ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> མི་སྣ།
 རྩོམ་ཡིག་ཀློག་པ།

དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རགས་གཏེར་མཛོད།

  རྩོམ་པ་པོ:བཞག་པ་སྤྲུལ་སྐུཡོང་ཁུངས:ནང་རིགགཟིགས་གྲངས:5450ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2014/11/3 11:59:05ཚོགས་ཡར་སྤྲོད:admin
༄༅། །དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ཆེན་མོ་ལུང་རིགས་རྒྱ་མཚོའི་གཏེར་མཛོད་ཅེས་བྱ་བ་བཞུགས་སོ། །
 
ལི་ཐང་བཞག་པ་སྐྱེ་མིང་འཇམ་དབྱངས་མཁས་གྲུབ་ཀྱིས་བརྩམས།
 
ཨོཾ་བདེ་ལེགས་སུ་གྱུར་ཅིག།
མཚན་དཔེའི་གཟི་འབར་ཉི་གཞོན་ལྷུན་པོ་ཉིད། །
མཁྱེན་བརྩེའི་དཀྱིལ་འཁོར་ཆ་ཤས་རབ་རྫོགས་ཤིང༌། །
ལེགས་གསུང་དྲུག་ཅུའི་ཚ་ཟེར་འབུམ་སྤྲོ་བའི། །
སྟོན་པ་འཇིག་རྟེན་མིག་དེར་གུས་ཕྱག་འཚལ། །
ཆོས་རྣམས་གནས་ལུགས་ངོ་བོས་སྟོང་པ་ལ། །
ཐ་སྙད་རྟེན་འབྲེལ་འགལ་མེད་ལེགས་བསྟན་ནས། །
རྟག་ཆད་སྨག་རུམ་འཐུག་པོ་གཞོམ་མཛད་པའི། །
ཀླུ་སྒྲུབ་སྨྲ་བའི་འོད་དཀར་གཙུག་གི་རྒྱན། །
གང་དེའི་མདོ་སྔགས་ལམ་བཟང་འཛད་མེད་གཏེར། །
མ་ནོར་རྫོགས་པར་འབྱེད་པའི་འཕྲིན་ལས་ཆར། །
འཛམ་གླིང་མཐའ་དབུས་ཀུན་ཏུ་སྙིལ་བ་ཡི། །
གདེངས་ཅན་དབང་པོ་བློ་བཟང་གྲགས་པ་རྒྱལ། །
ཐེག་མཆོག་ཟབ་མོའི་ལམ་བཟང་འབྱེད་པ་ལ། །
བདེ་བར་གཤེགས་དེས་དངོས་སུ་ལུང་བསྟན་པའི། །
འཕགས་མཆོག་ཀླུ་ཡི་མཛད་བཟང་ཆ་ཤས་ཙམ། །
བསྒྱུར་ཅིང་བསྡུས་ཏེ་རྩོམ་པ་ཁུར་དུ་བླངས། །
གངས་ལྗོངས་མཁས་པའི་སྤྱན་སྔར་མ་སོན་པའི། །
ཆེས་སྔའི་ལོ་པཎ་ཞལ་གསུངས་ཁུངས་བཙན་དང༌། །
སོན་ཀྱང་ངལ་བ་མང་བསྟེན་གཞུང་རྣམས་ལས། །
བཏུས་ཏེ་མཁས་རྣམས་དགྱེས་པའི་མཆོད་སྤྲིན་བསྟར། །
འདོད་ཁྱེར་གཡམ་རྒྱུག་རྙོག་མས་མ་གོས་ཤིང༌། །
འཕྲི་བསྣན་བཅོས་ལྷད་རང་བཟོས་མ་བསྒྲིབ་ལ། །
བསྐྱར་ཟློས་ཚིག་གི་ངལ་བར་མ་འཛེམ་པར། །
མཁས་མང་ཞལ་ཆབ་དྲོན་མོ་འདི་ན་བསྐྱིལ། །
གང་དག་གཞུང་ལུགས་རྒྱ་མཚོར་མ་ཞུགས་ཤིང༌། །
ངལ་བརྒྱས་དཔེ་ཀློག་དར་ཆེན་མ་འཕྱར་བར། །
དམ་པའི་མཛད་རྣམ་ནོར་མཆོག་རྙེད་འདོད་ན། །
སྔོན་བྱོན་ལེགས་བཤད་བགོ་སྐལ་འདི་ལོངས་ཤིག །
དེ་ལ་འདིར་སློབ་དཔོན་བདག་ཉིད་ཆེན་པོ་མི་འཕྲོག་པའི་མཁྱེན་རབ་དང་ཐུགས་རྗེ་ལྡན་པ། དེ་བཞིན་གཤེགས་པའི་ཐེག་པ་བླ་ན་མེད་པའི་ཚུལ་རབ་ཏུ་འབྱེད་པ། རབ་ཏུ་དགའ་བའི་ས་བསྒྲུབས་ནས་བདེ་བ་ཅན་གྱི་ཞིང་དུ་གཤེགས་པ། འཇིག་རྟེན་གྱི་ཁམས་དང་བའི་འོད་ཅེས་བྱ་བར་དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བར་འགྱུར་བར་རྒྱལ་བས་མདོ་རྒྱུད་དུ་མ་ནས་དངོས་སུ་ལུང་བསྟན་པའི་ཟབ་མོ་དབུ་མའི་ཤིང་རྟ་ཆེན་པོ་དཔལ་མགོན་འཕགས་པ་ཀླུ་སྒྲུབ་ཅེས་བྱ་བ་འདི་ཉིད་ནི། ཇི་སྐད་དུ་ཆོས་ཀྱི་རྒྱལ་པོ་ཙོང་ཁ་ཆེན་པོས།
དུས་གསུམ་བདེ་བར་གཤེགས་པའི་ཐུགས་ཀྱི་བཅུད། །
མཐའ་བྲལ་དབུ་མ་རྟེན་ཅིངའབྲེལ་འབྱུང་ལམ། །
ཇི་བཞིན་འགྲེལ་པར་ལུང་བསྟན་ཀླུ་སྒྲུབ་ལ། །
སྙིང་ནས་འདུད་དོ་བརྩེ་བའི་ལྕགས་ཀྱུས་ཟུངས། །
ཞེས་གསུངས་པ་ལྟར། དུས་གསུམ་གྱི་བདེ་བར་གཤེགས་པ་ཐམས་ཅད་གང་ནས་གཤེགས་ཤིང་གཤེགས་བཞིན་པ་དང༌། གཤེགས་པར་འགྱུར་བའི་བགྲོད་པ་གཅིག་པའི་ལམ་གྱི་མན་ངག་ཡོངས་སུ་རྫོགས་པའི་བཅུད་ཕྱུང་བ། དབང་པོ་ཡང་རབ་ཀྱི་སྤྱོད་ཡུལ་ཁོ་ནར་གྱུར་པའི་རྒྱལ་བའི་ཡུམ་མཆོག་ཤེར་ཕྱིན་གྱིས་དངོས་སུ་བསྟན་པའི་ཟབ་དོན། ཆོས་ཐམས་ཅད་རང་བཞིན་གྱིས་ཡོད་པ་དང་མེད་པ་དང་གཉིས་ཀ་དང་གཉིས་མིན་གྱི་མཐའ་བཞི་དང་བྲལ་བའི་ཟབ་མོ་དབུ་མའི་ལམ་མཆོགཐ་སྙད་དུ་རྟེན་ཅིང་འབྲེལ་བར་འབྱུང་བ་དང་ངོ་བོའམ་རང་བཞིན་གྱིས་གདོད་ནས་སྟོང་པ་གཉིས་པོ་གཅིག་གྲོགས་གཅིག་ཏུ་འཆར་བའི་ཚུལ་ལུགས་ཟབ་མོ་འདི་བསྟན་པས། སྲིད་པའི་འབྲོག་དགོན་པར་དབང་མེད་དུ་འཁྱམས་ཀྱང༌། ལེགས་ཉེས་འབྱེད་པའི་བློ་གྲོས་ཀྱི་མིག་དང་ལྡན་ཞིང༌། སྔོན་བསགས་བསོད་ནམས་བཟང་པོའི་སྟོབས་ཀྱིས་ཕྱི་ནང་གི་འགལ་རྐྱེན་ནི་སྒོ་ཐམས་ཅད་ནས་བྲལ། མཐུན་རྐྱེན་ནི་སྒོ་ཐམས་ཅད་ནས་ཚང་བའི་གདུལ་བྱ་སྐལ་བ་དང་ལྡན་པ་རྣམས་ལ་ནི། མཐོ་ལ་བརླིང་བའི་འཇིག་ཚོགས་ལ་ལྟ་བའི་རི་བོ་ཉི་ཤུ་རྨང་ནས་གཞིག་ཅིང་།   མ་རིག་པའི་སྨག་རུམ་འཐུག་པོ་དེ་ཉིད་དྲུང་ནས་ཕྱུང་སྟེ། ལྟ་བ་ངན་པའི་འཁྲི་ཤིང་ཐམས་ཅད་མེ་ལྷའི་ཞལ་དུ་བཏབ་ནས། ཕྲ་རྒྱས་ཀྱི་དུག་གི་ལྗོན་ཤིང་ལྷག་མེད་དུ་བཅད་ནས། ཐར་པ་དང་ཐམས་ཅད་མཁྱེན་པའི་གྲོང་ཁྱེར་དུ་བདེ་བླག་ཏུ་བགྲོད་པར་བྱེད་པའི་ཤིང་རྟའི་ལམ་སྲོལ་སྔ་ན་མེད་པ་ཞིག་ཕྱེ་བར་མཛད་པ་ཡིན་སྟེ། དེ་ནི་ཀླུ་སྒྲུབ་ཀྱི་རྣམ་ཐར་གཞན་ལ་གཟིགས་མ་དགོས་པར། ཀླུ་སྒྲུབ་རང་ཉིད་ཀྱིས་མཛད་པའི་གཞུང་རྣམས་ལས་རྟོགས་པར་བྱ་བ་ཁོ་ན་ཡིན་པས། དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིགས་པའི་ཚོགས་ལ་སོགས་པ་དང༌། དེའི་འགྲེལ་བ་ལའང་སློབ་དཔོན་སངས་རྒྱས་བསྐྱངས་དང་དཔལ་ལྡན་ཟླ་བ། འཇམ་མགོན་བླ་མ་ཙོང་ཁ་པ་ཆེན་པོའི་ཊཱིཀྐ་རྣམས་ལ་གསན་བསམ་མཛད་པ་ནི་ཐར་འདོད་དཔའ་བོའི་སྙིང་གི་ནོར་བུ་ཁོ་ནའོ། ། ཁྱད་པར་དུ་སློབ་དཔོན་འདི་ཉིད་ཀྱིས་མཛད་པའི་ཡུམ་བར་མའི་འགྲེལ་བ་ཤིན་ཏུ་རྒྱས་པ། བམ་པོ་བརྒྱ་ཐམ་པ་ཡོད་པ། རྒྱ་གར་སྐད་དུ། མ་ཧཱ་པྲཛྙཱ་པཱ་ར་མི་ཏཱ་ཤཱསྟྲ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་ཆེན་མོའི་བསྟན་བཅོས་ཞེས་བྱ་བ། རྒྱ་ནག་སྐད་དུ། 《摩诃般若波罗蜜经释论》ཞེས་སམ་ཡང་ན་དེང་སང་ཡོངས་གྲགས་ལ་《大智度论》ཏཱ་ཏྲི་ཏུའུ་ལུན་ཏེ་ཤེར་ཕྱིན་མན་ངག་ཏུ་གྲགས་པ།སྤྱི་ལོ་༤༠༥ལ་རྒྱ་གར་གྱི་པཎྜི་ཏ་གཞོན་ནུ་སྲོག་གིས་རྒྱ་ཡིག་ཏུ་བསྒྱུར་བ། ཚིག་དོན་གཉིས་ཀ་ཤིན་ཏུ་གསལ་ཞིང་རྒྱས་པ་ཞིག་ཡོད་ཅིང་། གཞུང་ཆེན་དེ་ནི་དུས་རབས་བདུན་པའི་ནང་དུ་བྱོན་པའི་དཔལ་ལྡན་ཟླ་བའི་དུས་སུ་རྒྱ་གར་དུ་མ་བཞུགས་པར་མངོན་སྟེ། དཔལ་ལྡན་ཟླ་བས་ཚིག་གསལ་ལས། ཁོང་གིས་གཟིགས་པའི་ཀླུ་སྒྲུབ་ཀྱི་དབུ་མའི་གཞུང་བརྒྱད་ཀྱི་མཚན་རེ་རེ་ནས་བཀོད་དེ། དེའི་རྗེས་སུ། དེས་མཛད་པའི། །གཞུང་རྣམས་དང་ནི་དེ་ཡི་སློབ་མའི་ཚོགས་དེ་དག་ཀྱང་དུས་མང་ཞིག་ན་ཉམས་པར་གྱུར། །དེ་ཉིད་ཉི་མ་ནུབ་པས་དེང་སང་གཞུང་ལུགས་གསལ་པོ་དེ་ནི་གང་ནའང་མེད། །ཅེས་གསུངས་པས་སོ། ། འདིར་འཁོད་པའི་རྣམ་ཐར་ནི་གཙོ་བོར་རང་ཅག་ཐ་མལ་པའི་སྣང་ངོར་སྐུའི་མཛད་པ་ཇི་ལྟར་བསྟན་པ་རྣམས་རྒྱ་གར་ནག་བོད་གསུམ་གྱི་གཞུང་ཆེན་རྙིང་པ་རྣམས་ལས་རང་ཉིད་ཀྱིས་གང་ཞིག་ཐོས་ཤིང་མཐོང་བ་རྣམས། འདོད་ཁྱེར་དང་གཡམ་རྒྱུག་གི་དྲི་མས་མ་གོས་ཤིང༌། འཕྲི་བསྣན་དང་བཅོས་ལྷད་རང་བཟོའི་དབང་དུ་ཡང་མ་ཤོར་ལ། ལུང་ཁུངས་རྣམས་ཀྱི་ཚིག་དོན་བསྐྱར་ཟློས་སུ་གྱུར་པ་མང་དུ་ཡོད་ཀྱང་ཚིག་གི་ངལ་བ་ལ་མ་འཛེམ་པར་རང་སོར་བཞག་ནས་བསྒྱུར་ཅིང་བསྡུས་ཏེ་རྩོམ་པ་ཡིན་ལ། དེ་ཡང་བློ་ཁ་ཅུང་ཟད་མཐོ་བ་རྣམས་ལ་ཕན་པར་བསམས་ནས༌། ལུང་དེ་དག་གི་གསུང་བ་པོ་མཁས་པ་སོ་སོའི་ལོ་རབས་སྔ་ཕྱིའི་གོ་རིམ་ལྟར་དགག་སྒྲུབ་ཀྱི་རྣམ་བཞག་ཅུང་ཟད་དང་བཅས་ཏེ་བརྗོད་པར་བྱའོ། །
དེས་ན་འདི་ལ་བདུན༌། དང་པོ། འཕགས་མཆོག་ཀླུ་སྒྲུབ་འདས་ནས་ལོ་བརྒྱ་ཙམ་ལ་ཕེབས་པ་སྟེ་སྤྱི་ལོ་༣༤༤ནས་༤༡༣བར་དུ་ཕེབས་པའི་པཎྜི་ཏ་གཞོན་ནུ་སྲོག་གི་དུས་སུ་ཇི་ལྟར་གྲགས་པ་དང༌།
གཉིས་པ། འཕགས་མཆོག་ཀླུ་སྒྲུབ་འདས་ནས་ལོ་ཉིས་བརྒྱ་བཞི་བཅུ་ཙམ་ལ་ཕེབས་པ་སྟེ་སྤྱི་ལོ་༤༩༠ནས་༥༧༠བར་དུ་ཕེབས་པའི་སློབ་དཔོན་ལེགས་ལྡན་འབྱེད་ཀྱི་དུས་སུ་ཇི་ལྟར་གྲགས་པ་དང༌།
གསུམ་པ། འཕགས་མཆོག་ཀླུ་སྒྲུབ་འདས་ནས་ལོ་སུམ་བརྒྱ་ལྔ་བཅུ་ཙམ་ལ་ཕེབས་པ་སྟེ། སྤྱི་ལོ་༦༠༠ནས་༦༥༠བར་དུ་ཕེབས་པའི་དཔལ་ལྡན་ཟླ་བ་གྲགས་པ་དང༌། བཞི་པ། སྤྱི་ལོ་༦༠༢ནས་༦༦༤བར་དུ་ཕེབས་པའི་ལོ་ཆེན་ཞོན་ཙང་འཕགས་ཡུལ་དུ་ཕེབས་པའི་དུས་སུ་ཇི་ལྟར་གྲགས་པ། ལྔ་པ། དུས་རབས་བདུན་པ་སྤྱི་ལོ་༦༨༠ཡས་མས་ཙམ་ལ་ཕེབས་པའི་མདོ་སྡེ་སྤྱོད་པའི་དབུ་མ་རང་རྒྱུད་པའི་སློབ་དཔོན་སྤྱན་རས་གཟིགས་བརྟུལ་ཞུགས་ཀྱིས་ཇི་ལྟར་གསུངས་པ།   དྲུག་པ། དུས་ཕྱིས་སུ་རྒྱ་གར་དུ་གྲགས་པའི་འཕགས་པ་ཀླུ་སྒྲུབ་ཀྱི་རྣམ་ཐར་དང་གཏམ་རྒྱུད་སོགས་སྤྱི་ལོ་༡༢༩༠ནས་༡༣༦༤བར་དུ་ཕེབས་པའི་ལོ་ཙཱ་བ་བུ་སྟོན་ཐམས་ཅད་མཁྱེན་པས་ཇི་ལྟར་གསུངས་པ།བདུན་པ། སྤྱི་ལོ་༡༥༧༥ནས་༡༦༣༤བར་དུ་ཕེབས་པའི་ལོ་ཙཱ་བ་ཇོ་ནང་ཏཱ་ར་ནཱ་ཐས་བོད་ཡིག་ཏུ་བསྒྱུར་ནས་རང་ཉིད་ཀྱི་གཞུང་རྣམས་སུ་ཕྱོགས་གཅིག་ཏུ་བསྡུས་ཏེ་ཇི་ལྟར་བཀོད་པ་དང་བཅས་པའོ། །
དང་པོ་ནི།   འཕགས་མཆོག་ཀླུ་སྒྲུབ་འདས་ནས་ལོ་བརྒྱ་ཙམ་སྟེ། སྤྱི་ལོ་༣༤༤ནས༤༡༣བར་དུ་ཕེབས་པའི་པཎྜི་ཏ་གཞོན་ནུ་སྲོག་གི་དུས་སུ་ཇི་ལྟར་གྲགས་པ་ནི། དེ་ཡང་པཎྜི་ཏ་གཞོན་ནུ་སྲོག་ནི་སྤྱི་ལོ་༤༠༡ཙམ་ལ་རྒྱ་ནག་ཏུ་ཕེབས་ཏེ་རྒྱ་ཡིག་ཏུ་བསྒྱུར་བའི་བྱང་ཆུབ་སེམས་དཔའ་ཀླུ་སྒྲུབ་ཀྱི་རྣམ་ཐར་ཞེས་པ་འདི། ད་ལྟ་དངོས་སུ་མཇལ་དུ་ཡོད་པའི་དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་རྣམས་ཀྱི་ནང་ནས་ཆེས་སྔ་ཤོས་དང་ཁུངས་བཙན་ཤོས་ཤིག་ཡིན་ཡང༌། སྔར་བོད་ཡིག་ཏུ་མ་བསྒྱུར་བས་རང་རེ་བོད་ཀྱི་ཡུལ་དུ་མཇལ་བའི་སྐལ་བར་མ་གྱུར་ཅིང༌། ད་རེས་བདག་ལ་རྣམ་ཐར་འདི་བོད་ཡིག་ཏུ་བསྒྱུར་བའི་སྐལ་བཟང་ཐོབ་པས་དད་སྤྲོ་ལྷག་པར་འཕེལ་ཞིང༌། འདིར་གངས་ཅན་མཁས་དབང་དགྱེས་པའི་མཆོད་སྤྲིན་དུ་འབུལ་ན་འདི་ལྟར། བྱང་ཆུབ་སེམས་དཔའ་ཀླུ་སྒྲུབ་ནི། འཕགས་ཡུལ་ལྷོ་ཕྱོགས་ཀྱི་བྲམ་ཟེའི་རིགས་སུ་༼སྤྱི་ལོ་༡༥༠ནས་༢༥༠༽འཁྲུངས་ཤིང༌། མཐོང་ཚད་མི་བརྗེད་པར་འཛིན་པའི་སྐྱེས་སྟོབས་ཀྱི་ཤེས་རབ་ཤིན་ཏུ་གསལ་བ་ཞིག་སྟེ། མའི་ནུ་ཞོར་སྤྱོད་པའི་དུས་ནས་ཡི་གེ་སུམ་ཅུ་རྩ་གཉིས་རེར་ཤླཽཀ་རེ་བྱེད་པའི་རིག་བྱེད་གཞུང་ཤླཽཀ་བཞི་ཁྲི་ཙམ་ཐོས་ཤིང་དེ་དག་ཀྱང་ཚིག་དོན་གཉིས་ཀར་བྱང་ཆུབ་པར་གྱུར་ལ། །གཞོན་ནུའི་དུས་ནས་སྙན་པའི་གྲགས་པས་རྒྱལ་ཁམས་ཀུན་ཏུ་ཁྱབ་པར་གྱུར་ཅིང༌། གནམ་སའི་བརྟག་ཐབས་སྣ་ཚོགས་དང༌། དེ་བཞིན་རྩིས་དང་གསང་ཚིག་དང་རིག་སྔགས་སོགས་ལ་མངའ་བརྙེས་པར་གྱུར་ཏོ། ། ཁོང་ལ་གྲོགས་པོ་གསུམ་ཡོད་ཅིང་འདི་རྣམས་དུས་དེར་ཤེས་རབ་ཕུལ་དུ་བྱུང་བར་གྲགས་སོ། །དེ་ནས་དུས་རེ་ཞིག་གི་ཚེ་འདི་དག་ཕན་ཚུན་བགྲོས་ཏེ་སྨྲས་པ། འཇིག་རྟེན་འདིའི་རིག་པའི་གནས་ལ་བློ་གྲོས་རྒྱས་ཤིང༌། གང་ལའང་ལྐོག་ཏུ་མ་གྱུར་པར་རྟོགས་པ་ནི་རང་རེ་ཙམ་ལགས་ན། ཅི་ཞིག་ལ་རྩེད་ཅིང་རོལ་པར་འདོད་དམ་ཞེས་དྲིས་པར། ལན་སྨྲས་པ། འདོད་པའི་ཡུལ་ལ་ཅི་དགར་སྤྱོད་པ་ནི་ཚེ་འདིའི་བདེ་བའི་མཆོག་ཡིན་ནའང༌། བདག་ཅག་བྲམ་ཟེ་རྣམས་ཀྱིས་རྒྱལ་པོ་དང་འདྲ་བའི་འདོད་པའི་ལོངས་སྤྱོད་ནི་གང་ལས་ཀྱང་མི་རྙེད་པས། བདེ་བ་དེ་ནི་ལུས་མི་སྣང་བའི་རིག་སྔགས་ཁོ་ནས་བསྒྲུབ་ནུས་སོ་ཞེའོ། །དེ་ནས་མི་བཞི་པོ་རྣམས་ཕན་ཚུན་བལྟས་པས་ཚུལ་མིན་གྱི་བྱ་བ་དེར་ཡིད་མཐུན་པར་གྱུར་ནས་མཉམ་དུ་རིག་སྔགས་ཀྱི་སློབ་དཔོན་ཞིག་གི་དྲུང་དུ་སོང་ནས་ལུས་མི་སྣང་བའི་གདམས་པ་ཞུས་སོ། ། དེ་ལ་རིག་སྔགས་སློབ་དཔོན་གྱིས་བསམ་པ། བྲམ་ཟེ་བཞི་པོ་འདི་དག་ནི་སྐྱེ་རྒུའི་དབུས་ན་མཚན་སྙན་བླ་ན་འཕགས་ཤིང༌། ངེད་ཅག་རྣམས་ནི་རྩྭ་ལས་ལོད་པ་ཡིན་མོད། དེང་རིག་སྔགས་ཀྱི་ཆེད་དུ་ཁོ་བོའི་དྲུང་དུ་རེ་ཞིག་འདུད་ཀྱང༌། བྲམ་ཟེ་འདི་དག་ནི་འཇིག་རྟེན་གྱི་ཁམས་འདིར་ཤེས་རབ་ལ་འགྲན་ཟླ་མེད་པ་ཤ་སྟག་ཡིན་ཅིང༌། མི་ཤེས་པ་ནི་དམན་པའི་ཆོས་འདི་ཁོ་ན་ཙམ་དུ་ཟད་ན། གལ་ཏེ་བདག་གིས་གདམས་ངག་རྫོགས་པར་སྦྱིན་ན་ནི་ནམ་ཞིག་ལེགས་པར་བྱང་བ་ན་ཁོ་བོ་འདོར་ནས་འགྲོ་བར་གདོན་མི་ཟ་བས། དེས་ན་རྫས་ཀྱི་སྦྱོར་བ་ཙམ་སློབ་པར་བྱ་སྟེ། འདི་དག་གིས་རྫས་སྨན་སྦྱོར་མི་ཤེས་པས་ནམ་ཞིག་ཟད་པ་ན་སླར་འོང་བར་འགྱུར་བས་རྟག་ཏུ་ཁོ་བོར་འདུད་པར་འགྱུར་རོ་སྙམ་མོ། ། དེ་ནས་དེ་དག་ལ་སྨན་རྫས་རིལ་བུ་སྔོན་པོ་རེ་སྦྱིན་ནས་སྨྲས་པ། ཁྱེད་རྣམས་ཀྱིས་དབེན་པའི་གནས་སུ་རྫས་སྨན་འདི་ཆུའི་ནང་དུ་ཐོབས་ལ་ཆུ་དེས་གདོང་ལ་བྱུག་ན་གཟུགས་མི་སྣང་བར་འགྲུབ་ཏེ་གཞན་གྱིས་མཐོང་བར་མི་འགྱུར་རོ་ཞེའོ། ། ཀླུ་སྒྲུབ་ཀྱིས་རྫས་དེ་ལུས་ལ་བྱུག་པ་ན་དེའི་དྲིའི་ཁྱད་པར་ལས་སྨན་གྱི་དངོས་པོའི་ཆ་ཤས་རྣམས་ཞོ་སྲང་དང་བཅས་པ་མ་ནོར་བར་མཁྱེན་ནས་འདི་སྐད་ཅེས། ཁྱེད་ཀྱི་རྫས་འདི་ལ་སྨན་སྣ་བདུན་ཅུ་ཡོད་པ་འདི་དང་འདི་དག་གོ་ཞེས་མང་ཉུང་དང་བཅས་པ་མ་ནོར་བར་སྨྲས་པས། རིགས་སྔགས་སློབ་དཔོན་དེས་ཁྱེད་ཀྱིས་ཅི་ལས་རྟོགས་ཟེར་བར་ལན་སྨྲས་པ། སྨན་རྣམས་ནི་རང་རང་གི་དྲིའི་ཁྱད་པར་དང་བཅས་ན་ཅིའི་ཕྱིར་མི་རྟོགས་ཤེའོ། དེ་ནས་སློབ་དཔོན་དེ་ངོ་མཚར་ཞིང་དུད་པར་གྱུར་ཏེ་བསམ་པ། སྐྱེས་བུ་འདི་འདྲ་ཐོས་པའང་དཀའ་ན་དངོས་སུ་མཇལ་བ་ལྟ་ཅི་སྨྲོས། ཁོ་བོའི་རིག་སྔགས་དམན་པ་འདི་ལྟ་བུར་སེར་སྣ་བྱེད་པ་ནི་འོས་མ་ཡིན་ནོ་སྙམ་ནས་གདམས་ངག་རྫོགས་པར་སྦྱིན་ནོ། །དེ་ནས་བཞི་པོ་དེ་དག་རིག་སྔགས་ལ་དབང་ཐོབ་པར་གྱུར་ནས་རྟག་ཏུ་རྒྱལ་པོའི་ཕོ་བྲང་དུ་ཕྱིན་ཏེ་བཙུན་མོ་མཛེས་མ་རྣམས་ལ་དགའ་མགུར་སྤྱད་དེ། ཉིན་བརྒྱ་ཙམ་ལས་མ་ལོན་པར་ཕོ་བྲང་དུ་བཙུན་མོ་མངལ་ཆགས་པ་དག་བྱུང་སྟེ་ཉེས་པས་འཇིགས་ནས་རྒྱལ་པོར་གསོལ་ཏོ། །རྒྱལ་པོ་ཤིན་ཏུ་ཡིད་མི་དགའ་བར་གྱུར་ནས་བློན་པོ་ཤེས་རབ་ཅན་དག་བསྡུས་ཏེ་བཀྲ་མི་ཤིས་པ་འདི་ཅི་ཞིག་ཡིན་ནམ་ཞེས་དྲིས་པར། བློན་པོ་རྒན་པ་ཞིག་ན་རེ། འདི་ལ་རྒྱུ་གཉིས་ལས་མ་འདས་ཏེ་གདོན་གྱིས་བསླུས་པའམ་ཡང་ན་རིག་སྔགས་མཁན་གྱིས་བསླུས་པ་གང་རུང་ཞིག་གོ།དེ་ལ་ཐབས་ཡོད་དེ་ཕོ་བྲང་གི་སྒོ་རྣམས་སུ་ཐལ་རྡུལ་ཞིབ་མོ་ལེགས་པར་ཁྲོམས་ལ་དཔུང་གི་ཚོགས་ཀྱིས་དམ་པོར་སྲུང་དུ་ཆུག་ཅིག  གལ་ཏེ་རིག་སྔགས་མཁན་གྱིས་བསླུས་པ་ཡིན་ན་ནི་དེར་རྐང་པའི་རྗེས་མངོན་པར་འགྱུར་བས་དཔུང་ཚོགས་ཀྱིས་བཅོམ་པར་བྱ། གདོན་གྱིས་བསླུས་པ་ཡིན་ན་ནི་རྐང་པའི་རྗེས་མངོན་པར་མི་འགྱུར་བས་དེ་ལ་རིག་སྔགས་ཀྱིས་བཟློག་གོ་ཞེའོ། །
དེ་ནས་དེ་མ་ཐག་ཏུ་བཀའ་ཡིས་བསྐོས་པའི་སྒོ་བས་ཐབས་དེས་བརྩམས་པ་ན། མི་བཞིའི་རྐང་པའི་རྗེས་བྱུང་བ་རྒྱལ་པོར་ཞུས་སོ། །རྒྱལ་པོས་གྱད་མི་བརྒྱ་ཕྲག་མང་པོ་ཕོ་བྲང་དུ་བཀུག་ནས་སྒོ་རྣམས་བཙན་པོར་བསྡམས། གྱད་མིའི་དཔུང་གིས་རལ་གྲིས་བར་སྟོང་ཀུན་ཏུ་བཏབ་པས་མི་གཞན་གསུམ་པོ་དེ་ཉིད་དུ་བསད་དོ། །ཀླུ་སྒྲུབ་ཉིད་ལུས་ཀྱི་འགུལ་སྐྱོད་དང་དབུགས་འབྱིན་རྔུབ་ཙམ་ཡང་བྱེད་མ་ཕོད་པར་རྒྱལ་པོའི་དབུའི་ཐད་དུ་གབ་པས། རྒྱལ་པོའི་དབུའི་ཐད་ཀྱི་ཁྲུ་བདུན་ཙམ་གྱི་ས་ལ་རལ་གྲིས་མི་སླེབས་པས་སྲོག་ཉེན་ལས་ཐར་རོ། །དེའི་ཚེ་ཀླུ་སྒྲུབ་ཀྱི་ཐུགས་ལ་འདོད་པ་རྣམས་ནི་སྡུག་བསྔལ་ཀུན་གྱི་རྩ་བ་སྟེ། ཡོན་ཏན་ཉམས་ཤིང་ལུས་སྲོག་ལ་འཚེ་བའང་འདི་ལས་འབྱུང་ངོ་ཞེས་ཐོག་མར་གོ་ནས། གལ་ཏེ་བདག་སྲོག་ཉེན་འདི་ལས་ཐར་ན། དགེ་སྦྱོང་གི་ལམ་ལ་ཞུགས་ནས་རབ་ཏུ་བྱུང་བའི་སྡོམ་པ་བླང་བར་བྱའོ་ཞེས་རང་གིས་རང་ལ་དམ་བཅས་སོ། ། གནས་དེ་ལས་ཐོན་མ་ཐག་ཏུ་རི་ལ་སོང་ནས་སངས་རྒྱས་ཀྱི་མཆོད་རྟེན་ཞིག་གི་དྲུང་དུ་ཞུགས་ནས་རབ་ཏུ་བྱུང་སྟེ་སྡོམ་པ་ཡང་དག་པར་བླངས་སོ། །དེ་ནས་ཞག་དགུ་བཅུ་ཙམ་ལ་དེ་ན་བཞུགས་པའི་སྡེ་སྣོད་གསུམ་གྱི་གཞུང་རྫོགས་པར་བཀླགས་ཟིན་ཅིང༌། དེ་ལས་གཞན་པའི་མདོ་སྡེ་དག་དོན་དུ་གཉེར་ནས་ཇི་ལྟར་བཙལ་ཀྱང་གང་དུའང་མ་རྙེད་དེ། རིམ་གྱིས་ཁ་བ་ཅན་གྱི་རིར་ཕྱིན་ཏོ། །རི་དེར་མཆོད་རྟེན་ཞིག་གི་ནང་དུ་དགེ་སློང་རྒན་པོ་ཞིག་བཞུགས་པ་དེས་ཐེག་པ་ཆེན་པོའི་མདོ་སྡེ་དག་གནང་ངོ༌། །དེ་དག་འབད་དེ་ཉན་ཅིང་ཀློག་པས་དགའ་ཞིང་མགུ་ལ་དེའི་དོན་ཡང་རྟོགས་མོད་ཀྱང་ཡོངས་སུ་རྫོགས་པར་ནི་རྟོགས་པར་མ་གྱུར་ཏོ། ། དེ་ནས་རྒྱལ་ཁམས་ཀུན་ཏུ་ཉུལ་ནས་དེར་མ་ཚང་བ་རྣམས་བཙལ་བ་ལས་འཛམ་བུའི་གླིང་གི་ཡུལ་གང་དུའང་མ་རྙེད་ཅིང༌། དེ་དག་ཏུ་ཕྱི་རོལ་མུ་སྟེགས་ཀྱི་གྲུབ་མཐའ་སྨྲ་བ་དང་དེའི་ལུགས་འཛིན་གྱི་དགེ་སྦྱོང་རྣམས་རིགས་པས་ཚར་བཅད་པས། ཕྱི་རོལ་པའི་སློབ་མ་ཞིག་ན་རེ། སློབ་དཔོན་ཉིད་
ནི་ཐམས་ཅད་མཁྱེན་པ་ལགས་མོད། དེང་སངས་རྒྱས་ཀྱི་སློབ་མར་གྱུར་པས། སློབ་མའི་བྱ་བ་
ནི་གསུང་རབ་མ་ཚང་བ་རྣམས་འཚོལ་ཞིང་རྒྱུན་འཛིན་པ་ཉིད་ལགས་ན། གསུང་རབ་དེ་དག་ནི་
ཚང་བར་མ་རྙེད་དེ། གལ་ཏེ་དེ་ལས་དོན་གཅིག་མ་ཚང་ནའང་ཐམས་ཅད་མཁྱེན་པར་མི་འགྱུར་རོ་ཟེར་བར། སློབ་དཔོན་གྱིས་དེའི་ལན་མ་རྙེད་ཅིང་ཡི་མུག་སྟེ་དེ་ཉིད་དུ་ཕྱིན་ཅི་ལོག་པའི་མངོན་པའི་ང་རྒྱལ་དག་སྐྱེས་ཏེ་སྙམ་པ། འཇིག་རྟེན་གྱི་ཁམས་འདིའི་ཆོས་ལ་ཐབས་ལམ་ནི་ཤིན་ཏུ་མང་ཞིང༌། སངས་རྒྱས་ཀྱི་ཆོས་འདི་ཡང་ལེགས་པ་དང་ལྡན་པ་ཡིན་མོད་ཀྱང་རིགས་པས་དཔྱད་ན་ད་དུང་ཡོངས་སུ་མ་ཚང་བས། གང་དག་ཡོངས་སུ་མ་ཚང་བའི་དོན་རྣམས་ཁོ་བོས་རིགས་པས་གཏན་ལ་ཕབས་ནས། ཕྱིས་ཀྱི་དོན་གཉེར་ཅན་རྣམས་ལ་གོ་བར་བྱེད་པ་ནི་རིགས་པ་དང་ཡང་མི་འགལ་ཞིང་དོན་ལ་ནོར་བ་ཡང་མེད་པས་སྐྱོན་ཅི་ཞིག་ཡོད་སྙམ་མོ། །གང་ཞིག་བསམ་པའི་དོན་དེ་མྱུར་བར་བྱེད་པར་འདོད་ནས། སྟོན་པ་དང་བསྟན་པ་དང་སྡོམ་པ་དང་ཆས་གོས་སོགས་གསར་དུ་བཅོས་ཏེ། གཙོ་བོ་སངས་རྒྱས་ཀྱི་ཆོས་དང་མཐུན་པ་ལ་དེ་དང་ཅུང་ཟད་མི་འདྲ་བའི་ཁྱད་པར་དང་ལྡན་པར་བྱེད་ཅིང༌། གལ་ཏེ་སྐྱེ་བོའི་ཚོགས་ཀྱིས་གསོལ་བ་མ་བཏབས་ན་གདམས་པ་སྦྱིན་པར་མི་བྱ་ལ། ནམ་ཞིག་དུས་ལ་བབས་པ་ན་སློབ་མ་རྣམས་ལ་སྡོམ་པ་དང་ཆས་གོས་གསར་པ་དག་སྦྱིན་པར་བྱའོ་དགོངས་ནས་གཅིག་པུར་ཆུ་ཤེལ་གྱི་ཁང་པར་བཞུགས་སོ། ། དེ་ལྟར་གྱུར་པར་ཀླུ་ཆེན་བྱང་ཆུབ་སེམས་དཔས་གཟིགས་ཏེ་ཐུགས་བརྩེ་བ་ཆེན་པོས་དེ་ལས་སྐྱོབ་པའི་སླད་དུ་རྒྱ་མཚོར་གདན་དྲངས་ནས་ཕོ་བྲང་ནང་གི་རིན་པོ་ཆེ་སྣ་བདུན་ལས་གྲུབ་པའི་མཛོད་ཀྱི་སྒོ་ཕྱེ་ནས། རིན་པོ་ཆེ་སྣ་བདུན་ལས་གྲུབ་པའི་གསུང་རབ་གླེགས་བམ་དག་གཟིགས་སུ་ཕུལ་བས། ཟབ་ཅིང་རྒྱ་ཆེ་བའི་དམ་པའི་ཆོས་ཀྱི་གསུང་རབ་དཔག་ཏུ་མེད་པ་དག་མཇལ་ལོ། །དེ་ནས་ཀླུ་སྒྲུབ་ཀྱིས་དེར་ཉིན་ཞག་དགུ་བཅུ་ཐམ་པ་ཙམ་ལ་བཀླགས་པས་གོ་བ་ལྷག་པར་རྙེད་ཅིང༌། ཐུགས་དགོངས་ཟབ་མོའི་དོན་ལ་གཞོལ་བས་ཡིད་བཞིན་གྱི་ནོར་བུ་ལྟ་བུའི་དོན་རྙེད་པར་གྱུར་ཏོ། །དེ་ལ་ཀླུས་དེའི་སེམས་ཤེས་ནས་འདི་སྐད་ཅེས། མདོ་སྡེ་ཀུན་ལ་རྫོགས་པར་བལྟས་སམ་དྲིས་པས། ལན་དུ་སྨྲས་པ། ཁྱེད་ཀྱི་གླེགས་བམ་དག་ཏུ་གསུང་རབ་གྲངས་ལས་འདས་པ་མཆིས་ན་བདག་གིས་རྫོགས་པར་བལྟ་བ་ནི་མི་ནུས་མོད། །འོན་ཏེ་བདག་གིས་བལྟས་ཟིན་པ་ནི་འཛམ་བུ་གླིང་དུ་བཞུགས་པའི་གསུང་རབ་ཐམས་ཅད་བསྡོམས་པའི་ལྡབ་བཅུ་ཙམ་མོ། ། ཀླུས་སྨྲས་པ། བདག་གི་ཕོ་བྲང་དུ་གང་བཞུགས་པའི་གསུང་རབ་ཐམས་ཅད་སྡོམ་ན་ནི། མཛོད་འདིར་བཞུགས་པའི་གསུང་རབ་ལས་ཆེས་མང་བས་ཚད་དང་གྲངས་དང་དཔེར་འཇོག་ཏུ་མ་མཆིས་སོ་ཞེའོ། །དེ་ནས་ཀླུ་སྒྲུབ་ཀྱིས་གསུང་རབ་དེ་དག་རྙེད་ནས་ཟབ་མོའི་དོན་ལ་རྩེ་གཅིག་ཏུ་སྙོམས་པར་ཞུགས་པས་མི་སྐྱེ་བའི་ཆོས་ལ་བཟོད་པ་གཉིས་པ་དང་ལྡན་པར་གྱུར་ཏོ། ། དེའི་འོག་ཏུ་ཀླུས་སླར་ཡང་ཀླུ་སྒྲུབ་འཕགས་ཡུལ་གྱི་ལྷོ་ཕྱོགས་སུ་བསྐྱལ་ཏེ། སློབ་དཔོན་འདིས་མུ་སྟེགས་ཀྱི་རྒོལ་བ་ཐམས་ཅད་ཚར་བཅད་དེ་སངས་རྒྱས་ཀྱི་བསྟན་པ་ཆེས་ཆེར་དར་བར་བྱས་ཤིང༌། ཁྱད་པར་དུ་ཐེག་པ་ཆེན་པོའི་སྡེ་སྣོད་རྣམས་ལས་བརྩམས་པའི་གཏན་ལ་ཕབས་པ། འདི་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོའི་མན་ངག་ཅེས་པའམ་ཤེས་རབ་ཀྱི་ཕ་རོལ་ཏུ་ཕྱིན་མ་ཆེན་མོའི་བསྟན་བཅོས་ཞེས་པ། ད་ལྟ་རྒྱ་ཡིག་གཅིག་པུའི་ཐོག་ཏུ་བཞུགས་པ་པཎྜིཏ་གཞོན་ནུ་སྲོག་རང་གིས་སྤྱི་ལོ་༤༠༤མགོ་བརྩམས་ནས་ལོ་བདུན་དང་ཟླ་བ་བཅུ་གཅིག་ཞག་ཉི་ཤུ་རྩ་བདུན་ལ་རྫོགས་པར་བསྒྱུར་ནས་མཛད་བྱང་ལ་བྱང་ཆུབ་སེམས་དཔའ་ཀླུ་སྒྲུབ་བཀོད་ཡོད་པ་བམ་པོ་བརྒྱ་ཡོད་པ་དེ་ཡིན་ནམ་སྙམ་ཤླཽཀ་འབུམ་ཡོད་པ་དང༌། བསྟན་བཅོས་སངས་རྒྱས་ལམ་གྱི་རྒྱན། འདི་བྱང་ཆུབ་ཀྱི་རྒྱུ་ཚོགས་ཀྱི་བསྟན་བཅོས་ཞེས་པ་ད་ལྟར་རྒྱ་ཡིག་ཐོག་ཏུ་བཞུགས་པ་རྒྱ་གར་གྱི་པཎྜིཏ་དྷརྨ་གུཔྟ་འམ་ཆོས་སྦས་ཀྱིས་སྤྱི་ལོ་༥༩༠་ཡི་རྗེས་ཙམ་ལ་བསྒྱུར་བ་བམ་པོ་དྲུག་ཡོད་པ་ཀླུུ་སྒྲུབ་རང་ཉིད་ཀྱི་འགྲེལ་བ་དང་བཅས་པ་ཤླཽཀ་ལྔ་སྟོང་ཡིན་པར་བཤད་དེ། ད་ལྟ་རང་འགྲེལ་མི་བཞུགས་ཤིང༌། དགེ་སློང་དབང་ཕྱུག་གི་འགྲེལ་བ་ཉུང་ངུ་ཞིག་ནི་འདུག་གོ། ཤླཽཀ་ལྔ་སྟོང་ཅན་དང༌། སྙིང་རྗེ་ཆེན་པོའི་ཐབས་ཀྱི་བསྟན་བཅོས་ཤླཽཀ་ལྔ་སྟོང་ཅན་དང༌། དབུ་མ་རྩ་བ་ཤེས་རབ་ཤླཽཀ་ལྔ་བརྒྱ་ཅན་སོགས་རྒྱ་ཆེར་བརྩམས་ནས། འཕགས་པའི་ཡུལ་དུ་ཐེག་པ་ཆེན་པོའི་ཆོས་ཀྱི་སྤྱོད་པས་ཆེས་ཆེར་ཁྱབ་པར་བྱས་སོ། །ཡང་འཇིགས་པ་མེད་པའི་བསྟན་བཅོས་ཞེས་པ་ཤླཽཀ་འབུམ་ཡོད་པ་ཞིག་བརྩམས་ཏེ་དབུ་མ་རྩ་བའི་ཚིག་རྣམས་ཀྱང་དེའི་ནང་ནས་ཕྱུང་ངོ། ། དེའི་ཚེ་བྲམ་ཟེ་ཞིག་ཡོད་དེ། རིག་སྔགས་ལ་ཤིན་ཏུ་མཁས་པས་ནུས་པ་ཡོད་རྒུས་ཀླུ་སྒྲུབ་དང་རྩོད་པར་འདོད་ནས་འཕགས་ཡུལ་གྱི་རྒྱལ་པོར་གསོལ་བ། ཁོ་བོས་དགེ་སློང་དེ་ཕམ་པར་ནུས་ཀྱི་རྒྱལ་པོས་དཔང་པོ་མཛོད་ཅིག་ཅེའོ། །རྒྱལ་པོས་སྨྲས་པ། ཁྱོད་ནི་བླུན་རྨོངས་ཆེན་པོ་སྟེ། ཁོང་ནི་བྱང་ཆུབ་སེམས་དཔའ་ཉིད་ཡིན་པས། བློ་གྲོས་ཉི་ཟླའི་འོད་ལྟར་གསལ་ཞིང༌། མཁྱེན་རབ་འཕགས་པའི་དགོངས་པ་དང་མཉམ་པ་ཞིག་ན། ཅིའི་ཕྱིར་དད་ཅིང་གུས་པས་བཀུར་བར་མི་བྱེད་ཅེས་སྨྲས་པར། །བྲམ་ཟེས་གསོལ་བ། རྒྱལ་པོ་ཉིད་ཤེས་རབ་དང་ལྡན་པ་ཞིག་ན་ཅིའི་ཕྱིར་རིགས་པའི་ལམ་ནས་མ་བརྟག་པར་མཐོང་བ་ཙམ་ནས་བཙན་གནོན་གྱིས་གཞོམ་པར་བྱེད་ཅེའོ། ། དེ་ནས་རྒྱལ་པོས་ཚིག་དེ་ཐོས་ནས་ཀླུ་སྒྲུབ་གདན་དྲངས་ཏེ། སྔ་མོ་ནས་གཙུག་ལག་ཁང་དུ་རྩོད་པའི་དཔང་པོའི་སླད་དུ་སློབ་དཔོན་དང་མཉམ་དུ་གདན་བཤམས་པ་ལ་བཞུགས་སོ། ། བྲམ་ཟེ་ཕྱིས་སུ་འོངས་ནས་གཙུག་ལག་ཁང་གི་མདུན་དུ་སླེབས་པ་དང་དེར་རིག་སྔགས་ལ་བརྟེན་ནས་རྫིང་བུ་ཡངས་ཤིང་རྒྱ་ཆེ་ལ་དྭངས་ཤིང་གཙང་བ་དང༌། དེའི་ནང་དུ་མེ་ཏོག་པདྨ་འདབ་མ་སྟོང་དང་ལྡན་པ་ཞིག་སྤྲུལ་པའི་སྟེང་དུ་རང་ཉིད་འཁོད་དེ་སྙེམས་ནས་ཀླུ་སྒྲུབ་ལ་འདི་སྐད་ཅེས། ཁྱོད་ས་ལ་སྡོད་པ་ནི་དུད་འགྲོ་དང་ཁྱད་པར་མ་མཆིས་པས། བདག་དྲི་མེད་པདྨོའི་སྙིང་པོར་བཞུགས་པའི་སྐྱེས་བུ་དམ་པ་ཤེས་རབ་དང་ལྡན་པ་ལ་རྒོལ་བའི་ཀླན་ཀ་སྨྲ་བར་འདོད་དམ་ཟེར་རོ། ། དེའི་ཚེ་ཀླུ་སྒྲུབ་ཀྱིས་རིག་སྔགས་ལ་བརྟེན་ནས་གླང་པོ་ཆེ་དཀར་པོ་མཆེ་བ་དྲུག་དང་ལྡན་པ་ཞིག་ཏུ་སྤྲུལ་ནས། ཆུ་རྫིང་གི་སྟེང་དུ་ཕྱིན་ཏེ་པད་གདན་ལ་སླེབས་པ་ན་བྲམ་ཟེ་དེ་གླང་ཆེན་གྱི་སྣས་བཟུང་ནས་མཁའ་ལ་བཏེགས་ཤིང་ས་ལ་བརྡབས་པས་ལུས་ཀྱི་རྐེད་པ་རྨས་ཤིང༌། དེ་ཉིད་དུ་ཀླུ་སྒྲུབ་ཀྱི་ཞབས་ལ་བཏུད་དེ་སྨྲས་པ། བདག་གིས་རང་འཁོས་ལ་མ་བརྟག་པར་སློབ་དཔོན་ཆེན་པོར་སྐུར་བ་བཏབ་པ་ལགས་པས། སློབ་དཔོན་ཁྱེད་ཀྱིས་བདག་རྗེས་སུ་བཟུང་སྟེ་བླུན་རྨོངས་ཀྱི་མུན་པ་བསལ་ཏུ་གསོལ་ཞེའོ། ། ཡང་དེའི་ཚེ་འཕགས་ཡུལ་ལྷོ་ཕྱོགས་ཀྱི་རྒྱལ་ཕྲན་རྣམས་ལོག་པའི་ལམ་ལ་དད་ཅིང༌། དགེ་སྦྱོང་དང་རྒྱལ་བའི་སྲས་ནི་མཐོང་བའི་སྐལ་བར་མ་གྱུར་པས། རྒྱལ་ཁམས་མཐའ་དབུས་ཀྱི་སྐྱེ་བོ་ཐམས་ཅད་ལོག་པའི་ལམ་དེར་ཞུགས་པར་གྱུར་ཏོ། ། ཀླུ་སྒྲུབ་ཀྱིས། ཤིང་གི་རྩ་བ་མ་བཀོག་པར། །ཡལ་ག་ཉམས་པར་འགྱུར་མིན་ལྟར། །མི་ཡི་བདག་པོ་མ་ཐུལ་བར། །ལམ་གྱི་སྤྱོད་པ་སྤྱད་མི་ནུས། །ཞེས་དགོངས་ནས་ཡོད་པ་ལ། ཡུལ་དེའི་རྒྱལ་ཁྲིམས་ལྟར་རྒྱལ་པོས་གླ་རྔན་བྱིན་ནས་སྲུང་དམག་བསྡུས་པ་ན་ཀླུ་སྒྲུབ་ཉིད་ཀྱང་དམག་ལ་ཞུགས་པས་དམག་དཔོན་དུ་གྱུར་ཅིང༌། གོ་མཚོན་ཐོགས་ནས་མདུན་དུ་སྐྱོད་དེ་དཔུང་གི་ཚོགས་ཀྱི་ཁ་ལོ་བསྒྱུར་བ་ན། བཙན་གྱིས་མ་བསྐུལ་ཡང་བཀའ་བཞིན་སྒྲུབ་ཅིང༌། ཉེས་ཁྲིམས་མི་བཙན་ཡང་ཀུན་གྱིས་བཀུར་བས། རྒྱལ་པོ་ལྷག་པར་མཉེས་ནས་དྲིས་པ། སྐྱེས་བུ་འདི་སུ་ཞིག། ཉེ་གནས་ཀྱིས་ལན་སྨྲས་པ། འདི་ནི་དམག་ལ་ཞུགས་པ་ཞིག་ཏེ་ཟས་དང་གླ་ཡང་མི་ལེན་ལ་དལ་བའི་དུས་སུའང་གུས་ནན་གྱིས་ལས་བྱེད་པ་ཞིག་ལགས་ན། ཅི་ལ་སེམས་ཤིང་ཅི་ཞིག་དོན་དུ་གཉེར་བ་ནི་མ་འཚལ་ཏོ་ཞེའོ། ། རྒྱལ་པོས་མདུན་དུ་བཀུག་ནས་དྲིས་པ། ཁྱོད་ནི་སུ་ཞིག། ལན་སྨྲས་པ། བདག་ནི་ཐམས་ཅད་མཁྱེན་པའོ། །རྒྱལ་པོ་ཡ་མཚན་དང་བཅས་ཏེ་དྲིས་པ། ཐམས་ཅད་མཁྱེན་པ་ནི་དུས་ཤིན་ཏུ་རིང་པོར་རེ་རེ་ཙམ་འབྱུང་བར་ལགས་ན། ཁྱེད་ཐམས་ཅད་མཁྱེན་པར་ཅི་ལས་རྟོགས། ལན་སྨྲས་པ། རྒྱལ་པོས་བདག་གི་ཤེས་རབ་མཁྱེན་པར་འདོད་ན་དྲིས་པས་མཐོང་བར་འགྱུར་རོ་ཞེའོ། །རྒྱལ་པོས་བསམ་པ། བདག་ནི་ཤེས་རབ་ཀྱི་བདག་པོ་ཡིན་པས་གཞུང་ཆེན་སྨྲ་བའི་སློབ་དཔོན་དག་ལ་དྲིས་པས་ཀྱང་ཕམ་པར་ནུས་ན། འདི་ནི་མིང་མེད་པ་ཞིག་ཡིན་པས། གལ་ཏེ་མ་ཐུབ་ན་དེ་ནི་དོན་ཆུང་ཞིག་མིན། འོན་ཏེ་མ་དྲིས་ན་ནི་ཕམ་པར་ཤུགས་ཀྱིས་ཁས་བླངས་སོ་སྙམ་ནས་སོམ་ཉིའི་ངང་ལ་རིང་དུ་ལུས་ཀྱང་ཐབས་གཞན་མ་རྙེད་ནས་དྲིས་པ། འོ་ན་དེ་རིང་ལྷ་ཡིས་ཅི་བྱེད་དམ། ཀླུ་སྒྲུབ་ཀྱིས་སྨྲས་པ། དེ་རིང་ལྷས་ལྷ་མ་ཡིན་དང་འཐབ་བོ་ཞེའོ། ། རྒྱལ་པོས་དེ་ལྟར་ཐོས་ནས། དཔེར་ན་མི་ཞིག་ཁ་ཟས་ཀྱིས་བརྣངས་སྟེ་ཡར་སྐྱུག་མི་ནུས་ལ་མར་མིད་ཀྱང་མི་ནུས་པ་བཞིན། ཚིག་དེ་རྫུན་དུ་འདོད་ནའང་སྒྲུབ་བྱེད་མེད་ཅིང༌། བདེན་པར་འདོད་ཀྱང་བདེན་དཔང་མི་གསལ་བས། ཅི་ཡང་མི་སྨྲ་བར་ཡོད་པར། ཀླུ་སྒྲུབ་ཀྱིས་སླར་ཡང་སྨྲས་པ། དེ་ནི་རྫུན་གྱིས་རྒྱལ་ཐབས་བྱེད་པ་མིན་ཏེ། རྒྱལ་པོ་ཉིད་ཅུང་ཟད་སྒུག་མཛོད་དང་ཡུད་ཙམ་ནས་རྟོགས་པར་འགྱུར་རོ་གསུངས་མ་ཐག་མཚོན་ཆའི་ཚོགས་ནམ་མཁའ་ནས་རིམ་བཞིན་སར་ལྷུང་ངོ། ། རྒྱལ་པོས་སྨྲས་པ། ཕུག་མདུང་དང་གོ་མཚོན་དག་ནི་དགྲ་ཆས་ཡིན་མོད་ཀྱང༌། དེ་དག་ལས་ལྷ་དང་ལྷ་མིན་འཐབ་པར་ཁྱེད་ཀྱིས་ཇི་ལྟར་ངེས་ཤེའོ། ། ཀླུ་སྒྲུབ་ཀྱིས་སྨྲས་པ། དོན་མེད་མང་དུ་སྨྲ་བ་ལས་བདེན་པའི་དངོས་པོར་གཟིགས་ན་མི་ལེགས་སམ། གསུངས་མ་ཐག་ལྷ་མ་ཡིན་གྱི་རྐང་ལག་མཛུབ་མོ་སྣ་དང་རྣ་བ་སོགས་ནམ་མཁའ་ནས་ལྷུང་ཞིང༌། ཡང་རྒྱལ་པོ་དང་བློན་འབངས་བྲམ་ཟེ་དང་བཅས་པས་ནམ་མཁར་དཔུང་ཚོགས་ཕན་ཚུན་འཐབ་པ་གསལ་བར་མཐོང་བས་རྒྱལ་པོས་ཕྱག་དང་བཅས་ཏེ་དུས་དེ་ནས་བཟུང་སྟེ་ཆོས་བཞིན་སྒྲུབ་པ་ལྷུར་བླངས་སོ། །གཙུག་ལག་ཁང་དེར་འཁོད་པའི་བྲམ་ཟེ་ཁྲི་ཕྲག་དག་ཀྱང་རལ་པ་དོར་ནས་ཚུལ་ཁྲིམས་ཡང་དག་པ་བླངས་སོ། ། དེའི་ཚེ་ཐེག་པ་དམན་པའི་དགེ་སློང་ཞིག་ཡོད་དེ། རྟག་ཏུ་སློབ་དཔོན་ལ་ཁོང་ཁྲོ་ཞིང་ཕྲག་དོག་དང་བཅས་ཏེ་ཡོད་པ་ལ། ཀླུ་སྒྲུབ་ཡུལ་དེར་བྱོན་ནས་དགེ་སློང་དེར་དྲིས་པ། ཁྱེད་ཉིད་བདག་འཇིག་རྟེན་འདིར་རིང་དུ་འཚོ་ཞིང་བཞེས་པར་འདོད་དམ། ལན་སྨྲས་པ། དེ་ནི་ཅིས་ཀྱང་མི་འདོད་དོ་ཞེའོ། །དེ་ནས་སློབ་དཔོན་སྒྲུབ་ཁང་སྟོང་པ་ཞིག་ཏུ་བཞུགས་ནས་ཉིན་མང་པོར་ཕྱིར་མ་ཕེབས་པ་ན། སློབ་མ་རྣམས་ནས་སྒོ་བཙན་གྱིས་ཕྱེས་ནས་བལྟས་པས། འབུ་སྲིན་ཤུན་པ་ལས་ཐོན་པ་ལྟར་ཞི་བར་གཤེགས་ཟིན་ཏོ། །སློབ་དཔོན་འཇིག་རྟེན་འདི་ནས་གཤེགས་ཏེ་ད་ལྟའི་བར་དུ་མི་ལོ་བརྒྱ་ཙམ་སོང་ཡང༌། འཕགས་ཡུལ་ལྷོ་ཕྱོགས་ཀྱི་རྒྱལ་ཕྲན་རྣམས་ནས་དེའི་ལྷ་ཁང་བཞེངས་ཏེ་སངས་རྒྱས་དང་འདྲ་བར་མཆོད་པ་དང་བསྙེན་བཀུར་བར་བྱེད་དོ། ། སློབ་དཔོན་དེ་ཡུམ་ལས་འཁྲུངས་པ་ན་ལྗོན་ཤིང་ཞིག་གི་འོག་ཏུ་སྐུ་འཁྲུངས་པས་མཚན་ལ་अर्जुनཨརྫུན་ཞུ། ཨརྫུན་ནི་ལྗོན་ཤིང་ཞིག་གི་མིང་ངོ། །ཀླུ་ལ་བརྟེན་ནས་ལམ་གྲུབ་པས་མཚན་གྱི་ཐོག་མར་ནཱ་ག་སྟེ་ཀླུ་ཞེས་པ་བསྣན་པས་नागार्जुन་ནཱགཱརྫུན་སྟེ་ཀླུ་སྒྲུབ་ཅེས་གྲགས་སོ། །ཞེས་གསུངས་སོ། ། གོང་གི་རྣམ་ཐར་འདི་ནི་འོག་ཏུ་འཆད་པར་འགྱུར་བའི་རྣམ་ཐར་རྣམས་ཀྱི་གཞི་རྟེན་ལྟ་བུར་བཀོད་པ་ཡིན་ལ། འདིར་ས་བཅད་ཀྱི་གོ་རིམ་ལེགས་པར་བསྒྲིགས་ཏེ་འོག་ནས་འབྱུང་བའི་རྣམ་ཐར་དེ་དག་ས་བཅད་འདིའི་བར་བར་དུ་ཇི་ལྟར་བསྣན་པའི་ཚུལ་གསལ་བར་འགོད་པར་བྱའོ། །
འདི་ལ་དབྱེ་ན་ས་བཅད་ཉེར་གཉིས་སུ་འགྱུར་བས་གོ་རིམ་བཞིན་བཀོད་ན་འདི་ལྟར། དང་པོ་གང་དུ་འཁྲུངས་པའི་ཡུལ་བརྗོད་པ་ལ། བྱང་ཆུབ་སེམས་དཔའ་ཀླུ་སྒྲུབ་ནི། འཕགས་ཡུལ་ལྷོ་ཕྱོགས་ཀྱི་ཞེས་གསུངས།  ༼འཕྲོ་མུ་མཐུད་འགོད་རྒྱུ། 
·རྩོམ་ཡིག་གོང་མ:བོད་བརྙན་དྲྭ་ཚིཊ་དང་གློག་བརྙན་དཔྱད་བརྗོད་ཀྱི་ཟུར་སྣེ།
·རྩོམ་ཡིག་འོག་མ:དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད།༢
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·སྟོན་པ་ཐུགས་རྗེ་ཅན་ལ་བསྟོད་པ་བྱིན་རླབས་ཉེར་འཇུག་བཞུགས་ 2015/4/10 17:09:54
·རྩམ་པ། 2013/1/8 19:50:56
·སྒྲོལ་མ་འཇིགས་པ་ཀུན་སེལ་ལས་ས་ཡི་འཇིགས་སྐྱོབ་ 2012/10/23 18:24:11
·སྒོ་ཤེས་རབ་གླེང་བ། 2012/8/15 22:13:39
·དགེ་འདུན་ཆོས་འཕེལ། 2012/7/28 13:38:57
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 11:46:11 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 15:22:56 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 23:14:00 [来自: 112.5.248.229]

འབྲེལ་ཡོད་དཔྱད་བརྗོད 47 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།23.44MS