ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ཚངས་དབྱངས་གླུ་ཁང >> ཚངས་མགུར།
 རྩོམ་ཡིག་ཀློག་པ།

སྲིད་པའི་གྲོང་ཁྱེར་ནས་རྙེད་པའི་གཞས་ཆུང་སྒྱུ་མའི་གླིང་བུ།

  རྩོམ་པ་པོ:རྨེ་སྤྲུལ་བསྟན་འཛིན་རྒྱ་མཚོ།ཡོང་ཁུངས:ངེད་དྲ་བ།གཟིགས་གྲངས:1712ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2010/4/7 9:03:42ཚོགས་ཡར་སྤྲོད:admin

                       ༠༠.png

            སྲིད་པའི་གྲོང་ཁྱེར་ནས་རྙེད་པའི་གཞས་ཆུང་སྒྱུ་མའི་གླིང་བུ།


                              རྨེ་སྤྲུལ་བསྟན་འཛིན་རྒྱ་མཚོ།

       ༡
སྤྲིན་པ་ལོང་ལོང་གསེབ་ནས། །
མོག་མོག་ཟླ་བ་མཐོང་ཚེ། །
ཡིད་མཁའི་ངོས་སུ་བསྒོམ་པའི། །
བླ་མའི་ཞལ་རས་དྲན་བྱུང༌། །

      ༢
མཛེས་སྡུག་ཧ་ལོའི་མེ་ཏོག །
དབྱར་ཁའི་སྤང་ནས་མ་བཞད། །
མི་སེམས་ལྡུམ་རའི་ནང་ནས། །
སྐྱོ་འཛུམ་འདབ་བརྒྱ་གྲོལ་སོང༌། །

      ༣
ལས་དབང་སྐྱི་སེར་རླུང་བུ། །
གར་གཡུགས་ས་ཡི་ཕྱོགས་ལ། །
སྐྱིད་སྡུག་ལ་ཁའི་དར་ལྕོག །
དབང་མེད་ལྷབ་ལྷུབ་བསྐྱོད་འགྲོ། །

     ༤
གཏད་སོ་མེད་པའི་མི་ཚེ། །
བར་སྣང་བྱ་སྤུ་རླུང་ཁྱེར། །
རླུང་ལ་སེམས་པ་ཡོད་ན། །
ཕར་བསྐྱོད་ཚུར་བསྐྱོད་མ་གནང༌། །

     ༥
ཨག་སྐད་ཙིར་ཙིར་འབྱིན་བཞིན། །
མི་ཡུལ་འདི་རུ་འོངས་ཤིང༌། །
དབུགས་རྒོད་བརྩེགས་མ་འཕེན་བཞིན། །
འདི་ནས་གཞན་དུ་ཆས་འགྲོ། །

     ༦
མི་ཚེའི་ལམ་བུའི་ནང་ནས། །
རྙེད་པ་འཇའ་ཡི་རྐང་རྗེས། །
བཟུང་བས་ཟིན་པ་མེད་འདིས། །
འཁོར་བའི་ཆོས་ཉིད་རྟོགས་བྱུང༌། །

     ༧
ལྗང་སྔོན་ཤིང་ལོའི་རྩེ་ཡི། །
ཡིད་འོང་སྤུ་སྡུག་འཇོལ་མོ། །
གཅིག་པུར་ལུས་པའི་བྱེའུ་ཆུང༌། །
ང་ལ་སྐྱོ་རོགས་གནོངས་དང༌། །

     ༨
གྲང་རླུང་ཤུར་ཤུར་ལྡང་བའི། །
སྐྱོ་མོའི་འཇིག་རྟེན་འདི་ནས། །
སྙན་ངག་ཚིག་གསུམ་གྱེར་ཡང༌། །
སྐྱི་སེར་རླུང་སྒྲས་ཁྱེར་སོང༌། །

    ༩
བསིལ་ཟེར་ཟླ་འོད་འོག་གི །
ལྷུང་ལྷུང་ཆུ་ཕྲན་འགྲམ་ནས། །
འདས་སོང་ལོ་ཟླའི་སྣང་བརྙན། །
སེམས་ལ་ཝ་ལེར་འཁོར་བྱུང༌། །

    ༡༠
ལབ་ཙེ་ཞིག་རོའི་རྩེ་ལ། །
རླུང་རྟའི་དར་ཞིག་བཙུགས་ཡོད། །
དར་སྣེ་རླུང་པོས་བསྐྱོད་སྐབས། །
ཉམ་ཆུང་ལས་དབང་དྲན་སོང༌། །

     ༡༡
ཁུ་བྱུག་ལྷོ་ནས་སླེབས་བྱུང༌། །
ཁྲུང་ཁྲུང་བྱང་ནས་ལོག་བྱུང༌། །
གཤིན་ཡུལ་འགྲིམས་པའི་མ་མ། །
གཏན་དུ་ཕེབས་རྒྱུ་མ་བྱུང༌། །

     ༡༢
དྲན་པའི་སེམས་ཀྱི་ཆུ་ཕྲན། །
ཡིད་ཀྱི་གཏིང་དུ་སྦས་ཀྱང༌། །
མ་བཅོས་སེམས་ཀྱི་ཟུར་ནས། །
ད་ལོ་སླར་ཡང་རྡོལ་བྱུང༌། །

     ༡༣
སྤྲིན་པ་ཡར་འགྲོ་ཞིག་ལ། །
བུ་ཡིས་འཕྲིན་ཞིག་བསྐུར་ཡོད། །
དྲན་པའི་ཆར་དང་འགྲོགས་ནས། །
ཕྱོགས་དེར་བབས་པ་ཨེ་བྱུང༌། །

    ༡༤
སེམས་པ་མི་སྐྱོ་དགུ་སྐྱོ། །
གློག་བརྙན་ནང་ནས་སྐྱོ་སོང༌། །
ཤི་གསོན་བར་གྱི་སྐད་ཆས། །
ཨ་ཇོའི་སེམས་པ་སྐྱོ་སོང༌། །

     ༡༥
ལས་འཕྲོའི་སེམས་ཀྱི་མདུད་པ། །
གཤིན་རྗེའི་ཕྱག་ཏུ་གཏད་ཡོད། །
ཚེ་རྟིང་མཉམ་འཛོམས་ཆོག་པའི། །
བཀའ་ཁྲོལ་གནང་མིན་སུས་ཤེས། །

     ༡༦
སྐྲ་ལོ་རླུང་གིས་ཁུར་སོང༌། །
རུས་པ་ས་ལ་ཐིམས་སོང༌། །
རྣམ་ཤེས་སྦྲང་བུ་འཁྱམས་པོ། །
གར་སོང་མི་ཤེས་སྐྱོ་བ། །

     ༡༧
ཤི་བྲལ་བྱུང་བའི་གྲོགས་དེ། །
དགུང་གི་ཉི་མ་ཡིན་ན། །
དེ་རིང་ནུབ་ལ་གཟིམས་ཀྱང༌། །
སང་ཉིན་ཤར་ནས་ཤར་འོང༌། །

     ༡༨
སེམས་པ་གསོ་བའི་གླུ་ཆུང༌། །
རི་བོའི་འགྲམ་ནས་བཏང་བས། །
རྫ་རིའི་འོག་གི་ཆུ་མོས། །
སྐྱོ་བའི་སྨྲེ་སྔགས་བཏོན་བྱུང༌། །

     ༡༩
ན་གཞོན་ལང་ཚོའི་ལྗོན་པ། །
ཆུ་བོའི་ཕར་ཁར་སྐྱེས་ཀྱང༌། །
དུང་སེམས་ཤིང་རྩེའི་བྱེའུ་ཆུང༌། །
གཙང་པོའི་ཚུར་ཁར་འཕུར་འོང༌། །

     ༢༠
ལྷོ་བྱང་རི་རྩེའི་སྐར་ཆུང༌། །
གནམ་གྱི་ཕ་མཐའ་ཚུར་མཐའ། །
དགུ་ཚིགས་སྐྱ་མོའི་ཞགས་པས། །
མཐོངས་སྔོན་དབྱིངས་ནས་སྦྲེལ་བྱུང༌། །

     ༢༡
ནམ་མཁའི་རྒྱུ་སྐར་ཁྲ་མོ། །
མི་བརྟན་སང་འགྱུར་གནང་འགྱུར། །
ང་ཡི་སྐར་མ་དཔའ་བརྟན། །
ཅི་འདྲའི་བརྟན་ཚུགས་ཆེ་བ། །

     ༢༢
ཁ་བ་མར་མར་བབས་བྱུང༌། །
འདབ་ལོ་གཅིག་འཐོར་གཉིས་འཐོར། །
སེམས་ཀྱི་གངས་ལྷ་མེ་ཏོག །
གཏན་དུ་ཡལ་རྒྱུ་མ་བྱུང༌། །

     ༢༣
སྤྲིན་པ་ནུབ་ལ་བསྐྱོད་སོང༌། །
ཆུ་བོ་ཤར་ལ་བཞུར་སོང༌། །
ང་དང་གངས་དཀར་རི་བོ། །
མ་འགྱུར་རང་སར་གནས་ཡོད། །

     ༢༤
སེམས་པའི་ལམ་ཕྲན་སྟེང་གི །
མགྲོན་པོ་རྒྱང་དུ་བཞུད་སོང༌། །
ཡིད་སྐྱོའི་སྨུག་ལོང་ཁྲོད་ནས། །
ང་ཡིས་སྐྱེལ་མ་ཞུས་ཡོད། །

     ༢༥
ནུབ་རིའི་ལ་ཁའི་རྩེ་ནས། །
ཟླ་བས་ཕྱི་མིག་བལྟས་བྱུང༌། །
ཐོ་རེངས་ཤར་གྱི་སྐར་ཆེན། །
སྐྱུར་འདོད་མེད་པ་ལོས་ཡིན། །

     ༢༦
གཉིད་ཀྱི་ཞིང་དུ་སྐྱེས་པའི། །
མེ་ཏོག་བཏུ་བར་ཆས་སྐབས། །
གྲང་རླུང་སེར་བུ་སྐྱ་མོས། །
ང་ཡི་རྨི་ལམ་དཀྲོགས་སོང༌། །

     ༢༧
དྲན་པའི་མེ་ལོང་ངོས་སུ། །
འགྲོ་ཁའི་མིག་ཆུ་ཤར་དུས། །
འདུ་འབྲལ་འཁོར་བའི་ཆོས་ཉིད། །
ཡང་ཡང་ཡིད་ལ་འཁོར་སོང༌། །

     ༢༨
སེམས་པ་ཤོར་བའི་རྗེས་སུ། །
དྲན་ཤེས་ར་མདར་སྦྲན་པས། །
འཁོར་འདས་གཉིས་ཀྱི་མཚམས་ནས། །
རང་སེམས་ནོམ་ལ་ལོན་བྱུང༌། །

     ༢༩
རྫ་རི་མཐོན་པོ་འདི་ནས། །
སྙན་མོའི་གཞས་ཤིག་གོ་བྱུང༌། །
ང་རང་ཁ་རོག་བསྡད་པས། །
བྲག་ཆས་ཨ་ལན་སྤྲད་སོང༌། །

     ༣༠
སེམས་པ་མི་ལ་མ་བྱིན། །
ནམ་མཁའི་ལྷ་ལ་བྱིན་ཡོད། །
ཨ་ཅེ་མེ་ཏོག་མཚོ་མོ། །
ང་ལ་བཀའ་བཀྱོན་མ་གནང༌། །

     ༣༡
ང་ནི་གསེར་ལོ་མེ་ཏོག །
ཁྱོད་ནི་གཡུ་ལོ་ལྗོན་པ། །
ལྡུམ་ར་གཅིག་ཏུ་འཛོམས་ཀྱང༌། །
འགྲོགས་པའི་དུས་ཚོད་མི་འོང༌། །

     ༣༢
འབྲལ་ཁའི་སེམས་ཀྱི་སྤྲིང་ཡིག །
ཆུ་བོའི་གཞུང་ལ་བསྐུར་ཡོད། །
གཙང་པོར་རྣམ་ཤེས་ལྡན་ན། །
མཐའ་མེད་རྒྱ་མཚོར་སྐྱེལ་རོགས། །

     ༣༣
སེམས་པ་ཕར་བརྩེ་ཚུར་དུང༌། །
གསོན་བྲལ་བྱེད་འདོད་མེད་ཀྱང༌། །
འཆི་བདག་བདུད་པོ་སླེབས་དུས། །
མི་འབྲལ་རང་དབང་ཡོད་དམ། །

     ༣༤
བརྩེ་བའི་སེམས་ཀྱི་ཡིག་ཆུང༌། །
རྨི་ལམ་ནང་ནས་འབྱོར་བྱུང༌། །
འདུ་འབྲལ་སྒྱུ་མའི་འཕྲིན་ལན། །
ནམ་མཁའི་ལྷ་མོར་བསྐུར་ཡོད། །

     ༣༥
ཁྱོད་ལ་རྒས་རྒྱུ་མེད་ཅིང༌། །
ང་ལ་འཆི་རྒྱུ་མེད་ན། །
སེམས་པ་རྒྱང་དུ་འཕུར་ནས། །
ཐར་ལམ་འཚོལ་དོན་མི་འདུག །

     ༣༦
མ་ཤི་དམྱལ་བའི་སྡུག་བསྔལ། །
མྱོང་འདོད་ཁྱོད་ལ་མེད་ན། །
འདྲིས་དང་མ་འདྲིས་མཚམས་ནས། །
བརྩེ་བའི་འབྲེལ་ཐག་གཅོད་དགོས། །

     ༣༧
དུང་སེམས་དར་གྱི་མདུད་པ། །
ཞེ་མཐུན་སོར་རྩེས་མ་བརྒྱུ། །
ལས་འཕྲོའི་མདུད་པ་ཐེབས་ན། །
འབྲལ་བའི་སྡུག་བསྔལ་ཆེ་འོང༌། །

     ༣༨
འཕྲད་པའི་སྙིང་གི་བདེ་བ། །
མཁའ་ལ་རྒྱུགས་པའི་སྐར་མདའ། །
འབྲལ་བའི་སེམས་ཀྱི་སྡུག་བསྔལ། །
ནམ་ཟླ་སྟོན་མཚན་རིང་མོ། །

     ༣༩
དུང་སེམས་ཕབ་ཀྱིས་བསྙལ་བའི། །
འཛུམ་དཀར་རྒུན་ཆང་མངར་མོ། །
ཞིམ་ཡང་བཟི་ཁ་བཙན་པས། །
ཨ་ཇོས་ཆུན་ས་མ་རེད། །

     ༤༠
ན་ཆུང་ཐུགས་ལ་མཛའ་བའི། །
རྗེས་ཆགས་སེམས་ཀྱི་མེ་ཏོག །
རྨི་ལམ་ནང་ནས་ལུས་སོང༌། །
བུ་མོ་དགོངས་པ་མ་ཚོམས། །

     ༤༡
མེ་ཏོག་འདབ་མ་རྒྱས་དུས། །
གསེར་སྦྲང་ལང་ཚོ་མ་སྨིན། །
གསེར་སྦྲང་ལང་ཚོ་སྨིན་དུས། །
མེ་ཏོག་ལྷ་ལ་ཕུལ་ཟིན། །

     ༤༢
སྟོད་ཀྱི་ཤྭ་བ་ཕོ་ཆེན། །
སྨད་ཀྱི་ཡུ་མོ་སྨུག་ཆུང༌། །
གཙང་པོ་གཅིག་ལ་འཐུང་ཡང༌། །
ལྷན་འཛོམས་ལས་ཀྱིས་མ་བསྐོས། །

     ༤༣
སེམས་པའི་དུང་ཤོག་ངོས་སུ། །
བརྩེ་བའི་ཡིག་ཆུང་བྲིས་ཡོད། །
ཇོ་ཇོ་རབ་ཏུ་བྱུང་ཉིན། །
ཡིག་འབྲུ་བསུབ་རྒྱུ་མ་བརྗེད། །

     ༤༤
རྒྱ་ཕིབས་སེར་པོའི་འོག་གི །
ཐུན་གསུམ་རྨི་ལམ་དམར་པོ། །
ཐོ་རེངས་སྐྱ་མདའི་ངོགས་ནས། །
མི་མངོན་དབྱིངས་སུ་དྲངས་སོང༌། །

     ༤༥
མ་ཀིའི་རྒྱ་གྲོང་ནང་ན། །
ལྟད་མོ་མི་མཐོང་དགུ་མཐོང༌། །
ལྟད་མོ་སེམས་ལ་ལྟ་ན། །
ཡ་ཀིའི་རི་ཁྲོད་འགྲིམ་དགོས། །

     ༤༦
འགྲོ་རོགས་གྲིབ་མ་ནག་རིལ། །
ཁྱོད་ལ་ཐུགས་འདོད་ཡོད་ན། །
མི་མེད་དབེན་པའི་རི་ལ། །
འུ་གཉིས་མཉམ་དུ་ཆས་ཆོག །

     ༤༧
དབུ་སྐྱེས་ལྕང་ལོ་སིལ་མ། །
ཐུགས་ལ་ཕངས་པ་མེད་ན། །
སོར་གསུམ་གཙུག་སྐྲའི་ཟར་བུ། །
མཁན་སློབ་ཕྱག་ཏུ་ཕུལ་ཐོང༌། །

     ༤༨
ང་ལ་ཐུགས་ཁྲལ་མི་དགོས། །
ཁྱེད་རང་ཆོས་ལ་ཕེབས་དང༌། །
འབྲལ་དཀའི་གདུང་བའི་མིག་ཆུ། །
མི་བཞུར་ཁོང་དུ་མིད་ཆོག །

     ༤༩
སྐྲ་དཀར་གཉེར་མའི་འོག་ནས། །
ཕ་མ་དགོངས་པ་མ་ཚོམས། །
བུ་ངས་ས་མཐའ་འདི་ནས། །
ཚེ་མཇུག་ཆོས་ལ་སྐྱེལ་གཏོང༌། །

     ༥༠
ང་དང་ནམ་མཁའི་ཟླ་བ། །
གནམ་ས་གཉིས་ཀྱི་གཞུང་ན། །
གྲོགས་མེད་གཅིག་པུར་རྒྱུ་ཡང༌། །
སེམས་ཁྲལ་མེད་པས་སྐྱིད་སོང༌། །

     ༥༡
སྐྱེ་དུས་གཅིག་པུར་སྐྱེས་ཤིང༌། །
འཆི་དུས་གཅིག་པུར་འཆི་བས། །
ཁེར་རྐྱང་རྣམ་ཤེས་འཁྱམས་པོར། །
མཛའ་བའི་གྲོགས་ཀྱིས་ཅི་བྱ། །

     ༥༢
མཐོང་ཡང་ཟིན་རྒྱུ་མེད་པ། །
བྱེ་མའི་ཐང་གི་སྨིག་རྒྱུ། །
མྱོང་ཡང་སྙིང་པོ་མེད་པ། །
འཇིག་རྟེན་འཁོར་བའི་བརྩེ་དུང༌། །

     ༥༣
སད་དཀར་མདའ་ཡིས་ཐེབས་པའི། །
སྟོན་མཇུག་ལོ་མ་སེར་པོ། །
ལྕང་མའི་རྩེ་ནས་འཕུར་ཏེ། །
གཞོན་པའི་སེམས་ལ་ལྷུང་སོང༌། །

     ༥༤
ལོ་ཆུང་སེམས་པའི་འགྱུར་ལྡོག །
ནམ་ཟླ་དཔྱིད་ཁའི་གནམ་ངོ༌། །
ཚིག་གསུམ་དམ་བཅའི་རི་མོ། །
གོམ་གསུམ་བར་ནས་ཡལ་འགྲོ། །

     ༥༥
བརྩེ་དུང་སེར་བའི་རིལ་བུ། །
རྟག་འཛིན་འཆིང་བར་བཅངས་ཀྱང༌། །
ཕྱི་ཐག་དྲོད་ཀྱིས་རེག་ཚེ། །
ཅང་མེད་ཆུ་རུ་འགྱུར་འགྲོ། །

     ༥༦
འཇའ་ཚོན་སྤང་ལ་མ་ཤར། །
བུ་མོའི་ཁ་ལ་ཤར་སོང༌། །
འཇའ་མདངས་ཁ་དོག་ལེགས་པས། །
ལོ་ཆུང་སེམས་པ་བསླུ་འོང༌། །

     ༥༧
ལམ་དེ་ཕར་འཁྱོག་ཚུར་འཁྱོགས། །
འཚོ་བའི་བགྲོད་ལམ་འདྲ་བ། །
ཆུ་དེ་ཕར་གུག་ཚུར་གུག །
འཁྱོག་པོའི་མི་སེམས་འདྲ་བ། །

     ༥༨
གཞོན་ཆུང་གསར་བུའི་བློ་སྣ། །
བུང་བས་སྦྲང་རྩི་འཚོལ་འདྲ། །
མེ་ཏོག་གཅིག་ལ་བརྩེ་ཞིང༌། །
སླར་ཡང་གཞན་ལ་འཕུར་འགྲོ། །

     ༥༩
མིག་ཆུ་ཙིར་ཙིར་གཏོང་ཡང༌། །
སྙིང་ནས་བཞུར་བ་མིན་ན། །
གསང་གཏམ་ཤུབ་ཤུབ་བཤད་ཀྱང༌། །
སེམས་ལས་རྡོལ་མིན་སུས་ཤེས། །

     ༦༠
ཡལ་རྒྱུ་མེད་པའི་འཛུམ་མདངས། །
གཏན་དུ་ཞེ་ལ་བཀོད་ཀྱང༌། །
ངམ་གནག་བཞིན་གྱི་ཁྲོ་གཉེར། །
ཟླ་གསུམ་གོང་ནས་མཐོང་འོང༌། །

     ༦༡
ན་ནིང་ལུས་སེམས་འདྲེས་ནས། །
ལྷ་སའི་ཕྱོགས་སུ་ཕྱིན་ཡང༌། །
ད་ལོ་ཆ་མིན་ཡ་མིན། །
ཟི་ལིང་བརྒྱུད་ནས་སླེབས་བྱུང༌། །

     ༦༢
ན་གཞོན་ལང་ཚོའི་མཛེས་སྡུག །
དབྱར་ཁའི་སྤང་གི་མེ་ཏོག །
ད་ལྟ་བཀྲག་དར་འཛོམས་ཀྱང༌། །
མི་རིང་དུས་ཀྱིས་རྙིང་འགྲོ། །

     ༦༣
སོ་དཀར་འཛུམ་པའི་མདངས་དང༌། །
ལྷན་ཅིག་དགོད་པའི་ཟུར་མིག །
མི་སྡུག་གཉེར་མའི་ཁྲོད་ནས། །
གར་སོང་ཆ་མེད་གྱུར་སོང༌། །

    ༦༤
ཁ་སང་ལྡེམ་ལྡེམ་རྒྱུ་བའི། །
ན་ཆུང་སྙིང་ལ་རྗེ་བོ། །
དེ་རིང་དུར་ཁྲོད་དབུས་ན། །
རྒོད་པོའི་གཟན་དུ་གྱུར་འདུག །

     ༦༥
འཁོར་བར་སྙིང་པོ་འཚོལ་བ། །
ནམ་མཁའི་འཇའ་ཚོན་དེད་འདྲ། །
ཅི་ཙམ་ཕར་ལ་བདས་པ། །
དེ་ཙམ་ཕྱིར་ལ་བཀྱེད་འགྲོ། །

     ༦༦
དྭངས་བསིལ་ཆུ་བོའི་ངོགས་ནས། །
མི་སྡོད་ལོ་ཟླས་རྙིང་བའི། །
རང་གི་བཞིན་རས་མཐོང་བས། །
ཕུགས་འདུན་ལྷ་ཆོས་དྲན་བྱུང༌། །

     ༦༧
དྲན་གདུང་ལྷོ་སྤྲིན་གསེབ་ནས། །
བརྩེ་དུང་ཁ་བའི་འདབ་མ། །
སྐྱོ་ཤས་མཚོ་ལ་བབས་ཏེ། །
ངེས་འབྱུང་ཆབ་ཏུ་འཁྱིལ་སོང༌། །

     ༦༨
སྐྱོ་ལ་དུངས་པའི་མི་ཡུལ། །
འཆི་ཁའི་མིག་ལ་སྣང་སྐབས། །
ཨ་ནུའི་སེམས་ཀྱི་སྐྱོ་གྲོགས། །
ལྷ་ཆོས་མིན་པ་མི་འདུག །

     ༦༩
སྙིང་པོ་དམ་པའི་ཆོས་ལ། །
སེམས་པའི་ཕྱེད་ཀ་འདྲེས་པས། །
རེ་བའི་འཛུམ་དཀར་ངོགས་ནས། །
ཐར་བའི་ལམ་སྣེ་མཐོང་སོང༌། །

     ༧༠
སེམས་དང་སེམས་པ་འདྲེས་ཀྱང༌། །
གཅིག་ཏུ་འགྱུར་ཐབས་མི་འདུག །
ཐུགས་དང་ཡིད་གཉིས་འདྲེས་ན། །
གཏན་དུ་འདུ་འབྲལ་མེད་དོ། །                  ཨེ་མ་ཧོས་མཁོ་འདོན་གནང་།


 

·རྩོམ་ཡིག་གོང་མ:སྒྱུར་རྩོམ། བགྲེས་སོང་གཤོག་པ་ཅན།
·རྩོམ་ཡིག་འོག་མ:ཞོགས་ལྗང་གིས་བྲིས་པའི་གླུ་ཚིག་གསར་པ།
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·སྣ་འཛོམས་དམངས་གཞས། 2015/4/18 11:12:04
·མིག་སྔའི་བོད་ཀྱི་གླུ་གཞས་སྒྱུ་རྩལ་གྱི་གནད་འགའ། ། 2014/11/23 9:44:18
·ལྷོ་ཁའི་དམངས་ཁྲོད་གླུ་གར་བྲོ་པ་གཞས་མའི་སྐོར་རགས་ཙམ་གླེང་བ། 2014/7/28 23:00:05
·གནམ་འོག་ཁྱིམ་ཚང་གཅིག་ཡིན། 2013/10/23 18:22:51
·གཡུ་འབྲུག་ཚན་སྡེབ་གླེང་བ། 2013/8/30 16:19:36
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/5 21:50:51 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/22 22:54:22 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/15 22:54:41 [来自: 112.5.248.229]

འབྲེལ་ཡོད་དཔྱད་བརྗོད 59 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།48.83MS