ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> འཕྲུལ་གྱི་རྒྱང་ཤེལ། >> དཔྱད་བརྗོད།
  གསར་འགྱུར་ཀློག་པ།

ཤའི་ཁ་ཟས་གནང་བཀག་གི་བསླབ་བྱ་བླང་དོར་གསལ་བའི་མེ་ལོང་།

[རྩོམ་པ་པོ:མཁན་ཚུལ་བློ།  ཡོང་ཁུངས:མཚོ་སྔོན་པོ་དྲ་བ།  དུས་ཚོད:2014/6/3 10:05:28  བཀླགས་ཐེངས:1061][ཡིག་གཟུགས:ཡིག་གཟུགས་མདོག]
ཤའི་ཁ་ཟས་གནང་བཀག་གི་བསླབ་བྱ་བླང་དོར་གསལ་བའི་མེ་ལོང་། 
 
ན་མོ་གུ་རུ་མཉྫུ་ཤྲི་ཡེ།
ཟླ་ཤེལ་རི་ཚོམ་དངར་བའི་འཇིག་རྟེན་གྱི། །
གདུང་ལྡན་འགྲོ་བའི་རྩ་ལག་སྙིང་རྗེའི་གཏེར། །
གསང་གསུམ་སྒྱུ་འཕྲུལ་རོལ་མོས་ཕན་བདེའི་དཔྱིད། །
སྩོལ་མཛད་ཕྱག་ན་པད་མོར་གུས་ཕྱག་འཚལ། །
     ཞེས་མཆོད་པར་བརྗོད་དེ། འདིར་སྟོན་པ་བདེ་བར་གཤེགས་པའི་གསུང་རབ་འདུལ་བ་དང་། མདོ་སྡེའི་སྡེ་སྣོད་དག་ལས། རབ་ཏུ་བྱུང་བ་དང་བྱང་ཆུབ་སེམས་དཔའ་རྣམས་ལ་ཤ་བཟའ་བ་གནང་བཀག་གི་བསླབ་བྱ་ཇི་ལྟར་གསུངས་པ་དང་། དེའི་དགོངས་པ་ཇི་ལྟར་བཀྲལ་བའི་ཚུལ་མདོ་ཙམ་བརྗོད་པ་ལ། དེང་གི་དུས་སུ་འཛམ་གླིང་ལྷོ་རྒྱུད་ན་གནས་པའི་ཉན་ཐོས་སྡེ་བ་དག་ཤ་བཟའ་བ་ཙམ་ལ་དགག་པ་མི་བྱེད་པར་སྣང་སྟེ། ཉན་ཐོས་ཀྱི་འདུལ་བའི་སྡེ་སྣོད་ལས་ཇི་སྐད་གསུངས་པ་བཞིན་དུ་ཕྱག་ལེན་མཛད་པར་ཟད་དོ། །མ་ཧཱ་ཙི་ན་པ་དག་ནི་ཐེག་པ་ཆེན་པོའི་སྡེ་སྣོད་ལས་གསུངས་པ་བཞིན་དུ་སྔར་ནས་ཤའི་ཁ་ཟས་མི་བསྟེན་པ་ལ་གཙིགས་ཆེན་བྱེད་ཅིང་། ད་ལྟའི་བར་དུ་སྲོལ་དེ་ཉིད་རྒྱུན་མ་ཆད་པར་ཡོད་དེ་ཡི་རང་པའི་གནས་སོ། །རང་རེའི་ཡུལ་ཕལ་མོ་ཆེར་རྐྱེན་དབང་གིས་བཏང་སྙོམས་ལྟ་བུར་སྣང་། ཁ་ཅིག་བོད་དུ་གསང་སྔགས་དར་བས་ལན་ནོ་སྙམ་དུ་སེམས་ཀྱང་གསང་སྔགས་ཀྱི་དམ་ཚིག་གི་རྫས་དང་ཤའི་ཁ་ཟས་ཕལ་བ་ལ་འབྲེལ་བ་ཅི་ཡང་མེད་དེ་འཆད་པར་འགྱུར་རོ། །དེས་ན་བྱང་སེམས་བདག་ཉིད་ཆེན་པོ་རྣམས་དང་། གྲུབ་པའི་དབང་ཕྱུག་རྟོགས་ཚད་མཐོན་པོར་ཕྱིན་པ་དག་ལ་དགག་བྱ་མེད་པར་མ་ཟད་གདུལ་བྱ་འདུལ་བའི་ཐབས་མཁས་ཀྱི་མཛད་སྤྱོད་ལ་ཚད་གཟུང་དུ་མེད་ཀྱང་། སྐྱེ་བོ་ཕལ་བ་བླང་དོར་ཅུང་ཟད་རེ་བགྱིད་པར་འདོད་པ་ག་ལ།ཐོག་མར་གནང་བཀག་གི་མཚམས་ཤེས་པ་གལ་ཆེ་བས་དེ་འཆད་པ་ལ་གཉིས་ཏེ། ཐེག་དམན་འདུལ་བའི་སྡེ་སྣོད་ལས་གསུངས་ཚུལ་དང་། ཐེག་ཆེན་བྱང་ཆུབ་སེམས་དཔའི་སྡེ་སྣོད་ལས་ཇི་ལྟར་གསུངས་ཚུལ་ལོ། །དང་པོ་ལ་གཉིས་ཏེ། བཀའ་ལས་ཇི་ལྟར་གསུངས་ཚུལ་དང་། དེའི་དགོངས་འགྲེལ་ལས་ཇི་ལྟར་གསུངས་ཚུལ་ལོ། །དང་པོ་ནི། ལུང་སྨན་གྱི་གཞི་ལས། སངས་རྒྱས་བཅོམ་ལྡན་འདས་ཡངས་པ་ཅན་གྱི་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་གནས་ན་བཞུགས་སོ། །ཡངས་པ་ཅན་ན་སྡེ་དཔོན་སེངྒེ་ཞེས་བྱ་བ་ཞིག་གནས་ཏེ། དེའི་ཉེ་འཁོར་ན་གནས་པ་རྣམས་ཀྱིས་དེའི་ཆེད་དུ་ཤ་ཁྱེར་ཏེ་འོངས་ནས་དེ་ཡང་ཟ་བར་བྱེད་དོ། །གང་གི་ཚེ་དེས་བཅོམ་ལྡན་འདས་ལས་བདེན་པ་མཐོང་བ་དེའི་ཚེ་མི་ཟ་བས་ཁྱེར་ཏེ་འོངས་ནས་ཡང་དགེ་སློང་རྣམས་ལ་སྦྱིན་པར་བྱེད་དོ། །དགེ་སློང་རྣམས་ཀྱིས་ཀྱང་དེ་དག་ཟོས་པ་དང་མུ་སྟེགས་ཅན་རྣམས་སྨོད་པར་བྱེད་། གཞོགས་འཕྱས་བྱེད་། ཁ་ཟེར་བར་བྱེད་དེ། ཤེས་ལྡན་དག་སྡེ་དཔོན་སེང་གེའི་ཆེད་དུ་བྱས་ཏེ་ཤ་ཁྱེར་ཏེ་འོངས་ན་ནི་དེས་དེ་དག་མ་ཟོས་ལ། ཤཱཀྱའི་སྲས་ཀྱི་དགེ་སྦྱོང་རྣམས་ལ་བྱིན་པ་དང་། ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་ཆེད་དུ་བྱས་པའི་ཤ་ནི་ཟོས་སོ་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་བཀའ་བསྩལ་པ། ངས་གནས་གསུམ་གྱིས་རུང་བ་མ་ཡིན་པའི་ཤ་བཟའ་བར་མི་བྱའོ་ཞེས་གསུངས་པ་གསུམ་གང་ཞེ་ན། བདག་གི་ཆེད་དུ་བྱས་པར་མངོན་དུ་མཐོང་བ་རུང་བ་མ་ཡིན་པའི་ཤ་བཟའ་བར་མི་བྱའོ་ཞེས་གསུངས་པ་དང་། ཡིད་ཆེས་པ་ལས་ཁྱོད་ཀྱི་ཆེད་དུ་བྱས་པ་ཡིན་ནོ་ཞེས་ཐོས་པ་རུང་བ་མ་ཡིན་པའི་ཤ་བཟའ་བར་མི་བྱའོ་ཞེས་གསུངས་པ་དང་། རང་ཉིད་ཀྱི་བློ་ལ་རྣམ་པར་རྟོག་པ་སྐྱེས་པ་ཚུལ་ལས་འདི་ནི་བདག་གི་ཆེད་དུ་བྱས་པ་ཡིན་ནོ་སྙམ་དུ་རུང་བ་མ་ཡིན་པའི་ཤ་བཟའ་བར་མི་བྱའོ་ཞེས་གསུངས་པ་ཡིན་ནོ། །དགེ་སློང་དག་ངས་གནས་གསུམ་གྱིས་རུང་བའི་ཤ་བཟའ་བར་བྱའོ་ཞེས་གསུངས་པ་གསུམ་གང་ཞེ་ན། འདིས་བདག་གི་ཆེད་དུ་བྱས་པར་མངོན་སུམ་དུ་མ་མཐོང་བ་རུང་བའི་ཤ་བཟའ་བར་བྱའོ་ཞེས་གསུངས་པ་དང་། ཡིད་ཆེས་པ་ལས་འདིས་ཁྱོད་ཀྱི་ཆེད་དུ་བྱས་པ་མ་ཡིན་ནོ་ཞེས་ཐོས་པ་རུང་བའི་ཤ་བཟའ་བར་བྱའོ་ཞེས་གསུངས་པ་དང་། བདག་ཉིད་ཀྱི་བློ་ལ་རྣམ་པར་རྟོག་པ་སྐྱེས་པ་ཚུལ་ལས་འདི་ནི་བདག་གི་ཆེད་དུ་བྱས་པ་ཡིན་ནོ་སྙམ་པ་མ་སྐྱེས་པ་རུང་བའི་ཤ་བཟའ་བར་བྱའོ་ཞེས་གསུངས་པ་ཡིན་ནོ། །ཞེས་གསུངས་སོ། ། གཉིས་པ་ནི། མདོ་རྩ་བ་ལས། ཤའི་བདག་ཉིད་ཀྱི་སྨན་དེ་ཡང་ངོ་། །ཐམས་ཅད་ཤན་པའི་གནས་ནས་བླང་ངོ་། །དེ་ནི་བྱ་བ་ཉིད་ཡིན་ནོ། །ཞེས་དང་། ཤ་བསྔོས་པར་ཤེས་ན་བཟའ་བར་མི་བྱའོ། །སྟག་གི་གོད་མ་མི་བཟའ་འོ། །གླང་པོ་ཆེ་དང་རྟ་དང་ཀླུ་རྣམས་ཀྱི་མི་བཟའོ། །རྨིག་གཅིག་པ་དང་ཝ་དང་སྤྲེའུ་དང་ཤིང་རྟ་མོ་དང་བྱ་རོག་དང་བྱ་རྒོད་དང་ཆུ་སྐྱར་དང་ཁྱི་དང་བྱ་ཁྲ་དང་འུག་པ་དང་དེ་དག་ལས་གཞན་པའི་བྱ་མི་རོ་ཟ་བ་དག་དང་བྱ་གར་དང་ཕ་ཝང་སྐྱིན་ཀོར་དྲེའུ་སྲིན་དང་སྲིན་བུ་རྣམས་ཀྱི་ཡང་མི་བཟའ་འོ། །ཞེས་དང་། དེའི་རྒྱ་ཆེར་འགྲེལ་ལས། །ཤ་བསྔོས་པར་ཤེས་ན་བཟའ་བར་མི་བྱའོ་ཞེས་བྱ་བ་ནི། ཟ་བ་པོའི་ཕྱིར་སྦྱིན་བདག་གིས་ཤ་བསྔོས་པར་ཟ་བ་པོས་མཐོང་བ་དང་ཐོས་པ་དང་དོགས་པའི་སྒོ་ནས་ཤེས་ནས་དེས་ཤ་དེ་བཟའ་བར་མི་བྱ་སྟེ། དེ་ལྟ་བས་ན་རབ་ཏུ་བྱུང་བ་རྣམས་ཀྱིས་ནི་ཤན་པའི་གནས་སམ་ཚོང་འདུས་ནས་ཤ་རུང་བ་དགེ་བསྙེན་དད་པ་ཅན་གྱིས་བླངས་ཏེ་བཟའ་བར་རྗེས་སུ་གནང་ངོ་། །ཞེས་གསུངས་སོ། །དེས་ན་ལུགས་འདིར་ཤ་བསྔོས་པ་ཡིན་མིན་གྱི་ཁྱད་པར་རང་གི་བཟའ་བའི་ཆེད་དུ་གཞན་དག་གིས་བསད་པར་མཐོང་ཐོས་དོགས་གསུམ་ཡོད་མེད་ཀྱིས་འབྱེད་པ་ཡིན་ལ། དེ་མེད་ན་བཟའ་བར་བཀག་པའི་ཤ་དག་ལས་གཞན་རྣམས་བཟའ་བར་གནང་བ་ཡིན་ནོ། །སྔོན་གྱི་མཁས་པ་ཁ་ཅིག་ན་རེ། རྣམ་གསུམ་དག་པ་ནི་ཁ་ཅིག རང་གི་ཆེད་དུ་མཐོང་ཐོས་དོགས་གསུམ་དང་བྲལ་བ་ཡིན་གྱི། སྤྱིར་ཤའི་ཆེད་དུ་མ་ཡིན་ནོ་ཞེས་ཟེར་བ་མི་འཐད་དེ། འོད་ལྡན་ལས། ཆེད་དུ་བྱས་པའི་ཤ་དང་ཉ་ཤ་དག་བཟའ་བར་མི་བྱའོ། །གལ་ཏེ་བྱས་པ་དང་བྱེད་དུ་བཅུག་པ་དང་། རྗེས་སུ་ཡི་རང་པ་འཁོར་གསུམ་ཡོངས་སུ་དག་པ་ཡིན་དུ་ཟིན་ཀྱང་ཆེད་དུ་བྱས་པ་དག་ལས་སྙིང་བརྩེ་བ་མེད་པ་སྐྱེ་བའི་ཕྱིར་དང་ཆ་མ་ཡིན་པའི་ཕྱིར་བཀག་གོ། དེ་ལས་གཞན་པ་ནི་མ་བཀག་པའོ། །ཞེས་གསུངས་པས་སོ། །ཞེས་ཟེར་མོད། ཉན་ཐོས་བའི་ལུགས་ལ་ནི་རྣམ་གསུམ་དག་མ་དག་གི་ཁྱད་པར་བདག་ཉིད་ཀྱི་ཆེད་དུ་བྱས་པ་མཐོང་བ་སོགས་ཡོད་མེད་ཀྱིས་འབྱེད་པར་ལུང་སྨན་གྱི་གཞི་ཉིད་ལས་ཤིན་ཏུ་གསལ་ལ། མདོ་རྩ་བ་དང་རྒྱ་ཆེར་འགྲེལ་ལས་ཤན་པའི་གནས་ནས་ཤ་བླངས་ཏེ་བཟའ་བར་གསུངས་ན། ཤན་པའི་གནས་ནས་བྱུང་བའི་ཤ་ནི་ཅིའི་ཕྱིར་བཟའ་བའི་ཕྱིར་དུ་བྱས་པའི་ཤ་མ་ཡིན། དེས་ན་འོད་ལྡན་གྱི་ལུང་དོན་ནི། རྔོན་པས་དགེ་སློང་གི་ཆེད་དུ་བསད་པའི་ཤ་ལྟ་བུ་ལ། སྲོག་གཅོད་པའི་བྱ་བ་དེ་དགེ་སློང་རང་གིས་བྱས་པ་དང་། རྔོན་པ་ལ་བྱེད་དུ་བཅུག་པ་དང་། རི་དྭགས་གསོད་པར་རྗེས་སུ་ཡི་རང་པ་སྟེ་འཁོར་གསུམ་དག་ཀྱང་རང་གི་ཆེད་དུ་བྱས་པ་ཟོས་ན་སྙིང་རྗེ་མེད་པ་དང་ཆ་མ་ཡིན་ཞེས་པའི་དོན་ཏེ། འོད་ལྡན་ཉིད་ལས་སྔ་མའི་འཕྲོས་སུ། འདི་ལྟར་གཞུང་གི་གླེང་གཞི་ལས། བཙུན་པ་བཅོམ་ལྡན་འདས་ཀྱིས་དགེ་སློང་བྱེ་མ་སྐྱེས་བྲོ་འཚལ་བ་ལ་ཤ་རྗེན་པ་སྦྱིན་པར་བྱའོ་ཞེས་གང་བཀའ་བསྩལཔ། བཙུན་པ་དེ་གང་ནས་བླང་བར་བགྱི། བཅོམ་ལྡན་འདས་ཀྱིས་བཀའ་བསྩལཔ། ཉེ་བ་འཁོར་ཤ་འཚོང་གི་གནས་ཆེན་པོ་ལྔ་དག་ནས་སོ། ། ལྔ་པོ་གང་དག་ཞེ་ན། ཤན་པ་དང་། བྱ་གག་འཚོང་བ་དང་། བྱ་བ་དང་། ཕག་འཚོང་དང་། རི་དྭགས་ཀྱི་རྔོན་པའི་ཤ་འཚོང་བའི་གནས་དག་ནས་སོ། །བཙུན་པ་སུས་བླང་བར་བགྱི་ཞིང་སྟོབས་སུ་སྩོལ་བར་བགྱི། ཉེ་བ་འཁོར་དགེ་བསྙེན་དད་པ་ཅན་གྱིས་སོ་ཞེས་གསུངས་པ་ཡིན་ཏེ། དགེ་བསྙེན་དད་པ་ཅན་སྨོས་པ་ནི་ཆེད་དུ་གསོད་པའི་དོགས་པ་མེད་པར་སྟོན་པ་ཡིན་ནོ། །ཞེས་གསུངས་པའི་ཕྱིར་རོ། །གཉིས་པ་ཐེག་པ་ཆེན་པོའི་ལུགས་ལའང་གཉིས་ཏེ། མདོ་དང་སྔགས་ཀྱི་ལུགས་སོ། །དང་པོ་ལ་བཀའ་དང་དགོངས་འགྲེལ་གཉིས་ལས། དང་པོ་ནི། ལང་ཀར་གཤེགས་པའི་མདོ་ལས། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་བསྩལཏོ། །བློ་གྲོས་ཆེན་པོ་བྱང་ཆུབ་སེམས་དཔའ་སྙིང་བརྩེ་བའི་བདག་ཉིད་ཅན་གྱིས་རྒྱུ་ཚད་མེད་པའི་ཕྱིར་ཤ་ཐམས་ཅད་བཟའ་བར་མི་བྱ་སྟེ། དེ་དག་ལ་ཕྱོགས་ཙམ་ཞིག་བཤད་པར་བྱའོ། །དེ་ལ་བློ་གྲོས་ཆེན་པོ་སྲོག་ཆགས་ཡུན་རིང་པོ་ནས་འཁོར་བ་རྣམས་ལ་གང་ཕའམ། མའམ། སྤུན་ནམ། སྲིང་མོའམ། བུའམ། བུ་མོའམ། གཉེན་བཤེས་སམ། གཉེན་ནམ། གཉེན་ལྟ་བུར་གང་ཡང་རུང་བར་མ་གྱུར་པའི་སེམས་ཅན་དེ་ནི་རྙེད་པར་སླ་བའི་རྣམ་པ་གང་ཡང་མེད་དོ། །གཉེན་དང་གཉེན་ལྟ་བུར་གྱུར་པ་དེ་དག་ཚེ་གཞན་དུ་ལུས་བརྗེས་པ་རི་དྭགས་དང་། ཕྱུགས་དང་། བྱའི་སྐྱེ་གནས་གང་ཡང་རུང་བར་གྱུར་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་འདོད་པ་འབྱུང་པོ་ཐམས་ཅད་བདག་དང་འདྲ་བར་གྱུར་པར་འདོད་པས་སྐྱེ་བོ་སྲོག་ཆགས་སུ་གྱུར་པ་ཐམས་ཅད་ལས་བྱུང་བའི་ཤ་ཇི་སྐད་དུ་བཟའ་བར་བྱ། བློ་གྲོས་ཆེན་པོ་སྲིན་པོ་རྣམས་ཀྱང་དེ་བཞིན་གཤེགས་པ་རྣམས་ཀྱི་ཆོས་ཀྱིས་ཆོས་ཉིད་བཟང་པོ་འདི་ཐོས་ནས་ཤ་ཟ་བ་ལས་རྣམ་པར་ལྡོག་ཅིང་སྲིན་པོའི་རང་བཞིན་དང་བྲལ་ནས་སྙིང་རྗེ་ཅན་དུ་འགྱུར་ན། ཆོས་འདོད་པའི་སྐྱེ་བོ་རྣམས་ལྟ་ཅི་སྨོས། དེ་ལྟར་ན་བློ་གྲོས་ཆེན་པོ་ཚེ་རབས་འཕོས་པ་དེ་དང་དེ་དག་ཏུ་སེམས་ཅན་ཐམས་ཅད་གཉེན་བཤེས་དང་། གཉེན་དུ་གྱུར་པའི་འདུ་ཤེས་ཀྱིས་སེམས་ཅན་ཐམས་ཅད་ལ་བུ་གཅིག་གི་འདུ་ཤེས་སུ་བསྒོམ་པའི་ཕྱིར་བྱང་ཆུབ་སེམས་དཔའ་སྙིང་བརྩེ་བའི་བདག་ཉིད་ཅན་གྱིས་ཤ་ཐམས་ཅད་མི་བཟའ་འོ། །བློ་གྲོས་ཆེན་པོ་སྤྱོད་པ་དང་ལྡན་པའི་བྱང་ཆུབ་སེམས་དཔའ་ནི་ཤ་བཟར་མི་རུང་བ་དང་། འཁྲུལ་བའི་ཕྱིར་ཡང་ཤ་ཐམས་ཅད་མི་བཟའ་སྟེ། བློ་གྲོས་ཆེན་པོ་བོང་བུ་དང་། རྔ་མོ་དང་། ཁྱི་དང་། གླང་དང་། མིའི་ཤ་ལ་སོགས་པ་ནི་འཇིག་རྟེན་གྱིས་བཟའ་བ་མ་ཡིན་ན། འདི་ལྟར་ཤན་པ་དག་རིན་གྱི་ཕྱིར་བཟར་རུང་ངོ་ཞེས་ཟེར་ཞིང་སྲང་གི་དབུས་དག་ཏུ་འཚོང་བར་བྱེད་པས་དེའི་ཕྱིར་ཡང་བློ་གྲོས་ཆེན་པོ་བྱང་ཆུབ་སེམས་དཔས་ཤ་ཐམས་ཅད་མི་བཟའ་འོ། །བློ་གྲོས་ཆེན་པོ་གཙང་བར་འདོད་པའི་ཕྱིར་ཡང་བྱང་ཆུབ་སེམས་དཔའ་ཤ་ནི་ཁུ་ཆུ་དང་ཁྲག་ལས་བྱུང་བའི་ཕྱིར་ཤ་མི་བཟའ་འོ། །འབྱུང་པོ་རྣམས་དངངས་པར་བྱེད་པའི་ཕྱིར་ཡང་བློ་གྲོས་ཆེན་པོ་བྱང་ཆུབ་སེམས་དཔའ་བྱམས་པར་འདོད་པ་རྣལ་འབྱོར་ཅན་གྱིས་ཤ་ཐམས་ཅད་བཟའ་བར་མི་བྱའོ། །འདི་ལྟ་སྟེ། བློ་གྲོས་ཆེན་པོ་སྨེ་ཤ་ཅན་དང་། གདོལ་བ་དང་། ཉ་བ་ལ་སོགས་པ་ཁྱིའི་ཤ་ཟ་བའི་སེམས་ཅན་རྣམས་ནི་རྒྱང་མ་ནས་མཐོང་ཡང་ཁྱི་རྣམས་འཇིགས་པས་ཟུག་སྟེ། ལ་ལ་ནི་བདག་ཅག་ཀྱང་བསད་དུ་འོང་ངོ་ཞེས་ཤི་ལ་ཐུག་པར་འགྱུར་རོ། །དེ་བཞིན་དུ་བློ་གྲོས་ཆེན་པོ་ནམ་མཁའ་དང་། ས་དང་ཆུ་ལ་གནས་པའི་འགྲོ་བ་ཤིན་ཏུ་ཕྲ་བ་གཞན་ཡོད་པ་དེ་དག་ཀྱང་ཤ་ཟ་བ་རྣམས་རྒྱང་མ་ནས་མཐོང་མ་ཐག་ཏུ་སྣའི་དབང་པོ་རྣོན་པོས་དྲི་ཚོར་ནས་སྲིན་པོ་ལས་མི་དག་མྱུར་ཏུ་འབྱོལ་བ་བཞིན་ཏེ། ལ་ལ་ཤི་དོགས་པར་ཡང་འགྱུར་རོ། །བློ་གྲོས་ཆེན་པོ་དེའི་ཕྱིར་དངངས་པར་འགྱུར་བས་བྱང་ཆུབ་སེམས་དཔའ་བྱམས་པ་ལ་གནས་པས་ཤ་མི་བཟའ་འོ། །བློ་གྲོས་ཆེན་པོ་འཕགས་པ་མ་ཡིན་པའི་སྐྱེ་བོས་བསྙེན་ཅིང་དྲི་མི་ཞིམ་ལ་མི་སྙན་པར་བྱེད་པ་དང་། འཕགས་པའི་སྐྱེ་བོས་རྣམ་པར་སྤང་པའི་ཕྱིར་ཡང་བྱང་ཆུབ་སེམས་དཔས་ཤ་མི་བཟའ་འོ། །བློ་གྲོས་ཆེན་པོ་འཕགས་པའི་སྐྱེ་བོ་ནི་དྲང་སྲོང་གི་ཟས་ཟ་སྟེ། ཁྲག་དང་ཤ་མི་ཟ་བས། དེའི་ཕྱིར་ཡང་བྱང་ཆུབ་སེམས་དཔས་ཤ་མི་ཟའོ། །བློ་གྲོས་ཆེན་པོ་སྐྱེ་བོ་མང་པོའི་སེམས་རྗེས་སུ་བསྲུང་བའི་ཕྱིར་བསྟན་པ་ལ་སྐུར་བ་སྤང་བར་འདོད་པའི་བྱང་ཆུབ་སེམས་དཔའ་སྙིང་རྗེའི་བདག་ཉིད་ཅན་གྱིས་ཤ་མི་བཟའ་འོ། །དེ་འདི་ལྟ་སྟེ། བློ་གྲོས་ཆེན་པོ་འཇིག་རྟེན་ན་བསྟན་པ་ལ་སྐུར་བར་སྨྲ་བ་དག་ཡོད་དེ། ཀྱེ་མ་འདི་དག་གི་དགེ་སྦྱོང་ཉིད་ནི་ཅི་ཞིག་ཡོད། འདི་དག་གི་ཚངས་པར་འཇུག་པའང་ག་ལ་ཡོད་དེ། དེ་ལྟར་འདི་དག་ནི་སྔོན་གྱི་དྲང་སྲོང་གི་ཟས་བོར་ནས་ཤ་གཟན་བཞིན་དུ་ཤའི་གཟས་ཀྱིས་ལྟོ་གང་ཞིང་ནམ་མཁའ་དང་། ས་དང་། ཆུ་ལ་གནས་པའི་འགྲོ་བ་ཕྲ་མོ་སྐྲག་པར་བྱེད་པ་རྣམས་འཇིག་རྟེན་འདི་དག་ཀུན་ཏུ་རྒྱུའོ། །འདི་དག་གི་དགེ་སྦྱོང་ཉིད་ནི་ཉམས་སོ། །འདི་དག་གི་སྡིག་པ་སྤངས་བ་ཉིད་ནི་ཞིག་གོ །འདི་དག་ལ་ནི་ཆོས་ཀྱང་མེད་འདུལ་བའང་མེད་དོ་ཞེས་དེ་ལྟར་སྡང་བའི་སེམས་འཆང་བ་རྣམས་རྣམ་པ་དུ་མས་བསྟན་པ་ལ་སྐུར་ཏོ། །དེའི་ཕྱིར་བློ་གྲོས་ཆེན་པོ་སྐྱེ་བོ་མང་པོའི་སེམས་རྗེས་སུ་བསྲུང་བའི་ཕྱིར་བསྟན་པ་ལ་སྐུར་བ་སྤང་བར་འདོད་པའི་བྱང་ཆུབ་སེམས་དཔའ་སྙིང་བརྩེ་བའི་བདག་ཉིད་ཅན་གྱིས་ཤ་ཐམས་ཅད་མི་བཟའོ། །བློ་གྲོས་ཆེན་པོ་ཤི་བའི་རོ་དྲི་མི་ཞིམ་ཞིང་མི་འཕྲོད་པ་དང་མཚུངས་པའི་ཕྱིར་ཡང་བྱང་ཆུབ་སེམས་དཔས་ཤ་མི་བཟའོ། །བློ་གྲོས་ཆེན་པོ་མི་ཤི་བའི་ཤ་བསྲེགས་པ་དང་། དེ་མ་ཡིན་པ་སྲོག་ཆགས་གཞན་གྱི་ཤ་བསྲེགས་པར་ཡང་དྲིའི་ཁྱད་པར་གང་ཡང་མེད་དེ། དེ་གཉིས་ཀ་དྲི་མི་ཞིམ་པར་མཚུངས་སོ། །དེའི་ཕྱིར་ཡང་བློ་གྲོས་ཆེན་པོ་རྣལ་འབྱོར་ཅན་གཙང་བར་འདོད་པའི་བྱང་ཆུབ་སེམས་དཔས་ཤ་ཐམས་ཅད་མི་བཟའོ། །བློ་གྲོས་ཆེན་པོ་དུར་ཁྲོད་པ་རྣམས་དང་། དགོན་པ་དང་ནགས་འདབས་མི་མ་ཡིན་པ་རྒྱུ་བ་བས་མཐའི་མལ་སྟན་ལ་གནས་པའི་རྣལ་འབྱོར་པ། རྣལ་འབྱོར་ལ་སྤྱོད་པ་བྱམས་པ་ལ་གནས་པ་རྣམས་དང་། རིག་སྔགས་འཆང་བ། རིག་སྔགས་གྲུབ་པར་འདོད་པ་རྣམས་ཀྱི་རིག་སྔགས་སྒྲུབ་པ་དང་། ཐར་པ་ལ་བགེགས་བྱེད་པའི་ཕྱིར་ཐེག་པ་ཆེན་པོ་ལ་ཞུགས་པའི་རིགས་ཀྱི་བུ་དང་། རིགས་ཀྱི་བུ་མོ་རྣམས་ཀྱི་རྣལ་འབྱོར་སྒྲུབ་པ་ཐམས་ཅད་ཀྱི་བར་ཆད་བྱེད་པར་འགྱུར་བར་རྗེས་སུ་མཐོང་ནས་བདག་དང་གཞན་གྱི་ལུས་ལ་ཕན་པར་འདོད་པའི་བྱང་ཆུབ་སེམས་དཔས་ཤ་ཐམས་ཅད་མི་བཟའོ། །གཟུགས་ལ་དམིགས་པ་རྣམ་པར་ཤེས་པའི་རྐྱེན་གྱིས་ཆགས་པ་སྐྱེད་པའི་ཕྱིར་ཡང་འབྱུང་པོ་ཐམས་ཅད་བདག་ཏུ་གྱུར་པ་སྙིང་བརྩེ་བའི་བདག་ཉིད་ཅན་གྱི་བྱང་ཆུབ་སེམས་དཔས་ཤ་ཐམས་ཅད་མི་བཟའོ། །བློ་གྲོས་ཆེན་པོ་དེ་ལ་ལྷ་རྣམས་ཀྱང་སྤོང་བའི་ཕྱིར་བྱང་ཆུབ་སེམས་དཔའ་སྙིང་བརྩེ་བའི་བདག་ཉིད་ཅན་གྱིས་ཤ་ཐམས་ཅད་མི་བཟའོ། །བློ་གྲོས་ཆེན་པོ་ཚེ་འདི་ཉིད་ལའང་དེའི་ཁ་ཤིན་ཏུ་དྲི་མི་ཞིམ་པར་འགྱུར་བའི་ཕྱིར་བྱང་ཆུབ་སེམས་དཔས་ཤ་ཐམས་ཅད་མི་བཟའོ། །སྡུག་བསྔལ་ཞིང་ཉལ་བ་དང་། སྡུག་བསྔལ་ཞིང་སད་པ་དང་། སྡིག་པའི་རྨི་ལམ་སྤུ་གཡོ་བར་བྱེད་པ་མཐོང་བ་དང་། ཁྱིམ་སྟོང་པ་ན་འདུག་ཅིང་གཅིག་པུ་དབེན་པར་གནས་པའི་ཚེ་ཡང་དེ་ལ་མདངས་འཕྲོག་པའི་མི་མ་ཡིན་པ་རྣམས་མདངས་འཕྲོག་པ་དང་། བར་བར་སྔང་བ་དང་། གློ་བུར་དུ་འཇིགས་ཤིང་སྐྲག་པར་འགྱུར་བ་དང་། ཟས་ཚོད་མི་ཟིན་ཏེ་ཟོས་པ་དང་། འཐུངས་པ་དང་། འཆོས་པ་དང་། མྱངས་པའི་བཅུད་ལེགས་པར་འཇུ་བའི་འཚག་ཏུ་མི་འགྱུར་བ་དང་། ལྟོ་སྲིན་བུ་སྐྱེས་པ་དང་། མཛེ་མང་པོའི་གཞིར་འགྱུར་བ། ནད་མང་བར་བྱེད་པ་ཡིན། མི་འཕྲོད་པའི་འདུ་ཤེས་ཀྱང་མི་འཐོབ་སྟེ། ངས་ཁ་ཟས་ནི་བུའི་ཤ་དང་། སྨན་བཞིན་དུ་བཤད་ལ། བློ་གྲོས་ཆེན་པོ་འཕགས་པ་མ་ཡིན་པའི་སྐྱེ་བོས་བསྙེན་པ། འཕགས་པའི་སྐྱེ་བོས་རྣམ་པར་སྤངས་པ། ཉེས་པ་དུ་མ་འཐོབ་པར་བྱེད་པ། ཡོན་ཏན་དུ་མས་རྣམ་པར་སྤངས་པ། དྲང་སྲོང་མ་ཡིན་པའི་ཟས་མི་བསོད་པ་མི་རུང་བའི་ཟས། ཤ་དང་ཁྲག་རྣམས་ཇི་ལྟར་སློབ་མ་རྣམས་ལ་གནང་བར་བྱ། བློ་གྲོས་ཆེན་པོ། ངས་ནི་འཕགས་པའི་སྐྱེ་བོས་རྣམ་པར་མ་སྤངས་པ། ཡོན་ཏན་མང་པོ་འཐོབ་པར་བྱེད་པ། ཉེས་པ་མང་པོ་རྣམ་པར་སྤངས་པ། སྔོན་གྱི་དྲང་སྲོང་གི་ཁ་ཟས་བསོད་པ། འབྲས་དང་། ནས་དང་། གྲོ་དང་། སྲན་མ་སྡེའུ་དང་། བལ་སྲན་དང་། སྲན་ཆུང་ལ་སོགས་པ་དང་། མར་དང་། འབྲུ་མར་དང་། སྦྲང་རྩི་དང་། ཧྭགས་དང་། བུ་རམ་དང་། ཁ་འདའ་དང་། ཤ་ཁུར་ལ་སོགས་པའི་ཟས་རྣམས་འོས་ཤིང་བརྟགས་པ་ཡིན་ཞེས་གནང་ན། བློ་གྲོས་ཆེན་པོ་མ་འོངས་པའི་དུས་ན། སྐྱེས་བུ་བླུན་པོ་འདུལ་བ་ལ་རྣམ་པར་རྟོག་པ། རྣམ་པ་མང་པོ་སྨྲ་བ་ཤ་གཟན་གྱི་རིགས་ཀྱི་བག་ཆགས་ཀྱིས་བསྒོས་པ་རོ་ལ་སྲེད་པ་ལ་ཤིན་ཏུ་ཆགས་པ། ཁ་ཅིག་ནི་འདི་བསོད་པའི་ཁ་ཟས་ཡིན་པར་འཛིན་ཏེ། བློ་གྲོས་ཆེན་པོ་སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་བསྐྱེད་པ། དད་པ་ཅན་རྣམ་པར་རྟོག་པ་མི་མངའ་བ། ཤཱཀྱའི་རིགས་ཀྱི་བུ། མིའི་རིགས་ཀྱི་བུ་དང་། རིགས་ཀྱི་བུ་མོ་ལུས་དང་། སྲོག་དང་། ལོངས་སྤྱོད་ལ་མ་ཆགས་པ། རོ་ལ་མ་ཞེན་པ། རོ་ལ་མི་བརྐམ་པ། སྙིང་རྗེ་ཅན། འབྱུང་པོ་ཐམས་ཅད་བདག་བཞིན་དུ་རེད་པར་འདོད་པ། སེམས་ཅན་ཐམས་ཅད་ལ་བུ་གཅིག་བཞིན་དུ་སྡུག་པར་ལྟ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དེ་སྙམ་དུ་འཛིན་པར་བཤད་དོ། །བློ་གྲོས་ཆེན་པོ་སྔོན་འདས་པའི་དུས་ན། རྒྱལ་པོ་སེངྒེ་འབངས་བཟང་ཞེས་བྱ་བ་ཞིག་བྱུང་སྟེ། དེ་ཟས་སུ་ཤ་ཟོས་ཤིང་མ་འོས་པར་བསྟེན་པས་རོ་ལ་སྲེད་ཅིང་ཆགས་པ་ལ་འདུན་པའི་ཕྱིར་མིའི་ཤའང་ཟོས་པར་གྱུར་ནས། དེའི་ཕྱིར་མཛའ་བོ་དང་། བློན་པོ་དང་། གཉེན་དང་། གཉེན་འདབ་ཀྱི་སྐྱེ་བོའི་ཚོགས་ཀྱིས་ཀྱང་སྤངས་པར་གྱུར་ན། གྲོང་ཁྱེར་བ་དང་། ཡུལ་གྱི་འགྲོ་བ་རྣམས་ཀྱིས་ལྟ་ཅི་སྨོས་ཏེ། བདག་གི་སྲིད་དང་ཡུལ་ཡོངས་སུ་བཏང་བའི་ཕྱིར་རབ་ཏུ་ཉོན་མོངས་པར་གྱུར་ཏོ། །བློ་གྲོས་ཆེན་པོ་དབང་པོས་ཀྱང་སྔོན་ལྷའི་དབང་པོ་ཐོབ་པར་གྱུར་ནས་ཤ་ཟ་བའི་བག་ཆགས་ཀྱི་ཉེས་པས་ཁྲའི་གཟུགས་སུ་བྱས་ནས་ལས་ཀུན་པ་བྱ་ཐི་བི་གཟུགས་དང་ཆ་བྱད་འཆང་བ་ཤིན་ཏུ་གཙེས་པར་གྱུར་ཏེ། རྒྱལ་པོ་ཞི་ལྡན་ཉེས་པ་མེད་པ་འབྱུང་བོ་ལ་སྙིང་བརྩེ་བ་ཅན་ཉིད་ཀྱང་སྲང་ལ་བཏབ་ཅིང་སྡུག་བསྔལ་ཆེན་པོ་ཐོབ་པར་བྱས་སོ། །བློ་གྲོས་ཆེན་པོ་དེ་ལྟར་ཚེ་དུ་མར་གོམས་ཤིང་ལྷའི་དབང་པོ་བརྒྱ་བྱིན་དུ་གྱུར་ཀྱང་བདག་དང་གཞན་ལ་ཉེས་པ་འཐོབ་པར་བྱེད་པར་འགྱུར་ན་གཞན་དག་ལྟ་ཅི་སྨོས། བློ་གྲོས་ཆེན་པོ་མིའི་དབང་པོར་གྱུར་པ་གཞན་རྣམས་ཀྱང་རྟ་ཤུགས་ཆེན་པོས་ཁྱེར་ནས་འབྲོག་དགོན་པ་ན་འཁྱམ་འཁྱམ་པ་ལས་སྲོག་གི་རིམ་གྲོའི་ཕྱིར་སེངྒེ་མོ་དང་འཚོགས་པར་གྱུར་ཏེ། བུ་དག་ཀྱང་སྐྱེས་པར་གྱུར་ཏོ། །སེང་གེ་དང་འགྲོགས་པའི་རྒྱུས་རྒྱལ་པོའི་བུ་རྐང་བཀྲ་ལ་སོགས་པའང་སྔོན་གྱི་ཚེ་རབས་ལ་ཤ་ཟ་བའི་ཉེས་པའི་བག་ཆགས་ཀྱིས་མིའི་དབང་པོར་གྱུར་ཀྱང་ཤ་ཟ་བར་གྱུར་ཏོ། །བློ་གྲོས་ཆེན་པོ་ཚེ་འདི་ཉིད་ལའང་ཁྱིམ་བདུན་པའི་གྲོང་ན་ཤ་ལ་ཤིན་ཏུ་བརྐམ་ཞིང་མི་འོས་པར་བསྟེན་ན། མི་ཤ་ཟ་བའི་ཕྲ་མེན་ཕ་དང་། ཕྲ་མེན་མ་མ་རུངས་པ་དག་ཏུ་སྐྱེའོ། །བློ་གྲོས་ཆེན་པོ་དེ་དག་ཚེ་བརྗེས་ནས་ཀྱང་ཤའི་རོ་ལ་ཆགས་པ་དེ་ཉིད་ཀྱིས་སེངྒེ་དང་། སྟག་དང་། གཟིག་དང་། སྤྱང་ཀི་དང་། ཏ་རཀྵ་དང་། བྱི་ལ་དང་། ཝ་དང་། འུག་པ་ཤ་མང་པོ་ཟ་བའི་སྐྱེ་གནས་དང་། ཤ་མང་དུ་ཟ་བའི་སྲིན་པོ་ལ་སོགས་པ་ཤིན་ཏུ་གཏུམ་པའི་སྐྱེ་གནས་སུ་ཡང་ལྟུང་བར་བྱེད་དོ། །དེར་ལྟུང་བ་རྣམས་མིའི་སྐྱེ་གནས་ཀྱང་འཐོབ་པར་དཀའ་ན་མྱ་ངན་ལས་འདས་པ་ལྟ་ཅི་སྨོས་ཏེ། བློ་གྲོས་ཆེན་པོ་ཤ་ཟ་བའི་ཉེས་པ་ཡང་དེ་དག་ལ་སོགས་པ་ཡིན་ན། ཤིན་ཏུ་བསྙེན་པ་རྣམས་ལྟ་ལོས་ཀྱང་སྐྱེ་མོད། ཕྱིར་བཟློགས་པས་ན་ཡོན་ཏན་ཤིན་ཏུ་མང་ན། བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རྣམས་ཀྱིས་ནི་ཡོན་ཏན་དང་། ཉེས་པ་འདི་དག་དང་། གཞན་ཡང་ཁོང་དུ་མི་ཆུད་དོ། །བློ་གྲོས་ཆེན་པོ་ཡོན་ཏན་དང་ཉེས་པ་འདི་དག་ལ་སོགས་པ་མཐོང་བའི་ཕྱིར་བྱང་ཆུབ་སེམས་དཔའ་སྙིང་བརྩེ་བའི་བདག་ཉིད་ཅན་གྱིས་ཤ་ཐམས་ཅད་མི་བཟའ་བར་བཤད་དོ། །བློ་གྲོས་ཆེན་པོ་གལ་ཏེ་ཇི་ལྟར་ཡང་སུའང་ཤ་མི་ཟ་ན་ནི་དེའི་ཕྱིར་སྲོག་ཆགས་རྣམས་ཀྱང་གསོད་པར་མི་འགྱུར་ན། བློ་གྲོས་ཆེན་པོ་སྲོག་ཆགས་ཉེས་པ་མེད་པར་རིན་གྱི་ཕྱིར་བསད་པ་ནི་ཕལ་ཆེར་དེ་ལས་གཞན་གྱི་ཕྱིར་ནི་ཉུང་ངོ་། །བློ་གྲོས་ཆེན་པོ་རོ་ལ་སྲེད་པ་ནི་ཤིན་ཏུ་མི་བཟད་པ་ཡིན་ཏེ། དེ་ལ་ཤིན་ཏུ་བསྙེན་པས་མིའི་ཤ་དག་ཀྱང་མིས་བཟའ་བར་གྱུར་ན། རི་དྭགས་དང་། ཕྱུགས་དང་། བྱ་དང་། སྲོག་ཆགས་ལས་བྱུང་བའི་ཤ་དེ་དག་ལྟ་ཅི་སྨོས། བློ་གྲོས་ཆེན་པོ་ཤའི་རོ་ལ་སྲེད་པས་གཟིར་བ་རྣམས་ཀྱིས་རྒྱ་དང་འཕྲུལ་འཁོར་འདི་དག་དེ་ལྟ་དེ་ལྟར་བཅའ་སྟེ་དེ་དག་གིས་ནི་བྱ་བ་དང་། ཤན་པ་དང་། ཉ་བ་ལ་སོགས་པས་ནམ་མཁའ་ལ་རྒྱུ་བ་དང་། ས་ལ་འགྲོ་བ་དང་། ཆུ་ལ་རྒྱུ་བའི་སྲོག་ཆགས་ཉེས་པ་མེད་པ་རྣམས་རྣམ་པ་དུ་མས་གསོད་པར་བྱེད་དོ། །བློ་གྲོས་ཆེན་པོ་འོན་ཀྱང་རྔོན་པར་གྱུར་པའི་སེམས་གཏུམ་པ་ཅན་སྲིན་པོ་ལྟར་སྙིང་རྗེ་མེད་པ་རྣམས་སྲོག་ཆགས་སུ་འདུ་ཤེས་པས་གསོད་ཅིང་ཟ་ཡང་སྙིང་རྗེ་ནམ་ཡང་མི་སྐྱེའོ། །བློ་གྲོས་ཆེན་པོ་གང་ཉེ་བར་བཟུང་སྟེ་ཉན་ཐོས་རྣམས་ལ་གནང་བར་བྱ་བ་མ་བྱས་པ་དང་། བྱེད་དུ་མ་བཅུག་པ་དང་། མ་བརྟགས་པ་ཞེས་བྱ་བའི་ཤ་ཡང་རུང་བ་མེད་ན། བློ་གྲོས་ཆེན་པོ་མ་འོངས་པའི་དུས་ན་ང་ཉིད་ཀྱི་བསྟན་པ་ལ་རབ་ཏུ་བྱུང་ཞིང་ཤཱཀྱའི་སྲས་ཀྱི་ཡིན་ནོ་ཞེས་ཁས་ལེན་པ་ངུར་སྨྲིག་གི་རྒྱལ་མཚན་ཐོགས་པ། སྐྱེས་བུ་གླེན་པ་ལོག་པའི་རྟོག་གེས་སེམས་ཉམས་པར་གྱུར་པ། འདུལ་བ་ལ་རྣམ་པ་མང་པོར་རྣམ་པར་རྟོག་པ། སྨྲ་བའི་འཇིག་ཚོགས་ལ་ལྟ་བ་རྒྱས་པ། རོའི་སྲེད་པ་ལ་ཆགས་པ་རྣམས་ཤ་ཟ་བའི་གཏན་ཚིགས་སུ་སྣང་བ། དེ་དང་དེ་དག་སྟོན་ཏེ། ང་ལ་ཡང་ཡང་དག་པ་མ་ཡིན་པར་སྐུར་བ་འདེབས་པར་སེམས་སོ། །དོན་བྱུང་བའི་གླེང་གཞི་དེ་དང་དེ་དག་ལ་བརྟགས་ནས་སྨྲ་སྟེ། དོན་བྱུང་བ་འདི་ནི་གླེང་གཞི་ལས་བཅོམ་ལྡན་འདས་ཀྱིས་ཤའི་ཟས་གནང་སྟེ་རུང་བའང་ཡིན། ཁ་ཟས་བསོད་པར་ཡང་གསུངས་ཏེ། དེ་བཞིན་གཤེགས་པ་ཉིད་ཀྱིས་ཀྱང་གསོལ་ཅེའོ་ཞེས་ཟེར་རོ། །བློ་གྲོས་ཆེན་པོ་མདོ་གང་ལས་བསྙེན་པར་གནང་བ་མེད་དེ། ཟས་བསོད་པའི་ནང་དུའང་རུང་བར་མ་བཤད་དོ། །བློ་གྲོས་ཆེན་པོ་གལ་ཏེ་ངས་གནང་བར་བྱ་བར་འདོད་དམ། ངའི་ཉན་ཐོས་རྣམས་ཀྱིས་བསྙེན་པར་རུང་བ་ཞིག་ཡིན་ན་ནི། བྱམས་པས་གནས་པའི་རྣལ་འབྱོར་ཅན་དུར་ཁྲོད་པ་རྣམས་དང་། ཐེག་པ་ཆེན་པོ་ལ་ཡང་དག་པར་ཞུགས་པའི་རིགས་ཀྱི་བུ་དང་། རིགས་ཀྱི་བུ་མོ་རྣམས་ལ་སེམས་ཅན་ཐམས་ཅད་བུ་གཅིག་བཞིན་དུ་འདུ་ཤེས་བསྒོམ་པའི་ཕྱིར་ཤ་ཐམས་ཅད་ཟ་བ་གཅོད་པར་ཡང་བྱས་སོ། །བློ་གྲོས་ཆེན་པོ་ངས་ནི་རིགས་ཀྱི་བུ་དང་རིགས་ཀྱི་བུ་མོ་ཆོས་འདོད་པ་ཐེག་པ་ཐམས་ཅད་ལ་རབ་ཏུ་ཞུགས་པ་རྣམས་དང་། དུར་ཁྲོད་པ་བྱམས་པ་ལ་གནས་པ་དགོན་པ་པ་རྣལ་འབྱོར་ལ་སྤྱོད་པ་རྣམས་ཀྱི་རྣལ་འབྱོར་ཐམས་ཅད་སྒྲུབ་པ་དང་སེམས་ཅན་ཐམས་ཅད་བུ་བཞིན་དུ་འདུ་ཤེས་བསྒོམ་པའི་ཕྱིར། ཤ་ཐམས་ཅད་གཅོད་པར་ཡང་བྱས་སོ། །བསྟན་པ་བརྗོད་པ་དེ་དང་དེ་ལ་བསླབ་པའི་གཞི་རིམ་པས་བཅའ་བ་སྐས་ཀྱི་གདང་བུ་བྲེ་བའི་ཚུལ་དུ་རྣམ་གསུམ་བཅས་ནས་དེའི་ཆེད་དུ་བྱས་པ་རྣམས་ཀྱང་བཀག་སྟེ་དེའི་ཕྱིར་རང་བཞིན་གྱིས་ཤི་བ་བཅུའི་ཤ་ནི་མ་བཀག་མོད་ཀྱི། འདིར་ནི་ཐམས་ཅད་ཀྱི་ཐམས་ཅད་དུ་ཀུན་ཐབས་མེད་པར་རིལ་གྱིས་བཀག་སྟེ། དེ་ལྟར་བློ་གྲོས་ཆེན་པོ། ངས་ཤའི་ཟས་ནི་སུ་ལའང་མ་གནང་། མི་གནང་། གནང་བར་མི་འགྱུར་ཏེ། བློ་གྲོས་ཆེན་པོ་རབ་ཏུ་བྱུང་བ་རྣམས་ལ་ཤའི་ཟས་ནི་མི་རུང་བར་བཤད་དོ། །བློ་གྲོས་ཆེན་པོ་གང་ཡང་ང་ལ་དེ་བཞིན་གཤེགས་པས་ཀྱང་གསོལ་ཏོ་ཞེས་སྐུར་བ་འདེབས་པར་སེམས་པ་དེ་ཡང་བློ་གྲོས་ཆེན་པོ་སྐྱེས་བུ་བླུན་པོ་རང་གི་ལས་ཀྱི་ཉེས་པའི་སྒྲིབ་པ་ལ་གནས་པ་དེ་དག་ལ་ཡུན་རིང་པོར་དོན་མེད་པ་དང་། གནོད་པ་དང་། མི་བདེ་བ་སྒྲུབ་པར་འགྱུར་རོ། །བློ་གྲོས་ཆེན་པོ་ངའི་འཕགས་པའི་ཉན་ཐོས་རྣམས་ནི་ཁ་ཟས་ཐ་མལ་པའང་མི་ཟ་ན་ཤ་དང་ཁྲག་གི་ཟས་མི་རུང་བ་ལྟ་ཅི་སྨོས། བློ་གྲོས་ཆེན་པོ་ངའི་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་ནི་ཆོས་ཀྱི་ཟས་ཟ་སྟེ། ཟང་ཟིང་གི་ཟས་ནི་མ་ཡིན་ན། དེ་བཞིན་གཤེགས་པ་རྣམས་ལྟ་ཅི་སྨོས། བློ་གྲོས་ཆེན་པོ་དེ་བཞིན་གཤེགས་པ་རྣམས་ནི་ཆོས་ཀྱི་སྐུ། ཆོས་ཀྱི་ཟས་ཀྱིས་གནས་པ་ཡིན་ཏེ། ཟང་ཟིང་གི་སྐུ་མ་ཡིན། ཟང་ཟིང་གི་ཟས་ཐམས་ཅད་ཀྱིས་གནས་པ་མ་ཡིན་ཏེ། སྲིད་པ་དང་སྲིད་པའི་ཡོ་བྱད་ལ་སྲེད་པས་ཚོལ་བའི་བག་ཆགས་ཐམས་ཅད་སྤངས་ཤིང་ཉོན་མོངས་པའི་ཉེས་པའི་བག་ཆགས་ཐམས་ཅད་མེད་པ། སེམས་དང་ཤེས་རབ་ཤིན་ཏུ་རྣམ་པར་གྲོལ་བ། ཐམས་ཅད་མཁྱེན་པ། ཐམས་ཅད་གཟིགས་པ། སེམས་ཅན་ཐམས་ཅད་ལ་བུ་གཅིག་པ་དང་མཚུངས་པར་གཟིགས་ཤིང་ཐུགས་རྗེ་ཆེན་པོ་དང་ལྡན་པའོ། །དེ་ལྟར་བློ་གྲོས་ཆེན་པོ་ང་ནི་སེམས་ཅན་ཐམས་ཅད་ལ་བུ་གཅིག་བཞིན་གྱི་འདུ་ཤེས་དང་ལྡན་པ་ཡིན་ན། ཇི་ལྟར་བདག་གི་བུའི་ཤ་བཟའ་བར་ཉན་ཐོས་རྣམས་ལ་གནང་བར་བྱ། རང་གིས་བཟའ་བ་ལྟ་ཅི་སྨོས་ཏེ། ངས་ཉན་ཐོས་རྣམས་ལ་གནང་བ་དང་། བདག་ཉིད་ཀྱིས་ཟོས་སོ་ཞེས་བྱ་བ་འདི་ནི་བློ་གྲོས་ཆེན་པོ་གནས་མེད་དོ། །དེ་ལ་འདི་སྐད་ཅེས་བྱ་སྟེ། བྱང་ཆུབ་སེམས་དཔའ་སེམས་ཆེན་གྱིས། །ཆང་དང་ཤ་དང་སྒོག་ཙོང་དག །བཟའ་ཞིང་བཏུང་བར་མི་བགྱི་བ། །རྒྱལ་བ་ཁྱུ་མཆོག་བཤད་དུ་གསོལ། །དྲི་ང་འཕགས་པ་མིན་པས་བསྙེན། །མི་སྙན་པ་ཡང་བྱེད་པ་སྟེ། །ཤ་ནི་གཅན་གཟན་རྣམས་ཀྱི་ཟས། །བཟར་མི་རུང་བར་ཐུབ་ཆེན་གསུངས། །ཟོས་ན་ཉེས་པ་གང་ཡིན་དང་། །མ་ཟོས་པ་ཡི་ཡོན་ཏན་དག །ཤ་ཟ་དེ་ལ་གང་ཡོད་པ། །བློ་གྲོས་ཆེན་པོས་ཤེས་པར་གྱིས། །འཁྲུལ་བ་དང་ནི་གཉེན་བཤེས་དང་། །ཁུ་ཆུ་ཁྲག་ལས་བྱུང་བའི་ཕྱིར། །འབྱུང་བོ་རྣམས་ནི་དངངས་འགྱུར་བས། །རྣལ་འབྱོར་ཅན་གྱིས་ཤ་མི་བཟའ། །ཤ་རྣམས་དང་ནི་སྒོག་ཙོང་དག  །ཆང་དག་རྣམ་པ་སྣ་ཚོགས་དང་། །ཀེའུ་དང་སྒོག་སྐྱ་དེ་བཞིན་ཏེ། །རྣལ་འབྱོར་ཅན་གྱིས་རྟག་ཏུ་སྤང་། །འབྲུ་མར་གྱིས་ཀྱང་བྱུག་པ་སྤང་། །ཁྲི་ལ་རྟེན་འཆའི་སེམས་ཅན་རྣམས། །བུ་ག་བུ་གར་འཇིག་འགྱུར་ཕྱིར། །ཁྲི་ལ་ཉལ་བར་མི་བྱའོ། །ཟས་ལས་དྲེགས་པ་སྐྱེ་བར་འགྱུར། །རྟོག་པ་དྲེགས་ལས་བྱུང་བ་སྟེ། །རྟོག་པས་འདོད་ཆགས་རབ་ཏུ་བསྐྱེད། །དེ་ཡི་ཕྱིར་ན་བཟར་མི་བྱ། །རྟོག་པ་ལས་ནི་འདོད་ཆགས་བསྐྱེད། །འདོད་ཆགས་ལས་ནི་སེམས་རྨོངས་བྱེད་། །རྨོངས་པས་འདུ་བར་རབ་ཏུ་འགྱུར། །སྐྱེ་སྟེ་འགྲོལ་བར་མི་འགྱུར་རོ། །ཁེ་ཡི་ཕྱིར་ནི་སེམས་ཅན་གསོད། །ཤ་ཡི་ཕྱིར་ནི་ནོར་སྦྱིན་བྱེད་། །དེ་དག་གཉིས་ཀ་སྡིག་ལས་ཅན། །འོ་དོད་འབོད་ལ་སོགས་པར་བཙོ། །གང་གིས་ཐུབ་པའི་ཚིག་འདས་ཏེ། །བསམ་པ་ངན་པ་ཤ་ཟ་ན། །འཇིག་རྟེན་གཉིས་ནི་གཞིག་པའི་ཕྱིར། །ཤཱཀྱའི་བསྟན་པས་རྟུལ་ཞུགས་བླངས། །ཤིན་ཏུ་མི་བཟད་དམྱལ་བར་ཡང་། །སྡིག་གི་ལས་ཅན་དེ་དག་འདོང་། །མ་རུངས་འོ་དོད་འབོད་སོགས་སུ། །ཤ་ཟ་དེ་དག་བཙོ་བར་འགྱུར། །རྣམ་གསུམ་དག་པའི་ཤ་རྣམས་ནི། །མ་བརྟགས་པ་དང་མ་བསླངས་དང་། །མ་བསྐུལ་བ་ཡང་ཡོད་མེད་པས། །དེ་བས་ཤ་ནི་མི་བཟའོ། །རྣལ་འབྱོར་ཅན་གྱིས་ཤ་མི་བཟའ། །ང་དང་སངས་རྒྱས་དག་གིས་བཤད་། །སེམས་ཅན་གཅིག་ལ་གཅིག་ཟ་བ། །ཤ་གཟན་དག་གི་རིགས་སུ་སྐྱེ། །དྲི་མི་ཞིམ་ཞིང་སྨད་པ་དང་། །སྨྱོན་པ་རྣམས་སུ་སྐྱེ་བར་འགྱུར། །གདོང་བ་སྨེ་ཤ་ཅན་རིགས་དང་། །བཙོ་བླག་མཁན་དུ་ཡང་ཡང་སྐྱེ། །ཕྲ་མེན་རིགས་ཀྱི་སྐྱེ་གནས་དང་། །ཤ་ཟའི་རིགས་སུ་སྐྱེ་བར་འགྱུར། །མི་ཡི་ཐ་མ་དེ་དག་ནི། །སྲིན་དང་བྱི་ལའི་མངལ་དུ་སྐྱེ། །གླང་པོའི་རྩལ་དང་སྤྲིན་ཆེན་དང་། །མྱ་ངན་འདས་དང་སོར་ཕྲེང་དང་། །ལང་ཀར་གཤེགས་པའི་མདོ་ལས་ཀྱང་། །ངས་ནི་ཤ་ཡང་རྣམ་པར་སྨད། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རྣམས་ཀྱིས་སྨད་པ་ལ། །ངོ་མི་ཚ་བར་ཟ་བ་ནི། །རྟག་ཏུ་སྨྱོན་པར་སྐྱེ་བར་འགྱུར། །ཤ་ལ་སོགས་པ་སྤང་བའི་ཕྱིར། །བྲམ་ཟེའི་རིགས་སམ་རྣལ་འབྱོར་ཅན། །ཤེས་རབ་ཅན་དང་ནོར་ལྡན་པར། །དེ་དག་རྣམས་ནི་སྐྱེ་བར་འགྱུར། །མཐོང་དང་ཐོས་དང་དོགས་པ་ཡིས། །ཤ་རྣམས་ཐམས་ཅད་རྣམ་པར་སྨད། །ཤ་གཟན་རིགས་སུ་སྐྱེ་པ་ཡི། །རྟོག་གེ་པ་རྣམས་མི་ཤེས་སོ། །ཇི་ལྟར་འདོད་ཆགས་ཐར་པ་ལས། །བར་ཆད་བྱེད་པར་འགྱུར་བ་བཞིན། །དེ་ལྟར་ཤ་དང་ཆང་ལ་སོགས། །བར་ཆད་བྱེད་པར་འགྱུར་བའོ། །མ་འོངས་པ་ཡི་དུས་ན་ནི། །ཤ་ཟ་གཏི་མུག་སྨྲ་བ་དག  །ཤ་ནི་སྡིག་མེད་རུང་བའོ་ཞེས། །སངས་རྒྱས་ཀྱིས་ནི་བཤད་ཅེས་ཟེར། །ཟས་ལ་སྨན་དང་འདྲ་བ་དང་། །བུ་ཡི་ཤ་དང་མཚུངས་པ་ཡང་། །རན་པ་དང་ནི་མི་འཕྲོད་པར། །རྣལ་འབྱོར་ཅན་གྱིས་ཟས་ལ་སྤྱོད། །སེངྒེ་དག་དང་སྟག་རྣམས་དང་། །ཝ་ལ་སོགས་དང་འགྲོགས་བྱ་བ། །ངས་ནི་བྱམས་པས་གནས་པ་ལ། །རྟག་པར་རྣམ་པ་ཀུན་ཏུ་སྨད། །ཐར་པའི་ཆོས་དང་འགལ་བའི་ཕྱིར། །མི་རྣམས་དངངས་པར་འགྱུར་བའི་ཤ །དེ་ཕྱིར་བཟའ་བར་མི་བྱ་སྟེ། །འདི་ནི་འཕགས་པའི་རྒྱལ་མཚན་ནོ། །ཞེས་གསུངས་སོ། །དེ་རྣམས་ཀྱི་དོན་ཅུང་ཟད་བཤད་ན་རིག་སྔགས་འཆང་བ་དང་། རིག་སྔགས་འགྲུབ་པར་འདོད་པ་རྣམས་ཀྱི་ཞེས་སོགས་ནི་བྱ་བའི་རྒྱུད་ལ་སོགས་པའི་རྗེས་སུ་འབྲངས་པ་རིག་སྔགས་དང་གཟུངས་སྔགས་ལ་སོགས་པ་སྒྲུབ་པར་འདོད་པའོ། །ངས་ཁ་ཟས་ནི་བུའི་ཤ་སྨན་བཞིན་དུ་བཤད་ལ་ཞེས་པ་ནི། ཤའི་ཟས་ནི་བུའི་ཤ་དང་འདྲ་བ་དང་འབྲས་ཆན་ལ་སོགས་དྲང་སྲོང་གི་ཟས་ནི་ཕན་པའི་སྨན་དང་འདྲ་ཞེས་པའོ། །དབང་པོས་ཀྱང་སྔོན་ལྷའི་དབང་པོ་ཐོབ་པར་གྱུར་ནས་ཞེས་པ་ལ་སོགས་པ་ནི། །སྔོན་ལྷའི་དབང་པོས་ཁྲའི་གཟུགས་སུ་བྱས་ནས་རྒྱལ་པོ་ཞི་ལྡན་གྱི་བསམ་པ་བརྟག་ཕྱིར་ཕུག་རོན་གཙེས་པ་རྒྱལ་པོ་ལ་སྐྱབས་སུ་སོང་བ་ན། ཁྲས་འདི་ངའི་ཟས་ཏེ། འདི་མེད་ན་ང་འཆིའོ་ཟེར་བས་རྒྱལ་པོས་འདིའི་ཤ་དང་མཉམ་པའི་སྲང་ཚད་རང་གི་ཤ་ལས་བཅལ་ལོ་ཞེས་གསུངས་སོ། །སྲོག་གི་རིམ་གྲོའི་ཕྱིར་སེངྒེ་མོ་དང་འཚོགས་ཞེས་པ་ནི། དེ་དང་མ་འགྲོགས་ན་དེས་གསོད་པར་འགྱུར་བའི་ཕྱིར་རོ། །ཁྱིམ་བདུན་པའི་གྲོང་ན་ཞེས་པ་ནི། བསྟན་པའི་རྗེས་འཇུག་ལས་དང་པོ་པ་རྣམས་འགྲོ་བར་བྱ་བ་མ་ཡིན་པའི་ཁྱིམ་བདུན་ཏེ། །ཤན་པ་དང་། ཆང་འཚོང་དང་། སྨད་བཙོང་མ་དང་། བྱ་པ་དང་། ཉ་པ་དང་། རྒྱལ་པོའི་ཕོ་བྲང་དང་། དེ་ལས་གཞན་པའི་རྔོན་པ་ལ་སོགས་རིགས་ངན་གྱི་ཁྱིམ་མམ། ཡང་ན་ལོག་པར་ལྟ་བའི་མུ་སྟེགས་སྲོག་གི་མཆོད་སྦྱིན་ལ་དགའ་བའི་ཁྱིམ་བདུན་པོ་ཡོད་པའི་གྲོང་ན་ཞེས་པའོ། །ཕྲ་མེན་ཕ་དང་མ་ནི་གནོད་སྦྱིན་དག་གོ། ཤིན་ཏུ་བསྙེན་པ་རྣམས་ལྟ་ལ་ཞེས་པ་ནི་རྟག་ཏུ་བསྟེན་པའི་ཉེས་པ་ཆེན་པོར་འགྱུར་པ་ལྟ་ཅི་སྨོས་པའོ། །གང་ཉེ་བར་བཟུང་སྟེ་ཞེས་པ་ནི་རྣམ་གསུམ་དག་པའི་ཤ་གང་ཡིན་པའོ། །མ་བརྟགས་པ་ཞེས་བྱ་བ་ནི། །མ་བསམས་ཤིང་བློ་ཡུལ་དུ་མ་བྱས་པའོ། །རུང་བ་མེད་ན་ཞེས་པ་ནི་དངོས་སམ་བརྒྱུད་ནས་སེམས་ཅན་ལ་གནོད་པར་འགྱུར་བས་ནའོ། །འདུལ་བ་ལ་རྣམ་པ་མང་པོར་རྟོག་པ་ཞེས་པ་ནི། དོན་འབྱུང་བའི་གླེང་གཞི་ཞེས་སོགས་འོག་ནས་འབྱུང་བ་རྣམས་ཏེ། དེ་བཞིན་གཤེགས་པས་ཀུན་དགའ་བོར་བསླབ་པ་ཕྲ་མོ་བག་ཡངས་སུ་བྱ་བར་གསུངས་པས་ཤ་བཟའ་བ་གནང་ངོ་ཞེས་ཟེར་བའོ། །གཏན་ཚིགས་སུ་སྣང་བ་ཞེས་པའང་དེ་ཉིད་དོ། །བསྟན་པ་བརྗོད་པ་དེ་དང་དེ་ལ་ཞེས་པ་ནི། བདེན་བཞིའི་ཆོས་འཁོར་ནས་རིག་པ་འཛིན་པའི་སྡེ་སྣོད་བར་གྱི་བསྟན་པའོ། །བསླབ་པའི་གཞི་རིམ་པས་བཅའ་བ་རྣམ་པ་གསུམ་ནི། སོ་ཐར་དང་བྱང་སེམས་དང་རིག་པ་འཛིན་པའི་བསླབ་གཞིའོ། །ཐུབ་བསྟན་བྱི་དོར་ལས་ནི། འདུལ་བ་ལས་ཐོག་མར་མིའི་ཤ་དང་རྨིག་གཅིག་པའི་ཤ་ལ་སོགས་པ་བཀག་པའི་བསླབ་པ་བཅས། དེ་རྗེས་རྣམ་གསུམ་དག་པའི་ཤ་གནང་བའི་བསླབ་པ་བཅས་པ་སྟེ། འདུལ་བ་ལས་བཅས་པའི་རིམ་པ་གཉིས་དང་། ཐེག་པ་ཆེན་པོ་ལས་སྤྱིར་བཏང་དུ་ཤ་ཙམ་རང་ཤི་ཡན་ཆད་ཐམས་ཅད་བྱང་ཆུབ་སེམས་དཔའ་ལ་བཀག་པའི་བསླབ་པ་སྟེ་རྣམ་པ་གསུམ་བཅས་པའོ། །ཞེས་བླ་མ་སྔ་མ་དག་འཆད་དོ། །ཞེས་ཀྱང་གསུངས་སོ། །རང་ཤི་བ་བཅུ་ནི། ཕྱིའི་འགལ་རྐྱེན་སེམས་ཅན་དང་། སེམས་ཅན་མ་ཡིན་པ་ས་ཆུ་མེ་རླུང་འབྱུང་བ་བཞིས་ཤི་བ་སྟེ་ལྔ་དང་། ནང་གི་འགལ་རྐྱེན་རླུང་མཁྲིས་བད་ཀན་དང་འདུས་པ་སྟེ་ནད་བཞི་དང་། ཚེ་ཟད་པ་སྟེ་མཐུན་རྐྱེན་མ་ཚང་ནས་ཤི་བ་གང་ཡིན་པ་བཟའ་བའི་ཆེད་དུ་བྱས་པ་མ་ཡིན་པའོ། །འདིར་ནི་ཐམས་ཅད་ཀྱི་སོགས་ནི། སེམས་ཅན་ལ་དངོས་བརྒྱུད་ཀྱི་གནོད་པ་ཐག་བསྲིང་བའི་ཕྱིར། སྲོག་ཆགས་ཐམས་ཅད་ཀྱི་ཤ་དུས་ཐམས་ཅད་དུ་བཟའ་བའི་ཐབས་མེད་པར་ཞེས་འབྲུ་གཉེར་རོ། །ཚིགས་བཅད་དག་ལས། འཇིག་རྟེན་གཉིས་ཀ་ཞེས་པ་ནི། གསོད་པ་དང་ཉོ་བ་ལ་སྦྱར་བར་གསུངས། མ་བརྟགས་པ་དང་ཞེས་སོགས་ནི། བཟའ་བྱར་མ་བརྟགས་པ་སྟེ་མ་བསམས་པ་དང་། གཞན་ལ་མ་བསླངས་པ་དང་། གཞན་ལ་མ་བསྐུལ་བའོ། །ཡོང་མེད་པས་ཞེས་པ་ནི། སྤྱིར་ཤ་བཟའ་བའི་ཉེས་པས་དངོས་སུ་མ་བསྐུལ་ཡང་བརྒྱུད་ནས་བསྐུལ་པར་འགྱུར་བའི་ཕྱིར་ཞེས་སོ། །རན་པ་དང་ནི་མི་འཕྲོད་པར། །ཞེས་པ་ནི་སྔར་བསྟན་པའི་དྲང་སྲོང་གི་ཟས་དག་རན་པར་བཟའ་ཞིང་། ཤ་ལ་མི་འཕྲོད་པའི་འདུ་ཤེས་ཀྱིས་སྤང་ཞེས་པའོ། །ཝ་ལ་སོགས་དང་འགྲོགས་བྱ་བ། ཞེས་པ་ནི་དེ་དག་ཏུ་སྐྱེ་ཞིང་འགྲོགས་པའོ། །འཕགས་པའི་རྒྱལ་མཚན་ནོ། །ཞེས་པ་ནི། ཚུལ་ཁྲིམས་ཀྱིས་བརྒྱན་ཅིང་བདུད་ལས་རྒྱལ་བའི་རྒྱལ་མཚན་ནོ། །ཞེས་པའོ། །རྒྱའི་སློབ་དཔོན་ཝེན་ཧྭི་ཡིས་མཛད་པའི་འགྲེལ་བ་དང་སྦྱར་ནས་བསྒྱུར་བའི་ལང་གཤེགས་ལས། གཞན་ཡང་བློ་གྲོས་ཆེན་པོ། དེ་ལ་སྲོག་གཅོད་པ་དག་ནི་ཁེ་འདོད་པའི་ཕྱིར་སྲོག་བཅད་ནས་འཚོང་བར་བྱེད་དོ། །གང་བླུན་པོ་ཤ་ཟ་བ་དེ་དག་ནི་རིན་གྱིས་ཤ་རྣམས་ཉོ་བར་བྱེད་དོ། །སྲོག་གཅོད་པར་བྱེད་པ་དེ་དག་ཁེ་འདོད་པའི་ཕྱིར་ལྕགས་ཀྱུ་དང་རྒྱ་རྣམས་ཀྱིས་སྲོག་ཆགས་ནམ་མཁའ་ལ་རྒྱུ་པ་དང་། ཆུ་ལ་གནས་པ་དང་། ས་ལ་འགྲོ་བ་དག་རྣམ་པ་དུ་མས་གསོད་ཅིང་ཁེ་ཚོལ་བར་བྱེད་དོ། །བློ་གྲོས་ཆེན་པོ། བྱེད་དུ་མ་བཅུག་པ་དང་། མ་བཙལ་བ་དང་། འདུ་ཤེས་མེད་པ་ཞེས་བྱ་བའི་ཤ་གང་ཡང་མེད་པས་དེའི་ཕྱིར་ཤ་བཟའ་བར་མི་བྱའོ། །བློ་གྲོས་ཆེན་པོ་ངས་སྔར་ཤ་རྣམ་པ་ལྔ་དང་བཅུ་བཀག་ལ་མདོ་སྡེ་འདིར་ནི་རྣམ་པ་ཐམས་ཅད་དང་དུས་ཐམས་ཅད་དུ་ཐབས་ཀྱིས་གནང་བ་ཐམས་ཅད་ཀྱང་བཀག་གོ །ཞེས་དང་། བཅོལ་ཚོལ་འདུ་ཤེས་དེ་མེད་ན། །རྣམ་གསུམ་དག་པའི་ཤ་ཡང་མེད། །རྒྱུ་མེད་ལས་ནི་ཡོད་མིན་པས། །དེ་ཡི་ཕྱིར་ན་བཟའ་མི་བྱ། །ཞེས་དང་། བསླབ་བཏུས་སུ་ལང་གཤེགས་ཀྱི་ལུང་དྲངས་པ་ལས། རྣམ་གསུམ་དག་པའི་ཤ་རྣམས་ནི། །མ་བརྟགས་པ་དང་མ་བསླངས་དང་། །མ་བསྐུལ་བ་ཡང་སྤོང་མེད་པས། །དེ་བས་ཤ་ནི་མི་བཟའ་འོ། །ཞེས་ཚིག་ཅུང་ཟད་མི་འདྲ་བ་ཡོད་དོ། །མྱ་ངན་ལས་འདས་པ་ཆེན་པོའི་མདོ་ལས། །དེ་ནས་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །
ཤ་མི་འཚལ་བ་ལ་གཟུད་པ་ནི་ཆེས་ཆེར་བགྱི་བ་ལགས་ན་ཤ་མི་འཚལ་བ་ལ་ཤ་འཚལ་དུ་སྩལ་ན་ནོངས་པར་མི་འགྱུར་ལགས་སམ། བཀའ་བསྩལབ། རིགས་ཀྱི་བུ་ལེགས་སོ་ལེགས་སོ། །ཁྱོད་ཀྱིས་ངའི་དགོངས་པ་རིག་སྟེ། དམ་པའི་ཆོས་སྲུང་བས་ནི་དེ་ལྟར་བྱ་དགོས་སོ། །རིགས་ཀྱི་བུ་ད་ཕྱིན་ཆད་ངའི་ཉན་ཐོས་རྣམས་ཤ་ཟ་བར་མི་གནང་ངོ་། །ཡུལ་འཁོར་གྱི་བསོད་སྙོམས་ནི་བུའི་ཤ་དང་འདྲའོ་ཞེས་བྱ་ན་ཤ་བཟའ་བར་ངས་ཇི་ལྟར་གནང་། ཤ་ཟ་བ་ནི་བྱམས་པ་ཆེན་པོ་འཆད་པར་འགྱུར་རོ། །ཞེས་ངས་བསྟན་ཏོ། །གསོལ་བ། བཅོམ་ལྡན་འདས་འོ་ན་ཇི་ལྟར་མུ་གསུམ་ཡོངས་སུ་དག་པའི་ཤ་བཟའ་བར་གནང་ལགས། བཀའ་བསྩལབ། མུ་གསུམ་ཡོངས་སུ་དག་པ་འདི་ནི་ངས་རིམ་གྱིས་བསླབ་པའི་གཞི་བསྡམ་པའི་ཕྱིར་དེང་ངས་བོར་རོ། །གསོལ་བ། བཅོམ་ལྡན་འདས་ཅི་ལས་དགོངས་ཏེ་དོན་ཆེད་ཀྱི་མུ་དགུ་དང་། ཤ་རྣམ་པ་བཅུ་སྤང་བ་བཀའ་བསྩལལགས། བཀའ་བསྩལབ། ཚིག་བཞག་པ་དེ་དག་ཀྱང་ཤ་མི་བཟའ་བར་བསྡམ་པའི་ཕྱིར་བཅད་དོ། །གསོལ་བ། བཅོམ་ལྡན་འདས་ཅི་ལས་དགོངས་ཏེ་ཤ་དང་ཉ་ཤ་བཟའ་བ་ཡང་ཁ་ཟས་བཟང་པོར་གསུངས་ལགས། བཀའ་བསྩལབ། ངས་ནི་ཤ་དང་ཉ་ཤ་ཁ་ཟས་བཟང་པོར་མ་གསུངས་ཀྱི། ངས་ནི་བུ་རམ་ཤིང་དང་། འབྲས་སཱ་ལུ་དང་། འབྲུ་དང་། གྲོ་དང་། ནས་དང་། སྲན་སྡེའུ་དང་། སྲན་གྲེའུ་རྣམས་དང་། དངར་བག་ཁ་ར་དང་། ལི་ཁ་ར་དང་། སྦྲང་རྩི་དང་། མར་དང་། འོ་མ་དང་། འབྲུ་མར་རྣམས་ཁ་ཟས་བཟང་པོར་གསུངས་སོ། །ངས་ནི་ལུས་གཡོགས་པའི་ཕྱིར་གོས་སྣ་ཚོགས་ཀྱང་ཁ་དོག་ངན་པར་བསྒྱུར་བར་བྱའོ། །ཞེས་བསྟན་ན་ཤ་བཟའ་བའི་རོ་ལ་ཆགས་པ་ལྟ་ཅི་སྨོས། གསོལ་བ། དེ་ལྟ་ན་ནི་བའི་བཅུད་རྣམ་ལྔ་དང་། ཏིལ་དང་། འབྲུ་མར་ཤིང་གི་ཁུ་བ་དང་། ངང་དང་། ཟབ་དར་ལ་སོགས་པ་ཡང་ཁྲིམས་སུ་བཅའ་བའི་རིགས་ལགས་སོ། །བཀའ་བསྩལཔ། གཅེར་བུ་པའི་ལྟ་བ་མ་འཛིན་ཅིག ང་ནི་འདུ་ཤེས་གཞན་གྱིས་ད་ཁྱོད་ལ་བསླབ་པའི་གཞི་བཅའ་བར་བྱ་སྟེ། མུ་གསུམ་གྱི་ཤ་ཡང་མི་བཟའ་བར་བསྡམས་སོ། །དོན་ཆེད་དུ་བྱས་པ་ཁྱོད་ཀྱིས་རིག་པ་དེ་ཡང་བསྡམས་སོ། །ཤ་རྣམ་པ་བཅུ་ལ་མ་གཏོགས་པ་དེ་ཡང་སྤངས་སོ། །ཤི་བའི་ཤ་ཡང་སྤངས་སོ། །ཤ་ཟ་བ་ནི་འགྲོ་ཡང་རུང་འདུག་ཀྱང་རུང་སྟེ། སྲོག་ཆགས་ཐམས་ཅད་དེའི་དྲི་ཚོར་ནས་དེས་འཇིགས་ཏེ། དཔེར་ན་མིས་ཤིང་ཀུན་ནམ་སྒོག་སྐྱ་ཟོས་ན་མིའོ་ཅོག་གི་སེམས་མ་དད་པར་འགྱུར་ཞིང་མི་མཐུན་པར་འགྱུར་ལ། མི་མང་པོ་ཚོགས་པའང་སྐྱེ་བོ་མང་བས་གང་བའི་ནང་དུ་སེམས་ཅན་དེ་དག་གིས་ཆེ་གེ་མོ་ཞིག་གིས་ཟོས་སོ། །ཞེས་ཤེས་པ་དེ་བཞིན་དུ་སྲོག་ཆགས་ཐམས་ཅད་ཀྱིས་ཤ་ཟ་བའི་མི་ངོ་ཤེས་ཏེ། དེ་དག་གིས་དྲི་ཚོར་ནས་འཆི་བའི་འཇིགས་པས་སྐྲག་པར་འགྱུར་ཏེ། དེ་རྒྱུ་ཞིང་འགྲོ་བ་ན་ཆུ་དང་། སྐམ་ས་དང་། ནམ་མཁའ་ལ་གནས་པའི་སྐྱེ་བོ་རྣམས་སྐྲག་སྟེ། བདག་ཅག་འདིས་གསད་དུ་འོང་ངོ་སྙམ་ནས་འཁམས་ནས་ཀྱང་འཆི་བར་འགྱུར་རོ། །རྒྱུ་དེ་དག་གིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤ་མི་ཟའོ། །གདུལ་བར་བྱ་བའི་དབང་གིས་ནི་ཤ་ཟ་བ་ལྟ་བུར་ཡང་སྟོན་མོད་ཀྱི། ཁ་ཟས་ཐ་མལ་པ་ཡང་མི་ཟ་ན་ཤ་ལྟ་ཅི་སྨོས། རིགས་ཀྱི་བུ་ང་འདས་པའི་འོག་ཏུ་ལོ་བརྒྱ་ཕྲག་མང་པོ་འདས་པ་ན་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་རྣམས་མེད་པར་གྱུར་ལ། དམ་པའི་ཆོས་གཏན་ཞིག་པའི་ཚེ་དགེ་སློང་འདུལ་བ་དང་མ་མོ་འཛིན་པ། རྟོག་པ་སྣ་ཚོགས་ཅན། རང་གི་ལུས་གསོ་བར་བྱེད་པ། ཤ་སྣ་ཚོགས་གཅེས་པར་འཛིན་པ། ཁམས་འཁྲུགས་པ་དང་། བཀྲེས་པ་དང་། སྐོམ་པས་གཟིར་བ། ཆ་ལུགས་འཇིགས་འཇིགས་ལྟར་འདུག་པ། བ་ལང་རྫི་འདྲ་བ། བྱ་པ་འདྲ་བ། ཆོས་གོས་ཚོན་ཅན་གྱི་རྟགས་འཆང་བ། བྱི་ལའི་རྟུལ་ཞུགས་སྤྱོད་པ། བདག་ནི་དགྲ་བཅོམ་པ་ཡིན་ནོ། །ཞེས་ཁས་འཆེ་བ། གནོད་པ་མང་པོས་ཉེན་པ། རང་གི་གཅིན་དང་ཕྱི་སས་ལུས་གོས་པ། ཐུབ་པ་བཞིན་དུ་ཆ་ལུགས་བཟང་པོར་འཆོས་པ། དགེ་སྦྱོང་མ་ཡིན་པར་དགེ་སྦྱོང་ལྟར་འཆོས་པ། དམ་པའི་ཆོས་ལྟར་བཅོས་མའི་ཡི་གེ་འཆང་བ་དག་འབྱུང་བར་འགྱུར་ཏེ། དེ་དག་གིས་ངས་བཅས་པའི་འདུལ་བ་དང་། ཆོ་ག་དང་། སྤྱོད་ཡུལ་དང་ལྡན་པའི་ཚུལ་དང་། རུང་བ་མ་ཡིན་པ་ལ་ཆགས་པ་ལས་རྣམ་པར་གྲོལ་བ། ཐར་བའི་དེ་ཁོ་ན་ཉིད་ཀྱི་ཡི་གེ་བཤིག་ནས་འདུལ་བ་དང་། མདོ་སྡེ་སོ་སོ་ནས་ཅི་དགའ་མགུར་འཆོས་ཤིང་སྨྲ་བར་བྱེད་དེ། འདི་ལྟར་བདག་ཅག་གི་འདུལ་བ་ལས་བཅོམ་ལྡན་འདས་ཀྱིས་ཤའི་བཅུད་ཀྱི་སྦྱིན་པ་ནི་རུང་བ་ཡིན་ནོ་ཞེས་གསུངས་སོ་ཞེས་ཟེར་ཞིང་། ཤཱཀྱའི་བུ་དགེ་སྦྱོང་རྣམས་བདག་ཉིད་ཀྱིས་རང་བཟོར་བྱེད་ཅིང་འགལ་བར་སྨྲ་བ་དག་འབྱུང་བར་འགྱུར་རོ། །རིགས་ཀྱི་བུ་གཞན་ཡང་རུང་བ་མ་ཡིན་པའི་འབྲས་རྗེན་པ་དང་། ཤ་དང་ཉ་ཤ་ལེན་པ་དང་། སྣམས་སུ་སྦྱོར་བ་དང་། འབྲུ་མར་གྱི་སྣོད་དང་། གདུགས་བྱེད་པ་དང་། ལྷམ་བྱེད་པ་དང་། རྒྱལ་པོ་ལ་སྟེན་པ་དང་། མོ་ཡིག་འཆང་བ་དང་། སྨན་པའི་དཔྱད་ལ་བརྩོན་པ་དང་། བྲན་དང་། བྲན་མོ་དང་། གསེར་དང་། དངུལ་དང་། བྱི་རུ་དང་། དུང་དང་། མན་ཤེལ་དང་། མུ་ཏིག་གི་དོ་ཤལ་དང་། ཤིང་ཐོག་རྣམས་ལེན་པ་དང་། རིག་པ་དང་། རི་མོ་མཁན་དང་། གཟུགས་མཁན་དང་། སྐྱེད་ཤིང་འཛུགས་པ་དང་། གསང་སྔགས་དང་། སྨན་དང་བྱིས་པའི་རྩེད་མོ་དང་། གར་ཐབས་ཀྱི་ཡན་ལག་དང་། མིག་འཕྲུལ་དང་། རེངས་པར་བྱ་བའི་ཕྱིར་སྦྱོར་བ་དང་། གླུ་གར་དང་། མེ་ཏོག་ཕྲེང་དང་། སོ་རྩི་དང་། སྨན་མར་ཆེན་པོ་བསྐོལ་བ་དང་། སྤོས་དང་བྱུག་པ་འཆང་བ་དང་། འགྲོས་འཆོས་པ་རྣམས་སློབ་པ་དང་། སྒེག་པའི་སྦྱོར་བ་ལ་བརྩོན་པ་དག་འབྱུང་བར་འགྱུར་ཏེ། དེ་དག་སྤངས་པ་ལ་ནི་དགེ་སློང་ཞེས་ང་ཟེར་རོ། །གསོལ་བ། བཅོམ་ལྡན་འདས་འོ་ན་ཇི་ལྟར་བགྱི་ལགས། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གཞན་གྱིས་སྩལ་པས་འཚོ་བ་རྣམས་ཀྱིས་ཡུལ་གང་མ་བརྟགས་པའི་ཟས་མོད་པ་དེར་བསོད་སྙོམས་ཤ་དང་འདྲེས་པ་ཇི་ལྟར་དག་པར་བགྱི་ལགས། བཀའ་བསྩལབ། རིགས་ཀྱི་བུ་ཅི་ནས་འདུལ་བ་དང་མི་འགལ་བར་ཆུས་བཀྲུས་ཏེ་བཟའ་བར་བྱའོ། །ཞེས་ངས་བསྟན་ཏོ། །ཡུལ་དེ་ལྟ་བུ་ན་ཟས་དང་། སྐོམ་ཤའི་ཟས་ཀྱིས་ཤས་ཆེར་འདྲེས་པར་སྣང་བ་དེ་ལྟ་བུ་ནི་སྤང་བར་བྱའོ། །སྣོད་གཅིག་ལ་གཅིག་རེག་སྟེ་ཁ་ཟས་དངོས་མ་འདྲེས་པ་དེ་ལ་ནི་ཉེས་པ་མེད་དོ། །ཤའམ། ཉ་ཤའམ། རི་དྭགས་ཀྱི་ཤའམ། རྨིག་པ་སྐབསམ་པོའམ། ཤའི་བག་གཞན་གྱིས་འབགས་པ་རྣམས་ཀྱང་ལྟུང་བྱེད་དུ་འགྱུར་རོ། །ཞེས་ང་ཟེར་རོ། །སྔར་ནི་དོན་གྱི་དམིགས་བྱུང་བའི་སྐབས་སུ་བསྟན་ཏོ། །ད་འདིར་ནི་ཤ་ཟ་བ་ལས་གནོད་པར་འགྱུར་བར་ངས་བསྟན་ཏོ། །འདི་ནི་ང་ཡོངས་སུ་མྱ་ངན་ལས་འདའ་བའི་ཚེ་མང་དུ་བཤད་པ་ཡིན་ཏེ། འདི་ནི་འདྲི་བའི་དབང་ཞེས་བྱའོ། །ཞེས་གསུངས་སོ། །གཉིས་པ་དགོངས་འགྲེལ་ལས་གསུངས་པ་ནི། བསླབ་བཏུས་ལས། དེ་ལྟར་རེ་ཞིག་རྟག་ཏུ་བའི་སྨན་གྱིས་ལུས་བསྲུང་བར་བྱ་བ་ཡིན་ནོ། །དེ་ལ་ཡང་ཉ་དང་ཤས་ནི་མ་ཡིན་ཏེ། ལང་ཀར་གཤེགས་པའི་མདོ་ལས་བཀག་པའི་ཕྱིར་ཏེ། འདི་ལྟར་བྱང་ཆུབ་སེམས་དཔའ་སྙིང་བརྩེ་བའི་བདག་ཉིད་ཅན་གྱིས་ཤ་ཐམས་ཅད་མི་བཟའོ་ཞེས་བཤད་དོ། །དེ་བཞིན་དུ་སྦྱར་ཏེ། འཁྲུལ་བ་དང་ནི་གཉེན་བཤེས་དང་། །ཁུ་ཆུ་ཁྲག་ལས་བྱུང་བའི་ཕྱིར། །ཞེས་པ་ནས། འདི་ནི་འཕགས་པའི་རྒྱལ་མཚན་ནོ། །ཞེས་པའི་བར་དྲངས་ནས། ཡེ་ཤེས་ལྡན་གྱི་ལེའུ་ལས། ཤ་ཟ་བ་གང་འབྱུང་བ་དེ་ནི་དོན་ཆེན་པོ་བསྒྲུབ་པའི་ཕྱིར་ཉེས་པ་མེད་དེ། དེ་ལས་འདི་སྐད་དུ། དགེ་སློང་འདི་ནི་འཆི་བའི་དུས་བགྱིས་ན། །འཛམ་བུ་གླིང་དུ་ཏིང་འཛིན་སྒྲ་ཡང་ནི། །སེམས་ཅན་རྣམས་ལ་རྟག་ཏུ་ནུབ་པར་འགྱུར། །འདིས་གསོས་པས་ནི་ཏིང་འཛིན་རྣམས་ཀྱང་ཐོབ། །ཅེས་གསུངས་སོ། །དེ་ནི་སྙིང་རྗེ་ཆེན་པོ་ལ་མངོན་པར་བརྩོན་པ་སྟེ། དེ་ལ་བྱམས་པ་མེད་དུ་མི་དོགས་པས་ཉེས་པ་མེད་དོ། །འཕགས་པ་དཀོན་མཆོག་སྤྲིན་ལས། དུར་ཁྲོད་པས་ཤ་དང་འབགས་པ་མེད་པར་བྱའོ་ཞེས་གསུངས་པ་གང་ཡིན་པ་དེ་ནི་དེ་ལས་གཞན་པའི་རང་བཞིན་ཅན་གྱི་སེམས་ཅན་གྱི་དོན་དུ་བསྟན་པའི་ཕྱིར་རོ། །འདུལ་བ་ལས་དེ་ལ་རྣམ་པ་གསུམ་ཡོངས་སུ་དག་པ་ཟོས་ན་སྤང་བའི་བར་ཆད་དུ་མི་འགྱུར་རོ་ཞེས་གང་གནང་བ་དེ་ནི་ཡོངས་སུ་སྤངས་པས་དག་པར་ལྟ་བ་རྣམས་ཀྱིས་མངོན་པའི་ང་རྒྱལ་བསལ་བ་དང་། སྐལ་བ་ཡོད་ཀྱང་དེ་ལ་ཆགས་པས་བསྟན་པ་ལ་འཇུག་མ་ནུས་པ་སྤང་བའི་ཕྱིར་རོ། །དེ་སྐད་དུ་ལང་ཀར་གཤེགས་པའི་མདོ་ལས་ཀྱང་། བསྟན་པ་བརྗོད་པ་དེ་དང་དེ་ལས་བསླབ་པའི་གཞི་རིམ་པར་བཅའ་བ་སྐབས་ཀྱི་གདང་བུ་བྲེ་བའི་ཚུལ་དུ་རྣམ་པ་གསུམ་བཅས་ནས་དེའི་ཆེད་དུ་བྱས་པ་རྣམས་ཀྱང་བཀག་སྟེ། དེ་ནས་ཐ་ན་རང་ཤི་བ་བཅུའི་ཤ་ཡང་བཀག་གོ་ཞེས་གསུངས་སོ། །ཞེས་དང་། རྟོག་གེ་འབར་བ་ལས། འདིར་སྨྲས་པ། སངས་རྒྱས་པ་ནི་འདི་ལྟར་བདག་ཉིད་ཆོས་ལ་གནས་པ་ཡིན་ནོ་སྙམ་དུ་སེམས་ཤིང་གཞན་ལ་ཁ་ཟེར་ཞིང་དམོད་པར་བྱེད་ཀྱང་རང་ཉིད་ཤ་ཟ་བ་ལ་འབད་པ་ཆེར་བྱེད་པར་གྲགས་ལ། སེམས་ཅན་སྲོག་མ་བཅད་པར་ནི་ཤ་རྙེད་པར་མི་འགྱུར་བས་དེས་ན་སྙིང་རྗེ་དང་བྲལ་བ་ཡིན་པའི་ཕྱིར། རི་དྭགས་ཀྱི་རྔོན་པ་ལ་སོགས་པ་བཞིན་དུ་སྡིག་པ་བྱེད་པ་ཉིད་ཡིན་ནོ་ཞེ་ན། འདི་ལ་བརྗོད་པར་བྱ་སྟེ། ཐུགས་རྗེ་ཆེན་པོ་དང་ལྡན་པའི་བཅོམ་ལྡན་འདས་སེམས་ཅན་ཐམས་ཅད་ལ་བུ་གཅིག་པ་ལྟར་དགོངས་པ། རུས་པ་དང་། རྐང་པའི་གཏིང་ནས་བརྩེ་བ་མངའ་བ་དེས་ཇི་ལྟར་ན་ཤ་ཟ་བར་རྗེས་སུ་གནང་བ་ཡིན། ཐེག་པ་ཆེན་པོའི་གཞུང་ལས། བཅོམ་ལྡན་འདས་ཀྱིས་མ་གནང་བ་ཁོ་ན་ཡིན་ཏེ། གླང་པོའི་རྩལ་དང་། སྤྲིན་ཆེན་པོ་དང་། ལང་ཀར་གཤེགས་པ་དང་། སོར་མོའི་ཕྲེང་བ་ལ་སོགས་པའི་མདོ་ལས། ཤ་ཟ་བ་རྣམ་པ་ཐམས་ཅད་དུ་བཀག་པ་ཉིད་ཡིན་ནོ། །ཉན་ཐོས་ཀྱི་ཐེག་པའི་གཞུང་ལས་ནི། མཐའ་གསུམ་དག་པའི་ཤ་གང་དག ཟོས་ཀྱང་སྡིག་ཏུ་མི་འགྱུར་ཏེ། །ད་ངས་མ་སོགས་སུ་འགྱུར་བའི་ཕྱིར། །སློང་མོའི་ཟས་ལ་སྡིག་མེད་བཞིན། །ཞེས་འབྱུང་སྟེ། འདི་ལྟར་བདག་གི་ཆེད་དུ་སྲོག་ཆགས་བསད་པར་རང་གིས་མཐོང་བ་ཡང་མེད། ཐོས་པ་ཡང་མེད། དོགས་པ་ཡང་མེད་པ་ནི་སྡིག་པའི་སེམས་དང་བྲལ་བ་ཡིན་པས་ནད་ལ་སོགས་པ་ཞི་བར་བྱ་བའི་དོན་དུ་དེ་ལྟ་བུའི་ཤ་ཟོས་ཀྱང་སྡིག་ཏུ་འགྱུར་བར་བརྟག་པར་མི་བྱ་སྟེ། དྭངས་མ་དང་། གཅིན་དང་། ངན་སྐྱུགས་ལ་སོགས་པར་འགྱུར་བའི་ཕྱིར། ཇི་ལྟར་སློང་མོས་རྙེད་པའི་ཟས་ནི་སློང་མོའི་ཟོས་ཏེ། དེ་ཟོས་པས་སྡིག་ཏུ་མི་འགྱུར་བ་བཞིན་ནོ། །གཞན་ཡང་གང་ཡང་ཤ་ནི་ཟོས་པ་ཡི། །སྡུག་པའི་རྒྱུར་ནི་མི་འགྱུར་ཏེ། །བཀྲེས་པ་བཟློག་པའི་རྒྱུ་ཡིན་ཕྱིར། །མ་བླངས་བྱིན་པའི་ཟས་བཞིན་ནོ། །ཤ་ཞེས་བྱ་བ་ནི་ཆོས་ཅན་ནོ། །དེ་ཟོས་པས་སྡིག་པའི་རྒྱུར་མི་འགྱུར་ཞེས་བྱ་བ་ནི་ཆོས་སོ། །བཀྲེས་པ་ཟློག་པར་བྱེད་པ་སྟེ། ཞི་བར་བྱེད་པའི་རྒྱུ་ཡིན་པའི་ཕྱིར། ཟས་ཀྱི་དུས་སུ་མ་བླངས་པར་རྙེད་པའི་ཟས་སྐོམ་བཞིན་ནོ། །ཤ་ནི་མི་བཟའ་བ་ཡིན་ཕྱིར། །མི་ཟ་ཞེ་ན་ལུས་ལ་གཏོགས། །ས་བོན་དང་ནི་བརྟན་བྱེད་པ། །མི་གཙང་མི་གཙང་སྲིན་བུ་བཞིན། །ཤ་ནི་བཟའ་བར་མི་བྱ་བ་ཉིད་དེ། ཕྱི་ས་ལ་སོགས་པ་བཞིན་ནོ་ཞེ་ན་རང་གི་ལུས་འདི་ཡང་བརྟག་པར་བྱ་བ་ཉིད་ཡིན་ཏེ། སྐྲ་དང་། སེན་མོ་དང་། བ་སྤུ་དང་། པགས་པ་དང་། ཕྱི་ཤུན་དང་། ཤ་དང་། རྒྱུས་པ་དང་། ཁྲག་དང་། རུས་པ་དང་། རྐང་དང་། མཁལ་མ་དང་། སྙིང་དང་། གློ་བསྲལ་དང་། མཆིན་པ་དང་། མཚེར་པ་དང་། གློ་དང་། རྒྱུ་མ་དང་། བཞག་དང་། ལོང་ཀ་དང་། གཅིན་དང་། ཕྱི་ས་དང་། མཆིལ་མ་དང་། རྔུལ་དང་། ལུད་པ་དང་། མཆི་མ་དང་། རྣག་དང་། མཁྲིས་པ་དང་། མཆིལ་སྣབས་དང་། ཞག་དང་། ཆུ་སེར་དང་། དྲི་མ་དང་། ཀླད་པ་དང་། ཀླད་རྒྱས་དང་། མིག་རྣག་དང་། རྣ་སྤབས་ཞེས་བྱ་བ་ལ་སོགས་པ་མི་གཙང་བའི་རྫས་སུམ་ཅུ་རྩ་དྲུག་གིས་གང་བའི་རྨའི་སྒོ་དགུ་ནས་རྟག་ཏུ་མི་གཙང་བ་ཟག་པ་ཁྲག་དང་ཁུ་བ་མི་གཙང་བའི་ས་བོན་ལས་བྱུང་བ། མི་གཙང་བའི་ཁུ་བས་ཉེ་བར་བསྟན་ཅིང་། ཕྱི་ས་དང་ངན་སྐྱུགས་ཀྱི་དྭངས་མས་གཡོགས་ནས། མངལ་གྱི་ནང་ནས་བྱུང་བའི་ལུས་འདི་ནི་མི་གཙང་བའི་ནང་ན་གནས་པའི་སྲིན་བུ་དང་འདྲ་བར་ཤིན་ཏུ་མི་གཙང་བ་ཡིན་ན་ཤ་ཟོས་པས་མི་གཙང་བ་ལྷག་པ་ཅི་ཞིག་ཏུ་འགྱུར། དེས་ན་འདི་ནི་ཅི་ཡང་མ་ཡིན་ནོ། །གལ་ཏེ་ཡང་སྐྱེ་བོ་བཟང་པོ་རྣམས་ཀྱིས་འདོད་པ་ཡིན་དུ་ཟིན་ཀྱང་ཉ་ལ་སོགས་པའི་ཤ་ནི་བཟའ་བར་མི་བྱ་སྟེ། ཁུ་བ་དང་ཁྲག་ལས་བྱུང་བ་ཡིན་པའི་ཕྱིར། བ་ལང་དང་བོང་བུའི་ཤ་བཞིན་ནོ་ཞེ་ན། འདི་ལ་བརྗོད་པར་བྱ་བ་ནི། ཁུ་བ་ལ་སོགས་ལས་བྱུང་བའི་ཕྱིར། །ཉ་ཤ་སོགས་ནི་སྨད་ཅེ་ན། །མར་དང་འོ་སོགས་རྒྱུ་ཡིན་པས། །འདི་ནི་མ་ངེས་པ་ཉིད་ཡིན། ཁུ་བ་དང་ཁྲག་ལས་བྱུང་བ་ཉིད་ཡིན་པའི་ཕྱིར་ཅི་བ་ལང་ལ་སོགས་པའི་ཤ་བཞིན་དུ་ཉ་ཤ་ལ་སོགས་པ་ཡང་བཟའ་བར་བྱ་བ་མ་ཡིན་པ་ཞིག་ཡིན་ནམ། འོན་ཏེ་ཁུ་བ་དང་ཁྲག་ལས་བྱུང་བ་ཡིན་པའི་ཕྱིར། མར་དང་འོ་མ་ལ་སོགས་པ་བཞིན་དུ་བཟའ་བར་བྱ་བ་ཉིད་ཡིན་ཞེས་ཐེ་ཚོམ་དུ་འགྱུར་བས་གཏན་ཚིགས་མ་ངེས་པ་ཉིད་ཡིན་ནོ། །གལ་ཏེ་ཡང་ཟ་བ་པོ་མེད་ན་གསོད་པ་པོ་ཡང་མེད་པར་འགྱུར་བས་དེས་ན་སྲོག་གཅོད་པ་ནི་ཟ་བ་པོ་ཉིད་ཡིན་ཏེ། འཚོ་བར་བྱེད་པའི་རྒྱུ་མཚན་ཡིན་པའི་ཕྱིར་ཤའི་ཕྱིར་གསོད་དུ་འཇུག་པ་ལྟ་བུའོ་ཞེ་ན། དེ་ལ། ཤ་ཟ་སྲོག་གཅོད་ཉིད་ཡིན་ཏེ། །དེའི་ཕྱིར་རྒྱུ་མཚན་ཕྱིར་ཞེ་ན། །པགས་སོགས་ཐོགས་པས་གཏན་ཚིགས་ནི། །མ་ངེས་པ་ཉིད་ཡིན་པར་འགྱུར། །གང་པགས་པ་ལ་སོགས་པ་ཐོགས་པའི་དཀའ་ཐུབ་མེད་ན་ཤར་བ་ལ་སོགས་པ་གསོད་པར་ཡང་མི་འགྱུར་རོ། །དེས་ན་དེ་ནི་རྒྱུ་མཚན་ཡིན་པའི་ཕྱིར་ཤའི་ཕྱིར་གསོད་པར་འཇུག་པ་པོ་བཞིན་དུ་ཤ་ཟ་བ་སྲོག་གཅོད་པ་ཉིད་ཡིན་པར་འགྱུར་རམ། འོན་ཏེ་དེའི་རྒྱུ་མཚན་ཡིན་པའི་ཕྱིར་པགས་པ་ལ་སོགས་པ་འཆང་བ་བཞིན་དུ་སྲོག་གཅོད་པ་མ་ཡིན་པ་ཉིད་དུ་འགྱུར་ཞེས་བྱ་བས་གཏན་ཚིགས་མ་ངེས་པ་ཉིད་ཡིན་ནོ། །རྒྱུ་མཚན་ཙམ་གྱིས་རྟོགས་པར་བྱེད་ན་སྐྱོན་མང་པོ་གཞན་ཡང་ཡོད་པར་ཐལ་བར་འགྱུར་ཏེ། ཇི་ལྟར། འཇལ་དང་སྲང་ལ་གཡོ་བྱེད་དང་། །ཉོ་བར་འདོད་པ་མི་དགེ་མཉམ། །འཚོ་བྱེད་ནོར་ནི་རྙེད་པ་དེའི། །གང་ཡང་སྡིག་པ་དག་ལས་ནི། །སྐྱོན་ནི་གཉིས་ཀྱིས་ལྷག་པར་དུ། །ཉོ་བ་པོ་ལས་འབྱུང་བར་འདོད། །དེ་བཞིན་བུད་མེད་བདག་པོ་བཞིན། །འདོད་པའི་ཁ་ཟས་སྦྱིན་བྱེད་དང་། སྐལ་བ་ལྡན་པའི་བུད་མེད་དང་། །གང་དག་ཆོས་དེ་སྟོན་པ་དང་། །ཚུལ་ཁྲིམས་མེད་ལ་དམོད་པ་དག  སྐྱོན་ཚོགས་འཛོམས་ཕྱིར་ཏི་ཏི་རི། །དགྲ་གསོས་ལས་ཀྱང་ངེས་པར་ནི། །ཆོས་མ་ཡིན་པ་འཐོབ་པར་འགྱུར། །ཀུན་དགའ་ར་བ་ཁྲོན་པ་རྫིང་། །དེ་ནི་ལུས་ཅན་ཤི་གྱུར་ན། །བྱེད་པའི་སྐྱེ་མཆེད་ཡིན་པའི་ཕྱིར། དེ་ལ་སྐྱོན་འདི་ཡོད་པར་འགྱུར། །གསད་བྱ་ཡོད་པས་གསོད་ཡོད་ཀྱི། །གང་ཕྱིར་མེད་ན་མ་ཡིན་ནོ། །དེས་ན་གསད་བྱ་གསོད་པ་གཉིས། །སྡིག་པ་མཉམ་པར་འཐོབ་པར་འགྱུར། །མཐོང་དང་ཐོས་དང་བསྡམས་པ་དང་། །རེག་དང་དྲན་པ་ཉིད་དང་ནི། །ཤ་ལ་བྱས་ནའང་ཆོས་མིན་འབྲེལ། །འདི་ལྟ་བུར་ནི་འགྱུར་བ་ཡིན། །གསལ་བར་བྱེད་པའི་ཉི་མ་དང་། །སྐྱེ་བའི་རྒྱུ་ནི་ཕ་དག་དང་། །སྐྱོང་བར་བྱེད་པའི་མི་བདག་དང་། །དེ་རྣམས་སྡིག་པའི་བྱེད་པོ་ཉིད་། །གོས་བྱེད་པ་ཡི་ལྟར་བྱས་ནས། །ཟས་ཀྱི་བྱ་བའང་མི་རིགས་ཏེ། །གང་ཕྱིར་སྐྱོན་ནི་གཉིས་འབྱུང་བ། །མ་ཟོས་པ་ལ་མ་ཡིན་ཏེ། །ཟོས་ལས་སྲོག་ཆགས་སྐྱེ་འགྱུར་ཞིང་། །དེ་དག་ཐུར་དུ་འབྱུང་བར་འགྱུར། །སྐྱེས་པ་ཉམས་འགྱུར་མ་ཟོས་ན། །མ་སྐྱེས་སྐྱེ་བར་མི་འགྱུར་རོ། །གལ་ཏེ་གཞན་གྱི་རྒྱུ་མཚན་གྱི། །སྐྱོན་དེ་ཁྱོད་ནི་མི་འདོད་ན། །གཞན་གྱིས་བསད་པར་གྱུར་པ་ཡང་། །སྡིག་དེ་སྤྱོད་པ་ག་ལ་འོང་། །གང་ཕྱིར་མི་སྡིག་གནང་མི་སྦྱིན། །དེས་ན་སྡིག་དེ་ཡོད་མ་ཡིན། །དེ་ཕྱིར་ཤ་སོགས་རྗེས་གནང་བ། །སྐྱོན་མེད་པར་ནི་གཟུང་བར་བྱ། །གཞན་ཡང་། ཤ་ཟ་བ་ནི་སྐྱོན་བཅས་མིན། །དེ་ཚེ་སྲོག་ཆགས་གནོད་མིན་ཕྱིར། །མུ་ཏིག་རྨ་བྱའི་སྒྲོ་སོགས་དང་། །འབྲས་དང་ཆུ་ཡི་དགོས་པ་བཞིན། །སྲོག་ཆགས་ཀྱི་ལུས་ལ་སྡུག་བསྔལ་བ་བསྐྱེད་ནས་ཤ་ཟོས་ན་སྐྱོན་དང་བཅས་པར་འགྱུར་གྱི། ཤ་ཟ་བའི་དུས་ན་སྲོག་ཆགས་ཀྱི་ལུས་ཀྱི་ཤ་ལ་སེམས་མེད་པས་སྡུག་བསྔལ་སྐྱེ་བར་མི་འགྱུར་ན་སྡིག་པར་ལྟ་ག་ལ་འགྱུར་ཏེ། །ཇི་ལྟར་ཉ་ཕྱིས་དང་། ཉ་དང་། གླང་པོ་ཆེ་མུ་ཏིག་གི་འབྲས་བུ་རྣམས་དང་། རྨ་བྱའི་སྒྲོ་དང་། གཡག་རྔ་དང་། སོ་དང་། རུས་པ་དང་། པགས་པ་ལ་སོགས་པ་རྣམས་ཉེ་བར་ལོངས་སྤྱོད་པར་བྱེད་པའི་དུས་ན། སྲོག་ཆགས་ལ་སྡུག་བསྔལ་ཅུང་ཞིག་ཀྱང་མེད་པ་དང་། །འབྲས་བུ་དང་། ཆུ་ལ་སོགས་པ་ལོངས་སྦྱོད་པའི་དུས་ན་གང་ལ་ཡང་གནོད་པ་མེད་པ་ལྟར་དེ་བཞིན་དུ་ཤ་ཟ་པར་བྱེད་ཀྱང་དེའི་ཚེ་གནོད་པ་མེད་པས་སྐྱོན་མེད་དེ། སྐྱོན་ཡོད་ན་ནི་ཤི་བའི་རོ་སྲེག་པར་ཡང་སྡིག་པ་ཡོད་པར་འགྱུར་རོ། །གལ་ཏེ་ཡང་འདིར་དེ་ལྟ་ན་ཡང་ཤ་ནི་བཟའ་བར་བྱ་བ་མ་ཡིན་ཏེ། འདོད་ཆགས་ལ་སོགས་པ་སྐྱེ་བར་བྱེད་པ་ཉིད་ཡིན་ཏེ། ཤ་ཟོས་ན་ནི་སྟོབས་སྐྱེ་བར་འགྱུར་ལ། སྟོབས་ལས་ནི་འདོད་ཆགས་ལ་སོགས་པ་སྐྱེ་བར་འགྱུར་བའི་ཕྱིར་རོ། །ཞེ་ན་དེ་ལ། འདོད་ཆགས་ཀུན་རྟོག་ལས་བྱུང་ཕྱིར། །ཤ་ཟོས་དེ་ཡི་རྒྱུ་མ་ཡིན། །དེ་མ་ཟོས་ལའང་དེ་འབྱུང་སྟེ། རྩྭ་ཟན་བ་ལང་ལ་སོགས་བཞིན། །ཞེས་བརྗོད་པར་བྱ་སྟེ། འདོད་ཆགས་དང་། ཞེ་སྡང་དང་། གཏི་མུག་རྣམས་རྩ་བར་གྱུར་པ་ལས་འབྱུང་གི་ཤ་ཟོས་པ་ལས་མ་ཡིན་ཏེ། ཇི་ལྟར། ཀུན་རྟོག་ལས་ནི་འདོད་སྐྱེས་པས། །འདོད་པའི་རྩ་བར་ཤེས་གྱིས་ཏེ། །ཁྱེད་ནི་ཀུན་རྟོག་མ་བྱེད་དང་། །དེས་ན་ཁྱོད་ལ་འབྱུང་མི་འགྱུར། །ཞེས་བྱ་བ་ལ་སོགས་པ་འབྱུང་བ་ལྟ་བུ་སྟེ། ཅི་བ་ལང་དང་། བོང་བུ་ལ་སོགས་པ་རྩྭ་ཟ་བ་དེ་དག་དུས་ཐམས་ཅད་དུ་འདོད་ཆགས་ཀྱི་སེམས་ཀྱིས་གནོད་པར་གྱུར་པ་གང་ཡིན་པ་དེ་དག་ཅི་ཤ་ཟ་བ་ཡིན་ནམ། དེས་ན་མཐའ་གསུམ་དག་པའི་ཤ་ཟོས་ནས། སྐྱོན་དང་ལྡན་པར་འགྱུར་བ་མ་ཡིན་པ་ཉིད་དེ། ཇི་ལྟར། མཐོང་དང་ཐོས་དང་དོགས་པ་ཡིས། །གང་གི་ཆེད་དུ་བྱས་ཤེས་པའི། །ཤ་དེ་དེ་ཡིས་བཟའ་མི་བྱ། །དེ་ལས་གཞན་གང་ཡིན་དེས་བཟའ། །རོ་ཆགས་ཚོལ་དང་གསོད་པ་དང་། །སྙིང་རྗེ་མེད་པའི་བསམ་སྤངས་ནས། །ཤ་ནི་ཟོས་པར་གྱུར་ན་ཡང་། །སྐྱོན་བཅས་མ་ཡིན་ཟས་མཆོག་བཞིན། །ཞེས་བྱ་བ་ལ་སོགས་པ་འབྱུང་བ་ལྟ་བུའོ། །ཞེས་གསུངས་སོ། །དེ་ལྟར་ན་ཐེག་ཆེན་པའི་ལུགས་ཀྱི་རུང་བ་དང་རུང་བ་མ་ཡིན་པའི་ཤའི་ཁྱད་པར་ནི། ཁ་ཅིག་ལང་གཤེགས་ལས། མཐོང་དང་ཐོས་དང་དོགས་པ་ཡི། །ཤ་རྣམས་ཐམས་ཅད་རྣམ་པར་སྨད། །ཅེས་གསུངས་པ་འདིའི་ལུགས་ཀྱི་རྣམ་གསུམ་དག་པའི་ཤའི་ངོས་འཛིན་ཡིན་པས་འདུལ་བ་དང་ཁྱད་པར་མེད་དེ། བཟའ་བ་པོ་རང་གི་ཆེད་དུ་བྱས་པར་རང་ལ་མཐོང་ཐོས་དོགས་གསུམ་ཡོད་མེད་ཡིན་ཟེར། ཁ་ཅིག་ནི། འདུལ་བ་ཚིག་ལེའུར་བྱས་པ་ལས། གང་ཕྱིར་ཆེད་དུ་བྱས་པའི་ཤ་མཐོང་ངམ་ཐོས་སམ་དོགས་པ་ནི། །དེ་ནི་བཟའ་བར་བྱ་མིན་པར། །འགྲོ་ཀུན་ཕན་པར་བཞེད་པས་གསུངས། །ཞེས་པ་ལྟར། ཤའི་ཆེད་དུ་མཐོང་ཐོས་དོགས་གསུམ་དང་བྲལ་བའོ། །ཞེས་འདུལ་བའི་ལུགས་ཀྱང་དེ་ལྟར་དུ་བཞེད་དོ། །རང་གི་བསམ་ཚུལ་ནི། འདུལ་བའི་ལུགས་ལ་སྔར་སྨྲས་པ་ལྟར་རང་གི་ཆེད་དུ་བྱས་པ་ལ་མཐོང་ཐོས་དོགས་གསུམ་ཡོད་མེད་ཀྱིས་འབྱེད་དགོས་པར་གསལ་ལ། ཐེག་ཆེན་གྱི་ལུགས་ལ་ནི་བཟའ་བ་ཙམ་གྱི་ཆེད་དུ་བྱས་པའི་ཤ་ཡང་མི་རུང་བ་ཡིན་ཏེ། ལང་གཤེགས་ལས། བློ་གྲོས་ཆེན་པོ། གང་ཉེ་བར་བཟུང་སྟེ། ཉན་ཐོས་རྣམས་ལ་གནང་བར་བྱ་བ། མ་བྱས་པ་དང་། མ་བརྟགས་པ་ཞེས་བྱ་བའི་ཤ་ཡང་རུང་བ་མེད་ན། ཞེས་དང་། རྣམ་གསུམ་དག་པའི་ཤ་རྣམས་ནི། །མ་བརྟགས་པ་དང་མ་བསླངས་དང་། །མ་བསྐུལ་བ་ཡང་ཡོང་མེད་པས། །དེ་བས་ཤ་ནི་མི་བཟའ་འོ། །ཞེས་དང་། བློ་གྲོས་ཆེན་པོ་བྱེད་དུ་མ་བཅུག་པ་དང་། །མ་བཙལ་བ་དང་། །འདུ་ཤེས་མེད་པ་ཞེས་བྱ་བའི་ཤ་གང་ཡང་མེད་པས་དེའི་ཕྱིར་ཤ་བཟའ་བར་མི་བྱའོ། །ཞེས་དང་། བཅོལ་ཚོལ་འདུ་ཤེས་དེ་མེད་ན། །རྣམ་གསུམ་དག་པའི་ཤ་ཡང་མེད། །རྒྱུ་མེད་ལས་ནི་ཡོད་མིན་པས། །དེ་ཡི་ཕྱིར་ན་བཟའ་མི་བྱ། །ཞེས་ཉན་ཐོས་ལ་རྣམ་གསུམ་དག་པའི་ཤ་ཞེས་ཉེ་བར་བཟུང་སྟེ་གནང་བ་དེའང་བཟའ་བར་མ་བསམ་པ་དང་། གཞན་ལ་མ་བསླངས་པ་དང་། གཞན་ལ་མ་བསྐུལ་བ་མ་ཡིན་ཏེ། ད་ངོས་སུ་དེ་ལྟར་བྱས་པ་མེད་ཀྱང་བརྒྱུད་ནས་སམ་དོན་གྱིས་བྱས་པ་ཡིན་པས་མི་རུང་བའི་ཤ་ཡིན་ཞེས་པ་སྟེ། དེས་ན་སྔར་ཉན་ཐོས་ལ་རུང་བར་གསུངས་པ་དེ་འདིར་མི་རུང་བར་གསུངས་པ་ཡིན་ཞེས་གསུངས་པའི་ཕྱིར་རོ། །ཡང་གནང་བཀག་གི་རིམ་པ་འདི་ལ་སྔོན་གྱི་མཁས་པ་ཁ་ཅིག་བྱང་ཆུབ་སེམས་དཔའ་རྣམས་ཀྱིས་ཤ་བཟའ་མི་རུང་བ་ཡིན་གྱི། ཐེག་དམན་གྱི་རབ་བྱུང་ཙམ་ལ་ནི་རྣམ་གསུམ་དག་པའི་ཤ་བཟའ་མི་རུང་བ་མེད་ཅེས་ཟེར། ཁ་ཅིག་ནི་ཉན་ཐོས་རྣམས་ལའང་སྔར་གནང་བ་ཡིན་གྱི། ཕྱིས་བཀག་པ་ཡིན་པས་བྱང་ཆུབ་སེམས་དཔའ་ཙམ་དུ་མ་ཟད་དེ་རྣམས་ཀྱིས་ཀྱང་ཤ་ཐམས་ཅད་བཟའ་མི་རུང་གསུངས། དེ་ལ་འདུལ་བ་ལས་རྣམ་གསུམ་དག་པའི་ཤ་གནང་བ་ནི་བདེན་དེ། ལུང་སྨན་གྱི་གཞི་ལས། དགེ་སློང་དག་ངས་གནས་གསུམ་གྱིས་རུང་བའི་ཤ་བཟའ་བར་བྱའོ་ཞེས་གསུངས་པ་གསུམ་གང་ཞེ་ན། ཞེས་སོགས་སྔར་དྲངས་པ་དང་། དགེ་སློང་རྣམས་ཀྱིས་ཤ་བཞེས་པའི་གླེང་གཞི་དུ་མ་འདུག་པའི་ཕྱིར་དང་། རྣམ་གསུམ་དག་པའི་ཤ་བཟའ་མི་རུང་པའི་སྔར་བཅས་དང་རྗེས་བཅས་གང་ཡང་འདུལ་བ་རང་ན་མི་སྣང་བའི་ཕྱིར་དང་། སློབ་དཔོན་ཡོན་ཤཱཀ་རྣམ་གཉིས་དང་ཆོས་བཤེས་སོགས་ཀྱིས་ཀྱང་དེ་ཁོ་ན་ལྟར་གསུངས་པའི་ཕྱིར་རོ། །འོན་ཀྱང་ལང་གཤེགས་དང་མྱང་འདས་ཆེན་པོའི་མདོ་དག་གི་ཚིག་དོན་ཐད་ཀར་བཤད་ན། ཕྱིས་སུ་ཉན་ཐོས་རྣམས་ཀྱིས་ཀྱང་ཤ་ཐམས་ཅད་བཟའ་མི་རུང་བར་བཅས་པར་མངོན་ཏེ། ལང་གཤེགས་ལས། བསྟན་པ་བརྗོད་པ་དེ་དང་དེ་ལ་བསླབ་པའི་གཞི་རིམ་པས་བཅའ་བ་སྐབསས་ཀྱི་གདང་བུ་བྲེ་བའི་ཚུལ་དུ་རྣམ་གསུམ་བཅས་ནས། །ཞེས་སོགས་དང་། དེ་ལྟར་བློ་གྲོས་ཆེན་པོ། ངས་ཤའི་ཟས་ནི་སུ་ལའང་མ་གནང་། མི་གནང་། གནང་བར་མི་འགྱུར་ཏེ། བློ་གྲོས་ཆེན་པོ་རབ་ཏུ་བྱུང་བ་རྣམས་ལ་ཤའི་ཟས་ནི་མི་རུང་བར་བཤད་དོ། །ཞེས་དང་། མྱང་འདས་ཆེན་པོ་ལས། རིགས་ཀྱི་བུ་ད་ཕྱིན་ཆད་ངའི་ཉན་ཐོས་རྣམས་ཤ་ཟ་བར་མི་གནང་ངོ་། །ཞེས་དང་། བཀའ་བསྩལབ། མུ་གསུམ་ཡོངས་སུ་དག་པ་འདི་ནི་ངས་རིམ་གྱིས་བསླབ་པའི་གཞི་བསྡམ་པའི་ཕྱིར་དེང་ངས་བོར་རོ། །ཞེས་དང་། ང་ནི་འདུ་ཤེས་གཞན་གྱིས་ད་ཁྱོད་ལ་བསླབ་པའི་གཞི་བཅའ་བར་བྱ་སྟེ། མུ་གསུམ་གྱི་ཤ་ཡང་མི་བཟའ་བར་བསྡམས་སོ། །ཞེས་དང་། ཤའམ། ཉ་ཤའམ། རི་དྭགས་ཀྱི་ཤའམ། རྨིག་པ་སྐབསམ་པོའམ། ཤའི་བག་གཞན་གྱིས་འབགས་པ་རྣམས་ཀྱང་ལྟུང་བྱེད་དུ་འགྱུར་རོ། །ཞེས་གསུངས་པའི་ཕྱིར་རོ། །དེས་ན་བསླབ་བཏུས་ལས་གསུངས་པ་ལྟར་འདུལ་བ་ལས་རྣམ་གསུམ་དག་པའི་ཤ་གནང་བ་ནི་དགོས་པའི་དབང་གིས་རེ་ཞིག་དེ་ལྟར་དུ་བསྟན་ནས། མཐར་གྱིས་ཉན་ཐོས་བྱང་སེམས་ཐམས་ཅད་ཀྱིས་ཤ་ཐམས་ཅད་མི་བཟའ་བའི་བསླབ་པའི་རིམ་པ་སྐབསས་ཀྱི་གདང་བུ་བཞིན་དུ་བསྡམས་ཏེ་སྔར་རྣམ་གསུམ་དག་པའི་ཤ་བཟའ་རུང་ཞེས་པ་དེའང་བོར་ནས་ད་ཕྱིན་ཆད་སུས་ཤ་ཟོས་ཀྱང་ངན་སོང་དུ་ལྟུང་བྱེད་ཡིན་ཞེས་གསུངས་པ་ཡིན་པར་སེམས་སོ། །གསུམ་པ་གསང་སྔགས་ལས་ཇི་ལྟར་གསུངས་ཚུལ་ལའང་བཀའ་དང་བསྟན་བཅོས་གཉིས་ལས། དང་པོ་ནི། དུས་འཁོར་རྩ་བའི་རྒྱུད་འགྲེལ་ཆེན་དྲི་མེད་འོད་དུ་དྲངས་པ་ལས། །ལྷ་དང་རང་འཇིགས་ཕ་མེས་དང་། འདོད་གྲུབ་དོན་དང་བཙོང་ཕྱིར་ཡང་། །གདུལ་དཀའ་སྡིག་པ་བྱེད་རྣམས་ཀྱིས། །གནོད་བྱེད་མིན་པའི་སེམས་ཅན་བསད་། །དེ་ཡི་ཤ་དེ་ཉོ་བ་དང་། །ཟ་འདོད་ཁ་ན་མ་ཐོ་བཅས། །མ་བླངས་སྣོད་དུ་ལྷུང་གྱུར་བ། །དེ་ཉིད་ཁ་ན་མ་ཐོ་མེད། །སྲོག་ཆགས་གཅིག་གི་ཤ་དག་ནི། །མང་པོ་རྣམས་ཀྱིས་ཟོས་པ་མཆོག། སྲོག་ཆགས་དུ་མའི་ཤ་དག་ནི། །ཡིད་སྐྱེས་གཅིག་གིས་ཟོས་པ་མིན། །ཞེས་དང་། དུས་ཀྱི་འཁོར་ལོའི་རྒྱུད་ཕྱི་མ་རྒྱུད་ཀྱི་སྙིང་པོ་ཞེས་པ་ལས། །སངས་རྒྱས་པ་ཡིས་ཀུན་ནས་ཤ་མི་བཟའ་ཞིང་བདག་གི་བ་ཡིས་བསྲུང་མི་བྱ། །སྲོག་ཆགས་རྣམས་ལ་སྲོག་ཆགས་འདུ་ཤེས་གསོད་པའི་ཡིད་ཀྱིས་ཉེ་བར་བརྩམས་པས་འདིར་ཉམས་པ། །ཞེས་དང་། དགེ་སློང་སྙིང་རྗེ་མེད་པས་ལྕེ་ལ་ཤ་ཡི་རོ་མྱོང་རོ་ལ་རྗེས་སུ་ཚོལ་བྱེད་ཅིང་། །བདག་ཉིད་གསོད་པ་ལ་སོགས་སྐྱོན་གྱིས་དགེ་སློང་རྣམས་དང་དགེ་ཚུལ་ཡང་ནི་དམྱལ་བར་འགྲོ། །ཞེས་དང་། ཤ་ལ་སོགས་པ་ཟོས་ན་ངེས་པར་ས་ཡི་འོག་ཏུ་ལུས་ཆེན་རྣམས་སུ་སྡུག་བསྔལ་འགྱུར། །ཞེས་གསུངས་སོ། །ནད་པའི་ནད་གསོ་བའི་ཕྱིར་དུ་ཤ་བསྟེན་དགོས་ནའང་བཟའ་བའི་ཕྱིར་དུ་བསད་པ་མ་ཡིན་པའི་ཤ་དག་གལ་ཏེ་ཡོད་ན་དེ་ཉིད་བསྟེན་པར་གསུངས་ཏེ། དེ་ཉིད་ལས། དགེ་སློང་ནད་པ་ལ་ནི་སྨན་པས་ཤ་བསྟན་ན་ཡང་བྱ་ཁྲ་རྣམས་ཀྱིས་བསད་པ་དང་། །ཕ་ཡི་ཆེད་དུ་བསད་དང་མཆོད་སྦྱིན་ཐོག་དང་མེ་དང་ཆུ་དང་མ་ཞུའི་སྐྱོན་གྱིས་ཤི་བ་རྣམས། །སྦྱོར་བ་འདི་རྣམས་མེད་པར་གྱུར་ན་གང་དུ་དེ་ཚེ་བཟའ་བར་བྱ་བ་གསུངས་པ་རྣམས། །དགེ་སློང་རྣམས་ལ་ཤ་གང་དེ་ནི་སྟོབས་བཅུ་ལྡན་པས་ནད་འཇོམས་ཕྱིར་ཡིན་འཆི་བསླུར་མིན། །དཔེ་གཞན་ལས། དགེ་སློང་རྣམས་ལ་ཤ་ནི་གང་དེ་སྟོབས་བཅུ་ལྡན་པས་འཆི་ན་གཞོམ་པ་ལས་ནི་གཞན་པ་མིན། ཞེས་གསུངས་སོ། །མཆན། ཞེས་དང་། ཀུན་བཟང་དགོངས་པ་ཟང་ཐལ་མཁའ་འགྲོའི་ལས་རིམ་གསང་བའི་མན་ངག་ལས། གསང་སྔགས་དམ་རྫས་བླང་བྱའི་རྫས་ཡིན་ཡང༔གཙང་དམེ་སྤང་བླང་མེད་པར་མ་རྟོགས་པར༔ཤ་ཁྲག་ཆང་ལ་བག་མེད་སྤྱོད་པ་སྤང༔བདུད་རྩི་རྣམ་ལྔ་སྨན་གྱི་དྲི་ཙམ་བླང༔ཞེས་དང་། ཤ་ཆང་ཁྲག་ལ་བག་མེད་སྤྱོད་པ་རྣམས༔སྡིག་ཅན་སྐྱེ་བོའི་ཟས་ཏེ་ཆོས་ཀྱི་བདུད༔ཅེས་སོ། །གཉིས་པ་བསྟན་བཅོས་ལས་གསུངས་པ་ནི། ཀུན་བཟང་དགོངས་པ་ཟང་ཐལ་ཞི་ཁྲོ་ལྷུན་གྲུབ་ཀྱི་འཕྲིན་ལས་དགའ་རབ་རྡོ་རྗེས་བཏུས་པའི་ཚོགས་འཁོར་ལས། དང་པོ་ཚོགས་ཀྱི་འཁོར་ལོ་ལ༔རོ་དྲུག་ཚང་བའི་ཟས་བརྒྱ་དང༔ཡོ་བྱད་ཕུན་སུམ་ཚོགས་པ་བཤམས༔དེ་ཡང་མཆོག་ཏུ་བསྔགས་པ་ཤ་དང་ཆང་ཡིན་ཏེ༔ཤ་ནི་ནད་ཡུན་རིང་གིས་ཤི་བ་མ་ཡིན་པ༔མིའམ་གཅན་གཟན་གྱིས་བསད་པ་མ་ཡིན་པ༔གྲི་ཐབས་སྣ་དགུ་དང༔དོམ་ཤ་བླང་བར་མི་བྱའོ༔རང་རྐྱེན་ཚེ་ཟད་ནས་ཤི་བ་ཁོ་ན་བསྔགས་སོ༔དབང་པོ་ཚང་བ་དགོས་སོ༔གྲིར་ཤི་བའི་ཤ་ཁྲག་ནི་གནོད་སྦྱིན་མཆོད་པའི་རྫས་ཡིན་ནོ༔ད་མ་རྫས་སུ་ནི༔རྨིག་ཟླུམ་དང༔མཛེ་ཅན་དང༔ད་མེ་ཤ་དང༔ནད་ངན་པས་ཤི་བའམ༔རྒྱུ་ངན་པ་དངོས་པོ་རུལ་བ་ནི་མཁའ་འགྲོ་མི་མཉེས་པས་དམ་རྫས་སུ་མི་རུང་ངོ༔ཞེས་དང་། འགྲེལ་ཆེན་དྲི་མེད་འོད་ལས། འོ་ན་སྔགས་ཀྱི་ཐེག་པ་འདིར་རྣལ་འབྱོར་པ་རྣམས་ཀྱིས་ཤ་བཟའ་བར་བཅོམ་ལྡན་འདས་ཀྱིས་གསུངས་ལ་དེ་ཉིད་ཀྱང་རྟག་ཏུ་སྲོག་བཅད་པ་ལས་འབྱུང་སྟེ་སྲོག་བཅད་པ་མེད་པར་ནི་འགའ་ཞིག་གི་ཚེ་སྲིད་དོ། །གལ་ཏེ་ཟ་བ་པོ་མེད་ན་གསོད་པ་པོ་ཡང་མི་འབྱུང་ངོ་། །དེའི་ཕྱིར་ཟ་བ་པོ་དང་གསོད་པ་པོ་དག་སྲོག་གཅོད་པར་འགྱུར་རོ། །འདིར་ཡང་ཉི་མ་སོ་སོར་སྔགས་པས་དམ་ཚིག་བཞི་བྱའོ་ཞེས་པ་ནི་དེ་བཞིན་གཤེགས་པའི་ངེས་པའོ་ཞེ་ན། དེ་ནི་བདེན་ཏེ་རྒྱུ་གང་གི་ཕྱིར་མཚན་མ་དང་ཁ་ན་མ་ཐོ་བ་དང་བཅས་པས་སྲོག་གཅོད་པར་འགྱུར་བ་རྒྱུ་དེའི་ཕྱིར་རྣལ་འབྱོར་པ་རྣམས་ཀྱིས་མཚན་མ་མེད་པ་དང་ཁ་ན་མ་ཐོ་བ་མེད་པ་གོ་ཀུ་ལ་སོགས་པ་བཟའ་བར་བཅོམ་ལྡན་འདས་ཀྱིས་གསུངས་སོ། །འདིར་ཡུལ་གང་ན་འཇིག་རྟེན་པ་རྣམས་ཀྱིས་གང་བཟའ་བ་མ་ཡིན་པ་དང་གང་བཙོང་བ་མ་ཡིན་པ་གོ་ཀུ་ལ་སོགས་པ་རང་གི་ལས་ཀྱིས་ཤི་བ་དང་གཡུལ་དུ་ལས་ངན་པའམ་རང་གི་སྐྱོན་གྱིས་ཆོམ་རྐུན་ལ་སོགས་པས་བསད་པ་དེ་དག་ཐམས་ཅད་རྣལ་འབྱོར་པས་བཟའ་བར་དེ་བཞིན་གཤེགས་པས་གསུངས་སོ། །རྫས་ཀྱིས་ཉོས་པ་ནི་མ་ཡིན་ཞིང་ཕ་མེས་ལ་སོགས་པ་དང་མཆོད་སྦྱིན་ལ་སོགས་པའི་བྱ་བ་ལ་བསད་པ་ཡང་མ་ཡིན་ཏེ། མཚན་མ་དང་བཅས་པའི་ཤ་བཟའོ་ཞེས་པ་ནི་དེ་བཞིན་གཤེགས་པས་མ་གསུངས་སོ། །ཡང་གང་ཞིག་ཉི་མ་སོ་སོར་དམ་ཚིག་བྱ་བ་དེ་ནི་ཁ་ན་མ་ཐོ་བ་མེད་པའི་གོ་ཀུ་ལ་སོགས་པ་ལྔ་དང་རྣམ་པར་སྣང་མཛད་ལ་སོགས་པ་ལྔའི་རིལ་བུ་ཉུངས་ཀར་གྱི་ཚད་ཙམ་ཉི་མ་སོ་སོར་དམ་ཚིག་བསྟེན་པའི་དོན་དུ་བྱའོ། །ཞེས་སོ། །དེ་ལ་ཕ་རོལ་པོས། བཟའ་བ་པོ་མེད་ན་གསོད་པ་པོའང་མི་འབྱུང་བས་བཟའ་བ་པོ་དང་གསོད་པ་པོ་གཉིས་ཆར་གྱིས་སྲོག་བཅད་པར་འགྱུར་རོ་ཞེས་པ་ལ། དེ་ནི་བདེན་ཏེ་ཞེས་ལན་བཏབ་ནས། རྒྱུ་མཚན་དེ་ཉིད་ཀྱི་ཕྱིར་ན་བཟའ་བའི་ཆེད་དུ་བསད་པ་རྫས་ཀྱིས་ཉོས་པ་དང་། ཕ་མེས་དང་མཆོད་སྦྱིན་སོགས་ཀྱི་ཆེད་དུ་གསོད་པའི་མཚན་མ་བཏབ་ནས་བསད་པའི་ཤ་རྣམས་མི་བཟའ་ཞིང་། རང་གི་ལས་ཀྱིས་ཤི་བ་སོགས་དང་ཡུལ་གང་དུ་བཟའ་བར་མི་བྱེད་པ་བ་ལང་ལ་སོགས་པའི་ཤ་དག་གམ་ཡང་ན་དམ་རྫས་རིལ་བུ་ཙམ་རྣལ་འབྱོར་པས་བསྟེན་པར་བྱ་ཞེས་གསུངས་པའོ། །གཞན་ཡང་གྲུབ་རྗེ་པད་མ་བདུད་འདུལ་གྱི་ཞལ་ནས། ཤ་ཟོས་སྡུག་བསྔལ་ཡིད་ལ་དྲན་ཙ་ན། །མི་བཟོད་སྙིང་འད་ར་གཟེར་རྒོད་འབར་བ་ནི། །ཨོཾ་མ་ཎི་པདྨེ་ཧཱུྃ་ཧྲཱིཿསྟོང་ཉིད་སྙིང་རྗེའི་ངང་ནས་འགྲོ་བ་འདྲེན། །འཕགས་པ་སྤྱན་རས་གཟིགས་ལ་ཕྱག་འཚལ་ལོ། །རང་ལ་བྱམས་དང་སྙིང་རྗེ་མ་འབྱོངས་པས། །མ་ཤ་ཟ་ཞིང་གཞན་ལ་རྒྱུ་འབྲས་བཤད་། །དོན་དམ་མ་རྟོགས་ཚིག་གི་ལམ་ལ་འབྱམས། །ནེ་ཙོ་ལྟ་བུའི་བྲག་དཀར་སྤྲང་པོ་བད་ག། འཚོ་བ་དཀའ་ཐུབ་བཅུད་ལེན་འདུག་པའི་སྐབས། །ཉིན་གཅིག་མཁའ་མཉམ་རང་གྲོལ་རིམ་གཉིས་ཀྱི། །ཟུང་འཇུག་སྤྱན་རས་གཟིགས་དབང་བསྒོམ་པའི་ངང་། །རང་ལུས་སོགས་ཀུན་དངོས་པོ་མི་སྣང་ནས། །འོད་ལུས་ཐུགས་རྗེ་ཆེན་པོ་ཇི་ལྟ་བུར། །གྱུར་ནས་མཁའ་ལ་ཡོད་སྣང་འདྲ་ཞིག་བྱུང་། །རང་རིག་འོད་གསལ་ངང་ནས་བལྟས་ཙ་ན། །ངན་སོང་སྡུག་བསྔལ་བསམ་གྱིས་མི་ཁྱབ་མཐོང་། །ཁྱད་པར་ཡང་སོས་སྡུག་བསྔལ་གླིང་བཞི་ཙམ། །མཐོང་བ་དེ་ཡི་བཞི་ཆ་ཙམ་ཞིག་ཏུ། །བར་མཚམས་མེད་པར་ཕོ་མོ་གཅེར་བུ་ཡིས། །བཀང་ནས་མི་རྣམས་རེ་རེའི་རྩ་བ་རུ། །ལས་མཁན་ཤིན་ཏུ་མ་རུངས་མང་པོ་ཡིས། །བྱ་རིགས་རི་དྭགས་གཡུང་དྭགས་གཅན་གཟན་རིགས། །མགོ་བརྙན་མི་འདྲ་ཅན་ནི་མང་པོ་ཡིས། །ལག་ན་མཚོན་ཆ་རྣོན་པོ་རེ་ཐོགས་ནས། །རྒྱུན་དུ་མི་ཤ་དུམ་བུར་བཅད་ཅིང་ཟ། །ཡང་ཡང་བཅད་ནས་ཡང་ཡང་ཤ་རྒྱས་ཤིང་། །ཇི་སྲིད་ལས་མ་ཟད་པར་མི་འཆི་བའི། །བག་ཆགས་འཛད་མེད་དེ་ཡི་རང་བཞིན་འཕེལ། །ཁྱད་པར་དམར་ཆོག་དེད་པའི་ཉེས་པ་འཕགས། །ཀུན་གྱིས་སྐབསད་ངན་འདོན་པ་འུ་རུ་རུ། །རང་སྣང་འཁྲུལ་བས་གཞན་འཁྲུལ་དེ་མཐོང་ནས། །སྡུག་བསྔལ་འདི་ལ་ཕན་ཐབས་ཅི་ཡོད་དམ། །བསམ་ཚེ་སྐད་ཅིག་མདུན་གྱི་ནམ་མཁའ་ནས། །ཐུགས་རྗེ་ཆེན་པོའི་ཞལ་ནས་འདི་སྐད་གསུངས། །ཨེ་མ་ང་དང་ཚེ་རབས་ཡང་ཡང་འབྲེལ་བའི་བུ། །ལེགས་པར་གསོན་དང་བརྩོན་འགྲུས་སྙིང་སྟོབས་ཅན། །བསྐྱེད་རུམ་ལྷ་ལ་བརྟན་པ་ཐོབ་པ་དང་། །ཡོན་ཏན་ཡལ་ག་ཅུང་རེ་རྒྱས་གད་འ་སྟེ། །ཆོས་ཀྱི་རྩ་བ་བྱམས་དང་སྙིང་རྗེ་ཡིན། །ཁྱོད་ལ་བྱམས་དང་སྙིང་རྗེ་མི་གནས་སམ། །སྙིང་རྗེ་འབྱོངས་ན་ཤ་ཟ་ནུས་མི་འོས། །ཤ་ཟོས་སྡུག་བསྔལ་འབྱུང་ལུགས་འདི་ལ་ལྟོས། །རང་བྱས་ལས་ཀྱི་རྣམ་སྨིན་རང་ལ་གྲུབ། །དུས་གསུམ་རྒྱལ་བས་བྱ་ཐབས་ཅི་ཡང་མེད། །ཤ་ཟོས་ཡོན་ཏན་ཀུན་བྲལ་ཉེས་ཚོགས་ལྡན། །བཞི་བརྒྱའི་ནད་དང་སྟོང་ཕྲག་བརྒྱད་ཅུའི་བགེགས། །ཉོན་མོངས་བརྒྱད་ཁྲི་བཞི་སྟོང་རང་གནས་འབྱུང་། །འབྲེལ་ཚད་དོན་ལྡན་བརྟུལ་ཞུགས་སྤྱོད་པ་དང་། །སྨན་དང་ཐེག་མཆོག་གསང་སྔགས་རྫས་མ་གཏོགས། །ཤ་ཟོས་པ་ལ་ཡོན་ཏན་ཏིལ་ཙམ་མེད། །ཤ་ཟ་ཅན་ནི་བདུད་དང་སྲིན་པོའི་རིགས། །ཡིན་པས་སྡོམ་པ་ཉམས་ཤིང་ཉོན་མོངས་འཕེལ། །གཞན་ཕན་བྱམས་དང་སྙིང་རྗེའི་རྒྱུ་མེད་ཅིང་། །འབྲས་བུ་བྱང་ཆུབ་སྙིང་པོར་སྨིན་པར་དཀའ། །ཤ་ཟོས་ལུས་ལ་ཡེ་ཤེས་ལྷ་མི་འཁོར། །བྱིན་རླབས་དངོས་གྲུབ་རྟེན་འབྲེལ་ཕྲིན་ལས་མེད། །ཤ་ཟོས་ལུས་ལ་གཞན་ཕན་རྫས་མི་འབྱུང་། །ཕལ་ཆེར་ལྷ་ཀླུ་སོགས་ཀྱིས་སྲིན་པོར་མཐོང་། །ཤ་ཟོས་ལུས་ལ་དྲི་ཟ་སྲིན་པོ་བདུད། །གཤིན་རྗེ་མོ་འདྲེ་རྒྱལ་འགོང་དམ་སྲི་འཁོར། །ཤ་ཟོས་འབྲས་བུ་དམྱལ་བར་སྐྱེ་བ་དང་། །བྱ་རིགས་ལྕེ་སྤྱང་སྲིན་པོ་སོགས་ལུས་ལེན། །དེ་བཞིན་ཤ་ཟོས་སྡུག་བསྔལ་དཔག་མེད་ཡོད། །སྤངས་ན་སྔར་བཤད་ཉེས་པ་ཀུན་བྲལ་ནས། །རྟག་ཏུ་མི་མ་ཡིན་གྱིས་སྤྱི་བོར་བཀུར། །གཙང་ལྡན་ཡང་དག་བྲམ་ཟེ་ལྷ་ལུས་མཐོང་། །ཕྱོགས་བཅུའི་སངས་རྒྱས་མ་ལུས་སྲས་འཁོར་བཅས། །བླ་མ་ཡི་དམ་མཁའ་འགྲོ་སྤྲིན་བཞིན་འདུ། །ཁྱད་པར་བྱང་ཆུབ་སེམས་དཔའ་སེམས་མ་འཁོར། །ཤུགས་འབྱུང་བྱམས་དང་སྙིང་རྗེའི་རྒྱུ་བྱེད་ཅིང་། །འབྲས་བུ་བྱང་ཆུབ་སྙིང་པོ་མྱུར་དུ་འཐོབ། །དེ་སོགས་ཡོན་ཏན་བསམ་གྱིས་མི་ཁྱབ་འབྱུང་། །ཞེས་གསུངས་ཐམས་ཅད་རང་སྣང་གྱུར་པའི་རྗེས། །རྨི་ལམ་འོད་གསལ་སད་ལྟར་ཞིག་བྱུང་དུས། །བཙན་དུག་ཟོས་བཞིན་ལུས་སེམས་མི་བདེ་ཞིང་། །འཇིགས་སྐྲག་བཟོད་མེད་སྲོག་གཟེར་སྙིང་འད་ར་རོ། །སྔར་གྱི་ཡང་སོས་སྡུག་བསྔལ་དྲན་ཙམ་གྱིས། །བདེ་སྡུག་གཏོང་ལེན་བྱེད་པའི་ཐབས་མ་བྱུང་། །ཤིན་ཏུ་ཡིད་རྨོངས་མཆི་མ་རབ་འཁྲུགས་ཤིང་། །བཟོད་གླགས་མེད་པ་སྙིང་རྗེའི་སེམས་སྐྱེས་ནས། །གཞན་གྱི་སྡུག་བསྔལ་རང་གིས་བླང་བའི་ཆེད། །མ་གྱུར་མཁའ་མཉམ་སེམས་ཅན་ཐམས་ཅད་ཀྱི། །ཤ་ཟོས་ཉེས་སྒྲིབ་མ་ལུས་དག་བྱའི་ཕྱིར། །བདེན་གཉིས་བདེན་པས་དམ་བཅའ་འདི་བརྗོད་དོ། །ཨ་ཧོ། ཐུབ་དབང་ཕྱོགས་དུས་རྒྱལ་བ་སྲས་བཅས་མཁྱེན། །རྒྱུ་འབྲས་གོ་ལོགས་བུ་ལ་ཐུགས་རྗེས་གཟིགས། །དྲིན་ཅན་རྩ་བརྒྱུད་བླ་མའི་ཚོགས་རྣམས་མཁྱེན། །རྒྱུ་འབྲས་གོ་ལོག་བུ་ལ་ཐུགས་རྗེས་གཟིགས། །ལྷག་པའི་ལྷ་མཆོག་སྤྱན་རས་གཟིགས་དབང་མཁྱེན། །རྒྱུ་འབྲས་གོ་ལོག་བུ་ལ་ཐུགས་རྗེས་གཟིགས། །བདག་ནི་མ་རིག་སྒྲིབ་གཉིས་དབང་སོང་བས། །མཁའ་མཉམ་ཕ་མའི་རང་བཞིན་ཡིན་ཟེར་ཞིང་། །རང་གིས་ཤ་ཟོས་གཞན་ལ་རྒྱུ་འབྲས་བཤད་། །སྡུག་བསྔལ་འདི་ཙམ་ཆེ་བ་ཡོད་མ་ཤེས། །རྣམ་གསུམ་དག་ཤ་རྒྱལ་བས་གནང་བ་ཡིན། །སྡིག་པ་མི་འོང་ཟེར་བ་ཕལ་ཆེར་ཐོས། །དེ་རྣམས་འབྲེལ་ཚད་དོན་ལྡན་སྐྱེས་མཆོག་ལ། ཉོན་མོངས་སྐྱོན་གྱིས་མ་གོས་པད་མ་ལྟར། །ཟབ་ལམ་གསང་སྔགས་སྤྱོད་པ་ཡིན་ཤས་ཆེ། །བདག་ནི་གཞན་ཕན་བྱམས་དང་སྙིང་རྗེ་དང་། །བསླུ་མེད་རྒྱུ་འབྲས་ཁོ་ན་མ་གཏོགས་པ། །དེ་བས་ཟབ་པའི་གདམས་པ་ཡོད་མ་ཡིན། །ནམ་མཁའི་མཐའ་ཁྱབ་སེམས་ཅན་ཐམས་ཅད་ཀྱི། །ཤ་ཟོས་ཉེས་སྒྲིབ་མ་ལུས་དག་པའི་ཆེད། །ཕྱིན་ཆད་ཤ་ཟ་ཡོངས་སུ་སྤང་བར་བགྱི། །དམ་བཅའ་དོར་བ་མེད་པའི་ཁས་ལེན་ཡིན། །ས་སྟེང་སེམས་ཅན་མ་ལུས་ཟོས་གྱུར་ཀྱང་། །ངོམས་ཤིང་ཚིམ་པའི་དུས་མེད་ཆེས་ཆེར་ལྟོགས། །ཉིན་མཚན་འགའ་ཡང་བཟའ་རྒྱུ་མ་རྙེད་ན། །སྔོན་ཆད་ཏིལ་ཙམ་ཡིད་ལ་ཟོས་སྣང་མེད། །དེ་བཞིན་ཞེན་ཆགས་ཟ་འདྲེ་བྲལ་རེ་རན། །ཤ་འདིའི་རྒྱུ་ནི་ཅི་ལས་བྱུང་སྙམ་ན། །བདག་འཛིན་ཆགས་པ་ཁོ་ན་ལས་བྱུང་ངོ་། །ཡིད་ལ་དྲན་ཙམ་ངལ་དུབ་སྐྱུག་བྲོ་ཞིང་། །ཤིན་ཏུ་ཞེན་ལོག་འད་མ་རྫབ་མི་གཙང་བའི། །རྫས་ནི་སུམ་ཅུ་རྩ་དྲུག་དང་འབྲེལ་བ། །སྡུག་བསྔལ་ཀུན་གཞིའི་ཕུང་པོ་བག་ཆགས་ལུས། །ཕལ་ཆེར་དུད་འགྲོ་ལས་ངན་རེ་རེ་ཡོད། །ཤ་དེ་གང་ཟོས་ཐར་བའི་དུས་ཀྱང་མེད། །ཤ་ཆང་དངོས་པོ་མ་དག་རྫས་ཡིན་པས། །གང་སྟེར་སྦྱིན་པར་མི་འགྲོ་རྒྱལ་བས་གསུངས། །དེ་ཕྱིར་ཉོན་མོངས་ཟས་ནི་སུ་ཡིས་ཟ། །མི་ལོ་སྟོང་ཕྲག་མང་པོ་ཡི་དྭགས་ཀྱིས། །བཟའ་བཏུང་མི་མཐོང་སྡུག་བསྔལ་མྱང་དགོས་པས། །མི་ཡིས་ཆུ་འཁྱགས་བཏུང་ཡང་ལོངས་སྤྱོད་ཡིན། །ཤ་ཆང་མ་གཏོགས་བཟའ་བཏུང་དུ་མ་ཡོད། །ལོངས་སྤྱོ, ད་དེ་ཡིས་བྱེད་པས་མ་ངོམས་ན། །དྲིན་ལན་ངན་གྱིས་འཇལ་བ་སུ་ཡོད་དམ། །བསྐལ་པ་དཔག་ཏུ་མེད་པའི་གོང་རོལ་ནས། །མཁའ་མཉམ་འཇིག་རྟེན་བདུན་པ་མ་ལུས་པ། །བདག་གི་ཨ་མར་མ་གྱུར་གཅིག་ཀྱང་མེད། །ནུ་འོ་འཐུང་བ་སྟོང་གསུམ་མཚོ་དང་མཉམ། །ཁ་ཞེ་མེད་དོ་མཆོག་གསུམ་དཔང་པོ་བཞག། སྔོན་ཆད་མ་རིག་བག་ཆགས་དབང་སོང་ནས། །མ་ཤ་གང་ཟོས་འགྱོད་པས་བཤགས་མ་ཤེས། །ད་ནི་སྟོབས་བཞི་ལྡན་པའི་ལྷག་བསམ་གྱིས། །མ་ཆགས་མི་ཆགས་ཆགས་པ་མེད་གསུངས་བཞིན། །ཕྱིན་ཆད་ཟ་སྣང་ཡིད་ལ་ཤར་ཙམ་མེད། །ཟོས་ན་དཀོན་མཆོག་གསུམ་གྱི་བཀའ་ཆད་འོང་། །ཆོས་སྐྱོང་སྲུང་མ་རྣམས་ཀྱིས་རྟག་ཏུ་གཟིགས། །དེ་ཕྱིར་མ་ཤ་ཟོས་ན་སྲིད་གསུམ་དུ། །ད་མ་ཉམས་ང་བས་སྡིག་ཆེན་ཡོད་མ་ཡིན། །གཞན་གནོད་ཆུང་ངུས་སྡོམ་ཉམས་རྒྱལ་བས་གསུངས། །ཤ་ཟོས་སྲོག་གཅོད་ཆ་མཐུན་སྨོས་ཅི་དགོས། །མྱ་ངན་འད་ས་མདོ་ལང་ཀར་གཤེགས་སོགས་ལས། །གང་གིས་ཤ་ཟོས་སྲོག་གཅོད་ཆ་མཐུན་པ། །ཐེག་པ་ཆེ་ཆུང་གང་ལས་བཀག་པ་དང་། །ད་གོས་སུ་བྱང་ཆུབ་སེམས་དཔའ་ལ་མ་གནང་། །བདག་ཅག་སྟོན་པ་སྲེག་པའི་ཕྲུག་གུ་དང་། །གཅན་གཟན་གྱུར་དུས་ཤ་ནི་བཀག་པ་བཞིན། །སྟོན་པའི་རྗེས་འཇུག་རྣམས་ལ་སྨོས་ཅི་དགོས། །དེ་ནི་རྒྱལ་བའི་བཀའ་དང་མཐུན་པ་བཞིན། །འཕགས་བོད་སྐྱེས་མཆོག་མང་པོས་དགག་བྱ་ཡོད། །དེ་ལྟར་ཉེས་པ་བསམ་གྱིས་མི་ཁྱབ་བོ། །སྡིག་དང་མ་འདྲེས་པ་དེ་ཡང་དག་ཆོས། །དེ་ཕྱིར་ཡང་དག་བཀའ་དང་མཐུན་པར་ཤོག །ཅེས། ཤ་ཟོས་ཉེས་དམིགས་དཔག་མེད་མཐོང་ནས་སུ། །དྲན་ཙམ་བཙན་དུག་ཟོས་བཞིན་སྙིང་གཟེར་ནས། །སྤང་ཐབས་རང་གིས་རང་ལ་གད་མས་པ་འདི། །བྲག་དཀར་ནམ་མཁའི་རྫོང་གི་དབེན་ཁྲོད་དུ། །སྤྲང་ཆེན་བདུད་འདུལ་མིང་གིས་བཀོད་པ་ཡི། །དགེ་བའི་འབྲས་བུས་སེམས་ཅན་ཐམས་ཅད་ཀྱི། །ཤ་ཟོས་ཉེས་སྒྲིབ་མ་ལུས་ཀུན་བྱང་ནས། །སངས་རྒྱས་སྟོང་གི་ཞལ་ཡང་མཐོང་བར་ཤོག །ཅེས་དང་། རྗེ་རྒོད་ཚང་སྣ་ཚོགས་རང་གྲོལ་གྱི་ཞལ་ནས། གཉིད་དུ་ཉལ་བའི་རྨི་ལམ་ཉིང་འཁྲུལ་ལ། །སྔར་ནས་ཤི་བའི་རང་གི་གྲྭ་རྒན་རིགས། །གྲོང་ཆོག་མང་དུ་འགྲོ་མཁན་འགའ་རེ་དང་། །གཉེར་བྱེད་ལས་འཛིན་ཤི་བ་འགའ་དང་བཅས། །ལྷན་ཅིག་མི་དགའ་བཞིན་དུ་དབང་མེད་ཕྱིན། །ཤ་གཟན་རུང་ཡིན་ཟེར་བའི་ལུང་པ་ནི། །རི་རོང་དོག་ཅིང་མུན་ནག་འཐིབས་པ་ན། །རབ་བྱུང་ཆ་བྱད་མདོག་ནག་བཞིན་མི་སྡུག །གོས་ཆེན་ལྗང་ནག་ལས་གྲུབ་སྣམ་སྦྱར་གྱོན། །བོངས་ཚད་ཁང་པ་ཉིས་ཐོག་ཙམ་ཡོད་པ། །འཇིགས་སུ་རུང་བ་ཞིག་གི་འཁོར་དུ་ཡང་། །བན་རྒན་ཧམ་ཁྲོག་མི་ཚད་སུམ་འགྱུར་ཙམ། །ཆོས་གོས་གྱོན་ཞིང་ཡིད་དུ་མི་འོང་བའི། །རྣམ་འགྱུར་ཅན་དང་གཞན་ཡང་མི་ནག་ནི། །པགས་གོས་གྱོན་ཞིང་འབྲོག་པའི་རིགས་འདྲ་བ། །ལག་ཏུ་ཞགས་པ་ནག་པོ་འགའ་ཞིག་ཐོགས། །དེ་འདྲའི་དཔོན་གཡོག་མང་པོས་བདག་ལ་བསྐོར། །གཙོ་བོ་དེ་ཡིས་འདི་སྐད་ཟེར་བ་ཐོས། །ཁྱོད་འདིར་དལ་བར་འདུག་པ་རྫོབས་རེ་ཆེ། །བནྡེའི་གཤེད་མར་བནྡེ་བསླེབས་ཡོད་དེ། །ལེགས་ཉེས་འབྱེད་པའི་ཁྲིམས་བདག་ང་ཡིན་ནོ། །དེང་སང་ཁྱེད་ཅག་བླ་མ་མཁན་སློབ་དང་། །དགེ་འདུན་མིང་བཏགས་ཆོས་པའི་གཟུགས་བཟུང་ནས། །ཤི་གསོན་ཀུན་གྱི་སྐྱབས་ཡུལ་བྱེད་མཁན་ཚོ། །ཕ་མར་གྱུར་པའི་སེམས་ཅན་སྲོག་བཅད་པའི། །ཤ་ལ་ལྟོ་ཡི་དྭངས་མ་བྱེད་ནུས་པ། །སྙིང་སྟོབས་འདི་འདྲ་ཆེ་ལུགས་ཨ་ལ་ལ། །གློ་བ་ཁྲག་གིས་བརྒྱངས་པའི་ཞིམ་ཟས་དང་། །མཆིན་པ་འཁྱགས་སུ་བོར་བའི་མཚར་ཟས་དང་། །གསོན་ཁྲག་ཚོད་མར་བྱས་པའི་བཞེས་སྤྲོ་སོགས། །ཁྱེད་ཅག་བཙུན་པ་རྣམས་ཀྱི་ཟ་ལུགས་ལ། །ཤ་ཁྲག་ཟས་ལ་གཅན་གཟན་བས་ཀྱང་ཧམ། །ཆང་རག་འཐུང་ལ་སྦུར་གོག་ལས་ཀྱང་སྲེད། །དཀོར་འཚོལ་བ་ལ་ཡི་དྭགས་ལས་ཀྱང་མུག། ད་དུང་དགེ་སློང་ཡིན་པར་ཁས་ལེན་ནམ། །ལྷུང་བཟེད་ཐོགས་ཤིང་ཤ་ཁྲག་ཟ་ལུགས་དང་། །ཆོས་གོས་ཤམ་ཐབས་ཆང་གིས་སྦང་ལུགས་དང་། འཚོང་ཁེ་ནོར་རྫས་བུད་མེད་འཚོལ་ལུགས་རྣམས། །དཀོན་མཆོག་གསུམ་ལ་ངོ་ཡང་མི་ཚ་འམ། །སྦྱིན་བདག་རྣམས་ཀྱི་དཀོར་ལ་ཟ་དུས་སུ། །ཤ་ཟ་ཆང་འཐུང་བྱེད་པའི་སྐྱིད་པོ་དེ། །ལས་ཀྱི་ཁྲིམས་ར་འདི་ལ་སླེབས་དུས་སུ། །སྐྱིད་སྡུག་ཅི་འདུག་ལྟོས་དང་དཀོར་གཟན་ཚོ། །མ་གི་ཤ་གཟན་ནག་པོའི་བཙོན་ཁང་ན། །ཁྱེད་རང་རྣམས་ཀྱིས་ཤ་ཡི་ཟ་ཚུལ་དང་། །བྱེད་ལུགས་མཐུན་པའི་བཀོད་པ་ཐ་དད་དུ། །ཁྱེད་རང་བཙུན་པ་ཚོ་ལ་བྱེད་ཅིང་ཡོད། །ལ་ལ་གཙབ་ཡོད་ལ་ལ་རྡུང་བཞིན་ཡོད། །ལ་ལ་བཙོ་ཞིང་ལ་ལ་འཁྱགས་ལ་བོར། །ལ་ལ་ཁྲམ་ཉག་ཚྭ་བླུགས་བསྲེགས་ཡོད་དོ། །ཁྱེད་ཀྱང་འགྲོ་རན་ད་ལྟ་དོངས་ཤིག་ཟེར། །བདག་གིས་རྨི་ལམ་ཡིན་པ་དྲན་མ་ཐུབ། །འཇིགས་ཀྱང་འཇིགས་ལ་སྐྱོ་ཡང་རབ་ཏུ་སྐྱོ། །ཞེས་གསུངས་སོ། །དེ་ལྟར་གསར་རྙིང་གི་རྒྱུད་སྡེ་དང་དགོངས་འགྲེལ་འདི་རྣམས་ནི་དགོངས་པ་མཐུན་པར་ཁ་ཟས་ཀྱི་ཆེད་དུ་བསད་པའི་ཤ་ནི་ཤ་བཟའ་འདོད་ཀྱིས་བཟའ་བར་གནང་བ་ལྟ་ཅི། ཚོགས་འཁོར་དང་རྒྱུན་གྱི་དམ་ཚིག་གི་རྫས་སུ་བྱ་བར་ཡང་མ་གནང་ངོ་། །དེས་ན་སྔགས་ལ་ཁ་གཡར་ནས་ཤ་ཆང་བག་མེད་དུ་སྤྱོད་པ་ནི་ངན་སོང་གི་རྒྱུ་ཁོ་ནའོ། །དེ་ལྟ་བས་ན་ཤ་ཁྲག་གི་རོ་ལ་སྲེད་པས་ཤའི་ཁ་ཟས་བག་མེད་དུ་བསྟེན་པ་འདི་ནིརང་གཞན་གཉིས་ཀ་ལ་གནོད་ཚབས་ཤིན་ཏུ་ཆེ་བ་ཞིག་སྟེ། དེ་ཡང་འདི་ལྟར་གལ་ཏེ་སྐྱེ་བ་ཕྱི་མར་དུད་འགྲོ་ལྟ་བུའི་རིགས་སུ་སྐྱེས་ན་སྔར་ཤ་ཟོས་ཟོས་པའི་བག་ཆགས་ཀྱིས་ཤ་ཁྲག་ལ་ཁ་ཟས་སུ་བྱེད་པའི་རིགས་སུ་སྐྱེ་བར་གོར་མ་ཆག་སྟེ། སྟོན་པས་གསུངས་པ་ལ་ནམ་ཡང་བསླུ་བ་མེད་པའི་ཕྱིར་དང་། བྱེད་པ་རྒྱུ་མཐུན་ཀྱི་འབྲས་བུ་འདི་ཤིན་ཏུ་སྟོབས་དང་ལྡན་པ་ཞིག་ཡིན་པའི་ཕྱིར་རོ། །དེ་འདྲའི་གདུག་པའི་སེམས་ཅན་དུ་གྱུར་པ་ན་བླང་དོར་གྱི་གནས་ནི་མི་ཤེས། སྔོན་གོམས་པའི་བག་ཆགས་ནི་མཐུ་བརྟས་པས་སེམས་ཅན་བགྲང་གིས་མི་ལང་པ་ཞིག་བསད་དེ་རང་ཉིད་འོག་ནས་འོག་ཏུ་ངན་སོང་གི་གཏིང་ནས་ནམ་ཡང་མི་ཐར་པ་ཞིག་ངེས་པར་འབྱུང་སྟེ། གདུག་པའི་སེམས་ཅན་རྣམས་སྐྱེས་པའི་དེ་མ་ཐག་པ་ནས་སྲོག་ཆགས་རྣམས་ཁ་ཟས་སུ་བྱེད་པ་མངོན་སུམ་ཡིན་ལ། སེམས་ཅན་འགའ་རེས་ཞག་རེ་ལ་སྲོག་ཆགས་ཁྲི་ཕྲག་མང་པོ་བཟའ་བའང་ཡོད། ད་ལྟ་མི་ཡུལ་ན་དཀར་གསུམ་མངར་གསུམ་གྱི་ཟས་རོ་བཅུད་ཕུན་སུམ་ཚོགས་པ་འདི་ཙམ་ཞིག་ཡོད་བཞིན་དུ་བླང་དོར་མི་བྱེད་ན་དེ་ཚེ་ཅི་བྱར་ཡོད། དེས་ན་འབྲས་བུ་འདི་ནི་ཤིན་ཏུའང་འཇིགས་སུ་རུང་བ་ཞིག་གོ། དེ་ལྟ་ན་སྦྱོར་ལམ་བཟོད་པ་ཐོབ་པ་དག་ངན་སོང་དུ་འགྲོ་མི་དགོས་པ་མ་གཏོགས་སོ་སྐྱེ་ཕལ་བ་རྣམས་ནི་ཤ་བཟའ་བ་འདི་ཉེན་ཚབས་ཤིན་ཏུ་ཆེ་བ་ཞིག་ཏུ་འདུག་སྙམ་དུ་སེམས་སོ། །ཁྱད་པར་དུ་རང་རེའི་ཡུལ་དུ་དགོན་པ་འགའ་རེས་དགེ་འདུན་གྱི་འཚོ་བའི་ཕྱིར་དུ་སེམས་ཅན་མང་པོ་ཆེད་དུ་གསོད་དེ། ཚུལ་འདི་ནི་སོར་བྱང་སྔགས་གསུམ་གྱི་ཉམས་ལེན་མཐའ་དག་གི་རྩ་བ་དང་འགལ་ཞིང་། བསྟན་པ་ལ་རྨ་འབྱིན་པའི་སྤྱོད་ངན་ཡ་ང་བ་ཞིག་སྟེ། འདི་འདྲའི་སྤྱོད་ངན་དག་ལ་བརྟེན་ནས་གསང་སྔགས་ལ་ལོག་པར་ལྟ་བ་དང་ཁ་ཟེར་བ་སྔར་ཡང་མང་དུ་བྱུང་ལ་ད་ལྟའང་ཤིན་ཏུ་མང་པོ་འདུག་གོ། དེའི་ཕྱིར་སྐྱེ་བོ་མང་པོས་ཆོས་སྤང་གི་ལས་ངན་བསགས་ནས་ངན་སོང་དུ་འགྲོ་བའི་སྡིག་རྐྱེན་དུ་འགྱུར། དེས་ན་བྱ་བ་ངན་པ་འདི་ལྟ་བུ་ནི་རང་གཞན་ཐམས་ཅད་ཕུང་དུ་འཇུག་པ་ཡིན་པས་ན་ཆོས་པ་ཡིན་པར་རློམ་པ་དག་གིས་ངེས་པར་དུ་སྤང་བར་བྱ་དགོས་པ་ཡིན་ཏེ། ཤཱཀྱའི་རྗེས་འཇུག་ཏུ་ཁས་འཆེས་ནས་རང་དབང་རང་ལ་ཡོད་བཞིན་དུ་བསམ་བཞིན་སེམས་ཅན་གྱི་སྲོག་ལ་འཚེ་བ་ལས་ལྷག་པའི་སྐྱོན་ཆེ་བ་ཅི་ཞིག་ཡོད་དེ། ཐེག་ཆེན་ཆོས་ཀྱི་རྩ་བ་བྱམས་དང་སྙིང་རྗེ་ཏིལ་འབྲུ་ཙམ་ཡང་མི་མངའ་བའི་འབྲས་རྟགས་སམ་ཡང་ན་འཚེ་བ་ཆོས་སུ་སྨྲ་བའི་རྟུལ་ཞུགས་སྐྱོང་བ་སྟེ། ཆེས་ཡི་མུག་པའི་གནས་སོ། །ད་ལྟ་འཛམ་བུ་གླིང་འདིར་དམྱལ་བ་ས་ཁར་ཐོན་པ་ལྟ་བུའི་བཤས་རྭ་སྣ་ཚོགས་ན་ཉི་མ་རེ་རེ་ཞིང་ཉེས་མེད་ཀྱི་སེམས་ཅན་བགྲང་གིས་མི་ལང་བ་ཞིག་གིས་སྡུག་བསྔལ་བཟོད་གླགས་མེད་པ་དག་མྱངས་ནས་སྲོག་སྐྱེལ་དགོས་པ་འདི་གཞན་གང་གི་ཕྱིར་དུའང་མ་ཡིན་གྱི། རང་རེ་ཤ་ཟ་བ་པོ་རྣམས་ཀྱི་ཆེད་ཁོ་ན་ཡིན་ལ། རང་ཅག་གིས་ཤན་པ་རྣམས་ལ་ཤའི་རིན་མང་པོ་གཞལ་བ་དེའང་དོན་གྱིས་སེམས་ཅན་དེ་རྣམས་ཀྱིས་སྡུག་བསྔལ་དྲག་པོ་དེ་ཉིད་མྱང་བའི་ཆེད་དུ་བྱིན་པ་ཡིན་ཏེ། སྡུག་བསྔལ་དེ་འདྲ་བ་མྱང་དུ་འཇུག་པ་དེ་ནི་འདི་འདྲ་བའི་རིན་འཐོབ་པའི་ཕྱིར་ཡིན་གྱི། ཤན་པ་དང་སེམས་ཅན་དེ་རྣམས་ཀྱི་བར་ན་འཁོན་ཡོད་པའམ་སེམས་ཅན་དེ་རྣམས་ཀྱིས་ཁྲིམས་འགལ་གྱི་ཉེས་པ་བྱས་པས་མ་ཡིན་པའི་ཕྱིར་རོ། །རྒྱུ་མཚན་དེ་ཉིད་ཀྱི་ཕྱིར་གསོད་པ་པོ་དང་ཤ་བཟའ་བ་པོ་གཉིས་ཆར་ལའང་ཉེས་པ་ཡོད་པར་གསུངས་པ་ཡིན་ཏེ། འཇམ་དཔལ་གྱི་ལྟ་འདོད་མདོར་བསྟན་ལས། རྫས་འཐོབ་དོན་དུ་སྲོག་གཅོད་དང་། །བཟའ་བའི་དོན་དུ་རིན་འཇལ་བ། །གཉིས་པོ་དག་ཀྱང་གསོད་པོ་སྟེ། །ངུ་འབོད་ལ་སོགས་རྣམས་སུ་འཚེད། །རྫས་ཀྱི་དོན་དུ་སེམས་ཅན་གསོད། །རྫས་སྟེར་མེད་ན་སུས་ཀྱང་མིན། །བྱ་དང་བྱེད་པོ་ཡང་དག་འབྲེལ། །རྟག་ཏུ་སྲོག་ཆགས་གསོད་པ་པོ། །གང་ཚེ་རྫས་ཀྱི་ཉ་ཉོས་པས། །ཁྱིམ་གནས་རྣམས་ལ་སྡིག་མེད་ན། །དེ་བཞིན་གཟུགས་སྐུ་ལ་སོགས་པ། །བྱས་པ་འང་ཇི་ལྟར་བསོད་ནམས་འགྱུར། །མཆོད་རྟེན་བརྩིགས་མཁན་གྱིས་བྱས་དང་། །ཉ་ནི་ཉ་བས་བསད་པ་སྟེ། །མཆོད་རྟེན་ཕྱག་བྱེད་བྱེད་པོ་མིན། །ཉ་ཟོས་གསོད་པ་པོ་ལ་མིན། །གང་ཚེ་ཉ་དེ་ཟོས་པ་ཡི། །སྡིག་པ་ཟ་བ་པོར་མེད་ན། །དེ་ཚེ་མཆོད་རྟེན་མཆོད་པ་ཡི། །བསོད་ནམས་མཆོད་བྱེད་པོ་ལ་མེད། །གསོད་པ་པོ་དང་ཟ་བ་པོ། །གཉིས་པོ་དག་ཀྱང་སོ་སོ་སྟེ། །གསོད་པ་པོ་ནི་ནོར་ལ་སྲེད། །ཟ་བ་པོ་ནི་ཟས་ཀྱི་དོན། །གསོད་པོ་ནོར་ལ་སྲེད་པ་དག  །བསྐལ་པ་འབུམ་དུ་འཚེད་པ་འོ། །ཟ་བོ་ཤ་ལ་སྲེད་པ་དག  །བསྐལ་པ་བྱེ་བར་འཚེད་པ་འོ། །ཉན་ཐོས་ཀྱིས་ནི་ཆེད་དག་ཏུ། །ཉ་བས་ཉ་ནི་བསད་པ་དང་། །བྲམ་ཟེ་ཡི་ནི་ཆེད་དག་ཏུ། །ཆང་མས་ཆང་ནི་བྱས་པ་དང་། །ཁ་ན་མ་ཐོ་མེད་གཞན་མིན། །ཤ་ཟ་བ་ཡི་མི་གང་ཞིག །དང་པོ་ཡི་དྭགས་འགྲོ་བ་སྟེ། །ཕྱི་ནས་ངུ་འབོད་འགྲོ་བའོ། །ཞེས་གསུངས་པ་དང་། །ལང་གཤེགས་ལས། གཞན་ཡང་བློ་གྲོས་ཆེན་པོ། དེ་ལ་སྲོག་གཅོད་པ་དག་ནི་ཁེ་འདོད་པའི་ཕྱིར་སྲོག་བཅད་ནས་འཚོང་བར་བྱེད་དོ། །གང་བླུན་པོ་ཤ་ཟ་བ་དེ་དག་ནི་རིན་གྱིས་ཤ་རྣམས་ཉོ་བར་བྱེད་དོ། །ཞེས་པ་ལ་སོགས་པ་གོང་དུ་དྲངས་པ་ལྟར་ཡིན་པའི་ཕྱིར་རོ། །དེ་ལྟར་རང་ཅག་གིས་རིན་བྱིན་ནས་སེམས་ཅན་མང་པོ་གསོད་དུ་བཅུག་སྟེ་ཤ་ཟོས་པའི་དགོས་པ་ནི་ལྕེའི་དབང་པོ་ལ་བྲོ་བ་ཅུང་ཟད་ཙམ་བསྐྱེད་པ་དེར་ཟད་ན། ད་གོས་པ་དེ་ནི་མི་ཡུལ་གྱི་ཟས་གཞན་པ་མང་པོ་དག་གིས་ཀྱང་ངེས་པར་འགྲུབ་པས་ཤ་མ་ཟོས་ཐབས་མེད་ཅི་ཡང་མི་འདུག་མོད། མནོག་ཆུང་གི་དོན་དུ་རང་གཞན་གཉིས་ཀ་ཕུང་བར་བྱེད་པ་འདི་རང་རེ་སོ་སྐྱེ་ཐ་མལ་པ་རྣམས་ཀྱི་ཐོག་མེད་ནས་གོམས་པའི་རང་གཤིས་ཡིན་ནོ། །ཁྱད་པར་དེང་དུས་སྐྱེ་བོ་དག་ལས་འབྲས་ལ་ཡིད་ཆེས་དང་སེམས་ཅན་ལ་སྙིང་བརྩེ་བ་ནི་ཅུང་ཟད་ཀྱང་མེད། འདོད་སྲེད་གཏི་མུག་གིས་ནི་སེམས་རབ་ཏུ་དབྱེན་སྤྱོས་པས་མིག་གིས་མཐོང་ཚད་ཀྱི་དུད་འགྲོ་རྣམས་ཀྱི་ཁྲོད་ན་མི་གསོད་རྒྱུ་དང་མི་བཟའ་རྒྱུ་ཤིན་ཏུ་ཉུང་བར་མ་ཟད་སྲོག་ཆགས་དག་གི་རོ་སྟོད་གསོན་པོར་གནས་བཞིན་དུ་རོ་སྨད་ཚོས་པར་བྱས་ཏེ་བཟའ་བ་སོགས་བློ་ཡུལ་ལས་འདས་པའི་གདོལ་སྤྱོད་སྣ་ཚོགས་བྱེད། མི་རྣམས་ཀྱིས་སྲོག་ཆགས་གཞན་དག་ལ་འབྲུ་དང་ཚོད་མ་སོགས་བཟའ་བཅའ་ཙམ་གྱི་འདུ་ཤེས་ལས་ཅི་ཡང་མེད་དེ། བཟའ་བའི་ཆེད་དུ་སྐྱེད་པར་བྱེད་ཅིང་བཟའ་བའི་ཆེད་དུ་གསོད་པར་བྱེད་། སེམས་ཅན་ཉམ་ཆུང་དེ་རྣམས་ལ་རང་དབང་གི་འཚོ་བ་ཅུང་ཟད་ཀྱང་མེད་པར་གཞན་གྱི་ཁ་ཟས་ཀྱི་ཕྱིར་དུ་སྐྱེ་དགོས་ཤིང་། ཁ་ཟས་ཀྱི་ཕྱིར་དུ་འཚོ་དགོས། ཁ་ཟས་ཀྱི་ཕྱིར་དུ་འཆི་བར་ཡང་བྱ་དགོས་པ་ཡིན་ནོ། །འཚོ་ཚུལ་དང་འཆི་ཚུལ་ནི་ཤིན་ཏུ་ཡ་ང་ཞིང་ཡི་མུག་པ་ཁོ་ན་ཡིན་ཏེ། དེ་ཐམས་ཅད་ཀྱི་རྩ་བ་ནི་མི་རྣམས་ཀྱིས་ཤའི་ཁ་ཟས་བསྟེན་པ་འབའ་ཞིག་ལ་ཐུག་པར་ཤེས་པར་བྱ་ལ། མི་དེ་རྣམས་ཀྱི་ཁྲོད་དུ་རང་ཡང་ཡོད་པ་འདི་གོ་དགོས་སོ། །ཤའི་ཁ་ཟས་སྤངས་པ་དག་ལ་ནི་ཁམས་གསུམ་གྱི་སེམས་ཅན་ཐམས་ཅད་ཤའི་ཆེད་དུ་བསད་ཀྱང་ཤའི་བགོ་སྐལ་ཡང་མེད་ལ་སྡིག་པའི་སྐལ་བའང་མེད་དོ། །དེང་སང་སྐྱེལ་འདྲེན་གྱི་མཐུན་རྐྱེན་དར་རྒྱས་སུ་ཕྱིན་པའི་དབང་གིས་འཛམ་གླིང་གི་ཟས་རིགས་རྣམས་ཕན་ཚུན་ཉོ་ཚོང་གིས་ཁྱེར་ཏེ་གང་སར་ཁྱབ་པས་ཤའི་ཁ་ཟས་རྣམ་གྲངས་སྣ་ཚོགས་པ་དང་བྱ་སྒོང་སོགས་ཀྱི་བཟའ་བཅའ་ཡུལ་གཞན་ནས་བྱུང་བ་རྣམས་དབྱིབས་དང་ཁ་དོག་དང་སྣོད་ཀྱི་བཟོ་བཀོད་མཛེས་པར་སྣང་བ་དུ་མ་འདུག་མོད། འདི་དག་ཐམས་ཅད་ཀྱང་བ་ལང་དང་ཕག་དང་བྱ་སོགས་སེམས་ཅན་རྣམས་ལ་ཤིན་ཏུ་མི་འོས་པའི་མནར་གཅོད་དཔེ་མེད་པ་བྱས་ནས་ཁྲག་དང་མཆི་མའི་རྒྱ་མཚོ་བསྐྱིལ་ཏེ་བཟོས་པ་འབའ་ཞིག་ཡིན་པས་ཅི་མི་སྙམ་དུ་རང་དགར་ལོངས་སྤྱོད་པའི་གནས་ནི་གཏན་མ་ཡིན་ནོ། །སྨྲས་པ། སྣ་ཚོགས་འབྱོར་པའི་ལོངས་སྤྱོད་རབ་རྒྱས་ཉམས་དགའ་མི་ཡི་འཇིག་རྟེན་ནས། །དཀར་གསུམ་མངར་གསུམ་གཙང་མའི་ཁ་ཟས་སྟོན་པས་བསྔགས་པ་རྣམ་སྤངས་ཏེ། །ཀླ་ཀློ་སྡིག་པའི་ཁ་ཆུས་རབ་སྦགས་ཤ་ཁྲག་དྲོན་མོར་རྔམ་པའི་འབྲས། །ཤ་གཟན་གདུག་པའི་གཅན་གཟན་ཡིན་ཞེས་སྟོན་པས་གསུངས་ན་ཅིས་མི་འཇིགས། །
དེ་ཕྱིར་སྐྱེ་བའི་ཕྲེང་བ་ཐམས་ཅད་དུ། །
གཞན་ལ་འཚེ་བའི་འཚོ་བ་ཡོངས་སྤངས་ཤིང་། །
བྱང་སེམས་བདུད་རྩིའི་རྒྱུན་གྱིས་རྒྱུད་བརླན་ཏེ། །
དུས་ཀུན་འགྲོ་བའི་དོན་ལ་གཞོལ་བར་ཤོག །
 
ཅི་སྟེ་ལས་དང་ཉོན་མོངས་ཤུགས་ཀྱིས་གདུག་འགྲོའི་ཁྲོད་དུ་ཁྱེར་ན་ཡང་། །
སྟོན་པའི་བཀའ་ལུང་ཕྱག་རྒྱའི་རེ་ཁཱ་སེམས་ལ་བཏབ་པ་མངོན་སད་དེ། །
ཤ་ཁྲག་སྤྱོད་ཕྱིར་འགྲོ་ལ་འཚེ་བའི་གདུག་པའི་བསམ་སྤྱོད་རབ་བཏང་ནས། །
སྙིང་རྗེའི་དབང་གིས་སྲོག་གི་འདུ་བྱེད་ཕངས་པ་མེད་པར་འདོར་གྱུར་ཅིག །
 
ལས་སྣང་དུས་རླབས་མཁའ་ལ་འཕྱོ་བ་སྲིད་པའི་རྒྱ་མཚོ་ཡ་ང་བར། །
དཀར་ནག་ལས་འབྲས་དྲི་ཡི་ཤིང་རྟས་ཇི་སྲིད་བསྐྱོད་པ་དེ་སྲིད་དུ། །
སྐྱེ་བོ་རྣམས་ཀྱི་ལུས་དང་སྲོག་ལ་གནོད་མེད་ཞི་བའི་སེམས་ལྡན་ཞིང་། །
མགོན་མེད་འགྲོ་བའི་མགོན་དུ་འགྱུར་བའི་ཡིད་ལ་སྨོན་པ་འགྲུབ་གྱུར་ཅིག །
 
·གསར་འགྱུར་གོང་མ:སྒྲུང་མཁན་ཚེ་རིང་དབང་འདུས་སྐུ་གཤེགས་པར་མྱ་ངན་ཞུ།
·གསར་འགྱུར་འོག་མ:ཚ་ལུ་མ་ཚན་རྩལ་རྒྱུན་ཤེས་དྲ་བ་ཤར་གཏོང་བྱས།
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
མིག་སྔར་གསར་མི་འདུག
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 9:03:59 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 12:10:29 [来自: 112.5.248.152]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 12:09:31 [来自: 112.5.248.152]

འབྲེལ་ཡོད་དཔྱད་བརྗོད 54 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།23.44MS