ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ཚངས་དབྱངས་འདུ་ར། >> བློ་སྦྱོང་།
 རྩོམ་ཡིག་ཀློག་པ།

ཤྲཱི་ཀ་ལ་ཙཀྲའི་དབང་ཞུ་རྣམས་ལ་གདམས་ངག

  རྩོམ་པ་པོ:དཔལ་དགྱེས་པ་རྡོ་རྗེ།ཡོང་ཁུངས:ངེད་དྲ་བ།གཟིགས་གྲངས:2353ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2011/7/15 15:55:42ཚོགས་ཡར་སྤྲོད:admin
༄༅། །ཤྲཱི་ཀ་ལ་ཙཀྲའི་དབང་ཞུ་རྣམས་ལ་གདམས་ངག་ཡིད་བཞིན་
ནོར་བུའི་མེ་ལོང་།
ན་མོ་གུ་རུ་བུདྡྷ་ཛྙཱ་ན་ཀ་ལ་ཙཀྲ་ཡེ། །
ཕྱོགས་དུས་སྲས་བཅས་རྒྱལ་བའི་གསང་གསུམ་ཀུན། །
ཀུན་འདུས་ཡིད་བཞིན་ནོར་བུ་རིན་པོ་ཆེ། །     
ཆེ་བའི་ཆེ་མཆོག་འཛམ་གླིང་ཆོས་ཀྱི་རྒྱལ། །
རྒྱལ་སྲས་སྤྱན་རས་གཟིགས་དབང་ཕྱག་གིས་འདུད། ། 
སྙིགས་ལྔའི་མུན་པ་བསལ་བའི་ཉི་ཟླ་བཞིན། །
མཁྱེན་བརྩེ་ནུས་པའི་འཁོར་སྒྱུར་རིན་པོ་ཆེས། །
མཐའ་ཡས་འགྲོ་བའི་མོས་བློ་དང་འཚམ་པར། །
ཟབ་རྒྱས་ཆོས་ཚུལ་གདམས་པར་འདི་ལྟར་ལགས། །
སྲོག་ལྡན་སེམས་ཅན་ཐམས་ཅད་ཀུན་མཚུངས་པར། །
བདེ་འདོད་སྡུག་བསྔལ་མི་འདོད་འདྲ་མཉམ་ཕྱིར། །
སྣོད་བཅུད་ཞི་བདེ་ཕྱི་ནང་གསང་བའི་དོན། །   
ཀུན་མཐུན་བྱང་ཆུབ་ལམ་དུ་འབད་པར་འཚལ། །
དགེ་སྡིག་བླང་དོར་ཉམས་སུ་ལེན་མཁས་ན། །
མི་ཆོས་ལེགས་འགྲུབ་འདི་ཕྱིར་སྐལ་བ་བཟང་། །
ཚེ་སྲོག་མི་འཇིག་རིང་འཚོ་ཞི་བདེའི་དཔལ། །
མི་རིགས་འགྲོ་བར་རང་དབང་དགའ་སྤྲོ་འཕེལ། །
འཕགས་པའི་བདེན་བཞི་མི་རྟག་བཅུ་དྲུག་རྣམས། །
ཡང་ཡང་སོམས་དང་དམ་ཆོས་རྣལ་མ་ཞིག །
ཐོས་བསམ་སྒོམ་པའི་ཡོན་ཏན་ཐོབ་འགྱུར་བས། །
སློབ་གཉེར་ཡང་དག་མཛད་པར་ཤིན་ཏུ་གལ། །
འཁོར་བར་མ་རིག་ཞེན་པའི་གང་ཟག་འགས།  །
འདོད་པར་སྤྱད་ཅིང་རྨོངས་སྲེད་རབ་འཕེལ་བ། །
ཆགས་སྡང་རྨོངས་པས་བཟི་བའི་དོལ་མཆོད་སོགས། །
འཇིགས་བསྐུལ་གནོད་བྱེད་ཚོགས་དག་ཕྱིར་དེངས་ཤིག །
འཇིག་རྟེན་ཆེད་དུ་རྙེད་བདེ་གྲགས་བསྟོད་རྣམས། །
རྨི་ལམ་ཉོ་ཚོང་འདྲ་བས་སྙིང་པོ་མེད། །                   
མཚན་ཉིད་ཀུན་ལྡན་བླ་མ་དམ་པ་ཞིག ། 
མཉེས་པ་གསུམ་གྱིས་བསྟེན་དང་དངོས་གྲུབ་འཐོབ། །
མངོན་མཐོ་ངེས་ལེགས་ཕུན་ཚོགས་མཐའ་དག་ཀུན། །
སྡོམ་པ་ཉམས་ལ་འབྱུང་བའི་སྐབས་བྲལ་ཕྱིར། །
དྲན་ཤེས་བག་ཡོད་ལྡན་པས་རང་རྒྱུད་འདུལ། །
སོར་བྱང་སྔགས་ཀྱི་སྡོམ་པ་བསྲུང་བར་མཛོད། །
ཐོས་པ་མ་རིག་མུན་སེལ་སྒྲོན་མེ་སྤོར། །   
བསམ་པ་འཆད་རྩོད་རྩོམ་པས་སྒྲོ་འདོགས་ཆོད། །
སྒོམ་པ་ཏིང་འཛིན་རྣམ་གསུམ་རྟག་ཏུ་འབོད། །
ཞི་ལྷག་ཐབས་ཤེས་བརྩོན་པར་ཤིན་ཏུ་གལ། །
གསུང་རབ་རྒྱ་མཚོ་མཉན་པའི་སྤྲོ་སེམས་གཅིག །
སྟོན་དང་བསྟན་ལ་ཡིད་ཆེས་ངེས་ཤེས་གཉིས། །
ཆགས་སྡང་རྨོངས་པའི་རྩ་བ་འཇོམས་པ་གསུམ། །
བྱུང་ན་དེ་ཚེ་རྒྱལ་བའི་རྗེས་འཇུག་ལགས། །
རྟོན་བཞི་གོ་ལོག་མ་སོང་མདོ་སྔགས་དོན། །               
ཟབ་རྒྱས་གདམས་ངག་ལུང་རིགས་ཡང་དག་གིས། །
ཐུགས་ལ་འཁྲུངས་ན་རང་རྒྱུད་དམ་པའི་ཆོས། །
སྐལ་བཟང་སྙིང་གི་གདམས་དོན་རྙེད་པ་ལགས། ། 
 
རྙེད་དཀའི་དལ་འབྱོར་སྙིང་པོ་ལོན་པའི་ཐབས། །
དོན་ཆེན་གཏན་གྱི་འདུན་མ་བསྒྲུབ་པའི་ཚུལ། །        
མི་རྟག་སྒྱུ་མའི་ཚེ་ལ་ངེས་མེད་པས། །        
བསླུ་མེད་ལས་འབྲས་གནས་ལ་ཡིད་ཆེས་གལ། །
ལུས་ཅན་ལས་ཀྱི་རྒྱུ་འབྲས་ཆུད་མི་ཟ། །     
ཚོགས་ཤིང་དུས་སུ་སྨིན་ཚེ་བཅོས་ཐབས་བྲལ། །          
ཤིན་ཏུ་བཟོད་དཀའ་འཁོར་བའི་སྡུག་བསྔལ་ལས། །
ཐར་པའི་བྱང་ཆུབ་ལམ་བཟང་བསྟེན་པར་མཛོད། །
བགྲང་ཡས་དུཿཁས་མནར་བའི་འགྲོ་བ་དག །
འདྲེན་པའི་སྐྱབས་གནས་བསླུ་བ་མེད་པ་ནི། །
སངས་རྒྱས་ཆོས་ཚོགས་གསུམ་ལས་གཞན་མེད་ཕྱིར། །
དཀོན་མཆོག་རྣམ་གསུམ་སྐྱབས་སུ་བསྟེན་པར་རིགས། །
ཁམས་གསུམ་སྡུག་བསྔལ་བདག་བདེ་འདོད་ལས་བྱུང་། །
ཞི་བདེ་མཐའ་དག་གཞན་ཕན་སེམས་ལས་འཁྲུངས། །
དེ་ཕྱིར་སྨོན་འཇུག་དོན་དམ་རིན་ཆེན་སེམས། །
བླ་མེད་བྱང་ཆུབ་སེམས་མཆོག་བསྐྱེད་པར་རིགས། །
གཞི་རྒྱུད་རང་བྱུང་རིག་པའི་མེ་ལོང་ལ། །   
གློ་བུར་སྒྲིབ་གཉིས་བག་ཆགས་རྡུལ་ཕུང་དག །
རབ་བསལ་དག་རྫོགས་སྨིན་པར་དུས་འཁོར་གྱི། །
སྲོག་སྡོམ་གཟེར་བཞིས་གནད་ལ་འབད་པར་རིགས། །
སྣང་གྲགས་རིག་པ་ལྷ་སྔགས་ཆོས་ཉིད་ངང༌། །     
སྐུ་དང་ཡེ་ཤེས་རོལ་བ་འབྱམས་སུ་ཀླས། །
ཟབ་གསང་རྣལ་འབྱོར་ཆེན་པོས་ཉམས་ལེན་ཀུན། །
དབྱེར་མེད་ཐུགས་ཀྱི་ཐིག་ལེར་བསྟིམ་པར་རིགས། ། 
སྦྱོར་དྲུག་བྱེད་རྩོལ་རྩ་རླུང་ལུས་འཕྲུལ་འཁོར་གྱིས། །
བདེ་གསལ་མི་རྟོག་ཏིང་འཛིན་འོད་གསལ་ངང་། །
བསྐྱེད་རྫོགས་རིམ་གཉིས་ལམ་ལ་དབང་འབྱོར་ཕྱིར། །
ཕྱག་ཆེན་དུས་ཀྱི་འཁོར་ལོ་བསྟེན་པར་རིགས། །
གདུལ་དཀའ་སྙིགས་ལྔའི་རྨོངས་མུན་བདོ་བའི་ཚེ། །
རྩོལ་བཅས་ཐེག་པའི་སྣང་གསལ་མངོན་དཀའ་བས། །
ཐེག་རྩེ་ཨ་ཏིའི་རིག་པ་ཉི་མའི་འོད། །      
འོད་གསལ་རྫོགས་པ་ཆེན་པོ་མཁྱེན་པར་རིགས། །
སྨིན་གྲོལ་དབང་བཞིས་སྒྲིབ་ཀུན་ཡོངས་སྦྱོངས་ཏེ། །
ཅོག་གཞག་བཞི་ལྡན་མན་ངག་གནད་གསང་རྟོགས། །
རིག་འཛིན་རྣམ་བཞིའི་ས་ལམ་མཐར་ཕྱིན་ནས། །
དོན་དམ་སྐུ་བཞིའི་ངོ་བོར་སངས་རྒྱས་ཤོག །
འདིར་སྨྲས་དགེ་བས་བདག་གཞན་འགྲོ་བ་ཀུན། །
ཀུན་བཟང་རྒྱལ་སྲིད་དམ་པར་དབང་འབྱོར་ཞིང་། །
ཞིང་མཆོག་དག་མཉམ་རབ་འབྱམས་མངོན་སུམ་སྟོན། །
ཁམས་གསུམ་འཁོར་བ་དོང་ནས་སྤྲུགས་གྱུར་ཅིག །
      ཅེས་པའང་རབ་རྒྱན་ལྕགས་ཡོས་སྣྲོན་ཟླའི་ཉའམ་འཛམ་གླིང་སྤྱི་བསང་གི་སྐབས་སུ་ཆོས་ནོར་གྱི་མུ་ཏོ་བ་བདག་ལ་སྙིང་ནས་དགའ་དད་ཡོད་པའི་སྙིང་གྲོགས་འགའ་ཞིག་གིས་ཡང་ཡང་བསྐུལ་བ་དོན་ཡོད་པར་བྱ་བའི་ཕྱིར་དུ་དབྱིན་ཡུལ་ཀུན་བཟང་ཆོས་གླིང་དུ་རིག་འཛིན་བླ་མ་དཔལ་དགྱེས་པ་རྡོ་རྗེས་གང་དྲན་དུ་ཤར་མར་བྲིས་པ་དགེའོ། །
·རྩོམ་ཡིག་གོང་མ:ཆང་དང་མ་ཅཱང་གངས་ཅན་ཡུལ་ལ་དར།
·རྩོམ་ཡིག་འོག་མ:དབྱངས་གསལ་ལྷ་མོ།
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
འབྲེལ་ཡོད་རྩོམ་ཡིག་མི་འདུག
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 3:13:23 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 5:02:48 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 7:44:55 [来自: 112.5.248.229]

འབྲེལ་ཡོད་དཔྱད་བརྗོད 97 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།39.06MS