡབ་ཀྱང་འདའ་བས་ཁྱོད་ལ་རྒྱལ་སྲིད་འབྱུང་ཟེར། རྒྱལ་བུས་དཔལ་གྱི་རིར་ཕྱིན་དབུ་བསླངས་པས། མཚོན་ཆས་མ་ཆོད་པར་སྔོན་རྩྭ་སྔོན་པོས་སྲོག་ཆགས་ཀྱི་སྐེ་བཅད་པའི་ལས་གཟིགས་ནས། ཀུ་ཤས་བཅད་ནས་གནང༌། ང་ནི་འདི་ནས་བདེ་བ་ཅན་དུ་འགྲོ། ཕྱི་ནས་ལུས་འདི་ལ་ཡང་འཇུག་པར་འགྱུར། ཞེས་སྒྲ་བྱུང༌། དེར་ས་གཡོས། མུ་གེ་ལོ་བཅུ་གཉིས་ཀྱི་བར་དུ་བྱུང་སྐད། རྒྱལ་བུས་སློབ་དཔོན་བཅུད་ལེན་གྲུབ་པས། སླར་འགྲིག་གིས་དོགས་ནས་དབུ་དཔག་ཚད་མང་པོས་ཆོད་པའི་སར་ཁྱེར༌། དེར་གནོད་སྦྱིན་མོས་ཕྲོགས། དབུ་ཕ་བོང་གི་ཁར་བཞག་པས་ཕ་བོང་གས་པའི་ས་དེར་འཕགས་པ་སྤྱན་རས་གཟིགས་ལྷ་ལྔའི་རྡོ་སྐུ་རང་བྱོན་དུ་བྱོན། དབུ་དང་སྐུ་ལུས་གཉིས་ལ་ཡོན་བདག་གནོད་སྦྱིན་མོས་སོ་སོར་ལྷ་ཁང་བརྩིགས། དེ་གཉིས་ཀྱི་བར་དུ་སྔོན་དཔག་ཚད་བཞི་ཙམ་ཡོད་སྣང་བ། ད་ལྟར་རྒྱང་གྲགས་གཅིག་ཀྱང་མི་སྣང་གསུངས། དེ་ནི་བདག་གི་བླ་མས་ཀྱང་མཇལ་ཏེ། རྡོའི་རྩིག་པ་རྣམས་འབྲེལ་ཏེ་བྲག་ལྟ་བུར་སོང་པའི་ལྷ་ཁང་ཆོ་འཕྲུལ་དང༌། གཉན་ཆ་ཆེ་བ། སྒོ་ནི་མེད། དཀར་ཁུང་ནས་བལྟས་པ་ལ། གཉིས་ཀའང་ཁྲིའི་སྟེང་ན་རྡོ་སྐུའི་དུམ་བུ་འདྲ་བ་རེ་འདུག་གསུངས། །ཞེས་གསུངས་སོ། ། འདིའི་མཛད་པ་པོ་ཇོ་ནང་གི་མཁས་པ་ཆེན་པོ་ཏཱ་ར་ནཱ་ཐ་ནི་གྲུབ་མཐའ་ཇོ་ནང་བ་ཡིན་ཡང༌། རྒྱལ་བའི་མདོ་སྔགས་ཀྱི་བསྟན་པ་ཡོངས་རྫོགས་བྱ་བ་བྱས་ཤིང༌། ཁྱད་པར་དུ་གསང་སྔགས་ཀྱི་དབང་དང་རྗེས་གནང༌། སྒྲུབ་ཐབས་རྣམས་ཕྱོགས་གཅིག་ཏུ་བསྡུས་ཏེ་བསྒྲིགས་པ་སྒྲུབ་ཐབས་རིན་འབྱུང་སོགས་མཛད་པས། ད་ལྟའི་བར་དུ་བོད་ཀྱི་གྲུབ་མཐའ་ཕལ་ཆེར་གྱི་དབང་རྗེས་གནང་མང་བོའི་རྒྱུན་མི་ཆད་པའང་བླ་མ་འདིའི་དྲིན་ཡིན་པར་སེམས་སོ། །འོན་ཀྱང་ལྟ་བའི་ཐད་ནས་ཇོ་ནང་རང་ཉིད་ཀྱི་གྲུབ་མཐའི་གཞན་སྟོང་གི་ལྟ་བ་དེ་འཛིན་པས། བོད་ཀྱི་གྲུབ་མཐའ་སྨྲ་བ་ཕལ་ཆེ་བས་ནི་ཟུར་ཟ་དང་དགག་པ་མང་དུ་མཛད་དོ། །རྗེ་བླ་མས་ནི་ཟབ་མོ་དབུ་མའི་ལམ་བཟང་འཕགས་མཆོག་ཀླུ་སྒྲུབ་ཡབ་སྲས་དང་དཔལ་ལྡན་ཟླ་བའི་ལེགས་བཤད་ཇི་ལྟ་བ་བཞིན་དུ་ཁས་ལེན་པས། གཞན་སྟོང་མི་འཐད་པར་བཞེད་པ་སྨཽས་མ་དགོས་ཀྱང༌། ལུགས་འདི་འགོག་པའི་བསྟན་བཅོས་ལོགས་སུ་བརྩམས་པ་ནི་མེད་དོ། །
འདིར་བསམ་དགོས་པ་ཞིག་ནི། ལོ་ཆེན་ཞོན་ཙང་དང་ཇོ་ནང་ཏཱ་ར་ནཱ་ཐ་གཉིས་ཀས་འཕགས་མཆོག་ཀླུ་སྒྲུབ་ཀྱིས་ཟབ་མོ་དབུ་མའི་ཤིང་རྟའི་སྲོལ་ཕྱེས་པའི་སྐོར་དང༌། ཀླུ་སྒྲུབ་ཀྱིས་དབུ་མའི་གཞུང་ཆེན་མོ་གང་དང་གང་བརྩམས་པ་རྣམས་མ་གསུངས་པའམ་ཤིན་ཏུ་བསྡུས་པ་ལས་མ་གསུངས་ལ། དེ་ལས་གཞན་པའི་རྣམ་པར་ཐར་པ་རྣམས་ནི་ཅུང་ཟད་རྒྱས་ཙམ་གསུངས་པས། དེ་ནི་རང་རང་གང་ལ་མོས་པའི་གྲུབ་མཐའི་དབང་གིས། ཡུལ་དུས་དབང་པོ་དང་བསྟུན་ཏེ་གསུངས་པའམ། གལ་ཏེ་དེ་དག་ཇི་ལྟ་བ་བཞིན་དུ་འདོད་ན་རང་གི་གྲུབ་མཐའི་ལྟ་གྲུབ་ལ་གནོད་པར་འགྱུར་བས་བློ་ངོར་མི་ཤོང་བ་ཉིད་དོ། །རང་རེ་ལ་དེ་ལྟ་བུའི་གྲུབ་མཐས་ཀུན་ནས་བཏགས་པའི་དྲི་མས་མ་གོས་པས། རང་ཉིད་ལ་བློ་གྲོས་ཀྱི་རྩལ་དང་ལྡན་ན། འཕགས་མཆོག་ཀླུ་སྒྲུབ་ཡབ་སྲས་ཀྱིས་ཇི་ལྟར་སྲོལ་ཕྱེ་པའི་ཟབ་མོ་དབུ་མའི་ལྟ་བ་ལ། དེ་དེ་བཞིན་དུ་སྨྲ་ཞིང་བསམ་པ་དང༌། དེའི་ལམ་ལ་ཇི་ལྟར་འདོད་པ་བཞིན་དུ་བསླབ་པ་ལ་གེགས་ཀྱང་ཅུང་ཟད་ཉུང་བར་གྱུར་པས་སྐལ་རེ་བཟང་ངོ་སྙམ་མོ། །
སྨྲས་པ།
ཇོ་ནང་གྲགས་ཀྱང་རྒྱལ་བསྟན་ཡོངས་རྫོགས་ལ༵། །
ལ༵་ལ་ཙམ་མིན་འཛིན་སྤེལ་འཕྲིན་ལས་ཆ༵ར། །
ཆ༵ར་བཞིན་ཕབས་པའི་སྐད་གཉིས་སྨྲ་བའི་དབ༵ང༌། །
དབ༵ང་པོ་ཡུལ་དུས་དང་བསྟུན་རྣམ་ཐར་མཛད། །
ཅེས་པ་འདི་ནི་བར་སྐབས་ཀྱི་ངལ་གསོ་བའི་ཚིགས་སུ་བཅད་པའོ། །
   འདི་དག་ལ་དཔྱད་པར་བྱ་བ་ཤིན་ཏུ་མང་ཞིང༌། འཕགས་མཆོག་ཀླུ་སྒྲུབ་ཀྱི་རྣམ་ཐར་ལ་ད་དུང་འདིའི་ནང་དུ་མ་བསྡུས་པའི་གོང་གི་གཞུང་དག་ལས་བྱུང་བ་དང༌། སྔོན་བྱོན་མཁས་པའི་གཞུང་གཞན་དག་དུ་གསལ་བར་གསུངས་པའང་མང་དུ་འདུག་མོད། དུས་ཚོད་ཅུང་ཟད་ཐུང་བས་རེ་ཞིག་སྨྲ་བར་མི་ནུས་ལ། རྗེས་སུ་ཁོ་བོས་འདི་དག་གི་སྙིང་པོ་བསྡུས་ཏེ་ལུང་འདྲེན་དང་དགག་སྒྲུབ་སོགས་མི་དགོས་པར་བྱེད་དེ། མཆོག་དམན་བར་གསུམ་སུས་བལྟས་ཀྱང་ཁ་གསལ་ཞིང་གོ་བདེ་བ་ཞིག་རྩོམ་པའི་འདུན་པ་ཡོད་པས། འདིར་ནི་དེའི་སྔོན་འགྲོའི་ཚུལ་དུ་འཕགས་མཆོག་ཀླུ་སྒྲུབ་ཀྱི་རྣམ་པར་ཐར་པ་རྒྱ་གར་ནག་བོད་གསུམ་གྱི་སྔོན་བྱོན་མཁས་པའི་ལུང་ཁུངས་རྣམས་གོ་རིམ་བཞིན་དུ་ཅུང་ཟད་རྒྱས་ཙམ་བཀོད་ནས། དེ་དག་ལ་རང་ཉིད་ཀྱི་གོ་ཚོད་ལྟར་གྱི་དགག་སྒྲུབ་བགྱིས་པ་ལགས་པས། འདི་ལ་དོན་དུ་གཉེར་བ་རྣམས་ལ་གཞུང་དེ་དང་དེ་དག་ལ་གཟིགས་པའི་སྐུལ་མར་འགྱུར་བའང་སྲིད་ཅིང༌། རང་ཉིད་ཀྱང་འཕགས་མཆོག་ཀླུ་སྒྲུབ་ལ་མི་ཕྱེད་པའི་དད་པ་བརྟན་པོ་སྐྱེ་བའི་ཆེད་དང༌། སྐྱེ་བ་ནས་ཚེ་རབས་ཐམས་ཅད་དུ་འཕགས་མཆོག་ཀླུ་སྒྲུབ་ཡབ་སྲས་དང༌། རྗེ་འཇམ་མགོན་བླ་མ་ཙོང་ཁ་པ་ཆེན་པོ་ཡབ་སྲས་བརྒྱུད་པ་དང་བཅས་པས་མཉེས་བཞིན་རྗེས་སུ་འཛིན་བའི་རྒྱུ་རུ་དམིགས་ཏེ་བྱས་པ་ལགས་སོ། །
འདིར་དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལ་རྒྱ་གར་གྱི་པཎྜིཏ་གཞོན་ནུ་སྲོག་དང༌། སློབ་དཔོན་ལེགས་ལྡན་འབྱེད་དང༌། དཔལ་ལྡན་ཟླ་བ་གྲགས་པ་དང༌། རྒྱའི་ལོ་ཙཱ་བ་ཆེན་པོ་ཞོན་ཙང་དང༌། རྒྱ་གར་གྱི་མཁས་པ་ཆེན་པོ་སྤྱན་རས་གཟིགས་བརྟུལ་ཞུགས་དང༌། བོད་ཀྱི་ལོ་ཙཱ་བ་ཆེན་པོ་བུ་སྟོན་རིན་ཆེན་གྲུབ་དང༌། ཇོ་ནང་ཏཱ་ར་ནཱ་ཐ་སོགས་རྒྱ་གར་ནག་བོད་གསུམ་གྱི་མཁས་པ་ཆེན་པོ་བདུན་ཙམ་གྱིས་དུས་རབས་སྔ་ཕྱི་སོ་སོར་ཇི་ལྟར་གསུངས་པ་རྣམས་ཕྱོགས་གཅིག་ཏུ་བསྡུས་ཏེ་བཀོད་ན་དཔྱད་གཞི་ཤིན་ཏུ་ཆེ་ཞིང༌། ཕྱི་མ་ཕྱི་མ་སྔ་མ་སྔ་མའི་ཁ་སྐོང་གི་ཚུལ་དུ་གོ་བ་ལོན་ན། ཤིང་རྟ་ཆེན་པོ་དཔལ་མགོན་འཕགས་པ་ཀླུ་སྒྲུབ་ཀྱི་གསང་གསུམ་གྱི་མཛད་པའི་ཆ་ཤས་མང་པོ་ཞིག་མཐོང་ནས་མི་ཕྱེད་པའི་དད་པ་བཟང་པོ་རྒྱུད་ལ་སྐྱེ་བའི་རྐྱེན་བཟང་དུ་འགྱུར་བས། བསོད་ནམས་ཀྱི་རྒྱུ་བླ་ན་མེད་པའོ། །
དེ་ལྟར་མིན་པར་རྩོད་པའི་རྒྱུ་ཁོ་ནར་སོང་ན་ནི། དགོས་པ་ལས་དགག་བྱ་ཆེ་བས།
དེང་སང་ཆོས་ལ་དད་པ་གཏན་ནས་མེད་ཅིང༌། ཆོས་ལ་ཞིབ་འཇུག་བྱེད་པའི་དམིགས་ཡུལ་ནི། ཐེག་པ་ཆེན་པོ་རྒྱལ་བའི་བཀའ་མིན་པར་སྒྲུབ་པའི་ཆེད་དང༌། ཐེག་ཆེན་གྱི་མདོ་སྡེ་རྣམས་མདོ་རྫུན་མ་ཤ་སྟག་ཡིན་ལ་དེ་ཡང་འཕགས་པ་ཀླུ་སྒྲུབ་ལ་སོགས་པས་བྱས་པར་བསྙོན་པ་དང༌། ཡང་ལ་ལས་འདྲ་བ་རྒྱུ་མཚན་དུ་བྱས་ནས་ཐེག་ཆེན་གྱི་ཆོས་ནི་ཀླུ་སྒྲུབ་ཀྱིས་བྲམ་ཟེའི་ཆོས་ལས་བརྐུས་སོ་ཟེར་བ་དང༌། ལ་ལ་ནི་ཀླུ་སྒྲུབ་ཀྱིས་གསང་སྔགས་ཀྱི་གཞུང་རྩོམ་པ་དེ་བློ་ངོར་མི་འཐད་ཀྱང༌། གསང་སྔགས་པ་རྣམས་ལ་སེམས་གསོའི་ཆེད་དུ་ཀླུ་སྒྲུབ་སྔ་ཕྱི་གཉིས་དང༌། དབྱིག་གཉེན་སྔ་ཕྱི་གཉིས་ལ་སོགས་པ། མདོར་ན་རང་དང་རང་ཕྱོགས་ཀྱིས་སྔར་ནས་ཐག་བཅད་ཟིན་པའི་ཆོས་འབྱུང་གི་གོ་རིམ་དང་མི་མཐུན་པ་བྱུང་ཚེ༌། རང་དང་རང་ཕྱོགས་ཀྱི་འདོད་པ་མི་བཅོས་པར་སློབ་དཔོན་དེ་དག་མིང་འདྲ་བའོ་ཞེས་གཉིས་རེ་གཉིས་རེ་བཞག་པ་སོགས་ཡིན་མིན་གྱི་ཐག་སྔར་ནས་བཅད་ཟིན་ནས༌། དེའི་སྒྲུབ་བྱེད་རྗེས་ནས་འཚོལ་དགོས་པ་དང༌། ཀུན་སློང་ངན་པ་དེ་རིགས་མེད་ཀྱང་ཚད་མ་ལ་མངོན་སུམ་ཁོ་ན་དང་གཞལ་བྱ་ལ་མངོན་གྱུར་ཁོ་ན་ལས་ཁས་མི་ལེན་པས་དཀོན་མཆོག་གསུམ་དང་ལས་འབྲས། སྐྱེ་བ་སྔ་ཕྱི། བདེན་བཞིའི་འཇུག་ལྡོག་ཙམ་དུ་མ་ཟད་མངོན་ཤེས་རྫུ་འཕྲུལ་དང་ལྷ་འདྲེ་ཙམ་ཡང་ཁས་མི་ལེན་པར་ནང་པའི་ཆོས་ལ་ཞིབ་འཇུག་གི་ཆུ་ཚད་མཐོན་པོ་ཡོད་པར་རློམ་པའི་ཆད་ལྟའི་གཡང་སར་ལྷུང་བ་དང༌། ཡང་ལ་ལས་ཡ་མཚན་ཆེ་བའི་ལྷ་སྒྲུང་དང་འབྲེལ་བའི་གཏམ་རྒྱུད་ཁོ་ནར་མན་ངག་གི་སྙིང་པོར་བཟུང་ནས་དོན་དངོས་ཀྱི་ལོ་རྒྱུས་ལ་དོ་སྣང་གཏན་ནས་མི་བྱེད་པ་དང༌། ལ་ལ་ནི་རང་གི་ལྟོ་གོས་གཏམ་གསུམ་གྱི་འབྱུང་ཁུངས་ཆོས་ཀྱི་ཞིབ་འཇུག་ཁོ་ན་ལ་བཅོལ་ནས།
གལ་ཏེ་འགྲེལ་བྱེད་མཁན་པོ་གཞན་གྱི་འདོད་པ་དང་མི་མཐུན་པ་ཞིག་བཤད་ཐུབ་པ་བྱུང་ན། ལོ་རྒྱུས་ཀྱི་ཁུངས་བཙན་མི་བཙན་སོགས་གང་ལའང་ཇི་མི་སྙམ་པར་བྱུང་རྒྱལ་དུ་སྨྲ་བ་སོགས་ཤིན་ཏུ་མང་ཞིང༌། དེ་དག་ལའང་བརྟག་དཔྱད་ལེགས་པོ་མ་བྱས་ན་བདེན་བདེན་འདྲ་བ་མང་པོ་བཤད་དུ་ཡོད་ཅིང༌། སྨྲ་བའི་སྤོབས་པའང་གཞན་ལས་མཐོ་བ་ཤ་སྟག་ཏུ་འདུག་པས། ཡིན་ལུགས་ཕུ་ཐག་ཆོད་པའི་རྣམ་དཔྱོད་ཞིབ་མོས༌།
བསྲེགས་བཅད་བརྡར་བའི་གསེར་བཞིན་དུ་ལེགས་པར་བརྟགས་ནས་འཇུག་ལྡོག་བྱེད་པ་ལས། རི་བོང་ཅལ་འདྲོག་གི་རྗེས་སུ་མི་ཞུགས་པར། རང་གཞན་གྱི་རྒྱུད་ལ་ནང་པ་སངས་རྒྱས་པ་སྤྱི་དང༌། ཁྱད་པར་དུ་ཐེག་པ་ཆེན་པོའི་སྟོན་པ་དང་བསྟན་པ། དེ་ཚུལ་བཞིན་དུ་འཛིན་ཅིང་སྤེལ་བར་བྱེད་པའི་བྱང་ཆུབ་སེམས་དཔའི་དགེ་འདུན་རྣམས་ལ་ཆོས་ཀྱི་རྗེས་སུ་འབྲང་བའི་དད་པ་བརྟན་པོ་རེ་སྐྱེད་པར་བྱེད་པ་ནི་ཤིན་ཏུ་གལ་ཆེ་བར་སེམས་སོ། །
སྨྲས་པ།
རྒྱལ་བའི་གསུང་ར༵བ་ར༵བ་འབྱམས་ཡང་སྙིང༵་སྙིང༵་གི་ནོར་བུ་ལྟར་བསྔགས་པའི། །
ཤེར་ཕྱིན་མན་ང༵ག་ང༵ག་གིས་བཀྲོལ་མཁ༵ས་མཁ༵ས་རྒུའི་གཙུག་གི་རྒྱན་གྱུར་པ། །
ཀླུ་སྒྲུབ་ཅེས་གྲ༵གས་གྲ༵གས་པའི་རྒྱལ་མཚ༵ན་མ༵ཚན་མོའི་མགོན་ལྟར་རྨོངས་པའི་སྨག།
ཀུན་ནས་འཇོམས་མཛ༵ད་མཛ༵ད་པ་རབ་མཆོ༵ག་མཆོ༵ག་ཟབ་ལམ་སྲོལ་འབྱེད་མཁས་རྒྱལ། །
གང་གི་དྲིན་ལས་ཟབ་དོན་བདུད་རྩིའི་རྒྱུ༵ན། །
རྒྱུ༵ན་མི་ཆད་པའི་ལམ་བཟང་དབུ་མའི་དོན༵། །
དོན༵་གཉེར་སྐྱེ་བོའི་དགའ་སྟོན་ཉིད་གྱུར་ག༵ང༌། །
ག༵ང་གིས་རྟོགས་དེས་སྲིད་པ་ཧྲིལ་པོར་བྱེད། །
བློ་མཆོག་མངའ་བ་ཁྱེད་འདྲ་མ་བྱོན་ན༵། །
ན༵་རྒ་འཁོར་བའི་གནས་ལས་སུ་ཡིས་སྒྲོལ༵། །
སྒྲོ༵ལ་བར་སྨྲ་ཡང་འཛིན་པས་དམ་བཅིངས་ཕྱིར༵། །
ཕྱིར༵་བཞིན་བྱིང་བའི་རང་གཞན་སྡེ་པ་མང༌། །
མ༵་རིག་འཁོར་བའི་རྩ་བར་གཟིགས་ནས་སུ། །
མ༵་ལུས་གསུང་གི་སྙིང་པོ་རྟེན་འབྲེལ་དོན། །
མ༵་ནོར་རྫོགས་པར་སྟོན་པས་མགོན་ཁྱོད་ཉིད། །
མ༵་གྱུར་འགྲོ་བའི་དཔུང་གཉེན་གཅིག་པུ་ལགས། །
ག༵ང་གི་མཛད་བཟང་ཟབ་ཡངས་རྒྱ་མཚོ་ལས། །
ག༵ང་ཐོས་རྩྭ་རྩེས་བླངས་པའི་ཟིལ་བ་ཙམ། །
ག༵ང་ཞིག་བརྗོད་དེར་རྣམ་དཀར་འགའ་མཆིས་ན། །
ག༵ང་གི་རིང་ལུགས་འཕེལ་བའི་རྒྱུ་རུ་བསྔོ །
རྒྱ༵ལ་ཀུན་མཁྱེན་རབ་གཅིག་བསྡུས་ལི་ཁྲིའི་རྡུལ། །
རྒྱ༵ལ་སྲས་ཀླུ་ཡི་ལུགས་བཟང་སྤེལ་བའི་སླད། །
རྒྱ༵ལ་བའི་གདུང་འཚོབ་རྣམ་རོལ་ཙོང་ཁ་པའི། །
རྒྱ༵ལ་བསྟན་ཉིང་ཁུ་སྲིད་མཐར་གནས་གྱུར་ཅིག།
ལོ༵་རྒྱུས་ཁུངས་མའི་འོ་མ་དཀྲོགས་པ་ལས། །
ལོ༵་ཡིས་རྙིང་རུལ་མ་བསྒྱུར་མར་གསར་གང༌། །
ལོ༵་ཚིགས་གསེར་གཞོང་དྲི་བྲལ་ལ་བཞག་ནས། །
ལོ༵་རབས་འདི་ཡི་མཁས་རྒུར་མཆོད་སྤྲིན་བསྟར། །
ཞེས་དཔལ་མགོན་འཕགས་པ་ཀླུ་སྒྲུབ་ཀྱི་རྣམ་པར་ཐར་པ་གང་ལས་བྱུང་བའི་ལུང་ཁུངས་གལ་ཆེན་རྣམས་བསྒྱུར་ཅིང་བསྡུས་ཏེ་ལུང་རིགས་ཀྱི་བརྒལ་བརྟག་དང་བཅས་པ་ཅུང་ཟད་རྒྱས་པར་བཀོད་པ་ལུང་རིགས་རྒྱ་མཚོའི་གཏེར་མཛོད་ཅེས་བྱ་བ་འདི་ནི། སྔར་ནས་རྩོམ་མཇུག་མ་རྫོགས་པ་ཞིག་ཡོད་པ་ཉིད། བདག་ཅག་རྣམས་ཀྱི་འདྲེན་མཆོག་བླ་ན་མ་མཆིས་པ། ཡང་དག་པ་ཡོངས་ཀྱི་དགེ་བའི་བཤེས་གཉེན་ཆེན་པོ། དྲུག་པ་རྡོ་རྗེ་འཆང་དང་ངོ་བོ་མི་གཉིས་པའི་བཀའ་དྲིན་གསུམ་ལྡན་གྱི་རྩ་བའི་བླ་མ་དམ་པ་སེར་སྨད་རྒྱལ་རོང་མཁན་ཟུར་རིན་པོ་ཆེ༌། དོན་གྱི་སླད་དུ་མཚན་ནས་སྨྲོས་ཏེ་རྗེ་བཙུན་ངག་དབང་ཐེག་མཆོག་དཔལ་བཟང་པོ་དེ་ཉིད་སྤྱི་ལོ་༢༠༡༠་ལོའི་ཟླ་བ་༨ཚེས་༤ལ་རྒྱ་ནག་གི་གྲོང་ཁྱེར་ཆེན་པོ་ཁྲིན་ཏུའུ་སྤོས་ལྡན་གྲོང་དུ་ཞབས་སོར་འཁོད་པའི་དུས་སུ་སྤྱན་བསྟར་ཞུས་པར། ཐུགས་དགྱེས་ཚོར་ཆེན་པོས་ཉིན་གཅིག་ལ་རྫོགས་པར་གཟིགས་ནས། འདིའི་མཇུག་མྱུར་དུ་རྫོགས་པར་གྱིས༌། ཁོ་བོས་ཕར་ཁྱེར་ནས་པར་བསྐྲུན་བྱེད་ཅེས་པའི་བཀའ་ལུང་སྤྱི་བོར་ནོད་པ་ཁུར་དུ་བླངས་ཏེ། སྤྱི་ལོ་༢༠༡༠་ལོའི་ཟླ་བ་༡༠་ཚེས་༡༡ནས་ཚེས་༢༧་བར་དུ་ཕ་བླ་མ་དམ་པ་ཁོང་ནས་དབེན་ས་སྙན་བརྒྱུད་ཀྱི་ཟབ་ལམ་བླ་མ་མཆོད་པ་དང་འབྲེལ་བའི་ཕྱག་ཆེན་ཁྲིད་ཁ་ཆེམས་རླུང་བསྐུར་གྱི་ཞལ་ཁྲིད་དང༌། ཕར་ཕྱིན་རྣམ་བཤད་སྙིང་པོ་རྒྱན་དང༌། དབུ་མ་ལ་འཇུག་པ། ཕར་ཕྱིན་བསྟན་བཅོས་མངོན་པར་རྟོགས་པའི་རྒྱན་འགྲེལ་བ་དོན་གསལ་དང་བཅས་པ།རྒྱས་པའི་བསྟན་བཅོས་ཚད་མ་རྣམ་འགྲེལ། མངོན་པ་མཛོད་ཀྱི་རྩ་བ་བཅས་བཞི་དང་འདུལ་བ་དམར་སྡོམ་དང་བཅས་པའི་ལྗགས་ལུང་བཀའ་དྲིན་བསྩལ་བའི་བར་བར་དུ་འཕྲི་བསྣན་ཅི་ནུས་བགྱིས་ཤིང༌། གསུང་ཆོས་མཇུག་གྲུབ་པའི་ཉིན་མོར་འདིའང་མཇུག་རྫོགས་པའི་རྟེན་འབྲེལ་མ་བསྒྲིག་ལྷུན་གྲུབ་བྱུང་ངོ་ཞེས་པའི་མཚམས་སྦྱོར་དང་བཅས་པ་འདི་ནི། རྒྱལ་བའི་དབང་པོ་ཐམས་ཅད་མཁྱེན་པ་གསུམ་པ་ཆེན་པོས་ཕྱག་བཏབ་ཅིང༌། ལི་ཐང་དགེ་ལྡན་ཐུབ་ཆེན་ཆོས་འཁོར་གླིང་ཞེས་པའི་མཚན་གྱི་མེ་ཏོག་སྤྱི་བོར་བཅིངས་པའི་འདུས་སྡེ་ཆེན་མོ་འདིའི་མཁན་རབས་གོ་གསུམ་པ།ལི་ཐང་བཞག་མ་ཐང་དགེ་ལྡན་བཤད་སྒྲུབ་ཆོས་འཁོར་གླིང་དང་།
རྒྱ་ནག་བྱང་ཤར་གྱི་གྲོང་ཁྱེར་ཆེན་མོ་ལེའོ་ནེང་ཧྲན་ཡང་གི་ཕོ་བྲང་གཅིག་དང་མཆོད་རྟེན་བཞིར་གྲགས་པའི་ཡ་གྱ་བྱང་ཕྱོགས་མཆོད་རྟེན་ཆེན་མོ་གང་དུ་ཆགས་པའི་གནས་མཆོག མན་ཇུའི་གོང་མ་ཧྭང་ཐའེ་ཇེང་དང་ཧྲུན་ཀྲི་གཉིས་ཀྱི་སྐུ་རིང་ལ་གོང་མ་རང་ཉིད་ནས་ཏཱ་ཆིང་རྒྱལ་ཁབ་ཀྱི་གོང་མའི་མཆོད་གནས་སུ་ཆེད་དུ་ཕྱག་བཏབ་གནང་བའི་འདུས་སྡེ་ཆེན་མོ་དགོན་རྒྱལ་སྐྱོང་ཆོས་འཁོར་གླིང་དང་། ཆིང་གི་གོང་མ་ཁང་ཞིང་གི་སྐུ་རིང་ལ་ཏུར་པུ་ཐུ་ཆི་དབང་ནས་ཡོན་སྦྱར་གྱིས་ཕྱག་བཏབ་པའི་ཏཱ་ཆིན་ཕུན་ཚོགས་རྣམ་དག་གླིང་དང་བཅས་པའི་ཁྲི་འཛིན་པ།  བཞག་པ་སྐུ་ཕྲེང་གསུམ་པའི་ཐ་སྙད་ཙམ་འཛིན་པ་དགེ་ལེགས་མཁས་གྲུབ་འཇམ་དཔལ་རྒྱ་མཚོའམ་མིང་གཞན་འཇམ་དབྱངས་མཁས་གྲུབ་ཏུ་འབོད་པས་བགྱིས་པ་འདིས་ཀྱང་འཕགས་མཆོག་ཀླུ་སྒྲུབ་ཡབ་སྲས་བརྒྱུད་པ་དང་བཅས་པའི་གསེར་སྦྱངས་བཙོ་མ་ལྟ་བུའི་བསྟན་པ་རིན་པོ་ཆེ་འདི་ཉིད་ཡུལ་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག། །།   རྫོགས་སོ།།
सर्वमङ्गलं॥॥
སརྦམངྒལཾ།། །།
·རྩོམ་ཡིག་གོང་མ:དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༧
·རྩོམ་ཡིག་འོག་མ:མིག་སྔའི་བོད་ཀྱི་གླུ་གཞས་སྒྱུ་རྩལ་གྱི་གནད་འགའ། །
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·རྗེ་ལམ་རིམ་པའི་རྣམ་ཐར་མདོར་བསྡུས། 2015/7/12 14:59:21
·འཕགས་པ་ཐོགས་མེད་ཀྱི་རྣམ་ཐར་སྔོན་མེད་ལེགས་བཤད་དགའ་སྟོན། 2015/6/24 11:31:41
·དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༧ 2014/11/19 13:19:56
·དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༥ 2014/11/12 20:48:06
·དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༤ 2014/11/12 20:37:16
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 4:12:57 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 6:13:05 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 9:25:13 [来自: 112.5.248.229]

འབྲེལ་ཡོད་དཔྱད་བརྗོད 57 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།23.44MS