ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> མི་སྣ།
 རྩོམ་ཡིག་ཀློག་པ།

དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༧

  རྩོམ་པ་པོ:བཞག་སྤྲུལ།ཡོང་ཁུངས:ནང་རིགགཟིགས་གྲངས:7011ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2014/11/19 13:19:56ཚོགས་ཡར་སྤྲོད:admin
༄༅། །དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ཆེན་མོ་ལུང་རིགས་རྒྱ་མཚོའི་གཏེར་མཛོད་ཅེས་བྱ་བ་བཞུགས་སོ། །༧
 
ལི་ཐང་བཞག་པ་སྐྱེ་མིང་འཇམ་དབྱངས་མཁས་གྲུབ་ཀྱིས་བརྩམས།
གཉིས་པ་ཀླུ་སྒྲུབ་ཀྱིས་སློབ་དཔོན་སྒྲ་གཅན་འཛིན་བཟང་པོ་ལས་དགེ་སློང་གི་སྡོམ་པ་ཞུས་པའི་སྐོར་ནི། ཇོ་ནང་ཏཱ་ར་ན་ཐས་ཀྱང་བཤད་ལ། ཀླུ་སྒྲུབ་ཀྱིས་མཛད་པའི་ཤེར་ཕྱིན་མན་ངག་ནའང་སྒྲ་གཅན་འཛིན་བཟང་པོའི་གཞུང་དྲངས་པ་སྔར་བཤད་ཟིན་པ་ལྟར་རོ། ། གླིང་བར་ནས་གསེར་འགྱུར་གྱི་རྩི་བླངས་ཏེ་གསེར་འགྱུར་བྱས་ནས་དགེ་འདུན་གྱི་གདུགས་ཚོད་སྦྱར་ནས་མུ་གེ་ལས་བསྐྱབས་པའི་རྐྱེན་གྱིས། ཀླུ་སྒྲུབ་གནས་ནས་ཕྱུང་ཞིང༌། གཙུག་ལག་ཁང་དང་མཆོད་རྟེན་བྱེ་བ་བཞེངས་དགོས་བྱུང་བར་གསུངས་ཏེ། གཞོན་ནུ་སྲོག་གིས་བསྒྱུར་བའི་རྣམ་ཐར་ལྟར་ན་དགོན་པ་དེར་ཞག་དགུ་བཅུ་ཙམ་ལས་མ་བཞུགས་ལ། དགོན་པ་འདི་དེའི་དུས་ཀྱི་དགོན་པ་ཆེ་ཤོས་ནི་མིན་པར་འདྲ་བས། དུས་གང་ཞིག་གི་ཚེ་དགོན་པ་གང་དུ་དེ་ལྟར་གནང་བ་ཡིན་པར་འཆད་དཀའོ། ། ཡང་དགེ་སློང་བདེ་བྱེད་ཀྱིས་རིག་པའི་རྒྱན་ཞེས་པའི་གཞུང་འབུམ་ཕྲག་བཅུ་གཉིས་པ་བྱས་ནས་ཐམས་ཅད་སུན་ཕྱུང་བ་བྱུང་བས་དེ་གདུལ་བའི་དོན་དུ་ནཱ་ལེནྡྲར་ཆོས་གསུངས་སོ། ཞེས་གསུངས་པར་ཏཱ་ར་ནཱ་ཐས་རྒྱ་གར་ཆོས་འབྱུང་ལས། བོད་ཀྱི་ལོ་རྒྱུས་རྣམས་ལ་དགེ་སློང་བདེ་བྱེད་ཅེས་བྱ་བས་རིག་པའི་རྒྱན་ཞེས་བྱ་བའི་བསྟན་བཅོས་ཐེག་ཆེན་སུན་འབྱིན་བའི་ཕྱིར་བརྩམས་པ་ཤློ་ཀ་འབུམ་ཕྲག་བཅུ་གཉིས་ཡོད་པ་བྱས་ཟེར་བ་སྣང་ཡང་ངག་སྒྲོས་འཕྱུག་པ་སྟེ། ཤློ་ཀ་སྟོང་ཕྲག་བཅུ་གཉིས་ཡིན་པར་རྒྱ་གར་བའི་ལོ་རྒྱུས་ཀྱི་ཡི་གེ་གསུམ་ལས་མཐུན་པར་བྱུང་ངོ། ། ཞེས་དག་བཅོས་གནང་ངོ། །ཏཱ་ར་ནཱ་ཐའི་བཀའ་བབས་བདུན་ལྡན་གྱི་རྣམ་ཐར་ལས་ཀྱང༌། དགེ་སློང་བདེ་བྱེད་ལ་སོགས་པ་ཐེག་པ་ཆེན་པོ་ལ་སྡང་བ་ཐམས་ཅད་རྩོད་པས་སུན་ཕྱུང༌། ལར་ཉན་ཐོས་སེན་དྷ་པས་བརྩམས་པའི་རྟོག་གེ་ཐེག་ཆེན་ལ་རྩོད་པའི་གཞུང་མང་པོ་བྱུང་བ་དེ་དག་གི་དཔེ་ཐམས་ཅད་བསྡུས་ནས་ས་འོག་ཏུ་སྦས་སོ། །ཞེས་གསུངས་ལ། གཞོན་ནུ་སྲོག་གིས་བསྒྱུར་བའི་རྣམ་ཐར་དུའང་དེའི་ཚེ་ཐེག་པ་དམན་པའི་དགེ་སློང་ཞིག་ཡོད་དེ། རྟག་ཏུ་སློབ་དཔོན་ལ་ཁོང་ཁྲོ་ཞིང་ཕྲག་དོག་དང་བཅས་ཏེ་ཡོད་པ་ལ། ཞེས་གསུངས་པས། དེའི་དུས་སུ་ཐེག་ཆེན་ལ་སྡང་ཞིང་རྩོད་པའི་ཉན་ཐོས་སྡེ་པའི་དགེ་སློང་རེ་གཉིས་ཡོད་ཀྱང༌། ཐེག་ཆེན་ལ་དོན་གཉེར་ལྡན་པ་ཤིན་ཏུ་མང་ཞིང༌། དེ་དག་ཀྱང་ལུང་རྟོགས་ཀྱི་ཡོན་ཏན་དང༌། འཆད་རྩོད་རྩོམ་གསུམ་གྱི་ཤེས་རབ་དང༌། འགྲོ་ཕན་གྱི་མཛད་འཕྲིན་ཧ་ཅང་ཆེ་ལ། གང་གིས་ཀྱང་ཟིལ་གྱིས་མི་ནོན་པ་ཤ་སྟག་ཡིན་པས་ན། དེའི་དུས་སུ་ཐེག་པ་ཆེན་པོའི་སྟོན་པ་དང་བསྟན་པ་དང་དེ་ཚུལ་བཞིན་དུ་སྒྲུབ་པའི་དགེ་འདུན་དང་བཅས་པ་ཡང་དག་པའི་རིགས་པའི་ལམ་ནས་སྐྱོན་མེད་ཁོ་ནར་སྒྲུབ་པར་མཛད་པའི་སྐྱེས་བུ་དམ་པ་ཀླུ་སྒྲུབ་ཡབ་སྲས་ལ་སོགས་པ་བྱོན་ནས༌། རང་གཞན་གྱི་སྡེ་པ་བློ་གཟུ་བོར་གནས་པ་ཐམས་ཅད་ཀྱི་གཙུག་གི་རྒྱན་དུ་གྱུར་པ་ཡིན་གྱི། དེ་དུས་སུ་རྫུན་སྒྲིག་བྱས་ནས་གཞན་ལ་བསྟན་མ་ཕོད་པར་ལྐོག་ཏུ་སྦས་ནས་བཞག་པ་དེ་འདྲ་ག་ལ་ཡིན། དེས་ན་དུས་རབས་ཉེར་གཅིག་པའི་མི་རེ་གཉིས་བློ་གྲོས་མཆོག་ཏུ་ཟབ་པས། ལོ་ངོ་ཉིས་སྟོང་ལ་ཉེ་བའི་སྔོན་གྱི་ཉན་ཐོས་ཀྱི་དགེ་སློང་བདེ་བྱེད་ལ་སོགས་པ་ཀླུ་སྒྲུབ་དངོས་སུ་མཇལ་མྱོང་བ་རྣམས་ཀྱིས་ཀྱང་འགོག་མ་ནུས་པའི་ཐེག་ཆེན་དང་གསང་སྔགས་ཀྱི་ཆོས་དེ་དག་གི་རྫུན་ཕུག་བརྟོལ་བར་རློམ་པ་ནི་མུན་སྦྲུལ་ཁོ་ནའོ། །
 ཀླུ་སྒྲུབ་ཀྱིས་མཛད་པའི་བསྟན་བཅོས་ལ་གཞོན་ནུ་སྲོག་གི་རྣམ་ཐར་ལས་བསྟན་བཅོས་ལྔའི་མཚན་དངོས་སུ་བྱུང་ཞིང་དེ་ལ་སོགས་པ་རྒྱ་ཆེར་བརྩམས་པར་གསུངས་པ་དང༌། དཔལ་ལྡན་ཟླ་བས་དབུ་མའི་དོན་སྟོན་པའི་བསྟན་བཅོས་མཚན་དངོས་བཏགས་པ་བརྒྱད་དང་གཞན་དེའི་གསུང་རབ་དབུ་མའི་དོན་ཟབ་སྟོན་པ་གསལ་ཞིང་རྒྱས་དག་ཡོད་ཀྱང༌། ཕྱིས་སུ་རིམ་བཞིན་ཉམས་ནས་གང་དུ་བཙལ་ཡང་མ་རྙེད་པར་གསུངས་པ་དང༌། སྔགས་ཕྱོགས་ཀྱི་གཞུང་མང་པོ་དང༌། བུ་སྟོན་གྱིས་རིགས་ཚོགས་སོ་སོར་བརྩིས་ན་མདོ་ཕྱོགས་བཅུ་གཉིས་དང༌། སྔགས་ཕྱོགས་བདུན་དང༌། དེ་མིན་གསོ་བ་སོགས་ཐ་སྙད་རིག་པ་དང་བསླབ་བྱ་སོགས་ལྔ་བཅས་གསུངས་སོ། ། ཡང་བུ་སྟོན་དང་ཏཱ་ར་ནཱ་ཐ་གཉིས་ཀས་བྱང་སྒྲ་མི་སྙན་དུ་ཕེབས་པར་གསུངས་པ་འདི་དང་གཞོན་ནུ་སྲོག་གི་འགྱུར་ལས་ཁ་བ་ཅན་གྱི་རིར་ཕེབས་པར་གསུངས་པ་གཉིས་ཀ་རྒྱ་གར་གྱི་བྱང་ཕྱོགས་ཡིན་པ་ནི་མཉམ་པས། ཧེ་མ་ལ་ཡའི་རི་རྒྱུད་དང་ཉེ་བའི་ཕྱོགས་སུ་ཕེབས་པ་ཡིན་ནམ་སྙམ་ཏེ། རྒྱ་གར་གྱི་བྱང་ཤར་གྱི་མཚམས་སོགས་སུ་ལྷོ་པའི་རིགས་ཡོད་པ་དེ་དག་ཉེ་དུས་སུའང་ཤིང་གི་ལོ་མའི་གོས་ཙམ་ལ་སྤྱོད་པས། ཀླུ་སྒྲུབ་དུས་སུ་ཧེ་མ་ལ་ཡའི་རི་རྒྱུད་དུ་དེ་འདྲའི་འཚོ་བར་སྤྱོད་མཁན་གྱི་ཡུལ་གྲུ་མང་ཙམ་ཡོད་པའང་སྲིད་དོ་ཞེས་པ་ནི་གང་དྲན་སྨྲས་པའོ། །
ཀླུ་སྒྲུབ་ཀྱིས་ས་དང་པོ་རབ་དགའ་བརྙེས་པའི་ཡུལ་ནི། གཞོན་ནུ་སྲོག་གིས་ཀླུ་ཡུལ་དུ་མི་སྐྱེ་བའི་ཆོས་ལ་བཟོད་པ་གཉིས་པ་ཐོབ་པར་གསུངས་པས་ཀླུ་ཡུལ་ཡིན་ལ། ཏཱ་ར་ནཱ་ཐས་ལྷོ་ཕྱོགས་དཔལ་གྱི་རི་ཡིན་པར་གསུངས་ཏེ། གསུང་ཚུལ་དང་པོ་འཐད་དམ་སྙམ་མོ། །སྐུ་མྱ་ངན་ལས་འདས་པའི་ཡུལ་ནི་ལྷོ་ཕྱོགས་ཀོ་ས་ལའི་གྲོང་ཁྱེར་གྱི་ལྷོ་ཕྱོགས་མི་རིང་བ་ན་གཙུག་ལག་ཁང་དང་མྱ་ངན་མེད་ཀྱིས་བཞེངས་པའི་མཆོད་རྟེན་དང་བཅས་པ་ཡོད་ཅིང་འཕགས་མཆོག་ཀླུ་སྒྲུབ་དང་པོ་དེར་བཞུགས་ཤིང༌། རྗེས་སུ་རྒྱལ་པོས་ཀླུ་སྒྲུབ་ཀྱི་ཆེད་དུ་རྒྱལ་ཁབ་དེའི་ལྷོ་ནུབ་ཏུ་ལེ་དབར་སུམ་བརྒྱ་ཙམ་ན་རི་ནག་པོ་ཞེས་པར་བྲག་ལ་གཙུག་ལག་ཁང་བརྐོས་པར་ལོ་ཆེན་ཞོན་ཙང་གིས་གསུངས་ལ། བུ་སྟོན་དང་ཏཱ་ར་ནཱ་ཐ་གཉིས་ཀས་དཔལ་གྱི་རིར་སྐུ་མྱ་ངན་ལས་འདས་པར་གསུངས་བས། རི་ནག་པོ་དང་དཔལ་གྱི་རི་གཉིས་ཀ་ད་ལྟར་རྒྱ་གར་བ་ལ་नागार्जुनिकोन्दा ནཱ་གཱ་རྫུ་ནི་ཀོནྡཱ་འམ་ཀླུ་སྒྲུབ་རི་བོར་གྲགས་པ༌། རི་བོ་ཕལ་ཆེར་ཆུ་མཛོད་དུ་ནུབ་ཟིན་པ་ཞིག་ཡོད་པ་དེ་ཡིན་ནམ་སྙམ་མོ། ། ཀླུ་སྒྲུབ་ཀྱི་མཚན་འགྲེལ་བ་ལ། གཞོན་ནུ་སྲོག་ནི། སློབ་དཔོན་དེ་ཡུམ་ལས་འཁྲུངས་པ་ན། ལྗོན་ཤིང་ཞིག་གི་འོག་ཏུ་སྐུ་འཁྲུངས་པས་མཚན་ལ་ཨརྫུན་ཞུ། ཨརྫུན་ནི་ལྗོན་ཤིང་ཞིག་གི་མིང་ངོ། །ཀླུ་ལ་བརྟེན་ནས་ལམ་གྲུབ་པས་མཚན་གྱི་ཐོག་མར་ནཱག་སྟེ་ཀླུ་ཞེས་པ་བསྣན་པས་ནཱགཱརྫུན་སྟེ་ཀླུ་ཤིང་ཀླུ་སྒྲུབ་ཅེས་གྲགས་སོ། །ཞེས་གསུངས་པས་བོད་སྐད་དུ་ཐད་བསྒྱུར་བྱེད་ན་ཀླུ་ཤིང་ཞེས་བསྒྱུར་དགོས། རྒྱ་གར་གྱི་སློབ་དཔོན་པྲཛྙཱརུཙི་སྟེ་ཤེས་རབ་གསལ་བས་སྤྱི་ལོ་༥༣༨ནས་༥༤༣་ བར་དུ་ཀླུ་སྒྲུབ་ཀྱིས་མཛད་པའི་དབུ་མའི་ཆ་མཐུན་ཞེས་པའི་བསྟན་བཅོས་འཕགས་པ་ཐོགས་མེད་ཀྱི་འགྲེལ་དང་བཅས་པ་རྒྱ་ནག་སྐད་དུ་བསྒྱུར་བ་ལས་ནི་ཀླུ་ལས་རྒྱལ་ཞེས་བསྒྱུར་རོ། ། ལོ་ཆེན་ཞོན་ཙང་ནི། ཐང་གི་སྐད་དུ་ཀླུ་སྒྲུབ་ཞུ། འགྱུར་རྙིང་དུ་ཀླུ་ཤིང་ཞེས་བསྒྱུར་བ་ནི་དོན་མ་ཡིན་ནོ་ཞེས་གསུངས་ཏེ། ཐད་ཀར་བསྒྱུར་ན་ཀླུ་ལ་བརྟེན་ནས་ནུས་ལྡན་དུ་གྱུར་པའམ་དཔའ་རྒོད་དུ་གྱུར་པའི་དོན་དུ་འགྲེལ་དགོས་པས་ཀླུ་སྒྲུབ་ཏུ་བསྒྱུར་ན་རུང་ངོ། ། བུ་སྟོན་ནི། ཨརྫུ་ན་ནི་སྲིད་སྒྲུབ་སྟེ། ཆོས་ཀྱི་རྒྱལ་སྲིད་སྐྱོང་བ་དང༌། ཉེས་པའི་དགྲ་ཚོགས་འདུལ་བས་སྲིད་སྒྲུབ་སྟེ། བསྡུས་པས་ཀླུ་སྒྲུབ་བོ། །ཞེས་གསུངས་ཏེ་དཔལ་ལྡན་ཟླ་བའི་དབུ་མ་ཚིག་གསལ་ལ་ཁུངས་བཅོལ་བར་མཛད་དེ། རང་རེ་བོད་ཀྱི་ལོ་ཙཱ་བ་རྣམས་ནས་ཀླུ་སྒྲུབ་ཅེས་བསྒྱུར་བ་ནི་ཤིན་ཏུ་ལེགས་ཀྱང་དབུ་མ་ཚིག་གསལ་ཁུངས་སུ་འགྲོའམ་བརྟག་པར་རིགས་སོ། ། དེ་ཡང་སྤྱི་ལོ་༡༩༠༢ནས་༡༩༨༠བར་དུ་ཕེབས་པའི་རྒྱའི་ཧུ་པེ་ཞིང་ཆེན་དུ་འཁྲུངས་ཤིང༌། ༡༩༢༠ལོར་རི་བོ་རྩེ་ལྔར་རབ་ཏུ་བྱུང་ནས། ༡༩༢༥་ལོར་བོད་ཡིག་སྦྱངས་ནས་རིམ་བཞིན་བོད་དུ་ཕེབས་ཏེ་སེ་ར་ཐེག་ཆེན་གླིང་དུ་གཞུང་ཆེན་ཀ་པོད་ལྔ་ལ་གསན་བསམ་མཐར་ཕྱིན་ནས། སླར་རྒྱ་ནག་ཏུ་ཕེབས་ནས་རྗེ་བླ་མའི་ལེགས་བཤད་ལམ་རིམ་ཆེན་མོ་དང༌། }གས་རིམ་ཆེན་མོ་དང༌། དབུ་མ་དགོངས་པ་རབ་གསལ་དང༌། དྲང་ངེས། དང༌། གསང་འདུས་རིམ་ལྔའི་ཊཱིཀ་ཆེན་སོགས་ཆོས་ཚན་རྒྱས་བསྡུས་མང་པོ་ཡོད་པའི་གསུང་འབུམ་པོད་ལྔ་ཙམ། དག་གསལ་སྙན་གསུམ་གྱིས་རྒྱ་ཡིག་ཏུ་བསྒྱུར་བས། ངེས་པ་དོན་གྱི་མཁས་པ་ཆེན་པོ་འགྲན་པའི་ཟླ་དང་བྲལ་བར་གྱུར་པ། ལོ་ཙཱ་བ་ཆེན་པོ་ཆོས་འཕགས་ཞུ་བ་དེས་ཀྱང༌། རྒྱ་ཡིག་ཐོག་ཏུ་ལོ་ཆེན་ཞོན་ཙང་གི་ཐ་སྙད་ལྟར་མཛད་དོ། །
སྨྲས་པ།
མཁ༵ས་པ་བུ་ཡི་ཆོས་འབྱུང་ལས་བྱུང་བའི། །
མཁ༵ས་མཆོག་ཀླུ་སྒྲུབ་རྣམ་ཐར་མདོར་བསྡུས་འདི། །
མཁ༵ས་མང་རྒྱ་འགྲེལ་ལ་བརྟེན་བགྱིས་པས་ན། །
མཁ༵ས་རྣམས་ཁུངས་གཏུགས་འདི་ལ་བྱས་ཏེ་སྨྲ། །
ཞེས་པ་ནི་བར་སྐབས་ཀྱི་ངལ་གསོ་བའི་ཚིགས་སུ་བཅད་པའོ། །
བདུན་པ། ཇོ་ནང་གི་སློབ་དཔོན་ཏཱ་ར་ནཱ་ཐའི་གསུང་ལས་ཇི་ལྟར་བྱུང་བ་ལ་གཉིས་ལས། དང་པོ་རྒྱ་གར་ཆོས་འབྱུང་སོགས་ལས་ཇི་ལྟར་བྱུང་བ་ནི། སྤྱི་ལོ་༡༥༧༥ནས་༡༦༣༤་ཇོ་ནང་གི་སློབ་དཔོན་ཏཱ་ར་ནཱ་ཐས་མཛད་པའི་རྒྱ་གར་ཆོས་འབྱུང་ལས་དཔལ་མགོན་འཕགས་མཆོག་ཀླུ་སྒྲུབ་ཀྱི་རྣམ་ཐར་གྱི་སྐབས་སུ་འདི་ལྟར་གསུངས་ཏེ།དེའི་འོག་ཏུ་སློབ་དཔོན་ཀླུ་སྒྲུབ་ཀྱིས་བསྟན་པ་བསྐྱངས་ཏེ། དབུ་མའི་ཚུལ་ལུགས་ལྷག་པར་དར་བར་མཛད། ཉན་ཐོས་པ་རྣམས་ལ་ཡང་ཕན་ཆེར་བཏགས། ཁྱད་པར་དགེ་སློང་དང་དགེ་ཚུལ་བསླབ་པ་འཆལ་བ་མང་པོ་དགེ་འདུན་གྱི་ནང་ན་དབང་ཆེན་པོར་ཡོད་པ་ཐམས་ཅད་གནས་ནས་བསྐྲད་དེ་སྟོང་ཕྲག་བརྒྱད་ཙམ་བྱུང་བར་གྲགས་ལ། སྡེ་པ་ཀུན་གྱི་བདག་པོ་མཛད། དེ་ཙམ་ན་བཙུན་པ་དགའ་བོ་དང༌། བཙུན་པ་དམ་པའི་སྡེ་དང༌། བཙུན་པ་ཡང་དག་བདེན་གསུམ་གྱིས་རྣལ་འབྱོར་སྤྱོད་པ་སེམས་ཙམ་གྱི་སྲོལ་བཟུང་ཞིང་བསྟན་བཅོས་ཀྱང་ཅི་རིགས་པར་བྱས་སོ། མངོན་པར་ཀུན་གཞི་བཤད་པའི་སྐབས་སུ་བཙུན་པ་འདི་གསུམ་ལ་སྔོན་གྱི་རྣལ་འབྱོར་སྤྱོད་པ་བ་ཞེས་ཟེར་བའི་རྒྱུ་མཚན་ཡང་ཐོགས་མེད་སྐུ་མཆེད་ལ་ཕྱིས་ཀྱི་རྣལ་འབྱོར་སྤྱོད་པ་པར་འཇོག་པས་དེའི་རྗེས་འབྲང་མ་ཡིན་པ་གསལ་བར་སྟོན་པའི་ཚིག་གོ ། དེ་ལ་སློབ་དཔོན་ཀླུ་སྒྲུབ་ཀྱིས་དཔལ་ནཱ་ལེནྡྲར་ཐེག་པ་ཆེན་པོའི་ཆོས་སྨྲ་བ་ལྔ་བརྒྱ་ལ་ལོ་མང་པོའི་བར་དུ་གསེར་འགྱུར་རྩིའི་སྦྱོར་བ་ལ་བརྟེན་ཏེ་འཚོ་བ་སྦྱར། དེ་ནས་ལྷ་མོ་ཙཎྜི་ཀཱ་བསྒྲུབས་ཏེ། ནམ་ཞིག་ན་ལྷ་མོ་དེས་སློབ་དཔོན་ནམ་མཁའ་ལ་ཁྱེར་ཏེ་ལྷའི་གནས་སུ་འཁྲིད་པར་བརྩམས་པ་ན། ང་ལྷ་གནས་སུ་འགྲོ་བ་དོན་དུ་གཉེར་བ་མ་ཡིན། བསྟན་པ་ནམ་གནས་ཀྱི་བར་དུ་ཐེག་པ་ཆེན་པོའི་དགེ་འདུན་རྣམས་ལ་འཚོ་བ་སྦྱོར་བའི་དོན་དུ་ཁྱེད་བསྒྲུབས་སོ། ཞེས་གསུངས་པས་དེས་ནཱ་ལེནྡྲ་དང་ཉེ་བའི་ནུབ་ཕྱོགས་རྗེ་རིགས་མ་བཟང་མོའི་ཚུལ་དུ་སྤྲུལ་ནས་འདུག་ལ། སློབ་དཔོན་གྱིས་འཇམ་དཔལ་གྱི་ལྷ་ཁང་རྡོ་ལས་གྲུབ་པ་ཤིན་ཏུ་མཐོ་བའི་ངོས་ཆེན་པོར་སེང་ལྡེང་གི་ཕུར་བུ་ཆེན་པོ་མིས་ཐེག་ཚད་གཅིག་བཏབ་སྟེ། འདི་ཐལ་བར་གྱུར་གྱི་བར་དུ་ཁྱེད་ཀྱིས་དགེ་འདུན་ལ་འཚོ་བ་སྦྱོར་ཞིག་ཅེས་བསྒོས་པས། ལོ་བཅུ་གཉིས་ཀྱི་བར་དུ་དགེ་འདུན་ལ་ཡོ་བྱད་ཐམས་ཅད་ཀྱིས་མཆོད་པར་བྱེད་པ་ཞིག་བྱུང་བ་ལས། མཐར་ཞལ་ཏ་བ་དགེ་ཚུལ་མ་རུང་པས་དེ་ལ་འདོད་པའི་དུས་བཏབ་ཡང་ཡང་བྱས་ཀྱང༌། དེ་ཅང་མི་སྨྲ་བ་ལས། ལན་ཅིག་ན་སེང་ལྡེང་གི་ཕུར་བུ་དེ་ཐལ་བར་སོང་བ་ན་འདུ་བར་བྱའོ་ཟེར་བས། དགེ་ཚུལ་ངན་པ་དེས་སེང་ལྡེང་གི་ཕུར་བུ་མེས་བསྲེགས་ཏེ་ཐལ་བར་བྱས་པ་ན་ལྷ་མོ་དེ་ཉིད་དུ་མི་སྣང་བར་གྱུར་ཏོ། དེ་ནས་སློབ་དཔོན་གྱིས་དེའི་དོད་དུ། ལྷ་ཁང་བརྒྱ་རྩ་བརྒྱད་དུ་ཐེག་པ་ཆེན་པོའི་ཆོས་གཞི་བརྒྱ་རྩ་བརྒྱད་བཙུགས། དེར་ནག་པོ་ཆེན་པོའི་སྐུ་རེ་བཞེངས། བསྟན་པ་བསྲུང་བའི་གཉེར་གཏད་དོ། །གཞན་ཡང་རྡོ་རྗེ་གདན་གྱི་བྱང་ཆུབ་ཤིང་ལ་གླང་པོ་ཆེའི་གནོད་པ་བྱུང་བའི་སྐབས་ཤིག བྱང་ཆུབ་ཤིང་གི་རྒྱབ་ཏུ་རྡོ་རིང་གཉིས་བྱས་པས་ལོ་མང་པོར་མ་བྱུང༌། ཡང་གནོད་པ་བྱུང་བ་ལ་རྡོ་རིང་གི་སྟེང་དུ་ནག་པོ་ཆེན་པོ་སེང་གེ་ལ་ཆིབས་པ་བེ་ཅོན་ཐོགས་པ་རེ་བཞེངས་པས་ལོ་མང་པོར་ཕན་པར་བྱུང༌། ཡང་གནོད་པ་བྱུང་བས་མཐའ་རྡོའི་དྲ་མིག་གིས་བསྐོར། ཕྱི་རོལ་ཏུ་མཆོད་རྟེན་ལྷ་ཅན་བརྒྱ་རྩ་བརྒྱད་བཞེངས། དཔལ་ལྡན་འབྲས་སྤུངས་ཀྱི་མཆོད་རྟེན་ལ་ལྕགས་རི་བཏབ་ཅིང༌། ལྕགས་རིའི་ནང་དུ་ལྷ་ཁང་བརྒྱ་རྩ་བྱས། རྡོ་རྗེ་གདན་གྱི་ཤར་ངོས་ལ་ཆུའི་གནོད་པ་ཆེན་པོ་བྱུང་བའི་ཚེ། ཕ་བོང་བདུན་ལ་ཐུབ་པའི་སྐུ་བརྙན་ཆེན་པོ་བརྐོས་པ་ཞལ་ཕྱིར་བསྟན་ཏེ་ཆུུ་རགས་ཀྱི་ཚུལ་དུ་བྱས་པས། ཆུའི་གནོད་པ་བཟློག་ཆུ་ལོན་གྱི་ཐུབ་པ་བདུན་ཞེས་གྲགས། ཆུ་ལོན་ནི་ཆུ་རགས་ཀྱི་མིང་ཡིན་པས། ཆུ་ནང་དུ་གཟུགས་བརྙན་ཤར་བ་ལ་འདྲ་ལེན་བྱས་པ་ཡིན་ཟེར་བ་ལ་ནི་མུན་སྤྲུལ་ཡིན་ཞིང༌། དེ་ཉིད་རྒྱལ་པོ་ཨུ་ཏྲ་ཡ་ན་བཏུལ་བའི་དུས་བྱུང་ཟེར་བ་ནི་འདུལ་བ་ལུང་དང་དངོས་སུ་འགལ་བས། དེ་གཉིས་ཀར་ཡང་རང་གི་དེ་ཉིད་གསལ་བར་སྟོན་པའོ། །འདི་དག་དང་དུས་མཚུངས་པར་ཨུ་ཊི་བི་ཤིའི་ཡུལ་དུ་རྒྱལ་པོ་མུཉྫ་འཁོར་སྟོང་དང་བཅས་པ་རིག་པ་འཛིན་པའི་ལུས་གྲུབ་པ་དང༌། ནུབ་ཕྱོགས་མ་ལ་ཝའི་ཕྱོགས་གཅིག་ཌོ་ཌྷ་ཧ་རི་ཞེས་བྱ་བར་རྒྱལ་པོ་བྷོ་ཛི་དེ་བ་འཁོར་སྟོང་དང་བཅས་པ་མི་སྣང་བར་གྱུར་པ་ལ་སོགས་པ་སྔགས་ཀྱི་ལམ་དུ་ཞུགས་པ་ཐམས་ཅད་ལ་དངོས་གྲུབ་མ་ཐོབ་པ་གཅིག་ཀྱང་མེད་དོ། དེའི་ཚེ་འཕགས་པས་གཟུངས་མང་པོ་དང་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་སྤྱན་དྲངས་པས་ཉན་ཐོས་རྣམས་ཀླུ་སྒྲུབ་ཀྱིས་བརྩམས་སོ་ཟེར་རོ། །དེ་ཕྱིན་ནས་ཐེག་ཆེན་གྱི་མདོ་སྡེ་གསར་དུ་བྱོན་པ་མེད་དོ། །ཉན་ཐོས་དངོས་སྨྲ་བ་རྣམས་ཀྱི་རྩོད་པ་བཟློག་པའི་ཕྱིར་རིག་པའི་ཚོགས་ལྔ་ལ་སོགས་པ་མཛད། བོད་ཀྱི་ལོ་རྒྱུས་རྣམས་ལ་དགེ་སློང་བདེ་བྱེད་ཅེས་བྱ་བས་རིག་པའི་རྒྱན་ཞེས་བྱ་བའི་བསྟན་བཅོས་ཐེག་ཆེན་སུན་འབྱིན་བའི་ཕྱིར་བརྩམས་པ་ཤློ་ཀ་འབུམ་ཕྲག་བཅུ་གཉིས་ཡོད་པ་བྱས་ཟེར་བ་སྣང་ཡང་ངག་སྒྲོས་འཆུག་པ་སྟེ། ཤློ་ཀ་སྟོང་ཕྲག་བཅུ་གཉིས་ཡིན་པར་རྒྱ་གར་བའི་ལོ་རྒྱུས་ཀྱི་ཡི་གེ་གསུམ་ལས་མཐུན་པར་འབྱུང་ངོ། །
ཤར་ཕྱོགས་པ་ཊ་བེ་ས་ཏེ་པུཀྐཾ་གི་ཡུལ་དང༌། ཨོ་ཌི་བི་ཤ་དང༌། བྷངྒ་ལ། ར་ངྷའི་ཡུལ་རྣམས་སུ་ཡང་ལྷ་ཁང་མང་དུ་བཞེངས། དེའི་ཚེ་མ་ག་དྷར་བྲམ་ཟེ་སུ་བིཥྞུ་ཞེས་བྱ་བའི་དཔལ་ནཱ་ལེནྡྲའི་གནས་སུ་ལྷ་ཁང་བརྒྱ་རྩ་བརྒྱད་བཞེངས། ཐེག་པ་ཆེ་ཆུང་གི་ཆོས་མངོན་པ་མི་ནུབ་པའི་ཕྱིར་མ་མོ་འཛིན་པ་བརྒྱ་རྩ་བརྒྱད་ཀྱི་ཆོས་གཞི་བྱས། འཕགས་པ་ཀླུ་སྒྲུབ་སྐུ་ཚེའི་སྨད་ལ་ལྷོ་ཕྱོགས་ཀྱི་རྒྱུན་དུ་བྱོན་ཏེ། རྒྱལ་བོ་བདེ་བྱེད་བཏུལ། ལོ་མང་དུ་བསྟན་པ་བསྐྱངས། ལྷོ་ཕྱོགས་དྲྭ་བ་ལིའི་ཡུལ་དུ་བྲམ་ཟེ་མ་ངྷུ་དང༌། སུ་པྲ་མ་ངྷུ་ཞེས་བྱ་བ་ལོངས་སྤྱོད་བསམ་གྱིས་མི་ཁྱབ་པ་དང་ལྡན་པ་ཡོད་དེ། དེ་གཉིས་དང་སློབ་དཔོན་གྱིས་བྲམ་ཟེའི་ཆོས་ལ་རིག་པ་འགྲན་བས་རིག་བྱེད་བཞི་དང༌། རིག་པའི་གནས་བཅོ་བརྒྱད་སོགས་སློབ་དཔོན་གྱི་མཁྱེན་པའི་བརྒྱའི་ཆར་ཡང་བྲམ་ཟེས་མ་སླེབ། བྲམ་ཟེ་གཉིས་ན་རེ། བྲམ་ཟེའི་བུ་རིག་བྱེད་གསུམ་དང་ལྡན་པ་བསྟན་བཅོས་ཀུན་གྱི་མཐར་ཕྱིན་པ་ལ་ཤཱཀྱའི་དགེ་སྦྱོང་བྱེད་པ་ཅི་ཡིན་དྲིས་པ་ན། རིག་བྱེད་ཀྱི་བསྔགས་པ་མ་ཡིན་པ་དང་ཆོས་ཀྱི་བསྔགས་པ་དག་བརྗོད་པས་ལྷག་པར་དད་དེ་ཐེག་པ་ཆེན་པོ་མཆོད་པར་བྱས་ནས། སློབ་དཔོན་གྱིས་དེ་ལ་རིག་སྔགས་བྱིན་པས་དང་པོས་ནི་དབྱངས་ཅན་མ་གྲུབ་ལ། ཕྱི་མས་ནི་ནོར་རྒྱུན་མ་གྲུབ་བོ། །དེ་གཉིས་ཀས་ཀྱང་ཐེག་པ་ཆེན་པོའི་ཆོས་སྨྲ་བ་པོ་ཉིས་བརྒྱ་ལྔ་བཅུ་རེ་མཆོད་པར་བྱས་ཤིང༌། དང་པོས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་འབུམ་པ་ཡང་ཉིན་ཞག་གཅིག་གམ་གཉིས་སམ་གསུམ་ལ་སོགས་པས་འབྲི་བར་བྱེད་དོ། །དེའི་ཕྱིར་དགེ་སློང་རྣམས་ལ་གླེགས་བམ་མང་དུ་སྟེར་རོ། །གཉིས་པས་ནི་ཡོ་བྱད་ཐམས་ཅད་ཀྱིས་མཆོད་པར་བྱས་སོ། །དེ་ནས་སློབ་དཔོན་འདིས་ནི་ཉན་བཤད་དང་སྒོམ་པ་དང་ལྷ་ཁང་བཞེངས་པ་དང་དགེ་འདུན་ལ་འཚོ་བ་སྦྱར་བ་དང་མི་མ་ཡིན་གྱི་དོན་མཛད་པ་དང༌། མུ་སྟེགས་ཀྱི་རྒོལ་བ་བཟློག་པ་ལ་སོགས་པ་སྒོ་ཐམས་ཅད་ནས་དམ་པའི་ཆོས་བསྐྱངས་བས་ཐེག་པ་ཆེན་པོའི་བསྟན་པ་ལ་བཀའ་དྲིན་ཟླ་མེད་པར་བྱས་པ་ཡིན་ནོ། །བྲམ་ཟེ་ཆེན་པོ་དང༌། འཕགས་པ་ཀླུ་སྒྲུབ་ཀྱི་རྣམ་ཐར་དངོས་ནི་བཀའ་བབས་བདུན་ལྡན་གྱི་བརྒྱུད་པའི་རྣམ་ཐར་རིན་པོ་ཆེའི་འབྱུང་གནས་ལྟ་བུའི་གཏམ་དུ་བཤད་ཟིན་པས་དེར་ཤེས་པར་བྱའོ། །རྒྱལ་པོ་བདེ་བྱེད་ཀྱིས་ཀྱང་ལོ་བརྒྱ་དང་ལྔ་བཅུ་ཙམ་ཐུབ་ཅིང༌། སློབ་དཔོན་འདིས་ལོ་དྲུག་བརྒྱ་ལས་བདུན་ཅུ་དོན་གཅིག་མ་ཚང་བར་འདོད་པ་དང༌། ཉེར་དགུ་མ་ཚང་བར་འདོད་པའི་ལུགས་གཉིས་སྣང༌། དང་པོའི་དབང་དུ་བྱས་ནས་ལོ་ཉིས་བརྒྱ་ཡུལ་དབུས་དང༌། ཉིས་བརྒྱ་ལྷོ་ཕྱོགས་དང༌། བརྒྱ་དང་ཉི་ཤུ་རྩ་དགུ་དཔལ་གྱི་རི་ལ་བཞུགས་ཞེས་གྲགས་པ་རགས་རྩིས་སུ་སྣང་ཞིང༌། གང་ལྟར་ལོ་ཕྱེད་ལོར་བརྩིས་པ་ཡིན་ཞེས་ཁོ་བོའི་བླ་མ་པནྚི་ཏ་རྣམས་གསུང༌། ཕྱི་མ་ལྟར་ནའང་གཞན་འདྲ་བ་ལས་བརྒྱ་དང་བདུན་ཅུ་རྩ་གཅིག་དཔལ་གྱི་རིར་བཞུགས་ཞེས་ཟེར་རོ། །བཅུད་ལེན་གྲུབ་པ་ནས་པགས་པའི་ཁ་དོག་ནོར་བུའི་མདོག་ལྟ་བུར་གྱུར།དཔལ་གྱི་རིར་བསྒོམས་པས་ས་དང་པོ་བརྙེས་ཏེ་སྐུ་ལ་མཚན་སོ་གཉྀས་ཀྱིས་བརྒྱན་པར་གྱུར་ཏོ། །སློབ་དཔོན་འདི་ཉིད་ཀྱི་གྲོགས་པོ་སློབ་དཔོན་བྲམ་ཟེ་མཆོག་སྲེད་ཅེས་བྱ་བ་རྒྱལ་པོ་བདེ་བྱེད་ཀྱི་མདུན་ན་འདོན་དུ་གནས་སོ། །དེའི་ཚེ་རྒྱལ་པོའི་བཙུན་མོ་ཐ་ཆུང་ཞིག་གིས་སྒྲའི་གནས་ཅུང་ཟད་ཤེས་ལ་རྒྱལ་པོས་ནི་མི་ཤེས་སོ། །སྐྱེད་མོས་ཚལ་དུ་ཆུ་ལ་རྩེ་བའི་ཚེ་རྒྱལ་པོས་དེ་ལ་ཆུ་གཏོར་བས། དེས་མ་མོད་ཀཱ་སིཉྩ་ཞེས་བོད་སྐད་དུ་བདག་ལ་ཆུ་མ་འཐོར་ཞེས་པའོ། །རྒྱལ་པོས་ལྷོ་ཕྱོགས་ཀྱི་ཡུལ་སྐད་དང་སྦྱར་བས་བལ་སྲན་གྱི་ཁུར་བ་ཏིལ་མར་གྱིས་བཅོས་པ་བྱིན་ཅིག་པར་གོ་ནས། དེ་ཕྱིན་པས་བཙུན་མོ་དེ་རྒྱལ་པོ་བ་ལང་ལྟ་བུ་དང་ལྷན་ཅིག་ཏུ་གནས་པ་ལས་ཤི་བའང་སླའོ་སྙམ་སྟེ་ལྕེབ་པར་བརྩམས་པ་ལས། རྒྱལ་པོས་བཟུང་ནས་སྒྲ་སློབ་པར་བྱས་ཏེ་བྲམ་ཟེ་མཆོག་སྲེད་ལས་ལེགས་པར་བསླབས་སོ། །འོན་ཀྱང་ཅུང་ཟད་མ་རྫོགས་ནས་སློན་དཔོན་སཔྟ་ཝརྨ་ལས་བླངས་པ་ཡིན་ནོ། །དེ་ལ་སློབ་དཔོན་མཆོག་སྲེད་ཀྱི་ལོ་རྒྱུས་ནི། སངས་རྒྱས་ཀྱི་བསྟན་པ་ལ་མངོན་པར་དད་པའི་བྲམ་ཟེ་ལས་དྲུག་པ་བརྩོན་པ་འཕགས་པ་ཀླུ་སྒྲུབ་ནཱ་ལེནྡྲའི་མཁན་པོ་མཛད་པའི་ཚེ་མཛའ་བཤེས་སུ་གྱུར་པ་ཞིག་མ་ག་ངྷའི་ཤར་ཕྱོགས་ར་རའི་ཡུལ་ན་ཡོད་པ་ལས། དེས་ལོ་བཅུ་གཉིས་སུ་འཕགས་པ་སྤྱན་རས་གཟིགས་ཀྱི་སྔགས་བཟླས་ཤིང༌། མཐར་གསེར་འབུམ་ཕྲག་བཞིའི་ཡོ་བྱད་སྦྱིན་སྲེག་ཏུ་ཕུལ་བས་འཕགས་པ་སྤྱན་རས་གཟིགས་ཞལ་མངོན་སུམ་དུ་བསྟན་ནས་ཁྱོད་ཅི་འདོད་གསུངས་པ་ལ། བདག་གྲུབ་པ་ཆེན་པོ་བརྒྱད་ཀྱིས་སེམས་ཅན་གྱི་དོན་བྱ་འདོད་བས་ནག་པོ་ཆེ་པོ་མངག་གཞུག་ཏུ་འཚལ་ཞུས་པས་དེ་བཞིན་དུ་གནང་ནས། དེ་ཕྱིན་ཆད་རིག་སྔགས་ཐམས་ཅད་ཇི་ལྟར་འདོད་པར་གྲུབ་ཅིང༌། རི་ལུ་ལ་སོགས་པ་གྲུབ་པ་བརྒྱད་པོ་སྟོང་ཕྲག་རེ་རེས་སེམས་ཅན་རྣམས་ལ་ཕན་བཏགས་སོ། །གྲུབ་པ་ཐོབ་པ་སྟོང་ཕྲག་བརྒྱད་པོ་དེ་དག་ཀྱང་ཁོང་ལ་བླ་མར་འཛིན། རིག་པ་མཐའ་དག་ཀྱང་མ་བསླབས་པར་རང་ཤེས་སོ། །དེ་ནས་ནུབ་ཕྱོགས་ཀྱི་ཡུལ་དུ་སོང་ནས་རྒྱལ་པོ་སནྟི་ཝ་ཧ་ན་ཞེས་བྱ་བ་ལོངས་སྤྱོད་ཆེན་པོ་དང་ལྡན་པའི་ཡུལ་དུ་གནས་སོ། ། ༼འཕྲོ་མུ་མཐུད་འགོད་རྒྱུ།
·རྩོམ་ཡིག་གོང་མ:དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༦
·རྩོམ་ཡིག་འོག་མ:དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་་ལུང་རིགས་གཏེར་མཛོད།༨
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·རྗེ་ལམ་རིམ་པའི་རྣམ་ཐར་མདོར་བསྡུས། 2015/7/12 14:59:21
·འཕགས་པ་ཐོགས་མེད་ཀྱི་རྣམ་ཐར་སྔོན་མེད་ལེགས་བཤད་དགའ་སྟོན། 2015/6/24 11:31:41
·དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་་ལུང་རིགས་གཏེར་མཛོད།༨ 2014/11/19 13:34:06
·དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༥ 2014/11/12 20:48:06
·དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་ལུང་རིགས་གཏེར་མཛོད་༤ 2014/11/12 20:37:16
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 7:12:18 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 9:53:27 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 14:41:19 [来自: 112.5.248.229]

འབྲེལ་ཡོད་དཔྱད་བརྗོད 47 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།23.44MS