ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ཚངས་དབྱངས་འདུ་ར། >> བློ་སྦྱོང་།
 རྩོམ་ཡིག་ཀློག་པ།

ལམ་རིམ་བདུད་རྩིའི་སྙིང་པོ།༨

  རྩོམ་པ་པོ:ཀོང་པོ་ཡེ་ཤེས་བརྩོན་འགྲུས།ཡོང་ཁུངས:ངེད་དྲ་བ།གཟིགས་གྲངས:3561ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2012/12/15 11:44:19ཚོགས་ཡར་སྤྲོད:admin
༄༅། ། བྱང་ཆུབ་ལམ་གྱི་རིམ་པའི་གདམས་པ་ཟབ་མོ་རྣམས་ཚིགས་སུ་བཅད་པའི་
སྒོ་ནས་ཉམས་སུ་ལེན་ཚུལ་དམ་ཆོས་བདུད་རྩིའི་སྙིང་བོ་
ཞེས་བྱ་བ་བཞུགས་སོ། །༨
 
  ངེས་པར་འཆི་བ་བསམ་པ་ནི།  དུས་ནམ་ཡང་རྙེད་དཀའ་རྙེད་གྱུར་ན། །དོན་ཤིན་ཏུ་ཆེ་བའི་རྟེན་བཟང་པོ། །འདི་མི་རྟག་མྱུར་དུ་འཇིག་འགྱུར་ཏེ། །རྩྭ་འདབ་རྩེར་ཆགས་པའི་ཟིལ་ཐིགས་བཞིན། །གནས་ཁམས་གསུམ་འཁོར་བ་མཐའ་མེད་འདིར། །རྟེན་བདེ་འགྲོ་དང་ནི་ངན་འགྲོ་ཡི། །ལུས་ཇི་འདྲ་ཞིག་ནི་བླང་གྱུར་ཀྱང༌། །མཐར་འཆི་བ་ཉིད་ལས་མ་འདས་སོ། །མཐོ་ནམ་མཁའི་དབྱིངས་དང་ས་སྟེང་དང་། །འོག་རྒྱ་མཚོ་རི་རབ་ཁོང་སེང་སོགས། །ཡུལ་གང་འདྲ་ཞིག་ཏུ་གནས་བཅས་ཀྱང༌། །དགྲ་འཆི་བདག་འདི་ལས་ཐར་མི་འགྱུར། །སྔོན་འདས་པའི་རྫོགས་ལྡན་དུས་རྣམས་དང༌། །སྙིགས་ལྔ་བདོ་ད་ལྟའི་དུས་འདི་དང༌། །སླར་མ་འོངས་དུས་ཚོད་གང་དུ་ཡང༌། །འཆི་བདག་གིས་མི་བརྫིའི་དུས་སྐབས་མེད། །ལྷ་ཚངས་དབང་ཁྱབ་འཇུག་འཁོར་བསྒྱུར་གྱི། །དཔུང་མཐུ་སྟོབས་དྲང་སྲོང་བདེན་མཐུ་དང༌། །ཁོང་སྒྱུ་མའི་རྫས་སྔགས་རྫུ་འཕྲུལ་སོགས། །ཐབས་གང་གི་འང་འཆི་བ་བཟློག་མི་ནུས། །ནོར་ལོངས་སྤྱོད་སྟོང་གསུམ་འཇིག་རྟེན་གྱི། །ཁྱོན་གང་བས་བླུས་ཀྱང་བསླུར་མེད་ཅིང༌། །རྗེ་སྨན་པའི་རྒྱལ་པོས་སྨན་སྦྱར་ཡང༌། །འཆི་བདག་གི་དགྲ་དེ་བཟློག་མ་ཡིན། །སྔོན་བྱུང་བའི་སྐྱེ་རྒུ་མཆོག་དམན་ཀུན། །ད་བརྟག་ན་མིང་གི་ལྷག་མ་ཙམ། །དུས་ད་ལྟ་འཚོ་བའི་འགྲོ་ཀུན་ཀྱང༌། །ནམ་ཞིག་ན་གཅིག་ཀྱང་མེད་པར་འགྱུར། །ཚུར་ཚེ་ལ་སྣོན་ཁ་འདེབས་རྒྱུ་མེད། །ཕར་སྐད་ཅིག་མི་སྡོད་ཟད་འགྱུར་བ། །དཔེ་མར་མེ་འབར་བ་དང་འདྲ་ན། །ད་མི་འཆི་གནས་པའི་གོ་སྐབས་ཅི། །དུས་དང་པོར་མངལ་དུ་ཆགས་པ་ནས། །བར་ཆད་པ་མེད་པར་འཆི་བའི་དྲུང༌། །དཔེ་རི་གཟར་འབབ་ཆུ་བཞིན་འགྲོ་ན། །བདག་གསོན་ནོ་སྙམ་པ་མ་འཁྲུལ་ལམ། །མི་གང་ཞིག་གསོད་པའི་ས་ཕྱོགས་སུ། །འགྲོས་དལ་མེད་འཁྲིད་པར་བྱེད་གྱུར་ན། །དེའི་བར་སྐབས་འདོད་ཡོན་ལྔས་བཀུར་ཡང༌། །སེམས་དགའ་བའི་རྒྱུ་རུ་འགྱུར་རམ་ཅི། །དཔེ་དེ་བཞིན་འཆི་བའི་དྲུང་ཉིད་དུ། །དུས་སྐད་ཅིག་མི་སྡོད་བསྙེགས་བཞིན་ལ། །དངོས་འདོད་པའི་ཡོན་ཏན་བརྒྱ་འཛོམ་ཡང༌། །ཡིད་དགའ་བར་བྱ་བའི་གནས་འདུག་གམ། །དུས་ད་ལྟའི་གནས་ཁང་གཉེན་བཤེས་དང༌། །གྲོགས་ལོངས་སྤྱོད་རྣམས་དང་ལུས་འདི་ཡང༌། །དུས་མི་རིང་བཞག་ནས་འགྲོ་དགོས་ན། །ད་རྨི་ལམ་འདྲ་འདིར་ཅི་ཞིག་ཆགས། །ལོ་ཟླ་བ་ཞག་དང་དུས་ཚོད་རྣམས། །དཔེ་ཉི་མའི་གྲིབ་སོ་ཇི་བཞིན་དུ། །རྟག་མི་ཐུབ་ཡུད་ཡུད་དུ་འགྲོ་ན། །ད་མྱུར་དུ་མི་འཆིའི་གོ་སྐབས་ཅི། །སྔར་ཕན་ཆད་རང་ལོ་དེ་ཙམ་འདས། །ཚེ་ལྷག་མའང་གཉིད་སོགས་ཀྱིས་གཡེངས་ནས། །ཆོས་བྱ་བའི་སྐབས་ནི་ཡུད་ཙམ་ན། །ད་ལོང་ཡོད་བྱ་བའི་གནས་འདུག་གམ། །ཚུལ་དེ་ཡང་ཉིན་ཞག་གཅིག་ཉིད་ལ། །ཆོས་ཚུལ་བཞིན་སེམས་དང་གཡེང་བ་གཉིས། །ཆ་གང་མང་བརྟགས་ན་གསལ་འགྱུར་བས། །དོན་འདི་ལས་བསམས་ཀྱང་ལོང་སྐབས་བྲལ། །དོན་དེ་ཕྱིར་རྐྱེན་གྱིས་བཟློག་མེད་པར། །མཐར་ངེས་པར་འཆི་ཞིང་དེ་ཡང་ནི། །ལོང་མེད་པར་མྱུར་དུ་འཆི་འགྱུར་ན། །ད་ངེས་པར་ཆོས་ལ་ཅིས་མི་འབད། །
  ནམ་འཆི་ངེས་མེད་བསམ་པ་ནི།   མཐར་ངེས་པར་འཆི་བ་ཙམ་མ་ཟད། །དུས་དེ་རིང་ཉིད་དུ་སྲོག་བྲལ་ཏེ།།ལུས་དུར་གྱི་གནས་སུ་བཞག་གྱུར་ནས།།སེམས་བར་དོར་མི་སླེབས་ངེས་མེད་དེ། །སྔོན་ཚེ་ལོ་དཔག་མེད་ཐུབ་པ་བྱུང༌། །སླར་ཚེ་ལོ་བཅུ་ལ་རིང་མཐའ་བྱེད། །དུས་ད་ལྟ་རྒན་གཞོན་གོ་རིམ་མེད། །ད་འཛམ་གླིང་ཚེ་ལ་ངེས་པ་ཅི། །དུས་སྔ་དྲོ་ཡོད་པ་ཕྱི་དྲོ་མེད། །ནུབ་ཉལ་དུས་ཡོད་པ་ལངས་ཚེ་མེད། །དུས་ད་ལྟ་ཡོད་པ་ད་ལྟ་མེད། །ཚེ་མི་རྟག་ངང་ཚུལ་འདི་རེ་འཇིགས། །གཟའ་གདོང་ཐུག་བྱུང་དང་གཡང་ལ་ལྷུང༌། །ཆུར་ཀོ་གྲུ་བུབ་དང་མེ་ཡིས་འཚིག །གནས་ཁང་པ་རྡིབས་དང་རྟ་ཡིས་བརྡབས། །ལུས་རྐང་ལག་ཆག་དང་མཚོན་གྱིས་རྨས། །མི་མི་མིན་དགྲ་བོའི་འཚེ་བ་དང༌། །ནད་མི་འདྲ་བཞི་བརྒྱ་རྩ་བཞི་དང༌། །གདོན་བགེགས་རིགས་སྟོང་ཕྲག་བརྒྱད་ཅུ་སོགས། །ཕྱི་ནང་གི་འཆི་རྐྱེན་འདི་རེ་མང༌། །དེང་སྙིགས་མ་ལྔ་བདོའི་དུས་ཡིན་ཕྱིར། །ཚེ་བསྲིང་བའི་ཐབས་ཀྱང་བསྒྲུབ་དཀའ་ཞིང༌། །ཕྱི་སྨན་གྱི་ནུས་པའང་ཉམས་གྱུར་པས། །དོན་དེ་སླད་གསོན་པའི་རྐྱེན་དེ་ཉུང༌།།ཟས་མི་འཕྲོད་དུག་ཏུ་གྱུར་པ་དང༌།།སྨན་མི་འཕྲོད་ནད་དུ་གྱུར་པ་སོགས། །གསོན་རྐྱེན་ཡང་འཆི་རྐྱེན་དུ་གྱུར་ན། །འདིར་གསོན་པའི་རྐྱེན་ལ་ཡིད་བརྟན་ཅི། །ལར་འཆི་རྐྱེན་སྣ་ཚོགས་རླུང་གི་ནང༌། །སྲོག་མར་མེ་ལྟ་བུར་གཡོ་བཞིན་དུ། །དུས་གཏན་དུ་སྡོད་འདྲའི་བསམ་སྦྱོར་ཅན། །འདི་རྟག་འཛིན་གདོན་གྱིས་ཟིན་པར་ངེས། །མི་བདག་གི་ལུས་དང་སྲོག་འདི་ནི། །དཔེ་ཆུ་ནང་ལྦུ་བ་ཇི་བཞིན་དུ། །རྐྱེན་ཆུང་ངུ་ཙམ་གྱིས་འཇིག་བྱེད་ན། །རིང་གནས་པར་རེ་བ་ཤིན་ཏུ་འཁྲུལ། །ས་རི་རབ་གླིང་བཞི་རྒྱ་མཚོ་སོགས། །ཆོས་འཇིག་དཀའི་ཚོགས་ཀྱང་འཇིག་འགྱུར་ན། །ལུས་རྫ་མའི་སྣོད་དང་འདྲ་བ་འདི།།དུས་ད་ལྟ་མི་འཇིག་ངེས་པ་ཅི། །དེང་ལུས་ལ་ནད་མེད་བདེར་གནས་ཀྱང༌། །དགྲ་འཆི་བདག་ནམ་མཁའི་སྤྲིན་བཞིན་དུ། །སེམས་སྣང་མེད་གཅིག་ལ་འོང་འགྱུར་ཕྱིར། །ད་ཡིད་བདེར་གནས་པའི་སྐབས་དང་བྲལ། །སང་སྐྱ་རེངས་ཤར་བའི་དུས་སྐབས་དང༌།།  ཚེ་ཕྱི་མའི་བར་དོའི་ཡིད་གཟུགས་གཉིས།།གང་སྔོན་ལ་འོང་བའི་ཆ་མེད་ན། །ད་དམ་ཆོས་ལ་འུར་མི་བྱ་རི།།   
  འཆི་བའི་ཚེ་ཆོས་མ་གཏོགས་གཞན་གང་གིས་ཀྱང་མི་ཕན་པ་བསམ་ཚུལ་ནི།  དགྲ་འཆི་བདག་དེ་ཡིས་ཟིན་གྱུར་ན། །གནས་ཁམས་གསུམ་སེམས་ཅན་མ་ལུས་པ། །གཉེན་མཛའ་བཤེས་སུ་གྱུར་མཐའ་བསྐོར་ཡང༌། །གྲངས་གཅིག་ཙམ་འཁྲིད་པའི་རང་དབང་མེད། །ཞིང་སྟོང་གསུམ་རིན་ཆེན་སྣ་བདུན་གྱིས། །ཡོངས་བྱུར་བུར་གང་ལ་དབང་ན་ཡང༌། །ནོར་དེ་ལས་ཏིལ་གྱི་འབྲུ་ཙམ་ཞིག །ཚེ་ཕྱི་མར་འཁྱེར་བའི་ཐབས་དང་བྲལ། །དུས་ལྷན་ཅིག་སྐྱེས་པའི་ལུས་འདི་ཡང༌། །གདན་མལ་ཆའི་སྟེང་དུ་ཅམ་བཞག་སྟེ། །སེམས་དགེ་སྡིག་ལས་ཀྱི་རླུང་ཤུགས་ཀྱིས། །གནས་རིགས་དྲུག་ཆ་མེད་ཡུལ་དུ་འཁྱེར། །དོན་དེ་སླད་འཆི་བའི་དུས་ཀྱི་ཚེ། །ལུས་ལོངས་སྤྱོད་གཉེན་གྱིས་གཏན་མི་ཕན། །དུས་དེ་ཚེ་ཕན་པའི་དོན་པོ་ནི། །སྐྱབས་བསླུ་མེད་དམ་ཆོས་ཉིད་ཡིན་པས། །ད་ཚེ་འདིའི་བྱ་བྱེད་དོན་མེད་པར། །རྨི་ལམ་དང་འདྲ་འདིར་རྒྱབ་ཕྱོགས་ནས། །ཆོས་སྙིང་པོ་བྱང་ཆུབ་ལམ་རིམ་གྱིས། །དཔལ་བྱང་ཆུབ་གོ་འཕང་བསྒྲུབ་པར་བྱ། །དོན་དེ་ལྟར་ནུས་པ་བྱིན་གྱིས་རློབས།།
 ༼འཕྲོ་མུ་མཐུད་འགོད་རྒྱུ།
·རྩོམ་ཡིག་གོང་མ:༢༠༡༢/༡༢/༡༢
·རྩོམ་ཡིག་འོག་མ:གྲགས་ཅན་གསུང་ཚིག༣༥
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·ལམ་རིམ་བདུད་རྩི་སྙིངཔོ།༡༥ 2013/5/14 20:43:48
·ལམ་རིམ་བདུད་རྩི་སྙིངཔོ།༡༤ 2013/5/11 17:53:59
·ལམ་རིམ་བདུད་རྩི་སྙིངཔོ།༡༣ 2013/5/5 20:27:58
·ལམ་རིམ་བདུད་རྩི་སྙིངཔོ།༡༣ 2013/4/2 16:19:02
·ལམ་རིམ་བདུད་རྩིའི་སྙིང་པོ་ལས་༡༢ 2013/3/1 19:34:55
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:vworqyid
zdQ0kY  <a href="http://ogtrnwcwnmcf.com/">ogtrnwcwnmcf</a>, [url=http://pvsuqdzhzlmy.com/]pvsuqdzhzlmy[/url], [link=http://xdeijoxttiwx.com/]xdeijoxttiwx[/link], http://qxetwxpsncwu.com/
发表时间:2017/2/21 9:51:13 [来自: 5.188.211.14]

 评论者:mflejmjzt
zzLCpn  <a href="http://wjzcvibzpczp.com/">wjzcvibzpczp</a>, [url=http://bszavgtcggff.com/]bszavgtcggff[/url], [link=http://dmpdmmgshsvk.com/]dmpdmmgshsvk[/link], http://avvaigrdjiuw.com/
发表时间:2017/2/21 9:46:45 [来自: 5.188.211.11]

 评论者:wxihzoq
KHTD3k  <a href="http://pgkaikuowzpf.com/">pgkaikuowzpf</a>, [url=http://oitlttllkrwf.com/]oitlttllkrwf[/url], [link=http://vbfjjyqnqbgo.com/]vbfjjyqnqbgo[/link], http://azvxxkqyzrvb.com/
发表时间:2017/2/21 9:42:10 [来自: 5.188.211.13]

འབྲེལ་ཡོད་དཔྱད་བརྗོད 42 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།23.44MS