ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> གཏེར་གྱི་བུམ་བཟང་། >> རིས་མེད
  གསར་འགྱུར་ཀློག་པ།

སྔ་འགྱུར་བསྟན་པ་རྒྱས་པའི་སྨོན་ལམ།

[རྩོམ་པ་པོ:འཇུ་མི་ཕམ།  ཡོང་ཁུངས:ངེད་དྲ་བ།  དུས་ཚོད:2011/5/29 8:37:51  བཀླགས་ཐེངས:1962][ཡིག་གཟུགས:ཡིག་གཟུགས་མདོག]
སྔ་འགྱུར་བསྟན་པ་རྒྱས་པའི་སྨོན་ལམ་ཆོས་རྒྱལ་དགྱེས་པའི་
ཞལ་ལུང་ཞེས་བྱ་བ་
བཞུགས་སོ༎
 
 
    དེ་ཡང་དུས་ཀྱི་ཐ་མར་རྩ་གསུམ་ལྷ་ཡི་ཐུགས་རྒྱུད་བསྐུལ་ནས་བསྟན་པའི་སྙིང་པོ་རིན་པོ་ཆེ་རྒྱས་པར་གྱུར་ཅིག་སྙམ་དུ་ལན་གཅིག་ཙམ་མོས་པ་ཡང་བསོད་ནམས་ཚད་མེད་པ་དང་ལྡན་ཞིང་རྒྱལ་བའི་སྲས་ཀྱི་སྨོན་ལམ་ཡོངས་སུ་རྫོགས་ནས་སྐྱེ་བ་ཀུན་ཏུ་རྒྱལ་བའི་ཆོས་དང་ཆོས་ཀྱི་སྙིང་པོ་ཟབ་མོའི་ཐེག་པ་དང་འཕྲད་ནས་འཛིན་སྐྱོང་སྤེལ་བས་མྱུར་དུ་རྣམ་པ་ཐམས་ཅད་མཁྱེན་པའི་ཡེ་ ཤེས་ལ་རེག་པར་འགྱུར་བའི་དགོས་པ་ཡོད་པས། སྐལ་བཟང་རྣམ་གྱིས་དུས་དུས་དང་། ཁྱད་པར་ཚོགས་མང་གི་སྐབས་སུ་སྨོན་ལམ་འདི་ལྟར་གདབ་པར་བྱ་སྟེ།
    ན་མོ། ཕྱོགས་བཅུའི་བདེ་བར་གཤེགས་པ་སྲས་དང་བཅས༎ཁྱད་པར་མཉམ་མེད་ཤཱཀྱའི་རྒྱལ་པོ་དང་༎རྒྱལ་སྲས་བརྒྱད་དང་གནས་བསྟན་འཕགས་པའི་ཚོགས༎མཁྱེན་བརྩེའི་བདག་ཉིད་མཆོག་རྣམས་དགོངས་སུ་གསོལ༎ཕན་བདེའི་འབྱུང་གནས་བསྟན་པ་རིན་པོ་ཆེ༎སྟོན་དང་སེམས་དཔའ་འཕགས་པ་མཆོག་རྣམས་ཀྱིས༎ཡང་ཡང་དཀའ་བས་བཙལ་ཞིང་བརྣགས་པའི་དོན༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །མཁན་སློབ་ཆོས་རྒྱལ་སྤྲུལ་པའི་ལོ་པཎ་དང་༎བཀའ་གཏེར་རིག་འཛིན་བརྒྱུད་པ་ཡི་དམ་ལྷ༎མ་མགོན་གཟའ་རྡོར་བརྒྱུད་གསུམ་དྲེགས་པའི་ཚོགས༎སྔ་འགྱུར་རྩ་གསུམ་ལྷ་ཚོགས་དགོངས་སུ་གསོལ༎ཐུབ་བསྟན་མདོ་དང་སྔགས་ཀྱི་ཚུལ་མཐའ་དག །གངས་ཅནལྗོངས་སུ་བརྩེ་བས་དྲངས་གྱུར་པ༎ཆེས་ཆེར་སྤེལ་བའི་རྡོ་རྗེའི་དམ་དགོངས་ནས༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཕྱོགས་དུས་རྒྱལ་བའི་སྐུ་གསུང་ཐུགས་རྡོ་རྗེ༎རིགས་གསུམ་སེམས་དཔའི་སྒྱུ་འཕྲུལ་རོལ་མོ་ཡིས༎གངས་ཅན་ཕན་བདེའི་ཉི་མ་གསལ་བར་མཛད༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྒྱལ་དང་རྒྱལ་སྲས་འཕགས་པ་ཆེན་པོའི་ཚོགས༎བསམ་བཞིན་སྤྲུལ་བའི་ཟློས་གར་ཉེར་བཟུང་ནས༎དྲི་མེད་རྒྱལ་བསྟན་ནོར་བུའི་རྒྱལ་མཚན་བསྒྲེངས༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཐུན་མོང་ཐུན་མིན་གཞུང་ཀུན་རང་དབང་གིས༎མ་ནོར་བསྒྱུར་ཞུས་གཏན་ལ་ཕབ་པ་ཡིས༎བཀའ་དང་དགོངས་པ་འགྲེལ་བའི་གཞུང་ཀུན་རྫོགས༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །བདེན་གསུང་བཀའ་ཡི་རྒྱ་མཚོ་ཆེན་པོ་ལ༎ཟབ་མོའི་ཆོས་གཏེར་ནོར་བུས་མངོན་པར་མཛེས༎མདོ་དང་སྔགས་ཀྱི་ལམ་བཟང་ཟུང་དུ་འབྲེལ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྨད་བྱུང་ཟ་ཧོར་མཁན་པོའི་སྤྱོད་པ་དང་༎མཚུངས་མེད་དཔལ་ལྡན་ཀླུ་ཡི་ལྟ་བ་གཉིས༎ཟུང་འབྲེལ་བརྒྱུད་པའི་བཀའ་སྲོལ་ཕྱག་རྒྱས་བཏབ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཟབ་མོའི་ནང་རྒྱུད་སྡེ་གསུམ་དགོངས་པའི་བཅུད༎ཐུན་མིན་མན་ངག་གསང་བའི་ལམ་མཆོག་ནས༎འཇའ་ལུས་ཆོས་སྐུར་གཤེགས་པའི་ངོ་མཚར་འབར༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རབ་འབྱམས་ཞི་ཁྲོའི་ཁྱབ་བདག་སྒྲུབ་སྡེ་བརྒྱད༎བཀའ་བབ་རིག་འཛིན་སོ་སོའི་དགོངས་བཅུད་དང་༎ཀུན་འདུས་པདྨའི་བཀའ་སྲོལ་གཅིག་ཏུ་འཁྱིལ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྒྱུ་དང་འབྲས་སུ་གསང་སྔགས་ཐེག་པ་ཆེ༎ཚང་ལ་མ་ནོར་རིག་འཛིན་བརྒྱུད་པའི་ལུང་༎ཌཱ་ཀིའི་ཞལ་གྱི་དྲོད་རླངས་ཐོལ་ལེ་བ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྡོ་རྗེ་འཆང་གི་དགོངས་དོན་བདུད་རྩིའི་བཅུད༎མཁས་གྲུབ་བྱེ་བའི་ཞལ་ནས་སྙན་དུ་བརྒྱུད༎རྟོག་གེ་ངན་པའི་རང་བཟོས་མ་བསླད་པ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །གསེར་གཞོང་ནོར་བུས་སྤྲས་པའི་ཡོན་གྱིས་ཀྱང་༎མི་འགུགས་དབྱིངས་ཀྱི་མཁའ་འགྲོའི་ཐུགས་མཛོད་ཆོས༎བརྩེ་བས་རྗེས་འཇུག་སྐལ་བ་ཁོ་ནར་བཀྲམ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ངོ་བོ་ཀ་ནས་དག་པའིི་ཡེ་ཤེས་ལ༎རང་བཞིན་ལྷུན་གྱིས་གྲུབ་པའི་གདངས་ཤར་བས༎བླུན་སྒོམ་སེམས་ལས་འདས་པའི་རྫོགས་པ་ཆེ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཡོད་མེད་ཕྱོགས་རེར་ཞེན་པའི་དམིགས་གཏད་ཞིག༎མཐར་འཛིན་ལྟ་བའི་འཛིན་སྟངས་དྲུང་ནས་ཕྱུངས༎གཞི་ལམ་འབྲས་བུ་སྣང་སྟོང་ཟུང་དུ་འཇུག །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །དུས་གསུམ་རྒྱལ་བའི་དགོངས་པ་མཐར་ཐུག་དོན༎ཟབ་ཞི་སྤྲོས་བྲལ་འོད་གསལ་འདུས་མ་བྱས༎རིག་སྟོང་མི་ཤིག་རྡོ་རྗེ་གྲུབ་པའི་མཐའ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །མང་དུ་ཐོས་པ་ལུང་གི་སྤྲིན་འཁྲིགས་ཤིང་༎ཕ་རོལ་རྒོལ་འཇོམས་རིག་པའི་གློག་ཕྲེང་འབར༎མན་ངག་གནད་ཀྱི་བདུད་རྩི་སྙིང་ལ་སིམ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྨད་བྱུང་ཨ་ཏི་ཡོ་གའི་གསང་ལམ་ནས༎མ་ལུས་རྒྱལ་བ་ཀུན་གྱི་ཡེ་ཤེས་སྐུ༎ཁྱབ་བདག་འཇམ་དཔལ་རྡོ་རྗེར་རབ་བསྒྲུབ་པ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཡང་དག་ཚད་མ་གསུམ་གྱི་ང་རོ་ཡིས༎ལྟ་དམན་རི་དྭགས་ཚོགས་རྣམས་སྐྲག་མཛད་པ༎ཐེག་མཆོག་སེངྒེའི་སྒྲ་དབྱངས་ས་གསུམ་ཁྱབ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྒྱལ་བསྟན་ཡོངས་སུ་རྫོགས་པའི་གོས་བཟང་རྩེར༎འོད་གསལ་རྡོ་རྗེ་སྙིང་པོའི་ཏོག་མཛེས་པ༎ཕྱོགས་ལས་རྣམ་པར་རྒྱལ་བའི་རྒྱལ་མཚན་མཐོ༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །བདག་སོགས་དེང་ནས་འགྲོ་བ་ཇི་སྲིད་དུ༎བསྟན་དང་བསྟན་པའི་སྙིང་པོ་ཡོངས་རྫོགས་པ༎མཁའ་ཁྱབ་ཞིང་དུ་འཛིན་སྐྱོང་སྤེལ་བ་ཡིས༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །མདོར་ན་མཁས་བཙུན་གྲུབ་པའི་རྣམ་ཐར་གྱིས༎རྒྱལ་བསྟན་སྤེལ་བའི་ཕྲིན་ལས་མཁའ་ཁྱབ་པའི༎བསྟན་འཛིན་དམ་པས་ས་སྟེང་ཡོངས་གང་ནས༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །དཔལ་ལྡན་བླ་མའི་སྐུ་ཚེ་རབ་བརྟན་ཅིང་༎བསྟན་པའི་སྦྱིན་བདག་མངའ་ཐང་དར་བ་ཡིས༎ཆོས་སྲིད་མི་ནུབ་ནོར་བུའི་རྒྱལ་མཚན་བསྒྲེངས༎མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །
    ཅེས་རྒྱལ་བ་ཐམས་ཅད་ཀྱི་ངོ་བོ་དཔལ་ལྡན་སངས་རྒྱས་པདྨ་སྐྱེས་འཆི་མེད་མཚོར་འཁྲུངས་རྒྱལ་བའི་བསྟན་པ་སྔ་འགྱུར་རྙིང་མ་ཞེས་གྲགས་པ་འདི་ནི་རྒྱལ་བསྟན་ཡོངས་སུ་རྫོགས་པའི་ཕྱི་མོ་ཡིན་ཅིང་ཟབ་གནད་ཆེ་བ་དུ་མའི་ཁྱད་ཆོས་དང་། ལྟ་སྒོམ་རྣམ་པར་དག་རྒྱལ་བ་དགྱེས་པའི་ལམ་བཟང་མཆོག་ཡིན་པ་འདི་ངོ་ཤེས་ནས། ནོར་བུ་རིན་པོ་ཆེ་བྱི་དོར་བྱས་ནས་རྒྱལ་མཚན་གྱི་རྩེ་མོར་མཆོད་པ་བཞིན་དུ་གང་ཟག་སྐལ་བ་དང་ལྡན་པ་རྣམས་ཀྱི་འཆད་རྩོད་རྩོམ་གསུམ་གྱི་ཕྲིན་ལས་རླབས་པོ་ཆེ་ཕྱོགས་ཐམས་ཅད་དུ་དར་ཞིང་རྒྱས་པར་མཛད་པའི་ཐུགས་ཁུར་བཞེས་པ་དང་། དེ་ལྟ་བུའི་བཞེད་པ་ཡིད་བཞིན་འགྲུབ་པའི་རྟེན་འབྲེལ་སྨོན་ཚིག་ཏུ་རྙིང་བསྟན་ལ་ལྷག་བསམ་དཀར་བ་མི་ཕམ་འཇམ་དབྱངས་རྣམ་རྒྱལ་རྒྱ་མཚོས་གནས་དུས་རྟེན་འབྲེལ་དགེ་བར་གུང་ཐུན་ལ་ཤར་མར་བྲིས་པ་དགེ་ལེགས་འཕེལ༎
 
བསྟན་རྒྱས་སྨོན་ལམ་གྱི་ངོ་སྤྲོད་མདོར་བསྡུས།
    སྔ་འགྱུར་བསྟན་པ་རྒྱས་པའི་སྨོན་ལམ་འདི་མཛད་པ་པོ་ནི་འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོ་ཡིན། བོད་བརྒྱུད་ནང་བསྟན་གྱི་ཆོས་རྒྱུད་སྤྱི་དང་བྱེ་བྲག་སོ་སོར་རང་རང་གི་བསྟན་པ་རྒྱས་པའི་སྨོན་ལམ་ཡོད་པ་བཞིན་རྙིང་མ་བ་ལ་བསྟན་རྒྱས་སྨོན་ལམ་རྒྱས་བསྡུས་མང་པོ་ཞིག་ཡོད་པའི་ནང་ནས་འཇུ་མི་ཕམ་རིན་པོ་ཆེས་མཛད་པ་འདི་ནི་ཚིག་དོན་གང་ཐད་ནས་གཟེངས་སུ་ཐོན་པ་ཞིག་ཏུ་གྱུར་ཡོད། དེ་ཡང་བསྟན་རྒྱས་སྨོན་ལམ་འདི་ནི་རྒྱས་བསྡུས་འཚམས་པ་དང་། ལྷག་པར་ཡང་གསང་སྔགས་སྔ་འགྱུར་བའི་ལྟ་སྒོམ་སྤྱོད་གསུམ་གསལ་ཞིང་གནད་འདུས་པར་གཏན་ལ་ཕབ་ཡོད་པས་དོན་དུ་གཞུང་ཆེན་པོ་ཞིག་ཏུ་གྱུར་ཡོད་སྟབས་འདི་ལ་མངའ་རིས་པ་མཁན་པོ་ཚེ་དབང་རིག་འཛིན་མཆོག་གིས་༼སྔ་འགྱུར་བསྟན་པ་རྒྱས་པའི་སྨོན་ལམ་གྱི་འགྲེལ་པ་དྲང་སྲོང་རིག་འཛིན་བརྒྱུད་པའི་ཞལ་ལུང་༽ཞེས་པ་ཞིག་ཀྱང་མཛད་འདུག སྙན་ངག་གི་ཁྱད་ཆོས་ཉམས་འདོན་སྟངས་དང་སྡེབ་སྦྱོར་གྱི་ཁྱད་ཆོས་སྒྲ་ལྕི་ཡང་སྦྱོར་སྟངས་ལས་ངག་ལ་འདོན་བདེ་ཞིང་འདོན་པའི་གདངས་ལས་སེམས་ལ་ཉམས་འགྱུར་གྱི་ཚོར་བ་སྦྱིན་ནུས་པ་ཞིག་ཏུ་གྱུར་ཡོད། བསྟན་རྒྱས་སྨོན་ལམ་འདི་སྔ་འགྱུར་བའི་དགོན་སྡེ་མང་པོ་དང་ལྷག་པར་ཡང་རིས་སུ་མ་ཆད་པའི་སྔ་འགྱུར་བའི་ཆོས་ཚོགས་ཆེན་པོ་རྣམས་ཀྱི་སྐབས་སུ་བཞི་ཆོད་ཀྱི་འདོན་རྟ་སྙན་པོ་དང་སྦྲགས་ནས་གསུང་སྲོལ་དར་ཡོད། དེ་བཞིན་དུ་ཚིག་སྙན་དོན་ཟབ་ཀྱི་བསྟན་རྒྱས་སྨོན་ལམ་འདིའི་ཤོ་ལོ་ཀ་རེ་རེ་བཞིན་འཕྱར་དར་དང་ཤིང་བྱང་སོགས་སུ་བྲིས་ནས་བཤམས་སྟོན་བྱེད་སྲོལ་ཡོད་པ་དེས་ཀྱང་སྐྱེ་བོ་མང་པོའི་སེམས་ལ་དད་པ་དང་དང་བ་ཆེན་པོ་སྟེར་བཞིན་ཡོད་པ་རེད།
 
བསྟན་རྒྱས་སྨོན་ལམ་འདི་མཛད་པ་པོའི་ངོ་སྤྲོད་མདོར་བསྡུས།
    དེ་ཡང་འཇུ་མི་ཕམ་པ་ནི་བོད་ཤར་ཕྱོགས་སྡེ་དགེ་རྒྱལ་ཕྲན་གྱི་མངའ་ཁོངས་རྫ་ཆུ་ཁར་སྡེ་དགེ་རྒྱལ་པོའི་བློན་རིགས་སུ་གཏོགས་པའི་ཁྱིམ་ཚང་ཞིག་ཏུ་ཕྱི་ལོ་༡༨༤༦ལོར་འཁྲུངས། དགུང་ན་ཧ་ཅང་གཞོན་པའི་དུས་ནས་མཁྱེན་རབ་ཚད་མེད་པ་མངའ་ཞིང་སློབ་གཉེར་ལ་དཀའ་ཚེགས་ཆེར་མི་དགོས་པར་མཁྱེན་པ་སོགས་ངོ་མཚར་གྱི་རྣམ་པར་ཐར་བ་བསམ་གྱིས་མི་ཁྱབ་པ་མངའ། ཁོང་གི་བླ་མ་གཙོ་བོའི་གྲས་ནི་འཇམ་དབྱངས་མཁྱེན་བརྩེ་དབང་པོ། རྫ་དཔལ་སྤྲུལ། འཇམ་མགོན་ཀོང་སྤྲུལ་བློ་གྲོས་མཐའ་ཡས། རྫོགས་ཆེན་མཁན་པོ་པདྨ་བཛྲ། ལབ་སྐྱབས་མགོན་དབང་ཆེན་དགྱེས་རབ་རྡོ་རྗེ་སོགས་ལ་བརྟེན།
ཕྱི་ལོ་༡༩༡༢ལོར་སྐུ་གཤེགས། ཁོང་གི་སློབ་མ་གཙོ་བོའི་གྲས་ནི་ཞེ་ཆེན་རྒྱལ་ཚབ། གླག་བླ་བསོད་ནམས་ཆོས་འགྲུབ། མཁན་པོ་ཀུན་དཔལ། རྡོ་གྲུབ་ཆེན་སྐུ་ཕྲེང་གསུམ་པ་བསྟན་པའི་ཉི་མ། གཏེར་སྟོན་བསོད་རྒྱལ། ཀ་ཐོག་སི་ཏུ། ཨ་འཛོམ་འབྲུག་པ་རིན་པོ་ཆེ། ༼༡༨༤༢ནས་༡༩༢༤༽སོགས་བྱོན།
འཇུ་མི་ཕམ་པས་བོད་བརྒྱུད་ནང་བསྟན་སྔ་འགྱུར་རྙིང་མའི་ལྟ་གྲུབ་གཞུང་ལུགས་འཆད་སྤེལ་ཡར་རྒྱས་དང་། གཞུང་ལུགས་འགྲེལ་སྟངས་གསར་བཏོད། ཉམ་ཆགས་སུ་སོང་ཟིན་པ་ཁ་སྐོང་བ། སྔོན་བྱོན་རྙིང་མའི་མཁས་པ་དག་གི་ལྟ་སྒོམ་བཞེད་སྲོལ་གྱི་གནད་ཕྱོགས་བསྡོམས་དང་། གསལ་ཁ་བཏོད་པ། དགག་སྒྲུབ་ཀྱི་རྣོ་སོ་འདོན་པ་སོགས་ཀྱི་ཐད་ལ་གཞུང་དང་གཞུང་འགྲེལ་མང་པོ་མཛད། དེ་ནས་བཟུང་འཇུ་མི་ཕམ་པའི་གཞུང་དང་གཞུང་འགྲེལ་རྣམས་སྔ་འགྱུར་རྙིང་མའི་གདན་ས་ཕལ་མོ་ཆེའི་རིང་ལུགས་ཀྱི་ཡིག་ཆར་བཟུང་ནས་སློབ་གཉེར་བྱེད་སྲོལ་བྱུང་།
    འཇུ་མི་ཕམ་པས་ནང་ཆོས་ཀྱི་གཞུང་ལུགས་ཁོ་ན་མ་ཡིན་པའི་སྨན་དང་། རྩིས། བཟོ། ཇུ་ཐིག་སོགས་ཀྱི་གཞུང་མང་པོ་མཛད་ནས་བོད་ཀྱི་རིག་གནས་འཛིན་སྐྱོང་སྤེལ་གསུམ་ལ་བྱས་རྗེས་ཆེན་པོ་བཞག་ཡོད།
འཇུ་མི་ཕམ་པའི་ཡིག་ཆ་སྐོར་ལ་དགེ་ལྡན་པའི་མཁས་པ་བྲག་དཀར་བློ་བཟང་དཔལ་ལྡན་དང་། ཏཱ་ལའི་བླ་མ་སྐུ་ཕྲེང་བཅུ་གསུམ་པའི་ཡོངས་འཛིན་མཛད་མྱོང་བ་དཔལ་རིས་རབ་གསལ། རྡོ་གྲུབ་མཁན་པོ་དམ་ཆོས་སོགས་ཀྱིས་བགྲོ་གླེང་དང་དང་དགག་བཞག་གི་ཡིག་ཆ་མཛད་པ་དེ་ནང་བསྟན་གྱི་ལྟ་གྲུབ་ལ་གསལ་ཁ་འདོན་པའི་ལས་འགུལ་ཞིག་ཏུ་གྱུར་ཡོད། མདོར་ན་འཇུ་མི་ཕམ་པ་ནས་བོད་བརྒྱུད་ནང་བསྟན་གསང་སྔགས་སྔ་འགྱུར་བའི་གཞུང་ལུགས་འགྲེལ་སྟངས་དང་ལྟ་གྲུབ་གཏན་ལ་འབེབས་སྟངས་ཀྱི་ཁ་ཕྱོགས་གསར་པ་ཞིག་ཏུ་བསྒྱུར་ཡོད་ལ་འཕེལ་རིམ་གསར་པ་ཞིག་གི་མགོ་ཡང་ཚུགས་ཡོད་ཅེས་བརྗོད་ཆོག
·གསར་འགྱུར་གོང་མ:ལམ་བུའི་རྩོམ་བསྡུའི་བརྡ་ཐོ།
·གསར་འགྱུར་འོག་མ:པོད་ཁུག་ཚཊ་པར༼མི་རབས་གསུམ་པ༽།
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
·གསོལ་བ་སྨོན་ལམ་རེ་བཏབ་ན། 2012/1/4 9:20:24
·འདི་ཕྱི་བར་དོ་གསུམ་གྱི་སྨོན་ལམ་ཀུན་འདུས་བཞུགས། ། 2010/4/29 8:33:50
·སྐུ་གསུམ་ཞིང་ཁམས་སྦྱོང་བའི་གསོལ་འདེབས་སྨོན་ལམ། 2010/4/27 8:31:39
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 21:39:17 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/24 3:14:47 [来自: 112.5.248.152]

 评论者:a6TVn6te
https://www.bj-arts.com/index/cate/cid/8.html
https://www.bj-arts.com/index/cate/cid/9.html
https://www.bj-arts.com/article/index.html
https://www.bj-arts.com/index/cate/cid/10.html
https://www.bj-arts.com/index/cate/cid/11.html
发表时间:2018/11/15 13:58:20 [来自: 112.5.248.229]

འབྲེལ་ཡོད་དཔྱད་བརྗོད 41 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།21.00MS