ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> གཏེར་གྱི་བུམ་བཟང་། >> མི་ཆོས
  གསར་འགྱུར་ཀློག་པ།

དུས་རབས་ཉེར་གཅིག་པའི་སྙིང་གཏམ་ཆ་ཚང་།

[རྩོམ་པ་པོ:མཁན་ཆེན་འཇིགས་མེད་ཕུན་ཚོགས་  ཡོང་ཁུངས:ངེད་དྲ་བ།  དུས་ཚོད:2011/2/6 12:49:30  བཀླགས་ཐེངས:1705][ཡིག་གཟུགས:ཡིག་གཟུགས་མདོག]
 
༄༅།།དུས་རབས་ཉེར་གཅིག་པའི་གངས་ཅན་པ་རྣམས་ལ་
ཕུལ་བའི་སྙིང་གཏམ་སྤྲིན་གྱི་རོལ་མོ་
ཞེས་བྱ་བ་བཞུགས་སོ།།
 
   ༧མཁན་ཆེན་འཇིགས་མེད་ཕུན་ཚོགས་འབྱུང་གནས།
 
 དུས་རབས་ཉེར་གཅིག་པའི་སྙིང་གཏམ་འདི་དེ་སྔོན་གང་ཟག་སོ་སོས་ཉམས་སུ་ལེན་བདེ་བའི་གོ་རིམ་ལྟར་དུམ་བུ་དུམ་བུ་བྱས་ནས་བཀོད་ཡོད་ཀྱང་།  དུས་དང་ཉེ་བར་འཚམས་ཤིང་ཁ་གསལ་གནད་འདུས་དོན་ཟབ་རིན་ཐང་ཅན་གྱི་བསྟན་བཅོས་འདི་ཉིད་ཤིན་ཏུ་རྩ་ཆེ་བའི་རྒྱུུ་མཚན་ལ་བརྟེན། ད་ལམ་འདིར་ཡང་བསྐྱར་ཆ་ཚང་ཕྱོགས་གཅིག་ཏུ་བཀོད་ཡོད་པས། རང་རེ་གངས་ཅན་པའི་སྐྱེ་བོ་རྒན་གཞོན་བར་གསུམ་ཚང་མས་འདི་ཉིད་ལམ་སྟོན་གྱི་སྒྲོན་མེ་ལ་འཛིན་ཏེ་དུས་རྒྱུན་གྱི་མི་ཚེའི་འཚོ་བའི་ནང་སོས་སོས་ལག་ལེན་ཏུ་བསྟར་གང་ཐུབ་གནང་རྒྱུའི་རེ་བ་རྩེ་གཅིག་ཏུ་ཞུའོ།
 
          མཚན་དཔེ་རི་དྭགས་གཞོན་ནུའི་རྟགས་འཆང་མཐོང་ན་མི་མཛེས་མེད་པའི་སྐུ། །
          ཡན་ལག་དྲུག་ཅུའི་འོད་སྣང་འབུམ་སྤྲོ་འགྲོ་ཀུན་མོས་བློར་འཚམ་པའི་གསུང་། །
          མཁྱེན་བརྩེ་ནུས་པའི་དཀྱིལ་འཁོར་ཉ་གང་སྤངས་རྟོགས་མ་ལུས་མཐར་སོན་ཐུགས། །
          ཐུབ་པའི་དབང་པོ་སྲིད་པའི་མིག་གཅིག་དེ་རིང་བདག་བློའི་མཁའ་ལ་རོལ། །
          བྱིན་རླབས་འོད་ཟེར་དཀར་པོའི་སྣང་བ་ཡིས། །
          ཕན་བདེ་ཨུཏྤལ་འཛུམ་པའི་གཉེན་གཅིག་པུ། །
          ཐུབ་པའི་དམ་ཆོས་བདུད་རྩིའི་འབྱུང་གནས་ཆེ། །
          དུས་ཀྱི་མཐར་ཡང་སྲིད་ན་རྒྱལ་གྱུར་ཅིག །
          སྡོམ་ཁྲིམས་པད་དཀར་མཛེས་པའི་སྙིང་པོ་རུ། །
          རིག་གྲོལ་སྦྲང་རྩི་ཕུང་པོའི་ཁུར་གྱིས་ངལ། །
          བསོད་ནམས་དྲི་བཟང་མངར་མོས་རིས་མེད་འགྲོ། །
          འཚོ་མཛད་ཚོགས་ཀྱི་མཆོག་ལ་རྟག་ཏུ་འདུད། །
          གུར་ཀུམ་མདངས་འཛིན་གཞོན་ནུའི་སྐུ་ལུས་ཅན། །
          ཚེ་རབས་དུ་མར་བསྙེན་པའི་ཡི་དམ་ལྷ། །
          འཇམ་དཔལ་དཔའ་བོ་ཞེས་སུ་གྲགས་འབར་བས། །
          ཀུན་ཏུ་ཤིས་པའི་མེ་ཏོག་འཐོར་གྱུར་ཅིག །
          གངས་རིའི་མུ་ཁྱུད་མཛེས་པའི་གནས་མཆོག་ན། །
          དད་དང་སྙིང་རྗེས་འཚོ་བ་བོད་ཀྱི་རིགས། །
          དེ་ཡི་མ་འོངས་བསམ་དང་སྦྱོར་བའི་ཚུལ། །
          ཤ་ཞེན་དྲག་པོའི་བློ་ཡིས་བཤད་ཀྱིས་ཉོན། །
      དེ་ཡང་བདག་ཅག་གི་སྟོན་པ་ཐམས་ཅད་མཁྱེན་པ་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོ་དེ་ཉིད་ཀྱི་ལུང་གིས་ཟིན་ཅིང་།  འཕགས་པ་འཇིག་རྟེན་དབང་ཕྱུག་གི་གདུལ་ཞིང་དུ་གྱུར་པ་གངས་ཅན་གྱི་ལྗོངས་ཞེས་པ་འཛམ་གླིང་གི་སའི་ཡང་རྩེར་སོན་པའི་གནས་འདིར་མི་ལོ་སྟོང་ཕྲག་དུ་མའི་སྔོན་ནས་དཔའ་མཛངས་བརྟུལ་ཕོད་དང་ལྡན་ཞིང་།  བྱམས་བརྩེ་དྲང་བདེན་ཅན།  ཡ་རབས་ཀྱི་སྤྱོད་པ་ལ་ངང་གིས་གནས་པའི་ཆོས་ལྡན་གྱི་མི་རིགས་ལོ་རྒྱུས་དང་ལྡན་པ་ཞིག་ཆགས་ཡོད་པ་ལ་ཆོས་ལྡན་བོད་ཀྱི་རྒྱལ་ཁམས་ཞེས་ཡོངས་སུ་གྲགས། དེ་ཡང་རང་རེའི་མེས་པོ་སྲང་བཙན་གྱི་དུས་སུ་ཐུན་མོང་དང་ཐུན་མོང་མ་ཡིན་པའི་རིག་གཞུང་མང་དུ་དར་བར་མཛད། ཁྲི་སྲོང་གི་སྐུ་རིང་ལ་ནུབ་ཀྱི་ཆུ་བོ་གང་གྰའི་འགྲམ་ནས་ཤར་རྒྱ་་ནག་ཁྲང་ཨན་ལ་དབང་བསྒྱུར་ཏེ་ཆབ་སྲིད་མངའ་ཐང་སྟོབས་འབྱོར་གྱིས་ཁམས་ཀྱི་རྒྱལ་ཁབ་སུ་ལའང་ངོ་གནོང་མི་དགོས་པ་དང་། ཕྱིས་རྒྱ་གར་གྱི་པཎ་ཊི་ཏ་ཡོངས་ཀྱི་གཙུག་རྒྱན་དཔལ་མར་མེ་མཛད་ཡེ་ཤེས་བོད་དུ་བྱོན་སྐབས་ཨོ་རྒྱན་སངས་རྒྱས་གཉིས་པ་སོགས་ཀྱི་སྐུ་རིང་ལ་བོད་དུ་ཆོས་དར་བ་ཙམ་ནི་རྒྱ་གར་དུའང་དར་ཡོད་ཚོད་མི་འདུག་ཅེས་བསྔགས་བརྗོད་མཛད་པ་ལྟར་བོད་ཆོས་སྲིད་གཉིས་ལྡན་གྱི་རྒྱལ་ཁབ་སྨོན་པའི་གནས་སུ་གྱུར་བ་ཞིག་བྱུང་སྟེ།  དེ་དག་ཀྱང་ཆོས་རྒྱལ་སྐུ་དྲིན་ཅན་དེ་རྣམས་དང་བོད་རྒྱ་ཆེའི་མང་ཚོགས་ཀྱི་འབད་པ་རང་ལ་བརྟེན་ནས་བྱུང་སྟེ། དེ་སོགས་ང་རྒྱལ་དང་སྤོབས་པ་གཉིས་ཀ་སྟེར་བའི་ལོ་རྒྱུས་ཀྱི་དན་དཔང་འདི་དག་ཡིན་པར་རླབས་ཆེན་གྱི་ལོ་རྒྱུས་དང་ལྡན་པའི་མི་རིགས་ཤིག་དངོས་གནས་ཡིན་པར་ཤེས་པར་བྱ་དགོས་པ་ཞིག་གོ། དེ་ནས་རིམ་བཞིན་དུས་ཀྱི་འཕོ་འགྱུར་གྱིས་བོད་ལ་དར་རྒུད་སྣ་ཚོགས་ཤིག་བྱུང་སྟེ། ད་ལྟའི་དུས་རབས་གསར་བའི་ནང་དུ་ནི་ང་ཚོ་སྔོན་ཐོནགྱི་མི་རིགས་ཀྱི་གྲལ་དུ་ཚུད་ཡོད་མེད་ཀུན་གྱིས་ཤེས་པ་དེ་ག་རང་རེད།  ད་ལྟས་མི་འགྱང་བའི་མ་འོངས་པར་དུས་རབས་ཉེར་གཅིག་པའི་ནང་དུ་འབྱོར་གྲབས་ཡིན། །དུས་རབས་འདི་ནང་མིའི་བསམ་བློའི་འཁྱེར་སོ་དང་ཕྱི་རོལ་གྱི་དངོས་པོ་འཛུགས་སྐྲུན་སོགས་ལ་འཕོ་འགྱུར་ཅི་རིགས་འོང་རྒྱུ་ནི་དངོས་པོའི་ཆོས་ཉིད་རེད། །འཕོ་འགྱུར་དེའི་ཁྲོད་ནས་ང་ཚོ་བོད་མི་རིགས་ཀྱི་བསམ་བློའི་དགེ་མཚན་དང་།  །ཐུན་མིན་གྱི་རིག་གཞུང་། ཡུལ་སྲོལ་གོམས་གཤིས་སོགས་ཕ་མེས་ཀྱི་སྲོལ་རྒྱུན་བཟང་པོ་རྣམས་མི་ནུབ་པར་རྒྱུད་འཛིན་བྱ་རྒྱུ་དང་།  །དེང་རབས་ཀྱི་རིག་པ་གསར་བ་འཕྲལ་ཕུགས་གཉིས་ཀར་ཕན་པའི་ཆ་རྣམས་ལ་བདག་གིར་བྱས་ཏེ་འཛམ་གླིང་གི་འགྲོ་བ་མིའི་རིགས་འདྲ་འདྲའི་ནང་ནས་རྗེས་ལུས་སུ་མི་འགྱུར་བའི་ཐབས་བསམ་བློ་ཞིབ་ཚགས་ཤིག་གཏོང་རྒྱུ་ནི་བོད་མི་རེ་རེས་ཀྱང་མི་བྱེད་དུ་མི་རུང་བ་ཞིག་རེད།  །དཔེར་ན་དུད་ཁྱིམ་དབུལ་བོ་འབུ་ཚང་ལྟ་བུ་ཞིག་ལས་མེད་པ་དག་གིས་ཀྱང་ངེད་ཚང་གི་མ་འོངས་པ་ན་འདི་དང་འདི་འདྲ་ཞིག་མ་བྱས་ན་ཉམས་རྒུད་འདི་དང་འདི་འདྲ་ཞིག་འོང་གིས་ཞེས་ཁྱིམ་མི་ཡོངས་ཀྱིས་བསམ་བློ་ཆིག་སྒྲིལ་བྱེད་པ་ཡིན་ན།  །ང་ཚོ་རླབས་ཆེན་གྱི་ལོ་རྒྱུས་དང་ལྡན་པའི་མི་རིགས་འདི་འདྲ་བ་ཞིག་གིས་འཛམ་གླིང་ཧྲིལ་པོར་ཕན་པ་ཡོད་པའི་རིག་གཞུང་སོགས་གང་ལའང་བསམ་བློ་མི་གཏོང་བར་རང་གི་ལྟོ་གོས་ཙམ་གྱི་ཆོག་ཤེས་པར་བྱེད་པ་ནི་བླུན་པོ་ཐ་ཤལ་བ་ལང་གི་ངང་ཚུལ་གསལ་བ་བྱེད་པ་སྟེ་ཤིན་ཏུ་སྨད་པའི་གནས་སོ།  །དེས་ན་བྱ་བ་འདི་ནི་གཙོ་བོ་བོད་མི་རིགས་སྤྱི་ལ་ཕན་སེམས་ཆེ་ཞིང་བློ་དཀར་གཞུང་དྲང་གི་རྒན་པོ་ཉམས་མྱོང་ཅན་རྣམས་དང་།  གནའ་དེང་ཟུང་དུ་སྦྲེལ་ཏེ་བཟང་ལེན་ངན་དོར་བྱེད་ནུས་པའི་གཞོན་ནུ་བློ་གྲོས་ཅན་རྣམས་དང་།  ཆོས་སྲིད་གཉིས་ཀ་ལ་ཤེས་རྒྱ་ཆེ་ཞིང་མི་སེམས་ལེགས་པའི་ལམ་དུ་སྒྱུར་བའི་ནུས་པ་དང་ལྡན་པའི་བླ་སྤྲུལ་བཅས་ལ་མ་བསྐོས་ལས་ཀྱི་བགོ་སྐལ་དུ་བབ་འདུག་པས་སོ་སོ་ནས་འོས་བབ་ཀྱི་ནུས་པ་རྩལ་དུ་འདོན་རྒྱུ་དང་།  གཞན་བོད་རྒྱ་ཆེའི་དམངས་ཚོགས་རྣམས་དེ་དག་གི་རྗེས་སུ་འབྲང་ཏེ་བློ་སེམས་ཆིག་སྒྲིལ་གྱིས་མ་འོངས་པའི་མདུན་ལམ་ལ་འབད་རྩོལ་བྱ་རྒྱུ་ནི་ཤིན་ཏུ་གལ་ཆེན་བའི་གནས་སོ།  །
      དེས་ན་མ་འོངས་པ་དུས་རབས་ཉེར་གཅིག་པའི་ནང་ང་ཚོ་བོད་མི་རིགས་ཀྱི་བསམ་བློའི་འཁྱེར་སོ་ཇི་ལྟར་བྱ་བ་ལ་བཞི་སྟེ།  དང་པོ་ནི་ཇི་སྐད་དུ།  བསམ་པ་བཟང་ན་ས་དང་ལམ་ཡང་བཟང་།  །བསམ་པ་ངན་ན་ས་དང་ལམ་ཡང་ངན།  །ཐམས་ཅད་བསམ་པ་དག་ལ་རག་ལས་པས།  །རྟག་པར་བསམ་པ་བཟང་ལ་འབད་པར་བྱ།  །ཞེས་གསུངས་པ་བཞིན་དུ།  ཕོ་མོ་རྒན་གཞོན་ཡོངས་ཀྱིས་རྒྱུན་དུ་བསམ་པ་བཟང་པོ་འབའ་ཞིག་ལ་ཕུགས་བཅོལ་དགོས།
   དེ་ཡང་བསམ་པ་བཟང་པོ་ཟེར་བ་གཞན་འགྲོ་བ་མིའི་རིགས་སུ་གཏོགས་པ་ཞིག་གམ། ཐ་ན་སྲོག་ཆགས་གྲོག་སྦུར་ཡན་ཆད་ཅིག་གིས་སྡུག་བསྔལ་མྱོང་བཞིན་ཡོད་པ་མཐོང་ན།  །འདིའི་སྡུག་བསྔལ་དེ་འཕྲལ་དུ་མེད་པར་གྱུར་ན་ཅི་མ་རུང་སྙམ་དུ་སེམས་ཁུར་བྱ།  དཔེར་ན་རང་ཉིད་ཀྱིས་ཐ་ན་ཉི་མ་ཚ་བའི་དུས་སུ་རླུང་བསིལ་བ་ཙམ་དང་།  །གྲང་བའི་དུས་སུ་ཉི་འོད་ཅུང་ཟད་ཕོག་པའི་བདེ་བ་ཡན་ཆད་འདོད་ལ། ལུས་ལ་མེ་སྟག་ཕྲ་མོ་ཙམ་ལྷུང་བ་དང་།  ཚེར་མ་ཟུག་པ་ཙམ་དང་།  གཞན་གྱི་ཚིག་ངན་ཞིག་སྨྲས་པ་ཙམ་ཡང་ཐོས་པ་མི་འདོད་པ་དེ་བཞིན་དུ་རང་རེ་མིའི་རིགས་ཐམས་ཅད་ཙམ་དུ་མ་ཟད་འབུ་སྦྲང་ཡན་ཆད་དེ་ག་ཁོ་ན་ལྟར་ཡིན་པས་གཞན་ལ་རང་དགར་གནོད་པ་བྱ་བའི་སེམས་དང་།  གསོད་སེམས་སྤང་བར་བྱ།  གཞན་དབུལ་བོ་ཉམ་ཐག་པ་ཞིག་གིས་ནོར་རྫས་ཅུང་ཟད་རྙེད་པའམ། དུད་འགྲོ་ཞིག་བཤས་ར་ནས་ཐར་བའམ།  །ཐ་ན་མི་ཞིག་གིས་བོར་སྟོར་བྱུང་བའི་དངོས་པོ་ཞིག་སླར་རྙེད་པ་ཡན་ཆད་ལའང་ཅི་མི་སྙམ་དུ་མི་འཇོག་པར་དགའ་བར་བྱ།  དེ་དག་ལ་སྙིང་རྗེ་དང་བྱམས་པ་ཟེར།  དེ་གཉིས་རང་རེ་བོད་མི་ཙམ་དུ་མ་ཟད་སྐྱེ་འགྲོ་སྤྱི་ལ་དམིགས་ཏེ་བསམ་དགོས།  ཤ་རུས་གཅིག་པའི་རང་རིགས་ཀྱི་སྤུན་ཟླ་ཡོངས་ལ་དུང་སེམས་ལྷག་པར་བྱ་རྒྱུ་དང་།  རང་རིགས་ཀྱི་ཡོན་ཏན་ལ་ཕངས་སེམས་ཁྱད་པར་ཅན་བྱ་རྒྱུ་ནི་སྐྱེ་བོ་དམ་པའི་ངང་ཚུལ་ཡིན་ཏེ་མི་རིགས་དེ་ཉིད་ནམ་གནས་ཀྱི་བར་དུ་མེད་ཐབས་མེད་པའི་བསམ་བློ་རིན་ཐང་དང་བྲལ་བ་ཞིག་ཡིན།  དེ་འདྲའི་བྱམས་པ་དང་སྙིང་རྗེ་དེ་ཉིད་མི་གཅིག་ལ་ཡོད་ན་སེམས་ཁོང་འཁྲུགས་པ་མེད་པར་རྟག་ཏུ་སྣང་བ་དགའ་ཡ་ལེ་གནས་ཤིང་།  ཡུལ་གང་དུ་ཕྱིན་ཀྱང་གཞན་ཕན་འབྱུང་བ།  །གྲོགས་སུ་དང་འགྲོགས་ཀྱང་མི་མཐུན་པ་མེད་པ།  སྐྱེ་བོ་ཀུན་གྱིས་བསྟོད་བཀུར་བསྔགས་པའི་གནས་སུ་གྱུར་ཏེ་རང་གི་བསམ་དོན་ཐམས་ཅད་ངང་གིསའགྲུབ།  སྐྱེ་བ་ཕྱི་མ་ཡང་།  སྤྱོད་འཇུག་ལས།  སེམས་གསལ་གཅིག་གི་འབྲས་བུ་ནི།  །ཚངས་ལ་སོགས་པ་ཡིན་པར་འདོད།  ཅེས་པ་ལྟར་བྱམས་དང་སྙིང་རྗེའི་རྣམ་སྨིན་གྱི་འབྲས་བུས་མངོན་མཐོ་ལྷ་མིའི་་དཔལ་ལ་སྤྱོད་ཅིང་།  རྒྱུ་མཐུན་གྱི་འབྲས་བུས་ཚེ་རབས་ཐམས་ཅད་དུ་བྱམས་དང་སྙིང་རྗེ་གཞན་ཕན་ཅན་དུ་འགྱུར་བ་གོར་མ་ཆག་པས་ཚེ་འདི་ཙམ་དུ་མ་ཟད་སྐྱེ་ཞིང་སྐྱེ་བའི་ཕྲེང་བ་ཐམས་ཅད་དོན་དང་ལྡན་པ་ཡིན་ནོ།  །ཡང་དེ་འདྲའི་བསམ་པ་བཟང་པོ་དེ་ཁྱིམ་ཚང་གཅིག་གི་ཁྱིམ་མི་ཡོངས་ལ་ཡོད་ན་ཁྱིམ་ཚང་དེ་དབུལ་པོ་ཐ་ཆད་ཇི་འདྲ་ཞིག་ཡིན་རུང་སྟེ།  བདེ་བ་ཐམས་ཅད་ཀྱི་རྩ་བ་སེམས་སྐྱིད་པ་ཞེས་པ་ལྟར་དུ་ཐམས་ཅད་སྐྱིད་ཀྱི་ངང་ནས་དུས་འདའ་བ་ཞིག་འོང་།  དེ་བཞིན་དུ་བསམ་པ་དེ་གྲོང་ཚོ་་གཅིག་ལ་ཡོད་ན་གྲང་ཚོ་གཅིག་དང་།  རྒྱལ་ཁབ་གཅིག་ལ་ཡོད་ན་རྒྱལ་ཁབ་གཅིག  འཛམ་བུ་གླིང་གི་མི་ཡོངས་ལ་ཡོད་ན་འཛམ་གླིང་ཧྲིལ་པོ་བདེ་ཞིང་སྐྱིད་པ་ཞིག་འོང་བ་ལ་ཐེ་ཚོམ་མེད་དོ།  རང་རེས་འདས་ཟིན་པའི་ལོ་རྒྱུས་དེ་ཚོར་ཕྱི་མིག་ཅིག་བལྟས་ན་འཛམ་གླིང་སྤྱི་དང་བྱེ་བྲག་ལ་གོད་ཆག་བྱུང་ངོ་ཅོག་ཐམས་ཅད་རང་གི་དོན་དུ་གཞན་ལ་འཚེ་བར་འདོད་པའི་བསམ་པ་མ་རུང་བས་བྱས་པ་འབའ་ཞིག་སྟེ།  དུས་རབས་འདི་ཉིད་ཀྱི་སྟོད་དུ་འཛམ་གླིང་འཁྲུག་ཆེན་དང་པོ་དང་གཉིས་པ་བྱུང་སྟེ་སྐྱེ་བོ་བགྲང་གིས་མི་ལང་པ་ཞིག་དམར་གསོད་བྱས།  ཨ་རིས་འཇར་པན་གྱི་སྟེང་དུ་རྡུལ་ཕྲན་འབར་མདེལ་འཕངས་ཏེ་མི་འབུམ་གྱི་ཚེ་སྲོག་དུས་གཅིག་ལ་བརླགས།  ཉེ་ཆར་མཚོ་ཁུག་དུ་འཁྲུག་པ་ལངས་ཏེ་དེང་རབས་ཀྱི་མཚོན་ཆ་ང་ཡ་བ་རྣམས་སྤྱད་ནས་དཀའ་སྡུག་གིས་བསགས་པའི་ནོར་རྫས་དང་རིན་ཐང་བྲལ་བའི་སྐྱེ་འགྲོའི་ཚེ་སྲོག་ཅི་ཙམ་ཞིག་འཕྲོ་བརླག་ཏུ་བཏང་།  གཞན་ཡང་རྒྱལ་ཁབ་དང་རྒྱལ་ཁབ་བར།  མི་རིགས་དང་མི་རིགས་ཀྱི་བར་ཕན་ཚུན་མཐོང་ཆུང་།  བརྙས་བཅོས།  བཙན་དབང་ཅི་ཙམ་བྱས་པ་ཐམས་ཅད་ཀྱི་རྩ་བ་བྱམས་དང་སྙིང་རྗེ་མེད་པ་འདི་ཁོ་ན་ལ་ཐུག  ཁྱད་པར་དུ་ཡང་འཛམ་གླིང་སྤྱི་ལ་མཚོན་ན་ད་ལམ་སྔོན་མེད་དེང་རབས་ཀྱི་མཚོན་ཆ་འཇིགས་སུ་རུང་བ་གྲངས་ཀྱིས་མི་ཆོད་པ་ཞིག་བཟོས་ཏེ་ས་འོག་ས་སྟེང་ས་བླ་ཐམས་ཅད་བཀང་ནས་ཡོད་པའི་དུས་འདི་འདྲའི་སྐབས་སུ་བྱམས་དང་སྙིང་རྗེའི་དཔྱང་ཐག་ཆད་ན་འཛམ་གླིང་ཧྲིལ་བོའི་དཔལ་འབྱོར།  རིག་གཞུང་།  སྐྱེ་འགྲོའི་ཚེ་སྲོག་དང་བཅས་པ་ལ་རེ་ཐག་གཏིང་ནས་ཆད་ཚར་བ་རེད།  དེ་ལྟ་བས་ན་གཞན་ཕན་གྱི་བསམ་པ་བཟང་པོ་བརྒྱ་ལ་སྐྱེད་མ་ནུས་ནའང་།  ཇི་སྐད་དུ།  རང་གི་ལུས་ལ་དཔེ་ལོངས་ལ།  །གཞན་ལ་གནོད་པ་མ་བྱེད་ཅིག  །ཅེས་པ་ལྟར་དུ་རང་གི་ལུས་སེམས་ལ་སྡུག་བསྔལ་འབྱུང་བར་མི་འདོད་པ་དཔེ་བྱས་ཏེ་རང་བདེ་བ་ཅུང་ཟད་འཐོབ་པའི་ཆེད་དུ་གཞན་གྱི་ལུས་སྲོག་ལ་གནོད་པ་བྱ་འདོད་ཀྱི་བསམ་ངན་དེ་དུག་བཞིན་དུ་སྤང་བར་བྱ་དགོས།  ལར་རང་རེའི་སེམས་འདི་རྟ་གསར་ལ་ཁ་ལོ་བསླབ་པ་དང་འདྲ་སྟེ་གང་བསླབ་པ་དེ་ཉིད་ལོབ་སྟེ་འོང་།  དང་པོ་ནས་བསམ་པ་འཆོས་མི་དགོས་པར་ཕན་སེམས་ཅན་ནི་དཀོན་པོ་རང་ཡིན་ཡང་མི་ཚེ་དོན་དང་ལྡན་པ་ཞིག་བྱ་འདོད་ཕན་ཆད་འདི་མི་སློབ་ཀ་མེད་ཡིན།  །བསམ་པ་བཟང་པོ་འདི་ཡོད་ན་ཆོས་དང་འཇིག་རྟེན་གྱི་ལེགས་ཚོགས་མ་ལུས་པའི་གཞི་རྟེན་གཅིག་པུ་ཡིན་པས་ཤིན་ཏུ་གལ་ཆེའོ།  །
   གཉིས་པ་ཟོལ་མེད་ཀྱི་དྲང་བདེན་བྱ་རྒྱུ་ནི།  རང་རེ་མིའི་སྤྱི་ཚོགས་ཀྱི་ནང་དུ་སྐྱེས་ནས་མ་ཤིའི་བར་མེད་དུ་མི་རུང་བ་གཅིག་ནི་ཟོལ་མེད་ཀྱི་དྲང་བདེན་གྱི་བསམ་པ་འདི་རེད།  མི་རིགས་དང་མི་རིགས་བར་རམ།  མི་དང་མིའི་བར་ཡང་རུང་སྟེ་གཡོ་སྒྱུ་མེད་པའི་བསམ་པ་དྲང་པོ་བྱ་རྒྱུ་འདི་ནི་རང་བདེ་བ་དང་གཞན་དགའ་བའི་རྒྱུ་མ་ནོར་བ་ཡིན།  རང་སེམས་ལ་ཞུ་དག་འཕེར་བའི་བསམ་པ་ཟོལ་མེད་ཅིག་གིས་བྱ་བ་གང་ཞིག་བསྒྲུབས་ཀྱང་ཕལ་མོ་ཆེ་ཞིག་ཡིད་བཞིན་དུ་འགྲུབ་པ་མངོན་སུམ་རེད་ལ་གལ་ཏེ་མ་འགྲུབ་ཀྱང་འགྱོད་པ་ཅི་ཡང་མི་འོང་།  གཞན་དུ་རང་བདེ་འདོད་དང་གཞན་བསླུ་འདོད་ཀྱིས་གཡོ་སྒྱུ་ཁོ་ན་བྱས་ཚེ་འགྲོ་བ་མིའི་རིགས་ལ་བསམ་གཞིགས་གཏན་ནས་བྱེད་མི་ཤེས་མཁན་ཞིག་མི་སྲིད་པས་ཡང་ནས་ཡང་དུ་མགོ་སྐོར་གཏོང་ཐུབ་དཀའ་བས་རང་གི་ཞེ་འདོད་མི་འགྲུབ་པར་མ་ཟད་མཐར་རང་ཉིད་ཕོངས་པའི་རྒྱུར་ཡང་འགྱུར་རོ།  །སྤྱིའི་ཆ་ནས་ང་ཚོ་བོད་མི་རྣམས་དངོས་ནས་གཡོ་མེད་དྲང་བདེན་གྱི་བསམ་པ་ཅན་དུ་འདུག་སྟེ།  རང་རེའི་བོད་རིགས་སྤུན་ཟླ་རྣམས་འཛམ་གླིང་ཧྲིལ་བོར་འཐོར་ཏེ་གནས་ཚེ་ཡུལ་དེ་དང་དེའི་མི་རྣམས་ཀྱི་ཡུན་རིང་དུ་འགྲོགས་པའི་ཉམས་མྱོང་ལ་བོད་ཟེར་བ་སྙིང་རྗེ་ཕན་སེམས་ཅན།  དྲང་བདེན་དང་།  སྤོབས་པ་ཅན་ཡ་རབས་ཀྱི་མི་རིགས་ཤིག་རེད་ཅེས་བསྔགས་བརྗོད་བྱེད་པ་ཆེས་མང་དུ་འདུག་པ་ནི་ང་ཚོའི་ཕ་མེས་བཟང་པོས་བཞག་པའི་གཟི་བརྗིད་ཡིན་པས་སྲོལ་བཟང་དེ་དག་མི་ཉམས་པར་བྱ་རྒྱུ་ནི་གལ་ཆེ་བའི་གནས་སོ།།
    གསུམ་པ་རང་རིགས་དང་རང་རིགས་ཀྱི་ཡོན་ཏན་ལ་ཕངས་སེམས་ཆེ་ཐང་དུ་བྱ་རྒྱུ་ནི།  འཛམ་གླིང་ཐོག་གི་མི་རིགས་གང་ཞིག་ཡིན་རུང་སྟེ་མི་རིགས་དེ་ཉིད་ཀྱི་རིགས་རྒྱུན་དང་།  རིག་གནས།  ཡུལ་སྲོལ་གོམས་གཤིས་སོགས་ཅི་ཙམ་ཞིག་ཏུ་གནས་ཐུབ་མིན་ནི་གཙོ་བོ་མི་རིགས་དེ་ཉིད་ལ་རང་རིགས་ཀྱི་རིགས་རྒྱུན་སོགས་ལ་མཐོང་ཆེན་བརྩི་འཇོག་ཕངས་སེམས་ཡོད་མེད་འབའ་ཞིག་ལ་རག་ལས་ཡོད།  །རང་རིགས་ཀྱི་ཡོན་ཏན་ལ་རང་རང་གི་བདག་པོ་མ་བྱས་ན་གཞན་གྱིས་སྐྱོབ་དགོས་ཚེ་དཀའ་ལས་རང་ཡོད།  གང་གི་ཚེ་མི་རིགས་རང་ཉིད་ཀྱི་ཡོན་ཏན་ལ་བརྩི་འཇོག་ཅི་ཡང་མེད་པར་དགོས་མེད་དུ་གཞན་གྱི་ལད་མོ་ཁོ་ནར་འཆེལ་བ་དེའི་ཚེ་མི་རིགས་དེ་ཉིད་ཀྱི་རིག་གཞུང་སོགས་ཕལ་ཆེར་ས་གོ་ལ་འདིའི་སྟེང་ནས་ཡལ་བའི་མགོ་རྩོམ་པ་དང་རྟགས་བསྟན་པ་ཡིན།  །འཛམ་གླིང་ཐོག་མི་རིགས་སུ་འདྲ་ཞིག་ཡིན་ཡང་རང་རིགས་ཀྱི་ཡོན་ཏན་ལ་ཤ་ཚ་མི་བྱེད་པ་སུ་ཞིག་ཡོད་དེ།  གལ་ཏེ་ཡོད་ན་བླུན་པོ།  ཅོལ་ཆུང་།  ཀླད་མེད་སྤྲེའུ་ལྟ་བུ་ཞེས་བྱ།  ཉེ་དུས་སུ་ཝོས་པའི་ཁུའི་སྐད་ཡིག་རྒྱུན་ཆད་དེ་ས་ཆེན་པོ་འདིའི་སྟེང་ན་སྐད་ཡིག་དེ་ཤེས་མཁན་རྒན་པོ་ལོ་བརྒྱད་ཅུ་ལྷག་ཏུ་སོན་པ་གཅིག་པུ་ཞིག་ལས་མ་ལྷག་པས་པཱ་ལུའུ་སྐད་ཡིག་ཞིབ་འཇུག་ཁང་གིས་ཀྱང་སྐྱོབ་ཐབས་མ་བྱུང་བ་དེ་འདྲ་ཞིག་བྱུང་ན་མི་རིགས་སུ་ལའང་དེ་ལས་བློ་ཕམ་ཆེ་བ་ཅི་ཞིག་ཡོད།  མི་རིགས་གང་ཡང་རང་གི་སྐད་ཡིག་སོགས་རིགས་གཞུང་དང་།  ཡུལ་སྲོལ་གོམས་གཤིས་ཐམས་ཅད་ནུབ་ཟིན་པའི་འོག་ཏུ་མི་རིགས་དེ་ཉིད་ཀྱང་གཞན་ཞིག་ཏུ་འགྱུར་ཚར་བ་རེད།  དེས་ན་རང་རིགས་དང་རང་རིགས་ཀྱི་ཡོན་ཏན་རྣམས་ལ་ཐམས་ཅད་ཀྱིས་ཕངས་སེམས་ཆེས་ཆེར་བྱ་རྒྱུ་འདི་ནི་རིགས་དེ་ཉིད་ཀྱི་སྲོག་ལྟ་བུ་ཡིན་པས་ཅི་བས་ཀྱང་གལ་ཆེའོ།  །དེའི་ཕྱིར་ང་ཚོ་བོད་ཆོལ་ཁ་གསུམ་གྱི་མཐོ་གདུགས་ཞབས་ཀྱི་བླ་མ།  །ཁྲི་ཐོག་གི་དཔོན་པོ།  ན་གཞོན་ཤེས་ཡོན་ཅན་རྣམས་དང་།  དམའ་སློབ་ཆུང་གི་སློབ་མ་ཡན་ཆད་ཀྱིས་བློ་སེམས་ཆིག་སྒྲིལ་གྱིས་ང་ཚོའི་ཕ་མེས་བཟང་པོས་བཞག་པའི་རིག་གཞུང་།  ད་ལྟ་བོད་གངས་ཅན་ཙམ་དུ་མ་ཟད་མཚན་ཉིད་རིག་པ་དང་།  ཚན་རིག་གི་ཤེས་ཡོན་ཡང་རྩེར་སོན་པའི་འཛམ་གླིང་སྔོན་ཐོན་གྱི་རྒྱལ་ཁབ་རྣམས་ཀྱི་ནང་ནའང་ཕན་པ་ཅི་རིགས་པ་ཐོན་དང་ཐོན་བཞིན་པའི་གཟི་བརྗིད་དང་ལྡན་པ་འདི་དང་།  འཛམ་གླིང་གི་གྲོགས་པོ་རྣམས་ཀྱིས་གདེངས་འཇོག་གནང་བའི་ཡ་རབ་ཚུལ་མཐུན་གྱི་གཤིས་ཀ་ཕ་མེས་ཀྱི་རིང་གི་ཐུན་མོང་མ་ཡིན་པའི་ཡུལ་སྲོལ་རྣམས་རྒྱུད་འཛིན་དར་སྤེལ་གྱི་ཆེད་དང་།  མ་འོངས་པའི་བོད་མི་རིགས་ཀྱི་མདུན་ལམ་གྱི་དོན་དུ་ཇི་མི་སྙམ་དུ་མི་འཇོག་པར་ལྷག་བསམ་ཟོལ་མེད་བྱ་རྒྱུ་འདི་ནི་མི་རིགས་ཀྱི་འཚོ་བ་དང་རིག་གནས་ཡུན་ནས་ཡུན་དུ་དར་རྒྱས་སུ་འགྲོ་བ་ལ་ཡོད་ན་གཅིག་ཆོག་མེད་ན་ཐབས་ཆག་ཡིན་པས་ན་ནམ་ཡང་རྩིས་མེད་བཏང་སྙོམས་སུ་བཞག་པའི་འོས་མ་ཡིན་ནོ།།
     བཞི་པ་དམ་པའི་ཆོས་ལ་ཡིད་ཆེས་བྱ་བ་ལའང་བཞི་སྟེ། དང་པོ་སྐྱེ་བ་སྔ་ཕྱི་ལ་ཡིད་ཆེས་བྱ་བ་ནི།ནང་པ་སངས་རྒྱས་པའི་དམ་པའི་ཆོས་འདི་ནི་རང་རེ་བོད་ཀྱི་རྒྱལ་པོ་ལྷ་ཐོ་ཐོ་རིའི་སྐུ་རིང་ལ་དབུ་བརྙེས།སྲོང་བཙན་གྱི་དུས་སུ་སྲོལ་བཏོད།ཁྲི་སྲོང་ལྡེའུ་བཙན་གྱི་བཙན་གྱི་དུས་སུ་དར་ཞིང་རྒྱས་པར་གྱུར་ཏེ་བོད་མི་རིགས་ཧྲིལ་པོའི་སེམས་དང་འབྲེལ་བ་གཏིང་ཟབ་ཅིག་ཆགས་ཏེ། གངས་ཅན་པ་སྤྱིའི་རིགས་གཞུང་ཡོངས་ཀྱི་རྩ་བ་དང་གཙོ་བོ་ཞིག་ཏུ་གྱུར། དེའི་དབང་གིས་རིག་གཞུང་ཐམས་ཅད་ཀྱང་གཞན་ལ་ཕན་པ་འབའ་ཞིག་ལྷུར་ལེན་པ་ཉིད་དུ་གྱུར་ཅིང་།ཐ་ན་དུད་འགྲོ་ཡན་ཆད་ལ་བྱམས་པ་དང་སྙིང་རྗེ་བྱེད་ཤེས་པ་དང་།སྤྱོད་ངན་རྣམས་ལའང་འདི་བྱས་ན་བདག་ལ་མི་རུང་སྙམ་དུ་འཛེམ་བག་ཤེས་པ་སོགས་བསམ་བློའི་དགེ་མཚན་མང་པོ་ཞིག་སྣང་བ་འདི་རྣམས་དམ་པའི་ཆོས་ཀྱི་དྲིན་རང་དུ་འདུག ལར་ཆོས་ཟེར་བ་འདི་ནི་བཞི་བརྒྱ་བ་ལས། ཆོས་ནི་མདོར་ན་མི་འཚེ་བར། དེ་བཞིན་གཤེགས་པ་རྣམས་ཀྱིས་གསུངས། །ཆོས་ཉིད་མྱ་ངན་འདས་པ་སྟེ། །འདིར་ནི་དེ་གཉིས་ཁོ་ནའོ། ཞེས་གསུངས་པ་ལྟར་མི་འཚེ་བ་ཞིག་སྟེ། དེ་ཡང་གཞན་ལ་གནོད་པའི་ལུས་ངག་ཡིད་གསུམ་གྱི་ལས་ཐམས་ཅད་སྤོང་བ་དང་། དེའི་སྟེང་དུ་གཞན་ཕན་རྒྱ་ཆེར་སྒྲུབ་པ་སྟེ་སྔ་མ་ཐེག་པ་ཐུན་མོང་བ་དང་།ཕྱི་མ་ཐེག་པ་ཆེན་པོའི་ཐུན་མིན་གྱི་ཆོས་སོ།།ཆོས་འདི་གཉིས་པོ་མི་སྒེར་རམ།སྤྱི་ཚོགས་ཀྱི་ཚོགས་པའམ།།རྒྱལ་ཁྱབ་སྟེ་སུ་ཞིག་གིས་ཉམས་སུ་ལེན་ནུས་པ་དེ་དག་འདི་ཕྱི་གཉིས་ཀར་བདེ་ནས་བདེ་བར་འགྲོ་བ་ལ་ཐེ་ཚོམ་མེད། གཞན་ལ་འཚེ་བ་མེད་པ་འདི་ཉམས་སུ་བླངས་ན་རང་གི་སྤྱོད་ངན་རྣམས་རང་གིས་འགོག་པས་ཁྲིམས་ཞེས་པ་ཡན་གར་དུ་ཅི་ཡང་མི་དགོས།གཞན་དུ་འཇིགས་ཤིང་རྔམ་པའི་ཁྲིམས་གཅོད་པ་དྲུང་དུ་ཡོད་ཚེ་ཁྲིམས་ཡོད་པ་དང་མེད་ཚེ་ཁྲིམས་མེད་དུ་གྱུར་བ་རེད།གལ་ཏེ་འཛམ་གླིང་ཐམས་ཅད་དེ་འདྲ་ཞིག་ཏུ་གྱུར་ན་འགྲོ་བ་མིའི་རིགས་ལ་མདུན་ལམ་རྩ་བ་ནས་མེད་པ་ཉིད་དུ་གྱུར་བ་རེད། །དེ་འདྲའི་བསམ་པ་བཟང་པོ་དེ་དག་གསེར་སྲང་སྟོང་བྱིན་ཡང་ཚོང་འདུས་ནས་ཉོ་རྒྱུ་མི་རྙེད། སྟོབས་འབྱོར་ཇི་འདྲ་ཞིག་ལྡན་ཡང་གཞན་ལས་འཕྲོག་རྒྱུ་མི་འོང་། ངན་གཡོའི་སྦྱོར་བ་ལ་ཇི་ལྟར་མཁས་ཀྱང་བརྐུ་རྒྱུ་མི་རྙེད། འོ་ན་ཇི་ལྟར་བྱ་ཞེ་ན། རྒྱུ་མཚན་དང་ལྡན་པའི་ཐབས་ཤིག་ལ་བརྟེན་ནས་རང་རྒྱུད་ལ་བསྐྱེད་དགོས། ཐབས་དེ་ནི་གཞན་ལས་ཅུང་ཟད་རེ་འབྱུང་མོད།ཆེས་ཕུལ་དུ་བྱུང་བ་ནི་དམ་པའི་ཆོས་ཁོ་ན་ལས་བསྟན་པས་དེ་ལ་བརྟེན་པ་མ་གཏོགས་ཐབས་གཞན་མེད་དོ།།དེང་སང་འཛམ་གླིང་ཧྲིལ་བོར་ཚན་རིག་ལག་ཤེས་དར་བས་ཕྱི་རོལ་གྱི་དངོས་པོའི་འཚོ་བ་ལ་འཕེལ་རྒྱས་ཆེན་པོ་བྱུང་འདུག་སྟེ་འཇིག་རྟེན་འཕུར་གྲུ་བཟོས་ཏེ་ཟླ་བའི་སྟེང་དུ་བགྲོད་ཅིང་མི་མ་ཡིན་པའི་གྲོང་ཁྱེར་དང་སྐྱེ་འགྲོ་ལའང་མངོམ་སུམ་དུ་ལྟ།གློག་གི་ཀླད་པ་བཟོས་ཏེ་ཕལ་པ་དག་གི་མཚན་རྨི་ལམ་དུའང་འབྱུང་མི་ཐུབ་པའི་ཡོ་བྱད་སྣ་ཚོགས་བསྐྲུན།འཕྲུལ་ཆས་ཀྱི་མི་བཟོས་ཏེ་དགྲ་འདུལ་གཉེན་སྐྱོང་གིས་མཚོན་པའི་བྱ་བ་སྣ་ཚོགས་ལ་བཀོལ་སྤྱོད་བྱེད་པ་སོགས་བློས་མི་ཁྱུད་པ་ཙམ་བྱུང་ཡོད།འོན་ཀྱང་དེ་དང་མཉམ་དུ་འཛམ་གླིང་ཐམས་ཅད་སྐད་ཅིག་ལ་ཐལ་རྡུལ་དུ་རློག་པའི་རྫས་ངན་གྱི་སྦྱོར་བ་གྲངས་ཀྱིས་མི་ཆོད་པ་ཞིག་བཟོས་ཏེ་ས་ངོས་ཙམ་དུ་མ་ཟད་རྒྱ་མཚོའི་གཏིང་དང་།བར་སྣང་ཐམས་ཅད་བཀང་སྟེ་འགྲོ་བ་མིའི་རིགས་མཐའ་དག་གི་ཚེ་སྲོག་དང་བཅས་པ་རླུང་གསེབ་ཀྱི་མར་མེ་ལྟ་བུར་གྱུར་བ་ཤིན་ཏུ་ཡ་ང་བའི་དུས་སྐབས་རེད། ནང་སེམས་ཀྱི་རྣམ་རྟོག་འདོད་ཆགས་དང་ཞེ་སྡང་སོགས་ནི་ཕྱི་དངོས་པོའི་འཚོ་བ་ཇི་ལྟ་ཇི་ལྟར་འཕེལ་བ་དེ་ལྟ་དེ་ལྟར་ཇེ་རྒོད།ཇེ་རགས།ཇེ་མང་དུ་འགྲོ་བ་མངོན་སུམ་ཚད་མ་རེད།སྔོན་དུས་རྒྱལ་པོའམ་དམག་དཔོན་ལྟ་བུ་ཞིག་གི་བྱ་བ་ཉེས་ན་ཡུལ་ཕྱོགས་གཅིག་གམ་གཉིས་ཙམ་ཙམ་རེ་བརླག་ཐུབ་པ་ལས་གཞན་ཐམས་ཅད་མི་ནུས། ད་ལྟ་སྲིད་འཛིན་ནམ་རིམ་པ་བརྒལ་བའི་ཚན་རིག་པའམ་དམག་དཔོན་ལྟ་བུ་ཞིག་གི་བྱ་བ་ཉེས་ན་སའི་གོ་ལ་ཧྲིལ་བོ་བརླག་ཚར་བ་ཡིན། དེའི་ཕྱིར་འགྲོ་བ་མིའི་རིགས་ཀྱི་མ་འོངས་པའི་མདུན་ལམ་ཇི་འདྲ་ཞིག་ཏུ་འགྱུར་བ་ནི་གཞན་ལ་མི་འཚེ་བ་དང་གཞན་ཕན་སྒྲུབ་པའི་བསམ་པ་གཉིས་པོ་འདི་ཡོད་མེད་ཁོ་ན་ལ་རག་ལས་ཡོད་པས་ད་ལྟའི་དུས་འདིར་འདི་གཉིས་ལས་གལ་ཆེ་བ་གཞན་ཅི་ཡང་མི་འདུག ལར་མིའི་རིགས་ཡར་རྒྱས་ཟེར་བ་དེ་ཕྱིའི་ལོངས་སྤྱོད་དང་། ནང་བསམ་བློའི་འཁྱེར་སོ་གཉིས་ཀའི་ཆ་ནས་ཇེ་བཟང་དུ་འགྲོ་དགོས་པ་ལས། རང་བདེ་བའི་ཆེད་དུ་གཞན་སྡུག་བསྔལ་བར་འདོད་པ་དང་། རང་ཕྱུག་པའི་ཆེད་དུ་གཞན་དབུལ་འདོད།  གནོད་སེམས། གཡོ་སྒྱུ། ཧམ་སེམས་སོགས་བསམ་ངན་གྱིས་ཀུན་ནས་བསླངས་ཏེ་སྤྱི་ཚོགས་ཧྲིལ་བོ་ངན་སྤྱོད་ཀྱིས་གང་ན་ཕྱིའི་ལོངས་སྤྱོད་རྣམས་ནི་ཇི་ལྟར་ཡོད་ཀྱང་ཕན་པ་མེད་པ་མ་ཟད་སྡུག་བསྔལ་གྱི་སྣ་འདྲེན་ཙམ་དུ་འགྱུར་རོ། །བདེ་བ་དང་སྡུག་བསྔལ་ཐམས་ཅད་ཀྱི་བྱེད་པ་པོ་ལུས་དང་སེམས་གཉིས་པོ་འདི་ཡིན་ལ། དེ་ལས་ཀྱང་སེམས་འདི་ནི་གང་བྱེད་ཀྱི་གཙོ་བོ་ཡིན་པས་ཡུན་ནས་ཡུན་དུ་བདེ་ཞིང་སྐྱིད་པ་ཞིག་འདོད་ཕན་ཆད་མིའི་རིགས་སྤྱི་དང་བྱེ་བྲག་གི་སེམས་འདི་མི་འཆོས་ཐབས་མེད་ཡིན་ནོ། །དེ་ལྟ་ན་ཐོག་མར་ནང་པ་སངས་རྒྱས་པའི་གཞུང་ནས་བཤད་པའི་འགྲོ་བ་རིགས་དྲུག་ཏུ་སྐྱེ་བ་ལེན་ཚུལགྱི་འཁོར་བའི་རྣམ་བཞག་འདི་ལ་ངེས་ཤེས་བསྐྱེད་པར་བྱ་དགོས་ཏེ་འདི་ཤེས་པ་དང་མ་ཤེས་པའི་ཁྱད་པར་ལས་མིའི་རིགས་ཀྱི་མ་འོངས་པའི་མདུན་ལམ་ལ་ཕན་གནོད་ཆེས་ཤིན་ཏུ་ཆེ་བའི་ཕྱིར་རོ། ། ༄༅། །གལ་ཏེ་ང་ཚོ་མི་ཚེ་གཅིག་པོ་འདི་མ་གཏོགས་སྐྱེ་བ་གཞན་ལེན་མི་དགོས་པར་རྒྱུན་ཆད་ཆད་འགྲོ་རྒྱུ་ཡིན་ནི་བྱ་བ་ཐམས་ཅད་ཚེ་འདི་ཁོ་ནའི་ཆེད་དུ་བྱས་ན་དེ་ལས་གཞན་པའི་བསམ་བློ་མང་པོ་གཏོང་དགོས་དོན་སུ་ལའང་མི་འདུག་མོད། འོན་ཀྱང་དེ་འདྲ་ཞིག་ནི་གཏན་ནས་ཡིན་པར་མི་སྣང་སྟེ། སྐྱེ་སེམས་སྐད་ཅིག་དང་པོ་དེའི་སྔོན་དུ་འཆི་སེམས་སྐད་ཅིག་ཐ་མ་སོང་བ་ཡོད་ཅིང་། འཆི་སེམས་སྐད་ཅིག་ཐ་མ་དེའི་རྗེས་སུ་ཡང་སྐྱེ་སེམས་སྐད་ཅིག་དང་པོ་འབྱུང་སྟེ་ཇི་སྲིད་དུ་བདག་མེད་རྟོགས་པའི་ཡེ་ཤེས་ཀྱིས་ལས་ཉོན་གྱི་སྒྲིབ་པ་མ་སྤངས་པ་དེ་སྲིད་དུ་ཟོ་ཆུན་གྱི་ཁྱུད་མོ་དང་། བུམ་ནང་གི་བུང་བ་བཞིན་དུ་རྒྱུན་ཆད་མེད་པར་འཁོར་བ་འཁོར་དགོས་པ་ཡིན་ནོ། །སེམས་ཅན་རྣམས་ཀྱི་ཤ་ཁྲག་གི་ལུས་འདི་ནི་ཤི་བའི་ཚེ་རྒྱུན་ཆད་པར་འགྱུར་བས་སྐྱེ་བ་ཕྱི་མ་མི་འགྲོ་བ་བདེན་མོད།ལུས་སེམས་གཉིས་ནི་རེ་ཞིག་ལྷན་ཅིག་ཏུ་ཚོགས་པ་ཙམ་ལས་ངོ་བོ་དང་སྐྱེ་ཚུལ་སོགས་ཐ་དད་ཁོ་ན་ཡིན་པས་ལུས་ཕ་རོལ་དུ་མ་སོང་བ་ཙམ་ལས་སེམས་ཕ་རོལ་དུ་མ་སོང་བ་ཇི་ལྟར་ཤེས་ཏེ་མི་ཤེས་སོ།། ལུས་སེམས་གཉིས་ཀྱི་སྐྱེ་ཚུལ་ཇི་ལྟར་ཐ་དད་ཡིན་ཞེ་ན།སྒྲ་བསྒྱུར་མར་པའི་སྲས་དར་མ་མདོ་སྡེས་རྣམ་ཤེས་གཅིག་གྲོང་ཕོ་གྲོང་འཇུག་གི་གདམས་པ་ལ་བརྟེན་ནས་ལུས་གསུམ་འདོར་ལེན་བྱས་ཚུལ་དང་། རྣལ་འབྱོར་པས་རྨི་ལམ་སྤྲུལ་སྒྱུར་ལ་བརྟེན་ནས་གདོས་བཅས་གྱི་ལུས་ཤུལ་དུ་བཞག་སྟེ་རྣམ་ཤེས་གཞན་དུ་སོང་རུང་ཡུན་རིང་དུ་ལུས་རོ་ལྟར་གྱུར་ནས་སླར་ཡང་རྣམ་ཤེས་ལུས་ལ་ཞུགས་པ་མང་པོ་བྱུང་དང་འབྱུང་མུས་སུ་ཡོད།གཞན་ཡང་སྤྱི་ལོ་༡༩༥༨ལོའི་དགུན་དུས་སུ་ཨ་རིའི་དབྱི་ལིའུ་རོ་པུ་གླིང་གི་ཝ་ཏ་ཞི་ཅའི་ས་ཁུལ་དུ་ལོ་བཅུ་བཞིར་སོན་པའི་བུ་མོ་ལའོ་ལན་ཟེར་བ་ལུས་སེམས་གཉིས་ཀར་ནད་གང་ཡང་མེད་པ་ཞིག་ཡོད།ལོ་དེའི་ཟླ་༡༢་ཚེས་༡ནུབ་མོར་དྲན་པ་མེད་པར་གྱུར།སླར་དྲན་པ་རྙེད་པའི་ཚེ་ཁྱིམ་མཚེས་ཡ་ཧྲི་ལོ་ཕོས་ཁྱོ་ཤུག་གཉིས་ལ་ལོ་བཅུ་གཉིས་ཀྱི་སྔོན་ཤི་སོང་བའི་བུ་མོ་མ་ལིས་ཞེས་པ་ཞིག་ཡོད་པ་དེ་ཁོ་ན་ཉིད་དུ་མངོན་སུམ་ཚད་མར་གྱུར་ནས་འདུག ལའོ་ལན་གྱིས་མ་ལིས་གཏན་ནས་མཐོང་མ་མྱོང་ཡང་གཤིས་ཀ་ཐམས་ཅད་ཇི་མ་ཇི་བཞིན་དུ་འདུག མོས་སྔོན་གྱི་ཕ་མ་གཉིས་སོགས་ཁྱིམ་མི་ཐམས་ཅད་གཏན་ནས་ངོ་མི་ཤེས་ཤིང་ང་རང་རང་ཁྱིམ་དུ་གཏོང་རོགས་ཞེས་ཟེར།མ་ལིས་ཀྱི་ཕ་ཡ་ཧྲི་ལོ་ཕོས་ཀྱིས་དེ་ཐོས་ཕྲལ་ཨ་རིའི་ཝ་ཧྲི་ཁང་ཤིན་གླིང་ཆོང་ནེས་གྲོང་ཁྱེར་ནས་སྨྱོ་ནད་ཀྱི་ཆེད་ལས་མཁས་པ་རབ་འབྱམས་པ་ཧྲི་ཏིས་ཝེན་ཧྲིན་བོས་ཏེ་བརྟག་དཔྱད་བྱེད་དུ་བཅུག   ལའོ་ལན་གྱིས་ཡ་ཧྲི་ཕོས་ཀྱི་ཁྱིམ་ཚང་གི་ལོ་རྒྱུས་ཕྲ་ཞིང་ཞིབ་པ་ཇི་བཞིན་དུ་བཤད་པས་ཕ་རྒན་ཤིན་ཏུ་ཡིད་ཆེས་དཀའ་བའི་གནས་འདི་ལ་ཡིད་མི་ཆེས་ཁག་མེད་བྱུང་སྟེ། ངེད་ཀྱི་དོན་འདི་ཅི་ཡིན་གཏན་ནས་ཤེས་པ་མི་འདུག གང་ལྟར་ཡང་འདི་ངེད་ཀྱི་མ་ལིས་ཡིན་ཐག་ཆོད་རེད་པས་རང་གི་ཁྱིམ་དུ་གཏོང་རོགས་ཟེར། ཧྲི་ཏིས་ཝེན་ཧྲིན་དང་ལའོ་ལན་གྱི་ཕ་མ་གཉིས་ཀྱིས་ཀྱང་བློར་བབ་སྟེ་ཟླ་བ་༡༢་ཚེས་༢༤ཉིན་མ་ལིས་ཀྱི་ཁྱིམ་དུ་སྤོས། ཁྱིམ་དུ་འབྱོར་མ་ཐག་མི་ཐམས་ཅད་ངོ་ཤེས། མོ་རང་གི་སྔོན་གྱི་བྱ་སྤུའི་མགོ་རྒྱན་སོགས་ངོས་འཛིན་བྱས། དེ་ལྟར་ལུས་ལའོ་ལན་གྱི་དང་སེམས་ནི་མ་ལིས་ཁོ་ནར་གནས་། ༡༩༥༩ལོའི་ཟླ་༣་ཚེས་༧ཉིན་ངུ་ཞིང་ཕ་མ་གཉིས་ལ་བོས་ཏེ་ལའོ་ལན་སླར་ལོག་བྱུང་ཟེར། མོས་ཤིན་ཏུ་ཡི་མུག་པའི་ཉམས་ཀྱིས་གྲོགས་པོ་ཚོ་ལ་གྱེས་མཇལ་ཞུས།  ཟླ་༣་ཛེས་༢༡་ཉིན་ཡང་དྲན་མེད་དུ་གྱུར་ཏེ་སླར་དྲན་པ་རྙེད་ཚེ་སྔོན་གྱི་ལའོ་ལན་རང་དུ་འདུག་པས་སྔར་གྱི་རང་ཁྱིམ་དུ་ཕྱིར་སོང་ངོ་། ཚུལ་འདི་ལ་དེང་རབས་སེམས་ཁམས་རིག་པའི་རབ་འབྱམས་པ་ཧོ་ཆུས་ཞེས་པ་དེས་རང་ཉིད་དངོས་ཀྱིས་དོན་འདིར་རྒྱུས་མངའ་བའི་དན་དཔང་གི་མི་གཙོ་བོ་རྣམས་ལ་འདྲི་རྩད་ནན་ཏན་དུ་བགྱེས་ཏེ་རྫུན་ཅུང་ཟད་ཀྱང་མི་འདུག་ཟེར་རོ། གོང་གི་ཧྲི་ཏས་ཝེན་ཧྲིན་ཞེས་པ་དེ་ནི་ཧེ་ཅིས་ནེས་ཡ་སློབ་གྲྭ་ཆེན་མོའི་དབང་རྩའི་རིག་པ་དང་།
སེམས་ཁམས་རིག་པའི་གཙོ་འགན་འཁུར་མཁན་དགེ་རྒན་ཆེན་མོ་དེ་རེད། འདིས་མཚོན་ནས་ཤེས་པར་བྱ་སྟེ་དེ་འདྲ་བ་དང་ཕྱོགས་མཚུངས་པར་མང་པོ་འདུག་ཀྱང་ཡི་གེ་མང་བས་མི་སྤྲོའོ། །དེས་ན་ལུས་དེ་དང་སེམས་དེ་གཉིས་ནི་རེ་ཞིག་ལས་ཀྱི་དབང་གིས་ལྷན་དུ་འདུས་པ་ཙམ་ལས་ངོ་བོ་བདག་གཅིག་སོགས་མི་འགྲུབ་པས་ང་ཚོ་ནང་པའི་གཞུང་ལས་ལུས་ནི་མགྲོན་ཁང་དང་རྣམ་ཤེས་ནི་མགྲོན་པོ་ལྟ་བུ་ཡིན་ཞེས་གསུངས་པ་འདི་དངོས་གནས་དྲང་གནས་མིག་གིས་བལྟ་རྒྱུ་ཡོད་པ་ཞིག་དང་ལག་པས་གཟུང་རྒྱུ་ཡོད་པའི་བདེན་དོན་ཞིག་ཡིན་པས་སྨྲ་བ་ཐམས་ཅད་ཀྱི་རྒྱལ་པོ་ཡིན་པར་ལྷང་ངེར་ག སལ་འདུག་གོ ཚན་རིག་པ་ཁ་ཅིག་གིས་རྫས་འགྱུར་གྱི་འགྱུར་རིམ་ལས་སྲོག་ཆགས་བྱུང་བ་ཡིན་ཟེར། དེ་ཡང་གདོད་མའི་རླུང་ཁམས་ཆེན་པོའི་ནང་ན་གནས་པའི་སྐྱེ་མེད་དངོས་པོ་རྣམས་འདུས་པ་ལས་སྐྱེ་ལྡན་དངོས་པོ་གྱུར། དེ་ཆར་པའི་རྒྱུན་དང་འགྲོགས་ཏེ་རྒྱ་མཚོར་སོང། རྒྱ་མཚོ་ནས་རིམ་བཞིན་དུ་འཕེལ་ཏེ་ཕྲ་ཕུང་ཉིང་རྡུལ་གྱི་སྐྱུར་རྫས་དང་། སྤྲི་དཀར་གྱི་བཅུད་དུ་གྱུར་ཅིང་མཐར་སྲོག་ཆགས་སུ་གྱུར་པས་ཚེ་སྲོག་ནི་སའི་གོ་ལ་རང་ནས་བྱུང་ཞེས་ཟེར། འདི་ཉིད་སྤྱི་ལོ་༡༩༥༥་ལོར་ཨ་རིའི་རྫས་འགྱུར་རིག་པ་བ་མེའུ་ལའེ་ཞེས་པས་ཞིབ་འཇུག་བྱས་ཏེ་ཤེས་པ་ཡིན་ལ། ༡༩༣༤ལོར་ནོ་པེ་ཨེར་རྗས་འགྱུར་རིག་པའི་བྱ་དགའ་ཐོབ་མཁན་ཡོའུ་་ལེས་ཞེས་པ་དེས་ཀྱང་འདི་ཡིན་པར་ཐག་བཅད་འདུག། ཡང་ཚན་རིག་པ་འགའ་ཞིག་གིས་ནི་འགྲོ་བའི་ཚེ་སྲོག་འདི་སྐར་མ་གཞན་ནས་བྱུང་ཞེས་ཀྱང་ཟེར་རོ། །དེ་ལ་དཔྱད་པ་སྔ་མ་དེས་སེམས་ཀྱི་ཡ་མཐའ་ཡང་དུས་དེ་ཉིད་ཀྱི་ཚེ་གསར་དུ་བྱུང་བ་ཡིན་ཞེས་ནི་གཏན་ནས་སྨྲ་མི་ནུས་ཏེ་ལུས་སེམས་གཉིས་ཀྱི་སྐྱེ་ཚུལ་མི་འདྲ་བར་གོང་དུ་བཤད་པ་ལྟར་དང་། གཞན་ཡང་མངལ་སྐྱེས་ཀྱི་སེམས་ཅན་ཀྱི་ལུས་ནི་ཐམས་ཅད་ཕ་མའི་ཁུ་ཁྲག་གཉིས་པོ་རིམ་པར་འགྱུར་བ་ལས་བྱུང་བར་ཐམས་ཅད་ཀྱིས་ཁས་ལེན་མོད། སེམས་ནི་དེ་ལྟར་མིན་ཚུལ་འོག་ཏུ་འཆད་དོ། །
    ༄༅། །ཡང་དངོས་གཙོའི་ཚན་རིག་པ་འགའ་རེས་མིའི་བསམ་གཞིགས་བྱེད་པའི་རྣམ་ཤེས་འདི་བེམ་པོ་དང་སོ་སོར་འབྱེད་རྒྱུ་མེད་པའི་བེམ་པོའི་ཆ་ཤེས་ཤིག་རེད། རྣམ་ཤེས་ཀླད་ཆེན་ལ་བརྟེན་དགོས། དེའི་ཕྱིར་མི་ཤི་བའི་ཚེ་ལུས་ཞིག་ནས་མེད་པར་གྱུར་བས་རྣམ་ཤེས་ཀྱང་རྒྱུན་ཆད་པར་གྱུར་ཟེར། ཡང་༡༩༦༣་ལོར་ནེ་པེ་ཨེར་གསོ་རིག་བྱ་དགའ་མྱོང་མཁན་གྱི་དབྱིན་ཇིའི་ཡས་ཧན་ཨེ་ཁུ་ལིས་སོགས་ཕུལ་དུ་བྱུང་བའི་ཚན་རིག་པ་མང་པོ་ཞིག་གིས་ནི་མིའི་ལུས་ཀྱི་ནང་བེམ་པོ་མ་ཡིན་པའི་དངོས་པོ་སྟེ་རྣམ་ཤེས་ཤིག་ཡོད་ལ། །དེ་མིའི་ལུས་ཞིག་པའི་འོག་ཏུའང་རྟག་པར་གནས་ཡོད། ཀླད་ཆེན་ནི་དཔེར་ན་འཕྲུལ་ཆས་ཀྱི་གློག་གི་ཀླད་པ་དང་། རྣམ་ཤེས་ནི་དེ་ལ་བཀོད་འདོམས་བྱེད་པའི་མིའི་ཀླད་པ་ལྟ་བུ་རེད་ཟེར་རོ། །དེ་ལས་སྔ་མ་དག་གིས་མི་ཤི་བའི་འོག་ཏུ་ཀླད་ཆེན་མེད་པས་རྣམ་ཤེས་ཀྱང་མེད་ཟེར་བ་ནི་ཕྱིན་ཅི་ལོག་ཁོ་ན་སྟེ། ད་ལྟ་འཛམ་བུ་གླིང་གི་ཐོག་ན་སྐྱེ་བ་སྔ་མ་ནས་ཕྱི་མར་འཕོ་ཚུལ་བར་སྲིད་ཀྱི་གནས་སྐབས་དང་བཅས་པ་བདེན་དཔང་ཚད་མ་དང་ལྡན་པའི་སྒོ་ནས་དྲན་མཁན་སྐྱེ་བོ་བརྒྱ་སྟོང་དུ་མ་ཐམས་ཅད་ལ་མཐུན་སྣང་དུ་བྱུང་དང་འབྱུང་མུས་སུ་ཡོད་པ་ཡིན་ན། ཅི་མངོན་སུམ་ལ་སྐུར་བ་གདབ་རྒྱུ་ཡིན་ནམ། དངོས་ཡོད་ཀྱི་གནས་ཚུལ་ཁས་མི་ལེན་ན་ཅི་ཞིག་ལ་དངོས་གཙོ་ཟེར། གཞན་ཡང་དེང་དུས་འཛམ་གླིང་ན་དང་པོ་ཉིད་ནས་ཀླད་ཆེན་མེད་པའི་མི་བཅུ་ཕྲག་འགའ་ཞིག་ཚན་རིག་གིས་གསར་མཐོང་བྱུང་ལ། དེ་དག་གི་བློ་གྲོས་ཀྱང་མི་ཕལ་བ་ལས་ལྷག་པར་འདུག་ཅེས་ཟེར་བས་ཀླད་ཆེན་མེད་ན་རྣམ་ཤེས་མེད་ཟེར་བ་ནི་མངོན་སུམ་དང་ཡང་འགལ་བ་ཞིག་གོ །དེས་ན་འདི་ལྟར་བལྟ་བར་བྱ་སྟེ། མི་ཤི་བའི་རྗེས་སུ་གཟུགས་ཕུང་་གིས་བསྡུས་པའི་ཤ་ཁྲག་གི་ལུས་འདི་ནི་འདིར་མེད་པར་འགྱུར་བ་སྨོས་མ་དགོས་ལ། འོན་ཀྱང་སེམས་ནི་དེ་གར་རྒྱུན་ཆད་པ་མ་ཡིན་ཏེ། ལུས་ཞིག་པ་ཙམ་གྱིས་སེམས་རྒྱུན་ཆད་དགོས་པའི་རྒྱུ་མཚན་རྡུལ་ཙམ་མེད་པའི་ཕྱིར་རོ། དེའི་ཚེ་ལུས་འདི་ལ་སེམས་མི་གནས་པ་ཙམ་ཞིག་གྲུབ་མོད། སེམས་གཏན་མེད་དུ་གྱུར་པ་ནི་སུས་ཀྱང་མི་རྟོགས་སོ། འཆི་བའི་ཚེ་སྒོ་ལྔའི་རྣམ་ཤེས་སོགས་རྣམ་རགས་པ་རྣམས་འགག་ནས་ཀུན་གཞིའི་རྣམ་ཤེས་ཀྱི་ངང་དུ་བརྒྱལ་ཏེ་འགྲོ། རེ་ཞིག་ནས་བརྒྱལ་སངས་ཚེ་བར་སྲིད་ཀྱི་སྣང་བ་ཤར་ཏེ་ཐོགས་རེག་དང་བྲལ་བའི་ལུས་དང་ལྡན་ཞིང་། བྱ་སྒྲོ་རླུང་གིས་བཏེགས་པ་འདྲ་བ་གར་འགྲོ་དང་འདིར་འགྲོ་མེད་པ། ཚེ་ཚད་ལ་ངེས་པ་མེད་པ། ལ་ལས་རང་གི་རོ་ཡང་མཐོང་བ་དེ་འདྲ་ཞིག་ཏུ་འགྱུར་རོ། །གལ་ཏེ་མངལ་དུ་འཇུག་པའི་རྒྱུ་རྐྱེན་མ་ཚང་ན་དེ་ཉིད་ཡུན་རིང་གནས་ལ། གལ་ཏེ་མངལ་དུ་འཇུག་པའི་རྒྱུ་རྐྱེན་ཚང་ན་ནི། དེའི་ཚེ་བདག་རྩྭའི་ཕུག་གམ། བྲག་ཕུག་གམ། ཁང་བ་བརྩེགས་མའི་ནང་དུ་འཇུག་གོ་སྙམ་པ་ལ་སོགས་པ་རང་རང་གི་ལས་ཀྱི་དབང་གིས་འདུ་ཤེས་མ་ངེས་པ་སྣ་ཚོགས་པས་མངལ་དུ་འཇུག་འགྱུར་ཏེ། དགའ་བོ་མངལ་དུ་འཇུག་པའི་མདོ་ལས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་དགའ་བོ་ལ་འདི་སྐད་ཅེས་བཀའ་བསྩལ་ཏོ། དགའ་བོ་སེམས་ཅན་རྣམས་ནི་མངལ་དུ་འཇུག་པར་འདོད་པའི་ཚེ་རྒྱུ་དང་རྐྱེན་ཕུན་སུམ་ཚོགས་པར་མ་གྱུར་ན་ནི་ལུས་ལེན་པར་འགྱུར་གྱི་གལ་ཏེ་ཕུན་སུམ་ཚོགས་པར་མ་གྱུར་ན་ནི་ལུས་ལེན་པར་མི་འགྱུར་རོ། །དེ་ལ་རྐྱེན་དང་མི་ལྡན་པ་ཞེས་བྱ་བ་གང་ཞེ་ན། འདི་ལྟ་སྟེ། ཕ་མ་གཉིས་ཡང་ཆགས་པའི་སེམས་བྱུང་བར་གྱུར། བར་མ་དོའི་ཕུང་པོ་ཡང་མངོན་གྱུར་ཅིང་སྐྱེ་བའི་གནས་ཡོངས་སུ་འཚོལ་བར་བྱེད་ཀྱང་ཕ་མ་དེ་དག་གི་འདུ་འཕྲོད་སྔ་ཕྱི་གྱུར་ཅིང་དུས་གཅིག་ཏུ་བྱུང་བར་མ་གྱུར་ཏམ། སོ་སོའི་ལུས་ལ་ནད་རྣམས་ལྡན་པར་གྱུར་ན་ཡང་མངལ་དུ་འཇུག་པར་མི་འགྱུར་ཞེས་དང་། གལ་ཏེ་ཕ་མ་ཆོ་རིགས་བཙུན་ཞིང་བསོད་ནམས་ཆེན་པོ་དང་ལྡན་པར་གྱུར་པ་ལ་བར་དོའི་ཕུང་པོ་བསོད་ནམས་ཆུང་བའམ། བར་མ་དོའི་སྲིད་པ་ཆོ་རིགས་བཙུན་ཞིང་བསོད་ནམས་ཆེན་པོ་དང་ལྡན་པར་གྱུར་པ་ཕ་མ་བསོད་ནམས་ཆུང་བར་གྱུར་ཏམ། གཉིས་ཀ་བསོད་ནམས་དང་ལྡན་ཡང་ཕན་ཚུན་ཕྲད་པར་འགྱུར་བའི་ལས་བསགས་པར་མ་གྱུར་ན་ཡང་མངལ་དུ་འཇུག་པར་མི་འགྱུར་རོ། །ཞེས་དང་། གཞན་ཡང་དགའ་བོ་ཇི་ལྟར་མངལ་དུ་འཇུག་པར་འགྱུར་ཞེ་ན། འདི་ལྟ་སྟེ། ཕ་མ་ཡང་ཆགས་པའི་སེམས་སྐྱེ་བར་གྱུར། དུས་ཀྱི་ཟླ་མཚན་ཡང་རྗེས་སུ་མཐུན་པར་གྱུར། བར་མ་དོའི་ཕུང་པོ་ཡང་མངོན་དུ་གྱུར་ལ། གོང་མ་ལྟ་བུའི་སྐྱོན་མང་པོ་ཡང་མེད་ཅིང་ལས་ཀྱི་རྐྱེན་དང་ལྡན་པར་གྱུར་ན་མངལ་དུ་འཇུག་པར་འགྱུར་རོ། །འདི་ལྟར་བར་དོའི་ཕུང་པོ་དེ་མངལ་དུ་འཇུག་པར་འདོད་པ་ན་དེ་ཡང་རྣམ་པ་གཉིས་སུ་འགྱུར་ཏེ། གཉིས་གང་ཞེ་ན། བསོད་ནམས་དང་མི་ལྡན་པ་དང་། བསོད་ནམས་ཆེན་པོ་དང་ལྡན་པ་གང་ཡིན་པའོ། །བསོད་ནམས་དང་མི་ལྡན་པ་གང་ཡིན་པ་དེ་ནི་རྣམ་པར་རྟོག་པའི་སེམས་བྱུང་ནས་ཡུལ་མཐོང་བར་གྱུར་པ་འདི་སྙམ་དུ་སེམས་ཏེ། དེང་བདག་གི་རླུང་དང་། གྲང་བ་དང་། ནམ་རྨུགས་པ་དང་། ཆར་བབས་པ་དང་། སྐྱེ་བོ་མང་པོའི་ཅ་ཅོ་དང་། མང་པོའི་མཐུ་སྟོབས་ཀྱིས་གནོད་པ་བྱེད་པ་དང་ཕྲད་པར་གྱུར་ཏོ་ཞེས་འཇིགས་ཤིང་སྐྲག་པ་སྐྱེ་ནས་དེང་བདག་རྩྭའི་ཁྱིམ་དང་། ལོ་མའི་ཁྱིམ་དང་། རྩིག་དྲུང་དང་དབེན་པར་འཇུག་པར་བྱའོ། །ཡང་ན་རི་དང་། ནགས་སྟུག་པོ་དང་། བྲག་ཕུག་དག་ཏུ་འཇུག་པར་བྱའོ་སྙམ་དུ་སེམས་ཏེ་གཞན་ཡང་འདུ་ཤེས་རྣམ་པ་སྣ་ཚོགས་བསྐྱེད་ནས་ཇི་ལྟར་མཐོང་བ་བཞིན་དུ་མའི་མངལ་དུ་འཇུག་པར་བྱའོ། །གང་ལ་བསོད་ནམས་ཆེན་པོ་དང་ལྡན་པ་དེ་ཡང་འདི་སྙམ་དུ་སེམས་ཏེ། དེང་བདག་གི་རླུང་དང་། གྲང་བ་དང་། ནམ་རྨུགས་པ་དང་། ཆར་བབས་པ་དང་། སྐྱེ་བོ་མང་པོའི་ཅ་ཅོ་དང་། མང་པོའི་མཐུ་སྟོབས་ཀྱིས་གནོད་པར་བྱེད་པ་དང་ཕྲད་པར་གྱུར་ཏོ་ཞེས་འཇིགས་ཤིང་སྐྲག་པ་སྐྱེས་ནས་ཁང་བ་བརྩེགས་པའི་སྟེང་དུ་འཛེག་པའམ་ཡང་ཐོག་མཐོན་པོའི་སྟེང་དུ་འཛེག་པའམ། གཞལ་མེད་ཁང་གི་ནང་དུ་འཇུག་པའམ། ཁྲི་ལ་འདུག་པ་བྱའོ་སྙམ་དུ་སེམས་ཏེ། གཞན་ཡང་འདུ་ཤེས་རྣམ་པ་སྣ་ཚོགས་བསྐྱེད་ནས་ཇི་ལྟར་མཐོང་བ་བཞིན་དུ་མའི་མངལ་དུ་འཇུག་པར་འགྱུར་རོ། །ཞེས་སོ། དེ་ལྟར་སྐྱེ་བ་སྔ་མའི་མ་རིག་པ་དང་འདུ་བྱེད་ལས་ཚེ་འདིའི་རྣམ་ཤེས་འགྲུབ་སྟེ། དེ་ནས་མིང་གཟུགས། སྐྱེ་མཆེད་རྣམས་རིམ་པར་འབྱུང་ལ་སླར་ཡང་ལས་བསགས་ཤིང་དེས་གསོས་བཏབ་སྟེ་སྐྱེ་བ་ཕྱི་མའི་རྒ་ཤིའི་བར་འབྱུང་། ཤི་ནས་མེད་དུ་མི་འགྲོ་བར་ཡང་སྐྱེ་བ་ཕྱི་མ་ལེན་ཏེ། རང་གི་རིགས་འདྲ་ཕྱི་མ་སྐྱེད་བྱེད་ཀྱི་རྒྱུ་རྐྱེན་ཐམས་ཅད་ཚང་ནས་ཡོད་པའི་ཕྱིར་རོ། དེ་ལྟར་སྐྱེ་བ་སྔ་ཕྱི་འདི་སྒྲུབ་ཚུལ་ལ་ཚད་མ་གྲུབ་པ་དང་དབུ་མ་སྙིང་པོ་སོགས་ལས་དངོས་སྟོབས་ཀྱི་རིགས་པ་དུ་མས་བསྒྲུབས་པ་ནི་གཞུང་དེ་དག་ཏུ་གསལ་བས་སླར་ཡང་འཆད་མི་དགོས་ལ། དེ་དག་ལས་གཞན་ཡང་རྗེས་དཔག་གི་སྒྲུབ་བྱེད་མང་པོ་འདུག་མོད། འདིར་ཁོ་བོ་ནི་ད་ལྟ་འཛམ་གླིང་གི་རྒྱལ་ཁབ་མང་པོར་མངོན་སུམ་ཚད་མས་ཐུན་མོང་དུ་གྲུབ་པ་འགའ་ཞིག་གིས་མཚོན་ཙམ་འཆད་དེ། གང་གི་ཕྱིར་ན། མངོན་སུམ་ནི་ཚད་མ་ཐམས་ཅད་ཀྱི་མཐར་ཐུག་ཡིན་པས་དེ་ཁས་མི་ལེན་པ་དང་དེ་ལ་སྐུར་པ་འདེབས་མཁན་ཞིག་ཡོད་ན་དེ་ནི་བླུན་པོའི་ངང་ཚུལ་མཚོན་པ་ཙམ་ཡིན་པས་སེམས་ཤེས་སུ་ཞིག་དེ་དང་བགྲོ་བར་བྱེད། གཞན་བློ་དང་ལྡན་པ་དག་ལ་ནི་ལས་རིགས་གང་ཞིག་ཡིན་ཡང་རུང་སྟེ་ཡིད་ཆེས་རྔམ་པོ་ཆེ་འདྲོང་བར་འགྱུར་པའི་ཕྱིར་རོ། །
༄༅། །དེ་ཡང་སྤྱི་ལོ༡༩༢༦་ལོར་རྒྱ་གར་དྷི་ལིའི་གྲོང་ཁྱེར་དུ་བུ་མོ་ཞིག་བཙས་པ་ལ་ཧང་ཏིས་ཏི་པིས་ཞེས་ཟེར། མོས་ཆུང་ངུའི་དུས་ནས་བཟུང་རྟག་ཏུ་སྐྱེ་བ་སྔ་མར་མོ་རང་གི་གྲོང་ཁྱེར་མ་ཐ་ལར་སྡོད་ཚུལ་རྣམས་་ཡང་ཡང་གླེང་། ཁྱིམ་ཚང་དེས་ཚོང་ཁང་འབྲིང་ཤོས་ཤིག་གཉེར་ཡོད་པས་ཚོང་བ་མང་པོ་རྟག་ཏུ་དེར་འོང་གིན་འདུག བུ་མོ་ལོ་དགུར་སོན་པའི་ཉིན་ཞིག་ཚོང་པ་ཞིག་འོང་བ་མཐོང་ནས་རབ་ཏུ་དགའ་སྟེ། འདི་ངའི་ཁྱོ་གའི་གཅེན་པོ་མ་ཐི་ལར་ཡོད་པ་དེ་རེད་ཟེར། ཚོང་པ་དེས་་ང་རང་དངོས་གནས་མ་ཐི་ལ་ནས་འོངས་བ་ཡིན་ལ། མོས་བཤད་པའི་གཅུང་པོ་དེའང་དངོས་གནས་ཡོད། གཅུང་པོའི་ཆུང་མ་དེ་ལོ་བཅུ་ལྷག་གི་སྔོན་དུ་ཕྲུ་གུ་བཙའ་མ་ནུས་པར་ཤི་སོང་བ་ཡིན་ན་འདི་ཅི་ཞིག་སྙམ་དུ་ཡ་མཚན་ཏེ། འོ་ན་ཁྱོད་ཀྱི་ཁྱོ་བོ་དང་ཕྲུ་གུའི་མིང་ཅི། ཁྱོ་གའི་མིང་ལ་ཁའེ་ཉན་ལ་ཧྲི་ཇོས་པིས་ཞེས་དང་། བུའི་མིང་ཕུས་ཧ་ལིས། བུ་མོའི་མིང་ལ་པེ་ལ་ཟེར། དེ་ཐོས་པ་དང་ཚོང་པ་དེ་ཧ་ལས་ཏེ་། ཨ་ཙི། དངོས་ནས་རེད། ཅུང་ཟད་ནོར་བ་མི་འདུག་གོ །དེ་ནས་ཚོང་པ་དེ་དང་བུ་མོའི་ཕ་མ་གཉིས་ལྐོག་གྲོས་བྱས་ཏེ། ཉིན་ཞིག་བུ་མོའི་སྐྱེ་བ་སྔ་མའི་ཁྱོ་བོ་དང་། ཕྲུ་གུ་རྣམས་ཚོང་པ་དེས་ཁྲིད་ནས་བྱུང་། བུ་མོས་མཐོང་མ་ཐག་ཏུ་ཤིན་ཏུ་དགའ་སྟེ། བདག་གི་ཁྱོ་བོ་སླེབས་བྱུང་ཟེར་ཞིང་འཐམས་ཏེ་ཡང་ཡང་ངུ་། ཕྲུ་གུ་དག་གི་དྲུང་དུ་སོང་སྟེ་ཕུས་ཧ་ལིས་དང་པེ་ལ་གཉིས་ཆེན་པོ་འདི་འདྲ་ཞིག་ཏུ་གྱུར་ཟིན་འདུག་ཅེས་ཟེར་ནས་ངུའོ། དེར་ཡོད་ཀྱི་སྐྱེ་བོ་ཐམས་ཅད་ཧ་ལས་སོ། གཏམ་དེ་དྷི་ལིའི་གྲོང་ཁྱེར་ཡོངས་སུ་ཁྱབ་པས་ཚན་རིག་པ་རྣམས་ཀྱིས་དམིགས་བསལ་གྱི་བརྟག་དཔྱད་ཨུ་ཡོན་ལྷན་ཁང་ཞིག་བཙུགས་ཏེ་ཉིན་གཅིག་བུ་མོས་གང་དུ་འགྲོ་རྒྱུ་ཡིན་གཏན་ནས་མ་ཤེས་པར་བྱས་ཏེ་མེ་འཁོར་ལ་ཞུགས་ཏེ་མ་ཐི་ལར་ཁྲིད་དེ་སོང་། མ་ཐི་ལའི་ཡུལ་མིས་ཤེས་འཕྲལ་ཐམས་ཅད་རུབ་སྟེ་མེ་འཁོར་ས་ཚུགས་སུ་ལྟད་མོར་བལྟ་བར་འོང་། བུ་མོ་མེ་འཁོར་ལས་བབ་མ་ཐག་མི་ཚོགས་ཀྱི་ཁྲོད་ནས་སྐྱེ་བ་སྔ་མའི་མ་དང་ནུ་མོ་དག་ངོས་ཟིན་པར་མ་ཟད་ཁྱོ་བོའི་ཉེ་འབྲེལ་ཐམས་ཅད་ངོ་ཤེས་ཏེ་དེ་གའི་ཡུལ་སྐད་ཀྱིས་གཏམ་སྨྲ་བས་ཐམས་ཅད་ཆེས་ཡ་མཚན་དུ་གྱུར། དེ་ལྟར་མེ་འཁོར་འབབ་ཚུགས་ནས་བརྟག་དཔྱད་གྲུབ་རྗེས་བུ་མོ་མིག་གཉིས་པོ་བཀབ་སྟེ་ཤིང་རྟ་ལ་བཞག་ནས་སྔོན་གྱི་ཁྱིམ་དུ་འགྲོ་ཚུལ་བཤད་དུ་བཅུག་པས་ཤར་རེར་རང་ཁྱིམ་དུ་ལོག་གོ །ཁྱིམ་དུ་ཕྱིན་རྗེས་ས་འོག་ཏུ་དངུལ་སྦས་ཡོད་ཚུལ་བཤད་དེ་ས་དེ་བརྐོས་པས་སྒམ་ཞིག་བྱུང་། ནང་གི་དངུལ་གྱི་གྲངས་དང་བཅས་བསྙད་ཏེ་ཁ་ཕྱེ་བས་སྒམ་སྟོང་བར་འདུག མོས་ཡ་མཚན། དངུལ་དེ་ངེས་པར་ཡོད་དགོས་རྒྱུ་ལ། གཞན་ཞིག་གིས་ཁྱེར་རམ་ཟེར། དེའི་ཚེ་སྔོན་གྱི་ཁྱོ་བོ་སྐྲག་སྟེ་འདར་བཞིན་དུ་དངུལ་དངོས་གནས་འདུག་ཀྱང་། ཆུང་མ་ཤི་རྗེས་བདག་གིས་མཐོང་སྟེ་སྤྱད་པ་ཡིན་ཟེར། ཁོང་གིས་ད་དུང་། འདི་ནི་ཤིན་ཏུ་འཇིགས་པའི་གནས་ཤིག་སྟེ་ཁོ་བོའི་ཆུང་མ་སྔ་མ་དང་གདོང་དབྱིབས་མི་འདྲ་བ་ཙམ་མ་གཏོགས་སྐད་གདངས་དང་། གཤིས་ཀ་བྱེད་སྟངས་ཐམས་ཅད་ཇི་མ་ཇི་བཞིན་རེད་ཅེས་ཟེར་རོ། །ཧིན་དྷུ་སློབ་གྲྭ་ཆེན་མོའི་དགེ་རྒན་རབ་འབྱམས་པ་ཀྲུས་ཤང་ཀྭང་གིས་བུ་མོ་འདི་ཕྱིས་ཧིན་དྷུ་པིང་ཙི་ཕོའི་སློབ་གྲྭ་ཆེན་མོ་ཞིག་གི་མཚན་ཉིད་རིག་པའི་དགེ་རྒན་བྱས་ཤིང་། ལོ་སུམ་ཅུར་སོན་སྐབས་ད་དུང་ཡང་སྐྱེ་བ་སྔ་མའི་ལོ་རྒྱུས་དག་དྲན་གྱིན་འདུག་ཀྱང་བྱིས་པའི་དུས་ལྟ་བུའི་གསལ་བོ་ཞིག་དྲན་ཐུབ་པ་མི་འདུག་ཟེར་རོ། །དེ་བཞིན་དུ་དབྱིན་ཇིའི་ཡུལ་གུ་ནན་ས་ཆའི་ཧུ་ཁུ་ས་མོ་གྲོང་དུ་ཕོས་ལོ་ཁུ་ཁྱོ་ཤུག་གཉིས་ལ་བུ་མོ་གྲུང་ནེས་ཞེས་པ་ལོ་བཅུ་གཅིག་ཅན་ཞིག་དང་། ཅུས་ཆུས་ལན་ཞེས་པ་ལོ་དྲུག་ཏུ་སོན་པ་ཞིག་ཡོད་པ་གཉིས་ཀ་རླངས་འཁོར་གྱིས་བསྣད་དེ་བསད། ཕ་མ་གཉིས་པོ་སེམས་སྡུག་དྲགས་ཏེ་གནས་གཞན་ཞིག་ཏུ་སྤོས་ནས་བསྡད། ལོ་ཕྱེད་ཀྱི་རྗེས་སུ་ཕོས་ལོ་ཁུ་མངལ་ཆགས་པར་གྱུར་ཏེ་བུ་མོ་མཚེ་མ་ཞིག་བཙས་པ་ལ་མིང་དུ་ཙུན་ནུས་ཧ་དང་ཅ་ལུན་ཞེས་བཏགས། ཅུས་ཆུས་ལན་འཆི་ཚེ་དཔྲལ་བ་དང་དཔུང་བར་རྨ་བཏོད་པ་དེ་དང་མཚུངས་པར་ཙུན་ནེས་ཧ་ཡི་ཐོད་པའི་སྟེང་མངལ་ནས་བྱུང་བའི་ཚེ་རི་མོ་དཀར་པོ་ཕྲ་ལ་རིང་བ་ཞིག་དང་དཔུང་པར་ཡང་དེ་འདྲའི་རྟགས་ཤིག་བྱུང་འདུག ལོ་གསུམ་གྱི་རྗེས་སུ་ཕོས་ལོ་ཁུས་བུ་མོ་གཉིས་ཁྲིད་དེ་སྔོན་གྱི་སྡོད་གནས་ཧུ་ཁུ་ས་མོར་ཕྱིན་པས་དེར་འབྱོར་བ་ན་བུ་མོ་གཉིས་ཀྱིས་སྐད་ཆེན་པོས། ཕ་གི་ནི་སྔོན་ངེད་གཉིས་རྟག་ཏུ་རྩེད་མོ་རྩེ་བའི་གནས་དེ་རེད། ངེད་ཚོའི་སློབ་གྲྭ་ཡང་དེའི་ལོགས་སུ་ཡོད། འདི་ནི་ངེད་ཅག་རྒྱུན་དུ་རྩེ་བའི་ཤུད་སྐས་དེ་རེད་ཅེས་ཅ་ཅོ་འདོན། སྔོན་གྱི་གནས་ཁང་ཡོད་ས་དེའང་ལེགས་སྟོན་ཤེས་འདུག བུ་མོ་གཉིས་ལོ་བཞིར་སོན་སྐབས་ཕ་མ་གཉིས་ཀྱིས་སྔར་ཤི་བའི་བུ་མོ་གཉིས་ཀྱི་རྩེད་ཆས་རྣམས་བྱིན་པས། དེ་དག་གི་ཁྲོད་ན་རྩེད་ཆས་བྱིས་པ་གཉིས་ཡོད་པ་དེ་གཉིས་ཀྱི་སྔོན་གྱི་མིང་དེ་ཇི་བཞིན་དུ་ཤེས། ཁོང་གཉིས་སྔོན་འཆི་ཁའི་དུས་ཀྱི་དངངས་སྐྲག་དེ་ནི་ད་དུང་བརྗེད་མི་འདུག་སྟེ། ཐེངས་མང་པོར་མཚན་མོ་གཉིད་ལས་གློ་བུར་དུ་སད་དེ་གཉིས་ཀ་ཕན་ཚུན་འཐམས་ནས། ངེད་གཉིས་རླངས་འཁོར་འདིས་གནོན་འོང་གི་འདུག་ཅེས་སྐྲག་སྣང་ཆེན་པོ་སྐྱེ་ཞིང་། ཅ་ལུན་གྱིས་ཙུན་ནེས་ཧའི་མགོ་བོ་བསྐྱོར་ནས་ཁྱོད་ཀྱི་མིག་ནས་ཁྲག་བཞུར་གྱི་འདུག་ཅེས་ངུ་བར་བྱེད་དོ། ། ཕོ་ལོས་ཁུ་ཁྱོ་ཤུག་གཉིས་དོན་དེ་དག་འདི་གཉིས་ལ་གཏན་ནས་བཤད་མྱོང་མི་འདུག་པས་སྨྱོ་ནད་ཆེད་ལས་མཁས་པས་བརྟག་དཔྱད་བྱས་ཀྱང་སྐྱེ་བ་སྔ་མ་ནས་ཕྱི་མ་འཕོས་པ་དེ་ལས་གཞན་པའི་རྒྱུ་མཚན་ཅི་ཡང་རྙེད་མི་འདུག་གོ །ཀྱེ་མ་མ་འདི་གཉིས་ཀྱིས་ལས་ཅི་ཞིག་བསགས་ཏེ་དང་པོ་ཕ་མ་གཅིག་གི་ཕྲུ་གུར་གྱུར། འཆི་བའི་ཚེ་ནའང་མཉམ་དུ་ཤི །སླར་ཡང་མཚེ་མར་གྱུར་ཏེ་སྐྱེ་བ་ཡང་དྲན་པ་ཞིག་ཏུ་གྱུར་པ་ཡིན་ནམ། ལས་ཀྱི་རྣམ་པ་སྨིན་པ་འདི་ནི་ནམ་ཡང་མི་བསླུ་བ་ཞིག་གོ །
   ༄༅། །ཡང་ཐེ་ལན་གྱི་རྒྱལ་ས་མན་ཀུའུའི་བྱང་ཤར་གྱི་རྗོང་ཞིག་ཏུ། ཉེ་ཆར་སྐྱེ་བ་སྔ་ཕྱིའི་སྟེང་ནས་རྩོད་གླེང་བྱུང་སྟེ་ཉེན་རྟོག་སྤྱི་ཁྱབ་མགོ་དཔོན་གྱིས་ཐག་གཅོད་བྱེད་མ་ནུས་པར་འདུག་སྟེ། རྫོང་དེ་གའི་ཐ་ལིང་ཁུལ་དུ་ལེ་ཐུན་དང་ཉིང་ཐུང་ཞེས་པའི་ཁྱི་ཤུག་གཉིས་ལ་བྱིས་པ་ལོ་གསུམ་ཅན་ཞིག་ཡོད་པ་དེས་ངའི་སྐྱེ་བ་སྔ་མའི་ཕ་མ་གཉིས་ནི་ལ་ཤེན་ཁུལ་གྱི་་ལིང་ཆིན་གྲོང་ན་ཡོད། དེར་ང་ལ་རྩེད་ཆས་བྱ་གག་ཆུང་ངུ་དང་སྟོང་སྐུད་ཀྱིས་བཏགས་པའི་སྐེ་རས་ཡོད་པས་ལེན་དུ་འགྲོ་དགོས་ཞེས་རྟག་ཏུ་ངུས་ཏེ་མ་ཐུབ་པས་མི་འགྲོ་ཀ་མེད་བྱུང་། གྲོང་དེར་འབྱོར་ཚེ་བྱིས་པ་པ་རང་ཉིད་ཀྱིས་ལམ་ཁྲིད་དེ་ཤར་རེར་སོང་སྟེ་ལེ་པུ་དང་ཉིང་ཁིང་ཞེས་པའི་ཁྱོ་ཤུག་གཉིས་ཀྱི་སྒོ་དྲུང་དུ་འབྱོར་ཚེ་ཁྱིམ་དེར་འཛུལ་ཏེ་རྩེད་ཆས་རྣམས་འཚོལ། ཁྱིམ་མཚེས་དག་ཡ་མཚན་ནས་བལྟར་འོང་། དེའི་ཚེ་ལེ་པུ་དང་ཉིང་ཁིང་གཉིས་ཞིང་ཁ་ནས་ཁྱིམ་དུ་ལོག་འོང་བས་བྱིས་པ་ཤིན་ཏུ་དགའ་སྟེ་རྩེད་ཆས་དེ་དག་གང་དུ་ཡོད་ཅེས་འདྲིའོ། །ཁྱོ་ཤུག་གཉིས་ཤིན་ཏུ་ཡ་མཚན་ཏེ་བྱིས་པའི་ད་ལྟའི་ཕ་མ་གཉིས་ལ་བཤད་རྒྱུར། ངེད་གཉིས་ལ་ལོ་བརྒྱད་ཀྱི་སྔོན་དུ་པ་ཧྲི་ཟེར་བའི་བུ་ཞིག་ཡོད། དེ་ལོ་བཞིར་སོན་སྐབས་ནད་ཀྱིས་ཤི་སོང་། པུར་འཇུག་བྱེད་ཚེ་བུའི་སྐེ་རས་དེ་པུར་སྒམ་དུ་མ་བཅུག་པར་ད་ལྟའང་ཉར་ཡོད་ཟེར་ནས་བླངས་བྱུང་བས་བྱིས་པ་ཤིན་ཏུ་དགའ་སྟེ་ངེད་ཀྱི་རེད་ཟེར་ནས་ལག་ནས་འཕྲོག་ཅིང་སྔོན་གྱི་ལོ་རྒྱུས་རྣམས་བཤད་པ་ཐམས་ཅད་བདེན་པ་ཁོ་ནར་འདུག དེ་ནས་ད་ལྟའི་ཕ་མ་གཉིས་ཀྱིས་ཁྲིད་དེ་འགྲོ་གྲབས་བྱས་ཚེ་སྔོན་གྱི་ཕ་མ་གཉིས་ཀྱི་ཁྱིམ་ནས་འདུག་དགོས་ཟེར་ཏེ་བསད་ཀྱང་འགྲོར་མི་བཏུབ། སྔ་ཕྱིའི་ཕ་མ་བཞི་ཆར་ཅི་བྱ་གཏོལ་མེད་དུ་གྱུར་ཏེ་དེ་གའི་ཉེན་རྟོག་སྤྱི་ཁྱབ་ཁང་ལ་ཞུ་གཏུག་བྱས། ཉེན་རྟོག་སྤྱི་ཁྱབ་མགོ་དཔོན་གྱིས་ཀྱང་ཐག་གཅོད་བྱེད་མ་ཤེས་པར་གོང་ལ་ཡར་ཞུ་བ་འབུལ་དགོས་བྱུང་འདུག་གོ །ཡང་ཡོ་རོབ་ཀྱི་རྒྱལ་ཁབ་པུང་ཀ་རི་ཡའི་བུ་མོ་སོའུ་ཧྥེ་ཡ་པེ་ཁུ་ཧྥོས་ཞེས་པ་འདི་བཙས་ནས་ཟླ་བ་གཉིས་མ་ལོན་པའི་དུས་ནས་སྐད་རིགས་བརྒྱད་སྨྲས་སྟེ། དབྱིན་ཇི་དང་། ཧྥ་རན་སི། སི་ཕེན། ལི་ཐུ་ཝན་ནི་ཡ། ཨ་རབ་ཀྱི་ཕལ་སྐད་ཅིག་སོགས་གསལ་བོ་སྨྲ་བར་བྱེད་དེ། བུ་མོའི་མས་བཤད་རྒྱུར། མོ་རང་ཟླ་གཅིག་ལོན་ཙམ་ནས་མ་ལ་མི་ཚེ་འདི་ཤིན་ཏུ་ཡུན་ཐུང་བའི་ཉམས་མྱོང་རྣམས་འཆད་པར་བྱེད་ཅེས་ཟེར་ཏེ་འདིས་སྐྱེ་བ་སྔ་མ་རྣམས་ཀྱང་དྲན་གྱིན་འདུག་གོ །ཚན་རིག་པ་དག་གིས་འདི་རྣམས་ཅི་ཡིན་མི་ཤེས་ནས་འོ་བརྒྱལ་ཆེན་པོ་མྱོང་གིན་འདུག ངེད་ཚོ་ལ་མཚོན་ན་བླ་མ་རྣམས་ཀྱི་རྣམ་ཐར་སོགས་ན་སྔོན་ནས་ཡོད་པ་ཐམས་ཅད་ཀྱི་ཁ་ལ་བྱང་བྱང་བ་དེག་རང་དང་མཚུངས་པས་མི་ཤེས་རྒྱུ་དང་ལྷག་པར་ཡ་མཚན་འོང་རྒྱུ་ཅི་ཡང་མི་འདུག་གོ །ཡང་རྫོང་མཁར་ཞིག་གི་ཀྲང་ཧྲོས་ཁྲོམ་ལམ་ན་ལོས་ཅང་ཟེར་བའི་བྱིས་པ་ལོ་ལྔ་པ་ཞིག་འདུག་སྟེ། འདིས་ཀྱང་ལ་ཐོ་གྲོང་ནང་རང་ལ་ཁྱིམ་གཉིས་པ་ཞིག་ཡོད། དེར་མ་ཟད་ཕ་མ་ཕུ་བོ་གསུམ་ཡོད། དེ་རྣམས་ཀྱི་མིང་ལ་འདི་ཟེར་ཞེས་རྒྱུན་དུ་འཆད། ཐེངས་ཤིག་ཀྲུང་དབྱང་ནས་ཝེ་ཐེ་ནམ་རྒྱལ་ཁབ་ལ་རང་སྲུང་རྒོལ་ལན་དམག་འཁྲུག་བྱེད་པའི་འཚམས་འདྲི་ཚོགས་པ་ཞིག་རྫོང་དེར་འོངས་པ་ན། ལོས་ཀྱང་གི་མས་ལོས་ཀྱང་ཁྲིད་དེ་ལྟད་མོ་བལྟར་ཕྱིན། དེར་ལོས་ཅང་བུད་མེད་གཅིག་གི་དྲུང་དུ་ཕྱིན་ནས། དགེ་རྒན་ལིང་ལགས། ཁྱེད་ཀྱིས་ང་ཤེས་སམ་ཟེར། བུད་མེད་འདི་སྔོན་ལ་ཐོ་སློབ་དུ་དགེ་རྒན་བྱས་ཤིང་ཕྱིས་རྫོང་མཁར་དུ་ལས་གནས་སྤོས་པ་ཡིན་འདུག གྲོགས་པོ་ཆུང་ཆུང་ཁྱོད་སུ་ཚང་གི་བྱིས་པ་ཡིན་ནམ། ཁྱོད་ཀྱིས་མི་དྲན་ནམ། ང་རང་ཨ་ཕེ་ཚང་གི་ལོས་ཡོན་ཕེ་མ་རེད་དམ། དགེ་རྒན་ལིང་གིས་ཞིབ་ཏུ་བསམ་བློ་གཏོང་བས་དངོས་གནས་རང་གིས་སྔོན་ལ་ཐོ་སློབ་ཆུང་དུ་ལོས་ཡོན་ཕེ་ཞེས་པའི་བྱིས་པ་ཞིག་ལ་ཡི་གེ་བསླབ་མྱོང་བ་དྲན་ནོ། ལོས་ཅང་གི་ད་ལྟའི་ཕ་མ་གཉིས་ཀྱིས་འདྲི་རྩད་བྱས་པས་ལ་ཐོ་གྲོང་བརྡལ་ན་དངོས་ནས་ལོས་ཅང་གིས་སྨྲས་པའི་ཁྱིམ་ཚང་དེ་ཉིད་ཡོད་པར་ཤེས། ༡༩༧༩ལོའི་ཟླ་༨་པར་མས་ལོས་ཅང་ཁྲིད་དེ་གཉེན་རྣམས་ལ་འཕྲད་དུ་སོང་། མ་བུ་གཉིས་གྲོང་དེར་གཏན་ནས་འགྲོ་མ་མྱོང་ཡང་བྱིས་པས་སྨྲས་པ་དང་བསྟུན་ཏེ་དུད་ཁྱིམ་ཞིག་ཏུ་སོང་ངོ་། ལོས་ཀྱང་གི་སྔ་མའི་ཕ་མ་གཉིས་ཀྱིས་ཀྱང་དོན་དེ་དག་སྔར་ནས་ཐོས་ཀྱང་གཏན་ནས་ཡིད་ཆེས་མི་འདུག དེ་གའི་མི་རྣམས་ཀྱིས་ཤེས་འཕྲལ་ཁྲོམ་ལམ་གང་བོར་ལྟད་མོ་བས་གང་བར་གྱུར། ལོས་ཀྱང་གི་སྔ་མའི་ཕ་མ་གཉིས་ཀྱིས་ད་ལྟའི་མས་བྱིས་པ་གཏམ་སྨྲ་ལུགས་མི་སློབ་པའི་ཆེད་དུ་ལྐོག་ནས་ཁང་བ་གཞན་ཞིག་ཏུ་ཁྲིད་དུ་བཅུད། ཟས་ཟ་བའི་དུས་སུ་སྔ་མའི་མས་ཉམས་སད་པའི་ཆེད་དུ་རང་ཉིད་བུད་མེད་འགའ་ཞིག་དང་མཉམ་དུ་བསྡད་དེ་བྱིས་པ་ཁྲིད་འོང་དུ་བཅུག་སྟེ་མོ་རང་ནས། བུད་མེད་འདི་རྣམས་ལས་ཁྱེད་ཀྱི་མ་གང་རེད་ཟེར། བྱིས་པས་བསམ་བློ་ཙམ་ཡང་མི་གཏོང་བར་ཁྱོད་རེད་ཟེར། ཁྱོད་ཀྱིས་རྫུན་མ་ཤོད། ང་འདྲའི་རྒས་ཁོག་ཅིག་ཁྱོད་ཀྱི་མ་ཇི་ལྟར་ཡིན་ཟེར་ཞིང་། བྱིས་པའི་ད་ལྟའི་མ་དང་ན་མཉམ་ཞིག་བསྟན་ནས་མོ་ཁྱོད་ཀྱི་མ་རེད་ཟེར། བུད་མེད་དེས་ཀྱང་ཆེད་དུ་བརྩེ་ཚུལ་བྱས་ཀྱང་མགོ་སྐོར་མ་ཐུབ། ཟས་ཟོས་པའི་རྗེས་སུ་ལོས་ཅང་གིས་ཕུ་བོ་གཉིས་པ་ཁྱིམ་དུ་ལོག་མི་འོང་བ་ཅི་ཡིན་ཟེར། ཕུ་བོ་གཉིས་པ་དེ་ཉིན་ཞིང་རའི་ནང་དུ་ལས་ཀའི་དུས་ཚོད་སྣོན་མ་བྱས་ཏེ་ཁྱིམ་དུ་མ་ལོག་པ་ཡིན་འདུག དེ་ནས་ཁོས་མ་ལ་སྔོན་གྱི་རྩེད་ཆས་རྣམས་དགོས་ཟེར་བ་ཅུང་ཟད་ནོར་བ་མི་འདུག་སྟེ། སྔོན་ངེད་ཀྱི་ཞོན་རྒྱུའི་ཤིང་རྟ་དེ་གར་ཡོད་ཟེར། དེ་ནི་ལོས་ཡོན་ཕེ་ཤི་བའི་རྗེས་སུ་མས་གསེས་ཏེ་མེར་བུས་པ་རེད། དེའི་ཚེ་ཁང་བའི་ནང་དུ་བྱིས་པ་ལོ་བཅུ་ལྷག་ལོན་པ་ཞིག་གིས་རླངས་འཁོར་ཆུང་ངུ་ཞིག་གིས་རྩེ་བཞིན་འདུག་པས་ལོས་ཅང་གིས་དེ་ང་ལ་སྟེར་དགོས་ཟེར། བྱིས་པ་དེས་ང་རང་གི་ཡིན་པས་མི་སྦྱིན་ཟེར། ངེས་པར་དུ་ང་རང་གི་ཡིན་ཏེ། ངས་ཞོན་པའི་སྐབས་སུ་གསར་བ་ཡིན་པ་ལ་ཁྱོད་ཀྱིས་འདི་འདྲའི་རྙིང་པ་བྱས་ཟིན་འདུག་ཟེར། ལོས་ཡོན་ཕེ་མ་ཤིའི་སྔོན་དུ་དངོས་གནས་གསར་བ་ཞིག་ཡིན་འདུག ཡང་དེའི་ཚེ་སྒོའི་ཕྱི་རོལ་ནས་ལོ་བཅུ་བདུན་ཡས་མས་ཅན་གྱི་སྐྱེས་པ་ཞིག་འོང་སྟེ། བྱིས་པ་ཁྱོད་ཀྱིས་ང་ཤེས་སམ་ཟེར། བྱིས་པས་འཕྲལ་དུ་། ཁྱོད་་ཨ་བུན་མ་ཡིན་ནམ། སྔོན་ཡི་གེ་སློབ་སྐབས་ངེད་གཉིས་མཉམ་དུ་སྡོད་ཅིང་། ཁྱོད་ཀྱིས་རྒྱུན་དུ་ང་ལ་བུར་ཤིང་བཟའ་རྒྱུ་སྟེར་བ་མ་ཡིན་ནམ་ཟེར་བ་དངོས་གནས་རེད་དེ་ལྟར་ཡིན་འདུག་པས་དེར་ཡོད་ཀྱི་མི་ཚོགས་ཐམས་ཅད་ཧ་ལས་སོ། ལོས་ཅང་གི་སྐྱེ་བ་སྔ་མའི་མ་ལ་གཅར་འདྲི་བྱེད་སྐབས་བཤད་རྒྱུར། སྔོན་ཆད་ང་ལ་མི་ཤི་བའི་རྗེས་སུ་སླར་སྐྱེ་རྒྱུ་ཡོད་པ་དེར་ཡིད་ཆེས་གཏན་ནས་མེད། དེའི་ཕྱིར་ལོས་ཅང་ཡང་གཉེན་དུ་ཁས་ལེན་འདོད་ཡེ་མེད། འོན་ཀྱང་ཁོའི་གཏམ་དང་སྤྱོད་པ་དག་གིས་ཡིད་མ་ཆེས་པ་དང་།ཁས་མི་ལེན་པའི་ཐབས་མི་འདུག་ཟེར་རོ།
༄༅། །གཞན་ཡང་ཀྲུང་གོའི་སན་ཅང་རྫོང་ཏ་ཏུས་གྲོང་ཚོའི་ཀུང་ཧྲེའི་འཕྲོད་བསྟེན་ཁང་གི་མགོ་དཔོན་ཝོས་ལགས་དང་ཆུང་མ་ཤེའུ་ལགས་ལ་༡༩༥༨་ལོའི་ཟླ་༣་ཚེས་༦ཉིན་བྱིས་པ་ཞིག་བཙས་པ་དཔྱིད་རྨོས་ཀྱི་མཐར་ཁེལ་བས་མིང་ལ་ཁྲུན་གིན་ཏེ་དཔྱིད་རྨོས་ཞེས་བཏགས། ༡༩༦༩ལོའི་ཟླ་༡༢་ཚེས་༢༡་ཉིན་གློ་ནད་ཀྱིས་ཤིའོ། །༡༩༧༧ལོའི་ཟླ་༦པར་ཀུང་ཧྲེ་དེ་གའི་དྲག་ཆས་གཙོ་འཛིན་དབྱང་ལགས་ཀྱིས་ན་གཞོན་དམངས་དམག་འགའ་ཁྲིད་དེ་ཧྲེ་ཐོན་གྲོང་དུ་གཞུང་ལམ་ལས་སར་ཕྱིན། དེར་བྱིས་པ་འགའ་ཞིག་རྟག་ཏུ་འོང་སྟེ་ཟས་ཀྱི་ལྷག་མ་སློང་། རྒད་པོ་ཞིག་གིས་དབྱང་ལ་བྱིས་པ་ཞིག་བསྟན་ཏེ། འདིས་སྐྱེ་བ་སྔ་མ་དྲན་དེ་ཁོ་རང་གིས་ཏ་ཏུས་གྲོང་ཚོ་ནས་འོངས་བ་ཡིན་ཟེར་གྱི་འདུག་ཟེར། དབྱིང་གིས་བྱིས་པ་ལ། འོ་ན་ཁྱོད་ཀྱི་ད་ཏུས་གྲོང་ནས་མུ་ཞིག་ཤེས་ཞེས་དྲིས་པར། ང་རང་ཤང་ཤེས་ཚང་གི་ཡིན། ཤང་མུན་དང་། ཤང་ཅུན་རྣམས་ཤེས་ཟེར། ཤང་ཤེས་ཟེར་བ་སྔ་མའི་ཕ་དང་། ཤང་ཅུན་ནི་ཁུ་བོ་རེད། འོ་ན་ཁྱོད་ཀྱི་ཁྱིམ་གང་དུ་ཡོད། ཁྲུང་ལིས་ན་ཡོད་ཅིང་སྒོ་འགྲམ་ན་ཁྲོན་པ་ཞིག་ཡོད་ཟེར། མིང་གང་ཡིན། ཁྲུན་གིན་ཟེར། དེ་ལས་གཞན་པའི་མི་སུ་ཤེས། གཞན་འགའ་དང་སློབ་གྲོགས་འགའི་མིང་སྨྲས་སོ། །དབྱང་གིས་དམངས་དམག་ལ། དེ་འདྲ་ཡོད་དམ། དངོས་གནས་ཡོད་དོ་ཟེར། ཁོང་རྣམས་ཕྱིར་འོངས་ནས་དེ་ལྟར་བཤད་པས་ཐམས་ཅད་ཀྱིས་ཤེས། གཏམ་འདི་ཝོས་ཁྱོ་ཤུག་གཉིས་ཀྱིས་ཐོས། སྔོན་ནི་འདི་འདྲའི་རིགས་ལ་གཏན་ནས་ཡིད་ཆེས་བྱེད་ཀྱིན་མི་འདུག་ཀྱང་དབྱང་ལ་དྲིས་པས། དེ་འདྲ་དངོས་གནས་འདུག་ཟེར། ཁོ་རང་ཐེ་ཚོམ་དང་བཅས་བཞིན་ཆུང་མ་ལ་གྲོས་བྱས་ཏེ། ཆུང་མ་དང་དེའི་ནུ་མོ་གཉིས་སོང་སྟེ་བརྟག་དཔྱད་བྱ་རྒྱུ་བྱས་སོ། ཁོང་གཉིས་ཧྲེ་ཐོན་གྲོང་དུ་འབྱོར་རྗེས་ཁྱིམ་དེ་དྲིས་ནས་ཕྱིན་པས་ཁྱིམ་དེར་ཨ་ཕྱི་བགྲེས་མོ་ཞིག་འདུག་པ་ལ་འོང་དོན་སྨྲས་པས་བྱིས་པ་བོས། བྱིས་པས་སྔོན་གྱི་མ་དེ་མཐོང་འཕྲལ་སེམས་ཤིན་ཏུ་སྐྱོ་སྟེ་མིག་ཆུ་ཁྲོམ་ཁྲོམ་གཏོང་བས་ངུ་ཞིང་མགོ་སྨད་དེ་མདུན་དུ་མདུག་གོ། མས་ཀྱང་ཅི་ཟེར་མ་རྙེད། དེ་ལྟར་དུ་དུས་ཚོད་གཅིག་ཙམ་བསྡད་རྗེས། བྱིས་པ་འཕྲལ་དུ་ལངས་ཏེ་ཕ་གའི་ཀ་བ་ཞིག་གི་རྩར་ཕྱིན་ཏེ་བསམ་བློ་ཞིག་བཏང་ནས། ཚུར་འོངས་ཏེ། ཨ་མ། ང་ནི་ཁྲུན་གིན་ཡིན། མས་བྱིས་པ་པང་དུ་བླངས་ཏེ་མིག་ཆུ་དབང་མེད་དུ་ཤོར། དེ་ནས་མས་སྨྲས་པ། ཁྱོད་ཤི་བའི་རྗེས་སུ་འདིར་ཇི་ལྟར་འོངས་པ་ཡིན། ང་ཤི་ནས་ཁྱོད་རྣམས་ཀྱིས་རོ་སྤུར་སྒམ་དུ་བཅུག་སྟེ་ས་འོག་ཏུ་གནོན་པ་རྣམས་ངས་གསལ་བོར་མཐོང་ཞིང་། དེའི་ཚེ་ང་ཡང་ཁྱོད་རྣམས་དང་མཉམ་དུ་སོང་། སླར་ཕྱིར་ལོག་སྟེ་ཉིན་གུང་གི་ཟས་ཟོས་རྗེས་འདི་གར་འོངས་པ་ཡིན། ལམ་ནས་བསིལ་ཁང་བདུན་བརྒྱུད་དེ་འོང་། བསིལ་ཁང་ཞིག་གི་ནང་གཉིད་ལོག་སྐབས་ཤིན་ཏུ་འཇིགས་པའི་སྒྲ་ཞིག་གྲག་སྟེ་གཉིད་ལས་བསླངས་པས་ཡང་ཡར་ཕྱིན་ཏེ་ཁྱི་ཟུག་པའི་སྐད་སྒྲ་ཆེན་པོ་ཐོས་པ་དེའི་ཚེ་ང་ལ་སྐྲག་སྣང་ཆེན་པོ་ཞིག་སྐྱེས་བྱུང་། དེའི་སྐབས་སུ་བདག་གི་ཕ་འདི་སྒོ་དྲུང་ན་འདུག་པས་འདིའི་རྗེས་སུ་འབྲངས་ཏེ་འོངས་བ་ཡིན་ཟེར་རོ། ཉིན་གཉིས་པར་སྔོན་གྱི་མ་ཕྱིར་ལོག་འགྲོ་སྐབས་བྱིས་པས་ཐག་རིང་པོའི་བར་སྐྱེལ་མ་བྱས་ཤིང་ད་དུང་ཕྱིར་འགྲོ་བར་མི་འདོད་ཚེ་མས་ཉིན་རྗེས་མར་ཨ་ཕ་ཁྱོད་བསུ་བར་འོང་ཟེར་བས་གདོད་ཕྱིར་ལོག་གོ །དེ་རྗེས་ཉིན་རྒྱུན་གཞུང་ལམ་འགྲམ་དུ་སོང་སྟེ། ཨ་ཕ་ད་དུང་ང་བསུ་བར་མི་འོང་བ་ཅི་ཡིན་ཟེར་ཞིང་སྒུག་གོ །གྲོང་དེ་གའི་མི་རྣམས་ཀྱིས་བྱིས་པ་ལ་བྱ་སྒོང་བྱིན་ཏེ་སྐྱེ་བ་སྔ་མ་འཆད་དུ་འཇུག་པས་ཅི་ཡང་བཤད་དོ། ། བྱིས་པའི་མས་བཤད་རྒྱུར། བྱིས་པ་བསིལ་ཁང་དུ་ཉལ་སྐབས་འདྲེ་ཞིག་འོང་སྟེ་དངངས་སྐྲག་སློང་སྐབས་ཁོས་སངས་རྒྱས་ཨ་མི་དྷེ་ཝ་ཞེས་ལན་གསུམ་བརྗོད་པས་འདྲེ་མི་སྣང་བར་གྱུར་སོང་ཟེར། ཁོ་མོ་འདི་འདྲའི་ཆེན་པོར་གྱུར་ཀྱང་ཨ་མི་དྷེ་ཝ་ཞེས་པ་ཅི་ཞིག་ལ་ཟེར་བ་མི་ཤེས་ན་འདིས་ཇི་ལྟར་ཤེས་པ་ཡིན་མི་ཤེས་ཟེར་རོ། ཟླ་འགའ་སོང་རྗེས་སྔོན་གྱི་མ་འོངས་ཏེ་བྱིས་པ་ཏ་ཏུས་གྲོང་དུ་བསུས་ནས་སོང་། གྲོང་ནང་དུ་འབྱོར་སྐབས་ཁོ་རང་སྔོན་དུ་འགྲོ་བཅུག་པས་ཤར་རེ་སྔོན་ཁྱིམ་དུ་སོང་སྟེ་ཅུང་ཟད་ཀྱང་མི་ནོར་རོ། །སྐས་ལ་འཛེགས་རྗེས་བསམ་བློ་ཅུང་ཟད་ཅིག་གཏོང་དགོས་བྱུང་སྟེ་སྔོན་གྱི་ཁང་པ་ཅུང་ཟད་བཅོས་ཡོད་པའི་རྐྱེན་གྱིས་ཡིན་ནོ། །ཁང་ནང་དུ་འཛུལ་ཚེ་གྱོས་པོ་མཐོང་ནས་འཕྲལ་དུ་ཤེས་ཏེ་གྱོས་པོ་ཞེས་འབོད། གྱོས་པོས་བྱིས་པ་པང་དུ་བླངས་ནས་དགའ་ཞིང་སྐྱོ་སྟེ་ངུའོ། །ཕ་དང་སྤུན་སྲིང་དང་སློབ་གྲོགས་སོགས་ཐམས་ཅད་ཀྱང་ངོ་ཤེས། སྔོན་གྱི་བྱ་བ་ཐམས་ཅད་གསལ་བོར་དྲན་གྱིན་འདུག། དཔེར་ན། སྔོན་ཆད་ཀྱི་ཁང་པ་སྐྲུན་ཚེ་སུས་གྲོགས་བྱས་པ་རེད་ཅེས་དྲིས་ཚེ་ཨ་ཞང་གིས་གྲོགས་བྱས་སོགས་ལན་ཐམས་ཅད་གསལ་བོར་འདེབས་སོ། ཕ་རྒན་གྱིས་སྨན་ཁང་དུ་ཁྲིད་པའང་དྲན། སྐྱེ་བ་སྔ་མ་ཤིན་ཏུ་བརྩེ་བའི་གྲོགས་པོ་ད་ལྟ་ལོ་དྲུག་ཏུ་སོན་པ་ཞིག་ཡོད་པ་དེ་ལ། ཁྱོད་ཀྱིས་ང་ཁྲིད་དེ་རྫོང་མཁར་དུ་རྩེ་སར་འགྲོ་བ། སྨན་པ་ལ་སྟོན་ཏུ་འགྲོ་བ་དང་། ངེད་དང་ལྷན་དུ་ཉལ་བ་རྣམས་བརྗེད་དམ་ཞེས་ཟེར་རོ། གྱོས་པོ་ལ་ངེད་གཉིས་མཉམ་དུ་རྨོས་པའི་ཡིའུ་ཙི་ཤིང་དེ་གར་ཡོད་ཟེར། གྱོས་པོས་བྱིས་པ་ཁུར་ཏེ་བལྟར་ཕྱིན་པས། སྔོན་རྨོ་ས་དེ་འདི་མ་རེད་ཟེར། རྗེས་སུ་གྱོས་པོས་དེར་སྤོས་པ་ཡིན་འདུག མིང་སྲིང་རྣམས་ཀྱི་གོས་ཐམས་ཅད་མཉམ་དུ་སྤུངས་ཏེ་ཁོ་རང་གི་སྔོན་གྱི་གོས་ངོས་འཛིན་དུ་བཅུག་པས་ཇི་བཞིན་དུ་ངོས་ཟིན་ཏོ། ཝོས་ཚང་གི་ཁྱིམ་མི་རྣམས་ཀྱིས་བྱིས་པའི་སྤྱོད་པ་ཐམས་ཅད་སྔོན་མ་དང་འདྲ་ཞིང་། ཐ་ན་འགྲོ་སྟངས་ཡན་ཆད་སྔོན་དང་འདྲ་བར་འདུག་ཅེས་ཟེར་རོ། །༡༩༨༣ལོའི་ཟླ་༡༠ཚེས་༢༨་ཉིན་སྨན་པ་ཚུན་དང་འཕྲད་པས་ལོ་བཅུ་ལྷག་གི་སྔོན་དུ་ལིན་ཤིའུ་རུ་འཕྲད་མྱོང་ཚུལ་རྣམས་ཇི་བཞིན་དུ་བཤད། སྨན་པས་བྱིས་པ་ལ་བརྟགས་ཏེ་ཁམས་བདེ་ཐང་ཁོ་ན་ཡིན་ཞིང་སེམས་ཁམས་མི་བདེ་བ་སོགས་ནད་ཅི་ཡང་མི་འདུག་ཅེས་ཟེར་རོ། །བྱིས་པ་འདིས་ལོ་གསུམ་ཙམ་ལོན་པ་ནས། ང་རང་ཏ་ཏུས་གྲོང་ནས་འོང་བ་ཡིན། ངའི་ཁྱིམ་འདི་མིན། ང་ཁྱིམ་དུ་འགྲོ་དགོས་ཞེས་ཟེར་ཞིང་། ཕ་མས་ཅུང་ཟད་སྤྱོས་པའི་ཚེ། ཁྱེད་ཅག་གིས་ད་དུང་སྤྱོས་ཤིག་དང་། ང་ཁྱིམ་དུ་མི་འགྲོ་རེ་ཞེས་ཟེར་རོ། །འདི་རྣམས་ལས་གཞན་ཡང་སྐྱེ་བ་སྔ་ཕྱི་དྲན་མཁན་མང་པོ་འདུག་སྟེ་ཡི་གེ་ཤིན་ཏུ་མང་བར་འགྱུར་བས་དེ་ཙམ་གྱིས་ཆོག་པར་བྱས་སོ། །དེ་རྣམས་ནི་མི་ནས་མིར་སྐྱེས་ཚུལ་ཡིན་ལ། ད་ནི་འགྲོ་བ་གཞན་ནས་གཞན་དུ་སྐྱེས་ཚུལ་ཡང་ཅུང་ཟད་ཅིག་བརྗོད་པར་བྱ་སྟེ། ཉེ་ཆར་ཅང་ཧྲོས་ཞིང་ཆེན་ཏྲེན་ཅང་རྫོང་གྲོང་སྒོ་ནུབ་མའི་ཕྱིའི་ཤའེ་ཏྲི་ན་གྲོང་བརྡལ་ཤའེ་ཡུད་མུན་ཚང་གི་ཕག་ཚང་དུ་ཕག་ཕྲུག་དྲུག་བཙས་འདུག ཐམས་ཅད་ཀྱི་རྒྱབ་ན་སྤུ་མེད་ཅིང་། རྐང་པ་དང་ལྟོ་བ་ཐམས་ཅད་མིའི་རྐང་པ་དང་མིའི་ལྟོ་བ་ཇི་ལྟ་བ་བཞིན་རེད། དེ་བས་ཀྱང་ཡ་མཚན་པ་ཞིག་ལ་རེ་རེའི་རྒྱབ་ལོགས་ན་ཤ་མདོག་སྔོན་པོའི་ཡིག་འབྲུ་གསུམ་རེ་འབུར་དོད་དུ་བྱུང་འདུག མིང་དེ་དག་ནི་ཉེ་དུས་ཤིན་ཏུ་རླབས་ཆེན་དུ་གྲགས་པའི་མི་དྲུག་གི་མིང་རེད། དོན་དངོས་འདི་མངོན་སུམ་ཚད་མར་མཐོང་མྱོང་མཁན་མང་པོ་ཡོད། ད་ལྟ་ཏན་དབྱང་གྲོང་ཁྱེར་ནང་ཝོས་གོ་ཤུན་གྱིས་རེ་ཞིག་ཉོས་ཏེ་དངོས་མང་རིག་པ་བ་ལ་ཞིབ་འཇུག་བྱེད་དུ་འཇུག་རྩིས་འདུག་གོ། དོན་འདི་འཛམ་བུ་གླིང་གི་ཡ་མཚན་ཅན་གྱི་མཐོང་ཐོས་གྱི་ནང་དུའང་བཀོད་ཡོད་ཟེར་རོ། །སྤྱི་ལོ་༡༩༣༥ལོར་ཧྲང་ཧེའི་ཏ་ཁྲིང་ས་ཁུལ་དུ་བཤན་པ་ཞིག་ཡོད་པ་ནད་ཀྱིས་ཐེབས་ཏེ་མལ་དུ་ལུས། ལམ་འགྲོ་བཙུན་པ་ཞིག་དང་འཕྲད་དེ་ཁྱེད་རང་སྡིག་སྒྲིབ་ཆེ་བས་འགྱོད་བཤགས་གྱིས་ཟེར། ནད་ཀྱིས་མནར་བས་གཞན་བྱེད་མ་ནུས་ཀྱང་ལག་པ་ཡ་གཅིག་གིས་ཐལ་མོ་བྱས་ཏེ་སྙིང་ཐག་པ་ནས་སངས་རྒྱས་ལ་གསོལ་བ་བཏབ། དེ་ནས་ཤི་སྟེ་ཟླ་བ་འགའ་སོང་རྗེས་ཁྱིམ་མི་ཐམས་ཅད་ལ་ཐུན་མོང་དུ་རྨི་ལམ་ཞིག་བྱུང་སྟེ། ཕ་རྒན་གྱིས་ང་ཁྱེད་ཚོའི་ཕ་ཡིན། སང་ཉིན་ཁྱིམ་མཚེས་ཀྱི་ཕག་ཁང་ནང་དུ་ཕག་ཕྲུག་ཏུ་བཙའ་ཞིང་ང་མི་ནོར་བའི་རྟགས་སུ་ལག་པ་ཡ་གཅིག་དེ་མིའི་་ལག་པ་ཡིན། ངའི་སྲོག་ལན་ཅིག་སྐྱོབས་ཤིག་ཟེར། ཕྱི་ཉིན་བལྟས་པས་དེ་ག་རང་དུ་འདུག་པས་ཧྲང་ཧེའི་པའོ་ཧྭ་དགོན་པའི་ཚེ་ཐར་ར་བའི་ནང་དུ་ཚེ་ཐར་བྱས་སོ། །ཅིན་ཧྭ་པར་ལེན་ཁང་གིས་འདིའི་བརྙན་པར་བླངས་ཏེ་དེབ་ཐོབ་ཏུ་བཀོད་པས་ཧྲང་ཧྭེའི་མི་ཕལ་མོ་ཆེ་ཞིག་གིས་ཤེས་ཤིང་། ཕག་དེ་དངོས་སུ་མཐོང་མཁན་ཉེ་ཆར་ཡང་ཡོད་ཟེར་ལ་བརྙན་པར་ནི་ད་ལྟ་འང་མཐོང་རྒྱུ་འདུག་གོ། གཞན་ཡང་ཉེ་ཆར་ཐེན་ཅིན་གྲོང་ཁྱེར་དུ་བུ་མོ་ཏྲེན་ཀྲོས་ཞེས་པ་ལོ་ཉེར་གཅིག་ལོན་པ་ཞིག་ཤི་བས་མས་སེམས་སྡུག་ཆེན་པོ་བྱས།དེ་རྗེས་རྨི་ལམ་ཐེངས་གསུམ་རྨིས་ཏེ་བུ་མོ་ང་རི་བོ་རྩེ་ལྔར་ཁྱི་ཞིག་གི་སྐྱེ་བ་བླངས་ཡོད་པས་བལྟར་ཤོག་ཟེར།རྒན་མོ་རི་བོ་རྩེ་ལྔར་འོངས་ཏེ་ཁྱི་ཡོད་པའི་དགོན་པ་སུ་ཡོད་དྲིས་པས་ལྷོ་རིའི་གསེར་གྱི་བ་གམ་གླིང་ན་ཡོད་ཟེར།གླིང་དེར་ཁྱི་དཀར་བོ་ཤ་མི་ཟ་ཞིང་།རབ ་ཏུ་བྱུང་བ་ལ་དགའ་བ་ཞིག་ཡོད་འདུག  རྒད་མོ་དེར་འབྱོར་ནས་ཁྱིའི་དྲུང་དུ་ཕྱིན་པས་ཁྱི་དེས་མཐོང་མ་ཐག་ཤིན་ཏུ་དགའ་སྟེ་རྒད་མོའི་མགུལ་དུ་འཐམས་ཏེ་དགའ་སྐྱོའི་རྣམ་འགྱུར་ཚད་མེད་བྱེད་ཅིང་མིག་ནས་མཆི་མ་ཤར་ཤར་དུ་བཞུར། རྒད་མོས་ཀྱང་བུ་མོ་དེ་ཡིན་ཐག་ཆོད་དེ་མིག་ཆུ་རང་དབང་མེད་པར་ཤོར་ཏེ་མི་ཁྱི་གཉིས་ཀ་ངུའོ། །རྒད་མོ་སྔོན་ཆོས་ལ་ཡེ་མི་དད་པ་ཞིག་ཡིན་ཡང་ཕྱིས་ཆོས་ལ་དད་དེ་ལོ་རེར་དགོན་པ་དེར་ཁྱི་ལ་ལན་རེར་བལྟར་འོང་ངོ་།ཉེ་ཆར་འགའ་ཞིག་ཆེད་དུ་རི་བོ་རྩེ་ལྔར་ཕྱིན་ཏེ་དགོན་འདིའི་རྒྱུན་བཞུགས་དགོན་གྲྭ་བ་རྣམས་ལ་གཅར་འདྲི་བྱས་པས་ཁོང་ཚོས་དགོན་དཔོན་སོགས་མི་མང་པོས་མངོན་སུམ་དུ་མཐོང་བ་ཡིན་པས་བདེན་པ་ཁོ་ན་ཡིན་ཟེར་ལ། ཁྱི་དེ་ནི་ད་ལྟའང་འདུག་གོ། །གཞན་ཡང་འདི་རྣམས་དང་འདྲ་བ་མང་པོ་འདུག་སྟེ་རེ་རེ་ནས་འབྲིར་མ་ལོངས་ཀྱང་འདི་རྣམས་ཀྱིས་མཚོན་ནས་ཤེས་པར་བྱའོ། །དེ་ལྟར་སྔོན་གནས་དྲན་ཚུལ་འདི་ལ་ཤིན་ཏུ་གསལ་བར་དྲན་མཁན་ཞིག་དང་། སྐྱེ་བ་སྔ་མའི་གནས་ཁང་ཕ་མ་སོགས་བག་ཆགས་ཤིན་ཏུ་བརྟན་པ་དེ་རྣམས་མ་གཏོགས་གཞན་བརྗེད་པ་ཞིག་སྟེ་རིགས་གཉིས་སྣང་། ཕྱི་མ་འདིས་ཕལ་མོ་ཆེ་ཞིག་བརྗེད་པ་བཞིན་དུ་དེ་ལས་གཞན་རྣམས་ཀྱིས་ཐམས་ཅད་བརྗེད་ནས་མ་དྲན་པ་ཡིན་གྱི་དེ་རྣམས་ལ་སྐྱེ་བ་སྔ་མ་མེད་པ་ནི་གཏན་ནས་མ་ཡིན་ཏེ་མི་སོ་སོ་ལ་བྱིས་པའི་དུས་ནས་སུས་ཀྱང་མ་བསླབ་པའི་གཤིས་ཀ་མི་འདྲ་བ་ཞིག་ཡོད་པ་འདི་ནི་སྔ་མའི་བག་ཆགས་ལས་བྱུང་བར་གོར་མ་ཆག་གོ། གལ་ཏེ་མ་དྲན་པ་ཙམ་གྱིས་མེད་པར་འཇོག་ན་གནས་ཁང་དང་ཕ་མ་ཙམ་མ་གཏོགས་མི་དྲན་པ་དེ་རྣམས་ལས་གཞན་པ་ཅི་ཡང་མེད་པར་ཁས་ལེན་དགོས་པར་འགྱུར་རོ། ། འོ་ན་སྐྱེ་བ་སྔ་མ་འདི་འགའ་ཞིག་གི་དྲན་ལ་འགའ་ཞིག་གིས་མི་དྲན་པའི་རྒྱུ་མཚན་གང་ཡིན་ཞེ་ན། འདི་ལ་གཉིས་ཏེ་སྒོམ་བྱུང་གི་མངོན་ཤེས་ཀྱིས་དྲན་པ་དང་། ལས་ཀྱི་དབང་གིས་དྲན་པའོ། ལས་ནི་རིན་ཆེན་ཕྲེང་བ་ལས། ཆོས་ཀྱི་སྦྱིན་དྲི་མེད་པས། །ཚེ་རབས་དྲན་པ་ཐོབ་པར་འགྱུར། །ཞེས་གསུངས་པ་ལ་སོགས་པའོ། རྒྱུ་འདི་གཉིས་ལས་གང་རུང་ལྡན་པས་དྲན་ལ་མི་ལྡན་པས་མི་དྲན་པ་ཡིན་ནོ། དེ་ལྟར་ཚེ་འདིའི་ལུས་སེམས་གཉིས་ནི་སྐྱེ་བ་སྔ་མའི་ལུས་སེམས་གཉིས་དང་། ད་ལྟའི་ཕ་མའི་ཁུ་ཁྲག་གཉིས་དང་། སྔོན་གྱི་ལས་རྣམས་ལས་སྐྱེས་པར་བདག་ཅག་གི་སྟོན་པས་གསུངས་པ་གོང་དུ་དྲངས་བ་ལྟར་ཡིན་གྱི་གློ་བུར་དུ་བྱུང་བ་ནི་གཏན་ནས་མ་ཡིན་ཏེ། གལ་ཏེ་སེམས་འདི་གློ་བུར་དུ་བྱུང་བ་ཡིན་ན་སྐྱེ་བ་སྔ་མ་བར་སྲིད་རྣམས་དྲན་པ་གནས་མེད་ཅིང་སྐབས་མེད་དེ་སེམས་རང་གི་ངོ་བོ་དེའི་ཚེ་ན་མེད་པར་འདོད་པའི་ཕྱིར་རོ། །དེ་བཞིན་དུ་ལུས་འདི་ཡང་ད་ལྟའི་ཕ་མའི་ཁུ་ཁྲག་ཙམ་ལས་སྐྱེ་བ་སྔ་མའི་ལུས་དང་དེ་བྱུང་བའི་འབྲེལ་བ་གཏན་ནས་མེད་ན་སྔ་མའི་ལུས་ལ་མཚོན་གྱིས་རྨས་པ་སོགས་ཀྱི་ཤུལ་ཕྱི་མའི་ལུས་ལ་ཡོད་དོན་རྩ་བ་ནས་མེད་ཀྱང་དེ་ནི་ཡོད་པའང་ཡིན་ཏེ། དབྱིན་ཇིའི་བུ་མོ་རླངས་འཁོར་གྱིས་བསད་པ་གཉིས་ཀྱི་སྔ་མའི་རྨ་ཤུལ་ཕྱི་མ་ལ་གསལ་བར་ཡོད་པ་དང་། གོང་དུ་བཤད་པའི་ཧྲེ་ཐོན་རུ་ཆེན་ན་ཡང་སྔོན་གནས་དྲན་མཁན་ཞིག་ཡོད་པ་དེས་སྐྱེ་བ་སྔ་མ་རྐུན་པོ་བྱེད་སྐབས་དམག་གིས་མེ་མདའ་བརྒྱབ་སྟེ་བསད་པས་ད་ལྟ་བཤང་ལམ་གྱི་སྟེང་ཕྱོགས་ན་རྨ་ཤུལ་ཤིན་ཏུ་གསལ་བོར་སྣང་ངོ་། འདི་འདྲ་བའི་རིགས་དམངས་ཁྲོད་ན་མང་དུ་སྣང་སྟེ་མཚོན་ཙམ་མོ། །འདིའི་རྒྱུ་མཚན་དཔེ་དང་བཅས་པ་དཔལ་ལྡན་ཟླ་བའི་བཞི་བརྒྱ་བའི་འགྲེལ་བ་ན་གསལ་བར་གསུངས་ཡོད་དོ། །དེ་ལྟ་ན་ད་ལྟའི་ལུས་སེམས་གཉིས་ནི་སྔ་མའི་ལུས་སེམས་ལས་བྱུང་བར་བསླུ་མེད་བསྙོན་མེད་དུ་གྲུབ་པའི་ཕྱིར་ཉེར་ལེན་གྱི་རྒྱུའི་གཙོ་བོ་ནི་སྔ་མའི་ཕུང་པོ་ལྔ་པོ་ཡིན། ལྷན་ཅིག་བྱེད་པའི་རྐྱེན་ནི་ད་ལྟ་སྨན་སོགས་ཀྱིས་ཀྱང་བྱེད་དེ་བྱིས་པ་མངལ་དུ་གནས་པའམ་བཙའ་བའི་སྐབས་བློ་རྣོ་བའི་ཆོ་ག་བྱས་པས་རིག་པ་ཇེ་གསལ་དུ་འགྱུར་བ་ལྟ་བུའོ། །ཕ་མའི་ཁུ་ཁྲག་གིས་ཀྱང་བྱེད་དེ་མི་དང་དུད་འགྲོའི་ཁུ་ཁྲག་བསྲེས་པས་སེམས་ཅན་མི་འདྲ་བ་འབྱུང་བ་ལྟ་བུའོ། །དེ་ལྟ་ནའང་ལྷན་གཅིག་བྱེད་པའི་རྐྱེན་གྱི་གཙོ་བོ་ནི་སྔོན་བསགས་པའི་ལས་ཁོ་ན་ཡིན་ཏེ་ལས་ཀྱིས་འགྲོ་བ་རིགས་དྲུག་ཏུ་འཕེན་པར་བྱེད་ནུས་ཀྱི་གཞན་གྱིས་ནི་མི་ནུས་སོ། །དེ་ལྟར་སྐྱེ་བ་སྔ་ཕྱི་ཞེས་པ་འདི་ནི་གྲུབ་མཐའི་བཤད་སྒྲོས་ཙམ་མ་ཡིན་པར་དོན་དངོས་ཐོག་ཏུ་གནས་པའི་བདེན་དོན་བསྙོན་དུ་མེད་པ་ཞིག་ཡིན་པའི་གནད་ཀྱིས་དེང་སང་ཕྱི་རྒྱལ་གྱི་ཚན་རིག་པ་རྣམས་གནས་འདི་ལ་ལྷག་པར་མོས་པ་སྐྱེས་ཏེ་སྔ་རྗེས་སུ་གཞུང་བརྒྱ་ཕྲག་ལྷག་ཅིག་དཔར་བསྐྲུན་བྱས་འདུག བྱ་བ་འདི་ལ་དང་པོར་བརྩོན་མཁན་ནི་ཨ་རིའི་ཝེ་ཅི་ནིའུ་ཡ་སློབ་གྲྭ་ཆེན་མོའི་དགེ་རྒན་ཧྲི་ཏུས་ཝེན་ཧྲེན་ཞེས་པ་དེ་རེད། ཁོང་གིས་རྒྱལ་ཁབ་སོ་སོ་ནས་སྔོན་གནས་དྲན་མཁན་བདུན་བརྒྱ་ལྷག་གི་ལོ་རྒྱུས་བསྡུ་སྒྲིག་བྱས་ཏེ་ཕལ་མོ་ཆེ་ཞིག་བདེན་དཔང་སྟོབས་ལྡན་ཡོད་པ་འབའ་ཞིག་ཡིན་འདུག་གོ །དེར་མ་ཟད་ད་ལྟ་རྒྱལ་སྤྱིའི་ཚེ་སྲོག་གི་ཚན་རིག་ཞིབ་འཇུག་ཁང་བཙུགས་ནས་ཞིབ་འཇུག་བྱས་ཏེ་འབྲས་བུ་མི་དམན་པ་ཐོབ་དང་འཐོབ་མུས་སུ་སྣང་ངོ་། །ང་ཚོ་བོད་ལ་མཚོན་ན་མི་རིགས་ཧྲིལ་བོས་སྐྱེ་བ་སྔ་ཕྱི་ལ་ཡིད་ཆེས་རྙེད་ནས་ལོ་སྟོང་ལྷག་སོང་སྟེ་བསམ་བློའི་སྟེང་ནས་བཅིངས་གྲོལ་དང་དགེ་མཚན་རྨད་དུ་བྱུང་བ་ཞིག་ཐོབ་པ་དེར་ད་ལྟ་དེང་རབས་ཀྱི་རིགས་པ་ཤིན་ཏུ་རྒྱས་ཏེ་མཁའ་དབྱིངས་ཀྱི་དུས་རབས་སུ་འབྱོར་བའི་གནས་སྐབས་ན་ཚན་རིག་གི་བདེན་དཔང་ཡང་ཐོབ་པས་གཞན་ལ་ངོམ་རིན་ཆོག་པའི་ཡོན་ཏན་ཞིག་སྟེ། བསམ་བློའི་འཁྱེར་སོ་འདིའི་དབང་གིས་རང་རེ་བོད་ཀྱི་སྤྱི་ཚོགས་ཀྱི་འཚོ་བའི་ནང་སྔོན་ནས་ད་ལྟའི་བར་ཕན་འབྲས་བརྗོད་ཀྱིས་མི་ལང་པ་ཞིག་ཐོབ་པ་ནི་ཐམས་ཅད་ལ་མངོན་སུམ་ཚད་མ་ཡིན་ནོ། །
    ༄༅། །གཉིས་པ་ལས་དང་ལས་ཀྱི་འབྲས་བུ་ལ་ཡིད་ཆེས་བྱ་བ་ནི། དེ་ལྟར་ཤི་ནས་མེད་དུ་མི་འགྲོ་བར་ཕ་རོལ་ཏུ་འགྲོ་དགོས་པར་ཚད་མས་གྲུབ་ཅིང་དེ་ཡང་འགའ་ཞིག་ནི་མི་དང་འགའ་ཞིག་ནི་དུད་འགྲོ་ཉིད་དུ་སྐྱེ་བར་ཡང་དེ་བཞིན་དུ་གྲུབ་ལ། དེར་སྐྱེས་ནས་ཀྱང་འགའ་ཞིག་གིས་ནི་བྱ་བ་བཟང་པོ་གཞན་གྱི་སྲོག་སྐྱོབ་པ་དང་། དབུལ་བོ་ལ་སྦྱིན་པ་སྟེར་བ། །དྲང་བདེན་བྱེད་པ་སོགས་ཡ་རབས་ཀྱི་སྤྱོད་པ་རྣམས་རང་རང་གིས་ངང་གིས་བྱེད། འགའ་ཞིག་ནི་སྲོག་གཅོད་པ། རྐུ་འཕྲོག་བྱེད་པ། རྫུན་གྱིས་གཞན་བསླུ་བ་སོགས་མ་རབས་ཀྱི་སྤྱོད་པ་རྣམས་ལ་རང་གི་ངང་གིས་དགའ་ཞིང་སྤྱོད། འགའ་ཞིག་ནོ་མི་ཚེ་གང་པོར་ནད་ཀྱིས་མནར་བས་སྨན་དཔྱད་གང་གིས་ཀྱང་མི་ཕན་པར་ཤི། ལ་ལ་ནི་ཚེ་གང་པོར་ནད་ཅི་ཡང་མེད་པར་འཆི་ཚེ་ཡང་བདེ་བར་ཤི ལ་ལས་ཚེ་གང་བོར་འབད་པ་སྣ་ཚོགས་བྱས་ཀྱང་ཐ་ན་ཉིན, , , ་གཅིག་གི་ཟས་གོས་ཕུན་སུམ་ཚོགས་པ་ཙམ་ཡང་རྙེད་པར་དཀའ་ལ་གཞན་གྱིས་ལོངས་སྤྱོད་རྒྱ་ཆེན་པོ་བྱིན་ཀྱང་འཕྲལ་དུ་ཟད་དེ་སྔར་གྱི་དེ་ག་རང་དུ་འགྱུར་བ་དང་། ལ་ལས་དེ་ཙམ་གྱིས་འབད་པ་ཆེན་པོ་མ་བྱས་ཀྱང་ནམ་དུའང་ལོངས་སྤྱོད་ཀྱིས་མི་གཏོང་བ་དང་། འགའ་ཞིག་ནི་གཟུགས་བཟང་ཞིང་འགའ་ཞིག་ནི་ཤིན་ཏུ་མི་སྡུག་པ་དང་གཞན་ཡང་དཔྲལ་བའི་དབུས་སུ་མིག་གཅིག་མ་གཏོགས་མེད་པ། སྐེ་རྔ་མོང་གི་སྐེ་ལྟར་རིང་བ། དབུགས་འབྱིན་རྔུབ་དང་། ཟས་སྐོམ་འགྲོ་བའི་བུ་ག་ཙམ་མ་གཏོགས་མིག་སྣ་སོགས་ཤུལ་ཙམ་ཡང་མེད་པ། ལུས་ལ་པགས་པ་ཡེ་མེད་པ། མགོ་ལ་རྭ་སྐྱེས་པ། ཕོ་ཁ་དྲུག་སྐྱེས་ཏེ་རྟག་ཏུ་མུ་གེའི་སྡུག་བསྔལ་བཟོད་དཀའ་བ་མྱོང་བ། ལུས་ལ་མེ་ལྕེ་རང་འབར་ཏེ་གསོན་གསོན་དུ་འཚིག་ནས་ཤི་བ་དང་། རྐང་པ་བཞི་ཅན། ལྕེ་གཉིས་ཅན། མགོ་གཉིས་ཅན། མིག་བཞི་ཅན། མགོ་ལ་རྭ་ཡལ་ག་བཞི་བ་དང་། ལག་སོར་རྣམས་རིང་ཐུང་དུ་སྐྱེས་ཏེ་སྡིག་སྲིན་ཇི་ལྟ་བ་བཞིན་དུ་གྱུར་བ་སོགས་བརྗོད་ཀྱིས་མི་ལང་པ་ཞིག་འདུག་སྟེ་མདོར་ན་འཇིག་རྟེན་གྱི་ཁམས་འདིར་བདེ་སྡུག་མི་མཉམ་པ་དབྱར་གྱི་རྩི་ཤིང་ལྟ་བུ་ཞིག་སྣང་བ་འདི་དག་རྒྱུ་མེད་རྐྱེན་མེད་དུ་བྱུང་བ་མི་སྲིད་ལ། བྱེད་པ་པོ་གཞན་ཞིག་གིས་ཆེད་དུ་བཀོད་སྒྲིག་བྱས་པ་ཡང་མི་འགྲུབ། དེས་ན་བདག་ཅག་གི་སྟོན་པས་གསུངས་པ་བཞིན་རང་རང་གིས་ལས་བསགས་པའི་འབྲས་བུ་ཡིན་པར་བདེ་བླག་ཏུ་གྲུབ་པ་ཡིན་ཏེ། ཇི་ལྟར་ན། ལས་རེ་རེ་ལའང་འབྲས་བུ་བཞི་བཞི་སྟེ། རྣམ་སྨིན་གྱི་དང་། རྒྱུ་མཐུན་གྱི་དང་། བྱེད་པའི་དང་། དབང་གི་འབྲས་བུའོ། །རྣམ་སྨིན་གྱི་འབྲས་བུ་ནི་དགེ་བས་བདེ་བ་དང་། མི་དགེ་བས་སྡུག་བསྔལ་བསྐྱེད་པ་དེ་ཡིན། རྒྱུ་མཐུན་གྱི་འབྲས་བུ་ནི་ཚེ་རབས་སྔ་མ་རྣམས་སུ་དགེ་བ་སོགས་བྱེད་པ་ཞིག་ཡིན་ན་ཚེ་འདིར་ཡང་བག་ཆགས་གོམས་པས་དེ་ཉིད་བྱེད་པ་སྟེ། ལས་བརྒྱ་བ་ལས། དེས་མི་དགེ་བ་ཀུན་ཏུ་གོམས་ཤིང་འདྲིས་པར་བྱས་པས། ཕྱི་ཡང་མི་དགེ་བ་ལ་བརྟེན། མི་དགེ་བ་ལ་སྤྱོད། མི་དགེ་བའི་རྗེས་སུ་འཇུག་པ་ཉིད་དུ་སྐྱེ་སྟེ། ཞེས་གསུངས་པ་ཉིད་དོ། ལས་ཀྱི་འབྲས་བུ་འདི་དག་ནི་མངོན་སུམ་དུ་བལྟར་ཡོད་པ་ཞིག་སྟེ། གོང་དུ་བཤད་པ་བཞིན་ཤན་པས་ལག་པ་ཡ་གཅིག་གིས་སངས་རྒྱས་ལ་ཐལ་མོ་སྦྱར་ཞིང་དད་བཞིན་དུ་ཤི་བས་དེའི་རྣམ་སྨིན་ཕག་ཏུ་སྐྱེས་ཀྱང་ལག་པ་ཡ་གཅིག་མིའི་ལག་པར་གྱུར་བ་དང། སྲོག་གི་འཇིགས་པ་ལས་ཐར་བར་གྱུར་བ་དང་། ཆིན་རྒྱལ་རབས་ཀྱི་སྐབས་སུ་ཟི་ཁྲོན་ཁྲིན་ཏུའུ་གྲོངས་ཁྱེར་གྱི་ཉེ་འགྲམ་པའོ་ཀྭང་སི་སྟེ་ནོར་འོད་གླིང་གི་གྲྭ་བ་ཞིག་གི་དྲུང་དུ་སྦྱིན་བདག་ཅིག་གིས་གསེར་དངུལ་བུམ་པ་གང་ཕུལ་ཏེ། འདི་གཉུག་མར་གནས་པའི་དགེ་འདུན་པ་དག་ལ་འཚོ་བ་ཡིན་ཟེར། གྲྭ་བས་མལ་ཁྲིའི་འགྲམ་ལ་འཇོག་ཏུ་བཅུག རང་ཉིད་གཞན་དུ་སོང་ནས་མཚན་མོར་སླར་ལོག་སྟེ་ཉལ་ཚེ་མལ་ཁྲི་འོག་གི་པང་ལེབ་ཆག་སྟེ་བུམ་པ་པང་ལེབ་འོག་ཏུ་ལྷུང་། གྲྭ་བས་དེར་གསེར་དངུལ་ཡོད་པར་བརྗེད་པར་གྱུར། པང་ལེབ་སླར་འཆོས་པའི་ཚེ་ནའམ་མ་མཐོང་བས་གཉུག་མར་གནས་པ་རྣམས་ཀྱི་ལོངས་སྤྱོད་ལ་གནོད་པར་གྱུར། གྲྭ་བ་དེ་ཉིད་ཤི་རྗེས་ལོ་འགའ་ཞིག་ནས་ཉིན་གཅིག་མ་ཧེ་ཞིག་དགོན་པར་འོངས་ཏེ་ཤར་རེ་སྔོན་གྱི་གྲྭ་པའི་ཁང་པའི་ནང་དུ་ཕྱིན་ནས་ངུ་ཞིང་པང་ལེབ་སྟེང་དུ་ལག་རྡེབ་བྱས། པང་ལེབ་རྭ་བརྡེགས་ཏེ་བཅག་པས་འོག་ནས་གསེར་དངུལ་གྱི་བུམ་པ་དེ་ཡོད་པར་མཐོང་། ཐམས་ཅད་ཡ་མཚན་ཏེ་ཞིབ་ཏུ་བལྟས་པས་མ་ཧེ་དེའི་རྭའི་ངོས་ན་སྔོན་གྱི་གྲྭ་བ་དེའི་མིང་གསལ་བར་དོད་ཡོད། ཀུན་སྐྲག་ཅིང་སྙིང་རྗེ་སྟེ་མ་ཧེ་ཉོས་ཏེ་དགོན་པར་བཞག ཕྱིས་ཤི་ཚེ་རྭ་དེ་བླངས་ནས་ཚགས་བྱས་ཏེ་ལོ་རེ་བཞིན་དགོན་པའི་རྒྱུ་རྫས་རྩིས་སྤྲོད་བྱེད་ཚེ་ཐམས་ཅད་ལ་རྭ་དེ་བསྟན་ནས་དགེ་འདུན་གྱི་ནོར་རྫས་ལ་བག་ཡོད་བྱ་དགོས་པའི་བསླབ་བྱ་བྱེད་དོ། །རྭ་འདི་རིག་གནས་གསར་རྗེའི་སྐབས་བརླགས་ཀྱང་འདི་དངོས་སུ་མཐོང་མྱོང་མཁན་གྱི་གྲྭ་རྒན་དང་སྦྱིན་བདག་མང་པོ་ད་དུང་ཡོད་འདུག་གོ །དེ་བཞིན་དུ་ངོར་མཁན་ཆེན་དཔལ་ལྡན་ཆོས་སྐྱོང་སྡེ་དགེ་ན་བཞུགས་སྐབས། ཉིན་གཅིག་དེ་རིང་དངུལ་མདའི་ཆུ་ནང་འདིར་ཅི་བྱུང་ཡང་གཏོང་མི་ཉན་ཞེས་གྲྭ་བ་མང་པོར་སྒུག་ཏུ་བཅུག ཕྱི་དྲོ་ཙ་ན་ཤིང་སྡོང་ཆེན་པོ་ཞིག་ཆུས་འཁྱེར་བྱུང་བ་དེ་བླངས་ནས་དེ་ལས་གཞན་གང་ཡང་མ་བྱུང་ཞུས་པས། དེ་ཡིན་། སྡོང་དུམ་དེ་གཤོགས་དང་གསུངས། སྡོང་དུམ་གཤགས་པའི་ནང་ན་སྦལ་བ་ཆེན་པོ་ཞིག་ལ་སྲོག་ཆགས་མང་པོས་ཟ་བཞིན་འདུག་པ་དེ་ལ་ཁྲུས་ཆོག་སོགས་མཛད། དེ་སྡེ་དགེའི་གཉེར་བ་པོ་རྒྱས་བྱ་བ་ཞིག་གི་སྐྱེ་བ་ཡིན་གསུངས་སོ། དེ་དག་ནི་རྣམ་སྨིན་གྱི་འབྲས་བུ་ཡིན། དེ་བཞིན་དུ་རྒྱུ་མཐུན་གྱི་འབྲས་བུ་ཡང་། ཀྲུང་གོའི་ཁྲོའུ་ཀུག་གྲོང་རྡལ་ན་༡༩༤༠ལོར་སྐྱེས་པའི་བགྲེས་མོ་རུས་མིང་པང་ཟེར་བ་ཞིག་ཡོད། འདིས་སྐྱེ་བ་སྔ་མར་ས་འོག་ཏུ་སྦས་པའི་དངུལ་སྒོར་མང་པོ་མོས་བཤད་པ་བཞིན་སྔོན་གྱི་གནས་ཁང་གི་འོག་ནས་རྙེད་པ་སོགས་ཚེ་རབས་དྲན་པའི་བདེན་དཔུང་སྟོབས་ལྡན་ཡོད་པ་ཞིག་རེད། འདི་སྐྱེ་བ་སྔ་མར་ཐ་མ་ཁ་འཐེན་རྒྱུར་ཤིན་ཏུ་སྲེད་པ་ཆེ་བས་ཚེ་འདིར་ལོ་གསུམ་ཙམ་ནས་མི་ཆེན་པོ་དག་ཇི་ལྟ་བ་བཞིན་དུ་ཐ་མ་ཁ་འཐེན་པར་བྱེད་དོ།  །དེ་ལྟར་ལས་བརྒྱ་བ་ལས་གསུངས་པ་བཞིན་འདིས་སྐྱེ་བ་སྔ་མ་མི་དགེ་བ་ཐ་མ་ཁ་འཐེན་རྒྱུར་འདྲིས་ཤིང་གོམས་པས་ད་ལྟའང་མི་དགེ་བ་ཐ་མ་ཁ་འཐེན་རྒྱུར་བརྟེན།  དེ་ལ་སྤྱོད། དེ་རྗེས་སུ་འཇུག་པ་ཉིད་དུ་སྐྱེ་བ་ནི་མངོན་སུམ་མོ།  དགེ་བ་དང་མི་དགེ་བའི་ལས་ཀྱི་རྣམ་གྲངས་བསྟན་པའི་མདོ་ལས། སྐྱེ་བ་སྔ་མར་རོལ་མོ་མཁན་བྱེད་པ་དག་ནི་སྐྱེ་བ་ཕྱི་མར་གླུ་གར་ལ་དགའ་བ་ཉིད་དུ་སྐྱེ་བར་གསུངས་པ་དེ་ཉིད་དངོས་གནས་དེ་ལྟར་དུ་བྱུང་འདུག་སྟེ་སྐད་གྲགས་ཅན་གྱི་གླུ་གར་པ་ཕུས་ལུས་ཧྲི་ལུས་ཤི་ནས་སླར་སྐྱེ་བའི་ཚེ་ལུས་ཀྱི་སྟེང་དུ་སྔ་མའི་མགོ་བརྙན་ཇི་ལྟ་བ་བཞིན་ཤ་གཏིང་ན་དོད་པ་སོགས་སྔ་མའི་ཡང་སྲིད་ཡིན་པའི་རྟགས་མཚན་ངོ་མཚར་ཅན་དང་ལྡན་པ་དེས་ཟླ་ངོ་དྲུག་ཙམ་ལོན་པ་ནས་གླུ་མང་པོ་ལེན་པའི་ཕྱིར་རོ། །སྔོན་གནས་དྲན་མཁན་འདི་དག་གི་འགྲོ་སྟངས། གཏམ་བཤད་སྟངས་སོགས་གཤིས་ཀ་ཐམས་ཅད་སྔ་མ་དག་དང་འདྲ་ཞིང་། ཐ་ན་ཚེ་སྔ་མར་མི་བཟའ་རྒྱུའི་ཟས་དག་ཚེ་འདིར་ཡང་བཟའ་མི་འདོད་པར་འདུག་པས་སྔ་མར་དགེ་མི་དགེ་གང་བྱེད་རྣམས་ཕྱི་མར་ཡང་བྱེད་རྒྱུ་ཡིན་པ་ནི་གདོན་མི་ཟ་བས་བྱེད་པ་རྒྱུ་མཐུན་གྱི་འབྲས་བུ་འདི་ནི་མངོན་སུམ་དུ་གྲུབ་པ་ཞིག་གོ །དེར་མ་ཟད་ལས་འགའ་ཞིག་གི་འབྲས་བུ་འཕྲལ་དུ་སྨིན་པའང་ཡོད་དེ། ཉེ་ཆར་ཙ་དབྱིར་རྒྱལ་ཁབ་ཏུ་རྔོན་པ་ཞིག་ལུས་མ་བརྗེས་པར་གཅན་གཟན་དུ་གྱུར་འདུག་སྟེ། ལོ་ཕུས་ཁུ་ལིའུ་ཁུ་ཞེས་པའི་རྔོན་པ་འདིའི་ལུས་ཡོངས་ལ་རི་མོ་སེར་པོ་ཐིག་ནག་པོས་ཁྱབ་ཅིང་། སོ་རྣམས་གཅན་གཟན་གྱི་མཆེ་བ་ལྟར་རིང་བོར་གྱུར། གདོང་དབྱིབས་གཟིག་དང་འདྲ་ཞིང་གདུག་པའི་ང་རོ་སྒྲོག  ཤ་རློན་ཟ་ཞིང་ཤིན་ཏུ་གཏུམ་པའི་མིའི་གཟིག་ཅིག་ཏུ་གྱུར་ཏོ།  །འདི་འདྲ་བ་སྔོན་དང་ད་ལྟར་བྱུང་བ་མང་པོ་སྣང་ངོ།  །ཡང་༡༩༩༠ལོའི་ཟླ་༡༠ཚེས་༢ཉིན་ཀྲུང་གོའི་ཀྭོང་ཀྲུའུ་སྤྲིན་དཀར་གནམ་གྲུ་ལ་ཉེས་སྐྱོན་བྱུང་སྟེ་མི་བརྒྱ་ཅིག་ཤི་རྨས་བྱུང་བའི་ནང་དུ་ནང་པའི་དགེ་བསྙེན་གསུམ་ཞིག་འདུག  ཁོང་རྣམས་ཀྱི་གནམ་གྲུའི་འཛིན་ཤོག་དེ་ཉོས་པ་ནས་བཟུང་རྒྱུ་མཚན་མེད་པར་སེམས་མི་བདེ་བ་ཞིག་བྱུང་བས་ལྷོ་གྲུ་འཛིན་དགོན་དུ་ཕྱིན་ནས་སྤྱན་རས་གཟིགས་ལ་གསོལ་བ་དྲག་ཏུ་བཏབ་པས་འཕྲལ་དུ་སེམས་མི་བདེ་བ་དེ་ཞི་བར་གྱུར།  ཟླ་༡༠ཚེས༢་ཉིན་གནམ་གྲུ་བར་སྣང་དུ་འཕུར་བཞིན་པའི་སྐབས་སུ་ཉེས་རྐྱེན་དང་འཕྲད་པར་དྲིལ་བསྒྲགས་པའི་ཚེ་ཁོང་གསུམ་པོས་སྤྱན་རས་གཟིགས་དང་འོད་དཔག་མེད་ལ་གསོལ་བ་རྩེ་གཅིག་ཏུ་བཏབ།  རེ་ཞིག་ནས་གནམ་གྲུའི་སྣུམ་ཟད་དེ་ཀྭོང་ཀྲུའི་སྤྲིན་དཀར་་གནམ་གྲུ་ཐང་དུ་མྱུར་འབབ་བྱས་པས་གནམ་གྲུ་གཞན་དང་འཕྲད་པ་དེ་དགེ་བསྙེན་གསུམ་པོའི་སྡོད་གནས་ཀྱི་རྒྱབ་ཕྱོགས་འདོམ་གང་ཙམ་གྱི་མཚམས་ནས་དུམ་བུ་གཉིས་སུ་གྱུར་པ་དེ་གནམ་གྲུའི་ཁོག་པའི་ཁ་ཕྱེས་ཚེ་ཁོང་རྣམས་འཕྲལ་དུ་ཕྱི་རོལ་དུ་བྲོས། དེ་མ་ཐག་མགོ་རྔ་གཉིས་པོ་འབར་གས་སུ་གྱུར་ཏེ་མེའི་ཕུང་པོ་ཞིག་ཏུ་གྱུར། དེ་ལྟར་གནམ་གྲུ་གང་བོ་ལས་མི་བཅུ་ཕྲག་ཙམ་མ་གཏོགས་ཐམས་ཅད་ཤི་ལ། བཅུ་ཕྲག་ཙམ་དེ་ཡང་རྐང་བཅད་ལག་རྡུམ་གྱི་རྨས་སྐྱོན་ཤིན་ཏུ་ཆེན་པོ་ཐེབས་པ་འབའ་ཞིག་རེད། ཁོང་གསུམ་པོར་རྨས་སྐྱོན་ཅུང་ཟད་ཀྱང་མ་བྱུང་ངོ་། དེ་ནས་གནམ་གྲུ་ཐང་གཙང་བཤེར་བྱེད་སྐབས་དངོས་པོ་གཞན་ཐམས་ཅད་ཐལ་བ་འབའ་ཞིག་ཏུ་གྱུར་ཀྱང་དགེ་བསྙེན་རྣམས་ཀྱིས་བླུས་པའི་ཆོས་ཀྱི་དཔེ་དེབ་འགའ་ཞིག་ཡོད་པ་དེ་ཁོ་ན་སྐྱོན་ཅི་ཡང་མེད་པར་ལུས་ནས་འདུག་པས་ཐམས་ཅད་ཀྱིས་དམ་པའི་ཆོས་ཀྱི་ནུས་པ་ནི་བསམ་གྱིས་མི་ཁྱབ་པར་འདུག་ཅེས་ཧ་མི་ལས་པ་གཅིག་ཀྱང་མི་འདུག་གོ །དེས་མཚོན་ནས་དེ་འདྲ་ཆེས་མང་པོ་ཡོད་པ་རྣམས་ཀྱང་ཤེས་པར་བྱའོ། །དེས་ན་ལས་ཀྱི་འབྲས་བུ་འདི་རྣམས་དངོས་ཡོད་ཀྱི་འཚོ་བའི་ནང་ནས་མིག་མཐོང་ལག་ཟིན་དུ་བྱུང་བ་ཡིན་པས་བསྙོན་འདིང་ན་མ་གཏོགས་གཞན་ཁས་མི་ལེན་པའི་ཐབས་མི་འདུག་གོ །གལ་ཏེ་ད་དུང་ཁས་མི་ལེན་ན་ནི་བླུན་པོའི་ཨུ་ཚུགས་ཡིན་པས་ཅི་བྱ་ཡོད། འདི་རིགས་པས་ཀྱང་གྲུབ་སྟེ། ཕྱི་རོལ་གྱི་དངོས་པོ་རྣམས་ལས་སྨན་གྱིས་བདེ་བ་སྐྱེད། དུག་གིས་སྡུག་བསྔལ་སྐྱེད་པ་འདི་སུས་ཀྱང་མ་བསྒྲིགས་མོད། དངོས་པོ་རང་གི་ཆོས་ཉིད་རེད། དེ་བཞིན་དུ་གཞན་ལ་གནོད་སེམས་སོགས་རྣམ་རྟོག་ཕྱིན་ཅི་ལོག་གི་དང་། གཞན་ལ་ཕན་སེམས་སོགས་རྟོག་པ་བཟང་པོ་རྣམས་ལའང་རང་རང་གི་འབྲས་བུ་ཞིག་ཅིའི་ཕྱིར་མེད། གཞན་ཡང་སྤྱོད་པ་ངན་པ་ཟས་དུག་ཅན་ཟོས་པས་སྡུག་བསྔལ་སྐྱེད། སྤྱོད་པ་ལེགས་པོ་འཕྲོད་བསྟེན་ཚུལ་བཞིན་བྱས་པས་བདེ་བ་སྐྱེད་པ་བཞིན་དུ། བྱ་བ་ངན་པ་གཞན་གྱི་ཤིན་ཏུ་གཅེས་ཤིང་ཕངས་པའི་སྲོག་གཅོད་པ་དང་། ངལ་བ་ཆེན་པོས་བསྒྲུབས་པའི་ནོར་རྫས་དབང་མེད་དུ་འཕྲོག་པ་སོགས་དང་། བྱ་བ་བཟང་པོ་སྲོག་སྐྱོབ་པ། སྦྱིན་པས་གཞན་ཚིམ་པར་བྱེད་པ་སོགས་ལ་རང་རང་གི་འབྲས་བུ་ཅི་སྟེ་མེད་དེ་རྒྱུ་མཚན་མཚུངས་པའི་ཕྱིར་རོ། །དེ་བས་ཁྱིམ་ཚང་ཞིག་གི་ནོར་རྫས་ཇག་པས་འཕྲོག་སྟེ་དབུལ་བོར་གྱུར་བ་ལྟ་བུར་མཚོན་ན་དབུལ་བོར་གྱུར་བའི་རྒྱུ་དངོས་སུ་མཐོང་བ་ནི་དགྲས་བཅོམ་པ་དེ་ག་རེད། འོན་ཀྱང་དེ་མ་གཏོགས་མ་མཐོང་བའི་རྒྱུ་གཞན་མེད་ཅེས་སྨྲ་མི་ནུས་ཏེ། དཔེར་ན་སྒྲ་སྡུད་འཕྲུལ་ཆས་ཀྱི་སྒྲ་འབྱིན་པའི་རྒྱུ་དངོས་སུ་མཐོང་བ་ནི་འཕྲུལ་ཆས་ཀྱི་ལྷུ་ལག་དེ་ཙམ་ཞིག་རེད། འོན་ཀྱང་དེ་རང་ལས་གཞན་པའི་མ་མཐོང་བའི་རྒྱུ་མེད་ཅེས་སྨྲ་ག་ལ་ནུས་ཏེ། རང་དགར་མི་མཐོང་བའི་གློག་གི་རྦ་རླབས་ཀྱང་མེད་ཐབས་མེད་པའི་ཕྱིར་རོ། །དེ་བཞིན་དུ་གློག་སྒྲོན་གྱི་འོད་འབྱིན་པ་ལའང་དངོས་སུ་མཐོང་བའི་སྒྲིག་ཆས་འདི་དག་ཀྱང་དེའི་རྒྱུ་ཡིན་མོད། གཙོ་བོ་ནི་མིག་སོགས་ཀྱིས་མི་མཐོང་བའི་གློག་ཤུགས་ཉིད་ཡིན་པ་ལྟ་བུའོ། །དེས་ན་འཇིག་རྟེན་གྱི་བདེ་སྡུག་སོགས་ལ་མིག་གིས་མཐོང་རྒྱུ་ཡོད་པ་དང་། ལག་པས་རེག་རྒྱུ་ཡོད་པ་འདི་དག་ལས་གཞན་པའི་རྒྱུ་མེད་ཟེར་བ་ནི་གནའ་རབས་དང་དེང་རབས་ཀྱི་རིགས་པ་གཉིས་ཀ་དང་མི་མཐུན་པ་ཞིག་གོ །འགའ་ཞིག་གིས་དགེ་བ་བསྒྲུབས་ཀྱང་མི་འདོད་པ་བྱུང་བས་ལས་འབྲས་ལ་ཡིད་གཉིས་བྱེད་ཀྱང་། མི་འདོད་པ་འབྱུང་བ་འདི་སྔོན་གྱི་ལས་འབྲས་ཡིན་ལ། ད་ལྟ་དགེ་བ་བསྒྲུབས་པ་ལ་འབྲས་བུ་མེད་པ་མིན་ཡང་དེ་མ་ཐག་ཏུ་སྨིན་པའི་ངེས་པ་མེད་དེ། ལས་ལ་སྐྱེ་བ་ཕྱི་མ་ཉིད་ལ་མྱོང་རྒྱུ་དང་། ཕྱི་མ་རྣམས་ལས་གང་རུང་ཞིག་ཏུ་མྱོང་འགྱུར་སོགས་ཡོད་པའི་ཕྱིར་རོ། ལར་ལས་རྒྱུ་འབྲས་མེད་ཟེར་བ་འདི་ལ་རྒྱུ་མཚན་དང་དགོས་པ་རྩ་བ་ནས་མི་འདུག ང་ཚོ་མིའི་རིགས་ཐམས་ཅད་སྡུག་བསྔལ་མི་འདོད་ཅིང་བདེ་བ་འདོད་པ་ལ་འདྲ་མཉམ་རེད། དེའི་ཕྱིར་འཕྲལ་ཡུན་གྱི་བསྡུག་བསྔལ་ཞི་བ་དང་། བདེ་བ་སྐྱེད་པའི་ཐབས་ཤིག་ཡིན་ཕྱིན་རྒྱུ་མཚན་ཡོད་ན་ལྟ་ཞོག གལ་ཏེ་མེད་ཀྱང་རེ་ཞིག་དགོས་པའི་དབང་གིས་ཀྱང་ཁས་བླང་འོས་ན། རྒྱུ་མཚན་དང་བཅས་པའི་མིའི་རིགས་ཀྱི་བསམ་བློའི་དཔལ་ཡོན་གོང་འཕེལ་དུ་འགྲོ་བའི་ཐབས་ཐུན་མོང་མ་ཡིན་པ་འདི་དག་ལ་རྒྱུ་མཚན་རྣམ་དག་ཅི་ཡང་སྨྲ་རྒྱུ་མེད་བཞིན་གྱ་ཚོམ་དུ་དགག་པ་ཅིའི་ཕྱིར་བྱེད། ད་ལྟ་འཛམ་གླིང་ཞི་འཇམ་དང་། སྐྱེ་དངོས་དོ་མཉམ་བྱེད་དགོས་ཞེས་ཁ་ནས་ཀུན་གྱིས་ཤོད་ཀྱིན་འདུག་ཀྱང་དོན་དུ་ཇི་བཞིན་ཞིག་གཏན་ནས་བྱེད་ཐུབ་པ་མི་འདུག དེའི་རྒྱུ་མཚན་གྱི་གཙོ་བོ་ནི་ཚེ་སྔ་ཕྱི་དང་ཁྱད་པར་ལས་དང་ལས་ཀྱི་རྣམ་པར་སྨིན་པ་ལ་ཡིད་ཆེས་དང་བརྩི་འཇོག་མེད་པ་འདི་ཁོ་ན་ལ་ཐུག་སྟེ། རང་འཚོ་འདོད་ཀྱིས་གཞན་གསོད་འདོད་པ་དང་དེའི་ཕྱིར་དུ་འཛམ་གླིང་རྩ་མེད་དུ་གཏོང་བའི་མཚོན་དང་རྫས་སྦྱོར་ངན་པ་སྣ་ཚོགས་འབད་པ་ཆེ་ཐང་གིས་བསྒྲུབས། རང་ལོངས་སྤྱོད་མངའ་ཐང་དང་ལྡན་འདོད་ཀྱིས་གཞན་གཞོམ་འདོད་སོགས་བློ་ངན་སྣ་ཚོགས་བྱུང་སྟེ་འཛམ་གླིང་དམག་ཆེན་གཉིས་པའི་སྐབས་སུ་ཡེའུ་ཐེའུ་མི་རིགས་རྐྱང་བར་ཡང་མི་འབུམ་ཐེར་དྲུག་ཅུ་ཐམ་པ་སྲོག་དང་ཕྲལ་བ་དང་། མི་རེ་རེས་ཀྱང་མི་ཉམ་ཆུང་ཁྲི་ཚོ་སུམ་ཅུ་ལྷག་བསད་པ་སོགས་ཡ་ང་ཞིང་ཡི་མུག་པའི་སྤྱོད་པ་མ་རུང་བ་དེ་དག་ཐམས་ཅད་ཀྱང་གཙོ་བོ་ལས་འབྲས་ལ་ཡིད་མི་ཆེས་པ་རང་ལ་ཐུག གལ་ཏེ་ལས་འབྲས་ལ་སྙིང་ཐག་པ་ནས་ཡིད་ཆེས་པ་ཞིག་ཡོད་ན་རང་གི་ངང་གིས་ཡ་རབས་ཚུལ་ལྡན་གྱི་སྤྱོད་པ་ལ་གནས་པར་འགྱུར་བས་འཛམ་གླིང་ཞི་བདེ་འོང་བ་ལའང་དེ་ལས་ལྷག་པ་མེད། གཞན་སྐྱེ་དངོས་དོ་མཉམ་དགོས་ཚུལ་སོགས་ཀྱི་སློབ་གསོ་གང་ཞིག་བཏང་ཡང་རུང་སྟེ་ལས་རྒྱུ་འབྲས་ལ་ཡིད་ཆེས་པ་ལྟ་བུའི་ནུས་པ་ཞིག་གཏན་ནས་ཐོན་ཐབས་མེད་དོ། དེའི་ཕྱིར་འཛམ་གླིང་སྟེང་ན་ཆོས་ལུགས་མི་འདྲ་བ་དུ་མ་ཞིག་ཡོད་པ་རྣམས་ཀྱང་སྐྱེ་བ་སྔ་ཕྱི་ཁས་བླངས་ཏེ་ལས་འབྲས་ལ་ཡིད་ཆེས་བྱེད་པར་ཕལ་མོ་ཆེ་ཞིག་མཐུན་པས་ང་ཚོ་འཛམ་གླིང་གི་མིའི་ལྔ་ཆ་གསུམ་ཟིན་པའི་རྒྱ་ཆེའི་ཆོས་དད་མང་ཚོགས་སྐྱེ་བོ་དུང་ཕྱུར་ཉེར་ལྔ་བརྒལ་བ་ཙམ་ཡོད་པ་ཀུན་གྱིས་རྡོག་རྩ་གཅིག་སྒྲིལ་གྱིས་ཚེ་སྔ་ཕྱི་དང་ལས་རྒྱུ་འབྲས་ཀྱི་རྨང་གཞི་འདིའི་སྟེང་ནས་མིའི་རིགས་ཀྱི་མདུན་ལམ་ལ་བྱས་རྗེས་འཇོག་ཆེད་འབད་པ་ཆེ་ཐང་དུ་བྱ་རྒྱུ་ནི་ཆེས་གལ་ཆེ་བའི་ལས་སུ་བཟུང་བར་བྱ་སྟེ། གཞན་དུ་ན་ཙན་དན་ཤིན་ཏུ་བསིལ་བ་ཡང་བརྡར་དྲག་ན་རང་ལས་བྱུང་བའི་མེས་རང་བསྲེག་པ་བཞིན་དུ་དེང་རབས་ཀྱི་རིག་པ་འདི་ཤིན་ཏུ་དར་དྲག་ནས་རང་གིས་རང་བརླག་པའི་གནས་སུ་འགྱུར་ཉེན་ཡོད་པར་ཤེས་པར་བྱའོ། །
     ༄༅། །གསུམ་པ་སྟོན་པ་ཚད་མའི་སྐྱེས་བུ་ཡིན་པ་ལ་ཡིད་ཆེས་པར་བྱ་བ་ནི། དེ་ལ་ཐོག་མར་ཚད་མ་ཞེས་པ་ནི་རྣམ་འགྲེལ་ལས། །ཚད་མ་བསླུ་མེད་ཅན་ཤེས་པ། །ཞེས་པ་ལྟར་གཞལ་བྱ་འཇལ་བ་ལ་བསླུ་བ་མེད་པ་ཞིག་ལ་ཟེར། དེ་ཡང་ཇི་སྐད་དུ། མི་བསླུ་ལས་དང་བྱེད་པོ་དང་། བྱ་བ་གསུམ་གྱི་བདག་ཉིད་ཅན། །ཞེས་པ་ལྟར་མི་བསླུ་བ་ཁྱད་ཆོས་་གསུམ་དང་ལྡན་པ་ཞིག་དགོས་ཏེ། དེ་ལྟར་མིན་ན་མཐའ་གཅིག་ཏུ་མི་བསླུ་བར་མི་འགྲུབ་པའི་ཕྱིར་རོ། །ཚད་མ་དེས་བཞག་པའི་རྣམ་གཞག་རྣམས་ལ་བདེན་པ་དང་། དོན་ལ་གནས་པ་དང་། ཡང་དག་པ་དང་། བསླུ་བ་མེད་པ་ཡིན་ནོ། །ཡང་བཅོམ་ལྡན་འདས་ཀྱི་གསུང་རབ་ལས་བརྗོད་བྱ་གཏིང་ཟབ་པ་རྟོགས་པར་དཀའ་བ་ཕལ་མོ་ཆེ་ཞིག་མངོན་སུམ་གྱི་དོན་ལ་མངོན་སུམ་གྱིས་གནོད་པ་མེད་ཅིང་གྲུབ། རྗེས་དཔག་གི་དོན་ལ་རྗེས་དཔག་གིས་གནོད་པ་མེད་ཅིང་གྲུབ། ལུང་རང་ཚིག་སྔ་ཕྱི་དང་དངོས་ཤུགས་འགལ་བ་མེད་པ་ཤེས་པའི་ཚེ་ན། རྒྱུ་མཚན་དེས་བཅོམ་ལྡན་འདས་ཚད་མའི་སྐྱེས་བུ་ཐམས་ཅད་མཁྱེན་པ་ཡིན་པར་ཡང་གྲུབ་པ་ཡིན་པས་དེའི་ཚུལ་ཅུང་ཟད་བརྗོད་ན། ལར་བཅོམ་ལྡན་འདས་ཚད་མ་ཡིན་པའི་རྣམ་གཞག་འདི་ཐམས་ཅད་ལ་ཐུན་མོང་དུ་གྲགས་པའི་ཚད་མས་འཇོག་དགོས་ཀྱི་རང་ནང་བ་ཡིན་པ་དང་སངས་རྒྱས་ཤཱཀྱ་ཐུབ་པ་ནང་བའི་སྟོན་པ་ཡིན་པ་ཙམ་ལ་བརྟེན་ནས་མ་ཡིན་ཏེ། སངས་རྒྱས་ཉིད་ཀྱི་ཞལ་ནས་ཀྱང་། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས་པ་ལྟར་རོ། །གལ་ཏེ་འཁྲུལ་བ་ཞིག་ཡོད་སྲིད་ན་སངས་རྒྱས་ཀྱི་གསུང་ཡིན་ཡིན་ཡང་འཁྲུལ་བ་ནི་འཁྲུལ་བ་རང་ཡིན་པས་དེ་ལ་བརྗོད་ལེགས་པས་བརྒྱན་རྒྱུ་ཅི་ཡང་མེད། དེས་ན་ཚེ་སྔ་ཕྱི་དང་ལས་རྒྱུ་འབྲས་སོགས་མེད་པར་འདོད་པ་དག་གིས་སྨྲས་པ་དེའང་རིགས་པ་རྣམ་དག་གིས་འགྲུབ་རྒྱུ་ཞིག་ཡིན་ན་དེ་ཅིའི་ཕྱིར་ཁས་མི་ལེན་ཏེ་མ་བླངས་ན་རྒྱུ་མཚན་མེད་པའི་ཨུ་ཚུགས་ཏེ་སྨད་པའི་གནས་སོ། །ཁོ་བོ་ཅག་ཀྱང་མི་ཚེ་རྟོག་གེའི་བརྒལ་བརྟག་གིས་བསྐྱལ་བ་ཞིག་ཡིན་པས་རང་གཞན་སུའི་ལུགས་ཡིན་ཡང་རྒྱུ་མཚན་མེད་པར་སྨྲས་པ་ཙམ་གྱིས་དེ་དེ་བཞིན་དུ་ཁས་བླངས་པ་མ་ཡིན་ཏེ། ཇི་སྐད་དུ། བདག་ནི་སངས་རྒྱས་ཕྱོགས་མི་འཛིན། །སེར་སྐྱ་སོགས་ལ་མི་སྡང་ཞིང་། གང་ཞིག་རིགས་པ་ལྡན་པའི་ཚིག །དེ་ཉིད་སྟོན་པ་ཡོངས་སུ་འཛིན། །ཞེས་གསུངས་པ་བཞིན་གཟུ་བོར་གནས་ཏེ་ཕྲ་ཞིབ་ཀྱི་རིགས་པས་བརྒལ་བརྟག་ཡང་ཡང་བགྱིས་ཏེ་གསུང་རབ་རིན་པོ་ཆེར་ངེས་ཤེས་གཏིང་ནས་རྙེད་དེ་ཡིད་ཆེས་པའི་དད་པ་ཐོབ་པ་ཡིན་ཞིང་། དེའི་དོན་ཅི་རིགས་པ་ཉམས་སུ་བླངས་ཏེ་ཆོས་ཀྱི་དགའ་བ་མཆོག་ཏུ་མྱོང་ནས་འཆི་ཚེ་སྐྲག་མི་དགོས་པ་ཞིག་དང་འགྱོད་མི་དགོས་པ་ཞིག་འོང་གི་འདུག སྤྱི་ཚོགས་ཀྱི་འཚོ་བའི་ནང་དུའང་དམ་པའི་ཆོས་འདི་ཉིད་ཕྱེ་ཐུག་ལ་མར་དང་ཟས་ཀྱི་བྲོ་བ་ལ་ལན་ཚྭ་བཞིན་དུ་སྣང་བས་འགྲོ་བ་མིའི་རིགས་གཙོ་བོར་གྱུར་བའི་སྐྱེ་འགྲོ་མཐའ་དག་གི་སྤྱིའི་སྐྱབས་གནས་ཞིག་དང་། སྤྱིའི་ལོངས་སྤྱོད་མེད་དུ་རུང་བ་ཞིག་རེད་སྙམ་དུ་སྙིང་ཐག་པ་གནས་བསམས་ཏེ་འཇིག་རྟེན་གྱི་བདེ་འབྱོར་ཐམས་ཅད་ཆེད་དུ་མ་བསྒྲུབས་པར་དམ་པའི་ཆོས་ཁོ་ན་གཅེས་པར་བཟུང་བ་ཡིན་ལ། ལོ་སུམ་སྟོང་གི་རིང་ལ་མཁས་བླུན། དྲག་ཞན། དབུལ་ཕྱུག་སྣ་ཚོགས་པའི་སྐྱེ་བོ་བགྲང་གིས་མི་ལང་པ་ཞིག་གིས་ལུས་དང་སྲོག་ལས་ཀྱང་གཅེས་པར་བཟུང་བའི་རྒྱུ་མཚན་ཡང་དེ་ག་ཡིན་གྱི། གཞན་གྱིས་གསུངས་པ་ཙམ་མ་གཏོགས་གཞན་གོ་རྒྱུ་ཅི་ཡང་མེད་པ་ཞིག་ཡིན་ན་དེ་ཙམ་གྱི་ཕངས་སེམས་ཅི་ལ་བྱེད། དེང་སང་འཛམ་གླིང་ཡོངས་ལ་ཚན་རིག་ལག་རྩལ་དར་རྒྱས་སུ་ཕྱིན་ཏེ་སྔོན་མཐོང་མ་མྱོང་བའི་ལྟད་མོ་དང་། ཐོས་མ་མྱོང་རིག་པ་མང་པོ་སྟོན་གྱིན་འདུག དེ་དག་མཐོང་བ་དང་ཐོས་པའི་ཚེ་སྟོན་པའི་གསུང་རབ་ལ་ཡིད་ཆད་པ་དང་ཐེ་ཚོམ་ཟ་བ་ལྟ་ཅི་གསུང་རབ་རིན་པོ་ཆེ་འདི་གང་དང་ཡང་མི་མཉམ་པའི་ཕུལ་དུ་བྱུང་བ་ཞིག་ཡིན་པ་ལ་ངེས་པ་ལྷག་པར་སྐྱེ་འོང་པར་འདུག གཞན་གྱི་རིག་པ་གསར་བ་འདི་དག་ལ་བརྟེན་ནས་དམ་པའི་ཆོས་ལ་དགག་པ་བརྗོད་པ་མཐོང་བའི་ཚེ་ནའང་དངོས་གནས་གད་མོ་འཆོར་གྱིན་འདུག་གོ །དེ་དག་གི་རང་བཞིན་བརྗོད་པ་འཕྲོས་གཏམ་དུ་བགྱིས་པའོ། །སྐབས་དོན་སྟོན་པ་ཚད་མ་ངེས་ཚུལ་ལ། གསུང་རབ་ཀྱི་དོན་ཉམས་སུ་བླངས་ཏེ་རྟོགས་པ་ཁྱད་པར་ཅན་སྐྱེས་པ་དག་གིས་ནི་སྟོན་པའི་གསུང་བཞིན་རང་གི་ཉམས་མྱོང་གིས་གྲུབ་ཟིན་པས་གཞན་གྱིས་ཅི་བརྗོད་ཀྱང་རུང་བ་སྤུའི་རྩེ་ཙམ་ཡང་གཡོ་མི་ནུས་པས་མི་ལྡོག་པའི་དད་པ་ཞེས་བྱ་སྟེ། དཔེར་ན་ཁ་ནང་གི་བུར་རོ་མངར་བ་ཡིན་པ་རང་གིས་མྱོང་བའི་ཚེ་གཞན་གྱིས་ཁ་བ་ཡིན་པ་དང་། མངར་བ་མིན་པ་ཅི་བརྗོད་ཀྱང་རུང་སྟེ་ཐེ་ཚོམ་ཙམ་ཡང་སྐྱེད་མི་ནུས་པ་བཞིན་ནོ། དེ་ཙམ་མིན་ཡང་ཐོས་བསམ་གྱིས་མཐའ་རྒྱ་བཅད་པ་རྣམས་ཀྱིས་ཀྱང་རིགས་པ་རྣམ་པ་བཞི་ལ་བརྟེན་ནས་ཟབ་པ་དང་རྒྱ་ཆེ་བའི་དོན་ལ་ངེས་པ་རྔམ་པོ་ཆེ་དྲངས་ཏེ་གཞན་གྱིས་དེ་ལ་སྐྱོན་གང་བརྗོད་ཐམས་ཅད་མ་རྟོགས་ལོག་ལོག་རྟོག་ཐེ་ཚོམ་གྱིས་བསྐྱེད་པའི་ལྟར་སྣང་འབའ་ཞིག་ཏུ་ཤེས་ནས་གྲུབ་མཐའི་རང་རྐང་ཚུགས་པ་ཡིན་པས་སུས་ཀྱང་གཞན་དུ་དྲངས་མི་ནུས་ཏེ་རྒྱུ་མཚན་ཤེས་པའི་དད་པ་ཡིན་ནོ། །དེ་འདྲའི་ངེས་ཤེས་གཉིས་པོ་བསྐྱེད་ཚུལ་ནི་འདིར་སླར་ཡང་བཤད་མི་དགོས་ཏེ་སའི་གོ་ལ་ཧྲིལ་བོ་འདིའི་སྟེང་ལ་ཆགས་པའི་མི་རིགས་གཞན་སུ་ལའང་མེད་པའི་གསུང་རབ་དགོངས་འགྲེལ་དང་བཅས་པ་འདི་སྙེད་ཅིག་བཞུགས་པ་འདིར་བལྟས་པས་ཆོག་པའི་ཕྱིར་རོ། །འོ་ན་ཅི་ཞིག་འཆད་ན། རིག་པ་གསར་བ་དང་མངོན་སུམ་གྱི་ལམ་ནས་ངེས་པ་བསྐྱེད་ཚུལ་ཅུང་ཟད་བརྗོད་དོ། །དེ་ཡང་སྟོན་པའི་གསུང་གི་སྙིང་པོ་ནི་རྟེན་ཅིང་འབྲེལ་བ་འབྱུང་བ་འདི་ཡིན་ལ། ཆེས་ཤིན་ཏུ་རྟོགས་པར་དཀའ་བའི་གནས་ཀྱང་འདི་ཉིད་ཡིན་ཏེ། སྔོན་བྱུང་མུ་སྟེགས་པའི་སྟོན་པ་རྣམས་ནས་ད་ལྟའི་ཚན་རིག་པ་ཡན་ཆད་སུས་ཀྱང་ཚུལ་བཞིན་སྨྲ་མ་ནུས་པ་སོ་སོའི་གཞུང་ལ་བལྟས་པས་ཤེས་པ་ལྟར་རོ། རྟེན་ཅིང་འབྲེལ་བ་འབྱུང་བ་ཞེས་པའི་དོན་ཡང་གནས་ཚུལ་ལ་དངོས་པོ་ཐམས་ཅད་རང་བཞིན་གྱིས་སྟོང་པ་སྤྲོས་པའི་མཐའ་ཐམས་ཅད་དང་བྲལ་བ་དང་། སྣང་ཚུལ་ལ་སྒྱུ་མ་དང་རྨི་ལམ་ལྟར་མེད་བཞིན་དུ་སྣ་ཚོགས་སུ་སྣང་ལ། དེ་ཡང་སེམས་ཀྱིས་བྱས་ཤིང་སེམས་ལ་སྣང་བ་ཙམ་མ་གཏོགས་ཕྱི་རོལ་ན་བདེན་པར་མ་གྲུབ་པ་ཉིད་ཡིན་ནོ། །དེ་ལས་དང་པོ་དངོས་པོའི་གཤིས་སྤྲོས་པ་ཐམས་ཅད་དང་བྲལ་བ་འདི་ནི་བདེ་བར་གཤེགས་པ་ཉིད་ཀྱི་གསུང་རབ་ལ་བརྟེན་ན་མིག་ལྡན་གྱི་མདུན་ན་གཟུགས་བཞིན་དུ་ཡིད་ཆེས་གཏིང་ནས་རྙེད་རྒྱུ་ཡོད་ལ། དེ་ཉིད་ཡང་དག་ཡིན་པའི་འབྲས་རྟགས་ཀྱང་དེ་ཉམས་སུ་བླངས་པས་འབྲས་བུ་ཐོབ་པ་སྔོན་ནས་ལྟའི་བར་བརྒྱུད་མར་བྱུང་བ་འདི་ཡིན་ནོ། འདི་ནི་སངས་རྒྱས་ཀྱི་གསུང་རབ་མ་གཏོགས་གཞན་གྱིས་གཏན་ལ་འབེབས་མི་ནུས་ལ། སངས་རྒྱས་ཐམས་ཅད་མཁྱེན་པ་ཡིན་པའི་སྒྲུབ་བྱེད་ཀྱི་གཙོ་བོ་ཡང་འདི་ཉིད་ཡིན་མོད། འོན་ཀྱང་འདི་ཚན་རིག་སོགས་ཀྱི་སྤྱོད་ཡུལ་དུ་གཏན་ནས་མ་གྱུར་པས་དེས་བསྒྲུབ་མི་ནུས་ཀྱང་དེང་དུས་ཀྱི་མི་འགའ་རེས་ཚན་རིག་ལ་རྩིས་ཆེན་བྱེད་པས་དེས་གྲུབ་པའི་ཆོས་འགའ་ཞིག་བརྗོད་ན། རེ་ཞིག་སྟོན་པས་དངོས་པོ་གཟུགས་ཅན་རགས་པ་རྣམས་མ་གྲུབ་ཅིང་རྡུལ་ཕྲ་རབ་ཏུ་གནས་ལ། དེ་ཡང་རྡུལ་རྣམས་བར་མཚམས་མེད་པའི་གོང་བུ་གཅིག་པ་ཞིག་མིན་ཡང་ཆུ་རྡུལ་གྱིས་ཕན་ཚུན་བསྡུས་ཏེ་མི་འཐོར་བར་གནས་པ་ཡིན་ཞེས་གསུངས་པ་དེ་ཉིད་མངོན་སུམ་གྱིས་གྲུབ་པ་ཞིག་སྟེ། །སྤྱི་ལོ་༡༨༠༨ལོར་ཚན་རིག་པ་ཡེ་ཏྭན་ཏོ་ཨུར་ཏུན་ཞེས་པས་ཐོག་མར་རྡུལ་ཕྲན་གྱི་རྣམ་གཞག་བྱས་ཏེ་དངོས་པོ་རྣམས་རྡུལ་ཕྲན་དུ་གནས་ཤིང་། རྡུལ་ཕྲན་རྣམས་དེ་ལས་ཆ་ཤས་དབྱེར་མེད་ཅིང་མི་འཇིག་པ་ཞིག་རེད་ཅེས་ཟེར།  འོན་ཀྱང་༡༩༡༣ལོར་ཏེན་མག་རྒྱལ་ཁབ་ཀྱི་ཚན་རིག་པ་པོ་ཨེར་གྱིས་རྡུལ་ཕྲན་རེ་རེའང་གློག་རྡུལ་དང་གློག་རྡུལ་སྙིང་པོ་གཉིས་སུ་དབྱེ་ཡོད་ལ། དེ་གཉིས་ཀྱི་བར་ན་བར་མཚམས་སྟོང་པ་ཡིན་ཅིང། གློག་རྡུལ་མཐའ་སྐོར་དུ་ཁབ་ལེན་གྱི་འཐེན་ཤུགས་ར་བ་སྟེ་སྡུད་པའི་ནུས་པ་ཡོད་པར་མཐོང་ངོ་། ཡང་དུས་རབས་འདིའི་ལོ་རབས་སུམ་ཅུ་བའི་ནང་དུ་ཚན་རིག་པ་དག་གིས་གཟུགས་ཅན་གྱི་དངོས་པོ་ཐམས་ཅད་ནི་རྡུལ་ཕྲན་ལས་གྲུབ་ཅིང་། རྡུལ་ཕྲན་ནི་རྒྱུ་རྡུལ་དང་། བར་རྡུལ། གློག་རྡུལ་ལས་གྲུབ་ལ་འདི་དག་ནི་དངོས་པོའི་རྩོམ་གཞི་དེ་ལས་ཆ་གཞན་དབྱེར་མེད་པའི་ཆུང་མཐའ་རེད་ཅེས་ཟེར་རོ། །འདི་དག་གིས་ནི་གོང་དུ་བཤད་པའི་སངས་རྒྱས་ཀྱི་གསུང་དེ་དག་དང་མིང་མི་འདྲ་བ་ཙམ་མ་གཏོགས་དོན་གཅིག་པ་ཡིན་ནོ། །ཡང་བདེ་བར་གཤེགས་པས་དེ་ལས་ཀྱང་གདུལ་བྱ་དབང་པོ་ཅུང་ཟད་རྣོ་བ་རྣམས་ཀྱི་དབང་དུ་བྱས་ཏེ་དབུ་སེམས་ཀྱི་མདོ་རྣམས་ལས་རྡུལ་ཕྲ་རབ་དེ་ཡང་དཔྱད་ན་ཆུ་ཤིང་གི་སྙིང་པོ་བཞིན་ཕར་ཕར་གཞི་མེད་དུ་གྱུར་ཏེ་མ་གྲུབ་པར་གསུངས་པའི་དོན་ནི། ༡༩༠༥ལོར་ཚན་རིག་པ་ཆེན་པོ་ཨེ་དབྱིན་སི་ཏན་གྱིས་རྡུལ་ཕྲན་དེ་དག་ཀྱང་མཐར་ཐུག་ནུས་ཤུགས་ཆེན་པོ་ཞིག་ཏུ་གྱུར་ནས་གཞི་མེད་དུ་འགྲོ་བ་ཤེས་ནས་དངོས་པོ་དང་ནུས་ཤུགས་ལྟོས་བཅས་ཀྱི་རིག་པའི་སྲོལ་བཏོད་ཅིང་རྡུལ་ཕྲན་འབར་མདེལ་བཟོས་པ་དང་། ཉེ་དུས་ཀྱི་དངོས་ཁམས་རིག་པ་བ་དག་གིས་རྒྱུ་རྡུལ་དང་བར་རྡུལ་་གཉིས་ལའང་ད་དུང་རྙོག་དྲ་ཆེ་བའི་ཆ་ཤས་ཕྱེ་རྒྱུ་འདུག་ལ་འཇིག་རྟེན་འདིའི་ནང་ན་རྩ་བའི་གཞི་རྡུལ་ལམ་རྩོམ་གཞི་ཞེས་བྱ་བ་བདེན་པ་འགྱུར་མེད་ཅིག་མི་འདུག་ཟེར་རོ། །དེ་ལྟ་ན་རགས་པ་ཐམས་ཅད་མ་གྲུབ་སྟེ་རྡུལ་ཕྲན་ཙམ་དུ་གནས། རྡུལ་ཕྲན་དེ་ཡང་མ་གྲུབ་སྟེ་རྒྱུ་རྡུལ་དང་བར་རྡུལ་སོགས་སུ་གནས། དེ་དག་ཀྱང་མ་གྲུབ་སྟེ་ད་དུང་དེ་ལས་ཕྲ་བ་གཞན་ཞིག་ཏུ་གནས་ལ། གཞན་དེ་དག་ཀྱང་ལྟོས་བཅས་འགྱུར་བའི་རང་བཞིན་ཅན་ཞིག་ལས་ཚུགས་ཐུབ་ཀྱི་བདེན་གྲུབ་ཅིག་མེད་པར་མཐོང་བ་འདིས་གོང་གི་སྟོན་པའི་གསུང་དེ་འཕྲུལ་ཆས་སྤྱད་དེ་མངོན་སུམ་དུ་མཐོང་བ་ཡིན་ནོ།  །དངོས་ཁམས་རིག་པ་བ་ཁོང་རྣམས་ཀྱིས་ཀྱང་འདི་སངས་རྒྱས་ཀྱི་གསུང་དང་ཤིན་ཏུ་མཐུན་པས་སངས་རྒྱས་ཀྱིས་འཕྲུལ་སོགས་གང་ལའང་མ་བརྟེན་པར་འདི་འདྲ་བ་ཞིག་མཁྱེན་པ་ལ་ཟེར་ཏེ་ཧ་ལས་ཀྱིན་འདུག་གོ །ཡང་སྟོན་པ་ཐམས་ཅད་མཁྱེན་པ་ཉིད་ཀྱི་ཞལ་སྔ་ནས་ཀྱིས། མདོ་སྡེ་ས་བཅུ་པ་སོགས་ལས་ཕྱི་རོལ་གྱི་དངོས་པོ་རྣམ་པ་སྣ་ཚོགས་པ་འདི་སེམས་ཀྱིས་བྱས་པ་ཡིན་པས་སེམས་འདི་ཉིད་སྣོད་བཅུད་ཀྱི་བྱེད་པ་པོ་ཡིན་པར་གསུངས་ཤིང་། དཀོན་མཆོག་བརྩེགས་པ་ལས་ཀྱང་དངོས་པོ་ཐམས་ཅད་ཀྱི་རྩ་བ་སེམས་ཡིན་པས་ཕྱི་རོལ་གྱི་དངོས་པོ་རྣམས་ལ་དགག་སྒྲུབ་བྱེད་པ་ལས་ནང་སེམས་ལ་དགག་སྒྲུབ་བྱ་དགོས་ཚུལ་གསུངས་པ་སོགས་ཐེག་ཆེན་གྱི་མདོ་རྣམས་ལས་རྒྱས་པར་གསུངས་པ་ནི། སྔར་བྱུང་སྲོལ་རྒྱུན་གྱི་ཚན་རིག་དང་། རྗེས་ལུས་ཀྱི་ཚན་རིག་པ་སྤྱིར་བཏང་བ་རྣམས་ཀྱིས་གཏན་ནས་ཤེས་མ་ཐུབ་མོད། ཕུལ་དུ་བྱུང་བའི་ཚན་རིག་པ་མང་པོས་སའི་གོ་ལ་ཧྲིལ་བོའི་སྟེང་གི་བློ་རྣོ་བའི་ཡང་རྩེར་བསྔགས་ཤིང་འཛམ་གླིང་ན་སྙན་གྲགས་ཆེ་བའི་རབ་འབྱམས་པ་ཡེ་ཧྭན་ཅང་། ཉོས་མན་ཞེས་པ་དེ་ཉིད་ཀྱིས་མིའི་ལུས་ཀྱི་ནང་ན་བེམ་པོ་མ་ཡིན་པའི་རྣམ་ཤེས་ཀྱི་ང་ཞིག་འདུག་པ་དེས་ལུས་ཀྱི་ཀླད་ཆེན་ལ་ཚོད་འཛིན་བྱེད་ཅིང་། དེར་མ་ཟད་ཕྱི་རོལ་གྱི་དངོས་པོ་རྣམས་ལའང་རྒྱང་རིང་མོ་ནས་ཚོད་འཛིན་བྱེད་ནུས་ཞེས་ཟེར། སྙན་གྲགས་ཅན་གྱི་དངོས་ཁམས་རིག་པ་བ་ཧྥེ་ལེ་ཙུ་ལོན་ཏོན་གྱིས། ཅང་ཉོས་མན་གྱིས་ཤིན་ཏུ་ཟབ་པའི་ཚད་རྡུལ་གྱི་རིག་པ་འདིས་ནི། དངོས་པོ་རྫས་སུ་གྲུབ་པ་ནི་མིའི་རིགས་ཀྱི་བསམ་པས་བཟོས་པ་ཙམ་ཞིག་སྟེ། རྫས་སུ་གྲུབ་པ་དངོས་ནི་བསམ་པ་ཉིད་ཡིན་ཞེས་བསྟན་པ་རེད་ཅེས་བཤད་དོ། །དུས་རབས་འདིའི་ནང་དུ་བྱུང་བའི་དངོས་ཁམས་རིག་པ་བ་རྣམས་ལས་ཆེས་རླབས་ཆེ་བའི་གྲས་རབ་འབྱམས་པ་ཡོས་ཅུན་ཝེ་ཀུ་ལ་ཞེས་པ་༡༩༦༣ལོར་དངོས་ཁམས་རིག་པ་གསར་བཏོད་ཀྱི་་ནོ་པེ་ཨེར་བྱ་དགའ་ཐོབ་མཁན་དེས་ཀྱ་ཅང་ཉོས་མན་གྱི་ཚད་རྡུལ་རིག་པ་ཁས་བླངས་ཏེ་མིའི་རིགས་ཀྱི་བསམ་པའི་ནུས་ཤུགས་ཀྱིས་བེམ་པོ་ལ་འགྱུར་ལྡོག་གཏོང་ནུས་པར་བཤད་དོ། །དེ་བཞིན་དུ་དབྱིན་ཇིའི་ལོན་ཏོན་གྱི་པེ་པས་ཁུ་སློབ་གྲྭ་ཆེན་མོའི་དངོས་ཁམས་རིག་པའི་དགེ་རྒན་རབ་འབྱམས་པ་ཏ་ཝེ་ཕོ་ཨེན་གྱིས་ཀྱང་སེམས་ཀྱི་ནུས་པས་དངོས་པོའི་རྣམ་པ་ལ་འགྱུར་བ་གཏོང་ནུས་པ་འདིར་ཡིད་ཆེས་གཏིང་ནས་བྱེད་གྱིན་འདུག་གོ །འདི་ནི་མངོན་སུམ་གྱིས་ཀྱང་གྲུབ་པ་ཞིག་སྟེ། ༡༩༣༦ལོར་ཧྥ་རན་སིའི་འགྲུལ་བཞུད་པ་བླའེ་ལོའུ་ཟེར་བ་རྒྱ་མཚོའི་ནང་དུ་གྲུ་འགྱེལ་ཏེ་ཁོ་རང་མཚོ་རླབས་ཀྱིས་གླིང་ཕྲན་ཞིག་གི་སྟེང་དུ་འཕངས། དེར་ཆུ་ཆུང་ངུ་ཞིག་གི་ནང་ན་ཉ་ཤི་བོ་ལྟ་བུ་འགའ་ཞིག་མཐོང་བ་བླངས་ནས་མེ་བུས་དེ་བཙོས། ཉ་རྣམས་ཚོས་པའི་ཚོད་དུ་སྣོད་ཀྱི་ཁ་ཕྱེ་ནས་བལྟས་པས་ཉ་རྣམས་ནི་གསོན་པོར་གྱུར་ཏེ་ལྷོག་ལྷོག་ཏུ་ཁོལ་བཞིན་པའི་ཆུ་ནང་ན་སྡུག་བསྔལ་གྱི་ཚོར་བ་ཅི་ཡང་མེད་པར་ཕར་འགྲོ་ཚུར་འོང་བྱེད་བཞིན་པ་མཐོང་སྟེ་ཁོ་རང་ལ་སྐྲག་སྣང་ཆེན་པོ་སྐྱེས་སོ། །ཕྱིས་སུ་གནའ་རྫས་རྟོག་ཞིབ་པ་རྣམས་ཀྱིས་ཞིབ་འཇུག་བྱས་ཏེ་ཉ་འདི་རྣམས་མེ་རི་འབར་གས་སུ་གྱུར་བའི་སྟོབས་ཀྱིས་ཚ་བོར་སོང་བའི་ཆུ་ནང་དུ་སྡོད་རྒྱུར་གོམས་པས་ཕྱིས་ཆུ་ཕལ་བའི་ནང་དུ་འབྱོར་ཚེ་འཁྱགས་རེངས་སུ་གྱུར་ཅིང་ཆུ་ཚ་བོར་བཙོས་པས་སླར་གསོན་པ་རེད་ཟེར། དེ་ལྟར་སེམས་ཅན་ཕལ་བ་རྣམས་ལ་ཤིན་ཏུ་ཚ་བར་སྣང་བའི་ཆུ་ཁོལ་དེ་ཉ་འདི་རྣམས་ལ་ཅུང་ཟད་ཀྱང་མི་ཚ་བ་དང་། དེའི་རྒྱུ་མཚན་གྱི་རྩ་བ་ཡང་བག་ཆགས་གོམས་པ་ལ་ཐུག་ཡོད་པ་འདིས་ནི་སྟོན་པ་སངས་རྒྱས་ཀྱིས་ཕྱིའི་དངོས་པོ་རྣམས་ནི་རང་གི་ངོ་བོས་གྲུབ་པ་མ་ཡིན་གྱི་ནང་སེམས་ཀྱི་བག་ཆགས་གོམས་ཚུལ་གྱིས་སྣ་ཚོགས་སུ་བྱུང་བ་ཡིན་པར་ཡང་ཡང་གསུངས་པ་དེ་ཆེས་ཤིན་ཏུ་གསལ་བར་བྱས་པ་ཡིན་ནོ། །དེང་སང་མེ་རིའི་ནང་དུ་དང་།  དུག་ཆུའི་ནང་དུའང་སྲོག་ཆགས་ཡོད་པར་མཐོང་ཞེས་ཐོས་ལ། གཞན་ཡང་འགའ་ཞིག་ལ་ཞིམ་པོར་སྣང་བ་དེ་འགའ་ཞིག་ལ་བཙོག་པར་སྣང་། འགའ་ཞིག་ལ་ཤིན་ཏུ་སྲ་བར་སྣང་བ་དེ་འགའ་ཞིག་ལ་སྙི་བར་སྣང་བ་སོགས་སྣང་བ་མ་ངེས་པ་སྣ་ཚོགས་པ་ཞིག་བྱུང་དང་འབྱུང་བཞིན་པ་རེད། དེ་དག་གི་རྒྱུ་མཚན་ཡང་སོ་སོའི་བག་ཆགས་གོམས་ཚུལ་མ་གཏོགས་གཞན་ཅི་ཡང་རྙེད་མི་འདུག་པས། སེམས་ཉིད་ཀྱིས་ནི་སེམས་ཅན་འཇིག་རྟེན་དང་། །སྣོད་ཀྱི་འཇིག་རྟེན་ཤིན་ཏུ་སྣ་ཚོགས་བཀོད། །ཅེས་སོགས་རང་རེའི་གཞུང་ན་གསུངས་པ་དེ་ཉིད་རྒྱུ་སྐར་གྱི་ཁྲོད་ན་རི་བོང་འཛིན་པ་བཞིན་དུ་གནས་སོ། །
༄༅། །ཡང་སྟོན་པ་ཐམས་ཅད་མཁྱེན་པ་ཉིད་ཀྱི་ཞལ་སྔ་ནས་ཀྱིས། དངོས་པོ་རྣམས་སྐྱེ་བའི་ཚེ་གཞན་ནས་འོང་བ་ཡང་མ་ཡིན། དང་པོ་ནས་རང་རང་གི་རྒྱུ་རྐྱེན་དག་ལ་གནས་ནས་ཡོད་པའང་མ་ཡིན། འོན་ཀྱང་རྒྱུ་རྐྱེན་དག་ཚོགས་པའི་ཚེ་ན་རྟེན་ཅིང་འབྲེལ་འབྱུང་ཙམ་གྱི་དབང་གིས་བྱུང་བ་ཡིན་ཞེས་ཤེར་ཕྱིན་གྱི་མདོ་སོགས་ལས་གསུངས་པ་དེ་ཉིད་ཀྱང་དེང་དུས་འཕྲུལ་གྱི་བྱེད་པས་མངོན་སུམ་དུ་གྲུབ་སྟེ། མཁའ་རླངས་ཀྱི་ཁྲོད་ན་གནས་པའི་དབྱང་རླངས་ཨའོ་གཉིས་པ་ཞེས་པ་འདི་དྲི་དང་རོ་ཞིམ་མི་ཞིམ་གང་ཡང་མེད་པའི་རླངས་རྡུལ་ཞིག་རེད། འོན་ཀྱང་རླངས་རྡུལ་དེ་ཉིད་གསུམ་ལྷན་གཅིག་ཏུ་ཚོགས་པ་ན་དྲི་ངན་དབྱང་རླངས་ཨའོ་གསུམ་པ། ཞེས་པའི་དྲི་ངན་ཅན་གྱི་རླངས་རྡུལ་ཞིག་འབྱུང་ཞེས་ཚན་རིག་པ་དག་ཟེར་རོ། །དེ་ལྟ་ན་དྲི་ངན་དབྱང་རླངས་ཀྱི་དྲི་ངན་དེ་གང་ནས་བྱུང་། རང་གི་རྒྱུ་རྐྱེན་ལས་གཞན་ནས་འབྱུང་མི་སྲིད་ལ། རང་གི་རྒྱུ་རྐྱེན་དུ་གྱུར་བའི་རླངས་རྡུལ་རྣམས་ལ་རེ་རེ་ནས་དྲི་ངན་པ་ཅུང་ཟད་ཀྱང་མེད་ན་ཅི་ཞིག་འབྱུང་། འདི་སངས་རྒྱས་ཀྱི་དགོངས་པ་དང་གཅིག་ཅེས་ཚན་རིག་པ་ཁོང་དག་གིས་ཀྱང་ཟེར་རོ། །དེ་ལྟར་ཚན་རིག་ལོ་རྒྱུས་ཀྱི་སྟེང་དུ་ཉུས་ཏོན་དང་། ཏོ་ཨེར་ཏུན། ཨེ་དབྱིན་སུ་ཏན། ཅང་ཉོས་མན་སོགས་སྙན་གྲགས་ཅན་གྱི་ཚན་རིག་པ་དེ་ཚོས་སྔ་མ་སྔ་མས་མ་རྟོགས་ལོག་པར་སྨྲས་པ་རྣམས་ཕྱི་མ་ཕྱི་མས་སུན་ཕྱུང་ནས་སོ་སོས་གསར་གཏོད་ཀྱི་རྣམ་པ་མང་པོ་ཞིག་བྱས། གསར་གཏོད་དེ་དག་གིས་སངས་རྒྱས་ཀྱི་གསུང་རབ་ལ་མི་གནོད་པར་མ་ཟད་སངས་རྒྱས་ཀྱིས་དེ་དག་ལོ་སུམ་སྟོང་ཙམ་གྱི་དུས་ནས་གསུངས་ཟིན་འདུག་པས་བློ་གཟུ་བོར་གནས་པའི་ཚན་རིག་པ་དང་མཚན་ཉིད་རིག་པ་བ་རྣམས་ནི་སངས་རྒྱས་ཀྱི་མཁྱེན་རབ་དང་། །ཐུགས་བརྩེས་ཡིད་གཏིང་ནས་འཕྲོག་སྟེ་བསྔགས་བརྗོད་དང་། ཉམས་ལེན་ཡང་བྱེད་ཀྱི་འདུག་སྟེ། དབྱིན་ཇིའི་མཚན་ཉིད་རིག་པ་པ་ལོ་ཧྲོས་ཞེས་པ། མཚན་ཉིད་རིག་པ་དང་། ཚན་རིག་སྤྱི་ཚོགས་རིག་པ་སོགས་གཞུང་བཞི་བཅུ་ལྷག་ཅིག་བརྩམས་ཏེ། ༡༩༥༠ལོར་ནོ་པེ་ཨེར་རྩོམ་རིག་བྱ་དགའ་ཐོབ་པའི་འཛམ་གླིང་ན་གྲགས་པ་དེས། འཛམ་གླིང་ཐོག་གི་ཆོས་ལུགས་རྣམས་ལས། ང་རང་གིས་ཆེས་ཡི་རངས་བྱེད་ས་ནི་སངས་རྒྱས་ཀྱི་ཆོས་ལུགས་ཡིན། ཞེས་དང་། ཚན་རིག་གི་ཕ་ཡབ་ཅེས་པའི་སྙན་གྲགས་ཐོབ་པའི་ཨེ་དབྱིན་སུ་ཏན་ཡང་དམ་པའི་ཆོས་ཀྱིས་ཡིད་འཕྲོག་སྟེ་རྡུལ་ཕྲན་གྱི་དུས་རབས་སུ་ཚན་རིག་ལག་རྩལ་གྱིས་མིའི་རིགས་ལ་ཕན་འདོགས་བྱེད་དུ་འགྱུར་བ་ལ་ངེས་པར་དམ་པའི་ཆོས་ཀྱི་སློབ་གསོ་འདི་མེད་དུ་མི་རུང་བར་ཤེས་ཏེ། གལ་ཏེ་དེང་རབས་ཀྱི་ཚན་རིག་གི་གནད་གལ་པོ་ཆེ་ལ་རམ་འདེགས་བྱེད་ནུས་པའི་ཆོས་ལུགས་ཤིག་ཡོད་ན། དེ་ནི་སངས་རྒྱས་ཀྱི་ཆོས་ལུགས་འདི་ཡིན་རྒྱུ་རེད། ཅེས་སྨྲས། ཀྲུང་གོའི་དེང་རབས་ཀྱི་རྩོམ་རིག་པ། བསམ་བློ་པ། གསར་བརྗེ་པ་ཞེས་པའི་སྙན་གྲགས་ཆེན་པོ་ཐོབ་པའི་སྐུ་ཞབས་ལུའུ་ཞུན་གྱིས་ཀྱང་མདོ་མཛངས་བླུན་དང་། རྣལ་འབྱོར་སྤྱོད་པའི་ས་ལ་སོགས་བཀའ་དང་བསྟན་བཅོས་མང་དུ་བཀླགས་ཏེ་སངས་རྒྱས་ཤཱཀྱ་ཐུབ་པའི་མཁྱེན་རབ་ལ་ཧ་ལས་ཏེ། ཁོ་རང་གི་གྲོགས་པོ་ཤིས་ཧྲིག་ཁྲེང་ལ། །སངས་རྒྱས་ཤཱཀྱ་ཐུབ་པ་ནི་དངོས་གནས་མཁྱེན་དཔྱོད་ཆེན་པོ་རེད། ང་ཚོས་རྟག་ཏུ་དགྲོལ་དཀའ་བའི་མི་ཚེའི་དཀའ་གནས་དེ་དག་ཁོང་གིས་སྔར་ནས་རང་རེ་ལ་གསལ་བར་བཤད་ཟིན་འདུག ཅེས་སྨྲས་སོ། །༡༩༧༢ལོར་ནོ་པེ་ཨེར་དངོས་ཁམས་རིག་པའི་བྱ་དགའ་འཐོབ་མཁན་པའི་ལེ་ཨུན། ཡེ་ཧྲི་ཧྥིན་ཧྲིན་ཞེས་པའི་རབ་འབྱམས་པ་འདི་དབྱིན་ཇིའི་སྐད་གྲགས་ཅན་གྱི་ཅན་ཆོ་སློབ་གྲྭ་ཆེན་མོའི་དགེ་རྒན་ཡིན་ཞིང་། ཧྥེ་ལེ་ཙུ་ལོན་ཏོན་ཚན་རིག་གསར་གཏོད་ཀྱི་བྱ་དགའ་སོགས་ཚན་རིག་གི་བྱ་དགའ་ཆེན་པོ་དུ་མ་ཐོབ་མཁན་འདིས་གསུང་རབ་རིན་པོ་ཆེ་ལ་སློབ་སྦྱོང་ནན་ཏན་བྱེད་པར་མ་ཟད་ནང་པའི་ཏིང་ངེ་འཛིན་ཡང་ཉམས་སུ་ལེན་གྱིན་འདུག་གོ །གཞན་ཡང་དེ་དང་འདྲ་བའི་ནུབ་ཕྱོགས་ཀྱི་རིག་པ་སྨྲ་བའི་རབ་འབྱམས་པ་ཆེས་ཤིན་ཏུ་མང་པོ་འདུག་ཀྱང་རེ་རེ་ནས་འབྲི་མ་ནུས་པས་འདི་དག་གིས་མཚོན་ནས་ཤེས་པར་བྱའོ། །འོ་ན་ཚན་རིག་པ་དག་གིས་སངས་རྒྱས་ཀྱི་དགོངས་པ་ཇི་བཞིན་དུ་ཤེས་པ་ཡིན་ནམ་ཞེ་ན། མ་ཡིན་ཏེ། དབྱིན་ཇིའི་རབ་འབྱམས་པ་པོ་ལུ་ཏོན་གྱིས། དེང་སྐབས་ཚན་རིག་དང་མཚན་ཉིད་རིག་པ་ཤིན་ཏུ་དར་རྒྱས་སུ་ཕྱིན་པའི་དུས་ཡིན་ཡང་། ཁོང་ཚོས་ཤེས་པའི་བདེན་དོན་རྣམས་སངས་རྒྱས་ཆོས་ལུགས་དང་ཆ་འདྲ་ཞིང། དེ་ལས་བརྒལ་མི་ཐུབ་པར་མ་ཟད་སངས་རྒྱས་ཆོས་ལུགས་ལ་དེ་བས་ཀྱང་ཟབ་པ་དང་རྒྱ་ཆེ་བའི་གནས་ཡོད་དོ། །ཞེས་སྨྲས་པ་བཞིན་དུ། ཚན་རིག་པས་གསར་གཏོད་བྱས་པ་རྣམས་ནི་བྲེ་མིག་དུ་ཕུལ་ཤོང་བ་ལྟར་སངས་རྒྱས་ཀྱི་གསུང་རབ་ཏུ་འདུས་ལ། སངས་རྒྱས་ཀྱི་གསུང་རབ་ཀྱི་བརྗོད་བྱ་ནི་ཕྱོགས་རེ་ཙམ་དེ་དག་གིས་ཤེས་པ་ཡིན་གྱི་མཐའ་དག་ནི་མ་ཡིན་ནོ། །ད་དུང་སངས་རྒྱས་ཀྱི་གསུང་ན་དུས་རབས་ཉེར་གཅིག་པ་སོགས་མ་འོངས་པའི་དུས་སུ་ཚན་རིག་པས་རྟོགས་སུ་རུང་བ་མང་པོ་ཡོད་ལ་། ཤིན་ཏུ་ཟབ་ཅིང་རྒྱ་ཆེ་བའི་སྐོར་རྣམས་ནི་ཚན་རིག་ཇི་ལྟར་དར་རྒྱས་སུ་གྱུར་ཀྱང་གཏན་ནས་རྟོགས་སུ་མི་རུང་བའང་ཡོད། ཡང་འགའ་ཞིག་རྣམ་པ་འགལ་བ་ལྟར་སྣང་ཡང་དོན་ལ་མི་འགལ་བ་རི་རབ་གླིང་བཞིའི་ཆགས་ཚུལ་ལྟ་བུ་ཡོད་དེ། དེ་ནི་ཚན་རིག་པས་མངོན་སུམ་དུ་མཐོང་བ་དང་མི་མཐུན་མོད། དེ་ཙམ་དུ་་མ་ཟད་སངས་རྒྱས་ཀྱི་གསུང་ནང་ཕན་ཚུན་ཀྱང་མི་འདྲ་བ་མང་དུ་བྱུང་ཡང་དེའི་དོན་ནི་སེམས་ཅན་སོ་སོའི་ལས་ཀྱི་དབང་གིས་འཇིག་རྟེན་མི་འདྲ་བ་སྣ་ཚོགས་སུ་སྣང་དུ་རུང་བ་ལ་དགོངས་ཏེ་མི་མཐུན་པ་མང་པོ་བཀའ་བསྩལ་བ་ཡིན་ཞེས་ལོ་སྟོང་ལྷག་གི་སྔོན་ནས་བཤད་ཟིན་པ་ལྟར་དོན་ལ་གནས་ཏེ། རགས་པའི་གནས་འདི་འདྲ་བ་ཞིག་ལ་སངས་རྒྱས་ལྟ་ཅི་མི་ཕལ་བ་བློ་ཅུང་ཟད་བྱང་བ་ཞིག་གིས་ཀྱང་དགོས་པ་གཞན་མེད་ན་རང་ཚིག་སྔ་ཕྱི་མཐུན་དགོས་པ་ཙམ་ཞིག་མི་ཤེས་པ་མི་སྲིད་པའི་ཕྱིར་རོ། །དེ་བས་ན་དམ་པའི་ཆོས་ནི་ཚན་རིག་དང་མི་མཐུན་པས་རྨོངས་དད་ཡིན་ཟེར་བ་དག་གིས་ནི་རང་ཉིད་ཀྱིས་ཚན་རིག་དང་དམ་པའི་ཆོས་ཀྱི་དོན་མ་རྟོགས་པར་བལྟ་བར་བྱའོ། །ཡང་ཅུང་ཟད་རྟོགས་པར་དཀའ་བ་བར་སྲིད་ཀྱི་རྣམ་གཞག་ལ། གསུང་རབ་རིན་པོ་ཆེ་ལས། བར་དོའི་སེམས་ཅན་གྱིས་རང་གི་རོ་རང་གིས་མཐོང་བ་དང་། རི་བྲག་སོགས་ལ་ཐོགས་མེད་དུ་འགྲོ་བ་དང་། འགའ་ཞིག་གིས་རང་ཉིད་ཤི་བར་མི་ཤེས་པ་དང་། རླུང་ལྟར་མགྱོགས་པར་འགྲོ་བ་དང་། ཚེའི་ཚད་མ་ངེས་པ་དང། བདེ་སྡུག་གི་སྣང་བའང་རང་རང་གི་ལས་ཀྱི་དབང་གིས་མ་ངེས་པར་སྣ་ཚོགས་སུ་འཆར་བར་གསུངས་པ་རྣམས་དངོས་གནས་ཇི་ལྟ་བ་བཞིན་བྱུང་འདུག་སྟེ། ༡༩༧༨ལོར་ཏུང་ཐ་གྲོང་དུ་སྐྱེས་པའི་བུ་མོ་ཙེ་གོ་ཨུ་ཞེས་པ་སྐྱེ་བ་སྔ་མ་ཤིན་ཏུ་གསལ་བར་དྲན་མཁན་དེ་དང་། ཤི་ནས་སླར་གསོན་པའི་ཨ་རིའི་སྨན་པ་པེ་ཨར་སི་དང་། གོང་དུ་བཀོད་པའི་སན་ཅང་རྫོང་གི་བྱིས་པ་ཁྲིན་གིན་བཅས་ཀྱིས་རང་གི་རོ་དང་པུར་སྒམ་བཅས་གསལ་བར་མཐོང་ངོ་། །ཨ་རིའི་སྨན་པ་པེ་ཨུར་སི་ཤི་བའི་རྗེས་ཀྱི་ལུས་དེ་མི་གསོན་པོ་རྣམས་ཀྱི་ཕྲག་པ་དང་འཕྲད་ཚེ་ཐོགས་པ་མེད་པར་ཐལ་བྱུང་དུ་འགྲོ་བ་དང་། ཨན་ཧྭེ་ཞིང་ཆེན་སོས་ཤན་གྱི་ཀྲོས་སུན་ཅིན་འཕྲུ་རློག་འཕྲོ་ལ་ཤི་སྐབས་རང་ཉིད་ཀྱིས་ཤི་བར་མ་ཤེས་ནས་ངོ་ཤེས་པའི་མི་རྣམས་ལ་གཏམ་དྲིས་ཚེ་དེ་དག་གིས་ལན་མ་བྱས་པས་ཁྲོས་ཏེ་གཞན་དུ་སོང་བ་དང་། འགྲོ་བའི་ཚེ་རྐང་མཐིལ་ས་ལ་མ་རེག་པར་རླུང་ལྟར་མགྱོགས་པར་འགྲོ་བ་དང་། ཚེ་ཚད་ཀྱང་རིང་ཐུང་སྣ་ཚོགས་ཤིག་ཏུ་འདུག་པ་དང་། བདེ་སྡུག་གི་སྣང་བའང་མ་ངེས་པ་སྣ་ཚོགས་ཤིག་བྱུང་འདུག་པའི་ཕྱིར་རོ། སྐྱེ་བ་དྲན་མཁན་འདི་རྣམས་ཀྱིས་ནི་སྔོན་དུས་སུ་ལས་ཅུང་ཟད་བཟང་པོ་རེ་བསགས་པས་མི་ནས་མིར་སྐྱེས་པ་མ་ཟད་སྐྱེ་བ་དྲན་ཞིང་བར་དོ་ཡང་སྡུག་བསྔལ་ཆེན་པོ་རང་བྱུང་མི་འདུག་ཀྱང་ལས་ཀྱི་དབང་གིས་སྣ་ཚོགས་པ་ཡོད་པར་ངེས་སོ། །ཡང་རྟོགས་དཀའ་བ་ལས་འབྲས་ཀྱི་སྐོར་ལ། གོང་དུ་བཤད་པ་བཞིན་ལས་དགེ་སྡིག་གི་རྣམ་སྨིན་གྱི་འབྲས་བུ་དང་། རྒྱུ་མཐུན་གྱི་འབྲས་བུ་། དེ་ཡང་མཐོང་ཆོས་མྱོང་འགྱུར་དང་། སྐྱེས་ནས་མྱོང་འགྱུར་གྱི་འབྲས་བུ་མང་པོ་ཞིག་སངས་རྒྱས་ཀྱིས་གསུངས་པ་ཇི་ལྟ་བ་བཞིན་མངོན་སུམ་དུ་བྱུང་བ་ཡིན་པས་དྲང་དོན་དངོས་ལ་གནོད་བྱེད་ཅན་མ་གཏོགས་པ་གཞན་ཐམས་ཅད་དེ་ལྟར་མི་བསླུ་བ་དང་། ཡང་དག་པ་ཉིད་དུ་ཤེས་པར་བྱའོ། །མདོར་བསྡུ་ན། སྟོན་པ་སངས་རྒྱས་ཀྱིས་མཁྱེན་དགོས་རྒྱུའི་གཙོ་བོ་སྐྱེ་བོ་རྣམས་ཐར་པ་འཐོབ་པའི་ལམ་ཚང་ལ་མ་ནོར་བ་དེ་ཡིན། དེ་མཁྱེན་པའི་སྒྲུབ་བྱེད་གཙོ་བོ་ནི་བདེན་བཞིའི་དོན་ཕྱིན་ཅི་མ་ལོག་པར་སྟོན་པ་ཉིད་ཡིན། དེ་ཉིད་ཀྱི་སྒྲུབ་བྱེད་ནི་ནང་པའི་གཞུང་གི་ཟབ་པ་དང་རྒྱ་ཆེ་བའི་རིགས་པའི་རྣམ་གཞག་གིས་ཞིབ་པར་བཤད་རྒྱུ་ཡོད་ཀྱང་འདིར་དགོས་པའི་དབང་གིས་དེང་རབས་ཀྱི་རིགས་པ་དང་བསྟུན་ཏེ་ཅུང་ཟད་བརྗོད་པ་ཡིན་ནོ། །       
 ༄༅། །བཞི་བ་དམ་པའི་ཆོས་རྣམ་གྲོལ་གྱི་འཇུག་ངོགས་ཡིན་པ་ལ་ཡིད་ཆེས་བསྐྱེད་པ་ནི། དེ་ཡང་དམ་པའི་ཆོས་ཀྱི་ངོ་བོ་ནི་གོང་དུ་བཤད་པ་བཞིན་གཞན་སྐྱེ་བོ་ཐམས་ཅད་ལ་མི་འཚེ་བ་གཞིར་བཅས་པའི་སྟེང་དུ་རང་དང་གཞན་ལ་ཕན་པ་རྒྱ་ཆེན་པོ་སྒྲུབ་པའི་དམིགས་བསལ་གྱི་ཐབས་ཤེས་ཤིག་རེད། དེ་ལ་དང་པོ་ཚེ་སྔ་ཕྱི་དང་དང་ལས་རྒྱུ་འབྲས་སོགས་ལ་ཡིད་ཆེས་པའི་སྟེང་ནས་སྲོག་གཅོད་པ་དང་། རྐུ་འཕྲོག་བྱེད་པ། རྫུན་གྱིས་མགོ་སྐོར་བ་སོགས་བྱ་བ་མ་རབས་རྣམས་སྤངས་ནས་གཞན་གྱི་སྲོག་སྐྱོབ་པ། སྦྱིན་པ་གཏོང་བ། དྲང་བདེན་བྱེད་པ་སོགས་དམ་པའི་བྱ་བ་རྣམས་ཉམས་སུ་ལེན་རྒྱུ་ནི་འཇིག་རྟེན་ལྷ་མིའི་ཐེག་པ་ཞེས་འབྲས་བུ་ལྷ་མིའི་བདེ་བ་འཐོབ་བྱེད་ཡིན། ལྟ་བ་རྟེན་ཅིང་འབྲེལ་འབྱུང་རྟོགས་པ་དང་། སྒོམ་པ་ཞི་ལྷག་ཟུང་འཇུག སྤྱོད་པ་གཞན་འཚེ་སྤོང་ཞིང་གཞན་ཕན་སྒྲུབ་པ་སྟེ་ལྟ་སྒོམ་སྤྱོད་པ་གསུམ་ལ་བརྟེན་ནས་འཁོར་བའི་སྡུག་བསྔལ་མཐའ་དག་སྤོང་བ་ནི་འཇིག་རྟེན་ལས་འདས་པའི་ཐེག་པ་ཞེས་བྱའོ། །ཚུལ་འདི་དག་དད་པའི་རྗེས་སུ་འབྲང་བ་དག་གིས་དེ་ལྟར་ཡིན་ནོ་སྙམ་དུ་མོས་པས་བཟུང་བ་ཙམ་མ་ཡིན་པར་གནའ་དེང་གི་རིགས་པ་རྣམ་དག་གིས་བསྒྲུབ་རྒྱུ་ཡོད་པར་གོང་དུ་མཚོན་ཙམ་བཤད་ལ། རྒྱས་པར་ནི་གསུང་རབ་རིན་པོ་ཆེ་ཉིད་ལས་རྟོགས་པར་བྱ་དགོས་ཏེ་ཤིན་ཏུ་གལ་ཆེ་བའི་གནས་སོ། །དམ་པའི་ཆོས་འདི་བོད་ཀྱི་རྒྱལ་ཁམས་སུ་དར་ཞིང་རྒྱས་ནས་ལོ་ཆིག་སྟོང་ལྷག་ཅིག་སོང་། དེའི་རིང་ལ་གོང་གི་ཐེག་པ་གཉིས་པོ་ཉམས་སུ་བླངས་ནས་རང་རང་གི་འབྲས་བུ་མངོན་དུ་གྱུར་པ་བགྲང་ལས་འདས་པ་ཞིག་བྱུང་སྟེ། གདོས་བཅས་ཀྱི་ལུས་ལྷག་མ་མ་ལུས་པར་འཇའ་འོད་དུ་དེངས་པ་དང་། ལུས་ཤིན་ཏུ་ཆུང་ངུར་གྱུར་ཏེ་རྡུལ་ཕྲན་དུ་དེངས་པར་རྩོམ་པ་དང་། ཤི་བའི་རྗེས་སུ་འཇའ་འོད་དང་། སྒྲ་དང་། གདུང་དང་། རིང་བསྲེལ་སོགས་དམ་པའི་ཆོས་རང་ནས་བཤད་པའི་རྣམ་གྲོལ་ཐོབ་པའི་རྟགས་མཚན་ཁྱད་པར་ཅན་དེ་དག་ཕྱོགས་ག་ཤེད་དང་། དུས་ག་ཤེད་ན་འབྱུང་རྒྱུ་ཡོད་ཅེས་བརྗོད་པ་ཙམ་མ་ཡིན་པར་ཐམས་ཅད་དུ་མཐུན་སྣང་དུ་བྱུང་བའི་ལོ་རྒྱུས་དན་དཔང་སྟོབས་དང་ལྡན་པ་འདི་སྙེད་ཅིག་འདུག་ལ། དུས་རབས་འདི་ཉིད་ཀྱི་དབང་དུའང་མང་པོ་བྱུང་བ་མ་ཟད་ཁོ་བོ་ཅག་དང་དུས་མཉམ་དུ་བྱུང་བའང་ཤིན་ཏུ་མང་ངོ་། །རྟགས་མཚན་འདི་དག་ནི་བྱུང་ཟིན་པའི་རྗེས་སུ་འགའ་ཞིག་གིས་གྲོལ་བ་ཐོབ་པའི་རྟགས་ཡིན་ཞེས་ཐག་བཅད་པ་མ་ཡིན་གྱི། ཆོས་འདི་ཉམས་སུ་བླངས་ན་གྲོལ་བ་འདི་འཐོབ་པ་དེ་ཐོབ་པའི་རྟགས་འདི་འབྱུང་ཞེས་དང་པོ་ཉིད་ནས་གཏན་ལ་ཕབ་པ་དེ་དག་ཕྱིས་མངོན་དུ་གྱུར་བ་ཡིན་པས་ཤིན་ཏུ་ཡིད་ཆེས་པའི་གནས་སོ། །དེ་ཙམ་མ་བྱུང་ནའང་འཆི་ཁ་ལ་ཉེ་བའི་ཚེ་རང་ཉིད་ནམ་འཆི་ཤེས་ཤིང་། འཆི་ཚེ་དངངས་སྐྲག་མེད་པར་མ་ཟད་ཤི་བའི་རྗེས་སུ་དག་པའི་ཞིང་ཁམས་འདི་དག་འདིར་འགྲོ་རྒྱུ་ཡིན་ཟེར་ཏེ་སྣང་བ་དགའ་ཡལ་ལེ། རིག་པ་སྤྲོ་སང་ངེ་བའི་ངང་ནས་ཤི་བ་ནི་རྒྱུན་དུ་མཐོང་ཐོས་སུ་གྱུར་དང་འགྱུར་བཞིན་པ་དེ་ག་རེད། དེར་མ་ཟད་ཡི་གེ་འབྲི་ཀློག་ཙམ་ཡང་མི་ཤེས་པའི་ཁྱིམ་པ་ཕལ་བ་རྣམས་ཀྱི་ནང་ན་དད་པ་ཁོ་ནའི་སྟོབས་ཀྱིས་འཆི་ཚེ་སངས་རྒྱས་དང་བྱང་སེམས་རྣམས་བསུ་མར་སླེབས་པའི་སྣང་བ་དང་བཅས་དགའ་སྐྱིད་ཀྱི་ངང་ནས་ཕ་རོལ་དུ་འགྲོ་བ་ཇི་འདྲའི་མང་པོ་འདུག དེས་ན་འདི་དག་ནི་དམ་པའི་ཆོས་འདི་རྣམ་གྲོལ་གྱི་འཇུག་ངོགས་མཐར་ཐུག་ཡིན་པའི་འབྲས་རྟགས་ཡང་དག་མིག་གིས་མཐོང་བ་ཡིན་ནོ། །གཞན་ཡང་ནད་ཀྱིས་ཐེབས་ཏེ་སྨན་བཅོས་ཇི་ལྟར་བྱས་ཀྱང་མ་ཕན་ནས་ཆོས་ཀྱི་རིམ་གྲོ་བསྒྲུབས་པས་ཕན་པ་བྱུང་བ་སོགས་དམ་པའི་ཆོས་ཀྱི་འབྲས་བུ་ནི་སྤྱི་ཚོགས་ཐོག་རྟག་ཏུ་མངོན་གསལ་དུ་འོང་གིན་འདུག་གོ །རྒྱུ་མཚན་དེའི་ཕྱིར་ལོ་སུམ་སྟོང་གི་རིང་ལ་སྐྱེ་བོ་ཚད་མེད་པ་ཞིག་གི་སེམས་དང་འབྲེལ་བ་གཏིང་ཟབ་པོ་ཞིག་ཆགས་པ་ཡིན་གྱི། གཞན་དུ་ཆོས་ཅི་བསྒྲུབས་ཀྱང་མཚོ་སྟེང་དུ་རྡོ་བོར་བ་ལྟར་ཕན་འབྲས་ཅི་ཡང་མངོན་རྒྱུ་མེད་ན་དེ་འདྲ་ག་ལ་འོང་། ང་ཚོ་བོད་མི་རིགས་ཧྲིལ་པོས་ཆོས་ལ་དད་པ་བྱེད་པ་དེའང་རྒྱུ་མཚན་འདི་དག་གི་སྟེང་ནས་བྱུང་བ་ཡིན་གྱི་ང་ཚོ་བླུན་ཆེས་ནས་མ་རེད། བོད་ནང་དམ་པའི་ཆོས་དར་བ་ནས་བཟུང་ཆོས་ཞེས་པ་བླ་བྲང་ཁག་འགའ་ཞིག་གམ། དཔོན་ཁག་འགའ་ཞིག་གམ། ཤེས་ཡོན་ཅན་འགའ་རེའི་སྒེར་ཆོས་ཙམ་མ་ཡིན་པར་བོད་རྒྱལ་བློན་ནས་བཟུང་འབངས་ཕལ་པའི་བར་གྱི་སྐྱེ་བོ་ཡོངས་ཀྱིས་འདི་ཕྱི་གཉིས་ཀྱི་སྐྱབས་གནས་སུ་བྱེད་ཅིང་། རིག་གནས་གཞན་ཀུན་ལས་ཀྱང་འདི་ཉིད་ཁོ་ནགཙིགས་སུ་འཛིན། དེའི་དབང་གིས་རྒྱལ་པོ་རྣམས་ཀྱིས་ཀྱང་རྒྱལ་སྲིད་ཆོས་བཞིན་དུ་བསྐྱངས་པས་འབངས་རྣམས་བདེ་བར་འཚོ། ཐ་ན་བཙོན་ཁང་ཡན་ཆད་ལ་གཞན་དང་མི་འདྲ་བའི་རང་དབང་ཡོད་པ་ཞིག་སྟེ། དགེ་འདུན་ཆོས་འཕེལ་རྩེ་ཕོ་བྲང་གི་ཞོལ་གྱི་བཙོན་ཁང་དུ་བཞུགས་སྐབས་དེར་གནས་པའི་བཙོན་པ་རྣམས་ལ་རང་དབང་ཆེན་པོ་ཡོད་པ་གཟིགས་ཏེ་རང་རེ་བོད་ཀྱི་ལུགས་སྲོལ་འདིར་མཉེས་ཚོར་ཆེན་པོས་བསྔགས་བརྗོད་གནང་འདུག་པ་བཞིན་དང་། མ་འོངས་པའི་མདུན་ལམ་ཡང་མུན་པ་མུན་ནག་ཏུ་མ་གྱུར་བ་ཞིག་ཡིན་ནོ། །དེ་ལྟ་བུའི་ཆོས་དེའང་རང་རེ་བོད་ལ་མཚོན་ན་རྙིང་མ་དང་། བཀའ་བརྒྱུད། ས་སྐྱ། དགེ་ལུགས་སོགས་ནང་གསེས་ཀྱི་དབྱེ་བ་མང་པོ་ཞིག་དར་ཡང་དོན་ལ་ཐམས་ཅད་འགལ་མེད་དུ་གནད་གཅིག་ཏུ་ཤེས་པར་བྱ་དགོས་ཏེ། བསྟན་འཛིན་གྱི་གཙོ་བོ་དག་ཐུགས་བརྒྱུད་གཅིག་པ་དང་བསྟན་པ་ཐམས་ཅད་དགོངས་པའི་ཞེ་ཕུགས་གཅིག་ཏུ་འབབ་པའི་ཕྱིར་ཏེ། དེ་ཡང་ཨོ་རྒྱན་སངས་རྒྱས་གཉིས་པ། མཉམ་མེད་ཇོ་བོ་རྗེ། འཇམ་དབྱངས་ས་སྐྱ་པཎ་ཌི་ཏ། མཉམ་མེད་དྭགས་པོ་རིན་པོ་ཆེ། རྗེ་བདག་ཉིད་ཆེན་པོ་བློ་བཟང་གྲགས་པ་རྣམས་ནི་གདུལ་བྱའི་དབང་གིས་སྤྲུལ་བའི་རྣམ་རོལ་ཐ་དད་ཙམ་ལས་དོན་ལ་ཐུགས་རྒྱུད་གཅིག་པ་ཡིན་པར་གསལ་ཏེ། བཀའ་གདམས་བུ་ཆོས་ལས། ཡང་རེ་ཞིག་ན་ཇོ་བོའི་ཞལ་ནས། མཁན་རྒྱུད་དུ་མ་ཟད་དགེ་སློང་བྱང་ཆུབ་སེམས་དཔའ། རྣལ་འབྱོར་གྱི་དབང་ཕྱུག་རྡོ་རྗེའི་ཐུགས་དང་ལྡན་པ་མཚོ་སྐྱེས་རྡོ་རྗེ་པདྨ་འབྱུང་གནས། མཆན། ནི་རྒྱ་གར་ན་འདུལ་འཛིན་པ་ཆེན་པོ་ཞིག་གི་སྤྲུལ་བར་ཡང་གྲགས་ཏེ། དཔལ་ཧེ་རུ་ཀའི་བཞད་པས་ནི་ཁོ་བོ་ཁོ་ན་ཡིན་པར་བྱེད། གདུལ་བྱའི་དབང་གིས་བོད་འདིར་ལན་གཉིས་གསུམ་ཞིག་འོངས་ཏེ་སྤྲུལ་བའང་དེ་ལྟར་དུ་བསྟན་ཏོ། །ཞེས་དང་། བླ་མ་དྲི་མ་མེད་པའི་ཞལ་ནས། འདི་ནས་ཤར་ཕྱོགས་ན་རྡོ་རྗེའི་གདན་ཞེས་བྱ་བ་དུས་གསུམ་གྱི་སངས་རྒྱས་ཐམས་ཅད་མངོན་པར་རྫོགས་པར་སངས་རྒྱས་པའི་གནས་ཡོད། དེའི་བྱང་ཕྱོགས་ན་བོད་ཁ་བ་ཅན་གྱི་རྒྱལ་ཁམས་ཞེས་བྱ་བ་མཐའ་འཁོབ་ཀྱི་ཡུལ་ཆེན་པོ་བྱམས་པ་དང་སྙིང་རྗེ་བྲལ་བའི་མི་མ་ཡིན་དྲག་པོ་དཔག་ཏུ་མེད་པ་ཡོད་པས། དེ་ན་གནས་པའི་སེམས་ཅན་ཐམས་ཅད་ངན་སོང་གསུམ་དུ་སྐྱུར་བར་བྱེད་པས། དེང་སང་བོད་ཁམས་དེར་བདག་གི་སྤྲུལ་བ་མཐུ་དང་ལྡན་པ་ཞིག་བཏང་ལ། སྔོན་ལ་མི་མ་ཡིན་དེ་དག་བཏུལ་ཏེ་གནོད་འཚེ་གདུག་རྩུབ་ཞི་བར་བྱ། སྐྱེ་བོ་ཐམས་ཅད་ཀྱང་བདེ་སྐྱིད་དང་བཀྲ་ཤིས་པར་བྱའོ། །ཁྱོད་ཀྱིས་དེའི་སྔོན་དུ་སྤྲུལ་བའི་རྒྱལ་པོ་ཞིག་ཐོངས་ལ་བོད་ཁམས་ཀྱི་སེམས་ཅན་དེ་དག་ཡོངས་སུ་དྲོངས། སྤྲུལ་བ་མང་པོ་ཡང་བྱོས། རྒྱ་ནག་དང་བལ་བོའི་ཡུལ་ན་དེ་བཞིན་གཤེགས་པའི་སྤྲུལ་པ་དངོས་ཡོད་པས་གནས་དེར་སྤྱན་དྲོངས། བོད་ཁམས་དེ་འཇིགས་པ་ཆེ་བས་ལྷ་མོ་ཞི་ཁྲོ་གཉིས་སྤྱན་དྲོངས། འཇིགས་པ་བརྒྱད་ལས་སྐྱོབ་པར་བྱེད་ཅིང་། དེ་ནས་ཡུལ་གྱི་དབུས་སུ་གྱུར་ནས་སྐྱེ་བོ་ཕལ་བ་དད་པ་སྐྱེས་དེ་གདམས་ངག་བསྟན་དུ་བཏུབ་པའི་དུས་སུ། བྱང་ཕྱོགས་དེ་ནས་བྱང་ཕྱོགས་སུ། །བོད་ན་རིགས་བཙུན་པར་གྲགས་པ་ཐམས་ཅད་ཀྱིས་བཀུར་བ་ཞིག་ཏུ་ཁྱོད་ཀྱི་ལུས་བླངས་ཏེ། ཁྱོད་ཀྱིས་བྱིན་གྱིས་བརླབས་པའི་སྤྲུལ་པ་ཞིག་རྒྱ་གར་ནས་ང་སྤྱན་འདྲེན་དུ་ཐོངས། །གཟོད་མི་རྣམས་གནས་སྐབས་དང་མཐར་ཐུག་གི་བདེ་བ་ལ་འགོད་པར་བྱའོ། །ཞེས་གསུངས་པ་དང་། འཇིག་རྟེན་སྒྲོན་མ་ཇི་སྐད་གསུང་པ་བཞིན་དུ་བགྱིའོ། དེ་ནས་སྤྲུལ་བའི་དགེ་སློང་རྣམས་ན་རེ། རྒྱལ་བ་སྲས་བཅས་བོད་ཁམས་དེར་གཤེགས་པའི་རྗེས་སུ་ཨུ་རྒྱན་གྱི་གནས་འདི་སུས་སྐྱོང་། མཁའ་འགྲོ་མ་རྣམས་སུས་སྡུད། སྲིན་པོའི་ཚོགས་རྣམས་སུས་འདུལ། ཞེས་ཞུས་པ་དང་། དེང་སང་གངས་རིའི་ཁྲོད་དུ་མི་མ་ཡིན་འདུལ་དུ་བཏང་བའི་སྤྲུལ་བ་དེ་སླར་འདི་ཉིད་དུ་ལོག་ནས། ཨུ་རྒྱན་སྐྱོང་ཞིང་མཁའ་འགྲོ་མ་རྣམས་སྡུད་པར་བྱེད་ལ། ཚོགས་ཀྱི་འཁོར་ལོ་རྒྱ་ཆེན་པོའང་བསྐོར། སྲིན་པོ་གདུག་པ་ཅན་ཡང་འདུལ། ཞེས་གསུངས་པ་དང་། ཞབས་དཀར་ཚོགས་དྲུག་རང་གྲོལ་གྱི་ཞལ་ནས་ཀྱང་། འོ་རྒྱལ་བ་ཐམས་ཅད་ཐུགས་ཆོས་སྐུའི་དབྱིངས་སུ་རོ་གཅིག་ཡིན་པས་གང་དང་གང་གི་སྤྲུལ་བ་ཡིན་ཞེས་ཀྱང་ཆོག ཁྱད་པར་དུས་གསུམ་སངས་རྒྱས་ཐམས་ཅད་ཀྱི་ཐུགས་ཀྱི་སྤྲུལ་བ་སློབ་དཔོན་རིན་པོ་ཆེ། ཇོ་བོ་རྗེ། རྗེ་དབག་ཉིད་ཆེན་པོ་རྣམས་ཐུགས་རྒྱུད་གཅིག་ཚུལ་ནི། བཀའ་གདམས་གླེགས་བམ་ལས། བླ་མ་དྲི་མ་མེད་པས། རྒྱལ་བུ་དཀོན་མཆོག་འབངས་ལ་གསུངས་པ། འདི་ནས་སྐྱེ་བ་གཞན་གྱིས་མ་ཆོད་པར། བོད་ཁམས་མགོན་མེད་ཡུལ་དུ་ཐུགས་རྗེས་ཟུང་། བོད་ཀྱི་རྒྱལ་པོ་དག་ལ་ཚད་མ་འཛིན། མི་དབང་མཛོད་ལ་བོད་ཁམས་བདེ་བར་སྐྱོངས། །ཨོ་རྒྱན་ཡུལ་དུ་ཇི་སྐད་སྨྲས་པ་བཞིན། །བདག་ཀྱང་གནས་དེར་ལྷ་འདྲེ་འདུལ་དུ་འགྲོ། །ཞེས་གསུངས་པ་དེ་ཨོ་རྒྱན་རིན་པོ་ཆེ་དང་། སྤྲུལ་བ་གཅིག་ནི་རྒྱ་གར་ཡུལ་དུ་འགྲོ། །ཞེས་གསུངས་པ་དེ་པཎ་ཌི་ཏ་པདྨ་བཛྲ་དང་། སྤྲུལ་བ་གཅིག་ནི་མདོ་མཁས་སྨད་དུ་འགྲོ །ཞེས་གསུངས་པ་དེ་རྗེ་བདག་ཉིད་ཆེན་པོ་ཡིན་པ་ལུང་བསྟན། དེ་བཞིན་དུ་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས། གྲུབ་དབང་པདྨ་འབྱུང་གནས་ཀྱི། །རྣམ་འཕྲུལ་དཔལ་ལྡན་མར་མེ་མཛད། །ཡང་སྤྲུལ་བློ་བཟང་གྲགས་པའི་དཔལ། །ཁྱོད་མིན་བདག་ལ་སྐྱབས་གཞན་གང་། ཞེས་དང་། རྒྱལ་བ་དགེ་འདུན་རྒྱ་མཚོའི་ཞལ་ནས། རིག་འཛིན་གྲུབ་པའི་དབང་ཕྱུག་པདྨ་འབྱུང་། ལྔ་བརྒྱའི་གཙུག་རྒྱན་དཔལ་ལྡན་མར་མེ་མཛད། །རྡོ་རྗེ་འཆང་དབང་བློ་བཟང་གྲགས་པའི་དཔལ། །སྣ་ཚོགས་སྤྲུལ་བའི་གར་མཛད་དེ་ལ་འདུད། །ཅེས་དང་། རྗེ་བཙུན་བཀྲ་ཤིས་རྒྱ་མཚོས། གཟི་བརྗིད་འོད་དཔག་མེད་མགོན་ཨོ་རྒྱན་རྗེ། །ཨ་ཏི་ཤ་དང་འཇམ་དཔལ་བློ་བཟང་གྲགས། །ཡེ་ཤེས་གཅིག་ལ་རྣམ་འགྱུར་ཆུ་ཟླའི་གར། ངེས་པ་སྙིང་ནས་རྙེད་ལ་ལན་བརྒྱར་འདུད།། ཞེས་དང་། འཇམ་དཔལ་དབྱངས་དངོས་ཁྲི་གུང་ཐང་བ་རིན་པོ་ཆེས། གངས་ཅན་བསྟན་པའི་སྲོལ་འབྱེད་པདྨ་འབྱུང་། །དེ་དོན་རྒྱུད་ལ་སྦྱོར་མཛད་ཨ་ཏི་ཤ །དེ་ལ་འཁྲུལ་བ་སེལ་མཛད་ཙོང་ཁ་བ།།རྣམ་གསུམ་དབྱེར་མེད་ཚད་མའི་ལུང་གིས་གྲུབ།།ཅེས་གསུངས་པ་སོགས་དང་དེང་སང་གི་བླ་མ་སྐྱེས་བུ་དམ་པ་རྣམས་ཀྱིས་ཀྱང་མགྲིན་གཅིག་དང་དབྱངས་གཅིག་ལྟར་གསུངས་ཚུལ་ལ་བསམས་ནས། བསྟན་པའི་བདག་པོ་དེ་གསུམ་དང་། རྗེས་འཇུག་གསར་རྙིང་གི་ཆོས་མཛད་ཡོངས་ལ་དད་གུས་དག་སྣང་སྦྱངས་ཏེ། མཆོད་བསྟོད་བཀུར་བ་ལ་བརྩོན་པར་བྱའོ།།ཞེས་གསུངས་སོ།།ཨོ་རྒྱན་ཆེན་པོས་ཀྱང་བཀའ་ཐང་བསྡུས་པ་ལས། །ཐུབ་པའི་ལུང་བསྟན་མདོ་ཁམས་སྒང་ཞིག་ཏུ། །ཨ་ཏི་ཤ་ཡི་སྤྲུལ་བ་བློ་བཟང་གྲགས། །སྐྱེས་བུ་དེ་བྱོན་བོད་ལ་བདེ་སྐྱིད་འཆར། །དེ་དུས་དཀར་ཕྱོགས་རྣམས་ཀྱང་སྤོབས་པ་མཐོ། །ཞེས་དང་། དེ་དུས་ང་ཡི་སྤྲུལ་པ་ས་སྐྱ་ཞེས། །སྟོད་ཀྱི་ཕྱོགས་སུ་ཡབ་མིང་འཇམ་དཔལ་དང་། །ཡུམ་མིང་སྒྲོལ་མ་ཞེས་བྱའི་སྲས་སུ་འཁྲུངས། འགྲོ་མགོན་འཕགས་པ་ཀུན་དགའ་རྒྱལ་མཚན་ཞེས། །ང་ཡི་ལྷ་ཁང་རྣམས་ཀྱང་ཞིག་གསོས་བྱེད། །གསང་སྔགས་བསྟན་པ་དར་ཞིང་རྒྱས་པར་བྱེད། །བོད་འབངས་སེམས་ཅན་བདེ་ཞིང་སྐྱིད་པར་འོང་། །ཞེས་དང་། ཐུའུ་བཀྭན་ཆོས་ཀྱི་རྡོ་རྗེའི་ནོར་བུ་ཀེ་ཏ་ཀའི་བྱི་དོར་ལས་ཀྱང་། དེར་མ་ཟད་ཇོ་བོ་ཆེན་པོ་དང་། མཉམ་མེད་དྭགས་པོ་རིན་པོ་ཆེ་དང་། ཆོས་ཀྱི་རྒྱལ་པོ་ཙོང་ཁ་བ་རྣམས་ཀྱང་སློབ་དཔོན་ཆེན་པོའི་་རྣམ་འཕྲུལ་ཡིན་པར་ཚད་མའི་སྐྱེས་བུ་རྣམས་ཀྱིས་ཡང་ཡང་གསུངས་ན། སློབ་དཔོན་ཆེན་པོ་ལས་ལྷག་པའི་བོད་གངས་ཅན་གྱི་བསྟན་འགྲོ་ལ་བཀའ་དྲིན་ཆེ་བ་སུ་ཞིག་མཆིས། ཞེས་གསུངས་སོ། དེ་ལྟར་དམ་པ་འདི་རྣམས་ནི་ཐུགས་རྒྱུད་གཅིག་པར་ཚད་མའི་ལུང་གིས་གྲུབ་པས་སྤངས་རྟོགས་སོགས་ལ་བཟང་ངན་འོང་དོན་གཏན་ནས་མེད་ཀྱང་བླུན་པོ་ཕྱོགས་ཞེན་ཅན་རྣམས་ཀྱིས་དམ་པ་འདི་དག་ལའང་དགག་སྒྲུབ་སྣ་ཚོགས་ཤིག་བྱེད་ཀྱིན་འདུག་པ་ནི་སྐྱི་གཡའ་བའི་གནས་སུ་སེམས་སོ།  །དེ་ཡང་ཐུའུ་བཀྭན་ཆོས་ཀྱི་རྡོ་རྗེའི་ཞལ་ནས་བྱང་ཆུབ་ལམ་རིམ་ལས། བསྟན་པ་སྔ་དར་ལ་མཁན་ཆེན་ཞི་བ་མཚོ་དང་།པདྨ་སམྦྷ་ཝས་བསྟན་པའི་སྲོལ་བཙུགས་པ་ལ། ཞེས་གསུངས་པ་ཚད་མར་བྱེད་དགོས་པས། བསྟན་པའི་སྲོལ་བཙུགས་པ་ལས་ལྷག་པའི་བསྟན་པ་ལ་བྱ་བ་ཅི་དགོས། ཞེས་དང་། བོད་ཡུལ་མུན་པའི་གླིང་དུ་བསྟན་པའི་སྒྲོན་མེ་ཐོག་མར་སྤེལ་བར་མཛད་པ་ནི། བསྟན་པའི་བྱ་བའི་ནང་ནས་ཀྱང་རབ་དང་ཕུལ་དམ་པ་ཞིག་ཏུ་འཁུམ་སྟེ། རྗེ་བླ་མས། བསྟན་པ་རིན་ཆེན་མཆོག་གིས་མ་ཁྱབ་པའམ། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། །སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །ཕན་བདེའི་གཏེར་དེ་གསལ་བར་བྱེད་པར་ཤོག །ཅེས་སྨོན་པ་མཛད་པའི་གནས་ཡིན་འདུག་པས་སོ། །ཞེས་གསུངས་པ་བཞིན། ད་ལྟའི་བར་དུ་རང་རེ་གངས་ཅན་གྱི་སེར་སྐྱ་ཡོངས་ལ་མདོ་སྔགས་ཀྱི་ཐེག་པ་ཡོངས་སུ་རྫོགས་པའི་ཆོས་ཉི་མ་ལྟ་བུ་གཞན་སུ་ལའང་དཀོན་པ་ཞིག་ཡོད་པ་འདི་ནི་ཨོ་རྒྱན་ཆེན་པོའི་བདག་རྐྱེན་ལས་བྱུང་བ་ཡིན་པས་བོད་ཁམས་ཡོངས་ལ་དེ་ལས་ལྷག་པའི་བཀའ་དྲིན་ཆེ་བ་ཞིག་ནི་དངོས་གནས་དཀའ་སྟེ། རྒྱལ་དབང་ཐམས་ཅད་མཁྱེན་པས། གྲུབ་མཆོག་མཚོ་སྐྱེས་རྡོ་རྗེ་དྲིན་པོ་ཆེ། །ཞེས་གསུངས་པ་ལྟར་རོ། རྒྱལ་བ་གཉིས་པ་བློ་བཟང་གྲགས་པས་ནི། བཀའ་གདམས་གླེགས་བམ་ལས། །ཐ་མ་བསྟན་པའི་མེ་རོ་ནི། །གྲགས་པའི་མཚན་གྱིས་གསོ་བར་བྱེད། །ཅེས་གསུངས་པ་ལྟར་རྒྱལ་བསྟན་ཡོངས་ཀྱི་གཞི་མ་འདུལ་བ་སོ་སོར་ཐར་བའི་གཙོས་བསྟན་པ་རིན་པོ་ཆེ་ནུབ་རྒྱ་གར་གྱི་ས་མཚམས་ནས་བཟུང་ཤར་རྒྱ་ནག་སྟོང་འཁུན་དང་སོག་པོའི་ཡུལ་ཚུན་ཆད་ཡངས་པའི་རྒྱལ་ཁམས་ཐམས་ཅད་དུ་ཁྱབ་པར་མཛད་ཅིང་ད་ལྟའི་བར་དགེ་ལྡན་གྱི་དགོན་ཆེན་རྣམས་ཀྱིས་ཚུལ་ཁྲིམས་རྣམ་པར་དག་པ་ལ་གཞིར་བཅས་སྤོང་ཀློག་ལ་བར་མེད་དུ་བརྩོན་པས་གངས་ཅན་གྱི་བསྟན་པའི་གཞི་མ་ལྟ་བུར་གྱུར་བའི་བཀའ་དྲིན་ནི་བསམ་གྱིས་མི་ཁྱབ་བོ། །དེ་བཞིན་དུ་དཔལ་ལྡན་ས་སྐྱའི་ཕྱོགས་ལའང་་མཁས་ཤིང་གྲུབ་པ་བརྙེས་པའི་སྐྱེས་བུ་དམ་པ་བསམ་གྱིས་མི་ཁྱབ་པ་གསེར་རིའི་ཕྲེང་བ་ཚར་དུ་དངར་བ་ལྟ་བུ་དག་བྱོན་པས་གངས་རིའི་ཁྲོད་ཀྱི་གྲུབ་མཐའ་སོ་སོའི་མཁས་པ་ཆེན་པོ་ས་ལ་གནས་པ་ཤིན་ཏུ་མང་པོ་ཞིག་དཔལ་ལྡན་ས་སྐྱའི་སློབ་མར་གྱུར་སྟེ། ཇི་སྐད་དུ། འཛམ་གླིང་ཐུབ་པའི་རྒྱལ་ཚབ་ས་སྐྱ་པའི། །ཆོས་ཀྱི་བརྒྱུད་པ་འཛིན་པའི་སློབ་མ་རུ། །མ་གྱུར་གངས་རིའི་ཁྲོད་འདིར་བསྟན་འཛིན་དུ་། །ཞལ་གྱིས་འཆེས་པའི་མཁས་པ་འགའ་ཡོད་མིན། །ཞེས་གསུངས་པ་ལྟར་ལགས་པས་བསྟན་པ་རིན་པོ་ཆེ་གསལ་བྱེད་ཀྱི་རྒྱན་དུ་གྱུར་བ་དང་། །གཞན་ཡང་བཀའ་བརྒྱུད་པའི་བསྟན་པའང་དཔེར་ན། དཔལ་ལྡན་འབྲུག་པའི་བསྟན་པ་ལྟ་བུས་བྱ་རྒོད་པོའི་ཉིན་ལམ་བཅོ་བརྒྱད་དུ་ཁྱབ་ཅེས་ཡོངས་སུ་གྲགས་པ་ལྟར་དང་། གྲུབ་པ་བརྙེས་པའི་རྣལ་འབྱོར་པ་མང་དུ་བྱོན་ནས་བསྟན་པ་ལ་བྱ་བ་རྒྱ་ཆེར་མཛད། ཇོ་ནང་ཀུན་མཁྱེན་དོལ་བུ་པ་ཤེས་རབ་རྒྱལ་མཚན་གྱིས་དབུས་གཙང་དུ་གྲྭ་སྐོར་མཛད་པས་ཐམས་ཅད་མཁྱེན་པ་ཞེས་སྙན་པའི་གྲགས་པས་ཁྱབ། འཕགས་པ་རྔ་བོ་ཆེ་ལ་སོགས་པའི་དོན་ཇི་བཞིན་དུ་མཁྱེན་ནས་བདེ་བར་གཤེགས་པའི་པའི་ངེས་དོན་གྱི་བསྟན་པ་གངས་རིའི་ལྗོངས་སུ་ཤིན་ཏུ་གསལ་བ་མཛད་པས་མཚོན་སྒྲུབ་བརྒྱུད་ཀྱི་རང་ལུགས་འདྲེན་པའི་ཤིང་རྟ་ཆེན་པོ་བརྒྱད་ཕྲན་ཚེགས་དང་བཅས་པ་ལ་སྐྱེས་བུ་དམ་པ་རྒྱུ་སྐར་གྱི་ཕྲེང་བ་ལྟ་བུ་ཞིག་བྱོན་པ་དག་འཆད་པ་དང་རྩོམ་པས་བསྟན་པ་རིན་པོ་ཆེ་གཙོ་བོར་གྱུར་པའི་བཅུ་ཕྲག་རིག་པའི་གཞུང་ལུགས་མཛེས་པར་བྱས་ཏེ་ད་ལྟའང་རང་རེའི་མིག་དང་རྣ་བའི་རྒྱན་དུ་བཞུགས་པ་འདི་དག་ཡིན་པས་བཀའ་དྲིན་བརྗོད་ཀྱིས་མི་ལང་ངོ་། །དེས་ན་བྱས་པ་ཤེས་ཤིང་དྲིན་གཟོ་འདོད་ཀྱིས་ཐམས་ཅད་ལ་དག་པའི་སྣང་བ་ཕྱོགས་མེད་དུ་བྱ་བ་དགོས་སོ། །སྐྱེས་བུ་དམ་པ་དེ་དག་ལས་བརྒྱུད་པའི་ཆོས་རྣམས་ཀྱང་གནས་སྐབས་སུ་དགོས་པའི་དབང་གིས་རྩལ་འདོན་མཛད་ཚུལ་མི་འདྲ་བ་མང་དུ་འདུག་ཀྱང་མཐར་ཐུག་གི་དོན་ལ་ངེས་པར་དགོངས་པ་གཅིག་ཏུ་མཐོང་སྟེ། པཎ་ཆེན་བློ་བཟང་ཆོས་རྒྱན་གྱི་ཞལ་སྔ་ནས། ལྷན་ཅིག་སྐྱེས་སྦྱོར་གའུ་མ། །ལྔ་ལྡན་རོ་སྙོམས་ཡི་གེ་བཞི། །ཞི་བྱེད་གཅོད་ཡུལ་རྫོགས་ཆེན་དང་། །དབུ་མའི་ལྟ་ཁྲིད་ལ་སོགས་པ། །སོ་སོར་མིང་འདོགས་མང་ན་ཡང་། །ངེས་དོན་ལུང་རིགས་ལ་མཁས་ཤིང་། །ཉམས་མྱོང་ཅན་གྱི་རྣལ་འབྱོར་པས། །དཔྱད་ན་དགོངས་པ་གཅིག་ཏུ་འབབས། །ཞེས་གསུངས་ཤིང་། ཕྱག་ཆེན་གྱི་ཁྲིད་ཡིག་ཀྱང་མཛད། །པཎ་ཆེན་བློ་བཟང་ཡེ་ཤེས་ཀྱི་ཞལ་ནས་ཀྱང་། དབུས་གཙང་མངའ་རིས་བར་གྱི་གྲུབ་པའི་མཐའ། །ཀུན་ཀྱང་རྒྱལ་བསྟན་ཁོ་ན་ཡིན་པའི་ཕྱིར། །ཕྱོགས་ལྷུང་གདོན་གྱིས་སྡང་ཞུགས་མི་མཛད་པར། །དག་སྣང་ནོར་བུའི་འོད་ཀྱིས་ཁྱབ་ན་ལེགས། །ཞེས་སོ། །ལྔ་བ་ཆེན་པོའི་ཡོངས་འཛིན་འཁོན་སྟོན་དཔལ་འབྱོར་ལྷུན་གྲུབ་ཀྱིས་ཕྱག་རྫོགས་དབུ་གསུམ་སྤྱི་ཁྱབ་ཀྱི་ཁྲིད་ཡིག་མཛད། རྒྱལ་དབང་ལྔ་བ་བློ་བཟང་རྒྱ་མཚོས་རྫོགས་ཆེན་ལ་ཐུགས་དམ་མཛད་ཅིང་དེའི་བསྔགས་པ་དུ་མའང་བརྗོད། མཁས་གྲུབ་རྗེས་མཐར་ཐུག་གི་དགོངས་པ་དགེ་བཤེས་སངས་རྒྱས་རིན་ཆེན་གྱིས་དྲིས་ལན་དུ་རྫོགས་ཆེན་གྱི་བསྔགས་པ་ཆེར་བརྗོད་དོ། འཇམ་དབྱངས་མི་ཕམ་རིན་པོ་ཆེས་ཀྱང་ས་དགེ་བཀའ་རྙིང་གི་དགོངས་པ་འགལ་མེད་དུ་ལུང་རིགས་ཀྱིས་བསྒྲུབས་པ་སོགས་ཀྱིས་མཚོན་སྔོན་གྱི་དམ་པ་རྣམས་ཀྱི་མཐར་ཐུག་གི་དགོངས་པའི་འབབ་སོ་ནི་གཅིག་ཁོ་ནར་སྣང་བ་སྟེ་ལུང་རིགས་ཀྱིས་རྒྱ་ཆེར་བསྒྲུབ་རྒྱུ་ཡོད་ཀྱང་རེ་ཞིག་དེ་ཙམ་མོ། །དེས་ན་རིས་སུ་མ་ཆད་པའི་བསྟན་པ་སྤྱི་ལ་རྒྱུ་མཚན་ཤེས་པའི་དད་པ་བྱ་དགོས་པ་ཡིན་གྱི་ཆགས་སྡང་གི་དགག་སྒྲུབ་ཀྱིས་ནི་རང་འཕོངས་ཀྱི་རྒྱུ་སྒྲུབ་པ་འབའ་ཞིག་ཏུ་ཟད་དོ། ཁྱད་པར་དུ་རང་རེའི་བསྟན་པ་ལ་ཉམ་ཉེས་དཔེ་མེད་པ་བྱུང་སྟེ་ཉག་ཕྲ་བ་འདི་འདྲའི་དུས་སུ་ཕན་ཚུན་གཅིག་གིས་གཅིག་ལ་མགོ་འདྲེན་དང་རམ་འདེགས་བྱ་དགོས་པའི་དུས་ཡིན་གྱི་མགོ་གནོན་དང་དམའ་འབེབས་བྱས་ན་གཞན་སུ་ལའང་མི་ཐུབ་ཀྱི་བསྟན་པ་རིན་པོ་ཆེ་ཉིད་ལ་ཐུབ་པ་ཡིན་པས་གཟབ་དགོས་སོ། །དེ་དག་ནི་ཞར་ལ་འོངས་པའི་གཏམ་མོ། །ཡང་འགའ་ཞིག་གིས་ཆོས་ལུགས་འདི་མི་རིགས་སྔོན་ཐོན་དུ་འགྱུར་བ་ལ་བར་དུ་གཅོད་བྱེད་ཡིན་ཟེར། སྔོན་ཐོན་ཞེས་པ་ཅི་ལ་ཟེར། རིག་གནས་དང་འཚོ་བ་ཡར་རྒྱས་སུ་འགྲོ་བ་ལ་ཟེར་ན། དེ་ལ་འདིས་ཅི་ཞིག་བར་དུ་གཅོད་དེ། ད་ལྟ་འཚོ་བ་དང་དེང་རབས་ཀྱི་རིག་གནས་རྣམས་དར་བའི་ཡང་རྩེར་སོན་པའི་སྔོན་ཐོན་གྱི་རྒྱལ་ཁབ་དག་ན་ཕྱི་ནང་གི་ཆོས་ལུགས་སྣ་ཚོགས་པ་ཤིན་ཏུ་དར་ཡང་རྒྱལ་ཁབ་དེ་དག་སུའི་ཡང་རྗེས་སུ་ལུས་མི་འདུག་ལ། ཆོས་མ་བསྒྲུབས་པས་སུ་ཡང་སྔོན་དུ་ཐོན་ཡོད་པ་མ་མཐོང་ངོ་། །དེ་ལྟ་ན་དམ་པའི་ཆོས་ཞེས་བྱ་བ་འདི་ནི་སྒྲུབ་བྱེད་ཚད་མ་དང་ལྡན་ཞིང་། བྱེད་ལས་འདི་དང་ཕྱི་མའི་སྡུག་བསྔལ་མཐའ་དག་སེལ་བར་བྱེད་པས་སྤྱིར་གལ་ཆེ་ཞིང་། ཁྱད་པར་དུ་རྡུལ་ཕྲན་གྱི་དུས་རབས་དང་མཁའ་དབྱིངས་ཀྱི་དུས་རབས་ལྟ་བུ་མི་རིགས་ཀྱིས་རང་གིས་རང་བརླག་ཏུ་ཉེ་བའི་སྐབས་སུ་ཆེས་མེད་དུ་མི་རུང་བ་ཞིག་ཡིན་པ་ནི་མི་ཤེས་སུ་མི་རུང་བ་ཞིག་གོ །ད་མདོ་ཧྲིལ་གྱིས་དྲིལ་ན། གཡོ་སྒྱུ་མེད་པའི་དྲང་བདེན་དང་། གཞན་ཕན་གྱི་བསམ་པ་བཟང་པོ་བསྟེན་ཏེ་སྐྱེ་འགྲོ་མཐའ་དག་ལ་གནོད་སེམས་སོགས་བསམ་ངན་རྣམས་སྤང་བར་བྱ། རང་རིགས་དང་རང་རིགས་ཀྱི་ཡུལ་སྲོལ་རིག་གནས་རྣམས་ལ་ཡོན་ཏན་དུ་བལྟས་ནས་ཕངས་སེམས་་དང་སྤོབས་པ་བསྐྱེད། སྐྱེ་བ་སྔ་ཕྱི་ལ་ངེས་པ་བསྐྱེད་ནས་མིག་ཐག་ཇེ་རིང་དུ་གཏོང་། ལས་རྒྱུ་འབྲས་ཤེས་ནས་བསམ་བཟང་དང་དྲང་བདེན་གྱི་བསྐུལ་མ་བྱེད། སྟོན་པ་ཚད་མའི་སྐྱེས་བུ་དང་། དམ་ཆོས་རྣམ་གྲོལ་གྱི་འཇུག་ངོགས་སུ་ཤེས་ཏེ་སྐྱབས་གནས་དང་བསྒྲུབ་བྱར་བྱེད་དགོས་ཏེ། འདི་དག་ནི་འདི་ཕྱི་གཉིས་ཀར་བདེ་བའི་རྒྱུ་མ་ནོར་བ་ཡིན་པས་ནམ་ཡང་མེད་དུ་མི་རུང་ངོ་། དེ་རྣམས་ཀྱིས་མ་འོངས་པའི་བསམ་བློའི་འཁྱེར་སོ་ཇི་ལྟར་བྱ་བའི་ཚུལ་མདོར་བསྡུས་པ་ཙམ་ཞིག་བཤད་ཟིན་ཏོ། །      
      ༄༅། །ད་ནི་གཉིས་པ་སྤྱོད་པའི་རིམ་པ་མདོ་ཙམ་བརྗོད་པར་བྱ་སྟེ། སྤྱིར་ཡ་རབས་དམ་པའི་སྤྱོད་པ་བོད་ཀྱི་མེས་པོ་སྲོང་བཙན་སྒམ་པོས་ཕྱག་རྒྱས་བཏབ་པའི་མི་ཆོས་གཙང་མ་བཅུ་དྲུག་གི་ཁྲིམས་ཏེ། དཀོན་མཆོག་ལ་གུས་པ། དམ་ཆོས་སྒྲུབ་པ། ཕ་མ་ལ་བཀུར་བ། ཡོན་ཏན་ཅན་གོང་དུ་བཀུར་བ། རིགས་མཐོ་དང་རྒན་རབས་ལ་ཕུ་དུད་བྱ་བ། མཛའ་བཤེས་ལ་གཞུང་རིང་བ། །ཡུལ་མི་ལ་ཕན་འདོགས་པ། ཡིད་དྲང་བ། མིག་ཡ་རབས་ལ་བལྟ་བ། ཟས་ནོར་ལ་སྤྱོད་ཤེས་པ། དྲིན་ཆེན་ལ་ཕན་ལན། བྲེ་སྲང་ལ་གཡོ་སྒྱུ་མེད་པ། སྤྱི་ལ་སྙོམས་ཤིང་ཕྲག་དོག་མེད་པ། བུད་མེད་གཡོ་སྒྱུ་ཅན་གྱི་ཁ་ལ་མི་ཉན་པ། ངག་འཇམ་ཞིང་སྨྲ་མཁས་པ། ཐེག་པ་ཆེ་ཞིང་བློ་ཁོག་ཡངས་པ་སྟེ་དེ་རྣམས་ལ་བླང་དོར་ཚུལ་བཞིན་བྱ་རྒྱུ་དང་། དེའི་སྟེང་དུ་ལྷ་ཆོས་དགེ་བ་བཅུའི་ཁྲིམས་ཏེ། སྲོག་གཅོད་པ་དང་། རྐུ་འཕྲོག་བྱེད་པ། འདོད་ལོག་སྤྱོད་པ་དང་ རྫུན་དང་། ཕྲ་མ་དང་། ཚིག་རྩུབ། ངག་འཁྱལ་རྣམས་སྨྲ་བ་དང་། བརྣབ་སེམས། གནོད་སེམས། ལོག་ལྟ་སྟེ་དེ་རྣམས་ཀྱིས་སྤོང་བ་དང་། སྲོག་སྐྱོབ་པ་དང་། སྦྱིན་པ་གཏོང་བ་སོགས་ལ་བརྩོན་པ་ནི་ཚེ་འདིར་རང་གཞན་ཐམས་ཅད་བདེ་བའི་རྒྱུ་ཡིན་པར་མ་ཟད་སྐྱེ་བའི་ཕྲེང་བ་ཐམས་ཅད་དུ་བདེ་ཞིང་སྐྱིད་པའི་རྒྱུ་ཡང་ཡིན་པས་ཅིས་ཀྱང་འབད་པས་བསྒྲུབ་དགོས་པ་སྤྱིར་བཏང་ལ། འདིར་དམིགས་བསལ་དུ་བརྗོད་འོས་པ་འགའ་ཞིག་ལས། དང་པོ་སློབ་གསོའི་སྐོར་ལ། མི་ལ་ཤེས་ཡོན་མེད་ན་ལྟོ་གོས་ཀྱི་རྩོལ་སྒྲུབ་ཕལ་བ་ཙམ་མ་གཏོགས་ཁྱད་འཕགས་ཀྱི་་བྱ་བ་གང་ཡང་སྒྲུབ་དཀའ། གལ་ཏེ་མི་རིགས་ཧྲིལ་པོ་དེ་ལྟར་གྱུར་ན་མི་རིགས་དེ་སྔོན་ཐོན་གྱི་གྲལ་དུ་ནམ་ཡང་ཚུད་ཐབས་མེད་པས་ཤེས་ཡོན་སྦྱང་རྒྱུ་འདི་ཤིན་ཏུ་གལ་ཆེ་བ་ཡིན་ཡང་། ང་ཚོ་བོད་ནང་ན་རིག་གནས་གཞན་དུ་མ་ཟད་བོད་རང་གི་བཅུ་ཕྲག་རིག་གཞུང་ཆ་ཚང་ཞིག་སྦྱང་རྒྱུ་ཡོད་པའི་སློབ་གྲྭ་ཧ་ཅང་དཀོན་མོ་རེད། གཞན་ཡང་ཕ་མ་ཚོས་ཕྲུ་གུ་རྣམས་སློབ་གྲྭ་གཏོང་འདོད་མེད་པའི་གོམས་གཤིས་ཤིག་ཆགས་འདུག འདིའི་རྒྱུ་རྐྱེན་གྱི་རྩ་བ་ནི་སྔ་སོར་སློབ་ཆུང་རྣམས་སུ་རྒྱ་ཡིག་ཁོ་ན་མ་གཏོགས་བོད་ཡིག་སྦྱོང་རྒྱུ་མེད་པ་དང་། རྒྱ་ཡིག་སྦྱངས་ཏེ་སློབ་འབྲིང་སོགས་མཐར་ཕྱིན་ཀྱང་བོད་དུ་བྱ་བ་བསྒྲུབ་པའི་ཁོར་ཡུག་བཟང་པོ་ཅི་ཡང་མེད་པས་སླར་ཁྱིམ་དུ་ལོག་ནས་ཕྱུག་འཚོ་བ་དང་། ལུད་སྐྱེལ་བ་སོགས་བྱེད་དགོས་པ་དང་ད་ལྟ་བོད་ཡིག་ཅུང་ཟད་རེ་སྦྱང་རྒྱུ་ཡོད་ཀྱང་དེས་སྤྱི་ཚོགས་ཐོག་དེ་ཙམ་གྱིས་གོ་ཆེན་པོ་ཆོད་ཀྱི་མི་འདུག་པས་གང་ལྟར་ཡང་དགོས་པ་ཆེར་མི་འདུག་སྙམ་དུ་བསམ་ཏེ་སློབ་གྲྭར་མི་གཏོང་བ་ཡིན་པར་མངོན་ནོ། །འདི་དག་རྒྱུ་མཚན་གཏན་ནས་མེད་པ་ཞིག་མ་རེད་མོད། འོན་ཀྱང་ད་ཕྱིན་ཆད་འགལ་རྐྱེན་དེ་དག་སེལ་ཐབས་དང་། ཕྲུ་གུ་ཚོ་ཅིས་ཀྱང་སློབ་གྲྭར་གཏོང་དགོས། རང་རེའི་མི་རབས་རྗེས་མ་རྣམས་ཀྱིས་རིག་གནས་གཞན་མ་ཟད་ཡི་གེ་ཙམ་ཡང་མི་ཤེས་པར་གྱུར་ན་བོད་ཀྱི་མདུན་ལམ་ཟད་ཚར་བ་རེད། ལར་ད་ལྟ་བོད་ཀྱི་ཡུལ་ན་བོད་ཀྱི་སྐད་ཡིག་ལ་རིན་ཐང་ཅི་ཡང་མི་འདུག་སྟེ། ཐ་ན་འཕྲིན་ཡིག་ཅིག་བསྐུར་དགོས་ཀྱང་ཡིག་ཤུབས་སྟེང་དུ་མི་རིགས་གཞན་གྱི་ཡི་གེ་ཞིག་འབྲི་མ་ཤེས་ཕྱིན་བོད་ཡིག་བྲིས་ན་ཡུལ་གཞན་དུ་མི་འཕྲོད་པར་མ་ཟད་བོད་ཀྱི་ཡུལ་ནང་ཕན་ཚུན་དུའང་མི་འཕྲོད། གློག་འཕྲིན་ནི་བོད་ཡིག་གིས་གཏོང་ས་ཞིག་གང་དུའང་མཐོང་རྒྱུ་མི་འདུག། འགྲིམ་འགྲུལ་ཐད་ལ་བོད་ཡིག་དཔྱིས་ཕྱིན་ཞིག་ཤེས་ཀྱང་རླངས་འཁོར་དང་འགྲོ་འོང་གི་དུས་ཚོད་དང་། འཛིན་ཤོག་ཐོག་གི་རྐུབ་སྟེགས་ཀྱི་ཨང་གྲངས་ཙམ་ཡང་ཤེས་དཀའ། གཞན་ཡང་ཐ་ན་རྫོང་གྲོང་ཞིག་ནས་སྨན་ཁང་དང་ཚོང་ཁང་ཞིག་བཙལ་དགོས་ནའང་བོད་ཡིག་ཤེས་པས་ནི་ཕལ་ཆེར་ཕན་པ་ཅི་ཡང་མི་འདུག་པ་ལྟ་བུས་མཚོན་ནས་ཤེས་པར་བྱའོ། །སྐད་ནི་བོད་སྐད་རྐྱང་པ་མ་གཏོགས་གཞན་མི་ཤེས་པ་རྣམས་ཀྱིས་ཉེར་མཁོ་ཕྲན་བུ་ཞིག་ཉོ་དགོས་ཀྱང་བརྡ་མི་འཕྲོད་པར་འདུག་པས་དེ་ལྟར་བོད་ཀྱི་སྐད་ཡིག་གཉིས་ཀྱིས་བོད་རང་གི་ཡུལ་ནས་གོ་མི་ཆོད་ན་གཞན་གང་ཞིག་ནས་གོ་ཆོད་དགོས་པ་ཡིན། འདི་འདྲའི་ངང་མུ་མཐུད་དེ་ཕྱིན་ན་ནམ་ཞིག་བརྡ་སྤྲོད་ཀྱི་ཐོབ་ཐང་ཅི་ཡང་མེད་པར་སྐད་རིགས་ཀྱི་གྲལ་ནས་ངང་ངམ་ཤུགས་ཀྱིས་འབུད་པའི་ཉེན་ཡོད་པས་ཤིན་ཏུ་གཟབ་པར་བྱ་དགོས་སོ། །དེས་ན་རང་རེའི་སྐད་ཡིག་འདིས་འཛམ་གླིང་ཐོག་ཏུ་གོ་ཆོད་པ་ཞིག་འོང་ཐབས་མ་ཐོན་ཀྱང་རང་ཡུལ་དུ་གོ་ཆོད་པ་ཞིག་ནི་ཅིས་ཀྱང་དགོས་ཏེ། དེ་ཙམ་ཡང་མ་བྱུང་ན་ཆེས་ཡིད་ཕམ་དགོས་པའི་གནས་སོ། ཉེ་ཆར་ཁམས་ཕྱོགས་སུ་ཤ་ཞེན་ཅན་གྱི་སྐྱེ་བོ་འགའ་རེས་སྒེར་གྱི་སྒོར་མོ་འབུམ་ཐེར་མང་པོ་བཏང་སྟེ་བོད་ཀྱི་ཤེས་རིག་སྦྱང་སའི་སློབ་གྲྭ་འཛུགས་ཀྱིན་འདུག  ཁོ་ཚོས་སློབ་གྲྭ་འདི་ནས་རིག་གནས་ཆེན་པོ་ཞིག་ཤེས་མ་ཐུབ་རུང་བོད་སྐད་དག་མ་ཞིག་དང་། རྩམ་པ་བརྫིས་ཤེས་པ་ཞིག་འོང་བའི་རེ་བ་བཅངས་ཡོད་ཟེར་རོ། །བསམ་པ་བཟང་པོ་འདི་འདྲ་བས་རང་རིགས་དང་རང་རིགས་ཀྱི་ཡོན་ཏན་རྣམས་ཀྱི་དོན་དུ་འབད་པ་བྱེད་རྒྱུ་འདི་ཤིན་ཏུ་ཡི་རངས་པའི་གནས་དང་། དེང་དུས་སུ་མེད་དུ་མི་རུང་བ་ཞིག་ཀྱང་རེད། གཞན་ཡང་རང་རེ་བོད་ལ་རྒྱུས་མངའ་མེད་པའི་དངོས་ཁམས་དང་རྫས་འགྱུར་སོགས་ནུབ་ཕྱོགས་ཀྱི་རིག་པ་གསར་པ་རྣམས་ལས་ཁོར་ཡུག་སོགས་ལ་གནོད་པ་མེད་པ་དག་ནི་ངེས་པར་དུ་སྤྱོད་ཤེས་དགོས་འདུག ། འདི་རྣམས་འཛམ་གླིང་གི་མི་རིགས་དེ་སྙེད་ཅིག་གིས་སྦྱངས་ནས་ཤེས་འདུག་པ་བོད་ཀྱིས་མི་ཤེས་པའི་རྒྱུ་མཚན་ཅི་ཞིག་ཡོད། དེ་ཡང་བོད་རང་གི་སྐད་ཡིག་གི་སྟེང་ནས་སྦྱང་རྒྱུ་ཡོད་དགོས། དེའི་ཕྱིར་དུ་ཡིག་བསྒྱུར་གྱི་བྱ་བའང་མང་པོ་ཞིག་བྱེད་དགོས་པར་འདུག རང་གི་སྐད་ཡིག་གི་ས་མ་ཤོར་བའི་སྟེང་ནས་གཞན་གྱི་སྐད་ཡིག་སྦྱང་རྒྱུའང་ཤིན་ཏུ་གལ་ཆེ་སྟེ། བརྡ་མ་འཕྲོད་ན་གཞན་དང་འབྲེལ་བ་བྱེད་པའི་ཐབས་མེད། སུ་དང་ཡང་འབྲེལ་འདྲིས་མེད་པར་ལུང་ཀྱོག་ཞིག་ཏུ་གནས་ན་ཤེས་རིག་དང་དཔལ་འབྱོར་གང་ལའང་ཡར་རྒྱས་འོང་དཀའ་བ་ཡིན་ནོ། །དེ་སོགས་མང་པོ་ཞིག་དུས་རབས་གསར་པའི་བོད་ཀྱི་ན་གཞོན་ཚོའི་ལས་ཀྱི་བགོ་སྐལ་དུ་བབ་ཡོད་དོ། དེ་བས་ན་དབང་ཆ་དང་། འབྱོར་པ། ཤེས་ཡོན་ཅུང་ཟད་རེ་ཡོད་པའི་བོད་རིགས་སྐྱ་སེར་ཕོ་མོ་ཡོངས་ཀྱིས་རང་རང་གི་ལྟོ་གོས་ཙམ་ལ་མགོ་མི་འཁོར་བར་བོད་སྤྱིའི་རིག་གནས་སློབ་གསོ་སོགས་ཀྱི་དོན་གལ་བོ་ཆེ་འདི་དག་ལ་ཅིས་ཀྱང་ཐུགས་བསམ་ཞིག་གཏོང་བར་ཞུ་ཞེས་ཐལ་མོ་སྙིང་གར་སྦྱར་ཏེ་ཞེ་ཐག་པ་ནས་གསོལ་བ་འདེབས་པ་ལགས་སོ། །ལར་རང་རེ་བོད་ཀྱི་དགོན་སྡེ་རྣམས་སྔོན་དུས་སུ་རིག་གནས་སྦྱང་སའི་ལྟེ་གནས་ལྟ་བུ་ཞིག་ཡིན་ཡང་ད་ལྟ་འཆད་ཉན་གྱི་སྲོལ་ཡོད་པའང་དཀོན་པོར་གྱུར་འདུག །དགོན་པའི་ནང་དུ་ལྷའི་འཇིམ་བརྙན་བཟོས་པ་འགའ་རེ་དང་གླེགས་བམ་རེ་ཟུང་བརྩིག་རྒྱུ་ཡོད་པ་དང་། འདོན་པ་རེ་གྱེར་རྒྱུ་ཡོད་པ་ཙམ་གྱིས་ཅི་ཡང་མི་འོང་། བཅུ་ཕྲག་རིག་གནས་སྤྱི་དང་ཁྱད་པར་དུ་གྲུབ་མཐའ་སོ་སོའི་རང་རྐང་ཚུགས་པའི་ཐོས་བསམ་དམིགས་ཕུག་པ་རེ་མེད་དུ་མི་རུང་། དེས་ན་དགོན་པ་རྣམས་ཀྱི་ནང་དུ་སྤོང་ཀློག་གཉིས་ཀྱིས་གཙོ་བོ་དང་བྱ་བ་གཞན་རྣམས་ཞར་བྱུང་ཙམ་དུ་བྱ་དགོས་ཀྱི་སྤོང་ཀློག་གི་སྙིང་པོ་མེད་ཕྱིན་འཇིག་རྟེན་གྱི་བྱ་བ་རྣམས་སྤྱི་ཚོགས་ཐོག་ནས་བསྒྲུབས་ན་ཆོག་པས་དགོན་པ་བཞེངས་དགོས་དོན་ཡང་མི་འདུག་གོ །ནང་བསྟན་གྱི་ཕྱོགས་ལ་བྱ་བ་སྒྲུབ་མཁན་འབྲེལ་ཡོད་ཀྱི་མི་རྣམས་ཀྱིས་ཀྱང་དང་པོ་ནང་བསྟན་ཞེས་པ་ཅི་ཞིག་ལ་ཟེར་བ་དེ་ངོས་ཟིན་དགོས་ཏེ་སློབ་དཔོན་དབྱིག་གཉེན་གྱིས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །ཞེས་གསུངས་པ་བཞིན་ལུང་རྟོགས་གཉིས་ལས་གཞན་པའི་བསྟན་པ་ཅི་ཡང་མེད། དེའི་བརྒྱུད་འཛིན་དང་དར་སྤེལ་བྱེད་ནའང་བཤད་སྒྲུབ་གཉིས་ཀྱིས་བྱེད་དགོས་ཀྱི་དེ་ལས་གཞན་པའི་བྱེད་ཚུལ་གང་ཡང་མེད་དེ། །དེ་འཛིན་བྱེད་པ་སྨྲ་བྱེད་དང་། སྒྲུབ་པར་བྱེད་པ་ཁོ་ནའོ། །ཞེས་གསུངས་པ་ལྟར་རོ། །སྤྱིར་མི་ཐམས་ཅད་ལ་རང་རང་གི་བབ་ཐང་ལྟར་བྱ་བ་རེ་བསྒྲུབ་རྒྱུ་ཡོད། རབ་ཏུ་བྱུང་བ་རྣམས་ཀྱི་བྱ་བ་ནི་འཇིག་རྟེན་གྱི་བྱ་བ་དཀའ་ཚེགས་ཅན་རྣམས་ཕར་དོར་ནས་ལྟོ་གོས་འབེལ་པོའི་ངང་རང་དགར་འཁྱམས་ནས་སྡོད་རྒྱུ་དེ་མ་རེད། ང་ཚོའི་བྱ་བ་ནི་ལམ་བསླབ་པ་གསུམ་ལ་ཉམས་ལེན་གྱི་སྒོ་ནས་རིག་པའི་གནས་ལྔ་སྤྱི་དང་ཁྱད་པར་དུ་སྐྱེ་འགྲོ་ཡོངས་ཀྱི་ཕན་བདེའི་གཞི་མ་ནང་རིག་པ་ལ་ཐོས་པ་དང་། བསམ་པ། འཆད་པ། རྩོད་པ། རྩོམ་པ་རྣམས་ཀྱིས་བརྒྱུད་འཛིན་དང་དར་སྤེལ་གནད་དུ་སྨིན་པ་ཞིག་བྱ་རྒྱུ་དེ་ཡིན། དེ་ཡང་དེང་རབས་ཀྱི་མིའི་སེམས་ལ་ཕན་གདགས་པ་ལ་དམ་པ་གོང་མའི་ལྟ་སྒོམ་སྤྱོད་པའི་གནད་མ་འཕྱུག་པའི་ཐོག་ནས་དེང་རབས་ཀྱི་རིག་པ་གསར་བ་དང་སྦྱར་ཏེ་དེ་དང་གནད་གཅིག་པ་དང་། དེ་ལས་ཆེས་ཁྱད་པར་དུ་འཕགས་ཚུལ་རྣམས་ཀྱང་ངེས་པར་དུ་འཆད་ཤེས་དགོས་ཏེ་དུས་བབ་ཀྱི་ཤེས་བྱ་ཡིན་པའི་ཕྱིར་རོ། །ནང་རིག་པ་འདི་བོད་མི་རིགས་སྤྱིའི་རིག་གཞུང་གི་གཙོ་བོ་ཡིན་པས་འདིའི་ཕྲ་ཞིབ་ཀྱི་རིགས་པ་རྣམས་ནི་རབ་ཏུ་བྱུང་བ་རྣམས་མ་ཟད་ཁྱིམ་པ་ཕོ་མོ་བྱིངས་ཀྱིས་ཀྱང་ཅི་རིགས་པ་ཞིག་རང་གིས་ཤེས་དགོས་པ་དང་གཞན་ལ་སྨྲ་ནུས་པ་ཞིག་གལ་ཆེའོ། །གཉིས་པ་ཡུལ་སྲོལ་གོམས་གཤིས་ཀྱི་སྐོར་ལ། གངས་ཀྱི་ར་བས་ཡོངས་སུ་མཛེས་པའི་ལྗོངས་འདིར་བོད་མི་རིགས་ཀྱིས་ལོ་རྒྱུས་ཀྱི་དུས་རབས་ཤིན་ཏུ་རིང་པོ་ཞིག་གི་ནང་དུ་འཚོ་བ་བསྐྱལ་བའི་ཡུན་ལ་ཐུན་མོང་མ་ཡིན་པའི་གོམས་གཤིས་ཤིག་ཆགས་ཡོད། དེའང་སྤྱིའི་ཆ་ནས་བཤད་ན་དཀོན་མཆོག་གསུམ་ལ་མཐོ་དམན་ཐམས་ཅད་ཅི་བས་ཀྱང་གུས་ཤིང་། ལུས་དང་སྲོག་ལ་བབ་ཀྱང་དད་པ་མི་གཏོང་། བོད་ཆོས་ལྡན་གྱི་རྒྱལ་ཁབ། ཨ་མ་དང་མ་ཎི་མཉམ་ཤེས་ཞེས་པའི་དཔེ་ལྟར་བྱིས་པ་རྣམས་ཨ་མ་ཟེར་ཤེས་པ་དང་མ་ཎི་འདོན་ཤེས་པ་ཕལ་ཆེར་དུས་མཉམ་འོང་། རྒས་པ་དག་གི་ཚེ་མཐའ་ནི་དམ་པའི་ཆོས་ཁོ་ནས་སྐྱེལ། ཐ མས་ཅད་ཀྱིས་ལས་རྒྱུ་འབྲས་ལ་བག་ཡོད་བྱེད། རྒྱུ་འབྲས་བརྩི་འཚོ་ཅན་གྱི་གང་ཟག་མི་ཡ་རབས་དང་བཟང་པོར་བརྩི། སྤྱིར་སེམས་ཅན་སུ་ལའང་ཤ་ཚ་དང་སྙིང་རྗེ་བྱེད་དེ། བཤའ་ལུག་སོགས་མི་བཤའ་ཀ་མེད་འཚོ་བའི་ཆ་རྐྱེན་གྱིས་ཕོངས་པས་རེད་ཀྱང་། བཤའ་བའི་ཚེ་ན་ཁར་དམ་རྫས་བླུགས། རྣ་བར་སངས་རྒྱས་ཀྱི་མཚན་དང་གཟུངས་ཅི་ཤེས་རྣམས་བརྗོད་དེ་སྙིང་རྗེ་རྗེའི་ངང་འགྱོད་བཞིན་བྱེད་པ་མ་གཏོགས་ཅི་མི་སྙམ་དུ་གསོད་མཁན་དཀོན་མོ་ཡིན། བྱས་པ་ཤེས་ཤིང་དྲིན་དུ་གཟོ་སྟེ་ཕན་ཅུང་ཟད་བཏགས་པའང་ཡུན་རིང་བོར་སེམས་སུ་འཛིན། བློ་ཐུབ་པའི་གྲོགས་མི་བསླུ་ཞིང་དེའི་རྗེས་སུ་སྲོག་ཀྱ, ང་, གཏ, ོང་། སྔར་འདྲིས་པ་དང་མ་འདྲིས་པ་གང་ཡིན་ཡང་ཉམ་ཐག་ལ་གྲོགས་བྱ་རྒྱུར་རང་བཞིན་གྱིས་དགའ། ཕོ་མོ་ཐམས་ཅད་ཀྱིས་མི་གཞི་བཟང་པོ་ལ་ཆེས་ཤིན་ཏུ་གལ་ཆེན་བྱེད། དགྲ་ལ་ལུས་སྲོག་ལ་ཡང་མི་བལྟ་བའི་དཔའ་ཞིང་བརྟུལ་ཕོད་ཆེ་བ་དང་། ཚིག་ལ་བརྩི་འཇོག་ཆེ་བ་སོགས་ཡ་རབས་ཀྱི་གཤིས་ཀ་མང་པོ་འདུག་པ་འདི་རྣམས་སྲིད་མཐའི་བར་དུ་མེད་དུ་མི་རུང་བ་ཡིན་པས་སྲུང་སྐྱོབ་བྱ་རྒྱུ་ཤིན་ཏུ་གལ་ཆེ། གོས་རྒྱན་གྱི་སྐོར་ལ་མི་རིགས་གཞན་དག་ལ་འགྱུར་ལྡོག་སྣ་ཚོགས་བྱུང་ལ། ད་ལྟའང་གསར་བཏོད་ཀྱི་རྣམ་པ་སྤང་ལ་ཤ་མོ་རྡོལ་བ་ལྟར་འོང་གིན་འདུག་ཀྱང་། རང་རེ་བོད་མི་མཐའ་དག་གི་རྒྱན་གོས་ཀྱི་ངོ་བོ་ཡང་རང་གི་སྲོལ་ལས་གཞན་དུ་མ་སོང་བ་ཞིག་ཡིན་ན་ལེགས་ཏེ། བོད་ཀྱི་གོས་འདི་དག་རང་གི་སའི་དྲོད་དང་འཚམ་པའི་གོས་ཡིན་པས་གཞན་གྱིས་དགོས་པ་མི་འདུག་ལ། ཚ་བའི་ས་ཁུལ་གཞན་དུའང་ཡུལ་དང་མཐུན་པའི་བོད་གོས་གྱོན་ན་སྟབས་མི་བདེ་བ་ཅི་ཡང་མི་འདུག  ཁྱད་པར་དུ་རང་གི་ཆས་གོས་གྱོན་ན་འཛམ་གླིང་ཐོག་བོད་མི་རིགས་འཚོ་ཞིང་གནས་པའི་མཚོན་བྱེད་དང་། རང་ཉིད་ཀྱང་གངས་ཅན་པའི་ཤ་ཁྲག་ལས་བྱུང་བ་ཞིག་ཡིན་པའི་བསམ་པ་མི་མདོར་བའི་དགོས་པའང་འདུག་པས་གལ་ཆུང་དོན་མེད་ཅིག་གཏན་ནས་མ་རེད། རབ་ཏུ་བྱུང་བ་རྣམས་ཀྱིས་ནི་ངེས་པར་དུ་སྟོན་པས་གནང་བའི་ངུར་སྨྲིག་གི་རྒྱལ་མཚན་ཚུལ་བཞིན་དུ་འཆང་དགོས་ཀྱི་རྒྱ་བོད་སུ་ཡིན་དང་སེར་སྐྱ་གང་ཡིན་གྱི་དབྱེ་འབྱེད་མི་ཐུབ་པ་ཞིག་བྱེད་མི་རུང་། སྤྱོད་ལམ་ཐམས་ཅད་ནི་དམ་པའི་ཆོས་འདུལ་བ་དང་མཐུན་པ་ཞིག་དགོས། དེང་རབས་ཀྱི་བྱ་བ་གསར་བ་རྣམས་ལའང་འདུལ་བ་བསྡུས་པའི་དགོངས་པ་བཞིན་དགག་དགོས་དང་བསྟུན་ཏེ་བླང་དོར་གྱི་གནས་རྣམས་གསལ་བར་བྱེད་པ་གལ་ཆེ་བས་གངས་ཅན་གྱི་འདུལ་བ་འཛིན་པ་དག་གིས་ཐུགས་ལ་འདོགས་པ་ཞུ།
    སྐད་ཡིག་གི་སྐོར་ལ། བོད་རིགས་དག་མ་ཞིག་ཡིན་ཕྱིན་བོད་ཀྱི་སྐད་དག་མ་ཞིག་ངེས་པར་ཤེས་དགོས། ཤེས་པ་དེ་སྤྱད་དགོས། གལ་ཏེ་བོད་རང་གི་ཆས་གོས་ཀྱང་མི་བྱེད། སྐད་ཡིག་དག་ཀྱང་མི་སྤྱོད་ན་དེའི་ཚེ་བོད་ཅེས་པའི་མིང་བོར་ཚར་བ་རེད། ད་ལྟ་བོད་ན་རྫོང་དང་གྲོང་ཁྱེར་ཆེ་ཆུང་སྣ་ཚོགས་པར་གནས་པའི་ཕ་མ་ཐམས་ཅད་བོད་རིགས་གཤའ་མ་ཡིན་ངེས་ཀྱི་བོད་ཕྲུག་ཚོས་བོད་ཀྱི་སྐད་ཡིག་གཏན་ནས་མི་ཤེས་པའི་གནས་ཚུལ་ཚབས་པོ་ཆེ་ཞིག་འོང་གིན་འདུག  དེ་ཚོ་ཕལ་ཆེ་བས་བོད་ཀྱི་གཤིས་ཀའང་དོར་ཚར་འདུག་པས་ཧ་ཅང་བློ་ཕམ་པའི་གནས་ཤིག་རེད། དེར་མ་ཟད་བོད་རིགས་ལས་བྱེད་པ་སོགས་བོད་ཀྱི་ཆེན་པོར་རློམ་པ་ཚོས་ཀྱང་བོད་སྐད་དག་མ་ཞིག་ཤོད་ཐུབ་ཀྱིན་མི་འདུག་སྟེ་གཏམ་གྱི་ལྔ་ཆ་གཅིག་གམ་གཉིས་ཙམ་ཞིག་རྒྱ་སྐད་ཡིན་པས་རྒྱ་སྐད་མི་ཤེས་མཁན་གྱིས་ད་ལྟ་བོད་ན་གཏམ་མགོ་མཇུག་ཚང་བ་ཞིག་མཉན་རྒྱུ་རྙེད་དཀའ་མོ་རེད། དེའི་རྒྱུ་མཚན་ཡང་ཕལ་མོ་ཆེ་ཞིག་དོན་མེད་ལད་མོ་ཁོ་ན་དང་། ཉུང་ཤེས་ཞིག་ནི་དེང་དུས་གསར་དུ་བྱུང་བའི་འཕྲུལ་ཆས་སོགས་དངོས་པོ་མང་པོ་ཞིག་ལ་བོད་སྐད་ཀྱི་སྐད་ཐོག་ནས་མིང་ལེགས་པོ་ཞིག་ད་དུང་ཆགས་མི་འདུག་པས་གཞན་དག་གིས་བཏགས་པའི་མིང་རྣམས་གཡར་དགོས་བྱུང་བ་རེད། དེའི་རྩ་བ་བོད་རང་གི་སྐད་ཡིག་ལ་རྩིས་ཆེན་མ་བྱས་པས་ལན་གྱི་བོད་སྐད་ཀྱིས་དེ་དག་ལ་མིང་གདགས་མི་ནུས་པ་གཏན་ནས་མ་རེད། དེས་ན་འདི་རིགས་ལ་བོད་གཅིག་འགྱུར་གྱི་མིང་ཞིག་གདགས་རྒྱུ་གལ་ཆེ་སྟེ་བོད་ཀྱི་ཕལ་སྐད་ཤེས་པ་གཞིར་བཞག་གིས་སྐད་རིགས་གཞན་ཤེས་ན་ཡོན་ཏན་ཡིན་གྱི་བོད་ཀྱིས་བོད་སྐད་མི་ཤེས་བཞིན་སྐད་རིགས་གཞན་ཞིག་སྨྲ་ཁུལ་བྱས་ན་ཁྲེལ་དགོད་བྱེད་མཁན་མ་གཏོགས་བསྔགས་བརྗོད་བྱེད་མཁན་ཞིག་འཛམ་གླིང་གི་ཁྱོན་ན་ཡོད་ཚོད་མི་འདུག་པའི་ཕྱིར་རོ།  ཡང་བོད་ཀྱི་རྩོམ་པ་པོ་དང་དཔེ་སྐྲུན་ཁང་འགའ་རེས་བོད་ཡིག་ནང་རྒྱ་ཡིག་གི་བརྡ་མཚོན་རྟགས་ཤད་ཅེས་པ་དེ་བསྲེས་ཏེ་རྒྱ་མིན་བོད་མིན་ཁྲ་ཧྲིལ་ལེ་བ་ཞིག་བྱས་འདུག  རྒྱ་ཡིག་ལ་སྔོན་འདི་དག་མེད་ཀྱང་གཅོད་མཚམས་དཀའ་བ་དང་དོན་ནོར་ཉེན་བྱུང་བས་སུང་རྒྱལ་རབས་ཚུན་ཆད་ནས་རིམ་བཞིན་དར་བར་གྱུར་མོད། བོད་ཀྱི་ཡི་གེ་ལ་མི་འཁྲུགས་པའི་རྒྱ་རིམ་པ་བདུན་དང་རྣམ་དབྱེ་ཚིག་ཕྲད་དེ་སྙེད་ཅིག་ཡོད་པས་གཅོད་མཚམས་དང་དོན་ནོར་ཉེན་ཅི་ཡང་མེད་པས་དགོས་པ་མི་འདུག་གོ །སྤྱིར་མི་རིགས་གཞན་གྱི་ལེགས་ཆ་ལེན་པ་ཡོན་ཏན་ཡིན་ཡང་དགོས་མེད་ཀྱི་ལད་མོ་དེ་ཚོ་བསྐྱུར་ན་སྙམ་སྟེ་འདི་འདྲའི་རྒྱ་འབྱམས་སུ་སོང་ན་དགེ་མཚན་དུ་ཅི་ཡང་མི་འགྱུར་རོ། །སྡིག་པའི་ཕྲུ་གུ་མའི་གཤེད་དུ་སོང་བ་ལྟ་བུ་མ་ཡིན་པར་མཁས་པ་སྔ་མ་རྣམས་ཀྱི་དགོངས་པ་དྲི་མ་མེད་པ་གཞིར་བཞག་གི་ཐོག་ནས་བོད་ཀྱི་སྐད་ཡིག་ལ་དག་ཐེར་དཔྱིས་ཕྱིན་པ་ཞིག་བྱ་རྒྱུ་དང་། ཅི་ནུས་ཀྱིས་བོད་ཆོལ་ཁ་གསུམ་གྱི་ཡིག་སྐད་གཅིག་འགྱུར་བྱ་རྒྱུ་སོགས་ནི་གལ་ཆེའི་ལས་ཀ་ཡིན་ནོ། །
   དཔལ་འབྱོར་འཛུགས་སྐྲུན་གྱི་སྐོར་ནི། ཇི་སྐད་དུ། མི་རྣམས་བདེ་བའང་ལོངས་སྤྱོད་མེད་མིན་ལ། །ཞེས་གསུངས་པ་བཞིན་ལོངས་སྤྱོད་མེད་ན་མིའི་རིགས་ལ་ཚེ་འདིའི་བདེ་བའང་འོང་ཐབས་མེད་ལ་རིག་གནས་དར་རྒྱས་སུ་གཏོང་ཐབས་ཀྱང་མི་འདུག ལོངས་སྤྱོད་མེད་ན་ཟས་གོས་ཀྱི་འཚོ་བ་ཙམ་ཡང་མི་འོང་ན་གཞན་པའི་འཛུགས་སྐྲུན་སོགས་སྟོང་བསམ་རང་རེད། དཔལ་འབྱོར་འཕེལ་རྒྱས་སུ་གཏོང་བའི་ཐབས་ནི་བཟོ་ཚོང་སོགས་ཡིན་ན། ད་ལྟ་བོད་ན་བཟོ་གྲྭ་མེད་པས་ཐོན་རྫས་གཞན་ལ་འཚོང་རྒྱུ་ལྟ་ཅི་བོད་རང་ལ་ཉེ་བར་མཁོ་བའི་གོས་དང་ཡོ་བྱད་དག་ཀྱང་གཞན་ནས་བླང་བར་བྱ་དགོས་ལ། དེའང་ལྕགས་ལམ་མེད་པས་ཕལ་ཆེར་རླངས་འཁོར་ཁོ་ན་ལ་བརྟེན་དགོས་པས་ཤིན་ཏུ་ཚེགས་ཆེ་ཞིང་། བོད་དུ་འབྱོར་ཚེ་དངོས་རྫས་ཐམས་ཅད་རིན་ཐང་ཇེ་ཆེར་འགྱུར་བ་དང་། བཟོ་གྲྭ་སོགས་དངུལ་གྱི་འོང་སྒོའི་ཁོར་ཡུག་མེད་ན་ནང་འདོམས་པའི་རྐྱེན་སོགས་ཀྱིས་འཚོ་བ་ལ་དཀའ་ངལ་འོང་གིན་འདུག དེས་ན་རང་རེ་བོད་ཀྱིས་ཀྱང་ད་ལྟ་འཛམ་གླིང་སྤྱིའི་སྲོལ་ལྟར་བཟོ་གྲྭ་དང་། ལྕགས་ལམ། མཁའ་འགྲུལ། ཚོང་ལས་སོགས་འཛུགས་སྐྲུན་བྱ་རྒྱུར་འབད་པ་བྱེད་དགོས། བོད་ཀྱི་ས་ཆར་འདི་རྣམས་བྱེད་མི་བཏུབ་པ་མ་རེད་ལ་བོད་མིས་སྦྱངས་ན་འདི་དག་མི་ཤེས་པའང་མ་རེད། བོད་ལ་སྔོན་ཡང་བཟོ་གྲྭ་དང་ལྕགས་ལམ་སོགས་མེད་པས་ད་ལྟ་འབད་ཀྱང་མི་ནུས་སོ་སྙམ་ན། མ་ཡིན་ཏེ། འཛམ་གླིང་ཐོག་དཔལ་འབྱོར་འཕེལ་རྒྱས་སུ་ཕྱིན་ཡོད་པའི་རྒྱལ་ཁབ་འདི་དག་གིས་ཀྱང་དུས་ཡུན་ཐུང་ངུ་ཞིག་གི་ནང་འབད་པ་བྱས་ནས་ཕྱུག་པོར་གྱུར་པ་ཡིན་གྱི་མི་ལོ་བརྒྱ་ཕྲག་འགའ་རེའི་སྔོན་དུ་འདི་དག་ལའང་ཐ་ན་རླངས་འཁོར་གཅིག་ཀྱང་མི་འདུག  འཚོ་བ་ཡར་རྒྱས་སུ་གཏོང་བའི་ཚན་རིག་ལག་ཤེས་འདི་དག་ཀྱང་ཐམས་ཅད་ཀྱིས་རང་རང་གིས་གསར་གཏོད་བྱས་པ་མ་རེད། འགའ་རེས་གསར་བཏོད་བྱས་པ་ཕན་ཚུན་སྦྱངས་ནས་ཤེས་པ་དེ་རེད། དེ་ལྟ་ན་ང་ཚོ་བོད་ཀྱིས་ཀྱང་ཚན་རིག་ལག་ཤེས་སོགས་བརྒྱ་ལ་གསར་གདོད་བྱེད་པ་ནུས་ནའང་གཞན་གྱིས་གསར་བཏོད་བྱས་ཟིན་པ་དེ་ཚོ་སྦྱངས་ན་ངེས་པར་དུ་ཤེས་ཐུབ་སྟེ། འདི་དག་བོད་ཀྱིས་སྦྱང་རྒྱུ་མ་རྙེད་ནས་མ་ཤེས་པ་ཡིན་གྱི་སྦྱངས་ཀྱང་བླུན་ཆེས་པས་མ་ཤེས་པ་ག་ལ་ཡིན། དེས་ན་ལག་རྩལ་འདི་སྦྱངས་ནས་བོད་དུ་བཟོ་ལས་དར་རྒྱས་སུ་གཏོང་ཐུབ་ན་མི་རི་བའི་རིན་གོང་ཆེན་པོ་གཞན་ལ་གཞལ་མི་དགོས་པ་དང་། དངོས་པོ་རྫུན་མ་བཟོས་ཏེ་མགོ་སྐོར་མཁན་རྣམས་ཀྱི་གཡོ་འོག་ཏུ་འཛུལ་མི་དགོས་པ་དང་། བོད་མི་ཚོར་བྱ་བ་བསྒྲུབ་པའི་ཁོར་ཡུག་ཡོད་པས་འོང་སྒོ་ཇེ་བཟང་དུ་གྱུར་པ་སོགས་ཀྱིས་མི་རིགས་ཀྱི་འཚོ་བ་མགྱོགས་པོར་ཡར་རྒྱས་སུ་འོང་བ་ལ་ཐེ་ཚོམ་མེད་དོ། །དེ་ཙམ་དུ་མ་བྱུང་རུང་རང་གི་གོས་སོགས་ཡོ་བྱད་འདི་རྣམས་ནི་ངེས་པར་དུ་བོད་རང་གིས་བཟོ་ཤེས་པ་ཞིག་འོང་རིགས་ཏེ་འཛམ་གླིང་ཧྲིལ་པོར་ཚན་རིག་ལག་ཤེས་འདི་འདྲའི་དར་རྒྱས་སུ་ཕྱིན་པའི་སྐབས་སུ་བོད་ཀྱིས་དེ་ཙམ་ཡང་མི་ཤེས་པ་ཅིའི་ཐ་ཚིག་ཡིན། དེ་བཞིན་དུ་ཚོང་ལས་གཉེར་ན་ཡང་བོད་ལ་ཆ་རྐྱེན་མེད་པ་མ་ཡིན་ཏེ། རི་ཐང་ཐམས་ཅད་རིན་ཐང་དང་ལྡན་པའི་ཚོང་རྫས་འབའ་ཞིག་རེད། འདི་དག་ཀྱང་མི་རིགས་རང་གིས་སྤྱོད་ཤེས་པ་ཞིག་དང་། ས་གནས་རང་གི་མི་དམངས་ཀྱི་འཚོ་བ་དང་སྤྱིའི་འཛུགས་སྐྲུན་ལ་ཕན་ཐོགས་པ་ཞིག་དགོས་ཀྱི་གཞན་དུ་ཁོར་ཡུག་ཐམས་ཅད་གཏོར་བརླག་བྱས་ནས་འཛུགས་སྐྲུན་ཅི་ཡང་མེད་ན་འཚོ་བ་ལ་གནོད་པ་མ་གཏོགས་ཕན་པ་མེད་དོ། །དེང་དུས་རྩམ་པ་དང་ཧོ་ཚ་བཟའ་རྒྱུ་ཡོད་པ་དང་། མིས་བཟོས་པགས་པ་གྱོན་རྒྱུ་ཡོད་པ་ཙམ་གྱིས་དེང་རབས་ཀྱི་འཚོ་བ་ཡར་རྒྱས་ཀྱི་གྲལ་དུ་མི་ཚུད་པ་འདྲ་བས་དཔལ་འབྱོར་འཛུགས་སྐྲུན་གྱི་ཆེད་དུ་འབད་པ་དྲག་པོ་བྱེད་དགོས་ཀྱི་འཚོ་བ་ཡར་རྒྱས་ཡིན་ཞེས་གཏམ་སྙན་པོ་བརྗོད་ནས་བསྡད་པས་མི་འོང་སྟེ། མི་འཁྱགས་ཁ་ནས་སྨྲས་ཀྱང་། འཁྱགས་འདར་མིག་གིས་མཐོང་ཟེར་བའི་པེ་ལྟར་དུ་གྱུར་ན་འཛམ་གླིང་གི་སྐྱེ་བོ་རྣམས་ཀྱིས་ཁྲེལ་བའི་རྒྱུ་ཡིན་པའི་ཕྱིར་རོ། །བོད་མི་དམངས་ལ་བཟོ་ཚོང་གི་བྱ་བ་སྒྲུབ་པའི་བཟོ་གྲྭ་སོགས་ཁོར་ཡུག་བཟང་པོ་མེད་པ་འདིས་འཚོ་བ་མ་ཟད་རིག་གནས་དར་རྒྱས་སུ་འགྲོ་བ་ལའང་གནོད་པ་ཆེན་པོ་ཡོད་ཚུལ་གོང་དུ་བཤད་པ་ལྟར་ཡིན་པས་གལ་ཤིན་ཏུ་ཆེའོ། ། མདོར་ན། མིའི་རིགས་འདྲ་མཉམ་ཡིན་པ་ལ་འཛམ་གླིང་གི་མི་གཞན་རྣམས་ལ་རང་ཡུལ་ན་རང་དབང་གིས་སྤྱོད་རྒྱུ་ཡོད་པའི་བཟོ་གྲྭ་དང་ཚོང་ར་སྣ་ཚོགས། སྨན་ཁང་། ལྕགས་ལམ། མཁའ་འགྲུལ། གྲོང་ཁྱེར་གྱི་འཛུགས་སྐྲུན། ཐ་ན་གཞུང་ལམ་སྤུས་ལེགས་ཡན་ཆད་དེང་རབས་ཀྱི་རྣམ་པ་བརྗོད་ལས་འདས་པ་ཞིག་བྱུང་ཡོད་པ་འདི་རྣམས་ལ་ང་ཚོ་བོད་མི་རིགས་ཀྱིས་སྤྱད་པར་འདོད་དམ་མི་འདོད། འདི་དག་ཡོད་ན་དགའམ་མི་དགའ། དགོས་སམ་མི་དགོས། ང་རང་ལ་མཚོན་ན་ཡུལ་གཞན་ནས་ཐ་ན་མྱུར་བགྲོད་གཞུང་ལམ་བཟང་པོ་ཞིག་མཐོང་ནའང་། ཀྱེ་མ་ང་ཚོ་བོད་མི་རིགས་ལའང་འདི་འདྲ་རེ་སྤྱོད་རྒྱུ་ཡོད་ན་སྙམ་པའི་ཡིད་སྨོན་འཆོར་གྱིན་འདུག  གཞན་ཐམས་ཅད་ཀྱང་དེ་དང་འདྲ་བ་ཡིན་སྙམ་སྟེ། མིའི་རིགས་ཐམས་ཅད་བདེ་བ་འདོད་པ་དང་སྡུག་བསྔལ་མི་འདོད་པ་མཚུངས་པའི་ཕྱིར་རོ། །དེ་ལྟ་ན་ང་ཚོ་བོད་ལ་ད་ལྟ་འདི་དག་འདུག་གམ་མི་འདུག གལ་ཏེ་མི་འདུག་ན་འདི་མུས་སུ་བསྡད་པས་འབད་མེད་ལྷུན་གྲུབ་ཏུ་འབྱུང་ངམ་མི་འབྱུང་། མི་འབྱུང་ན་འདི་དག་གི་ཆེད་དུ་ཐབས་སྣ་ཚོགས་ཀྱིས་འབད་པ་བྱ་རྒྱུ་ནི་བོད་མི་རིགས་ཀྱི་ལས་འགན་ཡིན་ནོ། །སྤྱོད་པའི་རིམ་པ་དེ་དག་གི་དོན་བསྡུ་ན། དང་པོ་གནའ་དེང་གི་རིག་གནས་སློབ་གསོ་འདི་འཕེལ་རྒྱས་སུ་བཏང་སྟེ་མི་རིགས་སྤྱི་ལ་རིག་གནས་ཀྱི་དཔངས་ཚད་ལྡན་པ་དང་། ཁྱད་པར་ཆེད་ལས་ཀྱི་མཁས་པ་མང་ཙམ་སྐྱེད་སྲིང་བྱེད་ཐུབ་ན་མི་རིགས་རང་ཉིད་སྟོབས་ལྡན་ཞིག་ཏུ་གྱུར་ནས་ཆོས་དང་འཇིག་རྟེན་གྱི་བྱ་བ་གང་ཡང་བསྒྲུབ་ནུས་པ་ཞིག་ཏུ་འགྱུར་གྱི་ཐམས་ཅད་བླུན་པོ་ཁྱུ་གཅིག་ཏུ་སོང་ཚེ་ཡར་རྒྱས་ཀྱི་རེ་བ་མེད་པས་སློབ་གསོ་ལ་ནན་ཏན་བྱ་དགོས། དེ་ཡང་རང་རིགས་ཀྱི་རིག་གནས་དང་ཡུལ་ལུགས་ལ་གཙིགས་སུ་མ་བཟུང་ན་ཇི་ལྟར་མཁས་ཀྱང་རིམ་བཞིན་རིགས་གཞན་ཞིག་ཏུ་གྱུར་ནས་ཕ་མེས་ཀྱི་རིགས་དེའི་མིང་དོན་གཉིས་ཀ་བོར་བས་མི་རིགས་ཀྱི་ལོ་རྒྱུས་མཇུག་རྫོགས་པར་འགྱུར་བས་ཤིན་ཏུ་བག་ཟོན་བྱ་བ་གལ་ཆེ། ཡང་གལ་ཏེ་མི་རིགས་ཀྱི་ངོ་བོ་མ་བོར་བ་ཙམ་ཡོད་ཀྱང་འབྱོར་བ་ཅི་ཡང་མེད་པའི་དབུལ་པོ་ཡི་དྭགས་ཀྱི་ཡུལ་ལྟ་བུ་ཞིག་ཏུ་གྱུར་ན་དབུལ་ཕོངས་ཀྱི་སྡུག་བསྔལ་ཉམས་སུ་མྱོང་བ་ལས་བདེ་སྐྱིད་ཀྱི་འཚོ་བ་ཞིག་མི་འོང་། བོད་མི་དམངས་སྤྱིའི་འཚོ་བ་ཡར་རྒྱས་མ་བྱུང་ན་གང་ཟག་འགའ་རེ་བདེ་བ་ཙམ་གྱིས་མི་འོང་བས་ཐུན་མོང་དུ་འབད་བརྩོན་བྱ་དགོས། ལར་གནས་སྐབས་ཐམས་ཅད་དུ་བོད་མི་རིགས་སྤྱིའི་དོན་ལ་བསམ་བློ་གཏོང་རྒྱུ་འདི་ཅི་བས་ཀྱང་གལ་ཆེའོ། །དེ་ལྟར་བསམ་པ་བཟང་པོ་གཞན་ལ་འཚེ་བ་སྤོང་འདོད་དང་། ཕན་པ་སྒྲུབ་འདོད་ཀྱིས་བོད་ཆོལ་ཁ་གསུམ་ན་གནས་པའི་མིའི་འགྲོ་བ་མ་ཟད་རང་རེ་དང་མཉམ་དུ་གནས་པའི་འབུ་སྲིན་རི་དྭགས་ཡན་ཆད་ཀྱང་འཚེ་བ་མེད་པར་བདེ་བའི་ངང་དུ་གནས་པ་ཞིག་དང་། དཀོན་མཆོག་ལ་དད་པ་དང་ལས་འབྲས་ལ་ཡིད་ཆེས་ཀྱིས་དགེ་བ་བསྒྲུབས་ཏེ་ཚེ་ཕྱི་མ་ལའང་འགྲོ་ལམ་ཡོད་པ་ཞིག་བྱ་རྒྱུ་དང་། ཡ་རབས་ཀྱི་སྤྱོད་པ་བཟང་པོ་སྤྱི་དང་ཁྱད་པར་དུ་དེང་དུས་དགོས་པ་སྐབས་སུ་བབ་པའི་བྱ་བ་གོང་དུ་བཤད་པ་དེ་རྣམས་བསྒྲུབས་ཏེ་རང་རེ་ལ་ཚེ་འདིའི་བདེ་སྐྱིད་ཡོད་པར་མ་ཟད་མ་འོངས་པའི་བུ་རབས་ཚ་བརྒྱུད་དང་བཅས་པ་ལའང་ཚེ་འདི་ཕྱི་གཉིས་ཀར་བདེ་སྐྱིད་ཀྱི་མདུན་ལམ་ཡོད་པ་ཞིག་བྱ་རྒྱུ་ནི་བོད་མི་རིགས་ཐམས་ཅད་ཀྱིས་བསམ་བློ་གཏོང་འོས་པ་ཞིག་དང་། བྱ་བ་བསྒྲུབ་དགོས་པ་ཞིག་ཡིན་པས་གངས་ཅན་གྱི་སེར་སྐྱ་ཕོ་མོ་རྒན་གཞོན་ཡོངས་ལ་ལྷག་བསམ་རྣམ་པར་དག་པས་དེ་སྐད་གསོལ་བ་འདེབས་པ་ལགས་སོ། །
སྨྲས་པ།
 
    རབ་དཀར་ས་འཛིན་ཕྲེང་བས་མཛེས་བརྒྱན་པའི། །བྷོ་ཊའི་ལྗོངས་ཆེན་ཆོས་ཀྱི་ཞིང་ཁམས་ན། ། སྔོན་ཞིག་སྡེ་བཞིའི་ཕུན་ཚོགས་དར་བའི་གཏམ། །དུས་ཀྱི་མཐར་ཡང་སྒྲ་འཛིན་གསོས་སུ་ཆེ། ། འོན་ཀྱང་སྲིད་པའི་རྒྱ་མཚོ་ན། །འབྱོར་རྒུད་ལས་ཀྱི་སྣང་བ་ནི། །སྣ་ཚོགས་རླབས་ཀྱི་ཕྲེང་བ་དག ། དུས་སུ་འབྱུང་བ་འཁོར་བའི་གཤིས། །བདེ་སྡུག་ལས་ཀྱི་སྣང་བ་ནི། རྒྱུ་དང་རྐྱེན་ལ་རབ་ཏུ་བརྟེན། ། རྒྱུ་དང་རྐྱེན་ནི་སྐྱེ་བོ་ཡིས། །འབད་པ་ཉིད་ལས་གཞན་དུ་མེད། །རང་ལྟོ་འགྲངས་བའི་བགྱི་བ་ཙམ། ། མི་ཚེའི་སྙིང་བོར་འཛིན་པ་དག །དེ་ཙམ་ཕྱུག་ཀྱིས་ཀྱང་ནུས་ན། །དེ་གཉིས་ཁྱད་པར་གང་གིས་འབྱེད། ། དེ་ཕྱིར་གངས་ཅན་འཛིན་མའི་སྣོད་ཡངས་པོར། །ཆོས་འབྱོར་ཕུན་ཚོགས་ནོར་བུའི་ཕུང་པོ་ཡིས། ། མངོན་པར་ཕྱུག་པའི་ཐབས་ནི་གང་ཡིན་ཞེས། །ཡང་དང་ཡང་དུ་དོན་འདི་སེམས་པར་རིགས། ། རང་གཤིས་བདུད་རྩིའི་རྫིང་བུ་ནི། །སྣོན་མེད་ངང་གིས་འགྲིབ་པ་ལ། །བླུན་པོས་ཅི་མི་སེམས་ན་ཡང་། ། བློ་ལྡན་བློ་ནི་འཇིགས་པའི་གནས། །ཆོས་སྲིད་དཔྱིད་ཀྱི་དཔལ་མོ་ནི། །འདི་ཕྱིར་བདེ་བའི་རྒྱུ་གཅིག་ལགས། །བདེ་འདོད་སྡུག་བསྔལ་མི་འདོད་ཕྱིན། བརྩོན་པའི་རྒྱུ་བ་ཅིའི་ཕྱིར་ཕྲ། །དེ་ལྟར་ལྷག་བསམ་སྤྲིན་གྱི་ཕྲེང་བ་ལས། །སྙིང་གི་གྲོས་འདེབས་དབྱར་སྐྱེས་རྔ་གསང་འདིས། །བློ་ལྡན་གངས་ཅན་སྐྱེ་བོ་མདོངས་མཐའི་ཚོགས། །ཡིད་ལ་སྤོབས་པའི་མངལ་གྱིས་ལྕི་གྱུར་ཅིག །ཅེས་པ་འདི་ནི་ཉེ་ཆར་ཀྲུང་དབྱང་མི་རིགས་སློབ་གྲྭ་ཆེན་མོའི་བོད་རིག་པའི་སྡེ་ཁག་གིས་བོད་མི་རིགས་ཀྱི་མ་འོངས་པའི་མདུན་ལམ་གྱི་ཆེད་དུ་བོད་ཀྱི་མཁས་པ་ཆེན་པོ་བཅུས་དུས་རབས་ཉེར་གཅིག་པར་བསྐུལ་བའི་སྙིང་གཏམ་ཞེས་པའི་དེབ་གཅིག་བསྒྲིག་རྒྱུ་ཡིན་པས་མ་འོངས་པར་བོད་ཀྱི་བསམ་སྤྱོད་དག་ཇི་འདྲ་བྱ་དགོས་ཚུལ་གྱི་ཡི་གེ་ཞིག་བྲིས་ཤིག་ཅེས་པའི་བཀའ་གསུང་གསེར་གྱི་ཅོད་པན་སྤྱི་བོར་སོན་པ་ན། རྨ་བྱས་དབྱར་རྔ་ཐོས་པ་ལྟ་བུའི་དགའ་བ་བྱུང་སྟེ། གང་གི་ཕྱིར། མི་རིགས་སྤྱིའི་མདུན་ལམ་བཟང་པོའི་ཆེད་དུ་བསྒྲུབས་པའི་བྱ་བ་ནི་ཆེ་ཕྲ་གང་ཡིན་ཡང་རུང་སྟེ་ཤིན་ཏུ་ཡང་རླབས་ཆེ་བ་དང་། གཟི་བརྗིད་དང་ལྡན་པའི་རང་བཞིན་ཅན་དུ་གནས་པའི་ཕྱིར་རོ། །དེ་ལྟ་བས་ན་དཔེ་ཁྲིད་སོགས་བགྱི་བ་མང་པོས་བྲེལ་བ་ཆེ་ཡང་འཕྲལ་དུ་དོན་ཡིད་ལ་གང་ཤར་རྣམས་ཟློས་སྐྱོན་གྲོང་ཚིག་སོགས་ལ་མ་འཛེམ་ཞིང་ཚིག་སྦྱོར་རྣམས་ཆེད་དུ་དེང་རབས་དང་མཐུན་པར་བྱས་ཏེ་གསེར་ལྗོངས་བླ་མ་རུང་ལྔ་རིག་ནང་བསྟན་སློབ་གླིང་དུ་ཨོ་རྒྱན་སངས་རྒྱས་གཉིས་པའི་བཀའ་འབངས་ཙམ་དུ་གཏོགས་པ་འཇིགས་མེད་ཕུན་ཚོགས་སུ་འབོད་པས་རབ་རྒྱན་ཤིང་ཕག་ཆོ་འཕྲུལ་ཟླ་བའི་ཚེས་གསུམ་སྟེ་རང་ཉིད་མི་ཡུལ་དུ་འོངས་ནས་ལོ་འཁོར་དྲུག་ཅུ་རྩ་གཉིས་ལོན་པའི་ཉིན་རྫོགས་པར་བྲིས་པ་འདི་ཡང་གངས་ཅན་ཆོས་སྲིད་ཀྱི་དཔལ་ཡོན་མི་ཟད་པ་དར་ཞིང་རྒྱས་པའི་རྒྱུར་གྱུར་ཅིག །  དགེའོ།། །།    མཇུག་ལེགས་པར་རྫོགས་སོ། །   འདི་ཉིད་དཔལ་དགྱེས་པ་རྡོ་རྗེས་མཁོ་འདོན་གནང་བར་སླར་ཡང་བཀའ་དྲིན་ཆེ་ཞུ་ཞུ། །   འགྲོ་དོན་འཕེལ། །
·གསར་འགྱུར་གོང་མ:ལྷ་སའི་ནང་མ་སྤྲོ་སྐྱིད་ཁང༌།
·གསར་འགྱུར་འོག་མ:རྒྱལ་ཡོངས་བོད་གཞས་འགྲན་བསྡུར་ཐོག་མ་དེ་མཇུག་བསྒྲིལ་བ།
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
མིག་སྔར་གསར་མི་འདུག
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 0:50:36 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 2:15:33 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 3:46:50 [来自: 112.5.248.229]

འབྲེལ་ཡོད་དཔྱད་བརྗོད 56 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།42.97MS