ཚངས་དབྱངས་དྲ་བ་ལ་ཕུལ་བའི་ལེགས་སྐྱེས་མེ་ཏོག་དཀར་པོ། །

ཨེ་མ་ཧོ།

ཚངས་གནས་བརྒྱ་བྱིན་འཁོར་ལོ་བསྒྱུར་རྒྱལ་དང་། །

ཚངས་པར་སྤྱོད་པའི་དགེ་འདུན་སྡེ་གཉིས་དང་། །

ཚངས་དབྱངས་གྲུབ་པའི་རྒྱལ་བ་སྲས་བཅས་བསྟོད། །

ཚངས་སྲས་དགྱེས་པའི་ངག་རིག་འདོད་པ་འཇོ། །

ཚངས་དབྱངས་དྲ་བའི་གནམ་ཀླད་སྒྱུ་འཕྲུལ་གར། །

ཚངས་དབྱངས་དྲ་བས་མཐུན་སྒྲིལ་ཟམ་ཆེན་བཙུགས། །

ཚངས་དབྱངས་དྲ་བས་ལེགས་དགུའི་ལམ་བཟང་སྟོན། །

ཚངས་དབྱངས་དྲ་བ་འཛམ་གླིང་རྒྱན་དུ་མཛེས། །

ཚངས་དབྱངས་དྲ་བ་དྲང་བདེན་རྒྱ་མ་དངོས། །

ཚངས་དབྱངས་དྲ་བས་ཕ་མེས་སྲོལ་རྒྱུན་འཛིན། །

ཚངས་དབྱངས་དྲ་བས་གནའ་དེང་བཟང་སྤྱོད་སྐྱོང་། །

ཚངས་དབྱངས་དྲ་བས་ཡ་རབ་ལྟ་སྒོམ་སྤེལ། །

ཚངས་དབྱངས་རྒྱ་མཚོ་དྲན་པའི་རྟེན་འབྲེལ་བརྡ། །

ཚངས་དབྱངས་ཡན་ལག་དྲུག་ཅུའི་གྲུབ་ཆ་ཞིག །

ཚངས་དབྱངས་དགའ་བདེའི་གླུ་བྲོ་མཉམ་རོལ་བའི། །

ཚངས་དབྱངས་དྲ་བའི་བཞེད་དོན་ལྷུན་གྲུབ་ཤོག །

      ཅེས་པའང་རབ་རྒྱན་ལྕགས་ཡོས་དབོ་ཟླའི་དཀར་ཕྱོགས་དགའ་བ་དང་པོར་ཚངས་དབྱངས་དྲ་བའི་གྲོགས་པོ་ཚོས་རང་ཕྱོགས་དགའ་ཙམ་གྱི་ཁ་ངོ་ལ་མི་བལྟ་བར་ཆོས་དང་དང་འཇིག་རྟེན་སྤྱི་ཡི་ལེགས་ཚོགས་དར་རྒྱས་ཆེད་དུ་དྲ་ཚིགས་སྤེལ་བ་ལ་དྲིན་བཟོ་གནང་བའི་ལེགས་སྐྱེས་སུ་རྒྱང་རིང་དབྱིན་ཇིའི་ལུང་པ་ནས་ཤྲྰི་ཨ་ནནྟ་བཛྲས་གུས་ཕུལ། ། ཤྲྰི་སརྦ་ལོ་ཀ་བི་ཛ་ཡནྟུ། །