ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> མི་སྣ།
 རྩོམ་ཡིག་ཀློག་པ།

དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད།༣

  རྩོམ་པ་པོ:བཞག་པ་སྤྲུལ་སྐུ།ཡོང་ཁུངས:ནང་རིག་གཟིགས་གྲངས:5818ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2014/11/9 13:52:10ཚོགས་ཡར་སྤྲོད:admin
༄༅། །དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ཆེན་མོ་ལུང་རིགས་རྒྱ་མཚོའི་གཏེར་མཛོད་ཅེས་བྱ་བ་བཞུགས་སོ། །༣
 
ལི་ཐང་བཞག་པ་སྐྱེ་མིང་འཇམ་དབྱངས་མཁས་གྲུབ་ཀྱིས་བརྩམས།
 
 
གསུམ་པ་འཕགས་མཆོག་ཀླུ་སྒྲུབ་འདས་ནས་ལོ་སུམ་བརྒྱ་ལྔ་བཅུ་ཙམ་ལ་ཕེབས་པའི་༼ སྤྱི་ལོ་༦༠༠ནས་༦༥༠བར་དུ་༽དཔལ་ལྡན་ཟླ་བ་གྲགས་པའི་དུས་སུ་ཇི་ལྟར་གྲགས་པ་ནི། དཔལ་ལྡན་ཟླ་བ་གྲགས་པ་དེ་འཕགས་པ་ཀླུ་སྒྲུབ་ཀྱི་རྗེས་སུ་འབྲངས་དགོས་པའི་རྒྱུ་མཚན་ནི། ཇི་ལྟར་སངས་རྒྱས་ཀྱི་དྲུང་ནས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་དངོས་སུ་ཉན་ནས་ཟབ་མོར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ལ་སོགས་པས། ཆོས་རྣམས་ཀྱི་བདག་ཉིད་དམ་གནས་ལུགས་ཇི་ལྟར་གཟིགས་པ་ལྟར། འཕགས་པ་ཀླུ་སྒྲུབ་ཀྱིས་ཀྱང་ཡུམ་ཤེར་ཕྱིན་གྱི་ལུང་དོན་ཕྱིན་ཅི་མ་ལོག་པར་མཁྱེན་ནས། ལུང་དང་རིགས་པ་ཡང་དག་པའི་ལམ་ནས་ཆོས་ཐམས་ཅད་རང་བཞིན་མེད་པར་གཏན་ལ་ཕབས་པ་ལ་ཐུག་པར་གསུངས་ཤིང༌། དེས་ན་དཔལ་ལྡན་ཟླ་བས་འཇུག་པ་རང་འགྲེལ་འདི་ཉིད་དུའང་ཡུམ་ཤེར་ཕྱིན་གྱི་ཟབ་དོན་དེ་ཉིད་སློབ་དཔོན་ཀླུ་སྒྲུབ་ཀྱི་ལུགས་ཇི་ལྟ་བ་བཞིན་དུ་འགྲེལ་བར་གསུངས་ཏེ། འཇུག་པ་རང་འགྲེལ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔས་ཆོས་རྣམས་ཀྱི་བདག་ཉིད་ཇི་ལྟ་བ་ཉིད་ཇི་ལྟར་མཐོང་བ་དེ་ལྟར། འཕགས་པ་ཀླུ་སྒྲུབ་ཀྱིས་ལུང་ཕྱིན་ཅི་མ་ལོག་པར་མཁྱེན་ནས་དབུ་མའི་བསྟན་བཅོས་ལས་རིགས་པ་དང་ལུང་དག་གིས་ཆོས་རྣམས་ཀྱི་བདག་ཉིད་ཡང་དག་པ་ཇི་ལྟ་བ་ཉིད་རང་བཞིན་མེད་པའི་མཚན་ཉིད་ཅན་ཆེས་གསལ་བར་བསྟན་ཏོ། །དེའི་ཕྱིར་ཇི་ལྟར་འཕགས་པ་ཀླུ་སྒྲུབ་ཀྱི་ཞལ་སྔ་ནས་རིགས་པ་དང་ལུང་དག་གིས་ཆོས་རྣམས་ཀྱི་དེ་ཉིད་བསྟན་པ་དེ་ཁོ་ན་ལྟར། བདག་གིས་དེས་ཉེ་བར་བསྟན་པའི་ལུགས་ཇི་ལྟར་གནས་པ་བཞིན་དུ་བརྗོད་པར་བྱའོ། ཞེས་གསུངས་སོ། ། འོ་ན་འདིས་ནི་དཔལ་ལྡན་ཟླ་བའི་འཇུག་འགྲེལ་གྱི་ཁུངས་སྟོན་པར་འདུག་པས་ཀླུ་སྒྲུབ་ཀྱི་རྣམ་ཐར་དང་འབྲེལ་བ་ཅི་ཡོད་ཅེ་ན། འབྲེལ་བ་ཤིན་ཏུ་ཆེ་སྟེ། འདི་ལས་དཔལ་མགོན་འཕགས་པ་ཀླུ་སྒྲུབ་ཀྱིས་ཡུམ་ཤེར་ཕྱིན་གྱི་དངོས་བསྟན་ཟབ་མོ་སྟོང་པ་ཉིད་ཀྱི་དོན་ཕྱིན་ཅི་མ་ལོག་པ་དེ་ཉིད་རང་གིས་རྙེད་ནས་གཞན་ལ་གསལ་བར་ཇི་ལྟར་མཛད་པའི་ཚུལ་གསུངས་པས། འཕགས་མཆོག་ཀླུ་སྒྲུབ་ཀྱི་རྣམ་ཐར་ལ་འདི་ལས་གལ་ཆེ་བ་ཞིག་ག་ལ་ཡོད་དེ། ཟབ་མོ་དབུ་མའི་ཤིང་རྟའི་སྲོལ་ཕྱེ་བ་དེ་ཀླུ་སྒྲུབ་ཀྱི་མཛད་པ་རྣམས་ཀྱི་ནང་ནས་མཛད་པའི་སྙིང་པོ་མཆོག་ཏུ་གྱུར་པ་ཡིན་པས་སོ། ། ཡང་གཞུང་དེར། འཕགས་པ་ཀླུ་སྒྲུབ་ཀྱིས་ཡུམ་ཤེར་ཕྱིན་གྱི་ཟབ་དོན་མ་ནོར་བར་རྙེད་པ་སོགས་སངས་རྒྱས་ཀྱིས་ལུང་ཇི་ལྟར་བསྟན་པའི་སྐོར་གསུངས་ཏེ། འཇུག་པ་རང་འགྲེལ་ལས། ་ཅི་སྟེ་རེ་ཞིག་འཕགས་པ་ཀླུ་སྒྲུབ་དེ་ཉིད་ལ་ལུང་ཕྱིན་ཅི་མ་ལོག་པར་ངེས་པ་ཅི་ལྟར་ཡོད་ཅེ་ན། ལུང་ལས་ཤེས་ཏེ། ཇི་ལྟར་འཕགས་པ་ལང་ཀར་གཤེགས་པ་ལས། ལྷོ་ཕྱོགས་བེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་འབོད་པ་སྟེ། །ཡོད་དང་མེད་པའི་ཕྱོགས་འཇིག་པ། །ང་ཡི་ཐེག་པ་འཇིག་རྟེན་དུ། །བླ་མེད་ཐེག་ཆེན་རབ་བསྟན་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །ཞེས་གསུངས་པ་དང༌། ཡང་འཕགས་པ་སྤྲིན་ཆེན་པོ་སྟོང་ཕྲག་བཅུ་གཉིས་པ་ལས་ཀྱང༌། ཀུན་དགའ་བོ་ལིཙྪ་བི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི་ནི་ང་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་ཀླུ་ཞེས་བྱ་བའི་དགེ་སློང་དུ་གྱུར་ནས་ངའི་བསྟན་པ་རྒྱས་པར་རབ་ཏུ་བསྟན་ཏེ། མཐར་གྱིས་རབ་ཏུ་དང་བའི་འོད་ཅེས་བྱའི་འཇིག་རྟེན་གྱི་ཁམས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་འགྱུར་རོ་ཞེས་གསུངས་སོ། །དེའི་ཕྱིར་འདིས་ལུགས་ཕྱིན་ཅི་མ་ལོག་པར་ངེས་པར་གྲུབ་བོ། ཞེས་ལང་ཀར་གཤེགས་པ་དང་འཕགས་པ་སྤྲིན་ཆེན་པོའི་མདོ་ལས་འཕགས་པ་ཀླུ་སྒྲུབ་ཀྱིས་ཡུམ་ཤེར་ཕྱིན་གྱི་དགོངས་པ་ངེས་དོན་དུ་འགྲེལ་བ་དང༌། བསྟན་པ་རྒྱས་པར་བྱེད་པ། རྟེན་དེ་ལ་ས་དང་པོ་རབ་ཏུ་དགའ་བ་ཐོབ་པ། ཞིང་འདིར་དངོས་ཀྱི་གདུལ་བྱ་རེ་ཞིག་རྫོགས་ནས་བདེ་བ་ཅན་གྱི་ཞིང་དུ་གཤེགས་པ། མ་འོངས་པར་སངས་རྒྱས་ཡེ་ཤེས་འབྱུང་གནས་འོད་དུ་འགྱུར་བ་སོགས་སངས་རྒྱས་ཀྱིས་ཇི་ལྟར་ལུང་བསྟན་པའི་ཚུལ་གསལ་བར་གསུངས་པས་སློབ་དཔོན་ལེགས་ལྡན་འབྱེད་ཀྱི་རྟོག་གེ་འབར་བའི་ལུང་གི་གསལ་བཤད་ལྟ་བུར་གྱུར་ཏོ། །
  ཡང༌དཔལ་ལྡན་ཟླ་བའི་བཞི་བརྒྱ་པའི་འགྲེལ་བ་ལས་ཀྱང་ཀླུ་སྒྲུབ་ཀྱི་སློབ་མ་འཕགས་པ་ལྷས་སློབ་དཔོན་ཀླུ་སྒྲུབ་དགེ་བའི་བཤེས་གཉེན་དུ་ཇི་ལྟར་བསྟེན་པའི་ཚུལ་གསལ་བར་གསུངས་ཏེ། འདི་ནི་རྒྱལ་པོ་བདེ་སྤྱོད་བཟང་པོས་བསྙེན་བཀུར་ཞུ་བའི་དུས་སུ་ཡིན་པར་ལོ་ཆེན་ཞོན་ཙང་གིས་གསུངས་པ་འོག་ནས་འབྱུང་བ་ལྟར་ཡིན་ལ། ལོ་ཆེན་གཞོན་ནུ་སྲོག་གིས་ས་བཅད་བཅུ་དྲུག་པར་འཕགས་ཡུལ་གྱི་རྒྱལ་པོས་སློབ་དཔོན་ཀླུ་སྒྲུབ་ཀྱིས་བྲམ་ཟེ་ནུས་ལྡན་ཞིག་དང་རྩོད་པའི་དཔང་པོར་མཛད་པར་གསུངས་ཤིང༌། ཡང་ས་བཅད་བཅོ་བརྒྱད་པར་འཕགས་ཡུལ་ལྷོ་ཕྱོགས་ཀྱི་རྒྱལ་པོ་འཁོར་བྲམ་ཟེ་ཁྲི་ཕྲག་དང་བཅས་པ་ཆོས་ལ་བཀོད་པར་གསུངས་ཏེ། རྒྱལ་པོ་བདེ་སྤྱོད་བཟང་པོའི་རྒྱལ་ཁབ་དེ་འཕགས་ཡུལ་ལྷོ་ཕྱོགས་ཀྱི་ཀོ་ས་ལ་ཞེས་པར་ཡོད་པས། འདིའི་ས་བཅད་ཕྱི་མའི་འཕགས་ཡུལ་ལྷོ་ཕྱོགས་ཀྱི་རྒྱལ་པོ་དེ་ཡིན་ནམ་སྙམ་སྟེ་བརྟག་པར་བྱའོ། །བཞི་བརྒྱ་པའི་འགྲེལ་བ་ལས། གང་གི་ཕྱིར་ན་སློབ་དཔོན་འཕགས་པ་ལྷ་འདི་ནི། །སློབ་དཔོན་ཀླུ་སྒྲུབ་སློབ་མར་གནང་བར་འདོད་གྱུར་པ། །དེའི་ཕྱིར་འདི་ཡི་དེ་ཉིད་ལུགས་ལས་ལུགས་གཞན་མིན། །འདི་ལྟར་སློབ་དཔོན་འཕགས་པ་ལྷ་ནི་སིངྒ་ལའི་གླིང་དུ་འཁྲུངས་པ་སིངྒ་ལའི་གླིང་གི་རྒྱལ་པོའི་སྲས་ཞིག་སྟེ་མཐར་རྒྱལ་ཚབ་བོར་ནས་དེ་ཉིད་དུ་རབ་དུ་བྱུང་ཞིང༌། དེ་ནས་ལྷོ་ཕྱོགས་ཀྱི་རྒྱུད་ལྟར་འོངས་ཏེ་སློབ་དཔོན་ཀླུ་སྒྲུབ་ཀྱི་ཉེ་གནས་ཉིད་དུ་གྱུར་ཅིང༌། དེའི་ལུགས་ཀྱི་རྗེས་སུ་འཇུག་པར་གྱུར་པ་དེ་ཉིད་ཀྱི་ཕྱིར་ན་བསྟན་བཅོས་བཞི་བརྒྱ་པ་འདིའི་དེ་ཁོ་ན་ཉིད་གང་ཡིན་པ་དེ་ནི་དབུ་མའི་བསྟན་བཅོས་ལས་བཤད་པའི་དེ་ཁོ་ན་ཉིད་ལས་མཚན་ཉིད་ཐ་དད་པ་ཅན་མ་ཡིན་ནོ། ཞེས་ཀླུ་སྒྲུབ་ཀྱི་སློབ་མ་འཕགས་པ་ལྷའི་འཁྲུངས་ཡུལ་སིངྒ་ལའི་གླིང་དང༌། རིགས་ནི་རྒྱལ་སྲས་ཡིན་ལ། མཐར་རྒྱལ་སྲིད་ལ་མ་ཆགས་པར་རྒྱལ་ཚབ་ཀྱི་གོ་གནས་ཀྱང་བོར་ནས་སིངྒ་ལའི་གླིང་དུ་རབ་ཏུ་བྱུང་ཞིང༌། འཕགས་ཡུལ་ལྷོ་ཕྱོགས་སུ་ལྟར་ཕེབས་ནས་ཀླུ་སྒྲུབ་ཀྱི་ཉེ་གནས་གནང་བ་དང་ཀླུ་སྒྲུབ་ཀྱི་རྗེས་སུ་འབྲངས་ནས་བསྟན་བཅོས་བཞི་བརྒྱ་པ་མཛད་པར་གསུངས། དེ་ཡང་འདིར་ལྷོ་ཕྱོགས་ཀྱི་རྒྱུད་དུ་ལྟར་འོངས་ཏེ་ཞེས་སྨྲོས་པས་ནི། སློབ་དཔོན་ཨཱརྱ་དེ་ཝ་དེ། དང་པོར་ཀླུ་སྒྲུབ་ཀྱི་སྙན་གྲགས་ཐོས་ནས་གཞུང་དོན་ལ་རྩོད་པ་དང་འདྲི་བའི་སླད་དུ་ལྟར་ཕེབས་པ་ཡིན་གྱི། དགེ་བའི་བཤེས་གཉེན་དུ་བསྟེན་པའི་ཕྱིར་དུ་ཕེབས་པ་མིན་ཡང༌། འཕགས་མཆོག་ཀླུ་སྒྲུབ་དང་མཇལ་ཙམ་ཉིད་ནས་ཆོས་ཀྱི་བགྲོ་གླེང་བྱར་མ་སྤོབས་ཤིང༌། མི་འཕྲོག་པའི་དད་པ་ཆེན་པོ་འཁྲུངས་ནས་དེའི་ཉེ་གནས་སུ་གྱུར་པ་ཡིན་ནོ་ཞེས་བསྟན་ཏེ་འདི་ནི་ས་བཅད་བཅོ་བརྒྱད་པའི་ཁུངས་སུ་གཏོགས་པའོ། །ཡང་དེ་ཉིད་དུ། ཇི་ལྟར་སློབ་དཔོན་ཀླུ་སྒྲུབ་ཀྱིས་རྒྱལ་པོའི་བུ་སེམས་ཀྱི་ནད་བུད་མེད་འདོད་པས་བསླང་བ་སྨན་པ་ཐམས་ཅད་ཀྱིས་མ་ཤེས་པ་ཞིག་མཁྱེན་ནས་ཞི་བར་མཛད་པ་དེ་བཞིན་དུ། བྱང་ཆུབ་སེམས་དཔའ་རྣམས་ཀྱང་སེམས་ཅན་གྱི་བསམ་པ་དང་བག་ལ་ཉལ་ཡོངས་སུ་ཤེས་པ་ལས་སེམས་ཅན་ཐམས་ཅད་ཀྱི་ཉོན་མོངས་པའི་པའི་ནད་རིལ་ཉེ་བར་ཞི་བར་བྱེད་དོ། ཞེས་འཕགས་མཆོག་ཀླུ་སྒྲུབ་ཀྱིས་གཞན་སེམས་ཤེས་པའི་མངོན་ཤེས་ལ་བརྟེན་ནས་རྒྱལ་བུའི་སེམས་ཀྱི་ནད་ཞི་བར་བྱས་པ་སོགས་གསུངས་སོ། །དཔལ་ལྡན་ཟླ་བ་གྲགས་པས་དབུ་མ་རྩ་བའི་འགྲེལ་བ་ཚིག་གསལ་བ་ལས་གསུངས་པའི་ཚིགས་བཅད་ཀྱི་དོན་འགྲེལ་ན། འདི་ལྟ་བུ་ཞིག་གསུངས་ཏེ། སེམས་ཅན་ཐམས་ཅད་སྡུག་བསྔལ་གྱིས་མནར་བར་མི་བཟོད་པའི་སྙིང་རྗེ་དང༌། གནས་སྐབས་དང་མཐར་ཐུག་གི་བདེ་བ་དང་ལྡན་པར་འདོད་པའི་བྱམས་པ་དང༌། འགྲོ་ཀུན་སྒྲོལ་བའི་ཁུར་ཆེན་བདག་གིར་བཞེས་པའི་ལྷག་བསམ་དང་བཅས་པའི་ཐུགས་རྗེས་བརླན་པའི་བྱང་ཆུབ་ཀྱི་ཐུགས་མངའ་བས་ན། སངས་རྒྱས་རྣམས་ཀྱི་སྲས་པོར་གྱུར་ཅིང༌། ཆོས་ཀྱི་གནས་ལུགས་མཐར་ཐུག་གཟིགས་པ་ལ་དྲི་མ་མེད་པའི་བློ་གྲོས་མཆོག་དང་ལྡན་པའི་འཕགས་པ་ཀླུ་སྒྲུབ་ཀྱིས་རྒྱལ་བའི་གསུང་རབ་སྤྱི་དང་ཁྱད་པར་དུ་ཡུམ་ཤེར་ཕྱིན་རྒྱས་འབྲིང་བསྡུས་གསུམ་གྱི་དོན་ཇི་ལྟར་གནས་པའི་ཟབ་མོ་སྟོང་པ་ཉིད་དེ། ཐོག་མར་རང་ཉིད་ཀྱིས་ཇི་ལྟ་བ་བཞིན་དུ་མཁྱེན་ནས། དེ་ལ་རབ་ཏུ་གུས་ཤིང་དད་པས་གཞན་ལ་ཕན་པའི་སླད་དུ་བསྟན་བཅོས་ཆེན་པོ་དབུ་མ་རྩ་བའི་ཚིག་ལེར་བྱས་པ་ཤེས་རབ་ཅེས་བྱ་བ་བརྩམས་ནས། འཇིག་རྟེན་གྱི་ཁམས་འདིར་ཆོས་ཉིད་ཟབ་མོའི་གཏམ་ཤིན་ཏུ་རྒྱས་པར་མཛད་པ་ཡིན་ཏེ། རྒྱུ་མཚན་གང་གིས་ཕྱིར་ན། ཡོན་ཏན་ཀུན་གྱི་འབྱུང་གནས་སངས་རྒྱས་རྣམས་ཀྱིས་མདོ་སྡེ་དག་ཏུ་འདི་ལྟར་མཛད་པར་ལུང་བསྟན་གསལ་བར་བྱུང་བས་སོ། །ཞེས་པ་སྟེ། གཞུང་དེ་ཉིད་ལས། གང་ཕྱིར་ཡོན་ཏན་ཀུན་གྱི་འབྱུང་གནས་འདི་ནི་སངས་རྒྱས་རྣམས་ཀྱིས་བསྟན་གྱུར་པ། ། དེ་ཕྱིར་དེའི་གཏམ་ཤིན་ཏུ་རྒྱས་དང་བཅས་པར་ཐུགས་རྗེས་བརླན་པའི་ཐུགས་མངའ་ཞིང༌། །སངས་རྒྱས་རྣམས་ཀྱི་སྲས་པོ་བློ་བཟང་ཀླུ་སྒྲུབ་དེ་ཡིས་གསུང་རབ་ཇི་ལྟ་བར། །
གནས་པ་བཞིན་དུ་མཁྱེན་ནས་གུས་པས་བསྟན་བཅོས་དབུ་མར་གཙོ་བོའི་ངོ་བོར་བསྟན། །
ཞེས་པ་ནི་འཕགས་མཆོག་ཀླུ་སྒྲུབ་འདི་སངས་རྒྱས་ཀྱིས་ལུང་བསྟན་པ་དང༌། དེའི་མཁྱེན་པ་དང་བརྩེ་བའི་ཡོན་ཏན་དང་འཕྲིན་ལས་རྣམས་ཀྱི་ནང་ནས་གསུང་གི་འཕྲིན་ལས་རྣམས་ལ་ཆེས་ཆེར་བསྔགས་པར་མཛད་དེ། འདི་ནི་ས་བཅད་བཅུ་བཞི་པ་སླར་འཕགས་ཡུལ་དུ་ཕེབས་ནས་མུ་སྟེགས་ཀྱི་རྒོལ་བ་ཐམས་ཅད་ཚར་བཅད་དེ་བསྟན་པ་ཆེས་ཆེར་སྤེལ་བའི་སྐོར་ཡིན་ནོ། །འདིར་ཁོ་བོས་ཡུམ་ཤེར་ཕྱིན་རྒྱས་འབྲིང་བསྡུས་གསུམ་གྱི་དོན་ཇི་ལྟར་གནས་པ་ཞེས་སྨྲོས་པ་ལ། ལ་ལ་ན་རེ། ཡུམ་འབྲིང་པོའི་དོན་ཇི་ལྟར་གནས་པ་བཞིན་དུ་འགྲེལ་བ་མ་གྲུབ་སྟེ། ཡུམ་བར་མ་དེ་འཕགས་པ་གྲོལ་སྡེའི་དུས་སུ་དགེ་བསྙེན་ཞི་བའི་གོ་ཆས་འཕགས་པ་འཇིག་རྟེན་དབང་ཕྱུག་གི་ཞིང་ཁམས་པོ་ཏ་ལ་ནས་དཀའ་བ་བརྒྱ་ཕྲག་དང་དུ་བླངས་ནས་འཛམ་བུའི་གླིང་དུ་གདན་དྲངས་ལ། ཡུམ་བར་མའམ་སྟོང་ཕྲག་ཉི་ཤུ་ལྔ་པ་ཝཱ་ར་ནཱ་སིར་སླེབས་པ་དང་འཕགས་པ་གྲོལ་སྡེས་མཇལ་ནས་ཉི་ཁྲིའི་སྣང་བ་མཛད་དོ་ཞེས་ཀུན་ལ་གྲགས་ཤིང་གྲུབ་པ་ལགས་པས། གལ་ཏེ་ཀླུ་སྒྲུབ་ཀྱི་དུས་ནས་འཛམ་བུའི་གླིང་དུ་ཡོད་ན་ཞིང་གཞན་ནས་གདན་དྲངས་པ་ཇི་ལྟར་འགྲིག་ཅེ་ན། དེ་ལ་ནི་སྐྱོན་མེད་དེ། འཕགས་པ་གྲོལ་སྡེ་མ་འཁྲུངས་གོང་གི་ལོ་ངོ་བརྒྱ་ཕྲག་གཉིས་ཀྱི་སྔོན་ནས་ཤེར་ཕྱིན་སྟོང་ཕྲག་ཉི་ཤུ་ལྔ་པ་རྒྱ་ཡིག་ཏུ་བསྒྱུར་ལ། ཁྱད་པར་དུ་ལོ་ཆེན་གཞོན་ནུ་སྲོག་གིས་སྤྱི་ལོ་༤༠༤ལ་མགོ་བརྩམས་ནས་ལོ་བདུན་དང་ཟླ་བ་བཅུ་གཅིག་ཞག་ཉི་ཤུ་རྩ་བདུན་ལ་ཤེར་ཕྱིན་སྟོང་ཕྲག་ཉི་ཤུ་ལྔ་པ་དང༌། དཔལ་མགོན་ཀླུ་སྒྲུབ་ཀྱིས་མཛད་པའི་དེའི་འགྲེལ་བ་ཤིན་ཏུ་རྒྱས་པ་ཤེར་ཕྱིན་མན་ངག་ཏུ་གྲགས་པ་དང་བཅས་པ་རྒྱ་ཡིག་ཏུ་རྫོགས་པར་བསྒྱུར་བ་ད་ལྟ་དངོས་སུ་མཇལ་དུ་ཡོད་པས། འཕགས་པ་གྲོལ་སྡེ་ཇི་ཙམ་སྔ་ཡང་དུས་རབས་ལྔ་པའི་སྨད་ཙམ་ལ་འཁྲུངས་པར་གྲུབ་ཅིང༌། སྤྱི་ལོ་༥༠༠ནས་༦༠༠བར་གྱི་སློབ་དཔོན་ཞིག་ཡིན་པས། གལ་ཏེ་དེའི་གོང་དུ་ཤེར་ཕྱིན་སྟོང་ཕྲག་ཉི་ཤུ་ལྔ་པ་འཛམ་བུའི་གླིང་དུ་མེད་ན་རྒྱ་ཡིག་ཏུ་ཇི་ལྟར་བསྒྱུར་སོམས་ཤིག   འདི་རིགས་ལ་སྡིག་པ་མིག་ཙུམ་བྱར་མེད་ཅིང༌། དཔལ་ལྡན་ཟླ་བསཀླུ་སྒྲུབ་གཤེགས་པར་གྱུར་པ་དེས་མཛད་པའི། །གཞུང་རྣམས་དང་ནི་དེ་ཡི་སློབ་མའི་ཚོགས་དེ་དག་ཀྱང་དུས་མང་ཞིག་ན་ཉམས་པར་གྱུར། །གསུངས་པ་ལྟར། སྔར་ཀླུ་སྒྲུབ་ཀྱི་དུས་སུ་མདོ་འདིའང་འཛམ་བུའི་གླིང་དུ་ཡོད་པར་བསྙོན་དུ་མེད་ཀྱང༌། ཀླུ་སྒྲུབ་ཡབ་སྲས་རྣམས་འདས་ནས་༼སྤྱི་ལོ་༤༧༠ནས་༥༤༠༽སློབ་དཔོན་སངས་རྒྱས་བསྐྱངས་ཕེབས་པའི་བར་དུ་ལོ་ངོ་ཉིས་བརྒྱ་ལྷག་གི་རིང་ལ་བསྟན་པ་སྤྱི་དང་ཀླུ་སྒྲུབ་ཡབ་སྲས་ཀྱི་གཞུང་རྣམས་ཆེས་ཆེར་ཉམས་པར་གྱུར་པས་ཡུམ་བར་མ་འདི་ཡང་རྒྱ་གར་འཕགས་པའི་ཡུལ་དུ་མ་བཞུགས་པར་འཕགས་པ་གྲོལ་སྡེའི་དུས་སུ་གྲུ་འཛིན་གྱི་ཞིང་ངམ་པོ་ཏ་ལ་ནས་འཛམ་བུའི་གླིང་དུ་གདན་དྲངས་དགོས་པར་བྱུང་བ་ཡིན་ནམ་སྙམ་མོ། །
  ཡང་གཞུང་དེ་ཉིད་ལས། རྟག་ཆད་ཀྱི་མཐའ་གཉིས་སེལ་བའི་དབུ་མ་རྩ་བའི་ཚིག་ལེའུར་བྱས་པ་ཤེས་རབ་ཅེས་པའི་བསྟན་བཅོས་འདི་མཛད་པའི་དགོས་པ་ནི། རྒྱལ་བའི་བསྟན་པ་རིན་པོ་ཆེ་སྤྱི་དང་ཁྱད་པར་དུ་གང་དག་ཡུམ་གསུམ་ནས་དངོས་སུ་བསྟན་པའི་ཟབ་མོ་སྟོང་པ་ཉིད་ཀྱི་དོན་ཇི་བཞིན་དུ་མ་རྟོགས་པའི་གདུལ་བྱ་རྣམས་རྗེས་སུ་བཟུང་སྟེ། ཟབ་མོའི་དོན་ཕྱིན་ཅི་མ་ལོག་པ་རྟོགས་པར་བྱེད་པ་དང༌། གང་དག་བློ་གྲོས་ངན་པའི་དབང་གིས་ལོག་པར་རྟོག་པ་དང་ལོག་པར་སྨྲ་བར་བྱེད་པའི་རྒོལ་བའི་དཔུང་ཚོགས་རྣམས་ཏེ། ཕྱི་རོལ་རྒྱང་འཕེན་པ་ལ་སོགས་པ་ཚེ་འདི་ཕྱི་དང༌། ཀུན་རྫོབ་རྒྱུ་འབྲས་རྟེན་འབྲེལ་མེད་པར་སྨྲ་བའི་མེད་པར་སྨྲ་བའམ་ཆད་པར་སྨྲ་བ་རྣམས་དང༌། ཕྱི་རོལ་གྲངས་ཅན་པ་ལ་སོགས་ཆོས་དང་གང་ཟག་གི་བདག་གཉིས་ཀ་ཁས་ལེན་པ་རྣམས་དང༌། རང་སྡེ་གནས་མ་བུ་བ་རྣམས་ཀྱིས་བརྗོད་དུ་མེད་པའི་བདག་ཁས་ལེན་པ་དང༌། དེ་མིན་བྱེ་བྲག་སྨྲ་བ་དང་མདོ་སྡེ་པ་རྣམས་གང་ཟག་རང་རྐྱ་ཐུབ་པའི་རྫས་ཡོད་ཀྱི་བདག་མེད་པར་འདོད་ཀྱང༌། ཆོས་ཀྱི་བདག་ཁས་ལེན་པ་དང༌། ཐེག་པ་ཆེན་པོའི་སེམས་ཙམ་པ་རྣམས་ནི་གང་ཟག་གི་བདག་ཁས་མི་ལེན་ཞིང༌། གཟུགས་སོགས་ཀྱི་ཆོས་རྣམས་ཕྱི་རོལ་དོན་དུ་ཡོད་པའང་མི་འདོད་པར་སེམས་ཀྱི་བདག་ཉིད་ཙམ་དུ་འདོད་ཀྱང༌། སེམས་བདེན་པར་གྲུབ་པ་ཁས་ལེན་པ་དང༌། དབུ་མ་རང་རྒྱུད་རྣམས་ཀྱང་གང་ཟག་གི་བདག་ཁས་མི་ལེན་ཞིང༌། ཆོས་ཐམས་ཅད་བློ་གནོད་མེད་ལ་སྣང་བའི་དབང་གིས་ཕར་བཞག་པ་མ་ཡིན་པའི་ཡུལ་རང་གི་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་ཚུར་གྲུབ་པའི་ཆོས་ཀྱི་བདག་ཁས་མི་ལེན་ཡང༌། བློ་གནོད་མེད་ལ་སྣང་བའི་དབང་གིས་ཕར་བཞག་པ་དང་ཡུལ་གྱི་ཐུན་མོང་གི་སྡོད་ལུགས་ཀྱི་ངོས་ནས་གྲུབ་པ་གཉིས་ཚོགས་ཀྱི་ཐ་སྙད་པའི་བདག་རང་བཞིན་ནམ་རང་ངོས་ནས་གྲུབ་པ་ཁས་ལེན་པས། དེ་དག་རྣམས་ནི་དཔལ་ལྡན་ཟླ་བའི་ལུགས་ཀྱི་དངོས་པོར་སྨྲ་བའམ་རྟག་པ་སྨྲ་བ་རྣམས་ཡིན་ལ། དེ་དག་རྣམས་ཡང་དག་པའི་རིགས་པའི་ལམ་ནས་ཚར་བཅད་དེ་རྟག་ཆད་ཀྱི་མཐའ་ལས་བཟློག་པར་བྱ་བའི་ཕྱིར་དུ་ཡིན་ནོ་ཞེས་གསུངས་སོ། ། འདིའི་ནང་ནས་ཕྱི་རོལ་པ་རྣམས་ནི་རྒྱལ་བའི་བསྟན་པ་ཟབ་མོ་མ་རྟོགས་པ་རྣམས་ཡིན་ལ། རང་སྡེའི་དབུ་མ་རང་རྒྱུད་པ་མན་ཆད་ནི་རྒྱལ་བའི་བསྟན་པ་ཟབ་མོ་མ་རྟོགས་པ་དང༌། ལོག་པར་རྟོག་པའམ་གཞན་དུ་འཆད་པ་ཅི་རིགས་ཤིག་མཆིས་སོ། །
དེ་འཆད་པ་ལ་ཚིག་གསལ་ལས།  སྐྱེ་བོ་གང་གིས་རྒྱལ་པའི་བསྟན་པ་ཟབ་མོ་མ་རྟོགས་པ་དེས་རྟོགས་ཕྱིར་དང༌། ། གང་དག་ཐུབ་པའི་དབང་པོའི་གསུང་ལས་གཞན་དུ་དེ་ཉིད་བསྟན་པར་འདོད་པ་དང༌། །
བློ་གྲོས་ངན་པ་གཞན་གང་གསུང་རབ་རྣམ་པ་གཞན་དུ་འཆད་པར་བྱེད་གྱུར་པ། །
དེ་དག་ཀྱང་ནི་བཟློག་པར་བྱ་ཕྱིར་མཐའ་གཉིས་སེལ་བའི་བསྟན་བཅོས་འདི་མཛད་དོ། །
ཞེས་གསུངས་ཏེ། འདི་ཡང་བཅུ་བཞི་པ་སླར་འཕགས་ཡུལ་དུ་ཕེབས་ནས་མུ་སྟེགས་ཀྱི་རྒོལ་བ་ཐམས་ཅད་ཚར་བཅད་དེ་བསྟན་པ་ཆེས་ཆེར་སྤེལ་བའི་སྐོར་རོ། །  ཡང་འོག་གི་གཞུང་འདི་རྒྱ་གར་གྱི་མཁན་པོ་མ་ཧཱ་སུ་མ་ཏི་དང་། པ་ཚབ་ཉི་མ་གྲགས་གཉིས་ཀྱི་འགྱུར་གྱི་གོ་རིམ་ལྟར་འགྲེལ་ན། ཀླུ་སྒྲུབ་དང་སྒྲ་གཅན་འཛིན་བཟང་པོ་དང་བཅས་པའི་འཕགས་པ་ལྷ་ཡི་གསུང་གི་རྗེས་སུ་འབྲངས་ནས། ཀླུ་སྒྲུབ་ཀྱིས་སྲོལ་ལེགས་པར་ཕྱེས་བའི་དབུ་མའི་ཚུལ་ལུགས་དེ་ནི༌། དུས་ཡུན་རིང་པོ་ཞིག་ཏུ་གསལ་པར་བསྟན་ཅིང་རྒྱས་པར་བྱས་པ་ཡིན་ཏེ། དེ་ཡང་ཀླུ་སྒྲུབ་ཡབ་སྲས་ཀྱི་སློབ་མ་རྣམས་ཀྱིས་ཐོག་མར་དབུ་མའི་བསྟན་བཅོས་ཤེས་རབ་ལ་སོགས་པའི་དོན་རྣམ་པར་འབྱེད་པའི་སྟོབས་ཀྱིས། ཟབ་མོ་སྟོང་པ་ཉིད་ཀྱི་རྣམ་བཞག་ལ་ངེས་པ་འཁྲུངས་པའི་བློ་དང་ལྡན་པར་གྱུར་ཅིང༌། དེ་ནས་དེ་དག་རྣམས་ཀྱིས་ཀྱང་མུ་སྟེགས་ཀྱི་རྒོལ་བ་རྣམས་ཚར་བཅད་དེ་ཕམ་པར་བྱས་ནས། ཐུབ་པའི་བསྟན་པ་དྲི་མ་མེད་པ་དེ་ཉིད་སྐལ་བ་ལྡན་པ་རྣམས་ལ་བཤད་པ་ལ་སོགས་པས་ཡུན་རིང་དུ་དར་བར་བྱས་སོ་ཞེས་བསྟན་པ་ལ་ཚིག་གསལ་ལས།
ཀླུ་སྒྲུབ་སྒྲ་གཅན་འཛིན་ནི་བཟང་པོའི་ཞལ་སྔ་དང་བཅས་ལྷས་ཀྱང་གསུང་རྗེས་སུ། །
འབྲངས་པས་དེ་ཡི་ཚུལ་ལུགས་དུས་ནི་ཡུན་རིང་ཞིག་ཏུ་གསལ་བར་བསྟན་པར་མཛད། །
དེ་ཡི་སློབ་མ་བསྟན་བཅོས་དེ་ལ་རྣམ་པར་འབྱེད་པས་རྣམ་ངེས་བློ་ལྡན་པ། །
རྣམས་ཀྱིས་ཀྱང་ནི་མུ་སྟེགས་མ་ལུས་ཕམ་བྱས་ཐུབ་མཆོག་བསྟན་པ་ཡུན་རིང་བཤད། ཅེས་སོ། །
འདིར་ཀླུ་སྒྲུབ་སྒྲ་གཅན་འཛིན་འཕགས་པ་ལྷ་གསུམ་གྱི་མཚན་དངོས་སུ་བསྟན་པ་ལས་གཞན་གཉིས་ཤེས་སླ་ལ། སློབ་དཔོན་སྒྲ་གཅན་འཛིན་བཟང་པོ་ནི་དབུ་མའི་སློབ་དཔོན་སྔ་གྲས་དང་ཤིན་ཏུ་གལ་ཆེ་བ་ཞིག་ཡིན་ལ། བསྟན་འགྱུར་བསྟོད་ཚོགས་ནང་གི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྟོད་པ་ཀླུ་སྒྲུབ་ཀྱིས་མཛད་པར་གྲགས་པ་འདི་ཡང་། སྒྲ་གཅན་འཛིན་བཟང་པོས་མཛད་པར་ཀླུ་སྒྲུབ་གཤེགས་ནས་ལོ་ཉིས་བརྒྱ་ཉི་ཤུ་ཙམ་ལ་ཕེབས་པ་༼སྤྱི་ལོ་༤༧༠ནས་༥༤༠༽སློབ་དཔོན་སངས་རྒྱས་བསྐྱངས་ཀྱིས་བུདྡྷ་པཱ་ལི་ཏར་གསུངས་སོ། །སློབ་དཔོན་འདི་དུས་ཇི་ཙམ་ལ་བྱུང་བ་ལ་ནི་དོགས་གཞི་གཉིས་ཡོད་དེ། དང་པོ་ནི། བུ་སྟོན་ཐམས་ཅད་མཁྱེན་པ་དང་ཇོ་ནང་བ་ཏཱ་ར་ནཱ་ཐ་གཉིས་ཀས་སློབ་དཔོན་སྒྲ་གཅན་འཛིན་བཟང་པོ་འདི་ཀླུ་སྒྲུབ་རབ་ཏུ་བྱུང་བའི་མཁན་པོ་ཡིན་པར་གསུངས་ཤིང༌། དབུ་མ་རྩ་བའི་འགྲེལ་པ་ཚིག་གསལ་བ་ལས་ཟུར་དུ་ཕྱུང་བ་དབུ་མའི་བསྟོད་པ་ཞེས་པའི་སཾ་སྐྲྀ་ཏའི་དཔེ་ལས་ཀྱང༌།
स्पष्टंराहुलभद्रपादसहितोनागार्जुनोतन्मतं
देवेनाप्यनुगम्यमानवचनःकालंचिरंदिष्टवान्।
སྤ་ཥྚཾ་རཱ་ཧུ་ལ་བྷ་དྲ་པཱ་ད་ས་ཧི་ཏོ་ནཱ་གཱ་རྫུ་ནོ་ཏནྨ་ཏཾ་
དེ་ཝེ་ནཱ་པྱ་ནུ་ག་མྱ་མཱ་ན་ཝ་ཙ་ནཿཀཱ་ལཾ་ཙི་རཾ་དི་ཥྚ་ཝཱན྄། །
ཞེས་པའི་གོ་རིམ་ལ་དཔག་ན། སྒྲ་གཅན་འཛིན་བཟང་པོའི་ཞལ་སྔ་ནས་དང༌། ཀླུ་སྒྲུབ་དང༌། ལྷས་ཀྱང༌། ཞེས་འབྱུང་བ་དང༌། ཀླུ་སྒྲུབ་ཀྱིས་མཛད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་པཎྜིཏ་གཞོན་ནུ་སྲོག་གིས་སྤྱི་ལོ་༤༠༤ཙམ་ལ་བསྒྱུར་བའི་རྒྱ་ནག་གི་དཔེ་ནའང་བསྟོད་པ་འདི་ཤིན་ཏུ་གལ་ཆེ་བར་བརྩིས་ཏེ་གཞུང་ཆ་ཚང་བ་ལུང་འདྲེན་མཛད་ལུགས་བཅས་ལ་བརྟག་ན། སློབ་དཔོན་སྒྲ་གཅན་འཛིན་བཟང་པོ་འདི་ཀླུ་སྒྲུབ་ཀྱི་སྔོན་དུ་བྱུང་ངམ་སྙམ་པ་དང༌།
གཉིས་པ་ནི། ཡང་ན་བོད་འགྱུར་ཚིག་གསལ་གྱི་པེ་ཅིང་པར་མ་དང་སྣར་ཐང་པར་མར། ཀླུ་སྒྲུབ་སྒྲ་གཅན་འཛིན་ནི་བཟང་པོའི་ཞལ་སྔ་དང་བཅས་ལྷས་ཀྱང་གསུང་རྗེས་སུ། །ཞེས་གསུངས་པའི་ཚིག་འགྲོས་ལ་བལྟས་ན་ཀླུ་སྒྲུབ་ཀྱི་སྐུ་ཚེའི་སྨད་ཙམ་ལ་འཁྲུངས་ཤིང༌། འཕགས་པ་ལྷའི་སློབ་མ་ཡང་ཡིན་པར་གསུངས་པ་བདེན་ནམ་སྙམ་སྟེ། བུ་སྟོན་རང་ཉིད་ཀྱིས་དགེ་སློང་གི་སྡོམ་རྒྱུན་འཆད་པའི་སྐབས་སུ། ལང་ཀར་གཤེགས་པའི་འགྲེལ་བ་དྲངས་པ་ལས། ཐུབ་པ་ནས་དྷི་དྷི་ཀའི་བར་ལུང་དང་འདྲ་བ་ལས། དེས་བི་བྷ་ག་ལ། དེས་བཙུན་པ་བུདྡྷཱ་ནནྟི་ལ། དེས་བུདྡྷ་མི་ཏྲ་ལ། དེས་སློབ་མ་དགེ་སློང་རྩིབས་ལ། དེས་སུ་ན་ཤ་ཏ་ལ། དེས་རྟ་སྐད་ལ། འདི་སློབ་དཔོན་རྟ་དབྱངས་ཡིན་ནམ་སྙམ་སྟེ།གཞོན་ནུ་སྲོག་གིས་བསྒྱུར་བའི་སློབ་དཔོན་རྟ་དབྱངས་ཀྱི་རྣམ་ཐར་ལྟར་ན་སློབ་དཔོན་རྟ་དབྱངས་ཀླུ་སྒྲུབ་ལས་སྔ་བར་གསུངས་ཤིང་། སྡེ་སྣོད་གང་ལ་བརྟེན་ནས་བྱུང་བའི་གཏད་རབས་ལས་ཀྱང་马鸣མ་མིང་ཞེས་རྟ་དབྱངས་ཀྱི་མཚན་ནས་སྨོས་པའི་ཕྱིར་རོ།།
དེས་མ་ཤི་བ་ལ། དེས་ཀླུ་སྒྲུབ་ལ། དེས་ཨཱརྱ་དེ་བ་ལ། དེས་རཱ་ཧུ་ལ་སྟེ་སྒྲ་གཅན་འཛིན་ལ། དེས་སཾ་གྷཱནནྟི་ལ། དེས་དགེ་སློང་སྒྲ་བཅོམ་ལ། དེས་གྷ་ལ་ཤ་ལ། དེས་ཀུ་མཱ་ར་ཏ་ལ། དེས་ཤ་ཡ་ཏ་ལ། དེས་བ་སུ་བནྡྷུ་ལ། དེས་མ་ནོ་ཏ་ལ། དེས་ཧ་ཀ་ལི་ཀ་ན་ཡ་ན་ཤ་ལ། དེས་དགེ་སློང་སེང་གེ་ལ་བསྟན་པ་གཏད་པར་བཤད་དོ་ཞེས་གསུངས་པའི་ཕྱིར་རོ། །  གཞན་ཡང་སྤྱི་ལོ་༤༧༢ལ་ལི་ཡུལ་གྱི་སློབ་དཔོན་ཀིངྐར་དང་རྒྱའི་བཙུན་པ་ཐན་ཡའོ་གཉིས་ཀྱིས་རྒྱ་ཡིག་ཏུ་བསྒྱུར་བའི་སྡེ་སྣོད་གང་ལ་བརྟེན་ནས་བྱུང་བའི་གཏད་རབས་ནང་དུ་སྒྲ་གཅན་འཛིན་འཕགས་པ་ལྷའི་སློབ་མ་ཡིན་སྐོར་གསལ་བར་གསུངས་པས། གལ་ཏེ་དེ་དག་བདེན་ན་སློབ་དཔོན་གྱིས་སློབ་མའི་ལུང་འདྲེན་པ་འཐད་དཀའ་བས༌། འོ་ན་ནི་ལོ་ཙཱ་བ་བློ་ལྡན་ཤེས་རབ་ཀྱིས་བསྒྱུར་བའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྟོད་པ་བོད་འགྱུར་དུ་ཀླུ་སྒྲུབ་རང་ཉིད་ཀྱིས་མཛད་པར་གསུངས་པ་དེའང་ཁུངས་མེད་ཅིག་མིན་པར་སེམས་སོ། །  མདོར་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྟོད་པ་ལུང་འདྲེན་བྱས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་རྒྱ་ནག་དཔེ་དེ་ཀླུ་སྒྲུབ་ཀྱིས་མཛད་པ་མིན་པའི་སྒྲུབ་བྱེད་དུ་འགྲོ་བ་ནི་རེ་ཞིག་འཐད་དཀའོ། །འདི་དག་ནི་ས་བཅད་ཉེར་གཅིག་པ་ཀླུ་སྒྲུབ་འདས་པའི་རྗེས་སུ་འཕགས་ཡུལ་ལྷོ་ཕྱོགས་ཀྱི་རྒྱལ་ཕྲན་རྣམས་ཀྱིས་དེའི་ལྷ་ཁང་བརྩིགས་ཏེ་བསྙེན་བཀུར་བྱས་པའི་སྐོར་ལས་འཁོར་སློབ་རྣམས་ཀྱིས་དེའི་ལུགས་བཟང་ཇི་ལྟར་རྒྱས་པར་བྱས་པའི་ཚུལ་ལོ། །
ཡང་ཚིག་གསལ་ལས། དབུ་ནི་དོན་དུ་གཉེར་བ་འོངས་ལ་ཐུགས་རྗེས་དབུ་ནི་བཅད་དེ་སྩོལ་མཛད་ནས། །
བདེ་བ་ཅན་དུ་རྒྱལ་བའི་སྲས་པོ་ཀླུ་སྒྲུབ་གཤེགས་པར་གྱུར་པ་དེས་མཛད་པའི། །
གཞུང་རྣམས་དང་ནི་དེ་ཡི་སློབ་མའི་ཚོགས་དེ་དག་ཀྱང་དུས་མང་ཞིག་ན་ཉམས་པར་གྱུར། །
དེ་ཉིད་ཉི་མ་ནུབ་པས་དེང་སང་གཞུང་ལུགས་གསལ་པོ་དེ་ནི་གང་ནའང་མེད། །
ཅེས་པའི་ཤླཽཀ་འདིའི་ནང་དུ་ཀླུ་སྒྲུབ་ཀྱི་རྣམ་ཐར་དང་འབྲེལ་བའི་དོན་ཆེན་བཞི་གསུངས་ཏེ།
དང་པོ་ནི། ཀླུ་སྒྲུབ་སྐུ་གཤེགས་པའི་ཚེ་གཞོན་ནུ་སྲོག་གིས་ནི་སློབ་དཔོན་ཀླུ་སྒྲུབ་སྒྲུབ་ཁང་སྟོང་པ་ཞིག་ཏུ་བཞུགས་ནས་ཉིན་མང་པོར་ཕྱིར་མ་ཕེབས་པ་ན། སློབ་མ་རྣམས་ནས་སྒོ་བཙན་གྱིས་ཕྱེས་ནས་བལྟས་པས། འབུ་སྲིན་ཤུན་པ་ལས་ཐོན་པ་ལྟར་ཞི་བར་གཤེགས་ཟིན་ཏོ། །ཞེས་གསུངས་ཀྱང་འདིར་གོང་གི་གསུང་ཚུལ་དང་ཅུང་ཟད་མི་འདྲ་བར། དབུ་དོན་དུ་གཉེར་ནས་སློང་མཁན་བྱུང་བ་ལ་ཐུགས་རྗེའི་དབང་གིས་དབུ་བཅད་ནས་སྦྱིན་པ་བསྩལ་བས་རྐྱེན་བྱས་ཏེ་འདས་པར་གསུངས།
གཉིས་པ་ནི།
བདེ་བ་ཅན་དུ་རྒྱལ་བའི་སྲས་པོ་ཀླུ་སྒྲུབ་གཤེགས་པར་གྱུར་པ་ཞེས་སྐུ་གཤེགས་ནས་བདེ་བ་ཅན་དུ་ཕེབས་པར་གསུངས། འདི་དག་ནི་ས་བཅད་བཅུ་དགུ་པ་ཐེག་དམན་གྱི་དགེ་སློང་ཞིག་གིས་གསོལ་ནས་ཞི་བར་གཤེགས་པའི་ཁུངས་སུ་གཏོགས་པའི་གསུང་ཚུལ་མི་འདྲ་བ་ཞིག་གོ །
གསུམ་པ་ནི།
དེས་མཛད་པའི། །གཞུང་རྣམས་དང་ནི་དེ་ཡི་སློབ་མའི་ཚོགས་དེ་དག་ཀྱང་དུས་མང་ཞིག་ན་ཉམས་པར་གྱུར། །ཅེས་ཀླུ་སྒྲུབ་འདས་ནས་དེས་མཛད་པའི་གཞུང་ཆེན་རྣམས་དང༌། དེའི་ཆོས་རྒྱུན་འཛིན་པའི་སློབ་མའི་ཚོགས་དེ་དག་ཀྱང་དུས་ཡུན་རིང་པོར་ཉམས་སོ་གསུངས་པས། རང་རེ་བོད་རྣམས་ལ་ཟླ་བ་གྲགས་པ་ཀླུ་སྒྲུབ་ཀྱི་དངོས་སློབ་ཏུ་གྲགས་པ་ནི་དོན་ལ་མི་གནས་པར་མ་ཟད་སངས་རྒྱས་བསྐྱངས་དང་ལེགས་ལྡན་འབྱེད་ཀྱང་ཀླུ་སྒྲུབ་ཀྱི་དངོས་སློབ་མིན་པས། དེ་དག་མ་ཕེབས་གོང་དུའང་དབུ་མའི་ཆོས་རྒྱུན་ལ་ཉམས་ཆག་ཡུན་རིང་བྱུང་མྱོང་ཡོད་པར་རྟོགས་སླའོ། །
བུ་སྟོན་ཆོས་འབྱུང་དུ་ལང་ཀར་གཤེགས་པའི་འགྲེལ་བ་དྲངས་པའི་ནང་ནས། དེས་ཀླུ་སྒྲུབ་ལ། དེས་ཨཱརྱ་དེ་བ་ལ། དེས་རཱ་ཧུ་ལ་སྒྲ་གཅན་འཛིན་ལ། དེས་སཾ་གྷཱནྟི་ལ། དེས་དགེ་སློང་སྒྲ་བཅོམ་ལ། དེས་གྷ་ལ་ཤ་ལ། དེས་ཀུ་མཱ་ར་ཏ་ལ། དེས་ཤ་ཡ་ཏ་ལ། དེས་བ་སུ་བནྡྷུ་ལ། དེས་མ་ནོ་ཏ་ལ། དེས་ཧ་ཀ་ལི་ཀ་ན་ཡ་ན་ཤ་ལ། དེས་དགེ་སློང་སེང་གེ་ལ་བསྟན་པ་གཏད་པར་བཤད་དོ་ཞེས་གསུངས་པའི་སློབ་དཔོན་འདི་དག་ཀླུ་སྒྲུབ་ནས་སངས་རྒྱས་བསྐྱངས་ཀྱི་བར་དུ་བྱུང་བའི་བླ་མའི་བརྒྱུད་པ་ཡིན་ནམ་སྙམ་སྟེ་བརྟག་པར་བྱའོ། །དབུ་མའི་འགྲེལ་བ་ག་ལས་འཇིགས་མེད་ཀྱི་མཛད་པ་པོ་དང༌། སངས་རྒྱས་བསྐྱངས་ཀྱི་དབུ་མ་རྩ་བའི་འགྲེལ་པ་བུདྡྷ་པཱ་ལི་ཏ་ལས་ནི་སློབ་དཔོན་འཕགས་པ་ཀླུ་སྒྲུབ་དང༌། སློབ་དཔོན་འཕགས་པ་ལྷ་དང༌། སློབ་དཔོན་སྒྲ་གཅན་འཛིན་བཟང་པོ་དང༌། སློབ་དཔོན་འཕགས་པ་འཇིགས་མེད་བཞིའི་ལུང་འདྲེན་མཛད་པ་ལས་གོང་གི་སློབ་དཔོན་གཞན་རྣམས་མི་གསལ་ལོ། །
གཞན་ཡང་ལེགས་ལྡན་འབྱེད་ཀྱིས་མཛད་པའི་དབུ་མ་སྙིང་པོའི་འགྲེལ་བ་རྟོག་གེ་འབར་བར་ཐེག་པ་ཆེན་པོ་ཉིད་ཀྱི་སློབ་དཔོན་ཐོགས་མེད་དང༌། དབྱིག་གཉེན་ལ་སོགས་པ་གཞན་དག་ནི།
ཞེས་གསུངས་པས་ཀྱང་ལེགས་ལྡན་འབྱེད་ཐོགས་མེད་སྐུ་མཆེད་ཀྱི་རྗེས་སུ་ཕེབས་པར་གྲུབ་པས། ཀླུ་སྒྲུབ་ཀྱི་དངོས་སློབ་མིན་པར་ཐེ་ཚོམ་མེད་དོ། །འོ་ན་ཇོ་བོ་རྗེས། ཀླུ་སྒྲུབ་སློབ་མ་ཟླ་གྲགས་ཡིན། །ཞེས་མ་གསུངས་སམ་ཞེ་ན། སློབ་མ་ཡིན་ན་དངོས་སློབ་ཡིན་པས་མ་ཁྱབ་བོ་ཞེས་ཞུའོ། །
བཞི་པ་ནི།
དེ་ཉིད་ཉི་མ་ནུབ་པས་དེང་སང་གཞུང་ལུགས་གསལ་པོ་དེ་ནི་གང་ནའང་མེད། །ཅེས་པའི་དོན་ནི། སྔར་ཀླུ་སྒྲུབ་ཀྱིས་མཛད་པའི་གཞུང་ལུགས་གསལ་ཞིང་རྒྱས་པ་དེ་དག་ནི་དེང་སང་གང་ནའང་མེད་ཅིང་མི་རྙེད་པར་གསུངས་པས། དཔལ་ལྡན་ཟླ་བས་ཀྱང་གང་ནའང་མ་རྙེད་པའི་ཀླུ་སྒྲུབ་ཀྱི་གཞུང་ལུགས་ཤིན་ཏུ་གསལ་ཞིང་རྒྱས་པ་དག་ཡོད་པར་གསལ་ལོ། མཁས་པ་ལ་ལ་ན་རེ། ཟླ་བ་གྲགས་པ་མ་འཁྲུངས་གོང་གི་ལོ་ཉིས་བརྒྱ་ལྔ་བཅུ་ཙམ་གྱི་སྔོན་དུ་ཕེབས་པའི་པཎྜིཏ་གཞོན་ནུ་སྲོག་གིས་རྒྱ་ཡིག་ཏུ་བསྒྱུར་བའི་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོའི་མན་ངག་ཤླཽཀ་འབུམ་ཡོད་པ་དང༌།
རྒྱ་གར་གྱི་པཎྜིཏ་དྷརྨ་གུཔྟ་འམ་ཆོས་སྦས་ཀྱིས་སྤྱི་ལོ་༥༩༠་ཡི་རྗེས་ཙམ་ལ་བསྒྱུར་བའི་སངས་རྒྱས་ལམ་གྱི་རྒྱན་ནམ་བྱང་ཆུབ་རྒྱུ་ཚོགས་ཀྱི་བསྟན་བཅོས་རང་འགྲེལ་དང་བཅས་པ་ཤླཽཀ་ལྔ་སྟོང་ཅན་དང༌། དེ་བཞིན་པཎྜིཏ་གཞོན་ནུ་སྲོག་གིས་ཀླུ་སྒྲུབ་ཀྱི་རྣམ་ཐར་དུ་མཚན་བྱང་བཀོད་པའི་སྙིང་རྗེ་ཆེན་པོའི་ཐབས་ཀྱི་བསྟན་བཅོས་ཤླཽཀ་ལྔ་སྟོང་ཅན་ལ་སོགས་པ་ནི་ཀླུ་སྒྲུབ་ཀྱིས་མ་མཛད་དེ། དེ་དག་སངས་རྒྱས་བསྐྱངས་དང་ལེགས་ལྡན་འབྱེད་དང་ཟླ་བ་གྲགས་པས་ལུང་འདྲེན་མ་མཛད་པའི་ཕྱིར་གསུངས་པ་ལ་མ་ཁྱབ་པའི་ལན་ཕུལ་ན་འགྲིག་པར་སེམས་སོ། །
·རྩོམ་ཡིག་གོང་མ:དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད།༢
·རྩོམ་ཡིག་འོག་མ:དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༤
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
འབྲེལ་ཡོད་རྩོམ་ཡིག་མི་འདུག
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 7:56:36 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 10:48:16 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 16:00:50 [来自: 112.5.248.229]

འབྲེལ་ཡོད་དཔྱད་བརྗོད 48 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།23.44MS